¿Ndáa ki̱ʼva sáka̱ku ña̱ ni̱xi̱ʼi̱ ta̱ Jesús miíyó?

Ta̱ Adán xíʼin ñá Eva va̱ása níxiniso̱ʼona Ndióxi̱. Xa̱ʼa̱ ña̱kán kíʼviyó ku̱a̱chi, xóʼvi̱yó ta xíʼi̱yó.a Soo su̱ví ndiʼi tiempo kundika̱a̱yó ndaʼa̱ ku̱a̱chi. Jehová ta̱xira se̱ʼera ta̱ Jesucristo ña̱ va̱ʼa sakǎkura miíyó ndaʼa̱ ku̱a̱chi ta saátu nu̱ú ña̱ xíʼi̱yó. Ña̱ Biblia sánáʼa̱ña, ta̱ Jesús ni̱xi̱ʼi̱ra xa̱ʼa̱yó ña̱ va̱ʼa ka̱kuyó. Ta ña̱ cha̱ʼvi ta̱ Jesús xa̱ʼa̱yó kúú ña̱ ni̱xi̱ʼi̱ra ni kǒo ku̱a̱chi níxi̱kuumiíra (kaʼvi Mateo 20:​28). Xa̱ʼa̱ ña̱ va̱ása níxikuumií ta̱ Jesús ku̱a̱chi ta ndiʼi tiempo xi̱kandíxara ña̱ xi̱ka̱ʼa̱n Jehová sana kivi kutakura ndiʼi tiempo nu̱ú ñuʼú yóʼo. Xa̱ʼa̱ ña̱ ni̱xi̱ʼi̱ra xa̱ʼa̱yó kivi ndakiʼinyó ña̱ sa̱ndáñúʼu ta̱ Adán xíʼin ñá Eva. Tasaá ni̱na̱ʼa̱ra nda̱saa kúni̱ Jehová xíni̱ra miíyó ta saátu mií ta̱ Jesús. Ña̱ lección yóʼo chindeétáʼanña xíʼún ña̱ kuni̱kaún taxiún tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús.

1. ¿Ndáa ki̱ʼva chíndeétáʼan ña̱ ni̱xi̱ʼi̱ ta̱ Jesús xíʼinyó tiempo vitin?

Xa̱ʼa̱ ña̱ kúúyó na̱ yiví ku̱a̱chi kéʼéyó ku̱a̱ʼání ña̱’a ña̱ va̱ása kútóo Jehová, soo kiviva xa̱a̱yó kooyó migo Ndióxi̱ tá ndixa ná ndandikó-iniyó xa̱ʼa̱ ku̱a̱chiyó ta ná ndukúyó nu̱ú Jehová xa̱ʼa̱ kivi ta̱ Jesús, ña̱ ná ixakáʼnu-inira xa̱ʼa̱ ku̱a̱chiyó. Ta saátu tá chíka̱a̱yó ndee̱ ña̱ va̱ása ndikóyó keʼéyó ña̱ va̱ása va̱ʼa (1 Juan 2:1). Ña̱ Biblia káchiña: “Ta̱ Cristo iin kuití yichi̱ ni̱xi̱ʼi̱ra xa̱ʼa̱ ku̱a̱chiyó ta va̱ása ndikókara keʼéra ña̱yóʼo, iin ta̱ nda̱kú-ini ni̱xi̱ʼi̱ra xa̱ʼa̱ na̱ va̱ása nda̱kú-ini, ña̱ va̱ʼa ku̱ʼu̱nndó xíʼinra nu̱ú Ndióxi̱” (1 Pedro 3:18).

2. Ña̱ ni̱xi̱ʼi̱ ta̱ Jesús, ¿ndáa ki̱ʼva chindeétáʼanña xíʼinyó chí nu̱únínu?

Jehová chi̱ndaʼára se̱ʼera ta̱ kǒo ku̱a̱chi kúúmií ña̱ va̱ʼa taxira ña̱ tákura xa̱ʼa̱yó “ña̱ va̱ʼa ndiʼi na̱ kándíxa miíra [ta̱ Jesús] kǒo ndiʼi-xa̱ʼa̱na chi kutakuna ndiʼi tiempo” (Juan 3:​16). Tíxa̱ʼvi ña̱ ke̱ʼé ta̱ Jesús, Jehová si̱lóʼoní kúma̱ní ta sandíʼi-xa̱ʼa̱ra ndiʼi ña̱ va̱ása va̱ʼa ña̱ kúu, xa̱ʼa̱ ña̱ kǒo níxiniso̱ʼo ta̱ Adán. Ña̱yóʼo kúni̱ kachiña tá ná na̱ʼa̱yó ña̱ kándíxayó ña̱ ni̱xi̱ʼi̱ ta̱ Jesús xa̱ʼa̱yó, kivi kusi̱í-iniyó kutakuyó ndiʼi tiempo nu̱ú ñuʼú yóʼo tá ná nduliviña (Isaías 65:​21-​23).

NÁ SAKUAʼAKAYÓ XA̱ʼA̱ÑA

3. Ña̱ ni̱xi̱ʼi̱ ta̱ Jesús sa̱kǎkura miíyó ndaʼa̱ ku̱a̱chi ta saátu nu̱ú ña̱ xíʼi̱yó

VIDEO: ¿Nda̱chun ni̱xi̱ʼi̱ ta̱ Jesús? (táʼví 1) (2:​01)

• ¿Ndáaña va̱ʼa sa̱ndáñúʼu ta̱ Adán tá kǒo níxiniso̱ʼokara Ndióxi̱?

Kaʼvindó Romanos 5:​12 ta ka̱ʼa̱nndó xa̱ʼa̱ ña̱yóʼo:

• ¿Ndáaña ndóʼún xa̱ʼa̱ ña̱ ni̱ki̱ʼvi ta̱ Adán ku̱a̱chi?

Kaʼvindó Juan 3:​16 ta ka̱ʼa̱nndó xa̱ʼa̱ ña̱yóʼo:

• ¿Nda̱chun chi̱ndaʼá Jehová se̱ʼera nu̱ú ñuʼú yóʼo?

1. Ta̱ Adán xi̱kuura iin ta̱a ta̱ va̱ása níxi̱kuumií ku̱a̱chi, soo tá kǒo níxiniso̱ʼokara Ndióxi̱, ndiʼi na̱ yiví ni̱ki̱ʼvina ku̱a̱chi tasaá ki̱xáʼa xíʼi̱na.

2. Ta̱ Jesús iin ta̱a ta̱ va̱ása níxi̱kuumií ku̱a̱chi xi̱kuura, ta xa̱ʼa̱ ña̱ xi̱niso̱ʼora Ndióxi̱ xu̱nára yichi̱ ña̱ va̱ʼa va̱ása kuumiíka na̱ yiví ku̱a̱chi ta saátu ña̱ kutakuna ndiʼi tiempo.

4. Xa̱ʼa̱ ña̱ ni̱xi̱ʼi̱ ta̱ Jesús ndiʼi na̱ yiví kivi ndakiʼin ña̱ va̱ʼa

VIDEO: ¿Nda̱chun ni̱xi̱ʼi̱ ta̱ Jesús? (táʼví 2) (2:​00)

• ¿Nda̱chun kivi ka̱ku ndiʼi na̱ yiví xa̱ʼa̱ ña̱ ni̱xi̱ʼi̱ iinlá kuití ta̱a?

Kaʼvindó 1 Timoteo 2:​5, 6 ta ka̱ʼa̱nndó xa̱ʼa̱ ña̱yóʼo:

• Ta̱ Adán va̱ása níxi̱kuumiíra ku̱a̱chi, soo tá ni̱ki̱ʼvira ku̱a̱chi ndiʼi na̱ yiví ni̱ki̱ʼvi ku̱a̱chi ta xa̱ʼa̱ ña̱kán xíʼi̱na. Saátu ta̱ Jesús kǒo ku̱a̱chi níxi̱kuumiíra. Soo, ¿ndáaña ke̱ʼéra ña̱ va̱ʼa cha̱ʼvira xa̱ʼa̱ ku̱a̱chiyó xíʼin ña̱ xíʼi̱yó?

5. Ña̱ sa̱kǎku ta̱ Jesús miíyó iin regalo ña̱ táxi Jehová ndaʼún kúúña

Na̱ kúú migo Jehová xítona ña̱ sa̱kǎku ta̱ Jesús miíyó nda̱a̱ táki̱ʼva íyo iin regalo ña̱ ta̱xira ndaʼa̱na. Ña̱ va̱ʼa kotoún iin ejemplo, kaʼvindó Gálatas 2:​20 ta ka̱ʼa̱nndó xa̱ʼa̱ ña̱yóʼo:

• ¿Ndáaña ni̱ka̱ʼa̱n ta̱ apóstol Pablo ni̱na̱ʼa̱ ña̱ xi̱xitora ña̱ sa̱kǎku ta̱ Jesús miíyó nda̱a̱ táki̱ʼva íyo iin regalo?

Tá ni̱ki̱ʼvi ta̱ Adán ku̱a̱chi, miíra xíʼin na̱ se̱ʼera ña̱ nda̱kiʼinna kúú ña̱ xíʼi̱na. Soo Jehová chi̱ndaʼára se̱ʼera nu̱ú ñuʼú yóʼo ña̱ va̱ʼa kuvira tasaá ni̱ʼún ña̱ kutakún ndiʼi tiempo.

Tá ná kaʼviún ña̱ versículo yóʼo, ndakanixi̱ní xa̱ʼa̱ ña̱ ndo̱ʼo Jehová tá xi̱nira ni̱xo̱ʼvi̱ se̱ʼera. Kaʼvindó Juan 19:​1-7 xíʼin 16-​18, ta ka̱ʼa̱nndó xa̱ʼa̱ ña̱yóʼo:

• ¿Ndáaña ndóʼún tá ndákanixi̱níún xa̱ʼa̱ ña̱ ke̱ʼé Jehová xa̱ʼún ta saátu ta̱ Jesús?

ÑA̱ XA̱A̱ SA̱KUAʼAYÓ

Xa̱ʼa̱ ña̱ ni̱xi̱ʼi̱ ta̱ Jesús, Jehová íxakáʼnu-inira xa̱ʼa̱ ku̱a̱chiyó ta saátu kivi taxira ña̱ kutakuyó ndiʼi tiempo.

Ná ndakaʼányó xa̱ʼa̱ ña̱yóʼo

• ¿Nda̱chun ni̱xi̱ʼi̱ ta̱ Jesús?

• Xa̱ʼa̱ ña̱ ke̱ʼé ta̱ Jesús, ¿ndáa ki̱ʼva sáka̱kuña miíyó nu̱ú ku̱a̱chi ta saátu nu̱ú ña̱ xíʼi̱yó?

• ¿Ndáaña va̱ʼa ndakiʼún xa̱ʼa̱ ña̱ ni̱xi̱ʼi̱ ta̱ Jesús?

NANDUKÚKA XA̱ʼA̱ÑA

Sakuaʼa nda̱chun xa̱ʼa̱ ña̱ va̱ása níxi̱kuumií ta̱ Jesús ku̱a̱chi va̱ʼaní cha̱ʼvira xa̱ʼa̱yó.

“¿Nda̱chun ña̱ ni̱xi̱ʼi̱ ta̱ Jesús cha̱ʼviña xa̱ʼa̱ ku̱a̱ʼánína?” (Artículo ña̱ va̱xi nu̱ú jw.org)

Nandukú xa̱ʼa̱ ndáaña xíniñúʼu keʼéyó ña̱ va̱ʼa ka̱kuyó.

“¿Ndáa ki̱ʼva sáka̱ku ta̱ Jesús miíyó?” (Artículo ña̱ va̱xi nu̱ú jw.org)

¿Á íxaa káʼnu-ini Jehová xa̱ʼa̱ ku̱a̱chi ña̱ ndeéní?

“Ña̱ ndáka̱tu̱ʼunna xa̱ʼa̱ Biblia” (La Atalaya, 1 tí mayo ku̱i̱ya̱ 2013)

Xa̱ʼa̱ ña̱ na̱kunda̱a̱-ini iin ta̱a xa̱ʼa̱ ña̱ ni̱xi̱ʼi̱ ta̱ Cristo xa̱ʼa̱yó, chi̱ndeétáʼanña xíʼinra ña̱ na̱samara ki̱ʼva ña̱ íyora. Kaʼvi xa̱ʼa̱ ña̱ ndo̱ʼora.

“Ya no soy esclavo de la violencia” (Artículo ña̱ va̱xi nu̱ú jw.org)