Kandíxa ña̱ kúni̱ní Jehová xínira yóʼó

1. ¿Nda̱chun nda̱kaxiún ña̱ kachíñún nu̱ú Jehová? (Koto na̱ʼná).

¿Á NDÁKAʼÚN ki̱vi̱ ña̱ ke̱ʼún oración nu̱ú Jehová ta ni̱ka̱ʼún ña̱ kachíñún nu̱úra? Ke̱ʼún ña̱yóʼo chi ku̱ndaa̱-iniún ndáa ki̱ʼva íyora ta ki̱xáʼún kúni̱níúnra ña̱kán ni̱ka̱ʼún xíʼinra ña̱ ndáyáʼvika nu̱ún kúú ña̱ kachíñún nu̱úra ta ndiʼi tiempo kuʼvi̱-iniún kuniúnra xíʼin ndiʼi níma̱ún (Mar. 12:30). Nani saá ki̱xáʼa kúʼvi̱ka-iniún xíniúnra. Ña̱kán, tá iinna ná nda̱ka̱tu̱ʼunna yóʼó: “¿Á ndixa kúʼvi̱-iniún xíniún Jehová?” Ndi̱ku̱n kama ka̱ʼún xíʼinna: “Kúʼvi̱níva-inii̱ xíni̱ra nu̱ú inkaka ña̱ʼa”.

2, 3. ¿Ndáaña kúni̱ Jehová ná kandíxayó? (Jeremías 31:3). ¿Ndáaña ka̱ʼa̱nyó xa̱ʼa̱ nu̱ú artículo yóʼo?

² ¿Ndáaña ndakuiún tá ná nda̱ka̱tu̱ʼunna yóʼó, á ndixa kándíxaún ña̱ kúni̱ní Jehová xíni̱ra yóʼó? Sana kakaloʼo iniún ña̱ ndakuiún yuʼúna saáchi sana ndakanixi̱níún ña̱ va̱ása xíniñúʼuví kuʼvi̱-ini Jehová kunira yóʼó. Iin ñá hermana ñá va̱ása níxi̱kuʼvi̱-inina kunina tá ni̱xi̱yo loʼoñá káchiñá: “Kúʼvi̱níva-inii̱ xíni̱ Jehová xíʼin ndiʼi níma̱i̱ soo sava yichi̱ íxayo̱ʼvi̱ña xíʼi̱n kandíxai̱ ña̱ kúni̱níra xínira yi̱ʼi̱”. Soo, ¿á kúʼvi̱-ini Jehová xínira miíún?

³ Jehová kúni̱ra ña̱ ná kandíxaún ña̱ kúʼvi̱-inira xínira miíún (kaʼvi Jeremías 31:3).a Xi̱kuni̱ra ña̱ ná koún migora xa̱ʼa̱ ña̱kán ka̱nara miíún. Ta tá nda̱taxiún miíún ndaʼa̱ra ta nda̱kuchiún saá ni̱na̱ʼa̱ra ña̱ kúʼvi̱ní-inira xínira miíún ta saátu ndiʼi na̱ káchíñu nu̱úra, xa̱ʼa̱ ña̱kán nda̱kaxinra yóʼó ta ndáyáʼviníún nu̱úra (Mal. 3:17). Jehová kúni̱ra ña̱ ná kandíxaún ña̱ kúni̱níra yóʼó nda̱a̱ táki̱ʼva ke̱ʼé ta̱ apóstol Pablo tá ka̱ʼyira ña̱yóʼo: “Saáchi ni loʼo va̱ása xíka-inii̱ ña̱ kúʼvi̱ní-ini Ndióxi̱ xínira miíyó. Ni tá ná kuviyó ni tá ná kutakuyó, nda̱a̱ ndáaka ña̱ʼa ná keʼé iin ángel á na̱ chíñu, ni ña̱ʼa ña̱ íyo vitin, ni ña̱ʼa ña̱ kúma̱ní kixi, ni ndee̱, ni ña̱ʼa ña̱ íyo chí nu̱ú súkun, ni ña̱ʼa ña̱ íyo chí nu̱ú kúnu, ni nda̱a̱ ndáaka ña̱ i̱xava̱ʼa Ndióxi̱, kǒo kivi sakúxíkáña miíyó nu̱ú ña̱ kúʼvi̱-ini Ndióxi̱ xínira miíyó” (Rom. 8:​38, 39). Nu̱ú artículo yóʼo sakúaʼayó nda̱chun ndáyáʼviní ña̱ kandíxayó ña̱ kúni̱ní Jehová xínira miíyó ta̱ saátu ndáaña chindeétáʼan xíʼinyó ña̱ kandíxayó ña̱yóʼo.

NDA̱CHUN NDÁYÁʼVINÍ KANDÍXAYÓ ÑA̱ KÚNI̱NÍ JEHOVÁ XÍNIRA MIÍYÓ

4. ¿Ndáa prueba chíndúʼú ta̱ Ndi̱va̱ʼa nu̱úyó ta ndáaña xíniñúʼu keʼéyó ña̱ va̱ʼa kǒo taxiyó sandáʼvira miíyó?

⁴ Tá kándíxayó ña̱ kúni̱ní Jehová xínira miíyó, ña̱yóʼo chindeétáʼanña xíʼinyó ña̱ ya̱ʼayó nu̱ú ndiʼi ña̱ʼa ña̱ xíniñúʼu ta̱ Ndi̱va̱ʼa xa̱ʼa̱ ña̱ kúni̱ra sandáʼvira miíyó (Efes. 6:11). Xa̱ʼa̱ ña̱ kúni̱ ta̱ Ndi̱va̱ʼa ña̱ ná sandákooyó ña̱ kachíñuyó nu̱ú Ndióxi̱, ¿ndáa prueba xíniñúʼura? Kúni̱ra ña̱ ná ndakanixi̱níyó ña̱ kǒo kúni̱ví Jehová xínira miíyó. Ná ndakaʼányó chi ta̱ Ndi̱va̱ʼa ndiʼi tiempo kúni̱ra sandáʼvira miíyó. Biblia káʼa̱nña nda̱a̱ táki̱ʼva íyo tí ndikaʼa saá íyora (1 Ped. 5:​8, 9). Tí ndikaʼa xáxirí kití válí tí vitá kúni. Ta ki̱ʼva saá kéʼé ta̱ Ndi̱va̱ʼa, ku̱a̱ʼání yichi̱ chindúʼúra prueba nu̱úyó tá kúú, tá ndákava-iniyó xa̱ʼa̱ ña̱ ndo̱ʼoyó tá ya̱chi̱, ña̱ ndóʼoyó vitin á xa̱ʼa̱ ña̱ ndíʼi̱-iniyó xa̱ʼa̱ ña̱ kuu chí nu̱únínu (Prov. 24:10). Ña̱ va̱ʼa kǒo taxiyó ña̱ sandáʼvi ta̱ Ndi̱va̱ʼa miíyó xíniñúʼu chika̱a̱níyó ndee̱ ña̱ kandíxayó ña̱ ndixaní kúʼvi̱-ini Jehová xínira miíyó (Sant. 4:7).

5. ¿Nda̱chun ndáyáʼviní kandíxayó ña̱ kúni̱ní Jehová xínira miíyó ta ndáyáʼviyó nu̱úra?

⁵ Tá kándíxayó ña̱ kúʼvi̱ní-ini Jehová xínira miíyó ña̱yóʼo chindeétáʼanña xíʼinyó ña̱ kuyatinkayó nu̱úra. ¿Nda̱chun káʼa̱nyó ña̱yóʼo? Saáchi i̱xava̱ʼara miíyó ña̱ kuʼvi̱-iniyó kuniyó inkana ta saátu ña̱ na̱ʼa̱ inkana ña̱ kúʼvi̱-inina xínina miíyó. Tá náʼa̱ iinna ña̱ kúni̱na xínina miíyó saátu miíyó kíxáʼayó kúni̱yó xíniyóna. Ña̱kán tá kíʼinyó kuenta ña̱ kúni̱ní Jehová xínira miíyó ta ndáyáʼviníyó nu̱úra, saá kúú ña̱ kuʼvi̱ka-iniyó kuniyóra (1 Juan 4:19). Tá kúʼvi̱ka-iniyó xíniyóra, saátu miíra kuʼvi̱ka-inira kunira miíyó saáchi Biblia káchiña: “Kuyatinndó nu̱ú Ndióxi̱ ta ta̱kán kuyatinra nu̱úndó” (Sant. 4:8). Vitin ná ka̱ʼa̱nyó xa̱ʼa̱ ndáaña chindeétáʼan xíʼin iin tá iinyó ña̱ kandíxayó ña̱ kúni̱ní Jehová xínira miíyó.

¿NDÁAÑA CHINDEÉTÁʼAN XÍʼÚN KANDÍXAÚN ÑA̱ KÚNI̱NÍ JEHOVÁ XÍNIRA YÓʼÓ?

6. ¿Ndáaña kivi keʼún tá íxayo̱ʼvi̱ña xíʼún ña̱ kandíxaún ña̱ kúni̱ní Jehová xínira yóʼó?

⁶ Ka̱ʼa̱n xíʼin Jehová ña̱ ná chindeétáʼanra xíʼún ña̱ kunda̱a̱-iniún nda̱chun kúú ña̱ kúni̱níra xínira yóʼó (Luc. 18:1; Rom. 12:12). Sana ku̱a̱ʼá yichi̱ xíniñúʼu ka̱ʼún xíʼin Jehová ña̱ ná chindeétáʼanra xíʼún ña̱ kunda̱a̱-iniún ña̱ kúni̱níra xínira yóʼó. Tá íxayo̱ʼvi̱ña xíʼún ña̱ kandíxaún ña̱ kúni̱ní Jehová xínira yóʼó, ndakaʼán chi kúnda̱a̱va-inira ndáa ki̱ʼva íyoún (1 Juan 3:​19, 20). Jehová xíni̱ra ndáa ki̱ʼva íyoún ta kíʼinra kuenta xíʼin ña̱ va̱ʼa ña̱ kúúmiíún (1 Sam. 16:7; 2 Crón. 6:30). Ña̱kán kiviva ka̱ʼún xíʼinra xa̱ʼa̱ ña̱ ndóʼún ta ka̱ʼún xíʼinra ña̱ ná chindeétáʼanra xíʼún ña̱ ná kandíxaún ña̱ kúni̱níra xínira miíún (Sal. 62:8). Tándi̱ʼi ni̱ka̱ʼún xíʼinra, chika̱a̱ ndee̱ ña̱ keʼún sava ña̱ʼa. Ná kotoyó ndáaña kivi keʼún.

7, 8. ¿Ndáa ki̱ʼva chíndeétáʼan Salmo xíʼinyó ña̱ kandíxayó ña̱ kúni̱ní Jehová xínira miíyó?

⁷ Kandíxa ña̱ káʼa̱n Jehová. Ndióxi̱ xi̱niñúʼura espíritu santora ña̱ va̱ʼa kaʼyí na̱ ta̱a ña̱ va̱ʼa ña̱ kúúmiíra nu̱ú tu̱ʼunra. Tá kúú ña̱ ni̱ka̱ʼa̱n ta̱ David: “Jehová íyo yatinra nu̱ú na̱ xóʼvi̱; ta sáka̱kura na̱ ndákavaní-ini” (Sal. 34:18). Tá saá ndóʼún sana ndákanixi̱níún ña̱ kǒo na̱ ndíʼi̱-ini xa̱ʼún, soo Jehová káʼa̱nra ña̱ chindeétáʼanra xíʼún tá ndákava-iniún. Nu̱ú inka táʼví ña̱ salmo ta̱ David ka̱ʼyíra: “Ndakaya ti̱kui̱í nu̱úi̱ ta ndataánva̱ʼúnrá ti̱xin ti̱aʼa ña̱ ñii̱ ña̱ kúú kuentaún” (Sal. 56:8). Tiempo xi̱naʼá tá xi̱xika na̱ yiví inka ñuu, xi̱xiniñúʼuna ti̱aʼa ña̱ ñii̱ ña̱ va̱ʼa kundika̱a̱ ti̱kui̱í koʼona ta xi̱ndayáʼviní ña̱yóʼo. Ki̱ʼva saá kéʼé Jehová, tá xítora ña̱ xóʼvi̱ún á yáʼún nu̱ú tu̱ndóʼo ña̱ yo̱ʼvi̱ní kúsuchí-inira ta nda̱a̱ táki̱ʼva íyo ña̱ ndátaánva̱ʼara ti̱kui̱í nu̱ún ini iin ti̱aʼa saá íyoña ta saá náʼa̱ra ña̱ ndíʼi̱-inira xa̱ʼún. Saátu ni̱ka̱ʼa̱n ta̱ David xíʼin Jehová: “Xíni̱va̱ʼún ndáaña kéʼíi̱” (Sal. 139:3). Jehová xítora ndiʼi ña̱ kéʼún ta ña̱ va̱ʼa kéʼún kúú ña̱ kíʼinkara kuenta xíʼin (Heb. 6:10). ¿Nda̱chun? Saáchi chíndayáʼvira ndiʼi ña̱ kéʼún ña̱ va̱ʼa sakúsi̱íún inira.b

⁸ Nu̱ú versículo yóʼo nda̱a̱ táki̱ʼva íyo ña̱ káʼa̱n Jehová ña̱yóʼo xíʼinyó saá íyoña: “Kúni̱ ña̱ ná kunda̱a̱-iniún ña̱ kúni̱níi̱ yóʼó ta ndíʼi-inii̱ xa̱ʼún”. Soo nda̱a̱ táki̱ʼva xa̱a̱ sa̱kuaʼayó, ta̱ Ndi̱va̱ʼa kúni̱ra ña̱ ná ndakanixi̱níyó ña̱ va̱ása kúʼvi̱-ini Jehová xínira miíyó. Ña̱kán tá sava yichi̱ ndákanixi̱níún ña̱ va̱ása kúni̱ Jehová xínira yóʼó, kivi ndakanixi̱níún ña̱yóʼo: “¿Ndáana kandíxai̱, ta̱ Ndi̱va̱ʼa ta̱ káʼa̱n ña̱ vatá á Ndióxi̱ ta̱ káʼa̱n ña̱ nda̱a̱?” (Juan 8:44; Sal. 31:5).

9. ¿Ndáaña káʼa̱n Jehová xíʼin na̱ kúʼvi̱-ini xíni miíra? (Éxodo 20:6).

⁹ Ndakanixi̱ní ndáa ki̱ʼva kúʼvi̱-ini Jehová xínira na̱ kúʼvi̱-ini xíni miíra. Ndakanixi̱ní xa̱ʼa̱ ña̱ ni̱ka̱ʼa̱nra xíʼin ta̱ Moisés ta saátu na̱ Israelita (kaʼvi Éxodo 20:6). Ndióxi̱ káʼa̱nra ña̱ kuʼvi̱-inira kunira na̱ kúni̱ní xíni miíra ta xa̱ʼa̱ ña̱ nda̱kúní-inira va̱ása sandákoora ña̱ kuʼvi̱-inira kunirana (Neh. 1:5). Ña̱kán tá sava yichi̱ íxayo̱ʼvi̱ña xíʼún ña̱ kandíxaún ña̱ kúni̱ní Jehová xíni̱ra yóʼó, ndakanixi̱ní xa̱ʼa̱ ña̱yóʼo: “¿Á kúʼvi̱-inii̱ xínii̱ Jehová?” Tándi̱ʼi ndakanixi̱ní ña̱yóʼo, tá kúʼvi̱-iniún xíniúnra ta chíka̱ún ndee̱ ña̱ sakúsi̱íún-inira kivi kandíxaún ña̱ kúʼvi̱ní-inira xínira yóʼó (Dan. 9:4; 1 Cor. 8:3). Tá kúʼvi̱-iniún xíniún Jehová, va̱ása kaka-iniún ña̱ kúʼvi̱-inira xínira miíún ta̱ va̱ása sandákoondaʼa̱ra yóʼó.

10, 11. ¿Ndáa ki̱ʼva kúni̱ Jehová ná ndakanixi̱níyó xa̱ʼa̱ ña̱ ni̱xi̱ʼi̱ se̱ʼera xa̱ʼa̱yó? (Gálatas 2:20).

¹⁰ Ndakanixi̱ní xa̱ʼa̱ ña̱ ni̱xi̱ʼi̱ ta̱ Jesús. Ña̱yóʼo kúú ña̱ ndáyáʼviní ña̱ ke̱ʼé Jehová xa̱ʼa̱ na̱ yiví (Juan 3:16). Soo saátu chi̱ndaʼára se̱ʼera ña̱ kuvira xa̱ʼa̱ miíún. Ndakanixi̱ní xa̱ʼa̱ ña̱ ndo̱ʼo ta̱ Pablo. Tá kúma̱níka nduura cristiano ke̱ʼéra ña̱ va̱ása va̱ʼa soo nisaá xi̱xiniñúʼu chika̱a̱ra ndee̱ ña̱ nasamara ki̱ʼva ña̱ ni̱xi̱yora (Rom. 7:​24, 25; 1 Tim. 1:​12-14). Ka̱ndíxara ña̱ ni̱xi̱ʼi̱ ta̱ Jesús xa̱ʼa̱ra ta nda̱a̱ táki̱ʼva íyo iin regalo ña̱ ta̱xi Jehová ndaʼa̱ra saá ni̱xi̱yoña (kaʼvi Gálatas 2:20). Ndióxi̱ xi̱niñúʼura espíritu santora ña̱ va̱ʼa ka̱ʼyí ta̱ Pablo tu̱ʼun yóʼo saáchi kúni̱ra ña̱ ná kunda̱a̱-iniyó xa̱ʼa̱ ña̱yóʼo ña̱kán ta̱xira ña̱ ná kaʼyi̱ña (Rom. 15:4). Kúni̱ra ña̱ ná kandíxaún ña̱ xa̱ʼa̱ miíún ni̱xi̱ʼi̱ se̱ʼera. Tá saá ná keʼún saá kúú ña̱ kandíxakaún ña̱ kúni̱níra xínira miíún.

¹¹ Táxiníyó tíxa̱ʼvi ndaʼa̱ Jehová xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó. Soo su̱ví xa̱ʼa̱ ña̱yóʼo kuití níkixira nu̱ú ñuʼú saáchi ki̱xitura ña̱ va̱ʼa sanáʼa̱ra ña̱ nda̱a̱ xa̱ʼa̱ Ndióxi̱ ta saátu ña̱ kunda̱a̱-ini na̱ yiví ña̱ kúʼvi̱ní-inira xínirana ta ña̱yóʼo kúú ña̱ ka̱ʼa̱nyó xa̱ʼa̱ vitin (Juan 18:37).

TA̱ JESÚS SA̱NÁʼA̱RA ÑA̱ KÚNI̱NÍ JEHOVÁ XÍNIRA YÓʼÓ

12. ¿Nda̱chun kivi kandíxayó ña̱ ni̱ka̱ʼa̱n ta̱ Jesús xa̱ʼa̱ Jehová ña̱ nda̱a̱ kúúña?

¹² Tá ni̱xi̱yo ta̱ Jesús nu̱ú ñuʼú yóʼo xi̱kusi̱íní-inira sa̱náʼa̱ra na̱ yiví ndáa ki̱ʼva íyo Jehová (Luc. 10:22). Ta kivi kandíxayó ndiʼi ña̱ ni̱ka̱ʼa̱nra xa̱ʼa̱ yivára ña̱ nda̱a̱ kúúña. Iinlá ta̱ Jesús kúú ta̱ xíni̱va̱ʼa ndáa ki̱ʼva íyo Jehová saáchi ku̱a̱ʼání ku̱i̱ya̱ ni̱xi̱yora chí ndiví xíʼinra (Col. 1:15). Ki̱ʼinra kuenta ndáa ki̱ʼva kúʼvi̱-ini Jehová xínira na̱ se̱ʼera ni kúúna na̱ íyo chí ndiví á na̱ ndóo nu̱ú ñuʼú yóʼo. Ná kotoyó ndáa ki̱ʼva chindeé ña̱ sa̱náʼa̱ ta̱ Jesús miíyó ña̱ kandíxayó ña̱ kúʼvi̱ní-ini Jehová xínira miíyó.

13. ¿Ndáaña kúni̱ ta̱ Jesús ndakanixi̱níyó xa̱ʼa̱ Jehová?

¹³ Ta̱ Jesús kúni̱ra ña̱ ná keʼéyó táki̱ʼva kéʼé miíra ña̱ kandíxayó ña̱ kúni̱ní Jehová xínira miíyó. Nu̱ú ku̱mí ña̱ Evangelio ta̱ Jesús ni̱ka̱ʼa̱nra “Yivá” xíʼin Jehová yáʼaka 160 yichi̱. Tá xi̱ka̱ʼa̱nra xíʼin na̱ discípulora xi̱kachira: “Yivándó” xíʼin “Yivándó ta̱ íyo chí ndiví” (Mat. 5:16; 6:26). Tá kúma̱níka kixi ta̱ Jesús nu̱ú ñuʼú yóʼo, na̱ xi̱ndasakáʼnu Jehová tiempo xi̱naʼá xi̱ka̱ʼa̱nna xíʼinra “Ndióxi̱ ta̱ kúúmií ndiʼi ndee̱”, “Ndióxi̱ ta̱ káʼnuní” xíʼin “Ndióxi̱ ta̱ i̱xava̱ʼa ndiʼi ña̱ʼa”. Xa̱ʼa̱ ña̱ xi̱ka̱ʼa̱n ta̱ Jesús “Yivá” xíʼin Ndióxi̱, náʼa̱ña ña̱ viíníva kítáʼan Ndióxi̱ xíʼin na̱ ndásakáʼnu miíra. Ku̱a̱ʼá yichi̱ ni̱ka̱ʼa̱n ta̱ Jesús “Yivá” xíʼin Jehová. Ná ka̱ʼa̱nyó xa̱ʼa̱ u̱vi̱ ña̱yóʼo.

14. ¿Ndáa ki̱ʼva ni̱na̱ʼa̱ ta̱ Jesús ña̱ ndáyáʼviníyó nu̱ú Jehová? (Mateo 10:​29-31; koto na̱ʼná).

¹⁴ Ná kotoyó ña̱ ni̱ka̱ʼa̱n ta̱ Jesús ña̱ va̱xi nu̱ú Mateo 10:​29-31 (kaʼviña). Nu̱ú ña̱yóʼo ni̱ka̱ʼa̱nra, Jehová kíʼinra kuenta tá ndákava iin saa nu̱ú ñuʼú. Tá ndiʼi tiempo kíʼinra kuenta xíʼin tí saa ni va̱ása ndásakáʼnurí miíra, kachikaví miíyó na̱ ndásakáʼnu miíra ta kúʼvi̱-iniyó xíniyóra. Nu̱ú versículo 30 ta̱ Jesús ni̱ka̱ʼa̱nra: “Nda̱a̱ yixí xi̱níndó kúnda̱a̱ va̱ʼa inira nda̱saa kúú ña̱ íyo”. Ña̱kán tá xíni̱ Jehová nda̱saa kúú ña̱ íyo, kivi kandíxayó ña̱ ndíʼi̱ní-inira xa̱ʼa̱yó. Ta̱ Jesús kúni̱ra ña̱ ná kandíxayó ña̱ ndáyáʼviníyó nu̱ú yiváyó ta̱ íyo chí ndiví.

15. ¿Ndáaña sákuaʼún xíʼin ña̱ káʼa̱n Juan 6:44 xa̱ʼa̱ Jehová?

¹⁵ Nu̱ú Juan 6:44 (kaʼviña) ta̱ Jesús ni̱ka̱ʼa̱nra “Yivá”. Ña̱kán yiváún ta̱ íyo chí ndiví xi̱tora ña̱ va̱ʼa ndíka̱ níma̱ún xa̱ʼa̱ ña̱kán ka̱nara miíún (Hech. 13:48). Tá ni̱ka̱ʼa̱n ta̱ Jesús ña̱ va̱xi nu̱ú Juan 6:44 sananí ni̱ka̱ʼa̱nra xa̱ʼa̱ ña̱ ni̱ka̱ʼa̱n Jehová ña̱ va̱xi nu̱ú Jeremías 31:3. Jehová ni̱ka̱ʼa̱nra xíʼin na̱ ñuura “ka̱nai̱ yóʼó nu̱úi̱ chi ndixaní kúʼvi̱-inii̱ xínii̱ yóʼó” (Jer. 31:3 chitáʼanña xíʼin Oseas 11:4). Ndakanixi̱ní xa̱ʼa̱ ña̱yóʼo, yiváyó ta̱ íyo chi ndiví kúʼvi̱ní-inira xínira miíún ña̱yóʼo kúni̱ kachiña ña̱ xítora ndíʼi ña̱ va̱ʼa ña̱ kúúmiíún.

16. a) ¿Ndáaña sánáʼa̱ ta̱ Jesús miíyó ta nda̱chun kivi kandíxayóra? b) ¿Ndáaña chindeétáʼan xíʼinyó ña̱ kandíxayó Jehová kúú yivá ta̱ xíniñúʼuníkayó? (Koto recuadro ña̱ naní “Yiváyó ta̱ xíniñúʼuníkayó”).

¹⁶ Ña̱ ku̱ni kachi ta̱ Jesús kúú ña̱yóʼo: “Jehová su̱ví yivá kuitíi̱ kúúra chi saátu kúúra yivá miíún”. Saátu kivi kandíxaún ña̱ kúʼvi̱ní-inira xi̱nira yóʼó ta ndíʼi̱-inira xa̱ʼún. Ña̱kán tá íxayo̱ʼvi̱ña xíʼún kandíxaún ña̱ kúʼvi̱ní-ini Jehová xínira yóʼó, ndakaʼán xa̱ʼa̱ ña̱ ni̱ka̱ʼa̱n ta̱ Jesús ta kandíxa ña̱ ni̱ka̱ʼa̱nra saáchi ta̱yóʼo ndiʼi tiempo káʼa̱nra ña̱ nda̱a̱ ta xíniva̱ʼara ndáa ki̱ʼva íyo yivára (1 Ped. 2:22).

CHIKAA̱KA NDEE̱ ÑA̱ KANDÍXAÚN ÑA̱ KÚNI̱NÍ JEHOVÁ XÍNIRA MIÍÚN

17. ¿Nda̱chun xíniñúʼu kandíxayó ña̱ kúni̱níva Jehová xínira miíyó?

¹⁷ Nda̱a̱ táki̱ʼva xa̱a̱ ku̱ndaa̱-iniyó ta̱ Ndi̱va̱ʼa ndiʼi tiempo kúni̱ra sandáʼvira miíyó ña̱ va̱ʼa sandákooyó kachíñuyó nu̱ú Jehová. Iin prueba ña̱ xíniñúʼura kúú ña̱ ná ndakanixi̱níyó ña̱ va̱ása kúni̱ví Jehová xínira miíyó, kǒo taxiún ña̱ sandáʼvira miíún (Job 27:5). Ña̱kán ná chika̱a̱níyó ndee̱ ña̱ kandíxakayó ña̱ kúni̱níva Jehová xínira miíyó.

18. ¿Ndáaña chíndeétáʼan xíʼún ña̱ kandíxaún ña̱ kúʼvi̱-ini Jehová xínira yóʼó?

¹⁸ Nu̱ú artículo yóʼo sa̱kúaʼayó, ña̱ kivi chindeétáʼan xíʼinyó ña̱ kandíxayó ña̱ kúʼvi̱ní-ini Jehová xínira miíyó. Tá kúú kivi ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ kandíxayó ña̱ kúʼvi̱-inira xínira miíyó, ta ndakanixi̱níyó xa̱ʼa̱ texto ña̱ náʼa̱ ña̱ kúʼvi̱ní-inira xínira na̱ ndásakáʼnu miíra. Saátu xíniñúʼu ndakaʼányó ña̱ kúʼvi̱níva-ini Jehová xínira na̱ kúʼvi̱-ini xíni miíra, ta kǒo xíniñúʼu nandósoyó ña̱ iin regalo ña̱ va̱ʼaní ta̱xi Jehová ndaʼa̱yó kúú ña̱ ni̱xi̱ʼi̱ ta̱ Jesús xa̱ʼa̱yó ta ná ndakaʼányó ña̱ ni̱ka̱ʼa̱n ta̱ Jesús, Jehová kúú yiváyó. Ña̱kán tá iinna ndáka̱tu̱ʼúnna yóʼó: “¿Á kándíxaún ña̱ kúʼvi̱-ini Jehová xínira yóʼó?” Saá kivi ndakuiún: “Kándíxavai̱ ña̱ kúʼvi̱-inira xínira yi̱ʼi̱ ta saátu chíkaa̱níi̱ ndee̱ ña̱ na̱ʼi̱ ña̱ kúʼvi̱-inii̱ xíni̱ra”.