Tu̱ʼun yóʼo xíniñúʼu taxiva̱ʼúnña níma̱ún

Na̱ íyo se̱ʼe nda̱a̱ táki̱ʼva íyo iin pastor saá íyona. Chi ta̱ pastor ndáara ndikachi sa̱na̱ra ta na̱ íyo se̱ʼe xíniñúʼu kunda̱a̱na se̱ʼena. Chi kivi kuxika se̱ʼena nu̱ú Ndióxi̱ ta ku̱a̱ʼá tu̱ndóʼo kixi nu̱úna (Prov. 27:23). ¿Ndáaña xíniñúʼu keʼé na̱ íyo se̱ʼe ña̱ va̱ʼa koona tá íyo iin pastor ta̱ va̱ʼaní ndáa kití sa̱na̱ra? Xíniñúʼu tavána tiempo ña̱ va̱ʼa natúʼunna xíʼin se̱ʼena ndiʼi ki̱vi̱. Saá kúú ña̱ kunda̱a̱-inina ndáa ña̱ ndákanixi̱ní se̱ʼena á ndáa ña̱ ñúʼu níma̱na (Prov. 20:5). Xíniñúʼu chindeé táʼanna xíʼinna (1 Cor. 3:10-15). Ña̱ video Estas palabras tienen que estar en tu corazón náʼa̱ña nu̱úyó ña̱ xíniñúʼu kaʼvi ni̱ʼiyó xíʼin se̱ʼeyó. Kotondeʼéndóña tándi̱ʼi ndakuiindó pregunta ña̱ va̱xi yóʼo.

1) ¿Nda̱chun va̱ása níxindi̱ʼi̱-ini na̱ veʼe ta̱ Román xa̱ʼa chiñu Ndióxi̱? 2) ¿Nda̱chun kǒo níkuchiñu ta̱ hermano Román tá xi̱kuni̱ra kaʼvira xíʼin na̱ veʼera ña̱ yichi̱ nu̱ú? 3) ¿Ndáaña kivi chindeé miíyó ña̱ va̱ʼa sakuaʼnuyó se̱ʼeyó káchi Biblia? (Deut. 6:6, 7.) 4) ¿Ndáaña xíniñúʼu keʼéyó ña̱ va̱ʼa natúʼun táʼankayó xíʼin na̱ veʼeyó? 5) Na̱ íyo se̱ʼe, ¿ndáa ña̱ʼa xíñiñúʼu sandákoona keʼéna ña̱ va̱ʼa chindeé táʼanna xíʼin se̱ʼena? 6) ¿Nda̱saa chi̱ndeé ta̱ hermano Vargas ta̱ Román xíʼin na̱ veʼera? (Prov. 27:17.) 7) ¿Ndáaña siʼna xíniñúʼu keʼé ta̱ íyo se̱ʼe tá kúni̱ra va̱ʼa kaʼvi na̱ veʼera xíʼinra? 8) ¿Ndáaña ke̱ʼé ta̱ hermano Román xíʼin na̱ veʼera ña̱ si̱íka ndóona vitin? 9) ¿Nda̱chun ndiʼi tiempo xíniñúʼu kaʼviyó xíʼin na̱ veʼeyó? (Efes. 6:4.) 10) Ka̱ʼa̱n ndáaña kúú ña̱ va̱ʼa keʼéyó ña̱ kaʼviyó xíʼin na̱ veʼeyó. 11) ¿Nda̱saa chi̱ndeé ta̱ Tomás ta̱ loʼo se̱ʼera ta̱ chée? (Jer. 17:9.) 12) ¿Nda̱saa chi̱ndeé ta̱ Tomás xíʼin ñá Mónica ñá loʼo se̱ʼena? (Mar. 12:30; 2 Tim. 2:22.) 13) ¿Ndáaña ke̱ʼé ta̱ Tomás xíʼin ñá Mónica tasaá ni̱na̱ʼa̱na ña̱ ndixa kándíxana Ndióxi̱? (Mat. 6:33.) 14) ¿Nda̱saa chíndeé video yóʼo ta̱a na̱ xa̱tindaʼa̱ ña̱ va̱ʼa kiʼinna kuenta xíʼin na̱ veʼena? (1 Tim. 5:8.) 15) Na̱ íyo se̱ʼe, ¿ndáaña xíniñúʼu keʼéna vitin?

ÑA̱ KU̱A̱ʼA̱N NU̱Ú NA̱ ÍYO SE̱ʼE: Tá ni̱ya̱ʼa̱ ña̱ drama yóʼo ti̱xin ña̱ asamblea ña̱ distrito ña̱ ku̱i̱ya̱ 2011, ¿á chi̱ndeéña miíún ña̱ nda̱kanixi̱níún ndáaña keʼún ña̱ va̱ʼaka kaʼviún xíʼin na̱ veʼún? Ta vitin tá xi̱tondeʼún video yóʼo, ¿á chi̱ndeéña yóʼó ña̱ nda̱kanixi̱níún ndáaka inka ña̱ʼa va̱ʼa keʼún vitin? Ka̱ʼa̱nndó xíʼin Jehová ña̱ ná chindeéra ndóʼó ña̱ va̱ʼa keʼéndó ña̱ kúma̱ní nu̱úndó ña̱ va̱ʼaka kundoondó xíʼin na̱ veʼendó (Efes. 5:15-17).