Pregunta ña̱ kéʼé na̱ káʼvi tutu yóʼo

¿Ndáana kúú “na̱ ángel na̱ nda̱kaxin mií Ndióxi̱” na̱ káʼa̱n 1 Timoteo 5:21 xa̱ʼa̱?

Ta̱ apóstol Pablo ka̱ʼyíra iin carta ku̱a̱ʼa̱n nu̱ú ta̱ Timoteo ta u̱vi̱ saára xi̱kuu anciano. Nu̱ú carta yóʼo ni̱ka̱ʼa̱nra: “Kúnda̱a̱-ini Ndióxi̱, saátu ta̱ Cristo Jesús xíʼin na̱ ángel na̱ nda̱kaxin mií Ndióxi̱ ña̱ xáʼndai̱ chiñu yóʼo nu̱ún ña̱ inkáchi ná ndatiún ku̱a̱chi xíʼin ndiʼina” (1 Tim. 5:21). ¿Ndáana kúú na̱ ángel na̱ nda̱kaxin mií Ndióxi̱?

Na̱ ángel na̱ káʼa̱n ta̱ Pablo xa̱ʼa̱, su̱ví na̱ 144,000 kúúna. Tá ka̱ʼyí ta̱ Pablo carta yóʼo ku̱a̱ʼa̱n ndaʼa̱ ta̱ Timoteo, ta̱ʼán ku̱ʼu̱nví na̱ nda̱kaxin Ndióxi̱ chí ndiví. Xa̱ʼa̱ ña̱kán su̱ví na̱yóʼoví kúú na̱ ángel na̱ nda̱kaxin mií Ndióxi̱ (1 Cor. 15:​50-54; 1 Tes. 4:​13-17; 1 Juan 3:2).

Ta ni su̱ví na̱ ángel na̱ kǒo níxiniso̱ʼo Ndióxi̱ tá ki̱xi Diluvio níxi̱kuuna. Saáchi na̱ ángel kán nda̱kutáʼanna xíʼin ta̱ Ndi̱va̱ʼa ta ndu̱una ta̱chí ndi̱va̱ʼa ta saátu sáa̱-inina xínina ta̱ Jesús (Gén. 6:2; Luc. 8:​30, 31; 2 Ped. 2:4). Chí nu̱únínu ta̱ Jesús ndakasira na̱ ta̱chí ndi̱va̱ʼa 1,000 ku̱i̱ya̱ ti̱xin iin yavi̱ naa, ta tándi̱ʼi inkáchi sandíʼi-xa̱ʼa̱rana xíʼin ta̱ Ndi̱va̱ʼa (Jud. 6; Apoc. 20:​1-3, 10).

Na̱ ángel na̱ nda̱kaxin mií Ndióxi̱ na̱ káʼa̱n 1 Timoteo 5:21 xa̱ʼa̱, íyona xíʼin Ndióxi̱ ta saátu xíʼin ta̱ Cristo Jesús chí ndiví. Ña̱kán na̱ ángel na̱ káʼa̱nyó xa̱ʼa̱ yóʼo kúú na̱ ángel na̱ kéʼé ña̱ va̱ʼa ta káchíñuna nu̱ú Ndióxi̱.

Íyo ku̱a̱ʼání na̱ ángel na̱ kéʼé ña̱ va̱ʼa (Heb. 12:​22, 23). Su̱ví inkáchi íyo chiñu ña̱ táxi Jehová ndaʼa̱ na̱ ángel keʼéna (Apoc. 14:​17, 18). Ná ndakaʼányó chi iin yichi̱ ni̱ka̱ʼa̱n Jehová xíʼin iin ángel ná sandíʼi-xa̱ʼa̱ra 185,000 na̱ soldado asirio (2 Rey. 19:35). Ta̱ Jesús ni̱ka̱ʼa̱nra ña̱ iin tiʼvi na̱ ángel kixina “ta ti̱xin Reinora ndatavána ndiʼi ña̱ʼa ña̱ sándakava inkana ndaʼa̱ ku̱a̱chi ta saátu na̱ yiví na̱ kéʼé ña̱ va̱ása va̱ʼa” (Mat. 13:​39-41). Ta sana inka na̱ ángel kúú na̱ sandátaka na̱ nda̱kaxin Ndióxi̱ ku̱ʼu̱n chí ndiví (Mat. 24:31). Jehová ta̱xira chiñu ndaʼa̱ inka na̱ ángel ña̱ va̱ʼa kundaana miíyó, nda̱a̱ táki̱ʼva káʼa̱n Salmo 91:11 (Mat. 18:10; kivitu kaʼviún Mateo 4:11 xíʼin Lucas 22:43).

Xa̱ʼa̱ ña̱kán “na̱ ángel na̱ nda̱kaxin mií Ndióxi̱” na̱ káʼa̱n 1 Timoteo 5:21 xa̱ʼa̱, sana kúúna na̱ ángel na̱ chíndeétáʼan xíʼin na̱ congregación. Nu̱ú capítulo yóʼo, ta̱ Pablo káʼa̱nra xíʼin na̱ hermano ña̱ ná ixato̱ʼóna na̱ anciano, ta saátu ni̱ka̱ʼa̱nra xíʼin na̱ anciano ña̱ vií ná keʼéna chiñuna ta inkáchi ná koo ndiʼi na̱ hermano nu̱úna. Ta ni̱ka̱ʼa̱ntura xíʼinna ña̱ viíní xíniñúʼu ndakanixi̱nína tá ndáka̱xinna ña̱ keʼéna, saáchi mií Jehová táxi chiñu ndaʼa̱na ña̱ kundaana na̱ hermano. ¿Nda̱chun ni̱ka̱ʼa̱n ta̱ Pablo ña̱yóʼo xíʼinna? Saáchi Jehová, ta̱ Jesús xíʼin na̱ ángel na̱ nda̱kaxin mií Jehová, xítona ndáa ki̱ʼva ndáa na̱ anciano na̱ congregación. Xa̱ʼa̱ ña̱kán kíʼinyó kuenta ña̱ íyo na̱ ángel na̱ kíʼin kuenta xíʼin ña̱ congregación, saáchi ndáana na̱ ñuu Ndióxi̱, kíʼinna kuenta xíʼin ña̱ predicación ta nátúʼunna xíʼin Jehová xa̱ʼa̱ ña̱ xítona kúu (Mat. 18:10; Apoc. 14:6).