Si̱íníka koo iniyó tá va̱ʼa-iniyó

1, 2. ¿Ndáa ki̱ʼva i̱xava̱ʼa Jehová miíyó?

KÚSI̱ÍKA-INIYÓ tá táxiyó ña̱ʼa ndaʼa̱ inkana nu̱úka ña̱ tá táxinaña ndaʼa̱yó, chi saá i̱xava̱ʼa Jehová miíyó (Hech. 20:35). Tá xa̱a̱ táxina iin regalo ndaʼa̱yó kúsi̱íva-iniyó, soo kúsi̱íníka-iniyó tá miíyó kúú na̱ táxiña ndaʼa̱ inkana á chíndeétáʼanyó xíʼinna. Ta va̱ʼaníva ña̱ i̱xava̱ʼa Jehová miíyó saá. ¿Nda̱chun?

² Chi miíyó kúú na̱ kivi ndaka̱xin ndáaña keʼéyó, ña̱kán tá ná ndaka̱xinyó ña̱ chindeétáʼanyó xíʼin inkana kusi̱íní-iniyó. Va̱ʼaní i̱xava̱ʼa Jehová miíyó, ¿á su̱ví saá? (Sal. 139:14).

3. ¿Nda̱chun káʼa̱n ña̱ Biblia ña̱ si̱íní-ini Jehová?

³ Biblia káʼa̱nña ña̱ na̱ táxi ña̱ʼa ndaʼa̱ inkana kúsi̱íní-inina. Ña̱kán Ndióxi̱ kúúra iin ta̱ si̱í-ini saáchi ku̱a̱ʼání ña̱ʼa táxira ndaʼa̱yó (1 Tim. 1:11). Jehová kúú ta̱ siʼna ta̱xi ku̱a̱ʼání ña̱ʼa ndaʼa̱yó ta iinlá miíra kúú ta̱ va̱ʼaní-ini. Ta̱ apóstol Pablo ni̱ka̱ʼa̱nra: “Saáchi xa̱ʼa̱ ta̱kán kúú ña̱ tákuyó, kánda̱yó ta íyoyó” (Hech. 17:28). Ta ndiʼi ña̱ va̱ʼa, Ndióxi̱ kúú ta̱ táxiña (Sant. 1:17).

4. ¿Ndáaña chindeétáʼan xíʼinyó ña̱ kusi̱íka-iniyó?

⁴ ¿Ndáaña kivi keʼéyó ña̱ va̱ʼa kusi̱íka-iniyó tá táxiyó ña̱ʼa ndaʼa̱ inkana? Kivi keʼéyó ña̱ kéʼé Jehová chi va̱ʼaní-inira. Ta ña̱yóʼo kúú ña̱ sakúaʼayó nu̱ú artículo yóʼo (Efes. 5:1). Soo, saátu sakúaʼayó ndáaña kivi keʼéyó tá túviyó ña̱ kǒo táxina tíxa̱ʼvi ndaʼa̱yó xa̱ʼa̱ ña̱ kéʼéyó xa̱ʼa̱na. Ndiʼi ña̱yóʼo chindeétáʼan xíʼinyó ña̱ kǒo sandákooyó ña̱ chindeétáʼanyó xíʼin inkana tasaá kusi̱íní-iniyó.

VA̱ʼA NÁ KOO INIYÓ TÁKI̱ʼVA ÍYO JEHOVÁ

5. ¿Ndáaña táxi Jehová ndaʼa̱yó?

⁵ Ná kotoyó ndáaña kéʼé Jehová tasaá náʼa̱ra ña̱ va̱ʼaní-inira. Ña̱ nda̱a̱ kǒo táxira ña̱ ku̱i̱ká ndaʼa̱yó, soo táxira ña̱ xíniñúʼuyó tá kúú, chíndeétáʼanra xíʼinyó ña̱ va̱ʼa ni̱ʼíyó ña̱ kuxuyó, ti̱ko̱to̱ kundixiyó xíʼin veʼe nu̱ú kooyó (Sal. 4:8; Mat. 6:​31-33; 1 Tim. 6:​6-8). Kǒo táxi kuití Jehová ña̱yóʼo ndaʼa̱yó xa̱ʼa̱ ña̱ ndákanixi̱níra ña̱ xíniñúʼu taxiraña ndaʼa̱yó. Tá saá, ¿nda̱chun kúú ña̱ táxiraña ndaʼa̱yó?

6. ¿Ndáaña sákuaʼayó xíʼin Mateo 6:​25, 26?

⁶ Jehová táxira ña̱ xíniñúʼuyó saáchi kúni̱níra xínira miíyó. Ná ka̱ʼa̱nyó xa̱ʼa̱ tu̱ʼun ña̱ ni̱ka̱ʼa̱n ta̱ Jesús nu̱ú Mateo 6:​25, 26 (kaʼviña). Nu̱ú versículo yóʼo, ta̱ Jesús ni̱ka̱ʼa̱nra xa̱ʼa̱ saa á sala ña̱ “kǒo chíʼirí ta ni kǒo sákeerí ni va̱ása táxiva̱ʼarí ña̱ kuxurí ti̱xin ya̱ka̱, soo yivándó ta̱ íyo chí ndiví sákuxurarí”. Tasaá ni̱nda̱ka̱tu̱ʼunrana: “¿Á kǒo ndáyáʼvika ndóʼó nu̱ú tíkán?”. Ña̱ xi̱kuni̱ ta̱ Jesús sanáʼa̱ra miíyó kúú ña̱ nu̱ú Jehová ndáyáʼviníkava miíyó. Tá va̱ʼaní ndáa Jehová kití saátu va̱ʼaní kundaara miíyó. Yiváyó kúú Jehová ta kúni̱níra xínira miíyó ña̱kán táxira ndiʼi ña̱ xíniñúʼuyó (Sal. 145:16; Mat. 6:32).

7. ¿Ndáaña keʼéyó ña̱ va̱ʼa chindeétáʼanyó xíʼin inkana nda̱a̱ táki̱ʼva kéʼé Jehová? (Koto na̱ʼná).

⁷ Kúni̱níyó xíniyó inkana ña̱kán chíndeétáʼanyó xíʼinna nda̱a̱ táki̱ʼva kéʼé Jehová. ¿Á xíni̱ún iin na̱ hermano na̱ kúma̱ní ña̱ kuxu á ti̱ko̱to̱ ña̱ kundixina? Kivi kuniñúʼu Jehová yóʼo ña̱ chindeétáʼún xíʼinna. Na̱ yiví xíni̱na ña̱ na̱ testigo Jehová va̱ʼa-inina ta chíndeétáʼanna xíʼin inkana tá yáʼana nu̱ú tu̱ndóʼo. Ná ka̱ʼa̱nyó xa̱ʼa̱ ña̱ ku̱u tá xi̱ndikaa̱ ña̱ pandemia COVID-19. Íyo na̱ hermano na̱ chi̱ndeétáʼan xíʼin na̱ ni̱ya̱ʼa nu̱ú tu̱ndóʼo ta ta̱xina ña̱ kuxuna, ti̱ko̱to̱ kundixina xíʼin inkaka ña̱ʼa ña̱ xíniñúʼuna. Saátu va̱ʼaní-inina chi ta̱xina donación nda̱ʼa na̱ ñuu Ndióxi̱ ña̱ va̱ʼa kuniñúʼunaña ña̱ chindeétáʼanna xíʼin na̱ ñaniyó xíʼin na̱ ku̱ʼvayó na̱ ndóo iníísaá nu̱ú ñuʼú. Ndiʼi na̱yóʼo ke̱ʼéna ña̱ káʼa̱n Hebreos 13:16: “Ta saátu kǒo nandósóndó ña̱ keʼéndó ña̱ va̱ʼa xíʼin inkana ni ña̱ taxindó ña̱ kúúmiíndó ndaʼa̱ inkana chi ña̱yóʼo nda̱a̱ táki̱ʼva íyo ña̱ sóko̱ndó ndaʼa̱ Ndióxi̱ saá íyoña ta kúsi̱íní-inira xíʼinña”.

8. ¿Ndáaña kéʼéyó xa̱ʼa̱ ña̱ táxi Jehová ndee̱ ndaʼa̱yó? (Filipenses 2:13).

⁸ Táxi Jehová ndee̱ ndaʼa̱yó. Kúúmiíní Jehová ndee̱ ta táxiraña ndaʼa na̱ ndásakáʼnu miíra (kaʼvi Filipenses 2:13). ¿Á xa̱a̱ káʼún xíʼinra ña̱ chindeétáʼanra xíʼún ña̱ va̱ʼa kǒo ki̱ʼviún ku̱a̱chi kini nu̱úra? ¿Á xa̱a̱ káʼún xíʼinra ña̱ chindeétáʼanra xíʼún ya̱ʼún nu̱ú tu̱ndóʼo ña̱ ndeéní á ña̱ keʼún inkaka ña̱ʼa? Tá xi̱toún ña̱ chi̱ndeétáʼan Jehová xíʼún ta ta̱xira ndee̱ ndaʼún, sana ndo̱ʼún táki̱ʼva ndo̱ʼo ta̱ apóstol Pablo ta̱yóʼo ni̱ka̱ʼa̱nra: “Kúúmiíi̱ ndee̱ ña̱ keʼíi̱ nda̱a̱ ndáaka ña̱ʼa chi íyo ta̱ táxi ndee̱ ndaʼíi̱ ña̱ keʼíi̱ña” (Filip. 4:13).

9. ¿Ndáa ki̱ʼva keʼéyó nda̱a̱ táki̱ʼva kéʼé Jehová? (Koto na̱ʼná).

⁹ Kǒoví ndee̱ kúúmiíyó ña̱ taxiyóña ndaʼa̱ inkana nda̱a̱ táki̱ʼva kéʼé Jehová. Soo, kiviva kuniñúʼuyó tiempoyó ña̱ chindeétáʼanyó xíʼinna. Tá kúú tá xíni̱yó na̱ hermano na̱ xa̱a̱ chée á na̱ kúúmií kue̱ʼe̱. ¿Á kivi chindeétáʼanyó xíʼinna ña̱ ku̱ʼu̱nyó kuenyó á sa̱táyó sava ña̱ʼa ña̱ xíniñúʼuna á ña̱ ndaya̱kúnyó veʼena? ¿Á kivi ku̱ʼu̱nyó kachíñuyó salón tá xa̱a̱ xíyo limpieza? Tá ná keʼéyó ña̱yóʼo saá va̱ʼaní chindeétáʼanyó xíʼin na̱ hermano.

10. ¿Ndáa ki̱ʼva chikaa̱yó ndee̱ xíʼin inkana?

¹⁰ Saátu tu̱ʼun ña̱ káʼa̱nyó kivi chindeétáʼanña xíʼin inkana. ¿Á xíni̱ún iin na̱ ñaniyó á na̱ ku̱ʼvayó na̱ yáʼa nu̱ú tu̱ndóʼo, ta kivi sandíkoún inina á ña̱ ka̱ʼún tu̱ʼun va̱ʼa xíʼinna? Tá xíni̱únna, ¿á kivi ka̱ʼún xíʼinna? ¿Á kivi ku̱ʼún kotoúnna á ka̱ʼún xíʼinna xíʼin teléfono á kaʼyíún iin carta nu̱úna á kivitu chindaʼún iin mensaje nu̱úna? Kǒo xíniñúʼuví ka̱ʼún ku̱a̱ʼá tu̱ʼun xíʼinna soo ña̱ ka̱ʼún xíʼinna níma̱ún ná kanaña, saáchi tá vií ná ka̱ʼún xíʼinna ña̱yóʼo kivi chindeétáʼanña xíʼinna ña̱ nda̱kú koo inina xíʼin Jehová ta saátu ña̱ va̱ʼa kunina (Prov. 12:25; Efes. 4:29).

11. ¿Ndáaña kéʼé Jehová xíʼin ña̱ ndíchi ña̱ kúúmiíra?

¹¹ Jehová táxi ña̱ ndíchi ndaʼa̱yó. Ta̱ discípulo Santiago ka̱ʼyíra: “Tá iin ndóʼó kúma̱ní ña̱ ndíchi nu̱úndó ndukúníndóña nu̱ú Ndióxi̱” ta ni̱ka̱ʼa̱nkara: “Ta ndakiʼinvandóña. Chi ta̱kán va̱ʼaní-inira ta ku̱a̱ʼáníña táxira ndaʼa̱ ndiʼi na̱ ndúkúña nu̱úra ta va̱ása ndáʼyi̱ra nu̱úna tá táxiraña ndaʼa̱na” (Sant. 1:5; nota). Táki̱ʼva káchi versículo yóʼo ndíchiní Jehová ta va̱ʼaní-inira chi táxiraña ndaʼa̱yó, ta tá táxira ña̱ ndíchi ndaʼa̱yó kǒo káʼa̱nra xa̱ʼa̱ña ta ni kǒo ndáʼyi̱ra nu̱úyó. Ta kǒo sándakavara-iniyó tá káʼa̱nyó xíʼinra ña̱ chindeétáʼanra xíʼinyó nu̱úka ña̱yóʼo káʼa̱nra xíʼinyó ña̱ ná ndukúyó ña̱ ndíchi nu̱úra (Prov. 2:​1-6).

12. ¿Á kivi sanáʼa̱yó inkana ña̱ xíni̱yó?

¹² Ta miíyó, ¿á kivi keʼéyó nda̱a̱ táki̱ʼva kéʼé Jehová ta sanáʼa̱yó inkana ña̱ xíni̱yó? (Sal. 32:8). Kiviva keʼéyóña, chi íyoníva na̱ kivi chindeétáʼanyó xíʼin. Tá kúú, kivi sanáʼa̱yó na̱ publicador xa̱á ndáa ki̱ʼva natúʼunna xíʼin na̱ yiví xa̱ʼa̱ Ndióxi̱. Ta saátu na̱ anciano va̱ʼaní chíndeétáʼanna xíʼin na̱ siervo ministerial á xíʼin inkaka na̱ hermano ña̱ va̱ʼa viíní keʼéna chiñu ti̱xin congregación. Ta ku̱a̱ʼání na̱ ñaniyó xíʼin ná ku̱ʼvayó na̱ xíni̱ ixava̱ʼa veʼe, sánáʼa̱na inkana ña̱ va̱ʼa viíní keʼéna chiñu yóʼo ti̱xin salón ta saátu ti̱xin inkaka veʼe ña̱ kúúmií na̱ ñuu Ndióxi̱.

13. ¿Ndáa ki̱ʼva kundiku̱nyó yichi̱ Jehová tá sánáʼa̱yó inkana?

¹³ Ná keʼéyó táki̱ʼva kéʼé Jehová tá xa̱a̱ sánáʼa̱yó inkana. Saáchi va̱ʼaní-inira ta táxira ña̱ ndíchi ndaʼa̱yó. Ta saátu miíyó, ña̱ xíni̱yó sánáʼa̱yóña inkana ta kǒo yíʼviyó ña̱ kindaana chiñu ndaʼa̱yó, ta ni kǒo ndákanixi̱níyó: “Ná sákuaʼa miívana, chi kǒo na̱ ní sánáʼa̱ yi̱ʼi̱”. Soo ti̱xin ñuu Jehová kǒo kívi keʼéyó ña̱yóʼo ta kǒo káʼa̱n kuitíyó xíʼinna xa̱ʼa̱ ña̱ xíni̱yó, chi saátu chíkaa̱yó ndee̱ ña̱ sanáʼa̱yóna (1 Tes. 2:8). Va̱ʼaní sánáʼa̱yóna ña̱ va̱ʼa koo tu̱ʼvana sanáʼa̱na inkana (2 Tim. 2:​1, 2). Tá ndiʼiyó sánáʼa̱yó inkana ña̱ xíni̱yó, saá si̱íní kooyó chi ndiʼiyó kunda̱a̱-ini ndáa ki̱ʼva keʼéyó iin chiñu.

TÁ TÚVIYÓ ÑA̱ KǑO NDÁYÁʼVI ÑA̱ KÉʼÉYÓ

14. ¿Ndáaña kúu tá kéʼéyó ña̱ʼa xa̱ʼa̱ inkana?

¹⁴ Tá xa̱a̱ kéʼéyó iin ña̱ʼa xa̱ʼa̱ na̱ hermanoyó, ta táxina tíxa̱ʼvi ndaʼa̱yó saá náʼa̱na ña̱ ndáyáʼvi ña̱ kéʼéyó xa̱ʼa̱na. Ta sava káʼyína iin carta loʼo táxina ndaʼa̱yó á kéʼéna inkaka ña̱ʼa xa̱ʼa̱yó (Col. 3:15). Ta kúsi̱íní-iniyó tá kéʼéna ña̱yóʼo.

15. ¿Ndáaña xíniñúʼu ndakaʼányó xa̱ʼa̱ tá kǒo táxina tíxa̱ʼvi ndaʼa̱yó?

¹⁵ Soo sava yichi̱ su̱ví ndiʼina táxi tíxa̱ʼvi ndaʼa̱yó xa̱ʼa̱ ña̱ kéʼéyó xa̱ʼa̱na. Sava yichi̱ xíniñúʼuyó tiempoyó, ndee̱yó xíʼin ña̱ kúúmiíyó ña̱ va̱ʼa chindeétáʼanyó xíʼinna, soo na̱yóʼo ni loʼo va̱ása náʼa̱na ña̱ ndáyáʼviña nu̱úna. Tá kúu ña̱yóʼo, ¿ndáaña chindeétáʼan xíʼinyó ña̱ kusi̱í-iniyó ta kǒo sa̱a̱yó? Ná ndakaʼányó ña̱ káʼa̱n Hechos 20:35. Ni táxina tíxa̱ʼvi ndaʼa̱yó xa̱ʼa̱ ña̱ kéʼéyó xa̱ʼa̱na á ni kǒo táxinaña, soo kiviva kusi̱í-iniyó. Ña̱kán, ná kusi̱í-iniyó taxiyó ña̱ʼa ndaʼa̱ inkana, ni túviyó ña̱ kǒo ndáyáʼvi ña̱ kéʼéyó nu̱úna. Ná kotoyó sava ña̱ chindeétáʼan xíʼinyó.

16. ¿Ndáaña xíniñúʼu ndakaʼányó xa̱ʼa̱?

¹⁶ Tá táxiún ña̱ʼa ndaʼa̱ inkana, ndíku̱ún yichi̱ Jehová. Ta̱yóʼo táxira ña̱ va̱ʼa ndaʼa̱ na̱ yiví, ni ndáyáʼviña nu̱úna á ni kǒo ndáyáʼviña nu̱úna (Mat. 5:​43-48). Jehová káʼa̱nra xíʼinyó ña̱ tá táxiyó iin ña̱ʼa ndaʼa̱ inkana kǒo xíniñúʼu kundatuyó ña̱ taxinaña ndaʼa̱yó chi mií Jehová kúú ta̱ taxi ku̱a̱ʼání ña̱ʼa ndaʼa̱yó (Luc. 6:35). Ña̱kán kǒo ndakava-iniún tá kǒo táxina tíxa̱ʼvi ndaʼún xa̱ʼa̱ ña̱ kéʼún xa̱ʼa̱na. Ndakaʼán chi tá kúsi̱í-iniyó ña̱ táxiyó ña̱ʼa ndaʼa̱ inkana, mií Jehová kúú ta̱ taxi ku̱a̱ʼání ña̱ va̱ʼa ndaʼa̱yó (2 Cor. 9:7; Prov. 19:17).

17. ¿Ndáaña chindeétáʼan xíʼinyó ña̱ keʼéyó táki̱ʼva kéʼé Jehová? (Lucas 14:​12-14).

¹⁷ Inka ña̱ chindeétáʼan xíʼún ña̱ keʼún táki̱ʼva kéʼé Jehová kúú ña̱ keʼún ña̱ káʼa̱n Lucas 14:​12-14 (kaʼviña). Iin ña̱ va̱ʼava kúú ña̱ va̱ʼa koo iniyó xíʼin na̱ kivi keʼé iin ña̱ʼa xa̱ʼa̱yó. Soo tá kíʼinyó kuenta ña̱ kéʼéyó ña̱ʼa xa̱ʼa̱ inkana chi ndátuyó ña̱ chindeétáʼanna xíʼinyó, ¿ndáaña kivi keʼéyó? Ná kundiku̱nyó consejo ña̱ ni̱ka̱ʼa̱n ta̱ Jesús: ña̱ va̱ʼa koo iniyó xíʼin na̱ kǒo kívi taxi iin ña̱ʼa ndaʼa̱yó. Tásaá ná keʼéyó, kusi̱íní-iniyó chi kéʼéyó táki̱ʼva kéʼé Jehová. Ña̱kán ná kǒo sandákooyó ña̱ chindeétáʼanyó xíʼin inkana ta saá kusi̱íní-iniyó ni kǒo táxina tíxa̱ʼvi ndaʼa̱yó.

18. ¿Ndáaña chindeétáʼan xíʼinyó ña̱ vií ndakanixi̱níyó xa̱ʼa̱ inkana?

¹⁸ Vií ndakanixi̱níún xa̱ʼa̱ inkana (1 Cor. 13:7). Tá kéʼéyó ña̱ʼa xa̱ʼa̱ inkana ta kǒo káʼa̱nna ni iin ña̱ʼa xíʼinyó kivi ndakanixi̱níyó: “¿Á kǒo ndáyáʼvi ña̱ kéʼíi̱ xa̱ʼa̱na? ¿Á na̱ndósó-inina taxina tíxa̱ʼvi ndaʼíi̱? ¿Á sana íyo ña̱ ndóʼovana ña̱kán kǒo nítaxina tíxa̱ʼvi ndaʼíi̱?”. Sana ndáyáʼviníva ña̱ ke̱ʼéyó nu̱úna, soo kǒo xíni̱na ndáa ki̱ʼva ka̱ʼa̱nna xa̱ʼa̱ ña̱yóʼo xíʼinyó. Sana kúkaʼan nu̱úna ña̱ chindeétáʼan inkana xíʼinna chi sana tá ya̱chi̱ va̱ʼa xi̱keʼéna ña̱ʼa xa̱ʼa̱ inkana, soo vitin kǒo kívika keʼénaña. Nda̱a̱ ndáaka ña̱ kúu, xa̱ʼa̱ ña̱ kúʼvi̱-iniyó xíniyóna chíndeétáʼanvayó xíʼinna ta kusi̱í-iniyó keʼéyóña (Efes. 4:2).

19, 20. ¿Nda̱chun kǒo xíniñúʼu kundatuyó ña̱ ndi̱ku̱n kama taxina tíxa̱ʼvi ndaʼa̱yó? (Koto na̱ʼná).

¹⁹ Kǒo kundatún ña̱ kamaní taxina tíxa̱ʼvi ndaʼún. Ta̱ rey Salomón ni̱ka̱ʼa̱nra ña̱ ndáyáʼviní va̱ʼa koo iniyó xíʼin inkana, ta ni̱ka̱ʼa̱nra: “Chikaa̱ si̱táva̱ʼún nu̱ú ti̱kui̱í, chi tá ná ya̱ʼa ku̱a̱ʼá ki̱vi̱ ndani̱ʼívaúnña” (Ecl. 11:1). Tu̱ʼun yóʼo sánáʼa̱ña miíyó ña̱ sava na̱ yiví sana taxivana tíxa̱ʼvi ndaʼa̱yó tá xa̱a̱ ná ya̱ʼa ku̱a̱ʼá ki̱vi̱. Ná ka̱ʼa̱nyó xa̱ʼa̱ iin ejemplo.

²⁰ Xa̱a̱ íyo ku̱a̱ʼání ku̱i̱ya̱, ñá síʼi iin ta̱ superintendente ña̱ circuito ka̱ʼyiñá iin carta ku̱a̱ʼa̱n nu̱ú iin ñá hermana ñá sa̱kán nda̱kuchi, ta ni̱ka̱ʼa̱nñá xíʼinñá ña̱ nda̱kú ná koo iniñá xíʼin Ndióxi̱. Tá ni̱ya̱ʼa u̱na̱ ku̱i̱ya̱, ñá hermana kán chi̱ndaʼáñá iin carta nu̱ú ñá síʼi ta̱ superintendente ta ni̱ka̱ʼa̱nñá xíʼinñá: “Káʼyii̱ carta yóʼo nu̱ún, saáchi ndiʼi ku̱i̱ya̱ ña̱ ni̱ya̱ʼa yóʼo, ña̱ ka̱ʼyiún va̱ʼaní chi̱ndeétáʼanña xíʼi̱n”.a Tasaá ni̱ka̱ʼa̱nkañá: “Liviní ña̱ ni̱ka̱ʼún xíʼi̱n, soo ña̱ chi̱ndeétáʼanníka xíʼi̱n kúú texto ña̱ ka̱ʼyiún nu̱ú carta kán ta nda̱a̱ vitin ndákaʼíi̱n xa̱ʼa̱ña”. Ñá hermana kán ni̱ka̱ʼa̱nñá xíʼinñá xa̱ʼa̱ sava ña̱ xi̱ ixayo̱ʼvi̱ xíʼinñá, tasaá ni̱ka̱ʼa̱nkañá: “Sava yichi̱ xi̱kuni̱i̱ sandákoi̱ ña̱ kachíñui̱ nu̱ú Jehová, soo texto ña̱ ka̱ʼyiún va̱ʼaní chi̱ndeétáʼanña xíʼi̱n ña̱ va̱ʼa chikaa̱kai̱ ndee̱ ña̱ kachíñui̱ nu̱ú Jehová. Ña̱yóʼo kúú ña̱ va̱ʼaní chi̱ndeétáʼan xíʼi̱n u̱na̱ ku̱i̱ya̱ ña̱ ni̱ya̱ʼa yóʼo”. Ni̱kusi̱íní-ini ñá síʼi ta̱ superintendente ña̱ circuito tá nda̱kiʼinñá carta yóʼo. Saátu miíyó, sana ke̱ʼéyó iin ña̱ʼa xa̱ʼa̱ inkana ta sana tá ná ya̱ʼa ku̱a̱ʼání tiempo saáví taxina tíxa̱ʼvi ndaʼa̱yó.

21. ¿Nda̱chun ndáyáʼviní keʼéyó nda̱a̱ táki̱ʼva kéʼé Jehová?

²¹ Tá ki̱ʼva xa̱a̱ sa̱kúaʼayó, va̱ʼaní i̱xava̱ʼa Jehová miíyó, chi si̱íka íyoyó tá táxiyó ña̱ʼa ndaʼa̱ inkana nu̱úka ña̱ táxinaña ndaʼa̱yó. Va̱ʼa kúniyó tá chíndeétáʼanyó xíʼin na̱ hermanoyó ta kúsi̱í-iniyó tá táxina tíxa̱ʼvi ndaʼa̱yó. Soo ni táxina tíxa̱ʼvi ndaʼa̱yó á ni kǒo táxinaña, ná kusi̱í-iniyó chi ña̱ va̱ʼava kúú ña̱ kéʼéyó. Ni nda̱a̱ ndáaka ña̱ ná taxiyó ndaʼa̱ inkana, ná ndakaʼányó ña̱ káʼa̱n 2 Crónicas 25:9: “Ku̱a̱ʼáníkava ña̱ kivi taxi Jehová ndaʼún”. Iinlá Jehová kúú ta̱ kivi taxi ku̱a̱ʼáníka ña̱ʼa ndaʼa̱yó. Ta kúsi̱í-iniyó tá táxira ku̱a̱ʼá ña̱ va̱ʼa ndaʼa̱yó, ña̱kán ndáyáʼvi ña̱ va̱ʼa koo iniyó nda̱a̱ táki̱ʼva íyo yiváyó Jehová.