Ku̱a̱ʼání ña̱ va̱ʼa táxi Jehová ndaʼa̱ na̱ íxakáʼnu-ini xa̱ʼa̱ inkana

1. ¿Ndáaña káʼa̱n Jehová xíʼin na̱ ndixa ndándikó-ini?

JEHOVÁ kúú ta̱ i̱xava̱ʼa miíyó, ta̱xira ley ndaʼa̱yó ta kúútura ta̱ ndátiin ku̱a̱chi xíʼinyó, ta saátu kúúra yiváyó ta̱ kúʼvi̱ní-ini xíni miíyó (Sal. 100:3; Is. 33:22). Ña̱kán tá kíʼviyó ku̱a̱chi nu̱úra ta xíʼin ndiʼi níma̱yó ndándikó-iniyó, íxakáʼnuva-inira xa̱ʼa̱yó saáchi kúni̱ra keʼéra ña̱yóʼo (Sal. 86:5). Jehová xi̱niñúʼura ta̱ profeta Isaías ña̱ ni̱ka̱ʼa̱nra iin tu̱ʼun ña̱ sándi̱koní-iniyó. Ta ña̱yóʼo ni̱ka̱ʼa̱nra: “Ni táki̱ʼva íyo color kúaʼa saá íyo ku̱a̱chindó, nduyaaña táki̱ʼva yaa nieve” (Is. 1:18).

2. ¿Ndáaña xíniñúʼu keʼéyó ña̱ vií kutáʼanyó xíʼin inkana?

² Xa̱ʼa̱ ña̱ kúúyó na̱ yiví ku̱a̱chi sava yichi̱ kéʼéyó á káʼa̱nyó ña̱ʼa ña̱ kivi sandákava-ini inkana (Sant. 3:2). Soo su̱ví ña̱yóʼo kúni̱ kachiña ña̱ va̱ása kivi vií kutáʼanyó xíʼin inkana. Chi kiviva kutáʼanyó xíʼinna tá ná ixakáʼnu-iniyó xa̱ʼa̱na ta saátu tá ná ixakáʼnu-inina xa̱ʼa̱yó (Prov. 17:9; 19:11; Mat. 18:21, 22). Sava yichi̱ su̱ví ña̱ ndeéví kéʼé iinna xíʼinyó, ña̱kán kúni̱ Jehová ña̱ ná ixakáʼnu-iniyó xa̱ʼa̱na (Col. 3:13). Chi miíra va̱ʼaní íxakáʼnu-inira xa̱ʼa̱yó, ña̱kán saátu xíniñúʼu keʼé miíyó (Is. 55:7).

3. ¿Ndáaña sakúaʼayó nu̱ú artículo yóʼo?

³ Nu̱ú artículo yóʼo sakúaʼayó, ña̱ ni kúúyó na̱ yiví ku̱a̱chi kiviva kundiku̱nyó yichi̱ Jehová ña̱ ixakáʼnu-iniyó xa̱ʼa̱ inkana. ¿Ndáa ku̱a̱chi kúú ña̱ xíniñúʼu natúʼunyó xa̱ʼa̱ xíʼin na̱ anciano? ¿Nda̱chun kúni̱ Jehová ña̱ ná ixakáʼnu-iniyó xa̱ʼa̱ inkana? Ta, ¿ndáaña kivi sakúaʼayó xíʼin ña̱ ndo̱ʼo sava na̱ hermano na̱ ni̱xo̱ʼvi̱ní xa̱ʼa̱ ku̱a̱chi inkana?

TÁ IIN NA̱ NDÁSAKÁʼNU NDIÓXI̱ NI̱KI̱ʼVINA IIN KU̱A̱CHI NDEÉ

4. a) ¿Ndáaña xíniñúʼu keʼé iin na̱ ni̱ki̱ʼvi ku̱a̱chi ndeé? b) ¿Ndáa chiñu ta̱xi Jehová ndaʼa̱ na̱ anciano?

⁴ Tá iinna ni̱ki̱ʼvina iin ku̱a̱chi ndeé, xíniñúʼu natúʼunna xa̱ʼa̱ ña̱yóʼo xíʼin na̱ anciano. Nu̱ú 1 Corintios 6:9, 10, káʼa̱nña xa̱ʼa̱ sava ku̱a̱chi ndeé ta tá ná keʼéyó ku̱a̱chi yóʼo, yáʼandosóyó ley Ndióxi̱. Tá iin na̱ ndásakáʼnu Ndióxi̱ ni̱ki̱ʼvina táʼan ku̱a̱chi yóʼo xíniñúʼu ka̱ʼa̱nna xíʼin Jehová ña̱ ná ixakáʼnu-inira xa̱ʼa̱na, ta saátu xíniñúʼu natúʼunna xíʼin na̱ anciano xa̱ʼa̱ ña̱yóʼo (Sal. 32:5; Sant. 5:14). Iinlá Jehová kúú ta̱ kivi ixakáʼnu-ini xa̱ʼa̱yó, ta kéʼéraña xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó.b Soo, ¿ndáa chiñu ta̱xi Jehová ndaʼa̱ na̱ anciano? Chiñu ña̱ ta̱xira ndaʼa̱na kúú ña̱ chindeétáʼanna xíʼin na̱ ni̱ki̱ʼvi ku̱a̱chi, ta na̱yóʼo xíniñúʼuna tu̱ʼun Ndióxi̱ ña̱ va̱ʼa ndaka̱xinna á kivi kundika̱a̱ka na̱ ni̱ki̱ʼvi ku̱a̱chi ti̱xin congregación á va̱ása (1 Cor. 5:12). Ta ña̱ va̱ʼa keʼéna ña̱yóʼo siʼna ndákanixi̱nína xa̱ʼa̱ pregunta yóʼo: ¿Á xa̱a̱ ya̱chi̱ka nda̱kanixi̱nína ndáa ki̱ʼva ki̱ʼvina ku̱a̱chi yóʼo? ¿Á xi̱kuni̱na chise̱ʼéna xa̱ʼa̱ ña̱ ke̱ʼéna? ¿Á ku̱a̱ʼá tiempo xi̱keʼénaña? Ta inka ña̱ ndáyáʼviní xíto na̱ anciano kúú ña̱yóʼo: ¿Á náʼa̱na ña̱ ndixa ndinuʼu-inina nda̱ndikó-inina? ¿Á íyo iin ña̱ náʼa̱ ña̱ xa̱a̱ i̱xakáʼnu-ini Jehová xa̱ʼa̱na? (Hech. 3:19).

5. ¿Ndáa ki̱ʼva chíndeétáʼan chiñu ña̱ kéʼé na̱ anciano xíʼin na̱ congregación?

⁵ Tá ndákutáʼan na̱ anciano xíʼin iin na̱ ni̱ki̱ʼvi ku̱a̱chi, ña̱ kúni̱na kúú ña̱ ndaka̱xinna keʼéna táʼan ña̱ xa̱a̱ nda̱kaxin Jehová chí ndiví: ña̱yóʼo kúni̱ kachiña ña̱ káʼa̱nna xíʼin Jehová, ña̱ ndíku̱nna ña̱ va̱xi nu̱ú tu̱ʼunra ta saátu ndíku̱nna inkaka tutu ña̱ tává na̱ ñuu Ndióxi̱ ña̱ káʼa̱n xa̱ʼa̱ ku̱a̱chi ndeé yóʼo (Mat. 18:18). ¿Ndáa ki̱ʼva chíndeétáʼan ña̱yóʼo xíʼin na̱ congregación? Tá va̱ása ndándikó-ini na̱ ni̱ki̱ʼvi ku̱a̱chi, távánana ti̱xin congregación, tasaá va̱ása chika̱a̱na ini inka na̱ hermano ña̱ ke̱ʼéna ña̱ va̱ása va̱ʼa, tasaá kúú ña̱ ndáana na̱ hermano ti̱xin congregación (1 Cor. 5:6, 7, 11-13; Tito 3:10, 11). Ta ña̱yóʼo kivi chindeétáʼanña xíʼin na̱ ni̱ki̱ʼvi ku̱a̱chi ña̱ ndandikó-inina xa̱ʼa̱ ña̱ va̱ása va̱ʼa ke̱ʼéna, tasaá ixakáʼnu-ini Jehová xa̱ʼa̱na (Luc. 5:32). Na̱ anciano káʼa̱nna xíʼin Jehová xa̱ʼa̱ na̱ nda̱ndikó-ini ña̱ ná chindeétáʼanra xíʼinna ña̱ vií ndakutáʼan tukuna xíʼinra (Sant. 5:15).

6. ¿Á kivi ixakáʼnu-ini Jehová xa̱ʼa̱ iin na̱ ki̱ta ti̱xin congregación?

⁶ Ná kachiyó, ña̱ nda̱kutáʼan na̱ anciano xíʼin iin na̱ ni̱ki̱ʼvi ku̱a̱chi, ta na̱yóʼo va̱ása ndándikó-inina xa̱ʼa̱ ña̱ ke̱ʼéna. Xa̱ʼa̱ ña̱yóʼo xíniñúʼu tavánana ti̱xin congregación. Ta tá ni̱ya̱ʼandosóna ley país nu̱ú ndóona, na̱ anciano va̱ása kivi chindeétáʼanna xíʼin na̱yóʼo xa̱ʼa̱ ña̱ kivi kundoʼona. Saáchi Jehová ta̱xira ña̱ ná koo na̱ chíñu ña̱ va̱ʼa ndatiinna ku̱a̱chi ta taxina castigo ndaʼa̱ na̱ yáʼandosó ña̱ káʼa̱n ley, ni nda̱ndikó-inina xa̱ʼa̱ ku̱a̱chi ña̱ ni̱ki̱ʼvina nu̱ú Jehová á va̱ása (Rom. 13:4). Soo tá ni̱ya̱ʼa tiempo na̱ yiví yóʼo ki̱ʼinna kuenta ña̱ va̱ása va̱ʼa íyo ña̱ ke̱ʼéna, ta ndixaní ndándikó-inina xa̱ʼa̱ ku̱a̱chi ña̱ ni̱ki̱ʼvina, ta násamana ña̱ ndákanixi̱nína xíʼin ña̱ kéʼéna, Jehová íyo tu̱ʼvara ixakáʼnu-inira xa̱ʼa̱na (Luc. 15:17-24). Ni ndeéní ku̱a̱chi ni̱ki̱ʼvina nu̱úra (2 Crón. 33:9, 12, 13; 1 Tim. 1:15).

7. ¿Ndáaña kúni̱ kachi ña̱ koo káʼnu-iniyó xa̱ʼa̱ na̱ ke̱ʼé ña̱ va̱ása va̱ʼa xíʼinyó?

⁷ Va̱ʼaní kúniyó saáchi su̱ví miíyó kúú na̱ xíniñúʼu ndaka̱xin ndáana kúú na̱ xíniñúʼu ixakáʼnu-ini Jehová xa̱ʼa̱. Soo íyo iin ña̱ kivi keʼéyó. ¿Ndáaña kúúña? Sana iinna ke̱ʼéna iin ña̱ va̱ása va̱ʼa xíʼinyó ta káʼa̱nna xíʼinyó ña̱ ná koo káʼnu-iniyó xa̱ʼa̱na á sanatu va̱ása ka̱ʼa̱nvína xíʼinyó ña̱ ná koo káʼnu-iniyó xa̱ʼa̱na. Soo nda̱a̱ ndáaka ña̱ ná keʼéna, kivi ndaka̱xinyó ña̱ ixakáʼnu-iniyó xa̱ʼa̱na. Ña̱yóʼo kúni̱ kachiña ña̱ va̱ása ndakaʼánkayó xa̱ʼa̱ ña̱ ke̱ʼéna xíʼinyó, ta ná va̱ása sa̱a̱kayó xíʼinna. Soo sana ixayo̱ʼvi̱vaña xíʼinyó keʼéyó ña̱yóʼo chi ni̱xo̱ʼvi̱níyó xíʼin ña̱ ke̱ʼéna xíʼinyó. Xa̱ʼa̱ ña̱kán xíniñúʼuyó ku̱a̱ʼá tiempo ña̱ va̱ʼa nandósó-iniyó xa̱ʼa̱ ña̱ ke̱ʼéna xíʼinyó. Tutu La Atalaya 15 tí septiembre ña̱ ku̱i̱ya̱ 1994 káchiña: “Ña̱ ixakáʼnu-iniyó xa̱ʼa̱ na̱ ke̱ʼé á na̱ ni̱ka̱ʼa̱n iin ña̱ va̱ása va̱ʼa xíʼinyó, su̱ví ña̱yóʼo kúni̱ kachiña ña̱ va̱ʼa íyo ña̱ ke̱ʼéna chi ña̱ kéʼéyó kúú ña̱ sándakooyó ku̱a̱chi ña̱ ke̱ʼéna xíʼinyó ndaʼa̱ Jehová. Chi iinlá mií Jehová kúú ta̱ nda̱kúní ndátiin ku̱a̱chi ta kixaa̱ iin tiempo ña̱ ndatiinraña xíʼinna”. ¿Nda̱chun kúni̱ Jehová ña̱ ná ixakáʼnu-iniyó xa̱ʼa̱ inkana ta saátu kandíxayó ña̱ nda̱kúní ndatiinra ku̱a̱chi?

¿NDA̱CHUN KÚNI̱ JEHOVÁ NÁ KOO KÁʼNU-INIYÓ XA̱ʼA̱ INKANA?

8. ¿Ndáa ki̱ʼva náʼa̱yó ña̱ chíndayáʼviyó ña̱ íxakáʼnu-ini Jehová xa̱ʼa̱yó?

⁸ Náʼa̱yó ña̱ ndáyáʼvi ña̱ kúndáʼvi-ini Jehová xínira miíyó tá íxakáʼnu-iniyó xa̱ʼa̱ inkana. Nu̱ú iin parábola, ta̱ Jesús chi̱táʼanra Jehová xíʼin iin ta̱ rey ta̱ i̱xakáʼnu-ini xa̱ʼa̱ iin ta̱ xi̱níká ku̱a̱ʼání xu̱ʼún nu̱úra. Soo ta̱ ta̱a ta̱ i̱xakáʼnu-ini ta̱ rey xa̱ʼa̱ va̱ása níkundáʼvi-inira kunira iin ta̱ xi̱níká loʼo xu̱ʼún nu̱úra (Mat. 18:23-35). ¿Ndáaña xi̱kuni̱ ta̱ Jesús sanáʼa̱ra xíʼin ña̱yóʼo? Ña̱ tá ndixa chíndayáʼviyó ña̱ kúndáʼvi-ini Jehová xínira miíyó, ña̱yóʼo chindeétáʼanña xíʼinyó ña̱ ixakáʼnu-iniyó xa̱ʼa̱ inkana (Sal. 103:9). Xa̱a̱ íyo ku̱a̱ʼá ku̱i̱ya̱ tutu ña̱ La Atalaya ni̱ka̱ʼa̱nña ña̱ ni ku̱a̱ʼá yichi̱ ná ixakáʼnu-iniyó xa̱ʼa̱ inkana, “va̱ása kítáʼanví ña̱yóʼo xíʼin ña̱ íxakáʼnu-ini Jehová xa̱ʼa̱yó xíʼin ña̱ kúndáʼvi-inira xínira miíyó, saáchi xa̱a̱ ni̱xi̱ʼi̱ ta̱ Jesús xa̱ʼa̱yó”.

9. ¿Ndáana kúndáʼvi-ini Jehová xínira? (Mateo 6:14, 15).

⁹ Tá íxakáʼnu-iniyó xa̱ʼa̱ inkana, Jehová íxakáʼnu-inira xa̱ʼa̱yó. Ta̱yóʼo kúndáʼvi-inira xínira na̱ kúndáʼvi-ini xíni inkana (Mat. 5:7; Sant. 2:13). Káxiní ni̱ka̱ʼa̱n ta̱ Jesús xa̱ʼa̱ ña̱yóʼo tá sa̱náʼa̱ra na̱ discípulora ndáa ki̱ʼva ka̱ʼa̱nna xíʼin Ndióxi̱ (kaʼvi Mateo 6:14, 15). Xa̱a̱ ya̱chi̱ví ni̱ka̱ʼa̱n Jehová xíʼin na̱ xi̱ndasakáʼnu miíra ña̱ ná kundáʼvi-inina kunina inkana, chi saá íyo ña̱ ni̱ka̱ʼa̱nra xíʼin ta̱ Job. Saáchi tá ni̱ka̱ʼa̱n ta̱ Elifaz, ta̱ Bildad xíʼin ta̱ Zofar xíʼinra tu̱ʼun ña̱ sa̱xóʼvi̱ní-inira, xi̱niñúʼu kundeé-inira xíʼin ña̱yóʼo. Ta ña̱ va̱ʼa ixakáʼnu-ini Jehová xa̱ʼa̱ ña̱ ke̱ʼé na̱ ta̱a yóʼo, ni̱ka̱ʼa̱nra xíʼin ta̱ Job ña̱ ná keʼéra oración xa̱ʼa̱na. Ta tá ke̱ʼéra ña̱yóʼo, ku̱a̱ʼání ña̱ va̱ʼa ta̱xi Jehová ndaʼa̱ra (Job 42:8-10).

10. ¿Ndáaña kivi kundoʼoyó tá va̱ása nándósó-iniyó xa̱ʼa̱ ña̱ ke̱ʼéna xíʼinyó? (Efesios 4:31, 32).

¹⁰ Miíyó kúú na̱ xóʼvi̱ tá va̱ása nándósóyó xa̱ʼa̱ ña̱ ke̱ʼéna xíʼinyó. Saáchi tá sáa̱kayó xíʼinna táki̱ʼva íyo iin ña̱ʼa ña̱ ve̱ení ndísoyó saá íyo ña̱yóʼo, xa̱ʼa̱ ña̱kán Jehová káʼa̱nra xíʼinyó ña̱ ná nandósóyó xa̱ʼa̱ ña̱ ke̱ʼéna xíʼinyó (kaʼvi Efesios 4:31, 32). Ta ña̱yóʼo kúú consejo ña̱ táxira ndaʼa̱yó: “Ndakoo ña̱ sáún ta va̱ása keʼékaúnña” (Sal. 37:8). Ku̱a̱ʼání ña̱ va̱ʼa ndakiʼinyó tá ná kuniso̱ʼoyó consejo yóʼo, saáchi tá va̱ása nándósóyó xa̱ʼa̱ ña̱ ke̱ʼéna xíʼinyó nda̱a̱ kivi kiʼin kue̱ʼe̱ miíyó (Prov. 14:30). Ña̱kán xóʼvi̱níyó xa̱ʼa̱ ña̱yóʼo tá va̱ása nándósóyó xa̱ʼa̱ña, ta nda̱a̱ táki̱ʼva íyo na̱ xíʼi veneno saá íyoyó, saáchi ndeéka xóʼvi̱yó xa̱ʼa̱ ña̱yóʼo nu̱úka ña̱ ke̱ʼéna xíʼinyó. Ña̱kán tá íxakáʼnu-iniyó xa̱ʼa̱ inkana ku̱a̱ʼání ña̱ va̱ʼa ndákiʼinyó, saáchi va̱ása ndíʼi̱ka-iniyó ta kivi ndakundeéyó kachíñukayó nu̱ú Jehová (Prov. 11:17).

11. ¿Ndáaña káʼa̱n tu̱ʼun Ndióxi̱ xa̱ʼa̱ ña̱ va̱ása keʼéyó nda̱a̱ táki̱ʼva ke̱ʼéna xíʼinyó? (Romanos 12:19-21).

¹¹ Tá iinna ke̱ʼéna iin ña̱ va̱ása va̱ʼa xíʼinyó ná sandákooyóña ndaʼa̱ Jehová. Saáchi va̱ása nítaxira nda̱yí ndaʼa̱yó ña̱ keʼéyó nda̱a̱ táki̱ʼva ke̱ʼéna xíʼinyó (kaʼvi Romanos 12:19-21). Xa̱ʼa̱ ña̱ kúúyó na̱ yiví ku̱a̱chi va̱ása nda̱kú ndátiinyó ku̱a̱chi nda̱a̱ táki̱ʼva ndátiin Jehová ña̱yóʼo, chi ta̱yóʼo kúú ta̱ xíni̱ xa̱ʼa̱ ndiʼi ña̱ʼa (Heb. 4:13). Ta sava yichi̱ xa̱ʼa̱ ña̱ sáa̱níyó kéʼéyó ña̱ kúni̱ miíyó. Ta ña̱yóʼo kúú ña̱ ka̱ʼyí ta̱ Santiago: “Saáchi iin na̱ yiví na̱ sáa̱ní, va̱ása nda̱kú kéʼéna nda̱a̱ táki̱ʼva kúni̱ mií Ndióxi̱” (Sant. 1:20). Ña̱kán kivi kandíxayó ña̱ nda̱kúníva ndatiin Jehová ku̱a̱chi xa̱ʼa̱yó.

12. ¿Ndáa ki̱ʼva náʼa̱yó ña̱ kándíxayó ña̱ nda̱kúní ndatiin Jehová ku̱a̱chi?

¹² Tá íxakáʼnu-iniyó xa̱ʼa̱ inkana, saá kándíxayó ña̱ nda̱kúní ndatiin Jehová ku̱a̱chi. Tá sándakooyó ndiʼi ña̱ ndóʼoyó ndaʼa̱ Jehová, kándíxayó ña̱ miíra ndasavií ndiʼi ña̱ sáxo̱ʼvi̱ miíyó. Ti̱xin ñuyǐví xa̱á ña̱ káʼa̱nra taxira kundooyó, káʼa̱nra ña̱ va̱ása ndakaʼánkayó xa̱ʼa̱ ndiʼi ña̱ʼa ña̱ sa̱xóʼvi̱ miíyó (Is. 65:17). Soo tiempo vitin, ¿á kivi nandósó-iniyó xa̱ʼa̱ ña̱ sa̱sáa̱nína miíyó xíʼin ña̱ sa̱xóʼvi̱nína miíyó? Ná kotoyó ña̱ ke̱ʼé sava na̱ hermano.

¿NDÁAÑA VA̱ʼA NDÁKIʼINYÓ TÁ ÍXAKÁʼNU-INIYÓ XA̱ʼA̱ INKANA?

13, 14. ¿Ndáaña sákuaʼún xíʼin ña̱ ndo̱ʼo ta̱ Tony xíʼin ta̱ José?

¹³ Ku̱a̱ʼání na̱ hermanoyó i̱xakáʼnu-inina xa̱ʼa̱ inkana ni ku̱a̱ʼání ña̱ va̱ása va̱ʼa ke̱ʼéna xíʼin na̱yóʼo. ¿Ndáaña va̱ʼa nda̱kiʼinna xa̱ʼa̱ ña̱ i̱xakáʼnu-inina xa̱ʼa̱na?

¹⁴ Ná kotoyó ña̱ ndo̱ʼo ta̱ Tony,c ta̱ íyo chí Filipinas. Tá kúma̱níka xa̱a̱ra koora testigo Jehová, iin ta̱a ta̱ naní José xa̱ʼníra ñanira ta̱ kúchée nu̱úra. Soo xa̱ʼa̱ ña̱ kue̱ʼe̱ní ni̱xi̱yo ta̱ Tony xi̱kuni̱ra kaʼníra ta̱ José. Soo chi̱ka̱a̱vana ta̱ José veʼeka̱a xa̱ʼa̱ ña̱ ke̱ʼéra, ta tá ki̱tara veʼeka̱a, ta̱ Tony chi̱ka̱a̱-inira ña̱ nandukúrara ta kaʼnírara. Ta nda̱a̱ sa̱tára iin pistola ña̱ va̱ʼa kaʼnírara. Soo tá ni̱ya̱ʼa tiempo, ta̱ Tony ki̱xáʼara sákuaʼara xa̱ʼa̱ Ndióxi̱ xíʼin na̱ testigo Jehová. Ta̱yóʼo káchira: “Tá ki̱xáʼíi̱ sákuaʼi̱ xa̱ʼa̱ tu̱ʼun Ndióxi̱, sa̱kúaʼi̱ ña̱ xi̱niñúʼu nasamai̱ ki̱ʼva ña̱ íyoi̱ ta va̱ása sa̱a̱níkai̱”. Ta̱ Tony nda̱kuchira ta ni̱xa̱a̱ra ku̱ura anciano ti̱xin congregación. Ta nda̱kanda̱ní-inira tá ku̱nda̱a̱-inira ña̱ ni̱xa̱a̱tu ta̱ José ku̱ura testigo Jehová. Ta tá nda̱kutáʼanra xíʼin ta̱ José nu̱mitáʼanra, ta ni̱ka̱ʼa̱nra xíʼin ta̱ José ña̱ xa̱a̱ i̱xakáʼnu-inira xa̱ʼa̱ra. Ta̱ Tony ni̱ka̱ʼa̱nra ña̱ ku̱si̱íní-inira tá i̱xakáʼnu-inira xa̱ʼa̱ ta̱ José, ta ku̱a̱ʼání ña̱ va̱ʼa ta̱xi Jehová ndaʼa̱ ta̱ Tony xa̱ʼa̱ ña̱ i̱xakáʼnu-inira xa̱ʼa̱ ta̱ José.

15, 16. ¿Ndáaña sákuaʼún xíʼin ña̱ ndo̱ʼo ta̱ Peter ta saátu ñá Sue?

¹⁵ Tá ku̱i̱ya̱ 1985 ta̱ Peter xíʼin ñá Sue, iin reunión ñúʼuna ti̱xin salón tá ndeéní ka̱ʼndi bomba, saáchi iin ta̱a chi̱ka̱a̱ ña̱yóʼo ti̱xin salón kán. Ta xa̱ʼa̱ ña̱yóʼo ñá Sue ndeéní tu̱kue̱ʼe̱ñá.d Sava yichi̱ xi̱ndakanixi̱nína nda̱chun ke̱ʼéra ña̱yóʼo. Ta tá ni̱ya̱ʼa tiempo, ti̱inna ta̱ ta̱a kán ta chi̱ka̱a̱nara veʼeka̱a ta kán kundika̱a̱ra nda̱a̱ kuvira. Tá ni̱nda̱ka̱tu̱ʼunna ta̱ Peter xíʼin ñá Sue á xa̱a̱ i̱xakáʼnu-inina xa̱ʼa̱ ta̱ ta̱a kán, na̱yóʼo ka̱china: “Jehová sánáʼa̱ra ndi̱ʼi̱ ña̱ va̱ása sa̱a̱ndi̱ ta saátu va̱ása ndakaʼánndi̱ xa̱ʼa̱ ña̱ kéʼéna xíʼinndi̱, chi tá ná keʼéndi̱ ña̱yóʼo kivi kixáʼa kundi̱ʼi̱ní-inindi̱ ta nda̱a̱ kivi kiʼin kue̱ʼe̱ ndi̱ʼi. Ña̱kán nda̱a̱ tá xa̱ʼa̱ ni̱ka̱ʼa̱nndi̱ xíʼin Jehová ña̱ ná chindeétáʼanra xíʼinndi̱ ña̱ va̱ása sa̱a̱ndi̱ kunindi̱ ta̱ ta̱a kán, ta va̱ása ndakaʼánndi̱ xa̱ʼa̱ ña̱ ke̱ʼéra xíʼinndi̱”.

¹⁶ Sava yichi̱ íxayo̱ʼvi̱níña xíʼin na̱ matrimonio yóʼo ña̱ ixakáʼnu-inina xa̱ʼa̱ ta̱ ta̱a kán. Ná kotoyó ndáaña káchina: “Sava yichi̱ tá kíxáʼa ndeéní ndóʼo ñá Sue, xóʼvi̱níndi̱ xa̱ʼa̱ ña̱yóʼo ta sáa̱níndi̱ xa̱ʼa̱ ña̱ ku̱u. Ta tá ndóʼondi̱ ña̱yóʼo chíka̱a̱níndi̱ ndee̱ ña̱ va̱ása ndakanixi̱níndi̱ xa̱ʼa̱ña, tasaá nándósó-inindi̱ xa̱ʼa̱ ña̱ ku̱u. Ña̱kán xíʼin ndinuʼu-inindi̱ káʼa̱nndi̱ ña̱ tá ná kixaa̱ iin ki̱vi̱ ña̱ xa̱a̱ ta̱ ta̱a yóʼo nduura testigo Jehová, viíní ndakiʼinndi̱ra ti̱xin ñuu Ndióxi̱. Xíʼin ña̱ ndo̱ʼondi̱ yóʼo sa̱kuaʼandi̱ ña̱ va̱ʼaní chíndeétáʼan tu̱ʼun Ndióxi̱ xíʼinyó tá yáʼayó nu̱ú tu̱ndóʼo, ta va̱ʼaní sándi̱koña-iniyó. Chi kúnda̱a̱-iniyó ña̱ si̱lóʼoní kúma̱ní ta sandíʼi-xa̱ʼa̱ Jehová ndiʼi ña̱ sáxo̱ʼvi̱ miíyó”.

17. ¿Ndáaña sákuaʼún xíʼin ña̱ ndo̱ʼo ñá Myra?

¹⁷ Ñá Myra ni̱xa̱a̱ña sa̱kuaʼañá xa̱ʼa̱ Jehová tá xa̱a̱ ti̱ndaʼa̱ñá ta kúúmiíñá u̱vi̱ na̱ va̱lí se̱ʼeñá, soo yiíñá va̱ása níxiinra sakúaʼara xa̱ʼa̱ Jehová. Ta tá ni̱ya̱ʼa tiempo ku̱a̱ʼa̱nra xíʼin inka ñaʼá, ta sa̱ndákoora ñá síʼira xíʼin na̱ va̱lí se̱ʼera. Ñá Myra káchiñá: “Nda̱kanda̱ní-inii̱ tá sa̱ndákoo yiíi̱ yi̱ʼi̱. Ta ku̱a̱ʼání ña̱ ndo̱ʼi̱ tá sa̱ndákoora yi̱ʼi̱, ndo̱ʼi̱ nda̱a̱ táki̱ʼva ndóʼo ku̱a̱ʼání ná ñaʼá tá sándaʼvi yiínaná: va̱ása níxi̱kandíxakai̱ nda̱a̱ ni iinna, ni̱xo̱ʼvi̱níi̱, nda̱kavaní-inii̱ ta nda̱kanixi̱níi̱ ña̱ kúúmií ku̱a̱chi xa̱ʼa̱ ña̱ ku̱u, ta saátu ni̱sa̱a̱níi̱”. Ni xa̱a̱ sa̱ndákootáʼanna, soo xóʼvi̱níkavañá xa̱ʼa̱ ña̱ ke̱ʼé yiíñá xíʼinñá. Ñáyóʼo káchiñá: “Ku̱a̱ʼá yo̱o̱ ni̱xo̱ʼvi̱níi̱ xíʼin ña̱ ndo̱ʼi̱ ta ki̱ʼi̱n kuenta ña̱ va̱ása viíka níxi̱kitáʼi̱n xíʼin Jehová ni xíʼin inkakana”. Vitin ñá Myra va̱ása sáa̱kañá xíʼin ta̱ xi̱kuu yiíñá ta saátu va̱ása kúni̱ñá ña̱ kundoʼora nda̱a̱ ni iin ña̱ va̱ása va̱ʼa. Chi ña̱ kúni̱ñá kúú ña̱ ná kixaa̱ iin ki̱vi̱ ña̱ sakúaʼara xa̱ʼa̱ Jehová. Ñáyóʼo ndákanixi̱níñá xa̱ʼa̱ ña̱ koo chí nu̱únínu ta su̱ví xa̱ʼa̱ ña̱ ndo̱ʼoñá. Ni iinlá miíñá sa̱kúaʼnu u̱vi̱ na̱ va̱lí se̱ʼeñá, soo chi̱ka̱a̱níñá ndee̱ ña̱ sa̱náʼa̱ñana xa̱ʼa̱ Jehová ta vitin ndiʼina kúsi̱íní-inina káchíñuna nu̱ú Jehová.

IINLÁ JEHOVÁ KÚÚ TA̱ NDA̱KÚNÍ NDÁTIIN KU̱A̱CHI

18. ¿Ndáaña kivi kandíxayó xa̱ʼa̱ ña̱ iinlá Jehová kúú ta̱ nda̱kúní ndátiin ku̱a̱chi?

¹⁸ Xa̱ʼa̱ ña̱ iinlá Jehová kúú ta̱ nda̱kúní ndátiin ku̱a̱chi, va̱ása xíniñúʼu kundi̱ʼi̱-iniyó ndáa ki̱ʼva ndatiinra ku̱a̱chi xíʼin inkana. Ta va̱ʼaní kúniyó tá kunda̱a̱-iniyó xa̱ʼa̱ ña̱yóʼo (Rom. 14:10-12). Ña̱kán kivi kandíxayó ña̱ ndiʼi tiempo nda̱kúní ndatiin Jehová ku̱a̱chi xíʼin ndiʼina (Gén. 18:25; 1 Rey. 8:32). Chi ta̱yóʼo nda̱a̱ ni iin yichi̱ va̱ása keʼéra ña̱ va̱ása va̱ʼa.

19. ¿Ndáaña keʼé Jehová chí nu̱únínu xa̱ʼa̱ ña̱ nda̱kúní ndátiinra ku̱a̱chi?

¹⁹ Xa̱a̱ ndátuníyó ná kixaa̱ ki̱vi̱ ña̱ sandíʼi-xa̱ʼa̱ Jehová ndiʼi ña̱ sáxo̱ʼvi̱ miíyó xa̱ʼa̱ ña̱ kúúyó na̱ yiví ku̱a̱chi. Ta kúni̱níyó ná kixaa̱ ki̱vi̱ yóʼo chi saá kúú ña̱ va̱ása kusuchíka-iniyó (Sal. 72:12-14; Apoc. 21:3, 4). Ta va̱ása ndakaʼákayó xa̱ʼa̱ ña̱yóʼo. Ña̱kán nani ndátuyó ná kixaa̱ ki̱vi̱ yóʼo ná kusi̱íní-iniyó xa̱ʼa̱ ña̱ va̱ʼaní chínúu Jehová yichi̱ nu̱úyó ña̱ ixakáʼnu-iniyó xa̱ʼa̱ inkana.