ÑA̱ KÉʼÉYÓ NA̱ TESTIGO
Xa̱a̱ ya̱chi̱ka ná koo tu̱ʼvayó tá kúma̱níka ku̱ʼu̱nyó nu̱ú na̱ médico
¿Nda̱chun ndáyáʼviní koo tu̱ʼvayó? Saáchi ndiʼiyó kivi ya̱ʼayó nu̱ú iin tu̱ndóʼo ña̱ va̱ása ndátuyó ta kivi ku̱ʼu̱nyó hospital xa̱ʼa̱ ña̱yóʼo. Tá kúni̱yó viíní ná chindeétáʼan na̱ doctor xíʼinyó ta saátu ta̱tán ña̱ táxina, xa̱a̱ ya̱chi̱ka ná nandukú va̱ʼayó xa̱ʼa̱ ña̱yóʼo. Tasaá kúú ña̱ na̱ʼa̱yó ña̱ íxato̱ʼóyó ña̱ tákuyó ta saátu ley ña̱ ta̱xi Jehová, ña̱ káʼa̱n xa̱ʼa̱ ni̱i̱ (Hch 15:28, 29).
¿Ndáa ki̱ʼva koo tu̱ʼvayó?
Tándi̱ʼi nda̱kanixi̱níún ta saátu ni̱ka̱ʼún xíʼin Jehová, sandákutú tutu ña̱ káʼa̱n ndáa ta̱tán kúú ña̱ ndakiʼún (DPA).a Na̱ publicador na̱ xa̱a̱ nda̱kuchi kivi ndukúna tarjeta yóʼo nu̱ú na̱ hermano na̱ kíʼin kuenta xíʼin publicación, ta na̱ íyo se̱ʼe válí kivi ndukúna tutu ña̱ naní Tarjeta de identidad (ic) ña̱ va̱ʼa kuniñúʼu na̱ va̱lí se̱ʼena.
Tá ñúʼu se̱ʼún, ndukú tutu nu̱ú na̱ anciano ña̱ naní Información para mujeres embarazadas (S-401), ña̱yóʼo va̱ʼaní chindeétáʼanña xíʼún ña̱ ndaka̱xiún ndáa ta̱tán kuniñúʼún xa̱ʼa̱ ña̱ ñúʼu se̱ʼún á tá xa̱a̱ ná kakuña.
Tá xíniñúʼu nde̱e ni̱i̱ yóʼo á xíniñúʼu kundika̱ún sava ki̱vi̱ ti̱xin hospital, xa̱a̱ ya̱chi̱ka natúʼún xíʼin na̱ anciano ta saátu xa̱a̱ ya̱chi̱ka natúʼún xíʼin na̱ doctor na̱ íyo ti̱xin hospital kán á taxina ku̱ʼu̱n iin na̱ testigo Jehová kotona yóʼó.
¿Ndáa ki̱ʼva chindeétáʼan na̱ anciano xíʼún? Kivi chindeétáʼanna xíʼún ña̱ sándakutún tarjeta DPA, soo va̱ása ka̱ʼa̱nna xíʼún ndáa ta̱tán kivi ndakiʼún ta va̱ása ka̱ʼa̱nna xíʼún ndáaña xíniñúʼu keʼún chi iinlá miíún xíniñúʼu ndaka̱xin ndáaña keʼún (Ro 14:12; Gál 6:5). Tá ná natúʼún xíʼin na̱ anciano ña̱ ni̱ka̱ʼa̱n na̱ médico xíʼún ña̱ sana xíniñúʼu nde̱e ni̱i̱ yóʼó, na̱yóʼo ndi̱ku̱n kama natúʼunna xíʼin na̱ Comité na̱ nátúʼun xíʼin na̱ hospital (CEH).
¿Ndáa ki̱ʼva chindeétáʼan na̱ Comité na̱ nátúʼun xíʼin na̱ hospital xíʼinyó? Na̱ hermano yóʼo íyo tutu ña̱ chíndeétáʼan xíʼinna ña̱ va̱ʼa chindeétáʼanna xíʼin na̱ médico ña̱ kunda̱a̱-inina nda̱chun kúú ña̱ va̱ása ndée ni̱i̱ miíyó. Kivitu chindeétáʼanna xíʼin na̱ médico ña̱ kotona ndáa ta̱tán kivi kuniñúʼuyó ña̱ va̱ʼa va̱ása nde̱e ni̱i̱ miíyó. Ta nda̱a̱ kivitu chindeétáʼanna xíʼinyó ña̱ ndani̱ʼíyó iin médico na̱ va̱ása táan ni̱i̱.
TÁNDI̱ʼI XI̱TONDÓ VIDEO ÑA̱ NANÍ ¿NDÁA KI̱ʼVA VIÍ KOO ÑA̱ NDAKA̱XINYÓ KEʼÉYÓ XA̱ʼA̱ NI̱I̱?, NDAKUIINNDÓ PREGUNTA YÓʼO:
¿Ndáaña kivi chindeétáʼan xíʼún ña̱ koo tu̱ʼvaún tá ná kixaa̱ tu̱ndóʼo nu̱ún tasaá va̱ása nde̱e ni̱i̱ yóʼó?
a Libro ña̱ naní Kivi koo si̱íún vitin ta saátu chí nu̱únínu lección 39, va̱xi ña̱ kivi chindeétáʼan xíʼún ña̱ viíní ndaka̱xiún á nde̱e ni̱i̱ yóʼó á va̱ása.