Ná kandíxayó ndiʼi ña̱ káʼa̱n Jehová keʼéra chí nu̱únínu

1. Ña̱ kándíxayó Ndióxi̱, ¿ndáa ki̱ʼva kotoyóña?

NDÁYÁʼVINÍ ña̱ kandíxayó Ndióxi̱, soo su̱ví ndiʼi na̱ yiví náʼa̱ ña̱ kándíxanara (2 Tes. 3:2). Mií Jehová kúú ta̱ chíndeétáʼan xíʼin na̱ káchíñu nu̱úra ña̱ va̱ʼa kandíxanara (Rom. 12:3; Gál. 5:22). Ndiʼi na̱ kándíxa Ndióxi̱ xíniñúʼu kusi̱í-inina.

2, 3. a) ¿Ndáaña va̱ʼa ndakiʼin na̱ kándíxa Ndióxi̱? b) ¿Ndáa pregunta kúú ña̱ ndakuiinyó?

² Ta̱ Jesús ni̱ka̱ʼa̱nra mií yivára kúú ta̱ kána miíyó ña̱ va̱ʼa kuyatinyó nu̱úra (Juan 6:​44, 65). Tá ná xa̱a̱yó kandíxayó ta̱ Jesús kivi koo káʼnu-ini Ndióxi̱ xa̱ʼa̱ ku̱a̱chiyó, ta xa̱ʼa̱ ña̱yóʼo va̱ʼaní xa̱a̱yó kutáʼanyó xíʼin Jehová (Rom. 6:23). ¿Ndáaña ke̱ʼéyó ña̱ va̱ʼa xa̱a̱yó kutáʼanyó xíʼin Jehová? Xa̱ʼa̱ ña̱ kúúyó na̱ yiví ku̱a̱chi, na̱ xíniñúʼu kuviva kúúyó (Sal. 103:10). Soo Jehová xi̱tora ña̱ kiviva keʼéyó ña̱ va̱ʼa, ta xa̱ʼa̱ ña̱ va̱ʼaní-inira chi̱ndeétáʼanra xíʼinyó ña̱ va̱ʼa kandíxayóra xíʼin ndiʼi níma̱yó. Tasaá ki̱xáʼayó kándíxayó ta̱ Jesús ta ndátuyó ndakiʼinyó ña̱ kutakuyó ndiʼi tiempo (kaʼvi 1 Juan 4:​9, 10).

³ Soo, ¿ndáaña kúni̱ kachi ña̱ kandíxayó Ndióxi̱? ¿Á kúni̱ kachi kuití ña̱yóʼo ña̱ kuxini̱ kuitíyó ndáaña kúú ña̱ va̱ʼa ña̱ káʼa̱n Jehová taxira ndaʼa̱yó chí nu̱únínu? Ta ña̱ ndáyáʼvika, ¿ndáa ki̱ʼva na̱ʼa̱yó ña̱ kándíxayó Ndióxi̱?

XÍʼIN NÍMA̱YÓ NÁʼA̱YÓ ÑA̱ KÁNDÍXAYÓ NDIÓXI̱

4. ¿Ndáa ki̱ʼva kivi na̱ʼa̱yó ña̱ kándíxayó Ndióxi̱?

⁴ Ña̱ kándíxayó Ndióxi̱ va̱ása kúni̱ kachi kuitíña ña̱ kunda̱a̱-iniyó ndáaña kúú ña̱ káʼa̱nra taxira ndaʼa̱yó. Ña̱ kándíxayó Ndióxi̱ kúú ndee̱ ña̱ chíndaʼá miíyó ña̱ keʼéyó ña̱ kúni̱ra. Xíniñúʼu kandíxayó ta̱ Jesús ta mií Ndióxi̱ kúú ta̱ chi̱ndaʼá ta̱yóʼo ña̱ va̱ʼa kixira nu̱ú ñuʼú ta sakǎkura miíyó ta ña̱yóʼo chíndaʼáña miíyó ña̱ natúʼunkayó xíʼin na̱ yiví xa̱ʼa̱ ña̱ va̱ʼa ña̱ káʼa̱n Ndióxi̱ xíʼinyó. Ta̱ apóstol Pablo ni̱ka̱ʼa̱nra ña̱yóʼo: “Tá xíʼin yuʼún káʼún xíʼin ndiʼina xa̱ʼa̱ ta̱ Jesús ña̱ kúúra tátayó ta xíʼin níma̱ún náʼún ña̱ kándíxaún ña̱ mií Ndióxi̱ kúú ta̱ sa̱ndátaku ta̱yóʼo, ka̱kuvaún. Saáchi ña̱ va̱ʼa nda̱kú koo ini iin na̱ yiví xíniñúʼu kandíxana xíʼin ndiʼi níma̱na, ta ña̱ va̱ʼa ka̱kuna xíniñúʼu kuniñúʼuna yuʼúna ña̱ natúʼunna xa̱ʼa̱ tu̱ʼun yóʼo” (Rom. 10:​9, 10; 2 Cor. 4:13).

5. a) ¿Nda̱chun ndáyáʼviní ña̱ kándíxayó Ndióxi̱? b) ¿Ndáa ki̱ʼva kivi ndasandákuyóña? Ka̱ʼa̱n xa̱ʼa̱ iin ejemplo.

⁵ Tá kúni̱yó kutakuyó nu̱ú ñuyǐví xa̱á ña̱ káʼa̱n Ndióxi̱ taxira ndaʼa̱yó xíniñúʼu ndasandakúyó ña̱ kándíxayóra. Nda̱a̱ táki̱ʼva íyo iin planta, xíniñúʼu ko̱so̱yó túyóʼo saátu ña̱ kándíxayó Ndióxi̱, xíniñúʼu kundaayóña ña̱ va̱ʼa ndakú kooña. Tú planta ndiʼi tiempo nása̱manú, ta tá kóso̱yó túyóʼo, ndákundeénú xáʼnunú, soo tá va̱ása kóso̱yó túyóʼo yíchi̱nú ta ndíʼi-xa̱ʼa̱nú. Ki̱ʼva saátu íyo ña̱ kándíxayó Ndióxi̱ tá va̱ása ndáayóña, ña̱yóʼo kúvitáña ta ndíʼi-xa̱ʼa̱ña (Luc. 22:32; Heb. 3:12). Soo tá ndáayó ña̱ kándíxayó Ndióxi̱ ndundakúkaña ta va̱ása ndiʼi-xa̱ʼa̱ña (2 Tes. 1:3; Tito 2:2).

NDÁAÑA KÁʼA̱N BIBLIA XA̱ʼA̱ ÑA̱ KÁNDÍXAYÓ NDIÓXI̱

6. ¿Ndáaña káʼa̱n Hebreos 11:1 xa̱ʼa̱ ña̱ kándíxayó Ndióxi̱?

⁶ Nu̱ú Hebreos 11:1 (kaʼviña) káʼa̱nña xa̱ʼa̱ ndáaña kúú ña̱ kándíxayó Ndióxi̱. Yóʼo káʼa̱nña xa̱ʼa̱ u̱vi̱ ña̱ʼa ña̱ kǒo xítoyó. 1) “Ña̱ ndátuyó” ña̱ káʼa̱n Ndióxi̱ xíʼinyó keʼéra soo kúma̱níka xi̱nuña, tá kúú ña̱ sandíʼi-xa̱ʼa̱ra na̱ yiví na̱ kéʼé ña̱ va̱ása va̱ʼa xíʼin ña̱ ndasalivira nu̱ú ñuʼú yóʼo. 2) Ña̱ʼa ña̱ kǒo xíninu̱úyó soo ña̱ ndixa kúúvaña. Nu̱ú texto yóʼo va̱xi iin tu̱ʼun griego ña̱ káʼa̱n xa̱ʼa̱ ña̱ va̱ása kaka-iniyó xa̱ʼa̱ ña̱ kǒo kívi kotoyó, tá kúú kǒo kívi kotoyó Jehová, ta̱ Jesucristo ni na̱ ángel soo kándíxavayó ña̱ íyona ta kándíxatuyó ndiʼi ña̱ xa̱a̱ kéʼé Reino Ndióxi̱ (Heb. 11:⁠3). Kándíxayó xíʼin ndinuʼu-iniyó ña̱ káʼa̱n Biblia xa̱ʼa̱ ña̱ koo chí nu̱únínu ni kǒo kívi kuniyóña ta náʼa̱yó ña̱yóʼo xíʼin tu̱ʼun ña̱ káʼa̱nyó ta saátu xíʼin ña̱ kéʼéyó chi tá va̱ása kéʼéyó ña̱yóʼo, ña̱ kándíxayó Ndióxi̱ va̱ása ndakú kooña.

7. ¿Ndáa ki̱ʼva chíndeétáʼan ejemplo ta̱ Noé xíʼinyó ña̱ va̱ʼa kunda̱a̱-iniyó ndáaña kúni̱ kachi ña̱ kandíxayó Ndióxi̱? (Koto na̱ʼná ña̱ va̱xi chí xa̱ʼa̱).

⁷ Hebreos 11:7 káʼa̱nña xa̱ʼa̱ ndáa ki̱ʼva xi̱kandíxa ta̱ Noé Ndióxi̱. Texto yóʼo káchiña: “Tá ni̱ka̱ʼa̱n Ndióxi̱ xíʼinra ña̱ kuu ña̱ʼa ña̱ nda̱a̱ ni iin yichi̱ ta̱ʼán kuu, ni̱na̱ʼa̱ra ña̱ íxato̱ʼóníra Ndióxi̱ ta i̱xava̱ʼara iin arca ña̱ va̱ʼa sakǎkura na̱ veʼera”. Ta̱ Noé ni̱na̱ʼa̱ra ña̱ kándíxaníra Ndióxi̱ tá i̱xava̱ʼara iin arca tú káʼnuní. Sana na̱ ni̱xi̱yo yatin xíʼinra ni̱nda̱ka̱tu̱ʼunnara nda̱chun kúú ña̱ kéʼéra chiñu yóʼo. Ta̱yóʼo va̱ása nísa̱a̱ra xíʼinna xa̱ʼa̱ ña̱ ni̱nda̱ka̱tu̱ʼunnara. Nu̱úka ña̱yóʼo, xa̱ʼa̱ ña̱ kándíxaníra Ndióxi̱ va̱ása níyi̱ʼvíra natúʼunra xíʼin na̱ yiví ña̱ xa̱a̱ ku̱nu̱mí ndatiin Ndióxi̱ ku̱a̱chi xíʼinna. Sana ña̱ ni̱ka̱ʼa̱nra xíʼinna kúú ña̱ ni̱ka̱ʼa̱n Ndióxi̱ xíʼinra tá ya̱chi̱ tá ka̱chira: “Chi̱ka̱a̱-inii̱ sandíʼi-xa̱ʼíi̱ ndiʼi ña̱ íyo nu̱ú ñuʼú yóʼo, saáchi nda̱kutú ndiʼi ña̱ kini ña̱ kéʼé na̱ yiví nu̱úña; [...] chindaʼíi̱ sa̱vi̱ kini kuunrá nu̱ú ñuʼú, tasaá ndiʼi-xa̱ʼa̱ ndiʼi ña̱ʼa ña̱ táku ña̱ íyo nu̱úña. Ndiʼi ña̱ íyo nu̱ú ñuʼú ndiʼi-xa̱ʼa̱ña”. Ndióxi̱ ni̱ka̱ʼa̱nra xíʼin ta̱ Noé ña̱ xíniñúʼu ki̱ʼvina ti̱xin tú arca ña̱ va̱ʼa ka̱kuna. Ta sanatu ña̱yóʼo kúú ña̱ ni̱ka̱ʼa̱n ta̱ Noé xíʼin na̱ yiví tá na̱túʼunra xíʼinna xa̱ʼa̱ ndáaña xíniñúʼu keʼéna ña̱ va̱ʼa ka̱kuna. Ta̱ Noé nda̱kúní ni̱xi̱yo inira na̱túʼunra xa̱ʼa̱ Ndióxi̱, saá ni̱na̱ʼa̱ra ña̱ kándíxarara (Gén. 6:​13, 17, 18; 2 Ped. 2:5).

8. ¿Ndáaña ni̱ka̱ʼa̱n ta̱ discípulo Santiago xa̱ʼa̱ ndáaña kúni̱ kachi ña̱ ndixaní kandíxayó Ndióxi̱?

⁸ Sana carta ña̱ ka̱ʼyí ta̱ Santiago, ka̱ʼyíraña tá ni̱ya̱ʼa loʼo tiempo ña̱ ni̱ka̱ʼa̱n ta̱ apóstol Pablo xa̱ʼa̱ ña̱ kuni̱ kachi ña̱ kandíxayó Ndióxi̱. Ta̱ Santiago su̱ví kuití ni̱ka̱ʼa̱nra ña̱ ka̱ʼa̱nyó ña̱ kándíxayó Ndióxi̱ chi xíniñúʼu na̱ʼa̱yóña. Ka̱chira: “¿Á kivi na̱ʼún nu̱úi̱ ña̱ kándíxaún Ndióxi̱ tá kǒo ña̱ va̱ʼa kéʼún? Yi̱ʼi̱ na̱ʼi̱ nu̱ún ña̱ kándíxai̱ Ndióxi̱ xa̱ʼa̱ ña̱ kéʼíi̱ ña̱ va̱ʼa” (Sant. 2:18). Ña̱ va̱ʼa na̱ʼa̱ra ña̱ su̱ví inkáchi íyo ña̱ kandíxa kuitíyó xíʼin ña̱ na̱ʼa̱yó ña̱ kándíxayó Ndióxi̱, ni̱ka̱ʼa̱nra xa̱ʼa̱ na̱ ta̱chí ndi̱va̱ʼa. Ni kándíxavana ña̱ íyo Ndióxi̱ soo kǒo kéʼéna ña̱ káʼa̱nra ta náʼa̱na ña̱ kǒo kándíxanara chi íyona contrara (Sant. 2:​19, 20). Saá ni̱ka̱ʼa̱nra xa̱ʼa̱ iin ta̱a ta̱ ni̱xi̱yo tiempo xi̱naʼá ta ni̱nda̱ka̱tu̱ʼunra: “¿Á su̱ví xa̱ʼa̱ ña̱ʼa ña̱ va̱ʼa ña̱ ke̱ʼé yiváyó ta̱ Abrahán kúú ña̱ ni̱ka̱ʼa̱n Ndióxi̱ xa̱ʼa̱ra ña̱ kúúra iin ta̱a ta̱ nda̱kú-ini chi ka̱ndíxara so̱kóra se̱ʼera ta̱ Isaac nu̱ú iin altar? Ta̱kán ke̱ʼéra u̱vi̱ saáña, ka̱ndíxaníra Ndióxi̱ ta ke̱ʼéra ña̱ va̱ʼa, ta xa̱ʼa̱ ña̱ ke̱ʼéra ña̱yóʼo ni̱na̱ʼa̱ra ña̱ ndixaní kándíxara Ndióxi̱”. Tándi̱ʼi ni̱ka̱ʼa̱nka ta̱ Santiago xa̱ʼa̱ ndáa ki̱ʼva na̱ʼa̱yó ña̱ kándíxayó Ndióxi̱ ta ka̱chira: “Nda̱a̱ táki̱ʼva íyo iin na̱ yiví, tá va̱ása ndákiʼinkana ta̱chí ña̱ táxi ña̱ kutakuna na̱ xa̱a̱ ni̱xi̱ʼi̱va kúúna, saátu íyo ña̱ kándíxayó Ndióxi̱, tá kǒo ni iin ña̱ʼa ña̱ va̱ʼa kéʼéyó ni loʼoví va̱ása ndáyáʼvi ña̱ kándíxayóra” (Sant. 2:​21-23, 26).

9, 10. ¿Ndáa ki̱ʼva chíndeétáʼan ta̱ apóstol Juan xíʼinyó ña̱ kunda̱a̱-iniyó ña̱ ndáyáʼviní na̱ʼa̱yó ña̱ kándíxayó Ndióxi̱?

⁹ Tá ni̱ya̱ʼa o̱ko̱ u̱xu̱ ku̱i̱ya̱, ta̱ apóstol Juan ka̱ʼyíra Evangeliora xíʼin u̱ni̱ carta. ¿Á xi̱kunda̱a̱-inira ndáaña kúni̱ kachi ña̱ kandíxayó Ndióxi̱ nda̱a̱ táki̱ʼva ni̱ka̱ʼa̱n inkaka na̱ ka̱ʼyí Biblia? Ta̱ Juan kúú ta̱ xi̱niñúʼu ku̱a̱ʼáníka yichi̱ tu̱ʼun griego ña̱ káʼa̱n xa̱ʼa̱ ña̱ na̱ʼa̱yó ña̱ kándíxayó Ndióxi̱.

¹⁰ Tá kúú ka̱chira: “Na̱ kándíxa se̱ʼe Ndióxi̱ kutakuna ndiʼi tiempo, soo na̱ kǒo xíín kuniso̱ʼo ña̱ káʼa̱nra va̱ása kutakuna, chi xa̱ʼa̱ ña̱ kéʼéna sa̱a̱ Ndióxi̱ xíʼinna” (Juan 3:36). Tá kándíxayó Ndióxi̱ xíniñúʼu kuniso̱ʼoyó ña̱ káʼa̱n ta̱ Jesús xíʼinyó. Ta̱ apóstol Juan ku̱a̱ʼá yichi̱ ni̱ka̱ʼa̱nra ña̱ ni̱ka̱ʼa̱n ta̱ Jesús, ña̱ ndiʼi tiempo xíniñúʼu na̱ʼa̱yó xíʼin ña̱ kéʼéyó ña̱ kándíxayó Ndióxi̱ (Juan 3:16; 6:​29, 40; 11:​25, 26; 14:​1, 12).

11. ¿Ndáa ki̱ʼva na̱ʼa̱yó ña̱ táxiyó tíxa̱ʼvi xa̱ʼa̱ ña̱ kúnda̱a̱-iniyó xa̱ʼa̱ ña̱ nda̱a̱?

¹¹ Xíniñúʼu taxiyó tíxa̱ʼvi ndaʼa̱ Jehová ña̱ xíniñúʼura espíritu santora ña̱ va̱ʼa chindeétáʼanña xíʼinyó ña̱ kunda̱a̱-iniyó xa̱ʼa̱ ña̱ nda̱a̱ tasaá xa̱a̱kayó kandíxayóra (Kaʼvi Lucas 10:21). Ná kǒo sandákooyó ña̱ taxiyó tíxa̱ʼvi ndaʼa̱ra xa̱ʼa̱ ña̱ xi̱niñúʼura se̱ʼera ña̱ va̱ʼa kuyatinyó nu̱úra, mií Ndióxi̱ kúú ta̱ nda̱kaxin ta̱ Jesús ña̱ va̱ʼa chindeétáʼanra xíʼinyó ña̱ va̱ʼaníka koo ña̱ kándíxayóra (Heb. 12:2). Ña̱ va̱ʼa na̱ʼa̱yó ña̱ táxiyó tíxa̱ʼvi ndaʼa̱ Ndióxi̱ xa̱ʼa̱ ña̱ va̱ʼaní-inira xíʼinyó xíniñúʼu ka̱ʼa̱nyó xíʼinra ta kaʼviyó tu̱ʼunra tasaá ndasandakúyó ña̱ kándíxayóra (Efes. 6:18; 1 Ped. 2:2).

12. ¿Ndáaña xíniñúʼu keʼéyó ña̱ va̱ʼa na̱ʼa̱yó ña̱ kándíxayó Ndióxi̱?

¹² Xíniñúʼu na̱ʼa̱kayó ña̱ kándíxayó ndiʼi ña̱ káʼa̱n Jehová taxira ndaʼa̱yó chí nu̱únínu ta náʼa̱yó ña̱yóʼo nu̱ú inkana tá xíkayó nátúʼunyó xa̱ʼa̱ Reinora ta sánáʼa̱yó na̱ yiví xa̱ʼa̱ra. Ta saátu xíniñúʼu chindeétáʼanyó xíʼin ndiʼina soo na̱ xíniñúʼu chindeétáʼankayó xíʼin kúú na̱ inkáchi ndásakáʼnu Ndióxi̱ xíʼinyó (Gál. 6:10). Saátu xíniñúʼu chika̱a̱yó ndee̱ ña̱ sandákooyó ki̱ʼva ña̱ ni̱xi̱yoyó tá ya̱chi̱, tá saá kéʼéyó ndiʼi tiempo ndakú koo ña̱ kándíxayó Ndióxi̱ (Col. 3:​5, 8-10).

IIN ÑA̱ NDÁYÁʼVINÍ KÚÚ ÑA̱ KÁNDÍXAYÓ NDIÓXI̱

13. a) ¿Nda̱chun ndáyáʼviní kandíxayó Ndióxi̱? b) ¿Ndáaña kivi chitáʼanyó xíʼin ña̱ kándíxayóra?

¹³ Biblia káchiña: “Tá iinna kǒo kándíxana Ndióxi̱ va̱ása kíndo̱o-inira xíʼinna, chi na̱ kúyatin nu̱ú Ndióxi̱ xíniñúʼu kandíxana ña̱ íyora ta táxira ña̱ va̱ʼa ndaʼa̱ na̱ chíka̱a̱ní ndee̱ ña̱ nandukúnara” (Heb. 11:6). Biblia káxiní káʼa̱nña xa̱ʼa̱ ña̱ kándíxayó Ndióxi̱, ña̱yóʼo kúú ña̱ xíniñúʼu kuumií ndiʼi na̱ ndásakáʼnu miíra ta chítáʼanña ña̱ kándíxayó Ndióxi̱ xíʼin ña̱ kútu̱ní kúva̱ʼa xa̱ʼa̱ iin veʼe (Heb. 6:1). Ta ña̱ va̱ása sandákooyó ña̱ kuʼvi̱-iniyó kuniyó Ndióxi̱ xíniñúʼu kandíxayóra ta saátu na̱ʼa̱yó inka ña̱ʼa ña̱ ndáyáʼviní (kaʼvi 2 Pedro 1:​5-7; Jud. 20, 21).

14, 15. ¿Á iin kítáʼan ña̱ kándíxayó Ndióxi̱ xíʼin ña̱ kúʼvi̱-iniyó xíniyó inkana?

¹⁴ Na̱ ka̱ʼyí Biblia, ku̱a̱ʼání yichi̱ ni̱ka̱ʼa̱nna xa̱ʼa̱ ña̱ kándíxayó Ndióxi̱, xíʼin ña̱yóʼo ni̱na̱ʼa̱na ña̱ ndáyáʼviníña. Ña̱yóʼo kúú ña̱ ku̱a̱ʼáníka yichi̱ káʼa̱nna xa̱ʼa̱. ¿Á kúni̱ kachi ña̱yóʼo ña̱ iinlá ña̱ ndáyáʼviníka nu̱úyó kúú ña̱ kándíxayó Ndióxi̱?

¹⁵ Ta̱ Pablo chi̱táʼanra ña̱ kándíxayó Ndióxi̱ xíʼin ña̱ kúʼvi̱-iniyó xíniyó inkana, ta ka̱chira: “Ni kivi sakánda̱i̱ yuku̱ xa̱ʼa̱ ña̱ kándíxai̱ Ndióxi̱ soo tá kǒo kúʼvi̱-inii̱ xínii̱ inkana, ndiʼi ña̱ kéʼíi̱ va̱ása ndáyáʼviña” (1 Cor. 13:2). Tá ni̱nda̱ka̱tu̱ʼunna ta̱ Jesús xa̱ʼa̱ ndáaña kúú ley ña̱ ndáyáʼvika, ni̱ka̱ʼa̱nra ña̱ ndáyáʼviníka kúú ña̱ kuʼvi̱-iniyó kuniyó Ndióxi̱ (Mat. 22:​35-40). Tá kúʼvi̱-iniyó xíniyó inkana ta kándíxayó Ndióxi̱ kivitu kuumiíyó inka ña̱ va̱ʼa. Biblia káchiña, na̱ kúʼvi̱-ini xíni inkana, ndiʼiña kándíxana ta kándíxana ndiʼi ña̱ káʼa̱n Ndióxi̱ ña̱ va̱xi nu̱ú tu̱ʼunra (1 Cor. 13:​4, 7).

16, 17. a) ¿Ndáaña káʼa̱n Biblia xa̱ʼa̱ ña̱ kándíxayó Ndióxi̱ xíʼin ña̱ kúʼvi̱-iniyó xíniyó inkana? b) ¿Ndáaña kúú ña̱ ndáyáʼvika, ta nda̱chun?

¹⁶ Nu̱ú ña̱ Escrituras Griegas Cristianas, ña̱ kándíxayó Ndióxi̱ xíʼin ña̱ kúʼvi̱-iniyó xíniyó inkana, inkáchi kítáʼanña va̱xiña, ña̱yóʼo náʼa̱ña nu̱úyó ña̱ ndáyáʼviní u̱vi̱ saáña. Ta̱ apóstol Pablo ni̱ka̱ʼa̱nra xíʼin na̱ hermano ña̱ ná kandíxanína Ndióxi̱ ta ná kuʼvi̱-inina kunitáʼanna (1 Tes. 5:8). Ta̱ apóstol Pedro ka̱ʼyíra: “Ni nda̱a̱ ni iin yichi̱ va̱ása níxinindó [ta̱ Jesús], kúʼvi̱va-inindó xínindóra. Ni vitin va̱ása xítondóra, náʼa̱vandó ña̱ kándíxaníndóra” (1 Ped. 1:8). Ta̱ Santiago ni̱nda̱ka̱tu̱ʼunra ña̱yóʼo na̱ hermano na̱ ku̱ʼu̱n chí ndiví: “¿Á su̱ví mií Ndióxi̱ kúú ta̱ níndaka̱xin na̱ yiví na̱ va̱ása ndáyáʼvi nu̱ú na̱ ñuyǐví yóʼo ña̱ va̱ʼa xa̱a̱na kandíxanínara, ta ndakiʼinna Reino ña̱ ni̱ka̱ʼa̱nra taxira ndaʼa̱ na̱ kúʼvi̱-ini xíni miíra?” (Sant. 2:5). Ta̱ apóstol Juan ka̱chira: “Ña̱yóʼo kúú chiñu ña̱ xáʼnda [Ndióxi̱] nu̱úyó: ña̱ ná kandíxayó se̱ʼera ta̱ Jesucristo ta saátu ña̱ ná kuʼvi̱-iniyó kunitáʼanyó” (1 Juan 3:23).

¹⁷ Ni ndáyáʼviníva ña̱ kándíxayó Ndióxi̱ soo tá ná saxínura ndiʼi ña̱ káʼa̱nra koo chí nu̱únínu, va̱ása kundatukayó ndakiʼinyó ña̱yóʼo. Soo ña̱ kúʼvi̱-iniyó xíniyó Ndióxi̱ xíʼin ña̱ kúʼvi̱-iniyó xíniyó inkana, va̱ása sandákoovíyó keʼéyó ña̱yóʼo. Xa̱ʼa̱ ña̱yóʼo ta̱ apóstol Pablo ka̱ʼyíra: “Soo ña̱ kindo̱o kúú u̱ni̱ ña̱yóʼo: ña̱ kándíxayó Ndióxi̱, ña̱ ndátuyó chindeé Ndióxi̱ miíyó xíʼin ña̱ kúʼvi̱-iniyó xíniyó inkana. Soo ña̱ ndáyáʼvika nu̱ú ndiʼi ña̱yóʼo kúú ña̱ kuʼvi̱-iniyó kuniyó inkana” (1 Cor. 13:13).

NA̱ ÑUU NDIÓXI̱ NÁʼA̱NA ÑA̱ NDIXA KÁNDÍXANARA

18, 19. ¿Ndáaña xítoyó kéʼé na̱ ñuu Ndióxi̱ tiempo vitin, ta ndáana xíniñúʼu ndukáʼnu xa̱ʼa̱ ña̱yóʼo?

¹⁸ Na̱ ñuu Jehová na̱ íyo tiempo vitin náʼa̱na ña̱ kándíxana Reinora, xa̱ʼa̱ ña̱yóʼo, xa̱a̱ yáʼaka u̱na̱ millón na̱ hermano íyo iníísaá ñuyǐví ta va̱ʼaní kítáʼanna. Ta Ndióxi̱ táxira espíritu santora ndaʼa̱na ña̱ va̱ʼa kuumiína ña̱ va̱ʼa (Gál. 5:​22, 23). Xíʼin ña̱yóʼo náʼa̱na ña̱ kándíxana Ndióxi̱ ta kúʼvi̱-inina xínitáʼanna.

¹⁹ Nda̱a̱ ni iin na̱ yiví kǒo kívi keʼé ña̱yóʼo. Iinlá Ndióxi̱ kúú ta̱ kivi keʼéña. Ña̱kán xíniñúʼu ndukáʼnura xa̱ʼa̱ ndiʼi ña̱ va̱ʼa ña̱ kéʼéra. (Is. 55:13). Saátu ña̱ sakǎkura miíyó xa̱ʼa̱ ña̱ kándíxayóra “iin bendición Ndióxi̱ kúú ña̱yóʼo” (Efes. 2:8). Ña̱ va̱ʼaní kítáʼan na̱ ñuu Ndióxi̱ kookaña nda̱a̱ ná ndakutú nu̱ú ñuʼú yóʼo xíʼin na̱ yiví na̱ kǒoka ku̱a̱chi kuumií, nda̱kúní koo inina xíʼin Jehová ta si̱íní koona ndasakáʼnuna ki̱vi̱ra ndiʼi tiempo. Nani ndátuyó kixaa̱ ki̱vi̱ kán ná kǒo sandákooyó kandíxayó ndiʼi ña̱ káʼa̱n Jehová keʼéra chí nu̱únínu.