Ña̱ kuyatinyó nu̱ú Ndióxi̱ iin ña̱ va̱ʼa kúúña

1, 2. a) ¿Ndáaña xíniñúʼu keʼéyó ña̱ va̱ʼa kuumiíyó iin na̱ migo na̱ va̱ʼaní kitáʼan xíʼinyó? b) ¿Ndáaña sakúaʼayó nu̱ú artículo yóʼo?

NDAKANIXI̱NÍ xa̱ʼa̱ iin na̱ va̱ʼaní kítáʼan xíʼún. ¿Á ndákaʼún ndáaña chi̱ndeétáʼan xíʼinndó ña̱ va̱ʼaní ki̱xáʼandó kítáʼanndó? Sana ku̱a̱ʼání tiempo nda̱kutáʼanndó ta na̱túʼunndó xa̱ʼa̱ ña̱ ndóʼondó tasaá ku̱ndaa̱-iniún ndáaña kúú ña̱ kútóo na̱ migoún ta ndáaña kúú ña̱ va̱ása kútóona. Ta ki̱ʼún kuenta ña̱ ku̱a̱ʼání ña̱ va̱ʼa kúúmií na̱ migoún ta xi̱kuni̱ún keʼún nda̱a̱ táki̱ʼva kéʼé na̱kán, ta tá ni̱ya̱ʼa tiempo ki̱xáʼún kúʼvi̱-iniún xíniúnna.

² Xíniñúʼu taváyó tiempo ta chikaa̱yó ndee̱ ña̱ va̱ʼa kuumiíyó na̱ migoyó táʼan na̱yóʼo. Ta ki̱ʼva saá íyo ña̱ kitáʼan viíyó xíʼin Jehová. Nu̱ú artículo yóʼo kotoyó ndáa ki̱ʼva kuyatinyó nu̱ú Ndióxi̱yó Jehová ta̱ kúú migoyó. Soo siʼnaka ná ka̱ʼa̱nyó xa̱ʼa̱ nda̱chun iin ña̱ va̱ʼaní kúú ña̱ keʼéyó ña̱yóʼo.

3. ¿Nda̱chun xíniñúʼu ndakanixi̱níyó xa̱ʼa̱ ña̱ va̱ʼa ndákiʼinyó ña̱ kúyatinyó nu̱ú Jehová? Ka̱ʼa̱n xa̱ʼa̱ iin ejemplo.

³ Ndáyáʼviní ndakanixi̱níyó xa̱ʼa̱ ndiʼi ña̱ʼa ña̱ chindeétáʼan xíʼinyó ña̱ kuyatinyó nu̱ú Jehová (Sal. 63:​6-8). Ná ka̱ʼa̱nyó xa̱ʼa̱ iin ejemplo ña̱ kivi chindeétáʼan xíʼinyó ña̱ kunda̱a̱-iniyó xa̱ʼa̱ ña̱yóʼo. Na̱ yiví kúnda̱a̱-inina ña̱ ndáyáʼviní kúú ña̱ kuxu va̱ʼana, koʼo ku̱a̱ʼána ti̱kui̱í, keʼéna ejercicio ta saátu ña̱ ndakindee̱ va̱ʼana. Soo ni saá ku̱a̱ʼání na̱ yiví kǒo kíʼinna kuenta xíʼin ña̱yóʼo ta nda̱a̱ káni kue̱ʼe̱ miína. Soo tá iin na̱ yiví ndákanixi̱nína xa̱ʼa̱ ña̱ va̱ʼa ndakiʼinna tá ná kundiku̱nna ña̱yóʼo va̱ása ixayo̱ʼvi̱víña xíʼinna keʼénaña. Ki̱ʼva saá íyo ña̱ kuyatinyó nu̱ú Jehová, chi tá ndákanixi̱níyó xa̱ʼa̱ ndiʼi ña̱ va̱ʼa ndákiʼinyó, ña̱yóʼo chindeétáʼan xíʼinyó ña̱ kuyatinkayó nu̱úra (Sal. 119:​27-30).

4. ¿Ndáaña ni̱ka̱ʼa̱n ta̱ ka̱ʼyí Salmo 73:28 xa̱ʼa̱?

⁴ (Kaʼvi Salmo 73:28).a Ta̱ ka̱ʼyí ña̱ Salmo 73 ki̱xira ti̱xin tribu ta̱ Leví ta xi̱xitara ti̱xin ña̱ templo. Sana xa̱a̱ ku̱a̱ʼání ku̱i̱ya̱ kúú ña̱ nda̱kú ni̱xi̱yo inira ña̱ ka̱chíñura nu̱ú Jehová, soo ki̱ʼinra kuenta ña̱ ndáyáʼviní ña̱ kuyatinra nu̱ú Ndióxi̱, chi iin ña̱ va̱ʼaní kúú ña̱yóʼo nu̱úra. Ta xi̱kuni̱ra ña̱ inkana ná kiʼinna kuenta ña̱ iin ña̱ va̱ʼaní kúú ña̱ kitáʼanna xíʼin Jehová. Ná kotoyó sava ña̱ va̱ʼa ndákiʼinyó xa̱ʼa̱ ña̱yóʼo.

KÚSI̱ÍNÍ-INIYÓ TÁ KÚYATINYÓ NU̱Ú NDIÓXI̱

5. a) ¿Nda̱chun kúsi̱í-iniyó tá kúyatinyó nu̱ú Jehová? b) ¿Ndáa ki̱ʼva chíndeétáʼan ña̱ sánáʼa̱ Jehová miíún? (Proverbios 2:​6-16).

⁵ Nani kúyatinkayó nu̱ú Jehová si̱íka kooyó (Sal. 65:4). ¿Nda̱chun káʼa̱nyó ña̱yóʼo? Ná ka̱ʼa̱nyó xa̱ʼa̱ savaña. Tá ndíku̱nyó consejo ña̱ va̱xi nu̱ú tu̱ʼunra va̱ʼa kána ndiʼi ña̱ kéʼéyó. Ña̱ sánáʼa̱ Jehová miíyó, ndáaña miíyó ña̱ kǒo ki̱ʼviyó ku̱a̱chi ndeé (kaʼvi Proverbios 2:​6-16).b Ña̱kán Biblia káʼa̱nña: “Si̱íní íyo iin ta̱a ta̱ kúúmií ña̱ ndíchi ta saátu iin ta̱ xíni̱ va̱ʼa” (Prov. 3:13).

6. ¿Nda̱chun ku̱suchí-ini ta̱ ka̱ʼyí ña̱ Salmo?

⁶ Ña̱yóʼo kǒo kúni kachiña na̱ kúú migo Jehová nda̱a̱ ni iin yichi̱ kǒo kusuchí-inina. Nda̱a̱ ta̱ ka̱ʼyí ña̱ Salmo 73 ku̱suchí-inira tá ndakanixi̱níra xa̱ʼa̱ ndiʼi ña̱ va̱ása va̱ʼa ña̱ xi̱kuu. Xi̱ndi̱ʼi̱ní-inira saáchi xi̱ndakanixi̱níra na̱ yiví na̱ kǒo níxi̱kandíxa Ndióxi̱ va̱ʼaníka xi̱ndoo na̱yóʼo nu̱úka miíra xa̱ʼa̱ ña̱kán xi̱sa̱a̱níra ta nda̱a̱ xi̱kunira koora táki̱ʼva ni̱xi̱yo na̱kán. Ta saátu xi̱ndakanixi̱níra na̱ yiví na̱ ndi̱va̱ʼa-ini xíʼin na̱ ni̱nuní kúni ndiʼi tiempo na̱ ku̱i̱ká xi̱kuuna, kǒo kue̱ʼe̱ níxikuumiína ta kǒo níxi̱xo̱ʼvi̱na soo su̱ví saá níxikuuña (Sal. 73:​3-7, 12). Xa̱ʼa̱ ña̱ ku̱a̱ʼání ña̱ kini xi̱keʼé na̱ yiví tiempo saá xi̱ndakanixi̱níra ña̱ va̱ása ndáyáʼviví ña̱ ndásakáʼnura Jehová. Ta ku̱suchíní-inira ni̱ka̱ʼa̱nra ña̱yóʼo: “Ni chíkaa̱níi̱ ndee̱ ña̱ kǒo ña̱ yaku̱a̱ kundikaa̱ níma̱i̱ soo va̱ása ndáyáʼviví ña̱yóʼo saátu va̱ása ndáyáʼvi ña̱ nda̱katai̱ ndaʼíi̱ ña̱ va̱ʼa na̱ʼi̱ ña̱ kǒo ku̱a̱chi kúúmiíi̱” (Sal. 73:13).

7. Tá kúsuchí-iniyó, ¿ndáaña xíniñúʼu keʼéyó ña̱ va̱ʼa kusi̱í tuku iniyó? (Koto na̱ʼná ña̱ va̱xi nu̱ú kixáʼa tutu yóʼo).

⁷ Ta̱ ka̱ʼyí ña̱ Salmo yóʼo ke̱ʼéra iin ña̱ʼa ña̱ va̱ʼa ná kǒo kusuchíka-inira. Ni̱ki̱ʼvira “ini lugar ña̱ yi̱i̱ nu̱ú íyo Ndióxi̱”, ta kán chi̱ndeétáʼan Jehová xíʼinra ña̱ nasamara ña̱ ndákanixi̱níra (Sal. 73:​17-19). Xa̱ʼa̱ ña̱ kúú Jehová migoyó, ki̱vi̱ tá kúsuchí-iniyó kúnda̱a̱-inira xíʼin ña̱ ndóʼoyó. Xíniñúʼu ka̱ʼa̱nyó xíʼinra ña̱ ná kuniʼira yichi̱ nu̱úyó ta saá kuniso̱ʼoyó ña̱ káʼa̱nra xíʼinyó nu̱ú tu̱ʼunra xíʼin ti̱xin ña̱ congregación. Ña̱yóʼo ndasandakúña iniyó ña̱ va̱ʼa chika̱a̱yó ndee̱ ña̱ ndasakáʼnuyóra ni kúsuchí-iniyó. Ni ndíʼi̱-iniyó Jehová chindeétáʼanra xíʼinyó ta sandíkora iniyó (Sal. 94:19).c

TÁ KÚYATIINYÓ NU̱Ú NDIÓXI̱ VIÍ ÍYOYÓ TA ÍYO ÑA̱ NDÁTUYÓ CHÍ NU̱ÚNÍNU

8. Tá ná kuyatinyó nu̱ú Ndióxi̱, ¿ndáa inka ña̱ va̱ʼa ndakiʼinyó?

⁸ Ña̱ kuyatinyó nu̱ú Ndióxi̱ íyo u̱vi̱ ki̱ʼva ña̱ chíndeétáʼanña xíʼinyó. Ña̱ nu̱ú, tá viíní kítáʼanyó xíʼin Ndióxi̱ si̱íní kooyó, ta viíní kooyó. Ña̱ u̱vi̱, íyo ña̱ ndátuyó ndakiʼinyó chí nu̱únínu ta kúnda̱a̱-iniyó ña̱ xi̱nuva ña̱yóʼo (Jer. 29:11). Ná ka̱ʼa̱nyó xa̱ʼa̱ iin tá iin ña̱yóʼo.

9. ¿Nda̱chun kúsi̱í-iniyó tá kúyatinyó Jehová?

⁹ Ña̱ kuyatinyó nu̱ú Jehová sákusi̱íña iniyó. Tiempo vitin ku̱a̱ʼání na̱ yiví káʼa̱nna ña̱ kǒo Ndióxi̱ íyo. Ta savana kǒo kúnda̱a̱-inina ndáa xa̱ʼa̱ kúú ña̱ íyoyó nu̱ú ñuʼú yóʼo ta ndákanixi̱nína ña̱ chí nu̱únínu na̱ yiví ndiʼi-xa̱ʼa̱na. Soo miíyó xa̱ʼa̱ ña̱ kúnda̱a̱-iniyó xa̱ʼa̱ ña̱ káʼa̱n tu̱ʼun Ndióxi̱, kándíxayó ña̱ ndixa “íyora ta táxira ña̱ va̱ʼa ndaʼa̱ na̱ chíkaa̱ní ndee̱ ña̱ nandukúnara” (Heb. 11:6). Yiváyó Jehová ta̱ íyo chí ndiví, i̱xava̱ʼara miíyó ña̱ ná kuni̱yó ndasakáʼnuyóra. Xa̱ʼa̱ ña̱ ndásakáʼnuyóra kúsi̱í-iniyó ta vií ndóoyó (Deut. 10:​12, 13).

10. Nda̱a̱ táki̱ʼva káʼa̱n Salmo 37:29 ¿ndáaña va̱ʼa ndátu na̱ ndáa-ini Jehová ndakiʼinna chí nu̱únínu?

¹⁰ Ku̱a̱ʼání na̱ yiví kǒoví ña̱ ndátuna ndakiʼinna chí nu̱únínu. Chi ña̱ kéʼéna kúú ña̱ káchíñuna, ña̱ koo se̱ʼena xíʼin ña̱ taxi va̱ʼana xu̱ʼúnna ña̱ va̱ʼa kuniñúʼunaña tá xa̱a̱ ná kuchéena. Na̱ yiví yóʼo kǒo ndíʼi̱-inina xa̱ʼa̱ Ndióxi̱, soo miíyó na̱ ndásakáʼnu Jehová xíʼin ndinuʼu-iniyó kándíxayóra (Sal. 25:​3-5; 1 Tim. 6:17). Ndáaní-iniyó Ndióxi̱yó ta̱ kúú migoyó, ta kándíxayó ña̱ saxínura ndiʼi ña̱ ni̱ka̱ʼa̱nra taxira ndaʼa̱yó. Ku̱a̱ʼání ña̱ va̱ʼa ndátuyó ndakiʼinyó chí nu̱únínu ta saátu ña̱ ndasakáʼnuyó Jehová ñuyǐví xa̱á ndiʼi tiempo (kaʼvi Salmo 37:29).d

11. ¿Ndáaña va̱ʼa ndákiʼinyó xa̱ʼa̱ ña̱ kúyatinyó nu̱ú Ndióxi̱ ta ndáa ki̱ʼva kúnira xíʼin ña̱ ña̱yóʼo?

¹¹ Ku̱a̱ʼání ña̱ va̱ʼa ndákiʼinyó tá kúyatinyó nu̱ú Ndióxi̱. Tá kúú, Jehová íxakáʼnu-inira xa̱ʼa̱ ku̱a̱chiyó tá ndándikó-iniyó (Is. 1:18). Ña̱yóʼo kúni̱ kachina ña̱ va̱ása sándi̱ʼi̱ka ña̱ xínitúni̱yó miíyó xa̱ʼa̱ ña̱ va̱ása va̱ʼa ke̱ʼéyó tá ya̱chi̱ (Sal. 32:​1-5). Ta saátu sákusi̱íyó ini Jehová ta ña̱yóʼo sákusi̱íña ini miíyó vitin (Prov. 23:15). Xa̱ʼa̱ ña̱ kúúyó migo Jehová ku̱a̱ʼání ña̱ va̱ʼa ndákiʼinyó. Soo ¿ndáaña kivi keʼéyó ña̱ va̱ʼa kuyatinkayó nu̱úra?

NDÁÁÑA KIVI KEʼÉYÓ ÑA̱ VA̱ʼA KUYATINKAYÓ NU̱Ú NDIÓXI̱

12. ¿Ndáaña xíniñúʼu ke̱ʼún ña̱ va̱ʼa kuyatinkaún nu̱ú Ndióxi̱?

¹² Tá xa̱a̱ nda̱kuchiún ta kúún testigo Jehová, ña̱yóʼo kúni̱ kachina ña̱ xa̱a̱ ku̱a̱ʼání ña̱ʼa sa̱kúaʼún xa̱ʼa̱ Jehová xíʼin xa̱ʼa̱ ta̱ Jesús, ndi̱kó-iniún xa̱ʼa̱ ku̱a̱chiún, ta ni̱na̱ʼún ña̱ kandíxaníún Ndióxi̱ ta saátu chíka̱a̱níún ndee̱ ña̱ kundi̱kún ña̱ káʼa̱nra. Ña̱kán yatinka íyoún xíʼin Jehová. Ta ña̱yóʼo kúú ña̱ xíniñúʼu keʼévayó ña̱ va̱ʼa kuyatinkayó nu̱ú Ndióxi̱ (Col. 2:6).

13. ¿Ndáa u̱ni̱ ña̱ʼa chindeétáʼan xíʼinyó ña̱ va̱ʼa kuyatinyó nu̱ú Jehová?

¹³ ¿Ndáaña chindeétáʼan xíʼinyó ña̱ va̱ʼa kuyatinkayó nu̱ú Jehová? 1) Xíniñúʼu kaʼviyó Biblia ta ndakanixi̱níyó xa̱ʼa̱ ña̱ káʼa̱nña. Ná chika̱a̱kayó ndee̱ ña̱ sakúaʼakayó xa̱ʼa̱ Ndióxi̱. Ta saátu ná chika̱a̱yó ndee̱ ña̱ kunda̱a̱-iniyó ndáa ki̱ʼva ndákanixi̱ní Ndióxi̱ ta ndáaña kúni̱ra ná keʼéyó ta ná kundiku̱nyó ña̱ káʼa̱nra xíʼinyó nu̱ú tu̱ʼunra (Efes. 5:​15-17). 2) Ná chika̱a̱kayó ndee̱ ña̱ kandíxakayó Ndióxi̱ ta ndakanixi̱níyó xa̱ʼa̱ ndiʼi ki̱ʼva ña̱ náʼa̱ra ña̱ kúʼvi̱-inira xínira miíyó. 3) Xíniñúʼu kundasíyó ña̱ʼa ña̱ kǒo kutóo Jehová ta kǒo kitáʼanyó xíʼin na̱ yiví na̱ kéʼé ña̱ kǒo kútóora (Sal. 1:1; 101:3).

14. ¿Ndáaña xíniñúʼu keʼéyó ndiʼi ki̱vi̱ ña̱ va̱ʼa sakúsi̱íyó-ini Jehová? (1 Corintios 10:31; koto na̱ʼná).

¹⁴ (Kaʼvi 1 Corintios 10:31). Ndáyáʼviní keʼéyó ndiʼi ña̱ xa̱a̱ ni̱ka̱ʼa̱nyó xa̱ʼa̱ yóʼo saáchi kúnda̱a̱-iniyó ña̱ sákusi̱íña ini Jehová. Su̱ví kuití ña̱ keeyó natúʼunyó xíʼin na̱ yiví xa̱ʼa̱ Ndióxi̱ á ña̱ ku̱ʼu̱nyó reunión xíniñúʼu keʼéyó. Ndiʼi ña̱ kéʼéyó ndiʼi ki̱vi̱ xíniñúʼu sakúsi̱íña-ini Jehová. Tá kúú, kúnda̱a̱-iniyó ña̱ sákusi̱íyó inira tá nda̱kú íyo ndiʼi ña̱ kéʼéyó ta saátu táxiyó ña̱ kúúmiíyó ndaʼa̱ inkana (2 Cor. 8:21; 9:7). Kúni̱ra ña̱ ná kundayáʼviní ña̱ tákuyó nu̱úyó. Tá kíʼinyó kuenta xíʼin ña̱ xíxiyó á ña̱ xíʼiyó ta ndúkúyó ki̱ʼva ña̱ kundaayó miíyó saá kúú ña̱ yatinka íyoyó nu̱úra. Ndiʼi ña̱ kéʼéyó ña̱ va̱ʼa sakúsi̱íyó ini Jehová sana loʼoní kúúña túviyó soo ndiʼi ña̱yóʼo chíndeétáʼanña xíʼinyó ña̱ viíka kutáʼanyó xíʼinra (Luc. 16:10).

15. ¿Ndáa ki̱ʼva kúni̱ Jehová ná keʼéyó xíʼin na̱ yiví?

¹⁵ Jehová va̱ʼaní inira xíʼin ndiʼi na̱ yiví ni ndásakáʼnunara á va̱ása (Mat. 5:45). Saá kúni̱ra ná keʼé miíyó. Tá kúú, Jehová kúni̱ra na̱ ndásakáʼnu miíra “ná kǒo ka̱ʼa̱nna ña̱ va̱ása va̱ʼa xa̱ʼa̱ nda̱a̱ ni iin na̱ yiví, ná kǒo kutóona sakákuna ku̱a̱chi [...] ta va̱ʼaní ná koo inina xíʼin ndiʼina” (Tito 3:2). Ni va̱ása kándíxa na̱ yiví Jehová, kǒo ndákanixi̱níyó ña̱ ndáyáʼvikayó nu̱ú na̱kán (2 Tim. 2:​23-25). Tá ndiʼi tiempo vií kéʼéyó xíʼin na̱ yiví saá kúú ña̱ kúyatinkayó nu̱ú Jehová.

TÁ NDÁKAVA INIYÓ KIVIVA KUYATINYÓ NU̱Ú NDIÓXI̱

16. Ña̱ ndo̱ʼo ta̱ ka̱ʼyí ña̱ Salmo 73, ¿ndáaña xi̱ndakanixi̱níra xa̱ʼa̱?

¹⁶ ¿Ndáaña kivi keʼéyó tá túviyó ña̱ va̱ása yatinka íyo Jehová nu̱úyó? Ná ka̱ʼa̱nyó xa̱ʼa̱ ña̱ ndo̱ʼo ta̱ ka̱ʼyí Salmo 73. Ña̱yóʼo kúú ña̱ ni̱ka̱ʼa̱nra: “Ndáa si̱lóʼo kitai̱ yichi̱ va̱ʼa, nda̱a̱ táki̱ʼva ni̱xi̱yo ta̱ xa̱a̱ ku̱nu̱mí ndakava saá ni̱xi̱yoi̱” (Sal. 73:2). Ta̱yóʼo ka̱chira, “xi̱ndakavaní-inii̱” “va̱ása vií níxi̱ndakanixi̱níi̱” ta ni̱ka̱ʼa̱nkara “nda̱a̱ táki̱ʼva ni̱xi̱yo iin kití tí kǒo ña̱ xíni̱túni̱” saá ni̱xi̱yora (Sal. 73:​21, 22). ¿Á nda̱kanixi̱níra ña̱ va̱ása ixakáʼnuka-ini Jehová xa̱ʼa̱ra ta ni va̱ása kuʼvi̱ka-inira kunirara xa̱ʼa̱ ña̱ ke̱ʼéra ña̱ va̱ása va̱ʼa?

17. a) ¿Ndáaña ke̱ʼé ta̱ ka̱ʼyí Salmo tá nda̱kavaní-inira? b) ¿Ndáaña sákuaʼayó xíʼin ña̱ ndo̱ʼo ta̱yóʼo? (Koto na̱ʼná).

¹⁷ Ni xi̱ndakanixi̱ní ta̱ ka̱ʼyí ña̱ Salmo ña̱ sa̱ndákoo ndaʼa̱ Jehová miíra, ta̱yóʼo loʼova tiempo xi̱ndakanixi̱níra saá. Ni xi̱ndakava-inira ki̱ʼinra kuenta ña̱ xi̱niñúʼu kuyatinra nu̱ú Jehová. Saáchi ña̱yóʼo kúu ña̱ ni̱ka̱ʼa̱nra xíʼinra: “Soo vitin, ndiʼi tiempo íyoi̱ xíʼún; ta tíún ndaʼa̱ kúaʼi̱. Táxiún consejo ndaʼíi̱ ña̱ va̱ʼa kuniʼún yichi̱ nu̱úi̱ tasaá na̱ʼún ña̱ va̱ʼa íyo iniún xíʼi̱n” (Sal. 73:​23, 24). Tá yáʼayó nu̱ú tu̱ndóʼo á tá ndákava iniyó, kivi kuyatinkayó nu̱ú Jehová chi ta̱yóʼo kúú ta̱ chindeétáʼanka xíʼinyó ta saá kandíxakayóra (Sal. 73:26; 94:18). Soo, tá ki̱xaa̱ iin tiempo ke̱ʼéyó ña̱ va̱ása va̱ʼa nu̱ú Jehová, ¿á kivika ndikóyó nu̱úra? Kiviva ndikóyó nu̱úra, saáchi ta̱yóʼo íyo tu̱ʼvara ña̱ ixakáʼnu-inira xa̱ʼa̱yó (Sal. 86:5). Tá ndeéní ndákava-iniyó saá kúú ña̱ xíniñúʼu kuyatinkayó nu̱ú Ndióxi̱ (Sal. 103:​13, 14).

NDIʼI TIEMPO NÁ KUYATINYÓ NU̱Ú NDIÓXI̱

18. ¿Nda̱chun ndáyáʼviní kuyatinyó nu̱ú Jehová ndiʼi tiempo?

¹⁸ Ndiʼi tiempo kivi kuyatinyó nu̱ú Jehová saáchi ndiʼi tiempo kivi sakúaʼakayó ña̱ʼa xa̱ʼa̱ra. Biblia káʼa̱nña xa̱ʼa̱ Jehová ña̱ ku̱a̱ʼání ña̱ ndíchi kúúmiíra ta ndiʼi ña̱ʼa xínira xa̱ʼa̱ “ta kǒo kúchiñuyó kunda̱a̱ ndiʼi iniyó xa̱ʼa̱ ndiʼi yichi̱ra” (Rom. 11:33).

19. Ña̱ sa̱kúaʼayó nu̱ú Salmo yóʼo, ¿ndáaña va̱ʼa ndakiʼinyó?

¹⁹ Salmo 79:13 káchiña: “Ndi̱ʼi̱ na̱ kúú ñuún xíʼin na̱ kúú ndikachi sa̱na̱ún tí sákixáʼún, ndiʼi tiempo taxindi̱ tíxa̱ʼvi ndaʼún ta ndasakáʼnundi̱ yóʼó ta saátu na̱ se̱ʼendi̱ na̱ koo chí nu̱únínu”. Kǒo kaka-iniún saáchi tá kúyatiún nu̱ú Jehová, ndiʼi tiempo ku̱a̱ʼáka ña̱ va̱ʼa taxira ndaʼún. Ta kivi ka̱ʼún ña̱yóʼo: “Ndióxi̱ ndasandakúra níma̱i̱, iinlá ta̱yóʼo kúú ta̱ íyo xíʼi̱n ndiʼi tiempo” (Sal. 73:26).