¿Ndáaña va̱ʼa ndákiʼinyó xa̱ʼa̱ ña̱ kúʼvi̱-ini Jehová xínira miíyó?

1. ¿Ndáa ki̱ʼva kivi sakúsi̱íyó-ini Jehová?

NÁ NDAKANIXI̱NÍYÓ ña̱ sa̱níʼi̱yó iin ña̱ʼa ña̱ liviní iin na̱ yiví ta va̱ʼaní chindeétáʼanña xíʼinna. Sana kusuchíníva-iniyó tá na̱ yiví kán ná kiʼinna ña̱ ta̱xiyó ndaʼa̱na ta chikaa̱va̱ʼanaña ta nandóso-inina xa̱ʼa̱ña. Soo kusi̱íníva-iniyó tá ná taxina tíxa̱ʼvi ndaʼa̱yó xa̱ʼa̱ña ta kuniñúʼunaña. ¿Ndáaña sákuaʼayó xíʼin ejemplo yóʼo? Ki̱ʼva saá íyo ña̱ ke̱ʼé Jehová tá ta̱xira se̱ʼera ta̱ Jesús ña̱ ni̱xi̱ʼi̱ra xa̱ʼa̱yó, ña̱kán kúsi̱íníva-inira tá táxiyó tíxa̱ʼvi ndaʼa̱ra xa̱ʼa̱ ña̱ ke̱ʼéra xa̱ʼa̱yó ta saátu xa̱ʼa̱ ña̱ ni̱na̱ʼa̱ra ña̱ kúʼvi̱ní-inira xínira miíyó (Juan 3:16; Rom. 5:​7, 8).

2. ¿Ndáaña sakúaʼayó nu̱ú artículo yóʼo?

² Tá yáʼa tiempo, kivi kixáʼayó nandóso-iniyó taxiyó tíxa̱ʼvi ndaʼa̱ Ndióxi̱ xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Tá saá ná keʼéyó, tá ki̱ʼva íyo ña̱ kiʼinyó regalo ña̱ ta̱xi Jehová ndaʼa̱yó ta chikaa̱va̱ʼayóña saá kooña ta nandóso-iniyó xa̱ʼa̱ña. Soo ña̱ va̱ʼa kǒo nandóso-iniyó taxiyó tíxa̱ʼvi ndaʼa̱ Jehová xa̱ʼa̱ ña̱ ke̱ʼéra xa̱ʼa̱yó, ndiʼi ki̱vi̱ xíniñúʼu ndakanixi̱níyó xa̱ʼa̱ ña̱ ke̱ʼéra ta saátu xa̱ʼa̱ ña̱ ke̱ʼé ta̱ Jesús xa̱ʼa̱yó. Ta ña̱ artículo yóʼo chindeétáʼan xíʼinyó ña̱ keʼéyó ña̱yóʼo ta saátu sakúaʼayó ndáaña va̱ʼa ndákiʼinyó vitin xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó ta ndáaña va̱ʼa kúú ña̱ ndakiʼinyó chí nu̱únínu. Saátu sakúaʼayó ndáa ki̱ʼva na̱ʼa̱yó ña̱ táxiníyó tíxa̱ʼvi ndaʼa̱ Jehová xa̱ʼa̱ ña̱ náʼa̱ra ña̱ kúʼvi̱ní-inira xínira miíyó ta ndáyáʼviní keʼéyó ña̱yóʼo yo̱o̱ ña̱ xíyo Conmemoración.

¿NDÁAÑA VA̱ʼA NDÁKIʼINYÓ TIEMPO VITIN?

3. ¿Ndáaña va̱ʼa xa̱a̱ ndákiʼinyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó?

³ Xa̱a̱ ku̱a̱ʼáníva ña̱ va̱ʼa ndákiʼinyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Tá kúú, va̱ʼa íxakáʼnu-ini Jehová xa̱ʼa̱ ku̱a̱chiyó ta kǒo na̱ íxandúxa xíʼinra ña̱ keʼéra ña̱yóʼo, saáchi xíʼin ndinuʼu-inira íxakáʼnu-inira xa̱ʼa̱yó. Nu̱ú iin yaa ni̱ka̱ʼa̱n ta̱ David ña̱yóʼo xíʼin Jehová: “Miíún Jehová va̱ʼaní-iniún ta íyo tu̱ʼvaún ña̱ koo káʼnu-iniún xa̱ʼa̱ na̱ yiví” (Sal. 86:5; 103:​3, 10-13).

4. ¿Ndáana ni̱xi̱ʼi̱ ta̱ Jesús xa̱ʼa̱? (Lucas 5:32; 1 Timoteo 1:15).

⁴ Íyo sava na̱ ndákanixi̱ní ña̱ va̱ása xíniñúʼu ixakáʼnu-ini Jehová xa̱ʼa̱na, ta mií ña̱ nda̱a̱ va̱ása xíniñúʼu ixakáʼnuví-inira xa̱ʼa̱yó. Ta̱ apóstol Pablo ni̱ka̱ʼa̱nra ña̱yóʼo: “Va̱ása xíniñúʼu ka̱ʼa̱nna apóstol xíʼi̱n”. Soo tándi̱ʼi ni̱ka̱ʼa̱ntura ña̱yóʼo: “Xa̱ʼa̱ ña̱ va̱ʼa-ini Ndióxi̱ xíʼi̱n kúi̱ iin apóstol” (1 Cor. 15:​9, 10). Ña̱kán tá ndándikó-iniyó xa̱ʼa̱ ku̱a̱chiyó, íxakáʼnuva-ini Jehová xa̱ʼa̱yó. ¿Nda̱chun? Ni va̱ása xíniñúʼuví ixakáʼnu-ini Jehová xa̱ʼa̱yó, soo kéʼévaraña xa̱ʼa̱ ña̱ kúʼvi̱-inira xínira miíyó. Xa̱ʼa̱ ña̱kán tá sava yichi̱ ndákanixi̱níyó ña̱ va̱ása xíniñúʼuví ixakáʼnu-ini Jehová xa̱ʼa̱yó, ná ndakaʼányó chi Jehová va̱ása nítaxira se̱ʼera ña̱ kuvira xa̱ʼa̱ na̱ yiví na̱ kǒo ku̱a̱chi chi ni̱xi̱ʼi̱ra xa̱ʼa̱ na̱ yiví na̱ kúúmií ku̱a̱chi ta ndándikó-inina xa̱ʼa̱ña (kaʼvi Lucas 5:32; 1 Timoteo 1:15).

5. ¿Ndáaña va̱ása xíniñúʼu ndakanixi̱níyó xa̱ʼa̱ ta nda̱chun?

⁵ Nda̱a̱ ni iin yichi̱ va̱ása xíniñúʼu ndakanixi̱níyó ña̱ xíniñúʼu ixakáʼnu-ini Jehová xa̱ʼa̱yó saáchi xa̱a̱ ku̱a̱ʼání ku̱i̱ya̱ káchíñuyó nu̱úra. Mií ña̱ nda̱a̱ chíndayáʼvinívara ña̱ kéʼéyó xa̱ʼa̱ra (Heb. 6:10). Va̱ása nítaxi Jehová se̱ʼera ña̱ kuvira xa̱ʼa̱yó ña̱ va̱ʼa ndacháʼvira miíyó xa̱ʼa̱ chiñu ña̱ kéʼéyó nu̱úra, chi iin regalo ña̱ ta̱xira ndaʼa̱vayó kúú ña̱yóʼo. Ña̱kán va̱ása xíniñúʼu ndakanixi̱níyó ña̱ xíniñúʼu ixakáʼnu-ini Jehová xa̱ʼa̱yó, saáchi xa̱a̱ ku̱a̱ʼání ña̱ʼa kéʼéyó xa̱ʼa̱ra. Chi tá saá ná ndakanixi̱níyó, kúni̱ kachiña ña̱ va̱ása níxiniñúʼuví kuvi ta̱ Jesús xa̱ʼa̱yó (kivitu kaʼviún ña̱ káʼa̱n Gálatas 2:21).

6. ¿Nda̱chun chi̱kaa̱ní ta̱ Pablo ndee̱ ña̱ ka̱chíñura nu̱ú Jehová?

⁶ Ta̱ Pablo xi̱kunda̱a̱-inira ña̱ ni ku̱a̱ʼáníva ña̱ ná keʼéra nu̱ú Jehová, va̱ása xíniñúʼuví ixakáʼnu-inira xa̱ʼa̱ra. Tá saá, ¿nda̱chun chi̱kaa̱níra ndee̱ ña̱ ka̱chíñura nu̱ú Jehová? Saáchi xi̱kuni̱ra na̱ʼa̱ra ña̱ táxiníra tíxa̱ʼvi ndaʼa̱ Jehová xa̱ʼa̱ ña̱ va̱ʼaní-inira xíʼinra (Efes. 3:7). Ta saátu miíyó kúsi̱íní-iniyó káchíñuyó nu̱ú Jehová ta su̱ví xa̱ʼa̱ ña̱ kúni̱ kuitíyó ná ixakáʼnu-inira xa̱ʼa̱ ku̱a̱chiyó kúúña, saáchi kéʼéyóña xa̱ʼa̱ ña̱ kúni̱yó na̱ʼa̱yó ña̱ táxiyó tíxa̱ʼvi ndaʼa̱ra xa̱ʼa̱ ña̱ kéʼéra xa̱ʼa̱yó.

7. ¿Ndáa inka ña̱ va̱ʼa ndákiʼinyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó? (Romanos 5:1; Santiago 2:23).

⁷ Inka ña̱ va̱ʼa ña̱ ndákiʼinyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó kúú ña̱ va̱ʼa xáa̱yó kítáʼanyó xíʼin Jehová.a Nda̱a̱ táki̱ʼva sa̱kúaʼayó nu̱ú artículo ña̱ ni̱ya̱ʼa, tá kákuyó va̱ása ndi̱ku̱nví kítáʼanyó xíʼin Ndióxi̱. Soo xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó kivi kutáʼanyó xíʼin Ndióxi̱ ta kuyatinyó nu̱úra (kaʼvi Romanos 5:1; Santiago 2:23).

8. ¿Nda̱chun xíniñúʼu taxiyó tíxa̱ʼvi ndaʼa̱ Jehová xa̱ʼa̱ ña̱ táxira ña̱ káʼa̱nyó xíʼinra?

⁸ Ná ndakanixi̱níyó xa̱ʼa̱ iin ña̱ va̱ʼa ña̱ ndákiʼinyó xa̱ʼa̱ ña̱ kítáʼanyó xíʼin Jehová: ña̱yóʼo kúú ña̱ va̱ʼa káʼa̱nyó xíʼinra. Su̱ví nda̱saa oración ña̱ kéʼéna ti̱xin reunión xíniso̱ʼora chi saátu xíniso̱ʼora oración ña̱ kéʼé iin tá iinyó nu̱úra. Ña̱ nda̱a̱ kúúña, va̱ʼaní ndíko-iniyó tá káʼa̱nyó xíʼin Jehová soo ña̱ ndáyáʼviníka kúú ña̱ chíndeétáʼanña xíʼinyó ña̱ va̱ʼaníka kutáʼanyó xíʼin Ndióxi̱ (Sal. 65:2; Sant. 4:8; 1 Juan 5:14). Tá ni̱xi̱yo ta̱ Jesús nu̱ú ñuʼú yóʼo xi̱kaʼa̱n ni̱ʼira xíʼin Jehová saáchi xi̱kunda̱a̱-inira ña̱ xi̱xiniso̱ʼovara ña̱ xi̱kaʼa̱nra xíʼinra. Ta saátu xi̱kunda̱a̱-inira ña̱ saá kúú ña̱ viíka kutáʼanra xíʼin yivára (Luc.5:16). Táxiníyó tíxa̱ʼvi ndaʼa̱ Jehová xa̱ʼa̱ ña̱ ta̱xira se̱ʼera ña̱ ni̱xi̱ʼi̱ra xa̱ʼa̱yó saáchi saá kúú ña̱ kivi xa̱a̱yó kutáʼanyó xíʼinra ta saátu kivi ka̱ʼa̱nyó xíʼinra.

¿NDÁAÑA VA̱ʼA NDAKIʼINYÓ CHÍ NU̱ÚNÍNU?

9. ¿Ndáaña va̱ʼa ndakiʼinyó chí nu̱únínu xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó?

⁹ ¿Ndáaña va̱ʼa ndakiʼin miíyó na̱ ndásakáʼnu Ndióxi̱ chí nu̱únínu xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó? Jehová taxira ña̱ kutakuyó ndiʼi tiempo. Ku̱a̱ʼání na̱ yiví ndákanixi̱nína ña̱ va̱ása kiviví kutakuyó ndiʼi tiempo saáchi xa̱a̱ ku̱a̱ʼání ku̱i̱ya̱ kúú ña̱ xíʼi̱ na̱ yiví. Soo Jehová i̱xava̱ʼara na̱ yiví ña̱ va̱ʼa kutakuna ndiʼi tiempo. Ña̱kán ni savana ndákanixi̱nína ña̱ va̱ása kivi kutakuyó ndiʼi tiempo, soo kiviva xi̱nu ña̱yóʼo xa̱ʼa̱ ña̱ ta̱xi Jehová se̱ʼera ña̱ ni̱xi̱ʼi̱ra xa̱ʼa̱yó (Rom. 8:32).

10. ¿Ndáaña ndátu na̱ ku̱ʼu̱n chí ndiví ndakiʼinna ta saátu miíyó na̱ kundoo nu̱ú ñuʼú yóʼo?

¹⁰ Ni chí nu̱únínuví kúú ña̱ ndakiʼinyó ña̱ kutakuyó ndiʼi tiempo, soo Jehová kúni̱ra ña̱ ná ndakanixi̱níyó xa̱ʼa̱ ña̱yóʼo tiempo vitin. Na̱ nda̱kaxin Ndióxi̱ xa̱a̱ kúni̱nína ku̱ʼu̱nna koona chí ndiví ta kaʼndachíñuna nu̱ú ñuʼú yóʼo xíʼin ta̱ Jesús (Apoc. 20:6). Ta miíyó na̱ kundoo nu̱ú ñuʼú yóʼo xa̱a̱ kúni̱níyó kooyó nu̱ú ñuyǐví xa̱á nu̱ú va̱ása xo̱ʼvi̱kayó (Apoc. 21:​3, 4). ¿Á ndátún koún ndiʼi tiempo nu̱ú ñuʼú yóʼo? Ná va̱ása ndakanixi̱níyó ña̱ loʼoka ndáyáʼvi ña̱ ndakiʼin miíyó nu̱ú ña̱ ndakiʼin na̱ ku̱ʼu̱n chí ndiví. Saáchi Jehová i̱xava̱ʼara miíyó ña̱ kutakuyó ndiʼi tiempo nu̱ú ñuʼú yóʼo, ta ña̱yóʼo kúú ña̱ sákusi̱íní-iniyó.

11, 12. ¿Ndáaña va̱ʼa ndátuyó ndakiʼinyó nu̱ú ñuyǐví xa̱á? (Koto na̱ʼná).

¹¹ Ndakanixi̱ní ndáa ki̱ʼva koún nu̱ú ñuyǐví xa̱á. Va̱ása kundi̱ʼika-iniún xa̱ʼa̱ ña̱ kiʼún kue̱ʼe̱ á xa̱ʼa̱ ña̱ kuviún (Is. 25:8; 33:24). Jehová taxira ndiʼi ña̱ va̱ʼa ña̱ kúni̱ún ndaʼún. ¿Ndáaña kúni̱ún sakúaʼún keʼún? ¿Á kúni̱ún sakúaʼún xa̱ʼa̱ kití válí? ¿Á kúni̱ún sakúaʼún kataún yaa? ¿Á kúni̱ún sakúaʼún sanánaún dibujo? Nu̱ú ñuyǐví xa̱á kuniñúʼuyó na̱ yiví na̱ xíni̱ keʼé veʼe, na̱ xíni̱ chiʼi, na̱ xíni̱ keʼé comida, na̱ xíni̱ kachíñu xíʼin planta, na̱ xíni̱ keʼé ndaʼáchíñu á na̱ xíni̱ keʼé inkaka chiñu (Is. 35:1; 65:21). Tá ná kutakún ndiʼi tiempo saá kúú ña̱ kivi sakúaʼún keʼún ndiʼi ña̱yóʼo.

¹² Tá ná ndataku na̱ ni̱xi̱ʼi̱, kusi̱íní-iniyó ndakiʼinyóna (Hech. 24:15). Saátu kusi̱íní-iniyó ndakundeéyó sakúaʼayó xa̱ʼa̱ Jehová, ta saátu ndakundeéyó sakúaʼayó xa̱ʼa̱ ña̱ i̱xava̱ʼara (Sal. 104:24; Is. 11:9). Ta inka ña̱ va̱ʼaníka ndakiʼinyó kúú ña̱ kǒo keʼékayó nda̱a̱ ni iin ña̱ va̱ása va̱ʼa, ña̱kán kivi ndasakáʼnuyó Jehová ta va̱ása kundi̱ʼi-iniyó xa̱ʼa̱ ña̱yóʼo. Nu̱úka ña̱ keʼéyó ña̱ sákusi̱í-iniyó loʼo kuití tiempo ta ki̱ʼviyó ku̱a̱chi, va̱ʼaka ná chikaa̱yó ndee̱ ña̱ ndakiʼinyó ndiʼi ña̱ va̱ʼa yóʼo chí nu̱únínu (Heb. 11:25). Va̱ʼaníka ña̱ ndakiʼinyó chí nu̱únínu nu̱ú ña̱ kivi taxi ñuyǐví yóʼo ndaʼa̱yó tiempo vitin. Ná ndakaʼányó chi kixaa̱ iin ki̱vi̱ ña̱ va̱ása kundatukayó ndakiʼinyó ña̱ va̱ʼa yóʼo, saáchi xa̱a̱ xi̱nuvaña tiempo saá. Ta kivi ndakiʼinyó ndiʼi ña̱yóʼo saáchi Jehová kúú ta̱ ni̱kuʼvi̱ní-ini xi̱ni miíyó ña̱kán ta̱xira se̱ʼera ni̱xi̱ʼi̱ra xa̱ʼa̱yó.

NÁ NA̱ʼA̱YÓ ÑA̱ TÁXINÍYÓ TÍXA̱ʼVI NDAʼA̱ JEHOVÁ XA̱ʼA̱ ÑA̱ KÚʼVI̱-INIRA XÍNIRA MIÍYÓ

13. ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ náʼa̱ra ña̱ kúʼvi̱-inira xínira miíyó? (2 Corintios 6:1).

¹³ ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó? Kivi na̱ʼa̱yó ña̱yóʼo tá ná kundi̱ʼi̱ka-iniyó xa̱ʼa̱ ña̱ kachíñuyó nu̱úra (Mat. 6:33). Ta ná ndakaʼányó chi ta̱ Jesús “ni̱xi̱ʼi̱ra xa̱ʼa̱ ndiʼina ña̱ va̱ʼa ná kǒo kutakukana xa̱ʼa̱ miína, va̱ʼaka ná kutakuna xa̱ʼa̱ ta̱ ni̱xi̱ʼi̱ xa̱ʼa̱na ta nda̱takura” (2 Cor. 5:15). Va̱ʼaní-ini Jehová xíʼinyó ta íxakáʼnu-inira xa̱ʼa̱yó, ña̱kán tá ná chikaa̱yó ndee̱ ña̱ kachíñuyó nu̱úra saá kúú ña̱ na̱ʼa̱yó ña̱ chíndayáʼviyó ndiʼi ña̱ xa̱a̱ kéʼéra xa̱ʼa̱yó ta saátu ña̱ táxiyó tíxa̱ʼvi ndaʼa̱ra (kaʼvi 2 Corintios 6:1).

14. ¿Ndáa ki̱ʼva kivi na̱ʼa̱yó ña̱ kándíxayó ña̱ káʼa̱n Jehová xíʼinyó?

¹⁴ Inka ki̱ʼva ña̱ na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ kúʼvi̱ní-inira xínira miíyó kúú ña̱ kandíxayóra ta kundiku̱nyó ña̱ káʼa̱nra. ¿Ndáa ki̱ʼva keʼéyó ña̱yóʼo? Tá kúú, tá xíniñúʼu ndaka̱xinyó á kaʼvi va̱ʼayó á ndáa chiñu kachíñuyó, xíniñúʼu ndakanixi̱níyó xa̱ʼa̱ ña̱ kúni̱ Jehová ná keʼéyó (1 Cor. 10:31; 2 Cor. 5:7). Tá náʼa̱yó ña̱ kándíxayó Jehová xíʼin ña̱ kéʼéyó saá kúú ña̱ xa̱a̱yó kandíxaníkayóra ta va̱ʼaníka kutáʼanyó xíʼinra. Ta saátu va̱ása kaka-iniyó ña̱ ndixa xi̱nuva ña̱ ndátuyó ndakiʼinyó chí nu̱únínu (Rom. 5:​3-5; Sant. 2:​21, 22).

15. ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi ndaʼa̱ Jehová tá ná koo ña̱ Conmemoración?

¹⁵ Tá xíyo Conmemoración ná chikaa̱yó ndee̱ ña̱ kanayó ku̱a̱ʼáka na̱ yiví, tasaá na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó, ta saátu ná chikaa̱yó ndee̱ ña̱ ku̱ʼu̱nyó ki̱vi̱ kán (1 Tim. 2:4). Tá ná kanayó na̱ yiví ña̱ ku̱ʼu̱nna xíʼinyó, ná ka̱ʼa̱nyó xíʼinna ndáa ki̱ʼva xíyo reunión ña̱ ndáyáʼviní yóʼo. Ta kivi na̱ʼa̱yó video ña̱ va̱xi nu̱ú jw.org nu̱úna, ña̱ naní ¿Nda̱chun ni̱xi̱ʼi̱ ta̱ Jesús? ta saátu ña̱ naní Ná ndakaʼányó xa̱ʼa̱ ña̱ ni̱xi̱ʼi̱ ta̱ Jesús. Ta na̱ anciano kúú na̱ kana na̱ ku̱xíká nu̱ú Jehová. Tá ná ndikó iin na̱ ku̱xíká nu̱ú Jehová ti̱xin ñuura, kusi̱íníva-ini na̱ ndóo chí ndiví ta saátu miíyó na̱ ndóo nu̱ú ñuʼú yóʼo (Luc. 15:​4-7). Tá xa̱a̱ ná koo ña̱ Conmemoración ná chikaa̱yó ndee̱ ña̱ va̱ása chindeé kuitíyó na̱ xa̱a̱ xíni̱yó chi saátu ná chindeéyó na̱ xa̱á xíʼin na̱ xa̱a̱ ku̱a̱ʼání tiempo ta̱ʼán ku̱ʼu̱n. Ná chikaa̱yó ndee̱ ña̱ viíní ndakiʼinyó na̱yóʼo (Rom. 12:13).

16. ¿Nda̱chun kivi chikaa̱kayó ndee̱ ña̱ keʼéyó ku̱a̱ʼáka chiñu nu̱ú Jehová tá ná koo ña̱ Conmemoración?

¹⁶ ¿Á kivi chikaa̱yó ndee̱ ña̱ ku̱a̱ʼáka chiñu keʼéyó nu̱ú Jehová tá ná koo ña̱ Conmemoración? Tá ná keʼéyó ña̱yóʼo saá kúú ña̱ na̱ʼa̱yó ña̱ táxiyó tíxa̱ʼvi ndaʼa̱ Jehová xíʼin ta̱ Jesús xa̱ʼa̱ ña̱ ke̱ʼéna xa̱ʼa̱yó. Tá ku̱a̱ʼáka tiempo ná keeyó natúʼunyó xa̱ʼa̱ Ndióxi̱ saá kúú ña̱ kiʼinkayó kuenta ndáa ki̱ʼva chíndeétáʼan Jehová xíʼinyó tasaá xa̱a̱yó kandíxaníkayóra (1 Cor. 3:9). Ta saátu ná ndakaʼányó kaʼviyó texto ña̱ xíniñúʼu kaʼviyó semana ña̱ xíyo Conmemoración, ña̱yóʼo va̱xiña nu̱ú folleto ña̱ naní Ndiʼi ki̱vi̱ ná kaʼviyó tu̱ʼun Ndióxi̱ ta saátu ka̱naña nu̱ú Tutu nu̱ú va̱xi ña̱ keʼéyó reunión. Ta kivi nandukúkayó xa̱ʼa̱ ña̱yóʼo tá káʼvi mitúʼunyó.

17. ¿Ndáa xa̱ʼa̱ kúú ña̱ kúsi̱íní-ini Jehová xíʼinyó? (Koto recuadro “Ki̱ʼva ña̱ kivi taxiyó tíxa̱ʼvi ndaʼa̱ Jehová”).

¹⁷ Soo tá va̱ása kívi keʼún ndiʼi ña̱ sa̱kúaʼayó nu̱ú artículo yóʼo, va̱ása kundi̱ʼi-iniún. Ndakaʼán chi va̱ása chítáʼan Jehová ña̱ kéʼún xíʼin ña̱ kéʼé inkana. Chi ña̱ xíto ta̱kán kúú ña̱ ndíkaa̱ níma̱ún, ta kúsi̱íní-inira xíʼún saáchi kúnda̱a̱-inira ña̱ táxiníún tíxa̱ʼvi ndaʼa̱ra xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼún (1 Sam. 16:7; Mar. 12:​41-44).

18. ¿Nda̱chun táxiníyó tíxa̱ʼvi ndaʼa̱ Jehová ta saátu ta̱ Jesús?

¹⁸ Tíxa̱ʼvi ña̱ ni̱xi̱ʼi̱ ta̱ Jesús xa̱ʼa̱yó va̱ʼa íxakáʼnu-ini Jehová xa̱ʼa̱ ku̱a̱chiyó, saátu kivi kooyó migora ta kivi kutakuyó ndiʼi tiempo. Ndiʼi tiempo ná na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ kúʼvi̱-inira xínira miíyó chi xa̱ʼa̱ ña̱yóʼo kúú ña̱ ta̱xira ku̱a̱ʼání ña̱ va̱ʼa ndaʼa̱yó (1 Juan 4:19). Ta saátu ná na̱ʼa̱yó ña̱ táxiníyó tíxa̱ʼvi ndaʼa̱ ta̱ Jesús xa̱ʼa̱ ña̱ ni̱kuʼvi̱ní-inira xi̱nira miíyó ta ni̱xi̱ʼi̱ra xa̱ʼa̱yó (Juan 15:13).