“Ndaka̱xinndó ndáana kúni̱ndó ndasakáʼnundó”

1. Ña̱ va̱ʼa kusi̱í-iniyó, ¿ndáaña xíniñúʼu keʼéyó ta nda̱chun? (Isaías 48:​17, 18).

YIVÁYÓ ta̱ íyo chí ndiví kúʼvi̱ní-inira xínira miíyó, ta kúnira ña̱ ná kusi̱í-iniyó vitin ta saátu chí nu̱únínu (Ecl. 3:​12, 13). Viíní i̱xava̱ʼara miíyó ña̱ kivi keʼéyó sava ña̱ʼa soo kǒo níkeʼéra miíyó ña̱ kaʼndachíñuyó nu̱ú miíyó ni ña̱ ndaka̱xinyó keʼéyó ndáaña kúú ña̱ va̱ʼa á ña̱ va̱ása va̱ʼa (Ecl. 8:9; Jer. 10:23). Mií Jehová kúnda̱a̱-inira ña̱ va̱ʼa si̱í kooyó xíniñúʼu ndasakáʼnuyóra ta keʼéyó ña̱ káʼa̱nra (kaʼvi Isaías 48:​17, 18).a

2. ¿Ndáaña kúni̱ ta̱ Ndi̱va̱ʼa ná ndakanixi̱níyó xa̱ʼa̱, ta ndáa ki̱ʼva náʼa̱ Jehová ña̱ vatá kúú ña̱ káʼa̱n ta̱ Ndi̱va̱ʼa?

² Ta̱ Ndi̱va̱ʼa kúni̱ra ña̱ ná ndakanixi̱níyó ña̱ kiviva kusi̱í-iniyó ni ná va̱ása ndasakáʼnuyó Jehová ta kivi kaʼndachíñuyó nu̱ú miívayó (Gén. 3:​4, 5). Ña̱ va̱ʼa na̱ʼa̱ Jehová ña̱ vatá kúú ña̱ káʼa̱n ta̱ Ndi̱va̱ʼa, ta̱xira ña̱ ná kaʼndachíñu na̱ yiví nu̱ú miína loʼo tiempo. Soo kíʼinyó kuenta ña̱ va̱ása kuchiñuvíyó kaʼndachíñuyó nu̱ú miíyó. Soo nu̱ú Biblia káʼa̱nña xa̱ʼa̱ ku̱a̱ʼání na̱ ta̱a xíʼin ná ñaʼá na̱ xi̱ndasakáʼnu Jehová ta xi̱kusi̱íní-inina ta iin ta̱ xi̱kusi̱íní-ini xi̱kuu ta̱ Jesús. Yóʼo kotoyó ndáa xa̱ʼa̱ kúú ña̱ nda̱kaxinra ndasakáʼnura Jehová ta saátu kotoyó nda̱chun xíniñúʼu ndasakáʼnuyó iinlá yiváyó ta̱ íyo chí ndiví. Tándi̱ʼi, kotoyó ndáa xa̱ʼa̱ kúú ña̱ nda̱kaxinyó ndasakáʼnuyó Jehová.

¿NDA̱CHUN NDA̱KAXIN TA̱ JESÚS NDASAKÁʼNURA JEHOVÁ?

3. ¿Ndáaña ni̱ka̱ʼa̱n ta̱ Ndi̱va̱ʼa taxira ndaʼa̱ ta̱ Jesús ta ndáaña nda̱kaxin ta̱ Jesús keʼéra?

³ Tá ni̱xi̱yo ta̱ Jesús nu̱ú ñuʼú yóʼo, xi̱xiniñúʼu ndaka̱xinra ndáana ndasakáʼnura. Tá ni̱ya̱ʼa loʼo ña̱ nda̱kuchi ta̱ Jesús, ta̱ Ndi̱va̱ʼa ni̱ka̱ʼa̱nra xíʼinra ña̱ tá iin yichi̱ kuití ná ndasakáʼnurara taxira ndiʼi gobierno ña̱ íyo ñuyǐví yóʼo nda̱ʼara. Soo ta̱ Jesús nda̱kuiinra yuʼúra: “Kúáʼan ta̱ Ndi̱va̱ʼa. Saáchi tu̱ʼun Ndióxi̱ káʼa̱nña: ‘Jehová Ndióxi̱ún ndasakáʼnún, mitúʼun ta̱yóʼo kachíñún nu̱ú’” (Mat. 4:​8-10). ¿Nda̱chun nda̱kaxin ta̱ Jesús keʼéra ña̱yóʼo? Ná kotoyó sava ña̱ ke̱ʼéra.

4, 5. ¿Ndáa xa̱ʼa̱ kúú ña̱ nda̱kaxin ta̱ Jesús ndasakáʼnura Jehová?

⁴ Xa̱ʼa̱ ña̱ kúʼvi̱ní-ini ta̱ Jesús xínira yivára Jehová xíʼin ndiʼi níma̱ra, xa̱ʼa̱ ña̱kán nda̱kaxinra ndasakáʼnura yivára (Juan 14:31). Ta̱ Jesús ndásakáʼnura Jehová saáchi kúnda̱a̱-inira ña̱yóʼo kúú ña̱ va̱ʼaka (Juan 8:​28, 29; Apoc. 4:11). Kúnda̱a̱-inira ña̱ mií Jehová kúú ta̱ ta̱xi ña̱ tákuyó, va̱ʼaní-inira ta kivi kandíxayóra (Sal. 33:4; 36:9; Sant. 1:17). Ndiʼi tiempo xi̱ka̱ʼa̱n Jehová ña̱ nda̱a̱ xíʼinra ta ndiʼi ña̱ xi̱kuumií ta̱ Jesús mií yivára ta̱xiña ndaʼa̱ra (Juan 1:14). Soo ta̱ Ndi̱va̱ʼa síínníva íyora, saáchi ta̱yóʼo kúú ta̱ sa̱kíʼvi ku̱a̱chi ta ki̱xáʼa xíʼi̱ na̱ yiví, káʼa̱nra ña̱ vatá, kúni̱ra kuumiíra ku̱a̱ʼání ña̱ʼa ta iinlá xa̱ʼa̱ miíra ndíʼi̱-inira xa̱ʼa̱ (Juan 8:44). Ta̱ Jesús xíniva̱ʼara Jehová ta saátu xíniva̱ʼara ta̱ Ndi̱va̱ʼa, ña̱kán ni loʼo kǒo níndakanixi̱níra ña̱ ya̱ʼandosóra ña̱ káʼa̱n Jehová ta koora nda̱a̱ táki̱ʼva íyo ta̱ Ndi̱va̱ʼa (Filip. 2:​5-8).

⁵ Inka xa̱ʼa̱ ña̱ nda̱kaxin ta̱ Jesús ndasakáʼnura Jehová kúú ña̱ xi̱kunda̱a̱-inira ña̱ ku̱a̱ʼání ña̱ va̱ʼa kuu tá nda̱kú ná koo inira kachíñura nu̱ú Jehová (Heb. 12:2). Ta xi̱kunda̱a̱-inira ña̱ tá ná nda̱kú ná koo inira xíʼin Jehová, ndasayi̱i̱ra ki̱vi̱ yivára ta xa̱ʼa̱ ña̱yóʼo kǒoka ku̱a̱chi kuumiíyó ta va̱ása kuvikayó.

¿NDA̱CHUN IINLÁ JEHOVÁ XÍNIÑÚʼU NDASAKÁʼNUYÓ?

6, 7. a) ¿Nda̱chun ku̱a̱ʼání na̱ yiví kǒo ndásakáʼnuna Jehová? b) ¿Nda̱chun iinlá Jehová xíniñúʼu ndasakáʼnuyó?

⁶ Tiempo vitin ku̱a̱ʼání na̱ yiví va̱ása ndásakáʼnuna Jehová saáchi kǒo kúnda̱a̱-inina xa̱ʼa̱ra ta saátu va̱ása xínina ndáa ña̱ va̱ʼa kúúmiíra ta ndáaña xa̱a̱ kéʼéra xa̱ʼa̱na. Ña̱yóʼo kúú ña̱ ndo̱ʼo na̱ yiví na̱ na̱túʼun ta̱ apóstol Pablo xíʼin chí ñuu Atenas (Hech. 17:​19, 20, 30, 34).

⁷ Ta̱ Pablo ni̱ka̱ʼa̱nra xíʼin na̱ yiví xa̱ʼa̱ Ndióxi̱ ta̱ nda̱a̱, ta̱yóʼo “kúú ta̱ táxi ña̱ táku na̱ yiví, táxira ta̱chí ndákiʼinna xíʼin ndiʼika ña̱ʼa”. Ta saátu ni̱ka̱ʼa̱nra xíʼinna “saáchi xa̱ʼa̱ ta̱kán kúú ña̱ tákuyó, kánda̱yó ta íyoyó”. Tándi̱ʼi ni̱ka̱ʼa̱nra ña̱yóʼo xíʼinna, “iin ta̱a kuití kúú ta̱ i̱xava̱ʼara, ta ti̱xin ta̱yóʼo kúú ña̱ ki̱xi ndiʼi na̱ ñuu”. Xa̱ʼa̱ ña̱kán iinlá mií Jehová kúú ta̱ xíniñúʼu ndasakáʼnuyó chi miíra kúú ta̱ i̱xava̱ʼa miíyó (Hech. 17:​25, 26, 28).

8. ¿Ndáaña kúú ña̱ kǒo keʼé Jehová xíʼin na̱ yiví?

⁸ Jehová i̱xava̱ʼa miíyó ta ta̱yóʼo kúú ta̱ káʼnuní iníísaá nu̱ú ñuyǐví. Xa̱ʼa̱ ña̱kán tá kúni̱ra kiviva ixandúxara xíʼin na̱ yiví ña̱ va̱ʼa ndasakáʼnunara soo nda̱a̱ ni iin yichi̱ va̱ása keʼéra ña̱yóʼo. Chi ña̱ kúni̱ra kúú ña̱ ku̱a̱ʼání na̱ yiví ná xa̱a̱na viíní kutáʼanna xíʼinra ndiʼi tiempo (1 Tim. 2:​3, 4). Xa̱ʼa̱ ña̱kán, ku̱a̱ʼání ña̱ʼa náʼa̱ nu̱úyó ña̱ ndixava íyora ta kúni̱níra xínira miíyó. Ta mií Jehová sánáʼa̱ra miíyó ndáa ki̱ʼva sanáʼa̱yó inka na̱ yiví xa̱ʼa̱ ña̱ va̱ʼa ña̱ keʼéra xa̱ʼa̱na ta saátu ndáa ki̱ʼva keʼéraña (Mat. 10:​11-13; 28:​19, 20). Ta saátu xíniñúʼura na̱ anciano ña̱ va̱ʼa kundaara miíyó ta saátu táxira ña̱ ná ndasakáʼnuyóra ti̱xin ña̱ congregación (Hech. 20:28).

9. ¿Ndáa ki̱ʼva náʼa̱ Jehová ña̱ kúʼvi̱-inira xínira miíyó?

⁹ Sava na̱ yiví va̱ása kándíxana ña̱ íyo Jehová, soo ta̱yóʼo náʼa̱ra ña̱ ndixa kúʼvi̱-inira xínirana. Xa̱a̱ ku̱a̱ʼání tiempo ku̱a̱ʼání na̱ yiví ndáka̱xinna ña̱ keʼéna ña̱ kúni̱ miína soo xa̱ʼa̱ ña̱ va̱ʼaní-ini Jehová táxira ndiʼi ña̱ʼa ndaʼa̱na ña̱ va̱ʼa kutakuna tasaá kusi̱í-inina (Mat. 5:​44, 45; Hech. 14:​16, 17). Tíxa̱ʼvi Jehová, na̱yóʼo kivi koo se̱ʼena ta koo migona ta saátu kivi ndakiʼinna ña̱ va̱ʼaní xa̱ʼa̱ ña̱ ndeéní káchíñuna (Sal. 127:3; Ecl. 2:24). Ña̱kán va̱ása xíka-iniyó ña̱ kúʼvi̱níva-ini Jehová xínira ndiʼi na̱ yiví (Éx. 34:6). Ta vitin ná kotoyó ndáa xa̱ʼa̱ kúú ña̱ nda̱kaxinyó ndasakáʼnuyó Jehová ta ndáa ña̱ va̱ʼa kúú ña̱ xa̱a̱ táxira ndaʼa̱yó.

¿NDA̱CHUN NDA̱KAXINYÓ NDASAKÁʼNUYÓ JEHOVÁ?

10. a) ¿Ndáa xa̱ʼa̱ kúú ña̱ ndásakáʼnuyó Jehová? (Mateo 22:37). b) Xa̱ʼa̱ ña̱ kúee íyo ini Jehová, ¿ndáa ki̱ʼva chíndeétáʼanña xíʼinyó? (Salmo 103:​13, 14).

¹⁰ Nda̱a̱ táki̱ʼva ke̱ʼé ta̱ Jesús saá kéʼé miíyó, ndásakáʼnuyó Ndióxi̱ saáchi kúʼvi̱-iniyó xíniyóra xíʼin ndiʼi níma̱yó (kaʼvi Mateo 22:37). Tá sákuaʼakayó xa̱ʼa̱ Jehová saá xáa̱yó kúnda̱a̱ka-iniyó xa̱ʼa̱ ña̱ va̱ʼa ña̱ kúúmiíra. Tá kúú ña̱ kúee íyo inira xíʼinyó. Tá kǒo níxiniso̱ʼoka na̱ ñuu Israel miíra ni̱ka̱ʼa̱n ndáʼvira ña̱yóʼo xíʼinra: “Ixandó ña̱ ma̱ní, sandákoondó yichi̱ ña̱ va̱ása va̱ʼa ña̱ ki̱ʼinndó ku̱a̱ʼa̱nndó” (Jer. 18:11). Jehová kúnda̱a̱-inira ña̱ xíʼin ñuʼú ku̱vaʼayó (kaʼvi Salmo 103:​13, 14).b Tá ndákanixi̱níyó ña̱ kúeení íyo ini Jehová ta saátu xíʼin inka ña̱ va̱ʼa ña̱ kúúmiíra, ña̱yóʼo chindeétáʼanña xíʼinyó ña̱ ndasakáʼnuyóra ndiʼi tiempo.

11. ¿Ndáa xa̱ʼa̱ kúú ña̱ ki̱xáʼayó ndásakáʼnuyó yiváyó ta̱ íyo chí ndiví?

¹¹ Xa̱ʼa̱ ña̱ kúnda̱a̱-iniyó ña̱ ndásakáʼnuyó Jehová iin ña̱ va̱ʼaní kúú ña̱yóʼo xa̱ʼa̱ ña̱kán kéʼéyóña (Mat. 4:10). Ta saátu kúnda̱a̱-iniyó ña̱ ku̱a̱ʼání ña̱ va̱ʼa ndákiʼinyó xa̱ʼa̱ ña̱ nda̱kú íyo iniyó xíʼin Ndióxi̱, tá kúú ña̱ ndásayi̱i̱yó ki̱vi̱ Jehová, náʼa̱yó ña̱ vatá kúú ña̱ káʼa̱n ta̱ Ndi̱va̱ʼa ta sákusi̱íyó ini yiváyó. Tá ná ndaka̱xinyó ndasakáʼnuyó Jehová tiempo vitin, saátu chí nu̱únínu kivi ndasakáʼnuyóra ndiʼi tiempo (Juan 17:3).

12, 13. ¿Ndáaña sákuaʼayó xíʼin ña̱ ndo̱ʼo ñá Jane xíʼin ñá Pam?

¹² Nda̱a̱ tá válívíyó kivi xa̱a̱yó kuʼvi̱-iniyó kuniyó Jehová ta ni yáʼa ku̱a̱ʼá ku̱i̱ya̱ kǒo sandákooyó ña̱ kuʼvi̱-iniyó kuniyóra. Ná kotoyó ña̱ ndo̱ʼo u̱vi̱ ná ku̱ʼvayó ñá Jane xíʼin ñá Pam.c Tá ki̱xáʼaná káʼviná Biblia, iinñá xi̱kuumiíñá 11 ku̱i̱ya̱ ta inkañá 10 ku̱i̱ya̱. Na̱ yivá náyóʼo va̱ása níxiinna kaʼvina Biblia, soo ta̱xivana permiso ndaʼa̱ se̱ʼena ña̱ kaʼviná Biblia xíʼin na̱ testigo Jehová. Soo xi̱xiniñúʼu ku̱ʼu̱nná veʼe-ñu̱ʼu ndiʼi yi̱chi̱ nu̱ú xi̱xa̱ʼa̱n na̱ yiváná. Ñá Jane káchiñá: “Ña̱ sa̱náʼa̱ na̱ testigo Jehová yi̱ʼi̱ xa̱ʼa̱ ña̱ sanáʼa̱ Biblia, chi̱ndeétáʼanníña xíʼi̱n ña̱ kǒo xa̱i̱ kuniñúʼi̱ droga á ña̱ keʼíi̱ ña̱ kini nda̱a̱ táki̱ʼva xi̱keʼé na̱ va̱lí na̱ xi̱kaʼvi xíʼi̱n escuela”.

¹³ Tá ni̱ya̱ʼa loʼo ku̱i̱ya̱, u̱vi̱ saáná ni̱xa̱a̱ná ndu̱uná publicadora ta tándi̱ʼi, ni̱xa̱a̱ná ndu̱uná precursora ta saátu xi̱ndaaná na̱ yiváná saáchi xa̱a̱ ku̱chéeva na̱yóʼo. Tá ndákanixi̱ní ñá Jane xa̱ʼa̱ ña̱ ku̱u, ñáyóʼo káchiñá: “Kíʼi̱n kuenta ña̱ mií Jehová va̱ása sándakoondaʼa̱ra na̱ kúú migora ta ndáarana. Nda̱a̱ táki̱ʼva káʼa̱n 2 Timoteo 2:19: ‘Jehová xíni̱vara na̱ kúú kuenta miíra’”. Xíʼin ña̱yóʼo kúnda̱a̱-iniyó ña̱ mií Jehová ndáara na̱ ndáka̱xin ndasakáʼnu miíra ta kúʼvi̱-inina xíninara.

14. ¿Ndáa ki̱ʼva kivi ndakiʼinyó tu̱ʼun Jehová? (Koto na̱ʼná).

¹⁴ Kúni̱yó ña̱ ná kunda̱a̱-ini na̱ yiví ña̱ vatá ña̱ káʼa̱nna xa̱ʼa̱ Jehová su̱ví ña̱ nda̱a̱ kúúña. Ndakanixi̱ní xa̱ʼa̱ ña̱yóʼo, ná kachiyó ña̱ íyo iin na̱ migoún na̱ va̱ʼaní-ini ta va̱ʼaní kúnda̱a̱-inina xíʼin ña̱ ndóʼo inkana. Soo iin ki̱vi̱ xi̱niso̱ʼún ña̱ ni̱ka̱ʼa̱nna ña̱ vatá xa̱ʼa̱ na̱yóʼo, ña̱ ndi̱va̱ʼaní-inina ta káʼa̱nna ña̱ vatá. ¿Ndáaña keʼún? ¿Á su̱ví ña̱ nda̱a̱ kúú ña̱ ndakiʼún tu̱ʼunna? Ta ki̱ʼva saá kéʼéyó tá xíniso̱ʼoyó ña̱ káʼa̱n iinna ña̱ vatá xa̱ʼa̱ Jehová, ña̱ kéʼéyó kúú ña̱ káʼa̱nyó ña̱ nda̱a̱ xa̱ʼa̱ra ta ndákiʼinyó tu̱ʼunra (Sal. 34:1; Is. 43:10). Xíʼin ki̱ʼva ña̱ kéʼéyó ta saátu xíʼin ña̱ káʼa̱nyó náʼa̱yó ña̱ kúni̱yó ndasakáʼnuyó Jehová xíʼin ndiʼi níma̱yó.

15. ¿Ndáaña kúú ña̱ va̱ʼa nda̱kiʼin ta̱ Pablo xa̱ʼa̱ ña̱ sa̱ndákoora ña̱ xi̱keʼéra? (Filipenses 3:​7, 8).

¹⁵ Kúsi̱í-iniyó sándakooyó sava ña̱ kéʼéyó ña̱ va̱ʼa sákusi̱íyó ini Jehová ta saá va̱ʼa kachíñukayó nu̱úra. Iin ta̱ ke̱ʼé ña̱yóʼo xi̱kuu ta̱ apóstol Pablo. Xi̱kuumiíra iin chiñu ña̱ ndáyáʼviní ti̱xin religión na̱ judío soo sa̱ndákoora ña̱yóʼo ña̱ va̱ʼa xa̱a̱ra koora discípulo ta̱ Cristo ta saátu ndasakáʼnura Jehová (Gál. 1:14). Ta xa̱ʼa̱ ña̱ ke̱ʼéra ña̱yóʼo si̱íní ni̱xi̱yora ta nda̱kiʼinra iin ña̱ ndáyáʼviní, ña̱ kaʼndachíñura xíʼin ta̱ Cristo chí ndiví. Ta̱ Pablo kǒo níndikó-inira ña̱ nda̱kaxinra ndasakáʼnura Jehová. Ta saátu keʼé miíyó kǒo ndíkó-iniyó (kaʼvi Filipenses 3:​7, 8).

16. ¿Ndáaña sákuaʼayó xíʼin ña̱ ke̱ʼé ñá Julia? (Koto na̱ʼná).

¹⁶ Tá xíʼin ndinuʼu-iniyó káchíñuyó nu̱ú Jehová, ku̱a̱ʼání ña̱ va̱ʼa ndakiʼinyó tiempo vitin ta saátu chí nu̱únínu. Ná kotoyó ña̱ ndo̱ʼo iin ñá hermana ñá naní Julia. Tá ni̱xi̱yo loʼo ñáyóʼo, xi̱xitañá ti̱xin veʼe-ñu̱ʼu nu̱ú xi̱xa̱ʼa̱nñá. Xa̱ʼa̱ ña̱ va̱ʼaní xi̱xita ñáyóʼo, ni̱ka̱ʼa̱nna xíʼinñá ña̱ sanáʼa̱kana miíñá ña̱ katañá ña̱ naní ópera. Tá ni̱ya̱ʼa loʼo tiempo, ku̱a̱ʼání na̱ yiví xi̱xinina ñá Julia. Ta saá ki̱xáʼañá xítañá nu̱ú xíta ku̱a̱ʼání na̱ xíni̱va̱ʼa kata. Nani tá ndíkaa̱ñá iin escuela ña̱ ndáyáʼviní nu̱ú sánáʼa̱nana katana, iin ta̱ káʼvi xíʼinñá ni̱ka̱ʼa̱nra xíʼinñá xa̱ʼa̱ Ndióxi̱ ta saátu ni̱ka̱ʼa̱nra xíʼinñá ña̱ ki̱vi̱ Ndióxi̱ kúú Jehová. Tá ni̱ya̱ʼa loʼo tiempo, ñá Julia ki̱xáʼañá káʼviñá Biblia u̱vi̱ yi̱chi̱ ti̱xin iin semana. Ta saá ñá Julia nda̱kaxinñá kachíñuñá nu̱ú Jehová nu̱úka ña̱ katañá. I̱xayo̱ʼvi̱níña xíʼinñá ña̱ sandákooñá ña̱ katañá, ñáyóʼo káchiñá: “Ku̱a̱ʼání na̱ yiví xi̱ka̱ʼa̱nna xíʼi̱n ña̱ va̱ʼaní xítai̱ ta nda̱chun sandákoi̱ katai̱, soo yi̱ʼi̱ xi̱kuni̱ kachíñui̱ nu̱ú Jehová”. Vitin xa̱a̱ ni̱ya̱ʼa 30 ku̱i̱ya̱, ¿ndáaña ndákanixi̱ní ñá Julia xa̱ʼa̱ ña̱ nda̱kaxinñá ke̱ʼéñá? Ñáyóʼo káchiñá: “Kúsi̱íní-inii̱ ta kúnda̱a̱-inii̱ ña̱ mií Jehová taxira ndiʼi ña̱ kúni̱i̱ chí nu̱únínu” (Sal. 145:16).

NÁ NDASAKÁʼNUKAYÓ JEHOVÁ

17. a) Xa̱ʼa̱ ña̱ ndóoyó tiempo so̱ndíʼi, ¿ndáaña kúni̱ kachi ña̱yóʼo nu̱ú na̱ ndásakáʼnu Jehová? b) Ta, ¿ndáaña kúni̱ kachi ña̱yóʼo nu̱ú na̱ kǒo ndásakáʼnu miíra?

¹⁷ Xa̱ʼa̱ ña̱ ndóoyó tiempo so̱ndíʼi, ta̱ apóstol Pablo ka̱ʼyira ña̱yóʼo: “Saáchi ndáa ‘loʼo kuití tiempo’ kúma̱ní ta ‘ta̱ va̱xi kixaa̱vara ta va̱ása kuachi̱ra’” (Heb. 10:37). ¿Ndáaña kúni̱ kachi ña̱yóʼo? Ña̱ si̱lóʼo tiempo kíndo̱o ña̱ kivi xa̱a̱ na̱ yiví ndaka̱xinna á ndasakáʼnuna Jehová (1 Cor. 7:29). Tá xa̱a̱ nda̱kaxinyó ndasakáʼnuyó Ndióxi̱, kúnda̱a̱-iniyó ña̱ ya̱ʼayó nu̱ú sava tu̱ndóʼo soo loʼova tiempo koo ña̱yóʼo.

18. ¿Ndáaña kúni̱ Jehová xíʼin ta̱ Jesús ná keʼéyó?

¹⁸ Ta̱ Jesús chi̱kaa̱ra ndee̱ xíʼin na̱ yiví ña̱ ná ndakundeéna kundiku̱nna miíra ta koona discípulora (Mat. 16:24). Ña̱kán ni ku̱a̱ʼání ku̱i̱ya̱ ndásakáʼnuyó Jehová, ta̱yóʼo kúni̱ra ña̱ ná chika̱a̱yó ndee̱ ña̱ kǒo sandákooyó keʼéyó ña̱yóʼo. Sava yichi̱ íxayo̱ʼvi̱ña xíʼinyó ndasakáʼnuyóra. Soo vitin kúsi̱íníva-iniyó ta ku̱a̱ʼání ña̱ va̱ʼa ndákiʼinyó xa̱ʼa̱ ña̱ ndásakáʼnuyóra (Sal. 35:27).

19. ¿Ndáaña sákuaʼayó xíʼin ña̱ ndo̱ʼo ta̱ Gene?

¹⁹ Sava na̱ yiví ndákanixi̱nína ña̱ tá ná ndasakáʼnuna Jehová va̱ása kivi keʼéna ña̱ kúni̱ miína. Tá iin na̱ loʼo kúa̱an kúún, ¿á túviún ña̱ va̱ása kivi keʼún ku̱a̱ʼáka ña̱ʼa tá ná ndasakáʼnún Jehová? Iin ta̱ loʼo kúa̱an ta̱ naní Gene ni̱ka̱ʼa̱nra ña̱yóʼo. “Xi̱ndakanixi̱níi̱ xa̱ʼa̱ ña̱ kúúyó testigo Jehová, ku̱a̱ʼání ña̱ʼa kǒo kivi keʼéyó ña̱ va̱ʼa kusi̱í-iniyó. Ta xi̱tuvi̱ ña̱ ku̱a̱ʼání na̱ va̱lí na̱ xi̱kitáʼan xíʼi̱n va̱ʼa xi̱xa̱ʼa̱nna vikó, xi̱xikana xíʼin ná válí ta xi̱sasíkína videojuego nu̱ú xi̱kanitáʼanna. Soo yi̱ʼi̱ xi̱xiniñúʼu ku̱ʼi̱n reunión ta saátu ku̱ʼi̱n natúʼi̱n xíʼin na̱ yiví xa̱ʼa̱ Ndióxi̱”. ¿Ndáaña ndo̱ʼo ta̱ Gene xa̱ʼa̱ ña̱ xi̱ndakanixi̱níra saá? Ta̱yóʼo káchira: “Ki̱xáʼíi̱ kéʼíi̱ táʼan ña̱ va̱ása va̱ʼa xi̱keʼé na̱ va̱lí yóʼo. Ta nani tiempo ña̱ xi̱keʼíi̱ ña̱yóʼo xi̱kusi̱í loʼova inii̱ soo su̱ví ndiʼiví tiempo níxi̱kusi̱í-inii̱. Ña̱kán ki̱xáʼíi̱ ndákaʼíi̱n xa̱ʼa̱ ña̱ káʼa̱n Biblia saáchi kǒo níxi̱keʼíi̱ ña̱ káʼa̱n ña̱yóʼo ta xi̱ndakanixi̱níi̱ ndáaña va̱ʼa ndakiʼi̱n tá ná kundiku̱i̱n ña̱ káʼa̱nña. Ta saá ki̱xáʼíi̱ ndásakáʼnui̱ Jehová xíʼin ndiʼi níma̱i̱, ta nani ki̱xáʼíi̱ keʼíi̱ ña̱yóʼo xi̱kiʼii̱n kuenta Jehová xi̱ndakuiinra ndiʼi oración ña̱ xi̱keʼíi̱ nu̱úra”.

20. ¿Ndáaña kúú ña̱ chikaa̱-iniyó keʼéyó?

²⁰ Iin ta̱ ka̱ʼyi ña̱ Salmo xi̱tara yaa yóʼo nu̱ú Jehová: “Kúsi̱íní-ini na̱ yiví na̱ ndáka̱xiún ta kánaúnna ña̱ kundoona yéʼún” (Sal. 65:4). Nda̱a̱ táki̱ʼva ni̱ka̱ʼa̱n ta̱ Josué, saátu miíyó xíʼin ndinuʼu-iniyó ná ka̱ʼa̱nyó: “Yi̱ʼi̱ xíʼin na̱ veʼi̱ Jehová kúú ta̱ ndasakáʼnundi̱” (Jos. 24:15).