Xa̱ʼa̱ ña̱ nda̱a̱ koo ku̱a̱chi nu̱úyó

1, 2. a) ¿Ndáa ki̱ʼva táxi̱n koo-iniyó tiempo vitin? b) ¿Nda̱chun va̱ása kívi vií kundooyó tiempo vitin? (Koto na̱ʼná ña̱ va̱xi chí xa̱ʼa̱).

NDIʼIYÓ kúni̱ vií kundoo ta kǒo kundi̱ʼi-iniyó. Soo kúnda̱a̱-iniyó ña̱ mií Jehová táxi ña̱ táxi̱n ndaʼa̱yó ta vií kundooyó. Ta ña̱yóʼo chíndeétáʼan xíʼinyó ña̱ vií koo ña̱ ndakanixi̱níyó ta va̱ása kundi̱ʼi-iniyó (Filip. 4:​6, 7). Ta xa̱ʼa̱ ña̱ nda̱taxiyó miíyó ndaʼa̱ Jehová, saátu vií kítáʼanyó xíʼin Ndióxi̱ (Rom. 5:1).

² Kúma̱níva kixaa̱ ki̱vi̱ Ndióxi̱ ña̱ va̱ása ndi̱ʼika-iniyó ta vií kundooyó. Xa̱ʼa̱ ña̱ ndóoyó ki̱vi̱ nu̱ú ndíʼi ku̱a̱ʼání tu̱ndóʼo íyo ta na̱ yiví ndi̱va̱ʼaní-inina (2 Tim. 3:​1-4). Miíyó na̱ cristiano chíkaa̱níyó ndee̱ ña̱ va̱ása keʼéyó ña̱ sanáʼa̱ ta̱ Ndi̱va̱ʼa (2 Cor. 10:​4, 5). Soo ña̱ sandíʼi̱níka-iniyó kúú ña̱ kéʼé na̱ veʼeyó na̱ kǒo kúú testigo Jehová xíʼinyó. Savana kusi̱kindaana miíyó xa̱ʼa̱ ña̱ kándíxayó á ña̱ ka̱ʼa̱nna ña̱ vatá xa̱ʼa̱yó ña̱ ndátaʼvíyó na̱ veʼeyó. Á sana nda̱a̱ sayíʼvina miíyó xa̱ʼa̱ ña̱ kǒo kítáʼankayó xíʼinna. ¿Ndáaña xíniñúʼu kunda̱a̱-iniyó xa̱ʼa̱ ña̱ sási na̱ veʼeyó nu̱úyó? ¿Ndáaña xíniñúʼu keʼéyó tá yáʼayó nu̱ú tu̱ndóʼo ndeé yóʼo?

NDÁAÑA XÍNIÑÚʼU KUNDA̱A̱-INIYÓ XA̱ʼA̱ ÑA̱ SÁSI NA̱ VEʼEYÓ NU̱ÚYÓ

3, 4. a) ¿Ndáaña sakúaʼayó xíʼin ña̱ sa̱náʼa̱ ta̱ Jesús? b) ¿Ama kúú ña̱ ixayo̱ʼvi̱ña xíʼinyó ña̱ kundiku̱nyó ta̱ Jesús?

³ Ta̱ Jesús xi̱kunda̱a̱-inira ña̱ xi̱sanáʼa̱ra ndataʼvíña na̱ yiví ta na̱ discípulora xíniñúʼu ndakú koo inina saáchi ixandi̱va̱ʼana xíʼinna. Ta na̱ familia kivi xa̱a̱na ndataʼví táʼanna. Ta̱ Jesús ka̱chira: “Va̱ása ndakanixi̱níndó ña̱ ki̱xai̱ ña̱ va̱ʼa viíní kutáʼan ndiʼi na̱ yiví, chi ki̱xai̱ xíʼin iin espada ta xa̱ʼa̱ ña̱yóʼo ndiʼi na̱ yiví xa̱a̱ síín ndakanixi̱nína xa̱ʼíi̱. Saáchi va̱xii̱ ña̱ ndataʼvíi̱ na̱ yiví. Iin ta̱ loʼo koora contra yivára, ta iin ñá loʼo kooñá contra siʼíñá, ta ñá íyo si̱so kooñá contra ñá si̱soñá. Ña̱ nda̱a̱ kúúvaña na̱ koo contra xíʼin iin tá iinna, koona mií na̱ veʼevana” (Mat. 10:​34-36).

⁴ ¿Nda̱chun ni̱ka̱ʼa̱n ta̱ Jesús: “Va̱ása ndakanixi̱níndó ña̱ ki̱xai̱ ña̱ va̱ʼa viíní kutáʼan ndiʼi na̱ yiví”? Saáchi xi̱kuni̱ra ña̱ ná kunda̱a̱-ini na̱ yiví ndáaña kundoʼona tá ná kundiku̱nnara. Soo, ña̱ ki̱xi ta̱ Jesús kúú “ña̱ na̱túʼunra xa̱ʼa̱ ña̱ nda̱a̱” su̱ví ña̱ ndataʼvíra na̱ yiví (Juan 18:37). Ta ña̱yóʼo kúú ña̱ kivi kuuva. Xa̱ʼa̱ ña̱kán xi̱sanáʼa̱ ta̱ Cristo ña̱ sava yichi̱ ixayo̱ʼvi̱ña xíʼinyó ña̱ kooyó discípulora, tá na̱ veʼeyó á na̱ migoyó kǒo xíínna kunda̱a̱-inina xa̱ʼa̱ ña̱ nda̱a̱.

5. ¿Ndáaña kúú ña̱ xa̱a̱ kúndeé-ini na̱ discípulo ta̱ Jesús xíʼin?

⁵ Ta̱ Jesús ni̱ka̱ʼa̱nra na̱ discípulora xíniñúʼu kundeé-inina nu̱ú tu̱ndóʼo tá kúú ña̱ íxandi̱va̱ʼa na̱ veʼena xíʼinna á inkaka ña̱ʼa (Mat. 10:38). Ña̱ va̱ʼa nda̱kú koo inina xíʼin ta̱ Cristo, na̱ ndíku̱n miíra xa̱a̱ kúndeé-inina xa̱ʼa̱ ña̱ kúsi̱kindaana miína á tá kǒo xíín na̱ veʼena ndakiʼinna miína. Soo xa̱a̱ ku̱a̱ʼáka ña̱ xa̱a̱ ndákiʼinna nu̱úka ña̱ sa̱ndákoona (kaʼvi Marcos 10:​29, 30).

6. ¿Ndáaña ndakaʼányó tá sási na̱ veʼeyó nu̱úyó ña̱ ndasakáʼnuyó Jehová?

⁶ Ni sási na̱ veʼeyó nu̱úyó ña̱ ndasakáʼnuyó Jehová, chíkaa̱yó ndee̱ ña̱ ku̱ʼvi̱-iniyó kuniyóna. Soo xíniñúʼu ndakaʼányó na̱ siʼnaka kúʼvi̱-iniyó xíniyó kúú Ndióxi̱ xíʼin ta̱ Cristo (Mat. 10:37). Soo ná ndakaʼányó xa̱ʼa̱ ña̱ kúʼvi̱-iniyó xíniyó na̱ veʼeyó, ta̱ Ndi̱va̱ʼa kivi kuniñúʼura ña̱yóʼo ña̱ sakúxíkara miíyó ta va̱ása nda̱kúka koo iniyó xíʼin Jehová. Ná ka̱ʼa̱nyó xa̱ʼa̱ ña̱ kivi kundoʼoyó ta kotoyó ndáa ki̱ʼva ya̱ʼayó nu̱ú ña̱yóʼo.

TÁ NA̱ TI̱NDAʼA̱ XÍʼINYÓ VA̱ÁSA KÚUNA TESTIGO JEHOVÁ

7. Tá na̱ ti̱ndaʼa̱ xíʼún va̱ása kúúna testigo Jehová ¿ndáa ki̱ʼva xíniñúʼu kotoún miína?

⁷ Biblia káʼa̱nña na̱ xa̱a̱ ti̱ndaʼa̱ kixiva tu̱ndóʼo nu̱úna (1 Cor. 7:28). Soo tá na̱ ti̱ndaʼa̱ xíʼinyó va̱ása kúúna testigo Jehová koo ku̱a̱ʼáka tu̱ndóʼo nu̱úyó. Soo, xíniñúʼu ndakanixi̱níyó nda̱a̱ táki̱ʼva ndákanixi̱ní Ndióxi̱. Tá na̱ ti̱ndaʼa̱ xíʼinyó va̱ása xíínna ndasakáʼnuna Jehová, su̱ví xa̱ʼa̱ ña̱yóʼo kúú ña̱ sandákooyóna (1 Cor. 7:​12-16). Ná ñaʼá ná kúú cristiana xíniñúʼu ixato̱ʼóna yii̱ná ni ta̱yóʼo va̱ása kíʼinra kuenta xíʼin na̱ veʼera ña̱ ndasakáʼnuna Jehová. Ta saátu ta̱ xa̱a̱ ti̱ndaʼa̱ ta̱ kúú cristiano xíniñúʼu ku̱ʼvi̱-inira kunira ñá síʼira ta kundaarañá ni ñá yóʼo va̱ása ndásakáʼnuñá Jehová (Efes. 5:​22, 23, 28, 29).

8. ¿Ndáaña kivi nda̱ka̱tu̱ʼúnyó miíyó tá na̱ xa̱a̱ ti̱ndaʼa̱ xíʼinyó sásina nu̱úyó ña̱ va̱ása ndasakáʼnukayó Jehová?

⁸ ¿Ndáaña kivi keʼéyó tá na̱ xa̱a̱ ti̱ndaʼa̱ xíʼinyó sásina nu̱úyó ña̱ va̱ása ndasakáʼnukayó Jehová? Tá kúú, yii̱ iin ñá hermana ni̱ka̱ʼa̱nra xíʼinñá ña̱ sava kuití ki̱vi̱ kitañá ka̱ʼa̱nñá xa̱ʼa̱ Ndióxi̱. Tá ná kundoʼoyó ña̱yóʼo, ná nda̱ka̱tu̱ʼúnyó ña̱yóʼo miíyó: “¿Á káʼa̱n ta̱ ti̱ndaʼa̱ xíʼi̱n ña̱ ná sandákoi̱ ndasakáʼnui̱ Jehová? Tá va̱ása káʼa̱nra ña̱yóʼo xíʼi̱n, ¿á kivi kandíxai̱ ña̱ káʼa̱nra ta keʼíi̱ ña̱ kúni̱ra?”. Ña̱ vií kunda̱a̱-iniyó chindeétáʼanña xíʼinyó ña̱ va̱ása kaku ku̱a̱chi (Filip. 4:5).

9. ¿Ndáa ki̱ʼva sanáʼa̱ na̱ cristiano se̱ʼena ña̱ ixato̱ʼóna na̱ yivána na̱ kǒo kúú testigo?

⁹ Tá na̱ ti̱ndaʼa̱ xíʼinyó va̱ása ndásakáʼnuna Jehová, ixayo̱ʼvi̱kaña xíʼinyó ña̱ sanáʼa̱yó se̱ʼeyó. Tá kúú, xíniñúʼu sanáʼa̱yona ña̱ kuniso̱ʼona ña̱ sanáʼa̱ Biblia, ña̱ ixato̱ʼóna yivána xíʼin siʼína (Efes. 6:​1-3). Soo tá na̱ ti̱ndaʼa̱ xíʼi̱n va̱ása ndíku̱nna ña̱ káʼa̱n tu̱ʼun Ndióxi̱ ¿ndáaña keʼíi̱? Iin ña̱ va̱ʼa keʼéyó kúú ña̱ ixato̱ʼóyóna. Ná kiʼinyó kuenta xíʼin ña̱ va̱ʼa ña̱ kéʼéna tá ná taxiyó tíxa̱ʼvi ndaʼa̱na xa̱ʼa̱ ña̱yóʼo. ná va̱ása ka̱ʼa̱nyó ña̱ va̱ása va̱ʼa xíʼinna nu̱ú na̱ se̱ʼeyó. Va̱ʼaka ná ka̱ʼa̱nyó xíʼinna ña̱ iin tá iinyó ndaka̱xin á kachíñuyó nu̱ú Ndióxi̱ á va̱ása. Ña̱ va̱ʼa ña̱ kixáʼa keʼé na̱ se̱ʼeyó kivi chindeétáʼanña xíʼin na̱ ti̱ndaʼa̱ xíʼinyó ña̱ kuni̱na kunda̱a̱-inina xa̱ʼa̱ Jehová.

10. Tá na̱ ti̱ndaʼa̱ xíʼún va̱ása kúúna testigo, ¿ndáaña kivi keʼún ña̱ va̱ʼa sanáʼúnna xa̱ʼa̱ Jehová?

¹⁰ Sava yichi̱ na̱ kǒo kúú testigo kivi ka̱ʼa̱nna xíʼin se̱ʼena ña̱ ná keʼéna vikó ña̱ kéʼé na̱ ñuyǐví á ña̱ kéʼéna ti̱xin veʼe-ñu̱ʼu vatá. Sava ta̱a ta̱ kǒo kúú testigo sana ka̱ʼa̱nra xíʼin ñá síʼira ña̱ ná kǒo sanáʼa̱ñá se̱ʼena xa̱ʼa̱ Biblia. Soo ni saá ná kuu chika̱a̱vañá ndee̱ ña̱ sanáʼa̱ñá se̱ʼeñá ña̱ nda̱a̱ ña̱ káʼa̱n Biblia (Hech. 16:1; 2 Tim. 3:​14, 15). Tá kúú ña̱ va̱ása táxi yii̱ñá ña̱ sanáʼa̱ñá se̱ʼeñá na̱ loʼo ku̱i̱ya̱ xa̱ʼa̱ Biblia á va̱ása ku̱ʼu̱nna xíʼinñá reunión. Ní íxato̱ʼóñá ña̱ káʼa̱nra soo ña̱ kivi keʼéña kúú ña̱ ka̱ʼa̱nñá xa̱ʼa̱ ña̱ kándíxañá xíʼinna. Ta saá sanáʼa̱ñá miína ña̱ sanáʼa̱ Jehová (Hech. 4:​19, 20). Soo tá xa̱a̱ ná kuaʼnuna miína ndaka̱xin á ndasakáʼnuna Jehová á va̱ása (Deut. 30:​19, 20).a

TÁ SÁSI NA̱ VEʼEYÓ NU̱ÚYÓ ÑA̱ KOOYÓ TESTIGO

11. ¿Ndáaña kivi taxi tu̱ndóʼo ndaʼa̱yó xa̱ʼa̱ na̱ veʼeyó na̱ kǒo kúú Testigo?

¹¹ Tá ki̱xáʼayó káʼviyó Biblia xíʼin na̱ testigo Jehová sana kǒo níkáʼa̱nyó xíʼin na̱ veʼeyó. Ta tá ndu̱ndakú ña̱ kándíxayó Ndióxi̱ ki̱ʼinyó kuenta ña̱ xíniñúʼu ndakúka koo iniyó ta ka̱ʼa̱nyó xíʼinna xa̱ʼa̱ ña̱ kándíxayó (Mar. 8:38). Tá ña̱ nda̱kú íyo iniyó xíʼin Jehová kíxi tu̱ndóʼo nu̱úyó, ¿ndáaña xíniñúʼu keʼéyó ña̱ va̱ʼa táxi̱n koo iniyó ta saá nda̱kúka koo iniyó xíʼinra? Ná kotoyó sava ña̱ chindeétáʼan xíʼinyó.

12. ¿Ndáa xa̱ʼa̱ kúú ña̱ kivi kasi na̱ veʼeyó nu̱úyó xa̱ʼa̱ ña̱ kooyó testigo Jehová ta ndáaña kivi keʼéyó?

¹² Ná chika̱a̱yó ndee̱ ña̱ kunda̱a̱-iniyó xíʼin na̱ veʼeyó na̱ kǒo kúú Testigo. Kúsi̱íní-iniyó ña̱ kúnda̱a̱-iniyó xa̱ʼa̱ ña̱ nda̱a̱ ña̱ sanáʼa̱ Biblia. Soo sava na̱ veʼeyó ndákanixi̱nína na̱ sa̱ndáʼviva kúúna miíyó ta xa̱ʼa̱ ña̱ kǒo kéʼékayó vikó xíʼinna ndákanixi̱nína ña̱ kǒo kúni̱kayó miína. Ta sana nda̱a̱ yíʼvina ña̱ taxi Ndióxi̱ castigo ndaʼa̱yó tá ná kuviyó. Ña̱kán ná kunda̱a̱-iniyó xíʼin ña̱ ndákanixi̱nína ta saátu kuniso̱ʼoyó ña̱ káʼa̱nna xíʼinyó ña̱ va̱ʼa kunda̱a̱-iniyó ndáaña ndíʼi̱-inina xa̱ʼa̱ (Prov. 20:5). Kivi kundiku̱nyó yichi̱ ta̱ apóstol Pablo, ta̱yóʼo xi̱kunda̱a̱-inira xíʼin ña̱ xi̱ndoʼo na̱ yiví saáchi saá kúú ña̱ va̱ʼa xi̱chindeétáʼanra xíʼin na̱ yiví xa̱ʼa̱ Ndióxi̱. Tásaá ná keʼéyó kivi chindeétáʼanyó xíʼin na̱ veʼeyó ña̱ ka̱ʼa̱nyó xíʼinna xa̱ʼa̱ ña̱ kándíxayó (1 Cor. 9:​19-23).

13. ¿Ndáa ki̱ʼva xíniñúʼu ka̱ʼa̱nyó xíʼin na̱ veʼeyó?

¹³ Vií ná koo ña̱ ka̱ʼa̱nyó xíʼinna. Biblia káchiña: “Tu̱ʼun ña̱ ka̱ʼa̱nndó, viíní ná kooña” (Col. 4:6). Kivi ka̱ʼa̱nyó xíʼin Jehová ñá taxira espíritu santora ndaʼa̱yó ña̱ va̱ʼa vií ka̱ʼa̱nyó xíʼin na̱ veʼeyó. Ná va̱ása natúʼun kúáchiyó xíʼinna xa̱ʼa̱ ña̱ kándíxana. Tá káʼa̱nna á kéʼéna iin ña̱ va̱ása va̱ʼa kúni̱yó xíʼin ná kundiku̱nyó yichi̱ na̱ apóstol. Ta̱ Pablo ka̱ʼyíra ña̱yóʼo: “Tá káʼa̱n-ndi̱va̱ʼana xíʼinndi̱, viíní ndákuiinndi̱ yuʼúna; tá ndíku̱nna sa̱tándi̱, íxandakú-inindi̱; tá chíka̱a̱na ku̱a̱chi síkí sa̱tándi̱, viíní ndákuiinndi̱ yuʼúna” (1 Cor. 4:​12, 13).

14. ¿Xa̱ʼa̱ ña̱ vií kéʼéyó ndáa ki̱ʼva chindeétáʼanña xíʼinyó?

¹⁴ Vií ná keʼéyó. Ña̱ vií koo ña̱ ka̱ʼa̱nyó kivi chindeétáʼanña xíʼinyó ña̱ táxi̱n kooyó xíʼin na̱ veʼeyó, ta ña̱ chindeétáʼanka xíʼinyó kúú ña̱ vií koo ña̱ keʼéyó (kaʼvi 1 Pedro 3:​1, 2, 16). Tá vií íyo ña̱ kéʼéyó, na̱ yiví kiʼinna kuenta ña̱ na̱ testigo Jehová si̱í íyona xíʼin na̱ ti̱ndaʼa̱ xíʼinna, vií ndáana se̱ʼena ta va̱ása yaku̱a̱ íyo ña̱ kéʼéna. Soo ni tá va̱ása xa̱a̱ na̱ veʼeyó nduuna Testigo, kivi kusi̱í-iniyó saáchi kúnda̱a̱-iniyó ña̱ ndásakáʼnuyó Jehová ta nda̱kú íyo iniyó xíʼinra.

15. ¿Ndáaña kivi keʼéyó ña̱ va̱ʼa kǒo xa̱a̱yó ka̱ʼa̱n kúáchiyó xíʼin na̱ veʼeýo?

¹⁵ Xa̱a̱ ya̱chi̱ka ná kiʼinyó kuenta ndáaña kivi sakáku ku̱a̱chi. Xa̱a̱ ya̱chi̱ka ná ndakanixi̱níyó ndáa xa̱ʼa̱ kúú ña̱ kivi xa̱a̱yó ka̱ʼa̱n kúáchiyó xíʼin na̱ veʼeyó ta ná kiʼinyó kuenta ndáaña kivi keʼéyó ña̱ va̱ʼa ndasaviíyó ña̱yóʼo (Prov. 12:​16, 23). Iin ñá hermana ñá íyo chí Australia káchiñá: “Si̱soi̱ xi̱sasira nu̱úndi̱ xa̱ʼa̱ ña̱ xi̱sakúaʼandi̱ xa̱ʼa̱ ña̱ nda̱a̱. Tá kúma̱níka ka̱ʼa̱nndi̱ xíʼinra ndáa ki̱ʼva íyora, yiíi̱ xíʼin miíi̱ xi̱ka̱ʼa̱nndi̱ xíʼin Jehová ña̱ ná chindeétáʼanra xíʼinndi̱ ña̱ ná va̱ása sandíi̱ ndakuiinndi̱ yuʼúra. Xa̱a̱ ya̱chi̱ka xi̱ndakanixi̱níndi̱ ndáa xa̱ʼa̱ kúú ña̱ kivi ka̱ʼa̱nndi̱ xíʼinra. Ta ña̱ va̱ása natúʼunndi̱ xíʼinra xa̱ʼa̱ religión loʼo tiempo xi̱ka̱ʼa̱nndi̱ xíʼinra”.

16. ¿Ndáaña kivi chindeétáʼan xíʼinyó tá túviyó ña̱ ku̱a̱chi miíyó ni̱xi̱yo ña̱ na̱túʼun kúáchiyó xíʼin na̱ veʼeyó?

¹⁶ Sava yichi̱ kivi natúʼun kúáchivayó xíʼin na̱ veʼeyó na̱ kǒo kúú Testigo. Sana kusuchí-iniyó xa̱ʼa̱ ña̱ kuu soo kúʼvi̱-iniyó xíniyó miína ta kúni̱yó ndiʼi tiempo sakúsi̱íyó inina. Tá saá ná kundoʼoyó ná ndakaʼányó chi ndáyáʼvika ña̱ nda̱kú koo iniyó xíʼin Jehová nu̱úka ña̱ ku̱ʼvi̱-iniyó kuniyó na̱ veʼeyó. Tá saá ná keʼéyó kivi chindeétáʼanyó xíʼin na̱ veʼeyó ña̱ kiʼinna kuenta ña̱ keʼéyó ña̱ káʼa̱n Biblia kúú ña̱ ndáyáʼvika. Nda̱a̱ ndáaka ña̱ ná kuu, ná ndakaʼányó chi va̱ása kivi ixandúxayó xíʼin nda̱a̱ ni iinna ña̱ xa̱a̱na ndasakáʼnuna Jehová. Soo ña̱ kivi keʼéyó kúú ña̱ na̱ʼa̱yó ña̱ va̱ʼaní chíndeétáʼanña xíʼinyó ña̱ kuniso̱ʼoyó Ndióxi̱. Xa̱ʼa̱ ña̱ kúʼvi̱-inira xínira ndiʼiyó nda̱a̱ táki̱ʼva kéʼéra xíʼin miíyó: táxira ña̱ ná ndaka̱xin mií na̱kán á ndasakáʼnunara á va̱ása (Is. 48:​17, 18).

TÁ IIN NA̱ VEʼEYÓ SA̱NDÁKOONA JEHOVÁ

17, 18. ¿Ndáaña kivi keʼéyó tá iin na̱ veʼeyó sandákoona Jehová?

¹⁷ Tá iin na̱ veʼeyó kítana ti̱xin ñuu Jehová á va̱ása kúni̱kana koona testigo Jehová kúsuchíní-iniyó. ¿Ndáaña kivi keʼéyó tá kúú ña̱yóʼo?

¹⁸ Na̱ va̱ása sandákooyó ña̱ kítáʼanyó xíʼin Jehová. Ña̱ va̱ʼa ndakú koo ña̱ kándíxayó Ndióxi̱, xíniñúʼu kaʼviyó Biblia ndiʼi ki̱vi̱, ku̱ʼu̱nyó reunión ta xa̱a̱ ya̱chi̱ka sakúaʼayó ña̱ kotoyó ki̱vi̱ kán, keeyó natúʼunyó xa̱ʼa̱ tu̱ʼun Ndióxi̱ ta ndukúyó nu̱ú Jehová ña̱ chindeéra miíyó (Jud. 20, 21). Soo ¿ndáaña̱ kivi keʼéyó tá kúsuchí-iniyó xa̱ʼa̱ ña̱yóʼo? Ná kǒo ndakava-iniyó. Ná kundi̱ʼi̱ka-iniyó ña̱ kachíñuyó nu̱ú Jehová, ña̱yóʼo chindeéña miíyó ña̱ va̱ása kusuchíka-iniyó. Ná kotoyó ña̱ ndo̱ʼo ta̱ ka̱ʼyí Salmo 73. Ña̱ nda̱kaniníxi̱níra xa̱ʼa̱ ña̱ ndo̱ʼora, ki̱xáʼara ndíʼi̱ní-inira. Soo ña̱ xi̱ndakanixi̱níra xa̱ʼa̱ ña̱ xi̱kachíñura nu̱ú Jehová kúú ña̱ chi̱ndeétáʼan xíʼinra ña̱ na̱samara ña̱ xi̱ndakanixi̱níra (Sal. 73:​16, 17). Tá ná keʼéyó táʼan ña̱yóʼo chindeétáʼanña xíʼinyó.

19. ¿Ndáa ki̱ʼva náʼa̱yó ña̱ íxato̱ʼóyó ña̱ nda̱kaxin Jehová keʼéra?

¹⁹ Ná ixato̱ʼóyó ña̱ nda̱kaxin Jehová. Tá ndákiʼinyó consejo, tá xa̱ʼa̱ sana xóʼvi̱yó xa̱ʼa̱ ña̱yóʼo, soo va̱ʼaníva chíndeétáʼanña xíʼinyó, nda̱a̱ xíʼin na̱ ni̱ki̱ʼvi ku̱a̱chi (kaʼvi Hebreos 12:11). Tá kúú, Jehová káʼa̱nra xíʼinyó ña̱ ná sandákooyó ña̱ kǒo kitáʼanyó xíʼin na̱ ni̱ki̱ʼvi ku̱a̱chi tá kǒo ndíko-inina xa̱ʼa̱ ña̱yóʼo (1 Cor. 5:​11-13). Ni kúsuchí-iniyó xíniñúʼu sandákooyó ña̱ ka̱ʼa̱nyó xíʼin na̱ veʼeyó na̱ ki̱ta ti̱xin ñuu Jehová, ni xíʼin teléfono, mensaje, carta, correo á nda̱a̱ ndáaka xíʼin inka ña̱ʼa.

20. ¿Ndáaña xíniñúʼu kundaa-iniyó?

²⁰ Ná kundaa-iniyó ña̱ ndikó tukuna. Ña̱ kúʼvi̱-iniyó ndiʼiña ndátuña, xa̱ʼa̱ ña̱kán ndátuyó ña̱ ndikó tuku na̱ ku̱xíká nu̱ú Jehová (1 Cor. 13:7). Tá xítoyó ña̱ iin na̱ veʼeyó ki̱xáʼana násama ña̱ kéʼéna, kivi ka̱ʼa̱nyó xíʼin Ndióxi̱ ña̱ Biblia ná taxiña ndee̱ ndaʼa̱na ña̱ ndikó tukuna nu̱úra (Is. 44:22).

21. ¿Ndáaña keʼéyó tá ti̱xin veʼeyó kána ku̱a̱chi xa̱ʼa̱ ña̱ ndíku̱nyó ta̱ Jesús?

²¹ Ta̱ Jesús ni̱ka̱ʼa̱nra ña̱ xíniñúʼu ku̱ʼvika-iniyó kuniyó ta̱kán nu̱úka inka na̱ yiví. Soo xi̱kunda̱a̱-inira na̱ discípulora nda̱kú koo inina xíʼinra ni ná ixandi̱va̱ʼa na̱ veʼena xíʼinna. Tá ti̱xin veʼeyó ki̱xáʼa ku̱a̱chi xa̱ʼa̱ ña̱ ndíku̱nyó ta̱ Jesús, ná ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ ya̱ʼayó nu̱ú tu̱ndóʼo yóʼo (Is. 41:​10, 13). Ta ná ndakanixi̱níyó ña̱ mií ta̱ Jesús xíʼin Jehová kúsi̱íní-inina xíʼin ña̱ kéʼéyó ta taxira ku̱a̱ʼání ña̱ va̱ʼa ndaʼa̱yó xa̱ʼa̱ ña̱ nda̱kú íyo iniyó xíʼinna. ¿Á su̱ví ña̱ nda̱a̱ sákusi̱íníña iniyó?