ARTÍCULO ÑA̱ KAʼVIYÓ 10
YAA 31 Kundiku̱n yichi̱ Jehová
Ná ndakanixi̱níyó nda̱a̱ táki̱ʼva ndákanixi̱ní Jehová xíʼin ta̱ Jesús
“Xa̱ʼa̱ ña̱ ni̱xo̱ʼvi̱ ta̱ Cristo tá xi̱kuura iin na̱ yiví, saátu ndóʼó xíniñúʼu ndakundeéndó ndakanixi̱níndó nda̱a̱ táki̱ʼva ndákanixi̱ní ta̱yóʼo” (1 PED. 4:1).
ÑA̱ KA̱ʼA̱NYÓ XA̱ʼA̱
¿Ndáaña va̱ʼa sa̱kúaʼa ta̱ Pedro xíʼin ki̱ʼva ña̱ xi̱ndakanixi̱ní ta̱ Jesús, ta ndáaña kivi sakúaʼa miíyó?
1, 2. a) ¿Ndáaña kúni̱ kachi ña̱ kuʼvi̱-iniyó kuniyó Jehová? b) ¿Ndáa ki̱ʼva ni̱na̱ʼa̱ ta̱ Jesús ña̱ xi̱kuʼvi̱ní-inira xi̱xinira Jehová?
TA̱ JESÚS ni̱ka̱ʼa̱nra ndáa ley ña̱ ta̱xi Jehová ndaʼa̱ ta̱ Moisés kúú ña̱ xi̱ndayáʼviníka tá ka̱chira: “Kuʼvi̱-iniún kuniún Jehová Ndióxi̱ún xíʼin ndiʼi níma̱ún, xíʼin ndiʼi ña̱ tákún, xíʼin ndiʼi xi̱níún ta xíʼin ndiʼi ndeún” (Mar. 12:30). Xa̱ʼa̱ ña̱kán xíniñúʼu kuʼvi̱-iniyó kuniyó Jehová xíʼin ndiʼi níma̱yó á xíʼin ndiʼi ña̱ kúúmiíyó. Ña̱yóʼo kúni̱ kachiña ña̱ xíniñúʼu ndasakáʼnuyóra xíʼin ndiʼi ndee̱yó ta saátu chikaa̱yó ndee̱ keʼéyó ndiʼika ña̱ kivi keʼéyó ña̱ ndasakáʼnuyó iinlá miíra. Ta saátu náʼa̱yó ña̱ kúʼvi̱-iniyó xíniyó Jehová tá vií íyo ña̱ ndákanixi̱níyó. Ni va̱ása kiviví xa̱a̱yó kunda̱a̱ káxi iniyó xa̱ʼa̱ ndiʼi ña̱ ndákanixi̱ní Jehová, soo kiviva chikaa̱yó ndee̱ ña̱ ndakanixi̱níyó nda̱a̱ táki̱ʼva ndákanixi̱níra. Ta iin ña̱ kivi chindeétáʼan xíʼinyó kúú ña̱ kunda̱a̱-iniyó ndáa ki̱ʼva ndákanixi̱ní ta̱ Cristo, saáchi ta̱yóʼo va̱ʼaní ni̱na̱ʼa̱ra ndáa ki̱ʼva ndákanixi̱ní yivára xa̱ʼa̱ iin tá iin ña̱ʼa (1 Cor. 2:16; koto nota ña̱ va̱xi nu̱ú Biblia de estudio, ña̱ naní “nosotros sí tenemos la mente de Cristo”).
2 Ta̱ Jesús xi̱kuʼvi̱ní-inira xi̱xinira Jehová ta ni̱na̱ʼa̱ra ña̱yóʼo xíʼin ki̱ʼva ña̱ xi̱ndakanixi̱níra. Ta̱yóʼo xi̱kunda̱a̱-inira ndáaña kúú ña̱ xi̱kuni̱ Ndióxi̱ ná keʼéra ta chi̱kaa̱-inira ña̱ saxínura ña̱yóʼo, ni xi̱kunda̱a̱-inira ña̱ xi̱niñúʼu xo̱ʼvi̱níra. Soo xa̱ʼa̱ ña̱ xa̱a̱ chi̱kaa̱-inira ña̱ sakúsi̱íra-ini yivára, va̱ása nítaxira ña̱ kasi nda̱a̱ ni iin ña̱ʼa nu̱úra ña̱ keʼéra ña̱yóʼo.
3. ¿Ndáaña sa̱kúaʼa ta̱ apóstol Pedro xa̱ʼa̱ ta̱ Jesús, ta ndáaña ni̱ka̱ʼa̱nra xíʼin na̱ cristiano keʼéna? (1 Pedro 4:1).
3 Ta̱ Pedro xíʼin inkaka na̱ apóstol ku̱a̱ʼání tiempo ki̱táʼanna xíʼin ta̱ Jesús tá ni̱xi̱yora nu̱ú ñuʼú yóʼo ta sa̱kúaʼana ndakanixi̱nína nda̱a̱ táki̱ʼva xi̱ndakanixi̱níra. Tá ka̱ʼyi ta̱ Pedro carta ña̱ nu̱ú ña̱ ku̱a̱ʼa̱n ndaʼa̱ na̱ cristiano, ni̱ka̱ʼa̱nra xíʼinna ña̱ ná chikaa̱na ndee̱ ña̱ ndakanixi̱nína nda̱a̱ táki̱ʼva ndákanixi̱ní ta̱ Cristo (kaʼvi 1 Pedro 4:1). Tá ka̱ʼyi ta̱ Pedro ña̱yóʼo, xi̱niñúʼura iin tu̱ʼun ña̱ káʼa̱n xa̱ʼa̱ na̱ soldado na̱ níʼi ña̱ʼa ña̱ xíniñúʼuna ña̱ kanitáʼanna ta xa̱a̱ íyo tu̱ʼvana ña̱ ku̱ʼu̱nna nu̱ú ku̱a̱chi. Ña̱yóʼo chíndeétáʼanña xíʼinyó kunda̱a̱-iniyó ña̱ tá ná ndakanixi̱níyó nda̱a̱ táki̱ʼva ndákanixi̱ní ta̱ Jesús, chindeétáʼanña xíʼinyó ña̱ kǒo kuni̱yó keʼéyó ña̱ va̱ása va̱ʼa ta saátu chindeétáʼanña xíʼinyó ña̱ va̱ása keʼéyó nda̱a̱ táki̱ʼva kéʼé na̱ ñuyǐví ta̱ Ndi̱va̱ʼa (2 Cor. 10:3-5; Efes. 6:12).
4. ¿Ndáaña sakúaʼayó nu̱ú artículo yóʼo?
4 Nu̱ú artículo yóʼo sakúaʼayó xa̱ʼa̱ ki̱ʼva ña̱ ndákanixi̱ní ta̱ Jesús ta saátu ndáa ki̱ʼva kundiku̱nyó yichi̱ra. Sakúaʼayó xa̱ʼa̱ u̱ni̱ ña̱ʼa. Ña̱ nu̱ú, ná sakúaʼayó ndakanixi̱níyó nda̱a̱ táki̱ʼva ndákanixi̱ní mií Jehová. Ña̱ u̱vi̱, ná sakúaʼayó vitá koo iniyó. Ña̱ u̱ni̱, ná sakúaʼayó vií ndakanixi̱níyó.
NÁ SAKÚAʼAYÓ NDAKANIXI̱NÍYÓ NDA̱A̱ TÁKI̱ʼVA NDÁKANIXI̱NÍ MIÍ JEHOVÁ
5. ¿Ama kúú ña̱ kǒo nína̱ʼa̱ ta̱ Pedro ña̱ ndákanixi̱níra nda̱a̱ táki̱ʼva ndákanixi̱ní Jehová?
5 Ná kotoyó ña̱ ndo̱ʼo ta̱ Pedro. Iin yichi̱ ni̱na̱ʼa̱ra ña̱ kǒo kítáʼan ña̱ ndákanixi̱níra xíʼin ña̱ ndákanixi̱ní Jehová. Ta̱ Jesús ni̱ka̱ʼa̱nra xíʼin na̱ apóstolra ña̱ xi̱niñúʼu ku̱ʼu̱nra chí Jerusalén ta kán tiin na̱ níʼi yichi̱ nu̱ú na̱ veʼe-ñu̱ʼu miíra ta tándi̱ʼi ixandi̱va̱ʼana xíʼinra ta kaʼnínara (Mat. 16:21). Ta̱ Pedro xi̱kunda̱a̱-inira ña̱ ta̱ Jesús kúú ta̱ Mesías ta̱ nda̱kaxin Ndióxi̱ ña̱ sakǎkura na̱ ñuura, xa̱ʼa̱ ña̱kán sana i̱xayo̱ʼvi̱ña xíʼin ta̱ Pedro kandíxara ña̱ taxi Jehová ña̱ kaʼnína ta̱ Jesús (Mat. 16:16). Xa̱ʼa̱ ña̱kán ku̱xíká loʼo ta̱ Pedro xíʼin ta̱ Jesús ta ni̱ka̱ʼa̱nra xíʼinra: “Táta kundáʼvi-iniún kuniún miíún. Ni va̱ása ndoʼún saá” (Mat. 16:22). Ta̱ Jesús xíʼin ta̱ Pedro su̱ví inkáchi íyo ña̱ níxi̱ndakanixi̱nína xa̱ʼa̱ ña̱yóʼo, saáchi ta̱ Pedro va̱ása nína̱ʼa̱ra ña̱ ndákanixi̱níra nda̱a̱ táki̱ʼva ndákanixi̱ní Jehová.
6. ¿Ndáa ki̱ʼva ni̱na̱ʼa̱ ta̱ Jesús ña̱ inkáchi íyo ña̱ ndákanixi̱níra xíʼin Jehová?
6 Ta̱ Jesús xi̱ndakanixi̱níra nda̱a̱ táki̱ʼva ndákanixi̱ní yivára. Xa̱ʼa̱ ña̱kán ni̱ka̱ʼa̱nra ña̱yóʼo xíʼin ta̱ Pedro: “Kuxíká nu̱úi̱ ta̱ Ndi̱va̱ʼa. Saáchi sásiún nu̱úi̱ ta kǒo ndákanixi̱níún nda̱a̱ táki̱ʼva ndákanixi̱ní Ndióxi̱, chi nda̱a̱ táki̱ʼva ndákanixi̱ní na̱ yivíva ndákanixi̱níún” (Mat. 16:23). Ta̱ Jesús xi̱kunda̱a̱va-inira ña̱ ixayo̱ʼvi̱ña xíʼinra ña̱ va̱ʼa saxínura ña̱ kúni̱ Jehová, saáchi xi̱niñúʼu xo̱ʼvi̱ra ta kuvira. Ta̱ Pedro nda̱kanixi̱níra ña̱ va̱ʼava kúú ña̱ ni̱ka̱ʼa̱nra xíʼin ta̱ Jesús, soo ta̱yóʼo kǒo níkeʼévíra ña̱ ni̱ka̱ʼa̱nra xíʼinra. Xíʼin ña̱yóʼo ki̱ʼin ta̱ apóstol Pedro kuenta ña̱ xi̱niñúʼu sakúaʼara ndakanixi̱níra nda̱a̱ táki̱ʼva ndákanixi̱ní mií Jehová. Ta saátu xíniñúʼu sakúaʼa miíyó keʼéyó.
7. ¿Ndáa ki̱ʼva ni̱na̱ʼa̱ ta̱ Pedro ña̱ xi̱chikaa̱ra ndee̱ ña̱ ndakanixi̱níra nda̱a̱ táki̱ʼva ndákanixi̱ní Jehová? (Koto na̱ʼná ña̱ va̱xi chí nu̱ú kíxáʼa tutu yóʼo).
7 Tá ni̱ya̱ʼa loʼo tiempo, ta̱ Pedro ni̱na̱ʼa̱ra ña̱ xi̱chikaa̱níra ndee̱ ña̱ ndakanixi̱níra nda̱a̱ táki̱ʼva ndákanixi̱ní mií Jehová. Xa̱a̱ ki̱xaa̱va tiempo ña̱ ni̱ka̱ʼa̱n Jehová ña̱ kiviva xa̱a̱ na̱ inka ñuu koona táʼan na̱ ñuura. Xa̱ʼa̱ ña̱kán ni̱ka̱ʼa̱nra xíʼin ta̱ Pedro ña̱ ná ku̱ʼu̱nra natúʼunra xíʼin ta̱ Cornelio, ta ta̱yóʼo kúú ta̱ nu̱ú ni̱xa̱a̱ ndu̱u cristiano ni su̱ví judío níxikuura. Soo sana i̱xayo̱ʼvi̱vaña xíʼin ta̱ Pedro keʼéra chiñu yóʼo, saáchi na̱ judío va̱ása níxikitáʼanna xíʼin na̱ va̱ása kúú judío. Soo tá ku̱ndaa̱-inira ndáaña kúú ña̱ kúni̱ Jehová, na̱samavara ki̱ʼva ña̱ xi̱ndakanixi̱níra. Tá ni̱ka̱ʼa̱n ta̱ Cornelio xíʼin ta̱ Pedro ña̱ ná ku̱ʼu̱nra kotorara, ndi̱ku̱n ni̱xa̱ʼa̱nvara (Hech. 10:28, 29). Ta na̱túʼunra xíʼin ta̱ Cornelio ta saátu xíʼin na̱ veʼera, ta ndiʼi na̱yóʼo ni̱xa̱a̱na nda̱kuchina (Hech. 10:21-23, 34, 35, 44-48).
Ta̱ Pedro kíʼvira veʼe ta̱ Cornelio. (Koto párrafo 7).
8. ¿Ndáa ki̱ʼva kivi na̱ʼa̱yó ña̱ ndákanixi̱níyó nda̱a̱ táki̱ʼva ndákanixi̱ní Jehová? (1 Pedro 3:8).
8 Tá ni̱ya̱ʼa tiempo, ta̱ Pedro ta̱xira consejo yóʼo ndaʼa̱ na̱ cristiano: “Inkáchi ná koo ki̱ʼva ña̱ ndákanixi̱níndó” (kaʼvi 1 Pedro 3:8). Ña̱ va̱ʼa inkáchi ndakanixi̱ní miíyó na̱ testigo Jehová, xíniñúʼu sakúaʼayó ndakanixi̱níyó nda̱a̱ táki̱ʼva ndákanixi̱ní mií Jehová ta nu̱ú tu̱ʼunra kivi sakúaʼayó xa̱ʼa̱ ña̱yóʼo. Tá kúú, ta̱ Jesús ni̱ka̱ʼa̱nra xíʼin na̱ xi̱ndiku̱n sa̱tára ña̱ siʼnaka Reino Ndióxi̱ ná kundi̱ʼi-inina xa̱ʼa̱ (Mat. 6:33). Ná kachiyó ña̱ iin na̱ hermano na̱ ndíkaa̱ ti̱xin congregaciónyó nda̱kaxinna ña̱ kachíñuna ku̱a̱ʼáka tiempo nu̱ú Jehová, ¿á ka̱ʼa̱nyó xíʼinna nda̱a̱ táki̱ʼva ni̱ka̱ʼa̱n ta̱ Pedro xíʼin ta̱ Jesús? Va̱ásaví. Nu̱úka ña̱yóʼo, chikaa̱yó ndee̱ xíʼinna ta ka̱ʼa̱nyó xíʼinna ña̱ va̱ʼaní íyo ña̱ nda̱kaxinna keʼéna.
NÁ SAKÚAʼAYÓ VITÁ KOO INIYÓ
9, 10. ¿Ndáaña sákuaʼayó xa̱ʼa̱ ña̱ vitání ni̱xi̱yo ini ta̱ Jesús?
9 Ñuú tá kúma̱níka kaʼnína ta̱ Jesús, sa̱náʼa̱ra ta̱ Pedro xíʼin inkaka na̱ apóstol ña̱ ndáyáʼviní sakúaʼana vitá koo inina. Ta̱ Jesús ni̱ka̱ʼa̱nra xíʼin ta̱ Pedro ta saátu ta̱ Juan ña̱ ná ixatu̱ʼvana ña̱ʼa ña̱ va̱ʼa kuxura xíʼin na̱ discípulora tá kúma̱níka kuvira. Ta sananí na̱yóʼo i̱xatu̱ʼvana iin xikóʼó xíʼin ti̱ko̱to̱ ña̱ kuniñúʼu na̱ ku̱ʼu̱n kán ña̱ va̱ʼa ndoo xa̱ʼa̱na. ¿Soo ndáana ndakata xa̱ʼa̱na?
10 Tá ya̱chi̱, iin na̱ esclavova kúú na̱ xi̱keʼé ña̱yóʼo. Soo ta̱ Jesús kúú ta̱ nda̱kata xa̱ʼa̱na ta kǒo níxi̱ka-inira ña̱ keʼéra ña̱yóʼo. Nda̱kanda̱ní-ini na̱ apóstol tá xi̱nina ña̱ ta̱vá ta̱ Jesús ti̱ko̱to̱ ña̱ kánuu sa̱tára, tasaá ki̱ʼinra iin ti̱ko̱to̱ loʼo ka̱túnra tokóra ta chi̱kaa̱ra ti̱kui̱í ini xikóʼó ta ki̱xáʼara ndákatara xa̱ʼa̱na (Juan 13:4, 5). Sana ku̱a̱ʼáva tiempo xi̱niñúʼu ta̱ Jesús ña̱ va̱ʼa nda̱katara xa̱ʼa̱ 12 saá na̱ apóstolra, nda̱a̱ ta̱ Judas ta̱ ni̱xi̱íkoñaʼá nda̱katara xa̱ʼa̱. Xíʼin ña̱ ke̱ʼé ta̱ Jesús ni̱na̱ʼa̱ra ña̱ vitání ni̱xi̱yo inira. Tándi̱ʼi, viíní ni̱ka̱ʼa̱nra ña̱yóʼo xíʼin na̱ discípulora: “¿Á kúnda̱a̱-inindó xíʼin ña̱ ke̱ʼíi̱ xíʼinndó? Ndóʼó káʼa̱nndó Maestro ta káʼa̱nndó táta xíʼi̱n, ta va̱ʼa káʼa̱nvandó chi suvi kúúvai̱. Ña̱kán, tá yi̱ʼi̱ ta̱ kúú táta xíʼin Maestro va̱ʼa nda̱katai̱ xa̱ʼa̱ndó, saátu xíniñúʼu keʼé ndóʼó xíʼin táʼanndó” (Juan 13:12-14).
Náʼa̱yó ña̱ vitá íyo iniyó xíʼin ki̱ʼva ña̱ ndákanixi̱níyó xa̱ʼa̱ miíyó ta saátu xa̱ʼa̱ inkana
11. ¿Ndáa ki̱ʼva ni̱na̱ʼa̱ ta̱ Pedro ña̱ sa̱kúaʼara vitá koo inira? (1 Pedro 5:5; koto na̱ʼná).
11 Ta̱ Pedro sa̱kúaʼara vitá koo inira nda̱a̱ táki̱ʼva ni̱xi̱yo ta̱ Jesús. Tá xa̱a̱ ndi̱kó ta̱ Jesús chí ndiví, ta̱ Pedro ke̱ʼéra iin milagro ta sa̱ndáʼara iin ta̱a ta̱ va̱ása níxi̱kivi kaka nani tá ka̱kura (Hech. 1:8, 9; 3:2, 6-8). Xa̱ʼa̱ ña̱ káʼnuní milagro ke̱ʼéra, ku̱a̱ʼání na̱ yiví nda̱kanda̱-ini xíʼin ña̱yóʼo (Hech. 3:11). ¿Ndáaña ke̱ʼé ta̱ Pedro xa̱ʼa̱ ña̱yóʼo? Ná ndakaʼányó chi tá tiempo ña̱ ni̱xi̱yo ta̱ Pedro xi̱ndayáʼviní ña̱ kindo̱o va̱ʼa iinna nu̱ú na̱ yiví. Xa̱ʼa̱ ña̱kán, ¿á xi̱kuni̱ ta̱ Pedro kindo̱o va̱ʼara nu̱ú na̱ yiví xa̱ʼa̱ ña̱ ke̱ʼéra milagro yóʼo? Va̱ásaví, saáchi vitá ni̱xi̱yo inira ta ni̱ka̱ʼa̱nra ña̱ mií Jehová xíʼin ta̱ Jesús kúú na̱ chi̱ndeétáʼan xíʼinra ña̱ ke̱ʼéra ña̱yóʼo. Ta ña̱yóʼo kúú ña̱ ni̱ka̱ʼa̱nra xa̱ʼa̱ ta̱ Jesús: “Xa̱ʼa̱ ki̱vi̱ ta̱ Jesús xíʼin xa̱ʼa̱ ña̱ kándíxandi̱ ki̱vi̱ra kúú ña̱ va̱ʼa nda̱ʼa ta̱a ta̱ xítondó yóʼo ta̱ xíni̱ndó” (Hech. 3:12-16). Tá ni̱ya̱ʼa tiempo, ta̱ Pedro ka̱ʼyira iin carta ku̱a̱ʼa̱n ndaʼa̱ na̱ cristiano ta ni̱ka̱ʼa̱nra xíʼinna ña̱ ndáyáʼviní vitá koo inina. Tu̱ʼun ña̱ ni̱ka̱ʼa̱nra yóʼo sana sándakaʼánña miíyó xa̱ʼa̱ ña̱ ke̱ʼé ta̱ Jesús tá ka̱túnra iin ti̱ko̱to̱ loʼo tokóra ta nda̱katara xa̱ʼa̱ na̱ apóstolra (kaʼvi 1 Pedro 5:5).
Ta̱ Pedro ni̱na̱ʼa̱ra ña̱ vitá íyo inira ta ni̱ka̱ʼa̱nra ña̱ mií Jehová xíʼin ta̱ Jesús chi̱ndeétáʼan xíʼinra ña̱ ke̱ʼéra iin milagro. Saátu miíyó kivi na̱ʼa̱yó ña̱ vitá íyo iniyó tá chíndeétáʼanyó xíʼin inkana, ta va̱ása kundatuyó ña̱ ka̱ʼa̱n va̱ʼana xa̱ʼa̱yó. (Koto párrafo 11 xíʼin 12).
12. ¿Ndáa ki̱ʼva kivi na̱ʼa̱yó ña̱ vitá íyo iniyó nda̱a̱ táki̱ʼva ke̱ʼé ta̱ Pedro?
12 Saátu miíyó kivi sakúaʼayó vitá koo iniyó nda̱a̱ táki̱ʼva ke̱ʼé ta̱ Pedro. Ña̱ va̱ʼa na̱ʼa̱yó ña̱ vitá íyo iniyó, xíniñúʼu na̱ʼa̱yóña xíʼin ña̱ kéʼéyó ta saátu xíʼin ki̱ʼva ña̱ ndákanixi̱níyó ta su̱ví ña̱ ka̱ʼa̱n kuitíyó kooña. Ña̱yóʼo kúú ña̱ xi̱kuni̱ kachi ta̱ Pedro tá xi̱niñúʼura iin tu̱ʼun ña̱ kúni̱ kachi “vitá koo iniyó”, tá ka̱ʼyira cartara. Xa̱ʼa̱ ña̱ kúʼvi̱-iniyó xíniyó Jehová ta saátu na̱ yiví kúú ña̱ chíndeétáʼanyó xíʼinna, ta su̱ví xa̱ʼa̱ ña̱ kúni̱yó kindo̱o va̱ʼayó nu̱úna kúúña. Tá kúsi̱í-iniyó káchíñuyó nu̱ú Jehová ta chíndeétáʼanyó xíʼin na̱ hermano, va̱ása kundatuvíyó ña̱ ná koto inkana ña̱ kéʼéyó chi saá na̱ʼa̱yó ña̱ vitá íyo iniyó (Mat. 6:1-4).
NÁ SAKÚAʼAYÓ VIÍ NDAKANIXI̱NÍYÓ
13. ¿Ndáaña kúni̱ kachi ña̱ vií ndakanixi̱níyó?
13 ¿Ndáaña kúni̱ kachi ña̱ vií ndakanixi̱níyó? (1 Ped. 4:7). Kúni̱ kachiña, ña̱ viíní xíniñúʼu koo ña̱ ndaka̱xinyó keʼéyó tasaá na̱ʼa̱yó ña̱ ndákanixi̱níyó nda̱a̱ táki̱ʼva ndákanixi̱ní Jehová. Saátu kúni̱ kachiña ña̱ xíniñúʼu kundayáʼvika nu̱úyó kúú ña̱ kutáʼan viíyó xíʼin Jehová. Tá vií ndákanixi̱níyó, va̱ása ndakanixi̱níyó ña̱ xíni̱yó xa̱ʼa̱ ndiʼi ña̱ʼa chi kiʼinvayó kuenta xíʼin ña̱ kéʼéyó. Ta ndiʼi tiempo xíniñúʼu ka̱ʼa̱nyó xíʼin Jehová ña̱ ná kuniʼira yichi̱ nu̱úyó.a
14. ¿Ndáaña ke̱ʼé ta̱ Pedro?
14 Ñuú tá kúma̱níka kuvi ta̱ Jesús ni̱ka̱ʼa̱nra ña̱yóʼo xíʼin na̱ discípulora: “Ñuú vitin, ndiʼi ndóʼó sandákoondó yi̱ʼi̱ xa̱ʼa̱ ña̱ ndoʼi̱”. Ta̱ Pedro nda̱a̱ ni loʼo kǒo níxi̱ka-inira ña̱ ni̱ka̱ʼa̱nra ña̱yóʼo xíʼinra: “Ni ndiʼina ná sandákoona yóʼó xa̱ʼa̱ ña̱ ndoʼún, soo yi̱ʼi̱ va̱ása keʼíi̱ saá”. Mií ñuú saá, ta̱ Jesús ta̱xira consejo yóʼo ndaʼa̱ sava na̱ discípulora: “Kundito va̱ʼa nu̱úndó ta ka̱ʼa̱nníndó xíʼin Ndióxi̱” (Mat. 26:31, 33, 41). Tá níxi̱ndiku̱n ta̱ Pedro consejo yóʼo, sana ndakúva koo inira ta ka̱ʼa̱nra ña̱ xi̱kuura discípulo ta̱ Jesús. Soo xa̱ʼa̱ ña̱ va̱ása níxi̱ndiku̱nra consejo yóʼo, ni̱ka̱ʼa̱nra ña̱ kǒo xíni̱ra ta̱ Jesús ta nda̱ndikóní-inira xa̱ʼa̱ ña̱ ke̱ʼéra ña̱yóʼo (Mat. 26:69-75).
15. ¿Ndáaña chi̱ndeétáʼan xíʼin ta̱ Jesús ña̱ ndakú koo inira ñuú tá kúma̱níka kuvira?
15 Ta̱ Jesús xíʼin ndinuʼu-inira xi̱ndaa-inira Jehová. Ni iin ta̱a ta̱ kǒo ku̱a̱chi níxikuumií kúú ta̱ Jesús, soo tuku ta tuku ni̱ka̱ʼa̱nra xíʼin Jehová ñuú tá kúma̱níka kuvira. Ta ña̱yóʼo chi̱ndeétáʼan xíʼinra ña̱ va̱ʼa ndakú koo inira tasaá keʼéra ña̱ kúni̱ yivára (Mat. 26:39, 42, 44; Juan 18:4, 5). Sana kǒo nínandóso-ini ta̱ Pedro xa̱ʼa̱ ña̱ ke̱ʼé ta̱ Jesús tá ku̱a̱ʼání yichi̱ ni̱ka̱ʼa̱nra xíʼin yivára ñuú tá kúma̱níka kuvira.
16. ¿Ndáa ki̱ʼva ni̱na̱ʼa̱ ta̱ Pedro ña̱ sa̱kúaʼara vií ndakanixi̱níra? (1 Pedro 4:7).
16 Tá ni̱ya̱ʼa tiempo, ta̱ Pedro sa̱kúaʼara ka̱ʼa̱n ni̱ʼira xíʼin Jehová tasaá na̱ʼa̱ra ña̱ ndáa-inirara. Tá nda̱taku ta̱ Jesús, ni̱ka̱ʼa̱nra xíʼin ta̱ Pedro ta saátu xíʼin inkaka na̱ apóstol ña̱ ndakiʼinna espíritu santo ña̱ va̱ʼa ndakundeéna natúʼunna xíʼin na̱ yiví xa̱ʼa̱ Ndióxi̱. Soo ni̱ka̱ʼa̱nra xíʼinna ña̱ ná kundatu naʼana chí ñuu Jerusalén (Luc. 24:49; Hech. 1:4, 5). ¿Ndáaña ke̱ʼé ta̱ Pedro nani xi̱ndatura? Ña̱ Biblia káʼa̱nña ña̱ miíra xíʼin inkaka na̱ cristiano xi̱kaʼa̱n ni̱ʼina xíʼin Ndióxi̱ (Hech. 1:13, 14). Tándi̱ʼi, nu̱ú carta ña̱ nu̱ú ña̱ kaʼyira ni̱ka̱ʼa̱nra xíʼin na̱ cristiano ña̱ vií ná koo ña̱ ndakanixi̱nína ta ná ka̱ʼa̱n ni̱ʼina xíʼin Jehová chi saá na̱ʼa̱na ña̱ ndáa-ininara (kaʼvi 1 Pedro 4:7). Ta̱ Pedro sa̱kuaʼara kundaa-inira Jehová, ta saátu va̱ʼaní xi̱chindeétáʼanra xíʼin na̱ hermano ta xi̱chikaa̱ra ndee̱ xíʼinna (Gál. 2:9).
17. Ni xíni̱nívayó keʼéyó iin ña̱ʼa, ¿soo ndáaña xíniñúʼu keʼéyó? (Koto na̱ʼná).
17 Ña̱ va̱ʼa vií koo ña̱ ndakanixi̱níyó, xíniñúʼu ka̱ʼa̱n ni̱ʼiyó xíʼin Jehová. Kúnda̱a̱-iniyó ña̱ ndiʼi tiempo xíniñúʼu ka̱ʼa̱n ni̱ʼiyó xíʼin Jehová ña̱ va̱ʼa ná kuniʼira yichi̱ nu̱úyó ni tá xíniñúʼu keʼéyó iin ña̱ʼa ña̱ túviyó va̱ása yo̱ʼvi̱ keʼéyó. Tá xíniñúʼu ndaka̱xinyó iin ña̱ ndáyáʼviní keʼéyó, xíniñúʼu ka̱ʼa̱n ni̱ʼiyó xíʼinra ña̱ ná chindeétáʼanra xíʼinyó saáchi kúnda̱a̱-iniyó ña̱ miíra xíni̱ ndáaña kúú ña̱ va̱ʼaka chindeétáʼan xíʼinyó.
Ta̱ Pedro sa̱kúaʼara ka̱ʼa̱n ni̱ʼira xíʼin Jehová tasaá ni̱na̱ʼa̱ra ña̱ xi̱ndaa-inirara. Saátu miíyó kivi xa̱a̱yó vií ndakanixi̱níyó tá káʼa̱nyó xíʼin Jehová ña̱ chindeétáʼanra xíʼinyó, kachikaví tá xíniñúʼu ndaka̱xinyó iin ña̱ ndáyáʼviní keʼéyó. (Koto párrafo 17).b
18. ¿Á kivi keʼéyó nda̱a̱ táki̱ʼva ke̱ʼé ta̱ Pedro?
18 Táxiníyó tíxa̱ʼvi ndaʼa̱ Jehová saáchi va̱ʼaní i̱xava̱ʼara miíyó ta va̱ʼa náʼa̱yó ña̱ va̱ʼa ña̱ kúúmiíra (Gén. 1:26). Soo xa̱ʼa̱ ña̱ kúúyó na̱ yiví ku̱a̱chi kúnda̱a̱-iniyó ña̱ va̱ása kíviví keʼéyó nda̱a̱ táki̱ʼva kéʼéra (Is. 55:9). Soo nda̱a̱ táki̱ʼva ke̱ʼé ta̱ Pedro, kiviva sakúaʼayó ndakanixi̱níyó nda̱a̱ táki̱ʼva ndákanixi̱ní Jehová, saátu sakúaʼayó vitá koo iniyó ta vií ndakanixi̱níyó.
YAA 30 Ndióxi̱ miíi̱, yivái̱, migoi̱
a Tá kúni̱ún kunda̱a̱ka-iniún ndáaña kúni̱ kachi ña̱ vií ndakanixi̱níyó, ki̱ʼvi nu̱ú jw.org á nu̱ú aplicación JW Library®. Ti̱xin táʼví ña̱ naní “Textos bíblicos explicados”, nandukú artículo ña̱ naní “2 Timoteo 1:7: ‘Dios no nos ha dado un espíritu de temor’” ta kaʼvi táʼví ña̱ naní “Buen juicio”.
b ÑA̱ KÁʼA̱N XA̱ʼA̱ NA̱ʼNÁ: Iin ñá hermana káʼa̱nñá xíʼin Jehová ña̱ chindeétáʼanra xíʼinñá tá kúma̱níka ya̱ʼañá ña̱ nda̱ka̱tu̱ʼunnañá xa̱ʼa̱ sava ña̱ʼa ña̱ va̱ʼa taxina iin chiñu ndaʼa̱ñá.