¿Á xíʼin ndinuʼu-iniún kúni̱ún ndataxiún miíún ndaʼa̱ Jehová?

1, 2. ¿Ndáaña xíniñúʼu keʼún tá kúma̱níka ndakuchiún?

TI̱XIN 5 ku̱i̱ya̱ ña̱ ni̱ya̱ʼa yáʼaka iin millón na̱ yiví ndakuchi ta ndu̱una testigo Jehová. Ku̱a̱ʼánína tá válívína sa̱kúaʼana xa̱ʼa̱ Jehová nda̱a̱ táki̱ʼva ni̱xi̱yo ta̱ discípulo Timoteo (2 Tim. 3:​14, 15). Inkana sa̱kúaʼana xa̱ʼa̱ Jehová tá xa̱a̱ chéena. Sa̱kán íyo loʼo tiempo iin ñaʼá ñá xa̱a̱ chéení ñá kúúmií 97 ku̱i̱ya̱ nda̱kuchiñá ta ndu̱uñá testigo Jehová.

² ¿Á táxina estudio nda’ún? ¿Á testigo Jehová kúú na̱ yiváún ta sánáʼa̱na yóʼó xa̱ʼa̱ ña̱ nda̱a̱? Tá saá, sana xa̱a̱ ndákanixi̱níún ña̱ ndakuchiún ta va̱ʼaníva tá ndákanixi̱níún ña̱yóʼo, soo íyo iin ña̱ʼa ña̱ xíniñúʼu keʼún tá kúma̱níka ndakuchiún ta ña̱yóʼo kúú ña̱ ndataxiún miíún ndaʼa̱ Jehová. Artículo yóʼo chindeétáʼanña xíʼún ña̱ kunda̱a̱-iniún ndáaña kúni̱ kachi ña̱ ndataxiún miíún ndaʼa̱ Jehová. Saátu chindeétáʼanña xíʼún ña̱ kǒo yi̱ʼvíún ndataxiún miíún ndaʼa̱ Jehová ta ndakuchiún.

¿NDÁAÑA KÚNI̱ KACHI ÑA̱ NDATAXIYÓ MIÍYÓ NDAʼA̱ JEHOVÁ?

3. Ka̱ʼa̱n xa̱ʼa̱ sava na̱ yiví na̱ nda̱kaxin Jehová kachíñu nu̱úra tiempo xi̱naʼá.

³ Tá káʼa̱n Biblia xa̱ʼa̱ ña̱ ndataxiyó miíyó ndaʼa̱ Jehová kúni̱ kachiña ña̱ keʼéyó iin ña̱ʼa ña̱ yi̱i̱ní á ña̱ kachiñuyó nu̱úra. Mií Jehová nda̱kaxin na̱ ñuu Israel ña̱ koona kuentara. Soo, sava na̱yóʼo ke̱ʼéna iin ña̱ ndáyáʼviníka. Tá kúú, Jehová nda̱kaxinra ta̱ Aarón ña̱ koora su̱tu̱ káʼnu ña̱kán chí nu̱ú ti̱ko̱to̱ra xi̱tiin iin ka̱a loʼo ña̱ oro, ta ña̱yóʼo xi̱ndanaʼa̱ña ña̱ iinlá nu̱ú Jehová kachíñura (Lev. 8:9). Saátu na̱ nazareo ke̱ʼéna iin ña̱ ndáyáʼviní chi nda̱taxina miína ndaʼa̱ Jehová. Ña̱ tu̱ʼun nazareo ka̱naña ti̱xin tu̱ʼun hebreo nazír ña̱ kúni̱ kachi “na̱ íyo síín” á “na̱ nda̱taxi mií ndaʼa̱ Ndióxi̱”. Ley ta̱ Moisés xi̱kaʼa̱nña ña̱ kǒo níxi̱xiniñúʼu keʼéna sava ña̱ʼa xa̱ʼa̱ ña̱ ki̱ndoona kachíñuna nu̱ú Ndióxi̱ (Núm. 6:​2-8).

4. a) ¿Ndáaña kúni̱ kachi ña̱ ndataxiyó miíyó ndaʼa̱ Jehová? b) ¿Ndáaña kúni̱ kachi ña̱ kǒo keʼéyó ña̱ kúni̱ miíyó? (Koto na̱ʼná).

⁴ Ña̱ ndataxiyó miíyó ndaʼa̱ Ndióxi̱ kúni̱ kachiña ña̱ ndaka̱xinyó kooyó discípulo ta̱ Jesús ta siʼna chiñu Ndióxi̱ kundi̱ʼi̱-iniyó xa̱ʼa̱. Ta̱ Jesús ni̱ka̱ʼa̱nra: “Tá iinna kúni̱na kundiku̱nna yi̱ʼi̱ ná sandákoona keʼéna ña̱ kúni̱ miína” (Mat. 16:24). Ña̱ tu̱ʼun griego ña̱ va̱xi nu̱ú texto yóʼo ña̱ káchi “ná sandákoona keʼéna ña̱ kúni̱ miína” kivitu kooña “ná kǒo keʼéna ña̱ kútóo miína”. Tá ná ndataxiún miíún ndaʼa̱ Jehová saá ka̱ʼún xíʼinra ña̱ kǒo keʼún ña̱ʼa ña̱ kǒo kútóora (2 Cor. 5:​14, 15). Ña̱yóʼo kúni̱ kachiña ña̱ kǒo keʼún ña̱ʼa ña̱ kútóo ku̱ñún, tá kúú ña̱ ku̱su̱n xíʼin na̱ ta̱ʼán tindaʼa̱ xíʼún (Gál. 5:​19-21; 1 Cor. 6:18). ¿Á ña̱ yo̱ʼvi̱ní kúú ña̱ ndúkú Jehová nu̱úyó? Va̱ásaví, tá ndixa kúʼvi̱-iniún xíniún Jehová saá keʼún ña̱ kútóora chi ña̱ va̱ʼa miívaún kúúña (Sal. 119:97; Is. 48:​17, 18). Iin ta̱ hermano ta̱ naní Nicholas káchira: “Kivi ndakanixi̱níyó ña̱ nda̱a̱ táki̱ʼva íyo yéʼé veʼeka̱a saá íyo ña̱ káʼa̱n Jehová xíʼinyó chi sásiña nu̱úyó ña̱ keʼéyó ña̱ kúni̱ miíyó, á kivitu ndakanixi̱níyó ña̱ íyoña nda̱a̱ táki̱ʼva íyo iin ka̱a ña̱ ndási nu̱ú ñúʼu tí león, chi ña̱yóʼo chíndeétáʼanña xíʼinyó ña̱ kǒo kaxírí miíyó”.

5. a) ¿Ndáaña kéʼé iin na̱ yiví tá xa̱a̱ ndátaxina miína ndaʼa̱ Jehová? b) ¿Ndáaña kúú ña̱ ndataxina miína ndaʼa̱ Jehová ta ndáaña kúú ña̱ ndakuchina? (Koto na̱ʼná).

⁵ ¿Ndáaña kéʼé iin na̱ yiví tá xa̱a̱ ndátaxina miína ndaʼa̱ Jehová? Kéʼéna iin oración nu̱úra ta kíndo̱ona xíʼinra ña̱ iinlá miíra ndasakáʼnuna ta saátu ña̱ kachíñuna nu̱úra. Tá ndátaxina miína ndaʼa̱ Jehová káʼa̱nna xíʼinra ña̱ kuʼvi̱-inina kuninara xíʼin ndiʼi níma̱na xíʼin ndiʼi ndee̱na xíʼin ndiʼi ña̱ ndákanixi̱nína ta saátu xíʼin ndiʼi ña̱ tákuna (Mar. 12:30). Tá kúni̱ún ndataxiún miíún ndaʼa̱ Jehová, iinlá miíún xíniñúʼu ka̱ʼa̱n xíʼinra. Soo, tá xa̱a̱ ná ndakuchiún ndiʼi na̱ yiví koto yóʼó, saá kunda̱a̱-inina ña̱ nda̱taxiún miíún ndaʼa̱ Jehová. Iin ña̱ʼa ña̱ ndáyáʼviní kúú ña̱ ndataxiyó miíyó ndaʼa̱ Jehová, ta xíniñúʼu sáxi̱nuyóña. Ña̱kán tá xa̱a̱ ke̱ʼún ña̱yóʼo chikaa̱ ndee̱ ña̱ saxínúnña chi ña̱yóʼo kúú ña̱ kúni̱ Jehová keʼún (Ecl. 5:​4, 5).

¿NDÁAÑA CHINDEÉTÁʼAN XÍʼÚN ÑA̱ NDATAXIÚN MIÍÚN NDAʼA̱ JEHOVÁ?

6. ¿Nda̱chun ndátaxi iin na̱ yiví miína ndaʼa̱ Jehová?

⁶ Xa̱ʼa̱ ña̱ kúʼvi̱-iniún xíniún Jehová kúú ña̱ ndataxiún miíún ndaʼa̱ra. Ta su̱ví loʼo kuití tiempo kuʼvi̱-iniún kuniúnra, chi xa̱ʼa̱ ña̱ sákuaʼún xa̱ʼa̱ra kúnda̱a̱-iniún ndáa ki̱ʼva íyora ta ña̱yóʼo kúú ña̱ chindeétáʼanka xíʼún ña̱ kunda̱a̱-iniún xíʼin ña̱ káʼa̱nra (Col. 1:9). Vitin ña̱ xa̱a̱ káʼviún Biblia kúnda̱a̱-iniún 1) ña̱ ndixava íyo Jehová, 2) ña̱ xi̱niñúʼura espíritu santora ña̱ va̱ʼa ka̱ʼyi̱ Biblia, ta saátu 3) ña̱ kúúmiíra iin ñuu ta xíniñúʼura na̱yóʼo ña̱ saxínura ña̱ kúni̱ra keʼéra.

7. ¿Ndáaña xíniñúʼu keʼé iin na̱ yiví na̱ kúni̱ ndataxi mií ndaʼa̱ Jehová?

⁷ Tá iin na̱ yiví kúni̱na ndataxina miína ndaʼa̱ Jehová, xa̱a̱ xíniñúʼu kunda̱a̱ loʼo inina xa̱ʼa̱ ña̱ káʼa̱n Biblia, saátu kéʼéna ña̱ kútóo Ndióxi̱ ta káʼa̱nna xíʼin inka na̱ yiví xa̱ʼa̱ ña̱ kándíxana (Mat. 28:​19, 20). Ta saátu kúʼvi̱ní-inina xínina Jehová ta iinlá miíra kúni̱na ndasakáʼnuna xíʼin ndiʼi níma̱na. ¿Á kéʼún ña̱yóʼo? Tá ndixa kúʼvi̱-iniún xíniún Jehová ndataxiún miíún ndaʼa̱ra ta ndakuchiún xa̱ʼa̱ ña̱ kúni̱ún sakúsi̱íún-inira ta su̱ví xa̱ʼa̱ ña̱ kúni̱ún sakúsi̱íún-ini na̱ táxi estudio ndaʼún. Tá na̱ va̱lí kúúndó kǒo keʼéndó ña̱yóʼo xa̱ʼa̱ ña̱ kúni̱ndó sakúsi̱índó-ini na̱ yivándó á xa̱ʼa̱ ña̱ xa̱a̱ xítondó ña̱ xa̱a̱ ndákuchi ku̱a̱ʼání na̱ migondó.

8. ¿Ndáaña keʼéyó tá kúʼvi̱-iniyó xíniyó Jehová? (Salmo 116:​12-14).

⁸ Tá ndákanixi̱níún xa̱ʼa̱ ndiʼi ña̱ kéʼé Jehová xa̱ʼún ta kúsi̱í-iniún xa̱ʼa̱ ña̱ kéʼéra xa̱ʼún, saá kúú ña̱ kǒo ixayo̱ʼvi̱ña xíʼún ña̱ ndataxiún miíún ndaʼa̱ra (kaʼvi Salmo 116:​12-14).a Biblia kachiña, ndiʼi ña̱ va̱ʼa chí ndiví va̱xiña ta Jehová kúú ta̱ táxiña (Sant. 1:17). Iin regalo ña̱ ndáyáʼviní ña̱ ta̱xi Jehová ndaʼa̱yó kúú se̱ʼera ta̱ Jesús. Xa̱ʼa̱ ña̱ ni̱xi̱ʼi̱ ta̱ Jesús kivi koún migo Ndióxi̱ ta kutakún ndiʼi tiempo (1 Juan 4:​9, 10, 19). Ña̱ va̱ʼa na̱ʼún ña̱ táxiún tíxa̱ʼvi ndaʼa̱ Jehová ndaka̱xin ña̱ ndataxiún miíún ndaʼa̱ra ta kachíñún nu̱úra (Deut. 16:17; 2 Cor. 5:15). Ta xa̱ʼa̱ ña̱yóʼo káʼa̱n libro ña̱ naní kivi koo si̱íún vitin ta saátu chí nu̱únínu, nu̱ú ña̱ lección 46, punto 4, mií nu̱ú lección yóʼo va̱xitu iin video ña̱ u̱ni̱ minuto ña̱ naní Regalo ña̱ kivi taxiyó ndaʼa̱ Ndióxi̱.

¿Á XA̱A̱ ÍYO TU̱ʼVAÚN ÑA̱ NDATAXIÚN MIÍÚN NDAʼA̱ NDIÓXI̱ TA NDAKUCHIÚN?

9. ¿Nda̱chun níma̱ miíyó xíniñúʼu kana ña̱ ndataxiyó miíyó ndaʼa̱ Jehová?

⁹ Sana ndákanixi̱níún ña̱ kǒo íyo tu̱ʼvaún ña̱ ndataxiún miíún ndaʼa̱ Ndióxi̱ ta ndakuchiún. Sana xíniñúʼu nasamaún ña̱ʼa ña̱ kéʼún ña̱ va̱ʼa kuniso̱ʼún ña̱ káʼa̱n Jehová á sanatu xíniñúʼukaún tiempo ña̱ va̱ʼa kitáʼún xíʼinra (Col. 2:​6, 7). Ndakaʼán chi su̱ví inkáchi kíxáʼa ndiʼina ndásakáʼnuna Ndióxi̱. Saátu sava na̱ va̱lí kamaní kíxáʼana káchíñuna nu̱ú Ndióxi̱ ta inkana táxina yáʼa ku̱a̱ʼá tiempo saáví kéʼéna ña̱yóʼo. Ña̱kán, ndakanixi̱ní xa̱ʼa̱ ña̱ kivi keʼún ta kǒo chitáʼún miíún xíʼin inkana (Gál. 6:​4, 5).

10. ¿Ndáaña keʼún tá kǒo íyo tu̱ʼvaún ña̱ ndataxiún miíún ndaʼa̱ Jehová ta ndakuchiún? (Koto recuadro ña̱ naní “Tá testigo Jehová kúú na̱ yiváún”).

¹⁰ Tá kíʼún kuenta ña̱ kǒo íyo tu̱ʼvaún ña̱ ndataxiún miíún ndaʼa̱ Jehová ta kachíñún nu̱úra, ka̱ʼa̱n xíʼinra ña̱ ná chindeétáʼanra xíʼún ña̱ nasamaún sava ña̱ kéʼún (Filip. 2:13; 3:16). Kuniso̱ʼova Jehová ña̱ ka̱ʼún xíʼinra ta chindeétáʼanvara xíʼún (1 Juan 5:14).

¿NDA̱CHUN KǑO XÍÍN SAVANA NDATAXINA MIÍNA NDAʼA̱ JEHOVÁ?

11. ¿Ndáaña keʼé Jehová ña̱ va̱ʼa chindeétáʼanra xíʼinyó ña̱ nda̱kú koo iniyó xíʼinra?

¹¹ Sava na̱ yiví xa̱a̱ íyo tu̱ʼvavana ña̱ ndataxina miína ndaʼa̱ Jehová ta ndakuchina, soo kǒo xíínna keʼéna ña̱yóʼo saáchi yíʼvina ña̱ tavánana ti̱xin congregación tá ná keʼéna iin ku̱a̱chi kini. Soo, Biblia káʼa̱nña ña̱ mií Jehová chindeétáʼan xíʼin na̱ ndásakáʼnu miíra ña̱ keʼéna ña̱ va̱ʼa tasaá sakúsi̱ína-inira (Col. 1:10). Ña̱kán, kǒo kaka-iniún chi mií Jehová taxi ndee̱ ndaʼún ña̱ keʼún ña̱ va̱ʼa nda̱a̱ táki̱ʼva kéʼéra xíʼin inkana (1 Cor. 10:13). Loʼova na̱ yiví kée ti̱xin congregación xa̱ʼa̱ ña̱ kéʼéna ku̱a̱chi kini. Mií Jehová chindeétáʼan xíʼinyó ña̱ nda̱kú koo iniyó xíʼinra.

12. ¿Ndáaña chindeétáʼan xíʼinyó ña̱ kǒo keʼéyó ña̱ kini?

¹² Xa̱ʼa̱ ña̱ kúúyó na̱ yiví ku̱a̱chi sana kúni̱yó keʼéyó ña̱ va̱ása va̱ʼa (Sant. 1:14). Soo, tá xa̱a̱ ná kixaa̱ iin ki̱vi̱ ña̱ sana kúni̱ún keʼún iin ña̱ kini, ndakaʼán chi iinlá miíún kúú na̱ kivi ndaka̱xin á keʼúnña á kǒo keʼúnña. Sava na̱ yiví káʼa̱nna ña̱ kǒo kivi ka̱ʼnu̱-iniyó, soo su̱ví ña̱ ndixa kúú ña̱yóʼo. Kiviva sakúaʼayó ka̱ʼnu̱-iniyó tasaá kiʼinyó kuenta xíʼin ña̱ ndákanixi̱níyó xíʼin ña̱ ndóʼoyó. Íyo sava ña̱ʼa ña̱ kivi chindeétáʼan xíʼinyó tá kúú: ña̱ ka̱ʼa̱nyó xíʼin Jehová ndiʼi ki̱vi̱, ña̱ kuumiíyó iin programa ña̱ kaʼviyó xa̱ʼa̱ Ndióxi̱, ña̱ ku̱ʼu̱nyó reunión xíʼin ña̱ keeyó predicación. Tá kéʼé ni̱ʼiyó ña̱yóʼo saá kúú ña̱ kuumiíyó ndee̱ ña̱ saxínuyó ña̱ ki̱ndooyó keʼéyó nu̱ú Jehová tá nda̱taxiyó miíyó ndaʼa̱ra. Ná ndakaʼányó chi íyova Jehová xíʼinyó (Gál. 5:16).

13. ¿Ndáaña sákuaʼayó xíʼin ña̱ ke̱ʼé ta̱ José?

¹³ Kǒo ixayo̱ʼvi̱ña xíʼinyó nda̱kú koo iniyó xíʼin Jehová tá ya̱chi̱ka ná ndakanixi̱níyó xa̱ʼa̱ ña̱ kivi kuu. Nu̱ú Biblia va̱xi ku̱a̱ʼání ejemplo na̱ yiví na̱ ke̱ʼé ña̱yóʼo, ta na̱ yiví ku̱a̱chi xi̱kuutu na̱yóʼova. Ná ka̱ʼa̱nyó xa̱ʼa̱ ta̱ José, ñá síʼí ta̱ Potifar tuku ta tuku xi̱kaʼa̱nñá xíʼinra ña̱ ku̱su̱nra xíʼinñá, soo ta̱yóʼo xa̱a̱ xi̱kunda̱a̱va-inira ndáaña keʼéra. Ta ña̱yóʼo xi̱kaʼa̱nra xíʼinñá: “Nda̱chunví keʼíi̱ ña̱ va̱ása va̱ʼa yóʼo ta ki̱ʼvii̱ ku̱a̱chi nu̱ú Ndióxi̱” (Gén. 39:​8-10). Ña̱kán ni kúma̱níka ka̱ʼa̱n ñá síʼí ta̱ Potifar xíʼinra xa̱a̱ xi̱xini̱vara ndáaña keʼéra, chi ndi̱ku̱n kama ni̱ka̱ʼa̱nra ña̱ kǒo ku̱su̱nra xíʼinñá.

14. ¿Ndáaña xíniñúʼu keʼéyó ña̱ va̱ʼa kundasíyó ña̱ kúndasí Jehová xínira?

¹⁴ ¿Ndáa ki̱ʼva kundiku̱nyó yichi̱ ta̱ José ta nda̱kú koo iniyó xíʼin Jehová? Ya̱chi̱ka ná ndakanixi̱níyó ndáaña keʼéyó tá xa̱a̱ ná ya̱ʼayó nu̱ú tu̱ndóʼo. Ná kǒo keʼéyó á kotoyó ni iin ña̱ʼa ña̱ kúndasí Jehová xínira ta ni loʼo ná kǒo ndakanixi̱níyó xa̱ʼa̱ ña̱yóʼo (Sal. 97:10; 119:165). Ña̱yóʼo chindeétáʼan xíʼinyó ña̱ kǒo keʼéyó ku̱a̱chi kini. Ña̱kán, tá xa̱a̱ ná ya̱ʼayó nu̱ú tu̱ndóʼo táʼan ña̱yóʼo xa̱a̱ kunda̱a̱-iniyó ndáaña keʼéyó.

15. ¿Ndáaña xíniñúʼu keʼún tasaá viíka kutáʼún xíʼin Jehová? (Hebreos 11:6).

¹⁵ Sana xa̱a̱ kúnda̱a̱-iniún ña̱ nda̱ni̱ʼún ña̱ nda̱a̱ ta kúni̱ún ndasakáʼnún Ndióxi̱ xíʼin ndiʼi níma̱ún. Soo, ¿á íyo iin ña̱ sási nu̱ún ña̱ ndataxiún miíún ndaʼa̱ Jehová ta ndakuchiún? Tá saá íyoña, kivi keʼún ña̱ ke̱ʼé ta̱ rey David ta kuakundáʼviún ka̱ʼún xíʼin Jehová: “Ndióxi̱, koto va̱ʼún ndáa ki̱ʼva íyoi̱, koto ña̱ ndíka̱a̱ níma̱i̱, koto va̱ʼún ña̱ sándi̱ʼi̱-inii̱. Ta koto tá íyo iin ña̱ va̱ása va̱ʼa kúni̱i̱ keʼíi̱, ta chika̱a̱ yi̱ʼi̱ yichi̱ nu̱ú kivi kutakui̱ ndiʼi tiempo” (Sal. 139:​23, 24). Tá chíka̱ún ndee̱ ña̱ ndataxiún miíún nda̱ʼa Jehová saá na̱ʼún ña̱ kúni̱ún viíníka kutáʼún xíʼinra. Biblia káʼa̱nña ña̱ táxira bendición ndaʼa̱ na̱ kéʼé ña̱yóʼo (kaʼvi Hebreos 11:6).

CHIKAA̱ NDEE̱ ÑA̱ VIÍKA KUTÁʼÚN XÍʼIN JEHOVÁ

16, 17. ¿Ndáa ki̱ʼva kána Jehová se̱ʼe na̱ testigo ña̱ ku̱ʼu̱nna congregación? (Juan 6:44).

¹⁶ Ta̱ Jesús ni̱ka̱ʼa̱nra ña̱ mií Jehová kúú ta̱ chíndeétáʼan xíʼin na̱ yiví ña̱ ki̱ʼvina ti̱xin ñuura (kaʼvi Juan 6:44). Iin ña̱ liviní kúú ña̱ kéʼé Jehová saáchi xítora ña̱ va̱ʼa ña̱ kúúmií iin tá iin na̱ yiví ta kánarana ña̱ koona na̱ ñuura. Nu̱ú Jehová iin tá iin na̱ ndásakáʼnu miíra ndáyáʼvinína ta kuenta miíra kúúna (Deut. 7:6; nota). Ta iin na̱kán kúú yóʼó.

¹⁷ Tá na̱ va̱lí kúúndó, ta na̱ yivándó kúú na̱ sánáʼa̱ ndóʼó xa̱ʼa̱ Jehová, sana ndákanixi̱níndó ña̱ su̱ví Jehová níkana ndóʼó chi na̱ yivándó kúú na̱ kúni̱ ña̱ ná sakúaʼandó xa̱ʼa̱ra. Soo, kotondó ndáaña káʼa̱n Biblia: “Kuyatinndó nu̱ú Ndióxi̱ ta kuyatinra nu̱úndó” (Sant. 4:8; 1 Crón. 28:9). Ña̱kán tá siʼna miíún kúyatin nu̱ú Jehová, ta̱kán kuyatinra nu̱ún, chi ndáyáʼviníún nu̱úra. Iin tá iin na̱ yiví na̱ kíxaa̱ ti̱xin congregación mií Jehová kúú ta̱ ka̱nana. Ta saátu kéʼéra xíʼin ndóʼó na̱ va̱lí na̱ kúú se̱ʼe na̱ testigo Jehová. Ña̱kán tá iin na̱ yiví kúyatinna nu̱ú Jehová ta̱kán kúyatinra nu̱úna táki̱ʼva káchi Santiago 4:8 (chitáʼan ña̱yóʼo xíʼin 2 Tesalonicenses 2:13).

18. ¿Ndáaña sakúaʼayó nu̱ú inka artículo? (Salmo 40:8).

¹⁸ Tá nda̱kuchi ta̱ Jesús ni̱na̱ʼa̱ra nu̱ú yivára ña̱ xa̱a̱ íyo tu̱ʼvara ña̱ keʼéra ndiʼi ña̱ ka̱ʼa̱nra xíʼinra (kaʼvi Salmo 40:8;b Heb. 10:7). Tá ná ndataxiún miíún ndaʼa̱ Jehová ta ndakuchiún saá keʼún nda̱a̱ táki̱ʼva ke̱ʼé ta̱ Jesús. Nu̱ú inka artículo sakúaʼayó ndáaña kivi chindeétáʼan xíʼinyó ña̱ nda̱kú koo iniyó xíʼin Jehová tá xa̱a̱ nda̱kuchiyó.