Ña̱ kachíñuyó nu̱ú Jehová xíʼin ndiʼi níma̱yó kúú ña̱ sákusi̱í-iniyó

1. ¿Ndáaña sákusi̱í-iniyó?

JEHOVÁ kúni̱ra ña̱ si̱íní ná kooyó, ta kúnda̱a̱-iniyó ña̱yóʼo saáchi iin ña̱ va̱ʼa ña̱ táxi espíritu santora kúú ña̱ si̱í kooyó (Gál. 5:22). Va̱ʼaní kúniyó tá nátúʼunyó xíʼin na̱ yiví xa̱ʼa̱ Ndióxi̱, ta saátu tá chíndeétáʼanyó xíʼin na̱ hermanoyó, saáchi tá táxiyó ña̱ kúúmiíyó ndaʼa̱ inkana saá kúú ña̱ kúsi̱íní-iniyó (Hech. 20:35).

2, 3. a) Nda̱a̱ táki̱ʼva káchi Gálatas 6:4, ¿ndáaña chindeétáʼan xíʼinyó ña̱ ndakundeéyó kusi̱í-iniyó? b) ¿Ndáaña sakúaʼayó nu̱ú artículo yóʼo?

² ¿Ndáaña chindeétáʼan xíʼinyó ña̱ ndakundeéyó kusi̱í-iniyó? Ta̱ apóstol Pablo ni̱ka̱ʼa̱nra xa̱ʼa̱ u̱vi̱ ña̱ kivi chindeétáʼan xíʼinyó, ta ña̱yóʼo va̱xiña nu̱ú Gálatas 6:4 (kaʼviña). Ña̱ nu̱ú, kiviva kusi̱í-iniyó xíʼin ña̱ kéʼéyó nu̱ú Jehová tá xíʼin ndiʼi níma̱yó ná kachíñuyó nu̱úra. Ta ndiʼiyó xíniñúʼu keʼé ña̱yóʼo (Mat. 22:36-38). Ña̱ u̱vi̱, ná va̱ása chitáʼanyó ña̱ kéʼéyó xíʼin ña̱ kéʼé inkana. Tá kǒo kue̱ʼe̱ kúúmiíyó á va̱ʼaní sa̱náʼa̱na miíyó keʼéyó iin chiñu á xíni̱níyó keʼéyóña, ná taxiyó tíxa̱ʼvi ndaʼa̱ Jehová chi ndiʼi ña̱ kúúmiíyó ta̱yóʼo kúú ta̱ ta̱xiña ndaʼa̱yó. Soo tá iin na̱ hermano kúú na̱ va̱ʼaní xíni̱ keʼé chiñu nu̱ú Jehová, ná kusi̱í-iniyó xíʼinna chi xíniñúʼuna ña̱ xíni̱na ña̱ va̱ʼa ndasakáʼnunara, ta va̱ása xíniñúʼunaña ña̱ va̱ʼa ndukáʼnuna á ña̱ ndakiʼinna iin ña̱ va̱ʼa. Nu̱úka ña̱ keetáʼanyó xíʼinna va̱ʼaka ná sakúaʼayó xíʼin ña̱ kéʼéna.

³ Nu̱ú artículo yóʼo kotoyó ndáaña chindeétáʼan xíʼinyó ña̱ va̱ása ndakava-iniyó tá va̱ása kívi keʼéyó ndiʼi chiñu ña̱ kúni̱yó keʼéyó nu̱ú Ndióxi̱. Ta saátu kotoyó ndáa ki̱ʼva kuniñúʼuyó ndiʼi ña̱ xíni̱yó keʼéyó, ta ndáaña kivi sakúaʼayó xíʼin ña̱ kéʼé inkana.

TÁ VA̱ÁSA KÍVI KEʼÉYÓ NDIʼI ÑA̱ KÚNI̱YÓ

4. ¿Ndáaña kivi sandákava-iniyó? Ka̱ʼa̱n xa̱ʼa̱ ña̱ ndo̱ʼo ñá Carol.

⁴ Ku̱a̱ʼání na̱ hermano ndákava-inina saáchi xa̱ʼa̱ ña̱ ku̱chéena á xa̱ʼa̱ ña̱ kúúmiína kue̱ʼe̱, va̱ása kívi keʼékana chiñu nu̱ú Jehová. Ña̱yóʼo kúú ña̱ ndo̱ʼo iin ñá hermana ñá naní Carol. Tá ya̱chi̱ ni̱xa̱ʼa̱nñá chi̱ndeétáʼanñá xíʼin iin congregación nu̱ú kúma̱ní na̱ natúʼun xa̱ʼa̱ Ndióxi̱, ta ni̱xa̱a̱ñá ka̱ʼviñá xíʼin 35 na̱ yiví ta chi̱ndeétáʼanñá xíʼin savana ña̱ nda̱taxina miína ndaʼa̱ Jehová ta ni̱xa̱a̱na nda̱kuchina. Va̱ʼaní ña̱ ke̱ʼéñá, soo tá ni̱ya̱ʼa tiempo ki̱ʼi̱n kue̱ʼe̱ miíñá ta kǒo níkivika keeñá veʼeñá. Ñáyóʼo káchiñá: “Xa̱ʼa̱ kue̱ʼe̱ ña̱ ndóʼi̱ va̱ása kívi keʼíi̱ nda̱a̱ táki̱ʼva kéʼé inkana. Soo ni saá ndákanixi̱níi̱ ña̱ va̱ása nda̱kú íyo inii̱ xíʼin Ndióxi̱ nda̱a̱ táki̱ʼva nda̱kú íyo ini inkana. Kǒo kívi keʼíi̱ ndiʼi ña̱ kúnii̱ keʼíi̱, ta ña̱yóʼo sándakavaníña-inii̱”. Ñá Carol chíka̱a̱níñá ndee̱ keʼéñá chiñu ña̱ kívi keʼéñá nu̱ú Jehová, ta ndáyáʼviníva ña̱ kéʼéñá. Kúnda̱a̱-iniyó ña̱ kúndáʼviní-ini Ndióxi̱ xínira miíyó, ña̱kán chíndayáʼviníra ña̱ kéʼé ñá hermana yóʼo.

5. a) ¿Ndáaña xíniñúʼu ndakaʼányó tá ndákava-iniyó xa̱ʼa̱ ña̱ kǒo kívi keʼéyó ku̱a̱ʼáka chiñu nu̱ú Ndióxi̱? b) Nda̱a̱ táki̱ʼva xítoyó nu̱ú na̱ʼná yóʼo, ¿ndáa ki̱ʼva ndákundeé ta̱ hermano yóʼo káchíñura nu̱ú Jehová?

⁵ Tá sava yichi̱ ndákava-iniyó xa̱ʼa̱ ña̱ va̱ása kívika keʼéyó ndiʼi ña̱ kúni̱yó keʼéyó, ná ndakanixi̱níyó xa̱ʼa̱ ña̱yóʼo: “¿Ndáaña kúni̱ Jehová ná keʼíi̱?”. Ña̱ kúni̱ra kúú ña̱ ná keʼéyó ndiʼi ña̱ kívi keʼévayó. Ndakanixi̱ní xa̱ʼa̱ ña̱yóʼo: iin ñá hermana ñá kúúmií 80 ku̱i̱ya̱ ndákavaní-iniñá saáchi kǒo kívi keʼéñá chiñu nu̱ú Ndióxi̱ nda̱a̱ táki̱ʼva xi̱keʼéñá tá xi̱kuumiíñá 40 ku̱i̱ya̱. Ni kúnda̱a̱-iniñá ña̱ xíʼin ndinuʼu-iniñá káchíñuñá nu̱ú Jehová, soo ndákanixi̱níñá ña̱ va̱ása kúsi̱í-inira xíʼin ña̱ kéʼéñá. Soo, ¿á ndixa va̱ása kúsi̱í-ini Jehová xíʼin ña̱ kéʼéñá? Kúsi̱íva-inira, saáchi tá xi̱kuumiíñá 40 ku̱i̱ya̱ ka̱chíñuñá nu̱úra xíʼin ndinuʼu-iniñá ta nda̱a̱ vitin ndákundeéñá káchíñuñá xíʼin ndinuʼu-iniñá ni kúúmiíñá 80 ku̱i̱ya̱. Tá ndákanixi̱níyó ña̱ va̱ása ku̱a̱ʼá chiñu kéʼéyó nu̱ú Jehová ta va̱ása kúsi̱í-inira xíʼin ña̱ kéʼéyó, ná ndakaʼányó chi miívara kúú ta̱ ndáka̱xin ndáaña kusi̱í-inira xíʼin ta ndáaña va̱ása kusi̱í-inira xíʼin. Tá xíʼin ndinuʼu-iniyó ná kachíñuyó nu̱ú Jehová kusi̱íníva-inira xíʼin ña̱ kéʼéyó (chitáʼanña xíʼin Mateo 25:20-23).

6. ¿Ndáaña sákuaʼayó xíʼin ña̱ ndo̱ʼo ñá María?

⁶ Iin ña̱ kivi chindeétáʼan xíʼinyó ña̱ kusi̱í-iniyó kúú ña̱ ná ndakanixi̱níyó xa̱ʼa̱ ña̱ kivi keʼéyó nu̱úka ña̱ ndakanixi̱níyó xa̱ʼa̱ ña̱ va̱ása kívi keʼéyó. Ná ka̱ʼa̱nyó xa̱ʼa̱ ña̱ ndo̱ʼo ñá María, ñá hermana yóʼo kúúmiíñá iin kue̱ʼe̱ ta va̱ása kívi keʼéña ku̱a̱ʼá chiñu nu̱ú Ndióxi̱. Tá xa̱ʼa̱, xi̱ndakavaní-iniñá ta xi̱ndakanixi̱níñá ña̱ va̱ása ndáyáʼvikañá. Soo ki̱ʼinñá kuenta ña̱ ti̱xin congregación nu̱ú ku̱a̱ʼa̱nñá ndíka̱a̱ iin ñá hermana ñá ndeéní ndóʼo ta nu̱ú cama kánduʼúñá. Ña̱kán nda̱kanixi̱níñá ndáa ki̱ʼva chindeétáʼanñá xíʼinñá. Ñá María káchiñá: “Chi̱ka̱i̱ ndee̱ ña̱ ku̱ʼi̱n veʼeñá ña̱ va̱ʼa natúʼunndi̱ xa̱ʼa̱ Ndióxi̱ xíʼin teléfono ta saátu ña̱ kaʼyíndi̱ carta. Tá xi̱ndixai̱ veʼi̱ xi̱kusi̱íní-inii̱ xa̱ʼa̱ ña̱ chi̱ndeétáʼi̱n xíʼin ñá hermana yóʼo”. Saátu miíyó kivi kusi̱í-iniyó tá ná ndakanixi̱níyó xa̱ʼa̱ ña̱ kívi keʼéyó nu̱úka ña̱ ndakanixi̱níyó xa̱ʼa̱ ña̱ va̱ása kívi keʼéyó. Soo tá kívi keʼéyó ku̱a̱ʼáka chiñu nu̱ú Ndióxi̱ á íyo ña̱ xíni̱ va̱ʼakayó keʼéyó, ¿ndáaña kivi keʼéyó?

TÁ ÍYO IIN ÑA̱ XÍNI̱ÚN KEʼÚN, KEʼÉÑA

7. ¿Ndáa consejo va̱ʼaní ta̱xi ta̱ apóstol Pedro ndaʼa̱ na̱ hermano?

⁷ Nu̱ú carta ña̱ nu̱ú ña̱ ka̱ʼyí ta̱ apóstol Pedro ni̱ka̱ʼa̱nra xíʼin na̱ hermano ña̱ ná kuniñúʼuna ña̱ xíni̱na keʼéna ña̱ va̱ʼa chika̱a̱na ndee̱ xíʼin inka na̱ hermano. Ta ña̱yóʼo kúú ña̱ ka̱ʼyíra: “Xa̱ʼa̱ ña̱ kúúndó na̱ káchíñu nu̱ú Ndióxi̱, xa̱a̱ síín síín íyo ki̱ʼva ña̱ ni̱na̱ʼa̱ra ña̱ va̱ʼaní-inira xíʼinndó, ña̱kán viíní keʼéndó chiñu ña̱ ta̱xira ndaʼa̱ndó ña̱ va̱ʼa chindeétáʼanndó xíʼin inkana” (1 Ped. 4:10). Ná chika̱a̱yó ndee̱ ña̱ keʼéyó ndiʼi ña̱ xíni̱yó, ta ná va̱ása ndakanixi̱níyó ña̱ kivi sa̱a̱-ini inkana kunina miíyó á ndakava-inina. Tá ná kǒo chika̱a̱yó ndee̱ ña̱ keʼéyó ña̱ xíni̱yó keʼéyó chi ndíʼi̱níka-iniyó xa̱ʼa̱ ña̱ kivi ndakanixi̱ní inkana xa̱ʼa̱yó, va̱ása kachíñuyó nu̱ú Jehová xíʼin ndinuʼu-iniyó.

8. Nda̱a̱ táki̱ʼva káchi 1 Corintios 4:6, 7, ¿nda̱chun va̱ása xíniñúʼu ni̱nuní kuniyó tá xíni̱níyó keʼéyó iin chiñu?

⁸ Iin ña̱ va̱ʼaníva kúú ña̱ kuniñúʼuyó ña̱ xíni̱yó keʼéyó, soo ná kiʼinníyó kuenta ña̱ va̱ása ni̱nuní kuniyó xíʼin ña̱yóʼo (kaʼvi 1 Corintios 4:6, 7). Sana yóʼó va̱ʼaní kíxáʼún káʼviún xíʼin na̱ yiví. Ta kiviva ndakundeún keʼún ña̱yóʼo, soo va̱ása va̱ʼa ni̱nu kuniún xíʼinña. Ndakanixi̱ní ña̱ iin ki̱vi̱ va̱ʼaní na̱túʼun xíʼin na̱ yiví xa̱ʼa̱ Ndióxi̱ ta nda̱a̱ ki̱xáʼún káʼviún xíʼinna. Ta kúni̱ún natúʼún xíʼin na̱ grupo ña̱ predicación nu̱ú ndíka̱ún xa̱ʼa̱ ndiʼi ña̱ ku̱u. Soo tá xa̱a̱ kúni̱ún natúʼún xíʼinna, xíniso̱ʼún ña̱ kíxáʼa iin ñá hermana nátúʼunñá ña̱ ku̱chiñuñá sa̱ndákooñá iin revista ndaʼa̱ iin na̱ yiví. Iin revista kuitíva sa̱ndákoo ñákán, soo yóʼó xa̱a̱ ki̱xáʼún káʼviún xíʼin iin na̱ yiví. ¿Ndáaña keʼún? Kúnda̱a̱va-iniún ña̱ chindeétáʼan ña̱ ndo̱ʼún xíʼin na̱ hermano kán, soo va̱ása natúʼunvíún xa̱ʼa̱ña mií ki̱vi̱ kán ña̱ va̱ʼa kǒo sándakavaún-ini ñá hermana kán. Ta xa̱ʼa̱ ña̱ kéʼún ña̱yóʼo náʼún ña̱ kúndáʼvi-iniún xíniún ñá hermana kán. Yóʼó iin ña̱ va̱ʼaníva kúú ña̱ xíni̱ún keʼún, ña̱kán va̱ása sandákoún ña̱ kaʼviún xíʼin na̱ yiví.

9. ¿Ndáa ki̱ʼva kuniñúʼuyó ña̱ xíni̱yó keʼéyó?

⁹ Ná ndakaʼányó chi ndiʼi chiñu ña̱ xíni̱yó keʼéyó Jehová kúú ta̱ ta̱xiña ndaʼa̱yó. Ña̱kán, ná kuniñúʼuyóña ña̱ va̱ʼa chika̱a̱yó ndee̱ xíʼin na̱ hermanoyó, ta ná va̱ása keʼéyóña xa̱ʼa̱ ña̱ kúni̱yó ná ka̱ʼa̱n va̱ʼana xa̱ʼa̱yó (Filip. 2:3). Kúsi̱íva-iniyó tá xíniñúʼuyó ndee̱yó ta saátu ña̱ xíni̱yó keʼéyó ña̱ va̱ʼa kachíñuyó nu̱ú Jehová. ¿Nda̱chun kúsi̱í-iniyó? Saáchi xíniñúʼuyó ndiʼi ña̱ xíni̱yó keʼéyó ña̱ va̱ʼa ndasakáʼnuyóra, ta va̱ása kéʼéyóña ña̱ va̱ʼa ná kuni inkana ña̱ xíni̱níkayó nu̱úna á ña̱ ndáyáʼviníkayó nu̱úna.

10. ¿Nda̱chun va̱ása va̱ʼa chitáʼanyó ña̱ kéʼéyó xíʼin ña̱ kéʼé inkana?

¹⁰ Tá va̱ása kíʼinyó kuenta kivi xa̱a̱yó chitáʼanyó ña̱ kéʼéyó xíʼin ña̱ kéʼé inkana. Ná ka̱ʼa̱nyó xa̱ʼa̱ ña̱yóʼo, sana iin ta̱ hermano va̱ʼaní xíni̱ra taxira discurso. Ta sana ndákanixi̱níra ña̱ xíni̱níra nu̱ú iin ta̱ hermano ta̱ íxayo̱ʼvi̱ña xíʼin taxi discurso. Soo sana íyova ña̱ xíni̱ ta̱ hermano kán keʼéra, sana va̱ʼaní-inira, va̱ʼaní sákuaʼnura se̱ʼera á kútóoníra natúʼunra xa̱ʼa̱ Ndióxi̱. Ña̱kán kúsi̱íní-iniyó xa̱ʼa̱ ña̱ ku̱a̱ʼání na̱ hermanoyó xíniñúʼuna ña̱ xíni̱na keʼéna ña̱ va̱ʼa kachíñuna nu̱ú Jehová, ta saátu ña̱ va̱ʼa chindeétáʼanna xíʼin inkana.

NÁ SÁKUAʼAYÓ XÍʼIN ÑA̱ KÉʼÉ INKANA

11. ¿Nda̱chun xíniñúʼu chika̱a̱yó ndee̱ ña̱ kundiku̱nyó yichi̱ ta̱ Jesús?

¹¹ Su̱ví ña̱ va̱ʼa kúú ña̱ chitáʼanyó miíyó xíʼin inkana, soo ku̱a̱ʼání ña̱ kivi sakúaʼayó tá ná kotoyó ña̱ kéʼé inka na̱ ndásakáʼnu Jehová. Ná ndakanixi̱níyó xa̱ʼa̱ ta̱ Jesús chi ta̱yóʼo kúú ta̱ va̱ʼaní yichi̱ chi̱núu nu̱úyó. Ni na̱ yiví ku̱a̱chi kúúyó soo kiviva kundiku̱nyó yichi̱ra ta keʼéyó táki̱ʼva ke̱ʼéra (1 Ped. 2:21). Tá ná chika̱a̱níyó ndee̱ ña̱ kundiku̱nyó yichi̱ra, va̱ʼaníka kachíñuyó nu̱ú Jehová ta saátu va̱ʼaníka sanáʼa̱yó na̱ yiví.

12, 13. ¿Ndáaña sákuaʼayó xíʼin ña̱ ke̱ʼé ta̱ rey David?

¹² Tu̱ʼun Ndióxi̱ káʼa̱nña xa̱ʼa̱ ku̱a̱ʼá na̱ ta̱a xíʼin ná ñaʼá na̱ sa̱ndákoo iin yichi̱ va̱ʼaní nu̱úyó, ni xi̱kuuna na̱ yiví ku̱a̱chi (Heb. 6:12). Ta iin ta̱yóʼo xi̱kuu ta̱ rey David. Ña̱yóʼo ni̱ka̱ʼa̱n Jehová xa̱ʼa̱ra: “Ta̱ David [...] iin ta̱a ta̱ sákusi̱íní-inii̱ kúúra” (Hech. 13:22). Soo iin ta̱ yiví ku̱a̱chiva xi̱kuura ta ke̱ʼéra sava ña̱ va̱ása va̱ʼa, soo ni saá va̱ʼava yichi̱ sa̱ndákoora nu̱úyó. ¿Nda̱chun? Saáchi tá ta̱xina consejo ndaʼa̱ra va̱ása níchika̱a̱ra ku̱a̱chi inkana xa̱ʼa̱ ña̱ ke̱ʼéra. Ta va̱ʼaní ka̱ndíxara consejo ña̱ ta̱xina ndaʼa̱ra, ta saátu nda̱ndikóní-inira xa̱ʼa̱ ña̱ ke̱ʼéra, ña̱kán i̱xakáʼnu-ini Jehová xa̱ʼa̱ra (Sal. 51:3, 4, 10-12).

¹³ Ejemplo ta̱ David kivi chindeétáʼanña xíʼinyó tá ná ndakanixi̱níyó xa̱ʼa̱ ña̱yóʼo: “¿Ndáaña kéʼíi̱ tá táxina iin consejo ndaʼíi̱? ¿Á ndákunii̱ ku̱a̱chii̱, á káʼi̱n ña̱ íyo iin xa̱ʼa̱va kúú ña̱ ni̱ki̱ʼvii̱ ku̱a̱chi? ¿Á chíka̱i̱ ku̱a̱chi inkana xa̱ʼa̱ ña̱ ke̱ʼíi̱? ¿Á chíka̱i̱ ndee̱ ña̱ va̱ása ndikói̱ keʼíi̱ ña̱ va̱ása va̱ʼa?”. Ta saátu tá káʼviyó xa̱ʼa̱ na̱ ta̱a xíʼin ná ñaʼá na̱ nda̱kúní ni̱xi̱yo ini, ná ndakanixi̱níyó xa̱ʼa̱ ña̱yóʼo: “¿Á tu̱ndóʼo ña̱ ni̱ya̱ʼana nu̱ú kúú ña̱ yáʼi̱ nu̱ú? ¿Ndáaña va̱ʼa ni̱na̱ʼa̱na?”. Ña̱kán tá káʼviyó xa̱ʼa̱ iin tá iin na̱ va̱xi nu̱ú tu̱ʼun Ndióxi̱, ná ndakanixi̱níyó xa̱ʼa̱ ña̱yóʼo: “¿Ndáaña kivi keʼíi̱ ña̱ va̱ʼa koi̱ nda̱a̱ táki̱ʼva ni̱xi̱yo ta̱ David ta̱ va̱ʼaní xi̱ndasakáʼnu Jehová?”.

14. ¿Ndáaña va̱ʼa ndakiʼinyó tá ná kundiku̱nyó yichi̱ na̱ hermanoyó?

¹⁴ Saátu íyo ku̱a̱ʼání ña̱ kivi sakúaʼayó xíʼin ña̱ kéʼé na̱ hermanoyó, kúúna na̱ va̱lí á na̱ xa̱a̱ chée. ¿Á kivi ndakanixi̱níún xa̱ʼa̱ iin na̱ ku̱a̱ʼa̱n congregación nu̱ú ndíka̱ún na̱ yáʼa nu̱ú iin tu̱ndóʼo? Tá kúú na̱ va̱lí na̱ íxandúxana xíʼin keʼé ña̱ va̱ása va̱ʼa, á tá kúú na̱ hermano na̱ va̱ása táxi na̱ veʼena sakúaʼana xa̱ʼa̱ Jehová, á na̱ ndeéndóʼo. ¿Á íyo iin ña̱ va̱ʼaní kéʼéna ña̱ kivi sakúaʼakayó keʼéyó? Tá ná kundiku̱nyó yichi̱na, sakúaʼayó ku̱a̱ʼání ña̱ʼa ña̱ kivi chindeétáʼan xíʼinyó ya̱ʼayó nu̱ú tu̱ndóʼo. Ña̱kán kúsi̱íní-iniyó ña̱ va̱ʼaní yichi̱ chínúu na̱ hermanoyó nu̱úyó xa̱ʼa̱ ña̱ nda̱kúní íyo inina xíʼin Ndióxi̱ (Heb. 13:7; Sant. 1:2, 3).

XÍʼIN ÑA̱ SI̱Í-INI NÁ KACHÍÑUYÓ NU̱Ú JEHOVÁ

15. ¿Ndáa consejo ña̱ ta̱xi ta̱ apóstol Pablo kivi chindeétáʼan xíʼinyó ña̱ kusi̱íka-iniyó kachíñuyó nu̱ú Jehová?

¹⁵ Tá ndiʼiyó chíka̱a̱yó ndee̱ ña̱ kachíñuyó nu̱ú Jehová xíʼin ndinuʼu-iniyó, va̱ʼaní kutáʼanyó ta kǒo ku̱a̱chi koo ti̱xin congregación. Ña̱yóʼo kúú ña̱ ke̱ʼé na̱ cristiano na̱ xi̱ndoo tá siglo nu̱ú. Na̱yóʼo xa̱a̱ síín síín ña̱ xi̱xini̱na keʼéna ta xa̱a̱ síín síín chiñu xi̱kuumiína (1 Cor. 12:4, 7-11). Soo va̱ása níxikeetáʼanna ta ni va̱ása níxi̱taʼví táʼanna. Chi ta̱ apóstol Pablo ni̱ka̱ʼa̱nra xíʼin na̱ ñuu Éfeso ña̱ ná “chika̱a̱na ndee̱ xíʼin ña̱ congregación ña̱ íyo nda̱a̱ táki̱ʼva íyo ku̱ñu ta̱ Cristo”. Ta ka̱chikara: “Tá iin iin táʼví ku̱ñu yóʼo sáxi̱nuña chiñuña, ña̱yóʼo va̱ʼaníka xáʼnuña ta xa̱a̱yó kuʼvi̱ka-iniyó kunitáʼanyó” (Efes. 4:1-3, 11, 12, 16). Tá ke̱ʼéna ña̱yóʼo, va̱ʼaní chi̱ndeétáʼanna xíʼin na̱ congregación ña̱ vií kutáʼanna ta va̱ása taʼví táʼanna. Ta saátu kéʼé na̱ hermano ti̱xin congregación tiempo vitin.

16. ¿Ndáaña xíniñúʼu chika̱a̱-iniún keʼún? (Hebreos 6:10).

¹⁶ Chika̱a̱ ndee̱ ña̱ va̱ása chitáʼún miíún xíʼin inkana. Chi nu̱úka ña̱ chitáʼún miíún xíʼin inkana va̱ʼaka kundiku̱ún yichi̱ ta̱ Jesús, ta chika̱ún ndee̱ ña̱ keʼún nda̱a̱ táki̱ʼva ke̱ʼéra. Kundiku̱n yichi̱ na̱ va̱ʼaní xi̱kandíxa Ndióxi̱ tiempo xi̱naʼá, ta saátu na̱ ndóo tiempo vitin. Ndakundeún kachíñún nu̱ú Jehová xíʼin ndinuʼu-iniún ta ndakaʼún ña̱ nda̱kúní-inira ta va̱ása nándósó-inira xa̱ʼa̱ ndiʼi chiñu ña̱ kéʼún nu̱úra (kaʼvi Hebreos 6:10). Xíʼin ña̱ si̱í-ini ndakundeún kachíñún nu̱úra chi ta̱kán chíndayáʼviníra ña̱ kéʼún ña̱ va̱ʼa sákusi̱íún-inira.