Tá táxi Ndióxi̱ consejo ndaʼa̱yó náʼa̱ra ña̱ kúʼvi̱-inira xínira miíyó

1. ¿Ndáaña káʼa̱n Biblia xa̱ʼa consejo?

¿NDÁAÑA ndákanixi̱níún tá xíniso̱ʼún tu̱ʼun consejo? Savana ndákanixi̱nína ña̱ sanáʼa̱yó iinna kúúña. Soo su̱ví ña̱yóʼo kuití kúni̱ kachiña. Kúni̱ kachiña taxiyó yichi̱ nu̱úna, ka̱ʼa̱nyó xíʼinna xa̱ʼa ña̱ va̱ása va̱ʼa kéʼéna á nda̱a̱ taxiyó castigo ndaʼa̱na. Ña̱kán tá táxi Ndióxi̱ consejo ndaʼa̱ iinna sava nda̱a̱ táxira castigo ndaʼa̱na. Soo nda̱a̱ ni iin yichi̱ va̱ása íxandi̱va̱ʼaníra xíʼinna. Tá táxira consejo ndaʼa̱na náʼa̱ra ña̱ kúʼvi̱-inira xínirana ta kúni̱ra kutakuna ndiʼi tiempo (Heb. 12:6). Ña̱ Biblia káchiña ña̱ va̱ʼa kúúña ndakiʼinyó consejo ta sava yichi̱ chítáʼanñaña xíʼin ña̱ kuxini̱yó xa̱ʼa iin ña̱ʼa, ña̱ kuumiíyó ña̱ ndíchi, ña̱ kuʼvi̱-iniyó kuniyó iinna á ña̱ taxi kutakuyó (Prov. 1:2-7; 4:11-13). Xa̱ʼa ña̱ táxina consejo ndaʼa̱yó kúú ña̱ kúni̱na sanáʼa̱na miíyó nda̱a̱ táki̱ʼva íxaa iin ta̱a xíʼin se̱ʼera ta̱ kúni̱níra xínira.

2, 3. ¿Ndáa u̱vi̱ ña̱ʼa kivi keʼéyó tá táxiyó consejo? (Koto na̱ʼná ña̱ va̱xi chí xa̱ʼa).

² Ná ka̱ʼa̱nyó xa̱ʼa iinña. Iin ta̱ loʼo ta̱ naní Carlos sísikíra iin pelota ini veʼera. Ta siʼíra káʼa̱nñá xíʼinra: “Ta̱ loʼo xa̱a̱ xíni̱ún ña̱ kǒo kívi kusikíún pelota ini veʼe chi kivi taʼviún ña̱ʼa”. Soo ta̱yóʼo kǒo xíniso̱ʼora ña̱ káʼa̱nñá xíʼinra ta ndákundeéra sísikíra. Ta iin kama ka̱ni pelota iin jarra ta ni̱taʼvíña. ¿Ndáaña keʼéñá xíʼinra vitin? Siʼna ka̱ʼa̱nñá xíʼinra tasaá taxiñá castigo ndaʼa̱ra. Ka̱ʼa̱nñá xíʼinra nda̱chun kúú ña̱ va̱ása va̱ʼa ña̱ ke̱ʼéra. Chi kúni̱ñá ná kunda̱a̱-inira ña̱ xíniñúʼu kuniso̱ʼora ña̱ káʼa̱n na̱ yivára chi ña̱yóʼo kúú ña̱ va̱ʼa, ta ña̱ káʼa̱nna xíʼinra ña̱ kivi keʼévara kúúña. Ña̱ va̱ʼa chindeé táʼanñá xíʼinra ña̱ kunda̱a̱-inira xíʼin ña̱yóʼo, táxiñá iin castigo ndaʼa̱ra ta loʼo tiempo kíndaañá pelota ndaʼa̱ra. Ni kǒo kútóo ta̱ Carlos ña̱yóʼo, soo chindeéña miíra ña̱ kunda̱a̱-inira tá kǒo xíniso̱ʼora ña̱ káʼa̱n na̱ yivára xíʼinra kixi tu̱ndóʼo nu̱úra.

³ Ndiʼiyó na̱ káʼvi tu̱ʼun Ndióxi̱ táki̱ʼva íyo na̱ veʼe Ndióxi̱ saá íyoyó (1 Tim. 3:15). Ña̱kán kúúña íxato̱ʼóyó ley Ndióxi̱ ta táxiyó ña̱ taxira consejo ndaʼa̱yó tá kéʼéyó ña̱ va̱ása va̱ʼa. Tá ni̱ki̱ʼviyó iin ku̱a̱chi ta xa̱ʼa ña̱yóʼo va̱xi tu̱ndóʼo nu̱úyó, consejo Ndióxi̱ sandákaʼánña miíyó ña̱ ndáyáʼviní ña̱ kuniso̱ʼoyó ña̱ káʼa̱nra (Gál. 6:7). Ndióxi̱ kúni̱níra xínira miíyó tá kǒo kúni̱ra xo̱ʼvi̱yó (1 Ped. 5:6, 7).

4. a) ¿Nda̱saa chíndeé táʼan consejo xíʼinyó? b) ¿Ndáaña sakuaʼayó nu̱ú artículo yóʼo?

⁴ Tá táxiyó consejo ña̱ va̱xi nu̱ú Biblia ndaʼa̱ se̱ʼeyó saátu xíʼin na̱ káʼviyó xíʼin, ña̱yóʼo chindeé táʼanña xíʼinna ña̱ va̱ʼa xa̱a̱na kuuna discípulo ta̱ Jesús. Tu̱ʼun Ndióxi̱ kúú ña̱ xíniñúʼuyó ña̱ sánáʼa̱yó na̱ yiví ta chíndeé táʼanña xíʼinyó ña̱ chindeéyó inkana ña̱ nasamana miína xíʼin ña̱ kéʼéna. Tu̱ʼun Ndióxi̱ yóʼo kúú ña̱ kivi kuniñúʼuyó ña̱ va̱ʼa sanáʼa̱yó se̱ʼeyó á na̱ káʼviyó xíʼin ña̱ va̱ʼa kunda̱a̱-inina xa̱ʼa Ndióxi̱ ta kandíxana ndiʼi chiñu ña̱ xa̱ʼnda ta̱ Jesús (2 Tim. 3:16; Mat. 28:19, 20). Jehová chíndeé táʼanra xíʼinyó ña̱ va̱ʼa sánáʼa̱yó na̱ káʼvi xíʼinyó tasaá xa̱a̱na kuuna discípulo ta̱ Jesús (kaʼvi Tito 2:11, 12).a Ta vitin ná sakuaʼayó xa̱ʼa u̱ni̱ pregunta ña̱ ndáyáʼviní: 1) ¿Nda̱chun tá táxi Ndióxi̱ consejo ndaʼa̱yó náʼa̱ra ña̱ kúʼvi̱ní-inira xínira miíyó? 2) ¿Ndáaña sakuaʼayó xíʼin na̱ yiví na̱ ta̱xi Ndióxi̱ consejo ndaʼa̱? 3) ¿Ndáa ki̱ʼva kivi kundiku̱nyó yichi̱ Jehová xíʼin ta̱ Jesús tá táxiyó consejo?

VIÍNÍ TÁXI NDIÓXI̱ CONSEJO NDAʼA̱YÓ

5. ¿Nda̱saa náʼa̱ Jehová ña̱ kúʼvi̱-inira xínira miíyó?

⁵ Jehová sánáʼa̱ra miíyó ta káʼa̱nra xíʼinyó xa̱ʼa ña̱ kéʼéyó chi kúni̱ra xínira miíyó. Kúni̱ra ña̱ ná kuukayó migora ta ná kutakuyó ndiʼi tiempo (1 Juan 4:16). Ni iin yichi̱ va̱ása káʼa̱n ndi̱va̱ʼara xíʼinyó ta ni va̱ása káʼa̱nra ña̱ kǒo ndáyáʼviyó nu̱úra (Prov. 12:18). Ña̱ kéʼéra kúúña, xítora ña̱ va̱ʼa kúúmiíyó ta íxato̱ʼóra ña̱ kúni̱yó keʼéyó. ¿Á saá túviyó xíʼin consejo ña̱ táxi Jehová ndaʼa̱yó tá xíniñúʼura ña̱ Biblia, na̱ yiváyó á na̱ anciano ña̱ congregación? Sava tá va̱ása kíʼinyó kuenta ta ku̱a̱ʼa̱n ndákavayó, na̱ anciano táxina consejo ndaʼa̱yó soo viíní káʼa̱nna xíʼinyó. Xíʼin ña̱yóʼo náʼa̱na ña̱ kúni̱ní Jehová xínira miíyó (Gál. 6:1).

6. Ni ná nundaa chiñu ña̱ kúúmií iinna ti̱xin congregación, ¿nda̱chun káʼa̱nyó ña̱ xíʼin ña̱yóʼo náʼa̱ Jehová ña̱ kúʼvi̱-inira xínirana?

⁶ Sava yichi̱ su̱ví kuití táxina consejo ndaʼa̱na. Tá ni̱ki̱ʼvina iin ku̱a̱chi ndeé sana kindaana chiñu ña̱ kúúmiína ti̱xin congregación. Ta ni saá ná ndoʼona, xa̱ʼa ña̱ ndákiʼinna consejo kúni̱ kachiña ña̱ kúni̱ Jehová xínirana. Xa̱ʼa ña̱ nu̱ndaa chiñu ndaʼa̱na sana chindeé táʼanña xíʼinna kunda̱a̱-inina ña̱ xíniñúʼuní chika̱a̱na ndée ña̱ kaʼvina Biblia, ña̱ ndakanixi̱nína xa̱ʼa ña̱ káʼvina saátu ña̱ ka̱ʼa̱nna xíʼin Ndióxi̱. Ña̱yóʼo kúú ña̱ chindeé táʼan xíʼinna ña̱ va̱ʼaka xa̱a̱na kutáʼanna xíʼin Jehová (Sal. 19:7). Tá ná ya̱ʼa tiempo sana ndakiʼin tukuna chiñu ña̱ xi̱kuumiína. Xa̱ʼa ña̱ távána iinna ña̱ kǒo kúúkana testigo Jehová xíʼin ña̱yóʼo náʼa̱ Jehová ña̱ kúʼvi̱-inira xínira na̱ congregación ña̱ va̱ʼa ná kǒo ña̱ ndoʼona (1 Cor. 5:6, 7, 11). Ndiʼi consejo ña̱ táxi Jehová nda̱kúní íyoña, ná kée ti̱xin ña̱ congregación kivi kunda̱a̱-inina ña̱ va̱ása va̱ʼa ña̱ níkeʼéna ta ndikó-inina xa̱ʼa ña̱ ke̱ʼéna (Hech. 3:19).

CONSEJO ÑA̱ TÁXI JEHOVÁ NDAʼA̱YÓ CHÍNDEÉÑA MIÍYÓ

7. a) ¿Ndáa ta̱a xi̱kuu ta̱ Sebná? b) ¿Ta ndáaña va̱ása va̱ʼa ki̱xaʼára kéʼéra?

⁷ Ña̱ va̱ʼa kunda̱a̱-iniyó ña̱ ndáyáʼviní iin consejo ná ka̱ʼa̱nyó xa̱ʼa u̱vi̱ na̱ nda̱kiʼin consejo nu̱ú Jehová: Ta̱ Sebná, ta̱ ni̱xi̱yo tiempo ta̱ rey Ezequías xi̱kuura, xíʼin ta̱ Graham, iin ta̱ hermano ta̱ íyo tiempoyó vitin. Siʼna ná ka̱ʼa̱nyó xa̱ʼa ta̱ Sebná. Sana ta̱yóʼo xi̱ndisochíñura xíʼin veʼe ta̱ Ezequías, iin chiñu káʼnuní xi̱kuu ña̱yóʼo (Is. 22:15). Soo xa̱ʼa ña̱yóʼo ndu̱ura iin ta̱a tá ni̱nuní kúni ta ki̱xaʼára kúni̱ra ndukáʼnura. Nda̱a̱ ni̱xa̱a̱ra ke̱ʼéra iin ya̱vi̱ liviní nu̱ú nduxunra ta ni̱xi̱kara xíʼin carro tú va̱ʼaní náʼa (Is. 22:16-18).

8. ¿Nda̱saa ta̱xi Jehová consejo ndaʼa̱ ta̱ Sebná, ta ndáaña i̱xaa ta̱yóʼo tándi̱ʼi?

⁸ Xa̱ʼa ña̱ xi̱kuni̱ ta̱ Sebná ndukáʼnura, Ndióxi̱ ki̱ndaara chiñu ndaʼa̱ra ta ta̱xiraña ndaʼa̱ ta̱ Eliaquim (Is. 22:19-21). Ña̱yóʼo ku̱uña tá ki̱xaʼá kúni̱ ta̱ rey asirio ta̱ Senaquerib sandiʼi-xa̱ʼara ñuu Jerusalén. Ni̱ya̱ʼa loʼo tiempo, ta̱ Senaquerib chi̱ndaʼára na̱ chíñu náʼnu nu̱úra ña̱ ku̱a̱ʼa̱nna sayíʼvina na̱ judío xíʼin ta̱ Ezequías (2 Rey. 18:17-25). Ta̱ Ezequías chi̱ndaʼá ta̱ Eliaquim ña̱ ku̱a̱ʼa̱nra ka̱ʼa̱nra xíʼin na̱ chíñu ñuu Asiria, soo va̱ása ku̱a̱ʼa̱n mitúʼunra chi ku̱a̱ʼa̱n inka u̱vi̱ka ta̱a xíʼinra. Iin ta̱yóʼo kúú ta̱ Sebná, ta vitin secretario kúúra nu̱ú ta̱ rey Ezequías. Xíʼin ña̱yóʼo kúnda̱a̱-iniyó ña̱ ndo̱ʼo ta̱ Sebná va̱ása níchika̱a̱raña-inira ña̱ sa̱a̱ra kakara chi iin ta̱a ta̱ vitá-iniva ndu̱ura. Chi nda̱kiʼinra iin chiñu loʼoka nu̱ú ña̱ xi̱kuumiíra tá ya̱chi̱. ¿Ndáaña sákuaʼayó xíʼin ña̱yóʼo? Yóʼo ka̱ʼa̱nyó xa̱ʼa u̱ni̱ña.

9-11. a) ¿Ndáaña kivi sakuaʼayó xíʼin ña̱ ndo̱ʼo ta̱ Sebná? b) ¿Ndáaña ndákanixi̱níún xa̱ʼa ña̱ ke̱ʼé Jehová xíʼin ta̱ Sebná?

⁹ Ña̱ nu̱ú, xa̱ʼa ña̱ nu̱ndaa chiñu ndaʼa̱ ta̱ Sebná náʼa̱ña nu̱úyó ña̱ va̱ása va̱ʼa kána ña̱ kéʼé na̱ ni̱nuní kúni; ni ña̱ kéʼé na̱ ndákanixi̱ní ña̱ ndáyáʼvikana nu̱ú inkana (Prov. 16:18). Sana kúúmiíún iin chiñu ti̱xin congregación ta savana ndákanixi̱nína ña̱ káʼnuní chiñu kéʼún. Tá kúúmiíún iin chiñu yóʼo, ¿á chika̱ún ndée ña̱ vitá koo iniún? ¿Á ndasakáʼnún Jehová xa̱ʼa chiñu ña̱ xa̱a̱ kúúmiíún? (1 Cor. 4:7). Ta̱ apóstol Pablo ni̱ka̱ʼa̱nra: “Káʼi̱n xíʼin ndiʼindó ña̱ kǒo ndakanixi̱níndó ña̱ ndáyáʼvika ndóʼó nu̱ú na̱ inka; viíní ndakanixi̱níndó nda̱a̱ táki̱ʼva kúni̱ Ndióxi̱” (Rom. 12:3).

¹⁰ Ña̱ u̱vi̱ ka̱ʼa̱nyó xa̱ʼa kúúña, xa̱ʼa ña̱ ta̱xi Jehová consejo ndaʼa̱ ta̱ Sebná kúni̱ kachiña ña̱ xíto Jehová ña̱ sana kiviva na̱samara xíʼin ña̱ kéʼéra (Prov. 3:11, 12). Ña̱yóʼo kivi chindeé táʼan xíʼin na̱ nu̱ndaa chiñu ndaʼa̱ ti̱xin congregación. Nu̱úka ña̱ sa̱a̱na ta tuku ta tuku nda̱kaʼánna xa̱ʼa ña̱ xa̱a̱ ku̱u, va̱ʼaka ná chika̱a̱na ndée ña̱ kachíñuna nu̱ú Jehová ni va̱ása kúúmiína iin chiñu ti̱xin congregación. Ta ná kunda̱a̱-inina consejo ña̱ nda̱kiʼinna nu̱ú Jehová kúni̱ kachiña ña̱ kúʼvi̱-inira xínirana. Ná ndakaʼányó chi tá kúúyó na̱ vitá-ini, Jehová taxira ña̱ va̱ʼa ndaʼa̱yó (kaʼvi 1 Pedro 5:6, 7).b Kúni̱yó taxiyó miíyó ndaʼa̱ Jehová ña̱ ná sanáʼa̱ra miíyó ndiʼi ña̱ kúni̱ra.

¹¹ Ña̱ u̱ni̱, ña̱ ke̱ʼé Jehová xíʼin ta̱ Sebná sánáʼa̱ña na̱ íyo se̱ʼe saátu na̱ anciano ña̱ congregación ndáa ki̱ʼva taxina consejo. Ña̱ táxi Jehová castigo ndaʼa̱ na̱ ni̱ki̱ʼvi iin ku̱a̱chi náʼa̱ra ña̱ kúʼvi̱-inira xínirana, ña̱ kúndasíra kúú ku̱a̱chi ña̱ ke̱ʼévana. Jehová xítora ña̱ va̱ʼa ña̱ kéʼé na̱ yiví. Tá ná taxiún consejo ndaʼa̱ iinna, ¿á keʼún táki̱ʼva kéʼé Jehová? (Jud. 22, 23).

12-14. a) ¿Ndáaña kéʼé sava na̱ yiví tá ndákiʼinna consejo nu̱ú Jehová? b) ¿Nda̱saa chi̱ndeé tu̱ʼun Ndióxi̱ iin ta̱ hermano ña̱ na̱samara, ta ndáaña ku̱u tándi̱ʼi?

¹² Sava na̱ yiví sáa̱na ña̱ ndákiʼinna consejo ta kúxíkana nu̱ú Jehová xíʼin na̱ congregación (Heb. 3:12, 13). ¿Á kivi chindeé táʼanyó xíʼin na̱yóʼo? Ña̱ va̱ʼa ndakuiinyó pregunta yóʼo, ná ka̱ʼa̱nyó xa̱ʼa ta̱ Graham. Ta̱yóʼo ki̱tara ti̱xin ñuu Ndióxi̱ tándi̱ʼi ndi̱kó tukura, chí nu̱úka loʼo sa̱ndákoora ña̱ keʼéra chiñu Ndióxi̱. Tá xa̱a̱ ni̱ya̱ʼa tiempo, ni̱ka̱ʼa̱nra xíʼin iin ta̱ anciano ta̱ ni̱xa̱a̱ ku̱u migora ña̱ kúni̱ra ña̱ ná kaʼvi ta̱yóʼo Biblia xíʼinra.

¹³ Ta̱ anciano yóʼo ndákaʼánra xa̱ʼa ña̱yóʼo: “Ña̱ xi̱ndoʼo ta̱ Graham kúúña ni̱nuní xi̱kunira. Xi̱ka̱ʼa̱n kúáchira xa̱ʼa na̱ anciano na̱ ti̱in ku̱a̱chi xíʼinra ña̱ ni̱xa̱a̱ra ki̱tara ti̱xin ñuu Ndióxi̱. Ña̱kán ki̱xaʼándi̱ káʼvindi̱ xa̱ʼa sava ña̱ va̱xi nu̱ú Biblia ña̱ káʼa̱n xa̱ʼa ña̱ kivi ndoʼoyó tá ni̱nuní kúniyó. Ta̱ Graham ki̱xaʼá ku̱a̱ʼa̱n kíʼinra kuenta ña̱ va̱ása va̱ʼa ña̱ kéʼéra, ta va̱ása níkutóora ña̱yóʼo. Ta va̱ʼaní na̱samara. Na̱kunda̱a̱-inira xa̱ʼa ña̱ ni̱nuní kúni̱ra nda̱a̱ táki̱ʼva íyo iin “viga” ña̱ ndási nu̱úra saá ni̱xi̱yoña, chi ña̱ xi̱ndoʼora kúú ña̱ xi̱ka̱ʼa̱n kúáchiníra xa̱ʼa inkana. Tasaá kamaní na̱samara ña̱ kéʼéra. Ki̱xaʼá xíka ni̱ʼira reunión, ki̱xaʼára káʼvira Biblia ta ki̱xaʼá káʼa̱nra xíʼin Ndióxi̱ ndiʼi ki̱vi̱. Ta ki̱xaʼá kíʼinra kuenta xíʼin na̱ veʼera ña̱ sakuaʼana xa̱ʼa Ndióxi̱ ta ña̱yóʼo sa̱kusi̱íníña-ini ñá síʼíra xíʼin ná se̱ʼera” (Luc. 6:41, 42; Sant. 1:23-25).

¹⁴ Ta̱ anciano káʼa̱nkara: “Iin ki̱vi̱ ña̱ ni̱ka̱ʼa̱n ta̱ Graham xíʼi̱n nda̱a̱ ni̱taʼví níma̱i̱ xíʼinña: ‘Xa̱a̱ ku̱a̱ʼání ku̱i̱ya̱ kúú ña̱ xíni̱i̱ xa̱ʼa Ndióxi̱ nda̱a̱ xi̱kui̱ precursor. Soo nda̱a̱ vitin kúú ña̱ kivi ka̱ʼi̱n ña̱ ndixaní kúúña kúʼvi̱-inii̱ xínii̱ Jehováʼ. Loʼo tiempo ni̱ya̱ʼa, ni̱ka̱ʼa̱nna xíʼin ta̱ Graham ña̱ ná chindeérana xíʼin micrófono ti̱xin ña̱ reunión, ta ta̱yóʼo chi̱ndayáʼviníra chiñu yóʼo. Ña̱ ke̱ʼéra sa̱náʼa̱ña yi̱ʼi̱ tá iin na̱ yiví ndákiʼinna consejo Jehová ta xáa̱na ndúuna iin na̱ yiví vitá-ini, ku̱a̱ʼání bendición táxi Jehová ndaʼa̱na”.

NÁ KUNDIKU̱NYÓ YICHI̱ JEHOVÁ XÍʼIN TA̱ JESÚS TÁ TÁXIYÓ CONSEJO

15. ¿Ndáaña xíniñúʼu keʼéyó ña̱ va̱ʼa kuniso̱ʼo inkana consejo ña̱ táxiyó ndaʼa̱na?

¹⁵ Ña̱ va̱ʼa sanáʼa̱ viíyó, siʼna xíniñúʼu taxiyó sánáʼa̱na miíyó (1 Tim. 4:15, 16). Saátu tá xíniñúʼu Jehová yóʼó ña̱ taxiún consejo ndaʼa̱ inkana, xíniñúʼu vitá koo iniún ta taxiún ná sánáʼa̱ra yóʼó. Tá ná kuni inkana ña̱ vitá-iniún, ixato̱ʼókana yóʼó ta kuniso̱ʼona consejo ña̱ táxiún. Ná ka̱ʼa̱nyó xa̱ʼa ña̱ ke̱ʼé ta̱ Jesús.

16. ¿Ndáaña sakuaʼayó xíʼin ña̱ sa̱náʼa̱ ta̱ Jesús xíʼin ña̱ xi̱taxira consejo?

¹⁶ Ta̱ Jesús ndiʼi yichi̱ xi̱niso̱ʼora ña̱ káʼa̱n yivára ni i̱xayo̱ʼvi̱ña xíʼinra (Mat. 26:39). Ta ni̱ka̱ʼa̱nra ña̱ ndiʼi ña̱ ndíchi xi̱kuumiíra á ña̱ sa̱náʼa̱ra, Ndióxi̱ ta̱xiña ndaʼa̱ra (Juan 5:19, 30). Xa̱ʼa ña̱ vitá ni̱xi̱yo inira ta xi̱xiniso̱ʼora ña̱ káʼa̱n Ndióxi̱ ni̱xa̱a̱ra ku̱ura iin maestro ta̱ va̱ʼaní ini ta xi̱kundáʼvi-inira xi̱xinira na̱ yiví, ña̱kán ku̱a̱ʼánína xi̱ndiku̱n sa̱tára (kaʼvi Lucas 4:22).c Tu̱ʼun vií ña̱ xi̱ka̱ʼa̱nra sa̱ndíkoña-ini na̱ yiví na̱ kúsuchíní-ini xa̱ʼa ña̱ ku̱a̱ʼání tu̱ndóʼo xi̱ya̱ʼana nu̱ú (Mat. 12:20). Ta̱ Jesús va̱ása nísa̱a̱ kamara tá ni̱nuní xi̱kuni na̱ apóstolra á nina miína xi̱ndakanixi̱nína xa̱ʼa. Viíní xi̱ka̱ʼa̱nra xíʼinna xa̱ʼa ña̱ xi̱keʼéna (Mar. 9:33-37; Luc. 22:24-27).

17. ¿Ndáaña xíniñúʼu keʼé na̱ anciano ña̱ va̱ʼa kundaana na̱ congregación?

¹⁷ Na̱ anciano va̱ʼaní kéʼéna tá ndíku̱nna yichi̱ ta̱ Jesús tá táxina consejo ña̱ va̱xi nu̱ú Biblia. Saá kúú ña̱ náʼa̱na ña̱ kúni̱na ná kuniʼi Jehová xíʼin ta̱ Jesús yichi̱ nu̱úna. Ta̱ apóstol Pedro ni̱ka̱ʼa̱nra: “Kundaandó na̱ congregación Ndióxi̱, kǒo keʼéndóña xíʼin ña̱ nduxa̱, kusi̱í-inindó keʼéndóña; kǒo keʼéndóña xa̱ʼa ña̱ chaʼvina ndóʼó, xíʼin ndinuʼu-inindó keʼéndóña; kǒo kuta̱a-inindó nu̱ú na̱ ñuu Ndióxi̱, miíndó xíniñúʼu chinúu yichi̱ nu̱úna” (1 Ped. 5:2-4). Na̱ anciano na̱ ndíku̱n ña̱ káʼa̱n ta̱ Jesús, chi ta̱yóʼo kúú ta̱ níʼi yichi̱ nu̱ú na̱ congregación, ta saátu tá ndíku̱nna ña̱ káʼa̱n Jehová, ku̱a̱ʼání ña̱ va̱ʼa ndákiʼin miína xíʼin na̱ congregación (Is. 32:1, 2, 17, 18).

18. a) ¿Ndáaña káʼa̱n Jehová keʼé na̱ íyo se̱ʼe? b) ¿Nda̱saa chíndeé Jehová na̱ íyo se̱ʼe ña̱ va̱ʼa taxina consejo ndaʼa̱ se̱ʼena?

¹⁸ Na̱ íyo se̱ʼe ¿ndáa ki̱ʼva xíniñúʼu taxina consejo? Jehová káʼa̱nra xíʼinna: “Ndóʼó na̱ íyo se̱ʼe, kǒo sásáa̱ndó se̱ʼendó, va̱ʼaka sanáʼa̱ndóna xa̱ʼa Jehová táki̱ʼva kúni̱ miíra” (Efes. 6:4). Ndáyáʼviní ña̱ keʼéna ña̱yóʼo. Proverbios 19:18 káchiña na̱ íyo se̱ʼe tá kǒo táxi va̱ʼana consejo ndaʼa̱ se̱ʼena ku̱a̱chi na̱yóʼo kúú ña̱ kuvi se̱ʼena. Jehová ndatiinra ku̱a̱chi xíʼin na̱yóʼo (1 Sam. 3:12-14). Soo Jehová táxira ña̱ ndíchi ndaʼa̱ na̱ ndúkúña nu̱úra ta táxitura ndée ndaʼa̱na tá ndíku̱nna ña̱ káʼa̱n tu̱ʼunra xíʼin yichi̱ ña̱ táxi espíritu santo Ndióxi̱ ndaʼa̱na ña̱ va̱ʼa sánáʼa̱na se̱ʼena (kaʼvi Santiago 1:5).d

NÁ SAKUAʼAYÓ ÑA̱ INKÁCHI KUTÁʼAN NDIʼIYÓ NDIʼI TIEMPO

19, 20. a) ¿Ndáa ña̱ va̱ʼa ndákiʼinyó tá xíniso̱ʼoyó consejo Jehová? b) ¿Ndáaña sakuaʼayó nu̱ú inka artículo?

¹⁹ Tá ndákiʼinyó consejo nu̱ú Jehová ta sákuaʼatuyó taxiyóña táki̱ʼva íxaa Jehová xíʼin ta̱ Jesús, ku̱a̱ʼání ña̱ va̱ʼa ndákiʼinyó. Si̱íníka íyoyó xíʼin na̱ veʼeyó saátu xíʼin na̱ congregación. Ndiʼiyó va̱ʼaní kúniyó, ta ña̱yóʼo náʼa̱ña nu̱úyó ndáa ki̱ʼva kooyó chí nu̱únínu (Sal. 72:7). Consejo ña̱ táxi Jehová ndaʼa̱yó sánáʼa̱ña miíyó ña̱ va̱ʼa inkáchi kutáʼan ndiʼiyó ndiʼi tiempo nda̱a̱ táki̱ʼva íyoyó xíʼin na̱ veʼeyó ta kǒo ku̱a̱chi kooyó xíʼin táʼanyó (kaʼvi Isaías 11:9).e Tá ná ndakaʼányó xa̱ʼa ña̱yóʼo, kunda̱a̱-iniyó consejo ña̱ táxi Jehová ndaʼa̱yó táxiraña xa̱ʼa ña̱ kúʼvi̱-inira xínira miíyó.

²⁰ Nu̱ú inka artículo sakuaʼayó xa̱ʼa consejo ña̱ ndákiʼinyó ti̱xin veʼeyó xíʼin congregación. Saátu sakuaʼayó ndáa ki̱ʼva ka̱ʼnu̱-iniyó xíʼin ña̱ kéʼéyó ta ndáaña kivi keʼéyó ña̱ kǒo ndakiʼinyó ña̱ yo̱ʼvi̱ka nu̱ú iin consejo.