Na anciano chíndeétáʼanna xíʼinyó ña̱ va̱ʼa kusi̱í-iniyó

1. ¿Ndáaña ni̱ka̱ʼa̱nna xa̱ʼa̱ na̱ xi̱ndasakáʼnu Ndióxi̱ na̱ xi̱ndoo chí Corinto ta ña̱yóʼo sa̱kúsi̱íníña-ini ta̱ Pablo?

TÁ KU̱I̱YA̱ 55 tiempo vitin. Ta̱ apóstol Pablo íyora chí ñuu Troas, soo ndákaniníxi̱níra xa̱ʼa̱ na̱ ndásakáʼnu Ndióxi̱ na̱ ndóo chí ñuu Corinto. Xa̱a̱ íyo loʼo tiempo xi̱niso̱ʼora ña̱ íyo ku̱a̱chi xíʼin na̱kán ta xa̱ʼa̱ ña̱yóʼo ndíʼi-inira. Ña̱kán, nda̱a̱ táki̱ʼva kéʼé iin ta̱ íyo se̱ʼe ña̱ ndíʼi-inira xa̱ʼa̱ na̱yóʼo, ka̱ʼyíra iin carta ña̱ va̱ʼa taxira consejo ndaʼa̱na (1 Cor. 1:11; 4:15). Ta saátu ni̱ka̱ʼa̱nra xíʼin ta̱ Tito ta̱ xi̱kuu migora ña̱ ná ku̱ʼu̱nra kotorana ta tándi̱ʼi ndakutáʼanra xíʼinra chí Troas ña̱ va̱ʼa kunda̱a̱-inira ndáa ki̱ʼva kéʼé na̱ ndoo chí Corinto. Vitin ta̱ Pablo xa̱a̱ ndátura kixaa̱ ta̱ Tito chi xa̱a̱ kúni̱níra ka̱ʼa̱nra xíʼinra. Soo nda̱kavaníva-inira, ta̱ Tito va̱ása níkixa̱a̱ra. ¿Ndáaña keʼé ta̱ Pablo vitin? Nda̱ara iin barco ta ku̱a̱ʼa̱nra chí Macedonia. Kán ni̱kusi̱íní-inira chi nda̱kutáʼanra xíʼin ta̱ Tito, ta íyo iin ña̱ va̱ʼaní natúʼunra xíʼinra: na̱ hermano na̱ xi̱ndoo chí Corinto ka̱ndíxavana consejo ña̱ ni̱ka̱ʼa̱n ta̱ Pablo ta kúni̱nína ndikóna kuninara. Tá ku̱nda̱a̱-ini ta̱ Pablo xa̱ʼa̱ ña̱yóʼo ku̱si̱íníka-inira (2 Cor. 2:12, 13; 7:5-9).

2. a)¿Ndáaña ni̱ka̱ʼa̱n ta̱ Pablo xíʼin na̱ ñuu Corinto xa̱ʼa̱ ña̱ kándíxayó Ndióxi̱ ta saátu ña̱ si̱í kooyó? b)¿Ndáaña ndakuiinyó?

² Tá ni̱ya̱ʼa loʼo, ta̱ Pablo ka̱ʼyíra carta ña̱ u̱vi̱ ña̱ ku̱a̱ʼa̱n ndaʼa̱ na̱ ñuu Corinto, ta nu̱ú ña̱yóʼo káchiña: “Ña̱ káʼi̱n xíʼinndó yóʼo va̱ása kúni̱ kachiña ña̱ ndi̱ʼi̱ kúú na̱ ndísochíñu xíʼin ña̱ kándíxandó Ndióxi̱, saáchi miívandó kúú na̱ kándíxa Ndióxi̱ ña̱kán kúú ña̱ ndakúní íyo inindó” (2 Cor. 1:24). ¿Ndáaña xi̱kuni̱ kachira? ¿Ndáaña kivi sakúaʼa na̱ anciano na̱ íyo tiempo vitin xíʼin tu̱ʼun ña̱ ni̱ka̱ʼa̱nra?

ÑA̱ KÁNDÍXAYÓ NDIÓXI̱ TA SAÁTU ÑA̱ KÚSI̱Í-INIYÓ

3. a)¿Nda̱chun ni̱ka̱ʼa̱n ta̱ Pablo: “Saáchi miívandó kúú na̱ kándíxa Ndióxi̱ ña̱kán kúú ña̱ ndakúní íyo inindó”? b)¿Ndáa ki̱ʼva kundiku̱n na̱ kúúmií iin chiñu ti̱xin ñuu Ndióxi̱ ña̱yóʼo?

³ Ta̱ apóstol Pablo ni̱ka̱ʼa̱nra xa̱ʼa̱ u̱vi̱ ña̱ ndáyáʼviní ña̱ kéʼé na̱ ndásakáʼnu Ndióxi̱. Ña̱yóʼo kúú: ña̱ kándíxana Ndióxi̱ saátu ña̱ kúsi̱í-inina. Xa̱ʼa̱ ña̱ kándíxayó Ndióxi̱ ka̱chira: “Va̱ása kúni̱ kachiña ña̱ ndi̱ʼi̱ kúú na̱ ndísochíñu xíʼin ña̱ kándíxandó Ndióxi̱, saáchi miívandó kúú na̱ kándíxa Ndióxi̱ ña̱kán kúú ña̱ ndakúní íyo inindó”. Ta̱ Pablo nda̱kunira ña̱ su̱ví miíra ni su̱ví inka na̱ yiví kúú na̱ níchindeétáʼan xíʼinna ña̱ ndakú koo inina xíʼin Ndióxi̱, chi ke̱ʼéna ña̱yóʼo xa̱ʼa̱ ña̱ kándíxana Ndióxi̱. Xi̱ndakanixi̱níra ña̱ su̱ví miíra kúú ta̱ xíniñúʼu kiʼin kuenta xíʼin ña̱ kándíxa inkana Ndióxi̱, ta ni va̱ása níxikuni̱ra keʼéra ña̱yóʼo, saáchi xi̱kandíxara ña̱ keʼévana ña̱ va̱ʼa (2 Cor. 2:3). Na̱ kúúmií chiñu ti̱xin ñuu Ndióxi̱ tiempo vitin kéʼéna nda̱a̱ táki̱ʼva ke̱ʼé ta̱ Pablo, saáchi va̱ása xíka-inina xa̱ʼa̱ na̱ ñúʼu ti̱xin congregación xa̱ʼa̱ ña̱ kándíxana Ndióxi̱, ta saátu ña̱ kéʼéna ña̱ va̱ʼa káchíñuna nu̱úra (2 Tes. 3:4). Nu̱úka ña̱ ka̱ʼa̱nna xa̱ʼa̱ iin tá iin ña̱ xíniñúʼu keʼé na̱ ñúʼu ti̱xin congregación ndíku̱nna ña̱ káʼa̱n tu̱ʼun Ndióxi̱ ta saátu ña̱ káʼa̱n na̱ ñuu Jehová, saáchi su̱ví na̱yóʼo kúú na̱ ndísochíñu xíʼin ña̱ kándíxa inkana Ndióxi̱ (1 Ped. 5:​2, 3).

4. a)¿Ndáaña xi̱kuni̱ kachi ta̱ Pablo tá ka̱ʼyíra: “Na̱ chíndeétáʼan kuití xíʼinvandó kúúndi̱ ña̱ va̱ʼa si̱í koondó”? b) Na̱ kúúmií iin chiñu ti̱xin ñuu Ndióxi̱, ¿ndáa ki̱ʼva ndíku̱nna yichi̱ ta̱ Pablo?

⁴ Ta̱ Pablo ka̱chira: “Na̱ chíndeétáʼan kuití xíʼinvandó kúúndi̱ ña̱ va̱ʼa si̱í koondó”. Xíʼin tu̱ʼun yóʼo, ni̱ka̱ʼa̱nra xa̱ʼa̱ miíra ta saátu na̱ xi̱kitáʼan xíʼinra. ¿Nda̱chun va̱ʼa kúnda̱a̱-iniyó xa̱ʼa̱ ña̱yóʼo? Saáchi nu̱ú carta yóʼo ni̱ka̱ʼa̱nra xa̱ʼa̱ u̱vi̱ na̱yóʼo. Ta̱yóʼo ka̱ʼyíra: “Ta̱ Silvano, ta̱ Timoteo xíʼin yi̱ʼi̱, na̱túʼunndi̱ xíʼinndó xa̱ʼa̱ ta̱ Jesucristo” (2 Cor. 1:19). Tá xi̱ka̱ʼa̱nra xa̱ʼa̱ na̱ chíndeétáʼan xíʼinra, na̱ xi̱ka̱ʼa̱nra xa̱ʼa̱ kúú na̱ va̱ʼaníka xi̱kitáʼan xíʼinra tá kúú ta̱ Apolos, ta̱ Áquila, ñá Prisca, ta̱ Timoteo á ta̱ Tito (Rom. 16:​3, 21; 1 Cor. 3:​6-9; 2 Cor. 8:23). Tá ni̱ka̱ʼa̱nra ña̱ “kúúna na̱ chíndeétáʼan kuití xíʼinna ña̱ va̱ʼa si̱í koona”, sa̱ndákaʼánra na̱ ñuu Corinto ña̱ miíra xíʼin na̱ xi̱kitáʼan xíʼinra, xi̱kuni̱na keʼéna nda̱a̱ ndáaka ña̱ʼa ña̱ va̱ʼa chindeétáʼanna xíʼin na̱ ñúʼu ti̱xin congregación ña̱ kusi̱í-inina. Ki̱ʼva saá kúú ña̱ kéʼé na̱ kúúmií chiñu ti̱xin ñuu Ndióxi̱ vitin: kéʼéna nda̱a̱ ndáaka ña̱ʼa, ña̱ va̱ʼa chindeétáʼanna xíʼin na̱ ñúʼu ti̱xin congregación ña̱ kachíñuna nu̱ú Jehová “xíʼin ña̱ si̱í-ini” (Sal. 100:2; Filip. 1:25).

5. ¿Ndáaña ka̱ʼa̱nyó xa̱ʼa̱ nu̱ú artículo yóʼo, ta ndáaña xíniñúʼu ndakanixi̱níyó xa̱ʼa̱?

⁵ Sa̱kán íyo loʼo tiempo ni̱nda̱ka̱tu̱ʼunna iin tiʼvi na̱ hermano na̱ kúsi̱í-ini nátúʼun xa̱ʼa̱ Ndióxi̱ ta xa̱a̱ síín síín lugar nu̱ú íyona, ni̱nda̱ka̱tu̱ʼunnana: “¿Ndáaña ni̱ka̱ʼa̱n á ke̱ʼé iin ta̱ anciano ña̱ va̱ʼa kusi̱íka-iniún kachíñún nu̱ú Ndióxi̱?”. Nani xítoyó ña̱ ni̱ka̱ʼa̱nna, ná ndakanixi̱níyó ndáa ki̱ʼva ndakuiin miíyó ña̱ ni̱nda̱ka̱tu̱ʼunna na̱yóʼo, ta ná ndakanixi̱níyó xa̱ʼa̱ ña̱ kivi keʼéyó ña̱ va̱ʼa chindeétáʼanyó xíʼin na̱ congregación nu̱ú ñúʼuyó ña̱ va̱ʼa kusi̱íka-inina.a

“CHINDEÉNDÓ ÑÁ PÉRSIDA ÑÁ KÚʼVI̱NÍ-INIYÓ XÍNIYÓ”

6, 7. a) ¿Ndáa ki̱ʼva kivi kundiku̱n na̱ anciano yichi̱ ta̱ Jesús, ta̱ Pablo xíʼin inkaka na̱ xi̱ndasakáʼnu Ndióxi̱ xi̱naʼá? b) ¿Nda̱chun kúsi̱íka-ini na̱ hermano tá ndákaʼányó ki̱vi̱na?

⁶ Ku̱a̱ʼání na̱ ndásakáʼnu Ndióxi̱ ni̱ka̱ʼa̱nna ña̱ va̱ʼaníka kúnina tá na̱ anciano náʼa̱na ña̱ ndíʼi-inina xa̱ʼa̱na. Iin ki̱ʼva ña̱ náʼa̱ na̱ níʼi yichi̱ ti̱xin congregación ña̱ ndíʼi-inina xa̱ʼa̱ inkana kúú ña̱ keʼéna nda̱a̱ táki̱ʼva ke̱ʼé ta̱ David, ta̱ Elihú xíʼin ta̱ Jesús (kaʼvi 2 Samuel 9:6; Job 33:1 xíʼin Lucas 19:5). U̱ni̱ saá na̱yóʼo xi̱niñúʼuna ki̱vi̱ inkana tá ni̱ka̱ʼa̱nna xíʼinna. Saátu ta̱ Pablo xi̱ndayáʼviní nu̱úra ña̱ ndakaʼánra ta kuniñúʼura ki̱vi̱ na̱ hermano. Nda̱a̱ nu̱ú ndíʼi carta ña̱ ka̱ʼyíra ku̱a̱ʼa̱n ndaʼa̱ na̱ hermano na̱ ñuu Roma chi̱ndeéra ki̱ʼva o̱ko̱ u̱ʼu̱n na̱ ñaniyó xíʼin ná ku̱ʼvayó ta ni̱ka̱ʼa̱nra ki̱vi̱ na̱yóʼo. Tá kúú tá ka̱ʼyíra: “Chindeéndó ñá Pérsida ñá kúʼvi̱ní-iniyó xíniyó” (Rom. 16:​3-15).

⁷ Sava na̱ anciano íxayo̱ʼvi̱níña xíʼinna ndakaʼánna xa̱ʼa̱ ki̱vi̱ na̱ ñúʼu xíʼinna ti̱xin congregación. Soo tá chíka̱a̱na ndee̱ ña̱ keʼéna ña̱yóʼo, íyoña nda̱a̱ táki̱ʼva íyo ña̱ káʼa̱nna xíʼin na̱ hermano ña̱yóʼo: “Yóʼó ndáyáʼviníún nu̱úi̱” (Éx. 33:17). Na̱ anciano chíndeétáʼanna xíʼin na̱ hermano ña̱ kusi̱í-inina tá ndákaʼánna ki̱vi̱ na̱yóʼo ta káʼa̱nna xíʼinna ña̱ taxina comentario tá káʼvina Tutu Ña̱ Nátúʼun xíʼinyó á inkaka reunión (chitáʼanña xíʼin Juan 10:3).

“ÑÁYÓʼO NDEÉNÍ KÉʼÉÑÁ CHIÑU NU̱Ú TA̱ TÁTA JESÚS”

8. ¿Ndáa ki̱ʼva xi̱ndiku̱n ta̱ Pablo yichi̱ Jehová ta saátu ta̱ Jesús?

⁸ Inka ki̱ʼva ña̱ chindeétáʼanyó xíʼin na̱ hermano ña̱ kusi̱í-inina kúú ña̱ ka̱ʼa̱nyó xíʼinna ña̱ va̱ʼaní íyo ña̱ kéʼéna, nda̱a̱ táki̱ʼva ke̱ʼé ta̱ Pablo. Saá íyo ña̱ ka̱ʼyíra nu̱ú carta ña̱ u̱vi̱ ña̱ ka̱ʼyíra ku̱a̱ʼa̱n ndaʼa̱ na̱ ñuu Corinto, ta ña̱yóʼo káchiña: “Kúsi̱íní-inii̱ xa̱ʼa̱ ña̱ kéʼéndó” (2 Cor. 7:4). Ña̱ va̱ʼaní ni̱ka̱ʼa̱nra xíʼinna sana sa̱kúsi̱íña-ini na̱ hermano na̱ xi̱ndoo chí ñuu Corinto. Ta saátu íyo ña̱ ni̱ka̱ʼa̱n ta̱ Pablo xíʼin inkaka na̱ congregacion (Rom. 1:8; Filip. 1:​3-5; 1 Tes. 1:8). Tá ni̱ka̱ʼa̱nra xa̱ʼa̱ ñá Pérsida nu̱ú carta ña̱ chi̱ndaʼára ndaʼa̱ na̱ congregación ña̱ íyo chí ñuu Roma, ni̱ka̱ʼa̱nkara ña̱yóʼo: “Ñáyóʼo ndeéní kéʼéñá chiñu nu̱ú ta̱ táta Jesús” (Rom. 16:12). Ku̱si̱íníva-ini ñá hermanayó xa̱ʼa̱ ña̱ ni̱ka̱ʼa̱nra. Tá ni̱ka̱ʼa̱n va̱ʼa ta̱ Pablo xa̱ʼa̱ inkana, xi̱ndiku̱nra yichi̱ Jehová ta saátu ta̱ Jesús (kaʼvi Marcos 1:​9-11 xíʼin Juan 1:47; Apoc. 2:​2, 13, 19).

9. ¿Nda̱chun va̱ʼa kúsi̱íka-ini na̱ congregación tá inkáchi káʼa̱nyó tu̱ʼun va̱ʼa xíʼin táʼanyó?

⁹ Na̱ anciano na̱ íyo tiempo vitin ndáyáʼviní nu̱úna ña̱ ka̱ʼa̱nna xíʼin inka na̱ hermano ña̱ kúʼvi̱ní-inina xíninana (Prov. 3:27; 15:23). Tá kéʼéna ña̱yóʼo nda̱a̱ táki̱ʼva íyo na̱ káʼa̱n ña̱yóʼo saá íyona: “Ki̱ʼi̱n kuenta xíʼin ña̱ kéʼún saáchi ndíʼi-inii̱ xa̱ʼún”. Xíʼin ña̱yóʼo kúnda̱a̱-iniyó, na̱ hermano na̱ ñúʼu ti̱xin congregación xíniñúʼuna ña̱ ka̱ʼa̱n na̱ anciano xíʼinna tu̱ʼun ña̱ chika̱a̱ ndee̱ xíʼinna. Ña̱ ni̱ka̱ʼa̱n iin ñá hermana ñá xa̱a̱ kúúmií ki̱ʼva 55 ku̱i̱ya̱ kítáʼanña xíʼin ña̱ káʼa̱n ku̱a̱ʼáníkana: “Nu̱ú káchíñuyó, na̱ yiví va̱ása káʼa̱nvína tu̱ʼun va̱ʼa xíʼinyó, kǒo na̱ kúʼvi̱-ini xíni táʼan, ta kútóonína keetáʼanna. Ña̱kán, kúsi̱íní-inii̱ tá iin ta̱ anciano káʼa̱nra xíʼi̱n ña̱ chíndayáʼviníra ña̱ kéʼíi̱ ti̱xin congregación. Táxiníña ndee̱ ndaʼíi̱, nu̱ú yi̱ʼi̱ iin ki̱ʼva ña̱ náʼa̱ yivái̱ ta̱ íyo chí ndiví ña̱ kúʼvi̱ní-inira xínira yi̱ʼi̱ kúú ña̱yóʼo”. Sa̱kán íyo loʼo, iin ta̱ anciano ni̱ka̱ʼa̱nra tu̱ʼun ña̱ liviní ta chi̱ka̱a̱níña ndee̱ xíʼin iin ta̱ sákuaʼnu u̱vi̱ na̱ va̱lí se̱ʼe ta kǒo ñá síʼira íyo xíʼinra. Ta, ¿ndáaña ku̱u xa̱ʼa̱ ña̱ ni̱ka̱ʼa̱nra yóʼo? Ta̱ íyo se̱ʼe káchira: “Ña̱ ni̱ka̱ʼa̱nra chi̱ka̱a̱níña ndee̱ xíʼi̱n”. Saá íyoña, tá xíʼin ndinuʼu-ini na̱ anciano chíka̱a̱na ndee̱ xíʼin inkana chíndeétáʼanna xíʼinna ña̱ si̱íní koona. Ta xa̱ʼa̱ ña̱yóʼo, koo ndee̱na ña̱ ndakundeéna keʼéna ña̱ kúni̱ Ndióxi̱ ña̱ va̱ʼa ni̱ʼína ña̱ kutakuna ndiʼi tiempo (Is. 40:31).

“KUNDAANDÓ NA̱ CONGREGACIÓN NDIÓXI̱”

10, 11. a) ¿Ndáa ki̱ʼva kundiku̱n na̱ anciano yichi̱ ta̱ Nehemías? b) ¿Ndáaña chindeétáʼan xíʼin na̱ anciano ña̱ chika̱a̱na ndee̱ xíʼin na̱ hermano “nda̱a̱ táki̱ʼva kúni̱ Ndióxi̱” tá ná ku̱ʼu̱nna kotonana?

¹⁰ ¿Ndáaka ña̱ kivi keʼé na̱ kúúmií iin chiñu ti̱xin congregación ña̱ va̱ʼa kundi̱ʼi̱-inina xa̱ʼa̱ na̱ hermano ta chindeétáʼanna xíʼinna ña̱ kusi̱í-inina? Ndúkúna ki̱ʼva ña̱ chika̱a̱na ndee̱ xíʼin na̱ xíniñúʼuña (kaʼvi Hechos 20:28). Tá kéʼéna ña̱yóʼo, kéʼéna nda̱a̱ táki̱ʼva kéʼé na̱ xi̱niʼi yichi̱ nu̱ú na̱ ñuu Ndióxi̱ tá xi̱naʼá. Ná kiʼinyó kuenta xíʼin ña̱ ke̱ʼé iin ta̱ xi̱niʼi yichi̱ nu̱ú na̱ ñuu Ndióxi̱, tá ki̱ʼinra kuenta ña̱ va̱ása viíka íyo ña̱ kándíxa sava na̱ judío Ndióxi̱, ta̱yóʼo xi̱kuu ta̱ Nehemías ta ndakúní ni̱xi̱yo inira. Biblia káchiña ña̱ ki̱xáʼara chíka̱a̱ra ndee̱ xíʼinna (Neh. 4:14). Na̱ anciano na̱ íyo tiempo vitin kéʼéna táʼan ña̱yóʼo: saáchi siʼnaka na̱yóʼo kúú na̱ ndúkú ki̱ʼva ña̱ chika̱a̱na ndee̱ xíʼin na̱ hermano ña̱ va̱ʼa ndakundeéna kandíxakana Ndióxi̱. Nda̱a̱ ku̱a̱ʼa̱nna veʼena xítonana ta kéʼéna ña̱yóʼo ña̱ va̱ʼa chika̱a̱na ndee̱ xíʼinna “nda̱a̱ táki̱ʼva kúni̱ Ndióxi̱” (Rom. 1:11). ¿Ndáaña chindeétáʼan xíʼin na̱ anciano ña̱ va̱ʼa keʼéna ña̱yóʼo tá ná ku̱ʼu̱nna kotona na̱ hermano?

¹¹ Tá kúma̱níka ku̱ʼu̱nna kotona na̱ hermano, xíniñúʼu tavána tiempo ña̱ va̱ʼa ndakanixi̱nína ndáaña kivi ka̱ʼa̱nna xíʼin na̱yóʼo. Kivi ndakanixi̱nína xa̱ʼa̱ ña̱yóʼo: “¿Ndáa tu̱ndóʼo kúú ña̱ yáʼa na̱ hermano yóʼo nu̱ú? ¿Ndáaña kivi ka̱ʼi̱n ña̱ va̱ʼa chika̱i̱ ndee̱ xíʼinna? ¿Ndáa texto ña̱ va̱xi nu̱ú Biblia kivi chindeétáʼan xíʼinna? ¿Ndáana káʼa̱n Biblia xa̱ʼa̱ na̱ ndo̱ʼo táʼan ña̱ ndóʼona?” Tá ná ndakanixi̱nína xa̱ʼa̱ ña̱yóʼo vií koo ña̱ ka̱ʼa̱nna tasaá chindeétáʼanna xíʼin na̱ hermano tá ku̱a̱ʼa̱n na̱ anciano kotona na̱ hermano, ta táxina ña̱ ná ka̱ʼa̱n na̱ hermano yóʼo xa̱ʼa̱ ña̱ ndóʼona ta viíní xíniso̱ʼona ña̱ káʼa̱nna (Sant. 1:19). Iin ñá hermana ni̱ka̱ʼa̱nñá: “Chíka̱a̱níña ndee̱ xíʼinyó tá iin na̱ anciano va̱ʼaní xíniso̱ʼona ña̱ káʼa̱nyó” (Luc. 8:18).

12. ¿Ndáana xíniñúʼu chika̱a̱na ndee̱ xíʼin ti̱xin congregación ta nda̱chun?

¹² ¿Ndáana kúú na̱ kivi ku̱ʼu̱nna kotona? Ta̱ Pablo ni̱ka̱ʼa̱nra ña̱yóʼo xíʼin na̱ anciano: Kundaandó ndikachi sa̱na̱ Ndióxi̱. Saa íyoña, ndiʼi na̱ ñúʼu ti̱xin congregación xíniñúʼu chika̱a̱na ndee̱ xíʼinna, nda̱a̱ na̱ publicador xíʼin na̱ precursor na̱ xa̱a̱ ku̱a̱ʼání ku̱i̱ya̱ nátúʼun xa̱ʼa̱ Ndióxi̱. Ni ndakúní íyo na̱ hermano yóʼo ta nda̱kúní íyo inina xíʼin Ndióxi̱. ¿Nda̱chun xíniñúʼu chindeétáʼan na̱ anciano xíʼinna? Saáchi nda̱a̱ na̱yóʼo kivi ndakanixi̱nína ña̱ va̱ása kúndeéka-inina nu̱ú ndiʼi ña̱ va̱ása va̱ʼa kúú nu̱ú ñuyǐví yóʼo. Iin ña̱ ndo̱ʼo ta̱ rey David sánáʼa̱ña miíyó nda̱a̱ na̱ nda̱kú íyo ini káchíñu nu̱ú Ndióxi̱ xíniñúʼuna ña̱ chindeétáʼan inkana xíʼinna.

“KAMANÍ KI̱XAA̱ TA̱ ABISAI [...] ÑA̱ SA̱KǍKURARA”

13. a) ¿Ndáaña ku̱u xa̱ʼa̱ ña̱kán xi̱kuni̱ ta̱ Isbí-benob kaʼníra ta̱ David? b) ¿Nda̱chun va̱ʼa ku̱chiñu ta̱ Abisai sa̱kǎkura ta̱ David mií tiempo ña̱ xíniñúʼuraña?

¹³ Tá ni̱ya̱ʼa loʼo tiempo ña̱ nda̱kaxinna ta̱ David ña̱ koora rey nu̱ú na̱ ñuu Israel, ka̱nitáʼanra xíʼin ta̱ Goliat, iin ta̱ ki̱xi ti̱xin na̱ veʼe na̱ refaím, náʼnuní ni̱xi̱yo na̱yóʼo. Ndakúní ni̱xi̱yo ini ta̱ David ta xa̱ʼníra ta̱yóʼo (1 Sam. 17:4, 48-51; 1 Crón. 20:5, 8). Tá ni̱ya̱ʼa ku̱i̱ya̱ ta̱ David xi̱niñúʼu kanitáʼanra xíʼin na̱ filisteo, ta kanitáʼan tukura xíʼin inka ta̱ ki̱xi ti̱xin na̱ veʼe na̱ refaím. Ta̱yóʼo xi̱naníra Isbí-benob (2 Sam. 21:16; nota). Soo ta̱ káʼnuní yóʼo si̱lóʼo kuití ta kaʼníra ta̱ David. ¿Nda̱chun? Saáchi su̱ví xa̱ʼa̱ ña̱ níyi̱ʼví ta̱ David níxi̱kuuña, chi ta̱ ku̱naáva xi̱kuura. Biblia káʼa̱nña xa̱ʼa̱ra ña̱ xa̱a̱ ku̱naára, ña̱kán tá xi̱ni ta̱ Isbí-benob ña̱yóʼo, ki̱ʼinra kuenta ña̱ kivi kaʼnírara. Soo tá xa̱a̱ ku̱a̱ʼa̱n ta̱ káʼnuní yóʼo kaʼníra ta̱ David, “kamaní ki̱xaa̱ ta̱ Abisai se̱ʼe ñá Zeruyá ña̱ sakǎkurara, ka̱nira ta̱ filisteo ta xa̱ʼníra ta̱yóʼo” (2 Sam. 21:15-17). Si̱lóʼo kuití ta kaʼnínara. Ta̱xiníva ta̱ David tíxa̱ʼvi ndaʼa̱ ta̱ Abisai xa̱ʼa̱ ña̱ ki̱ʼinra kuenta xíʼinra ta sa̱kǎkurara tá xi̱kuni̱na kaʼnínara ¿Ndáaña sákuaʼayó xíʼin ña̱yóʼo?

14. a) ¿Ndáa ki̱ʼva ya̱ʼayó nu̱ú tu̱ndóʼo ña̱ íyo nda̱a̱ táki̱ʼva ni̱xi̱yo ta̱ Goliat? b) ¿Ndáa ki̱ʼva chindeétáʼan na̱ anciano xíʼinyó ña̱ ndakú kooyó ta kusi̱í tuku iniyó? Ka̱ʼa̱n xa̱ʼa̱ iin ña̱yóʼo.

¹⁴ Ni sási ta̱ Ndi̱va̱ʼa nu̱úyó ta saátu na̱ kítáʼan xíʼinra, miíyó na̱ káchíñu nu̱ú Jehová chíka̱a̱yó ndee̱ ña̱ nátúʼunyó xíʼin na̱ yiví xa̱ʼa̱ Ndióxi̱ nu̱ú iníísaá ñuyǐví. Sava miíyó ni̱ya̱ʼayó nu̱ú tu̱ndóʼo ña̱ íyo nda̱a̱ táki̱ʼva ni̱xi̱yo ta̱ Goliat, soo xa̱ʼa̱ ña̱ kándíxayó Jehová xa̱a̱ ku̱chiñuyó ni̱ya̱ʼayó nu̱ú ña̱yóʼo. Xa̱ʼa̱ ña̱ xíniñúʼu kundeé-iniyó nu̱ú ña̱ íyo ñuyǐví yóʼo sava yichi̱ kúnaáyó ta ndákava-iniyó, vitá kúniyó ta nda̱a̱ kivi ndakavayó nu̱ú tu̱ndóʼo ña̱ kivi ya̱ʼayó nu̱ú. Tá ndóʼoyó ña̱yóʼo, ña̱ chíndeétáʼan iin ta̱ anciano xíʼinyó kivi sakúsi̱íña-iniyó ta ndakú koo iniyó. Iin ñá precursora ñá kúúmií ki̱ʼva 65 ku̱i̱ya̱ káchiñá: “Xa̱a̱ íyo loʼo tiempo va̱ása va̱ʼa níxikunii̱ ta xi̱kunaíi̱ tá xi̱natúʼi̱n xa̱ʼa̱ Ndióxi̱. Iin ta̱ anciano ki̱ʼinra kuenta ña̱ ku̱naíi̱, ta ni̱nda̱ka̱tu̱ʼunra yi̱ʼi̱ ndáaña ndóʼi̱. Va̱ʼaní íyo ña̱ ni̱ka̱ʼa̱nndi̱ xa̱ʼa̱ ta xi̱niñúʼura iin ña̱ va̱xi nu̱ú Biblia ña̱ chi̱ndeétáʼanra xíʼi̱n. Xi̱niso̱ʼi̱ consejo ña̱ ni̱ka̱ʼa̱nra ta va̱ʼaní chi̱ndeétáʼanña xíʼi̱n, táxiníi̱ tíxa̱ʼvi xa̱ʼa̱ ña̱ ki̱ʼinra kuenta xíʼi̱n ta chi̱ndeétáʼanra xíʼi̱n”. Iin ña̱ va̱ʼaní kúúña ña̱ íyo na̱ anciano xíʼinyó ta ndíʼi-inina xa̱ʼa̱yó, ta nda̱a̱ táki̱ʼva ke̱ʼé ta̱ Abisai, íyo tu̱ʼvana ña̱ chindeétáʼanna xíʼinyó.

“ÑA̱ VA̱ʼA KUNDA̱A̱-ININDÓ ÑA̱ KÚʼVI̱NÍ-INII̱ XÍNII̱ NDÓʼÓ”

15, 16. a) ¿Nda̱chun xi̱kuʼvi̱ní-ini na̱ hermano xi̱xinina ta̱ Pablo? b) ¿Nda̱chun kúʼvi̱-iniyó xíniyó na̱ anciano na̱ kúʼvi̱ní-ini xíni miíyó?

¹⁵ Na̱ anciano ku̱a̱ʼání chiñu kéʼéna ña̱ va̱ʼa kundaana na̱ congregación. Sava yichi̱ nda̱a̱ va̱ása kísi̱na ña̱ káʼa̱nna xíʼin Ndióxi̱ xa̱ʼa̱ ña̱ ndíʼi̱ní-inina xa̱ʼa̱ na̱ kúú ndikachi sa̱na̱ Ndióxi̱ á ña̱ chindeétáʼanna xíʼin na̱ ñanina ña̱ va̱ʼa kandíxakana Ndióxi̱ (2 Cor. 11:​27, 28). Soo chíka̱a̱nína ndee̱ ña̱ keʼéna ña̱yóʼo ta xíʼin ña̱ si̱í-ini kéʼénaña. Tasaá ndíku̱nna yichi̱ ta̱ Pablo, chi ka̱ʼyíra ña̱yóʼo nu̱ú na̱ xi̱ndasakáʼnu Ndióxi̱ na̱ xi̱ndoo chí ñuu Corinto: “Xíʼin ña̱ si̱í-ini taxii̱ ndiʼi ña̱ kúúmiíi̱ ndaʼa̱ndó” (2 Cor. 12:15). Xi̱kuʼvi̱ní-inira xi̱xinira na̱ hermano, xa̱ʼa̱ ña̱kán chi̱ka̱a̱níra ndee̱ ña̱ ndasandakúra-inina (kaʼvi 2 Corintios 2:4; Filip. 2:17; 1 Tes. 2:8). Xa̱ʼa̱ ña̱kán xi̱kuʼvi̱ní-inina xi̱xinara (Hech. 20:​31-38.)

¹⁶ Miíyó na̱ ndásakáʼnu Ndióxi̱ tiempo vitin saátu kúʼvi̱-iniyó xíniyó na̱ anciano, tá káʼa̱nyó xíʼin Jehová táxiyó tíxa̱ʼvi ndaʼa̱ra xa̱ʼa̱ ña̱ íyo na̱yóʼo xíʼinyó. Chíndeétáʼanna xíʼinyó ña̱ kusi̱í-iniyó, ta saátu tá xáʼa̱nna xítona miíyó chíka̱a̱na ndee̱ xíʼinyó. Ta saátu táxiyó tíxa̱ʼvi xa̱ʼa̱ ña̱ kíʼinna kuenta xíʼinyó, ta íyo tu̱ʼvana ña̱ chindeétáʼanna tá ndóʼoyó iin tu̱ndóʼo ña̱ íyo ñuyǐví yóʼo. Mií ña̱ ndixa, chíndeétáʼannívana xíʼinyó ña̱ va̱ʼa kusi̱í-iniyó.