Kivi kutakuyó ndiʼi tiempo

1. Ña̱ káʼa̱n Jehová kutakuyó ndiʼi tiempo, ¿ndáa ki̱ʼva chíndeétáʼanña xíʼinyó?

JEHOVÁ káʼa̱nra xíʼin na̱ xíniso̱ʼo ña̱ káʼa̱nra ña̱ kutakuna ndiʼi tiempo (Rom. 6:23). Tá ndákanixi̱níyó xa̱ʼa̱ ña̱yóʼo xáa̱yó kúʼvi̱níka-iniyó xíniyóra. Ná ndakanixi̱níyó xa̱ʼa̱ ña̱yóʼo: Jehová kúʼvi̱-inira xínira miíyó ña̱kán kúni̱ra ña̱ ná kutakuyó ndiʼi tiempo ta nda̱a̱ ni iin yichi̱ ná kǒo kuxíkáyó nu̱úra.

2. Ña̱ kúnda̱a̱-iniyó ña̱ kutakuyó ndiʼi tiempo, ¿ndáa ki̱ʼva chíndeétáʼanña xíʼinyó?

² Ña̱ káʼa̱n Ndióxi̱ taxira kutakuyó ndiʼi tiempo chíndeétáʼanña xíʼinyó ña̱ kundeé-iniyó tá yáʼayó nu̱ú tu̱ndóʼo. Ni tá kúni̱ na̱ sáa̱-ini xíni miíyó ña̱ kaʼnína miíyó, va̱ása sandákooyó ña̱ kachíñuyó nu̱ú Jehová. ¿Nda̱chun? Saáchi tá nda̱kú íyo iniyó xíʼin Ndióxi̱ nda̱a̱ ná kuviyó, ta̱kán káʼa̱nra ña̱ sandátakura miíyó ta kivi kutakuyó ndiʼi tiempo (Juan 5:28, 29; 1 Cor. 15:55-58; Heb. 2:15). ¿Nda̱chun va̱ʼa kúnda̱a̱-iniyó ña̱ kivi kutakuyó ndiʼi tiempo? Ná sakúaʼayó xa̱ʼa̱ savaña.

JEHOVÁ ÍYORA NDIʼI TIEMPO

3. ¿Nda̱chun kivi kandíxayó ña̱ kivi taxi Jehová ña̱ kutakuyó ndiʼi tiempo? (Salmo 102:12, 24, 27).

³ Kúnda̱a̱-iniyó ña̱ kivi taxi Jehová ña̱ kutakuyó ndiʼi tiempo saáchi miíra kúú ta̱ táxi ña̱ tákuyó ta íyora ndiʼi tiempo (Sal. 36:9). Ná ka̱ʼa̱nyó xa̱ʼa̱ sava versículo ña̱ káʼa̱n xa̱ʼa̱ Jehová, ña̱ xa̱a̱ íyora tiempo xi̱naʼá ta saátu koora ndiʼi tiempo. Salmo 90:2 káʼa̱nña xa̱ʼa̱ Jehová ña̱ xa̱a̱ íyora tá tiempo xi̱naʼáví ta saátu koora ndiʼi tiempo. Ta ki̱ʼva saátu káʼa̱n ña̱ va̱xi nu̱ú Salmo 102 (kaʼvi Salmo 102:12,b 24,c 27).d Ta ña̱yóʼo kúú ña̱ ni̱ka̱ʼa̱n ta̱ profeta Habacuc xa̱ʼa̱ Jehová tá ka̱chira: “¿Á su̱ví ndiʼi tiempo íyoún Jehová Ndióxi̱ miíi̱ ta̱ yi̱i̱? Yóʼó va̱ása kuviún” (Hab. 1:12).

4. ¿Nda̱chun va̱ása xíniñúʼu kundi̱ʼi̱-iniyó tá íxayo̱ʼvi̱ña xíʼinyó ña̱ kunda̱a̱-iniyó ña̱ ndiʼi tiempo íyo Jehová?

⁴ ¿Á íxayo̱ʼvi̱ña xíʼún tá ndákanixi̱níún xa̱ʼa̱ Jehová ña̱ ndiʼi tiempo íyora? (Is. 40:28). Su̱ví iinlá yóʼó ndóʼo saá. Chi saátu ni̱ka̱ʼa̱n ta̱ Elihú xa̱ʼa̱ Ndióxi̱ ña̱ ku̱a̱ʼání ku̱i̱ya̱ íyora ta va̱ása kúnda̱a̱-iniyó xíʼin ña̱yóʼo (Job 36:26). Sava yichi̱ kǒo kúnda̱a̱ káxi iniyó xa̱ʼa̱ iin ña̱ʼa, soo su̱ví ña̱yóʼo kúni̱ kachiña ña̱ kǒoña íyo. Tá kúú ná ka̱ʼa̱nyó xa̱ʼa̱ luz, ni kǒo kúnda̱a̱ va̱ʼa-iniyó ndáa ki̱ʼva káchíñu ña̱yóʼo. Soo su̱ví ña̱yóʼo kúni̱ kachiña ña̱ kǒoña íyo. Ta ki̱ʼva saá kúú ña̱ ndóʼoyó tá ndákanixi̱níyó xa̱ʼa̱ Jehová, sana va̱ása kívi xa̱a̱yó kunda̱a̱-iniyó ama ki̱xáʼa íyora ta ni kǒo kúnda̱a̱-iniyó ña̱ koora ndiʼi tiempo. Su̱ví ña̱yóʼo kúni̱ kachiña ña̱ loʼo kuití tiempo íyo Jehová. Ndiʼi ña̱ káʼa̱n Biblia xa̱ʼa̱ Jehová ña̱ nda̱a̱ kúúña ni kúnda̱a̱-iniyó xíʼinña á va̱ása (Rom. 11:33-36). Ña̱kán, xa̱a̱ íyova Jehová tá kúma̱ní kuva̱ʼa ndiʼi ña̱ íyo chí ndiví, tá kúú ñu̱ʼu á ña̱ ka̱ndii xíʼin ndiʼi tí ki̱mi. Biblia káʼa̱nña xa̱ʼa̱ Jehová ña̱ xi̱niñúʼura ndee̱ra ña̱ i̱xava̱ʼara ñuʼú yóʼo xíʼin ndiʼi ña̱ʼa ña̱ íyo chí ndiví (Jer. 51:15; Hech. 17:24). Ná ka̱ʼa̱nyó xa̱ʼa̱ inka ña̱ kivi chindeétáʼan xíʼinyó ña̱ kandíxayó ña̱ kiviva kutakuyó ndiʼi tiempo.

NDIÓXI̱ I̱XAVA̱ʼARA MIÍYÓ ÑA̱ KOOYÓ NDIʼI TIEMPO

5. ¿Ndáaña ni̱ʼí ta̱ Adán xíʼin ñá Eva tá níxiniso̱ʼona ña̱ ni̱ka̱ʼa̱n Jehová xíʼinna?

⁵ Iinlá na̱ yiví kúú na̱ i̱xava̱ʼa Jehová ña̱ va̱ása kuvina, chi ndiʼika ña̱ʼa ndíʼi-xa̱ʼa̱vaña. Jehová ta̱xira iin ña̱ va̱ʼaní ndaʼa̱na: ña̱ kutakuna ndiʼi tiempo. Ta ña̱yóʼo kúú ña̱ ni̱ka̱ʼa̱n Jehová xíʼin ta̱ Adán tá ka̱chira: “Va̱ása xíniñúʼu kaxíún ku̱i̱ʼi ña̱ íyo ndaʼa̱ yitu̱n tú kúúmií ña̱ kunda̱a̱-iniún xa̱ʼa̱ ña̱ va̱ʼa xíʼin xa̱ʼa̱ ña̱ va̱ása va̱ʼa, saáchi ki̱vi̱ ña̱ ná kaxíún ña̱ íyo ndaʼa̱ túyóʼo kuvivaún” (Gén. 2:17). Tá níxiniso̱ʼo ta̱ Adán xíʼin ñá Eva ña̱ ni̱ka̱ʼa̱n Jehová xíʼinna, va̱ása kuvivína. Ta kivi ndakanixi̱níyó ña̱ tá níxi̱yokana nu̱ú jardín ña̱ Edén, taxiva Jehová kaxína ku̱i̱ʼi ndaʼa̱ yitu̱n tú táxi ña̱ kutakuna, tasaá kutakuna ndiʼi tiempo (Gén. 3:22).e

6, 7. a) ¿Ndáa inka ña̱ʼa náʼa̱ ña̱ va̱ása ní ixava̱ʼa Jehová miíyó ña̱ kuviyó? b) ¿Ndáaña kúni̱ún keʼún tá ná kutakún ndiʼi tiempo nu̱ú ñuyǐví xa̱á? (Koto na̱ʼná).

⁶ Ndákanda̱ní-iniyó tá kúnda̱a̱-iniyó xa̱ʼa̱ sava prueba ña̱ ndáni̱ʼí na̱ científico ña̱ káʼa̱nna ña̱ mekeyó va̱ʼaní ndátaán va̱ʼaña ku̱a̱ʼání ña̱ʼa ndiʼi tiempo ña̱ tákuyó, soo kiviva ndataán va̱ʼaña ku̱a̱ʼáníka ña̱ʼa. Tá ku̱i̱ya̱ 2010, iin revista ña̱ ta̱vá na̱ científico ni̱ka̱ʼa̱nña xa̱ʼa̱ ña̱ mekeyó, ña̱ ki̱ʼva u̱ni̱ millón hora ña̱ grabación ña̱ video kivi kuñuʼu ini mekeyó. Ta ña̱ va̱ʼa kotoyó ndiʼi video yóʼo yáʼaka 300 ku̱i̱ya̱ xíniñúʼuyó ña̱ kotoyóña. Soo mekeyó kivi ku̱a̱ʼáva ña̱ʼa kivi kuñuʼu iniña. Xíʼin ña̱yóʼo kúnda̱a̱-iniyó ña̱ va̱ʼaní i̱xava̱ʼa Jehová mekeyó, chi kivi kuñuʼu ku̱a̱ʼání ña̱ sákuaʼayó iniña ta su̱ví nda̱saa ña̱ sákuaʼa kuitíyó ti̱xin 70 á 80 ku̱i̱ya̱ ña̱ kutakuyó (Sal. 90:10).

⁷ Jehová i̱xava̱ʼara miíyó ña̱ kuni̱níyó kutakuyó. Nda̱a̱ táki̱ʼva káchi Biblia, Ndióxi̱ “chi̱ka̱a̱ra-ini na̱ yiví ña̱ kutóona kutakuna ndiʼi tiempo” (Ecl. 3:11). Xa̱ʼa̱ ña̱kán kǒo kútóoyó kuviyó (1 Cor. 15:26). Ná ndakanixi̱níyó ña̱ ndeéní ki̱ʼin kue̱ʼe̱ miíyó. ¿Ndáaña keʼéyó? ¿Á kǒo nda̱a̱ ni iin ña̱ʼa keʼéyó? Va̱ásaví, chi ña̱ keʼéyó kúú ña̱ ku̱ʼu̱nyó nu̱ú na̱ doctor ta saátu koʼoyó ndiʼi ta̱tán ña̱ taxina ndaʼa̱yó ña̱ va̱ʼa kama ndaʼayó. Ta ku̱a̱ʼání ña̱ kéʼéyó chi kǒo kúni̱yó kuviyó. Ta tá xíʼi̱ iin na̱ kúʼvi̱ní-iniyó xíniyó, kúúna na̱ va̱lí á na̱ xa̱a̱ ku̱chée, xóʼvi̱ní-iniyó xa̱ʼa̱na ta ku̱a̱ʼání tiempo yáʼa tasaá ndúva̱ʼa-iniyó (Juan 11:32, 33). Xa̱ʼa̱ ña̱ kúʼvi̱ní-ini Ndióxi̱ xínira miíyó, i̱xava̱ʼara miíyó ña̱ kooyó ndiʼi tiempo ta saátu ña̱ sakúaʼayó ku̱a̱ʼání ña̱ʼa ndiʼi tiempo. Soo íyo inkaka ña̱ kivi chindeétáʼan xíʼinyó ña̱ kandíxayó ña̱ kiviva kutakuyó ndiʼi tiempo. Ná kotoyó ña̱ xa̱a̱ ke̱ʼé Jehová tá ya̱chi̱ xíʼin ña̱ xa̱a̱ kéʼéra tiempo vitin ña̱ náʼa̱ ña̱ ta̱ʼán nasamara ña̱ kúni̱ra keʼéra xa̱ʼa̱yó, chi kúni̱ra ña̱ ná kutakuyó ndiʼi tiempo.

TA̱ʼÁN NASA̱MA ÑA̱ KÚNI̱ JEHOVÁ KEʼÉRA

8. ¿Ndáaña káʼa̱n Isaías 55:11 xa̱ʼa̱ ña̱ káʼa̱n Jehová keʼéra?

⁸ Ni ni̱ki̱ʼvi ta̱ Adán xíʼin ñá Eva ku̱a̱chi nu̱ú Jehová ta xa̱ʼa̱ ña̱yóʼo ni̱xa̱a̱yó ku̱uyó na̱ yiví ku̱a̱chi ta xíʼi̱yó, soo Jehová ta̱ʼán nandósóví-inira xa̱ʼa̱ ña̱ káʼa̱nra taxira ndaʼa̱yó (kaʼvi Isaías 55:11).f Jehová kúni̱ra ña̱ na̱ íyo nda̱kú-ini xíʼinra ná kutakuna ndiʼi tiempo. ¿Nda̱chun va̱ʼa kúnda̱a̱-iniyó xa̱ʼa̱ ña̱yóʼo? Saáchi xa̱a̱ ku̱a̱ʼá ña̱ʼa kéʼé Jehová ta xa̱a̱ ku̱a̱ʼá ña̱ káʼa̱nra ña̱ va̱ʼa saxínura ña̱yóʼo.

9. ¿Ndáaña káʼa̱n Ndióxi̱ keʼéra? (Daniel 12:2, 13).

⁹ Jehová ni̱ka̱ʼa̱nra ña̱ sandátakura na̱ ni̱xi̱ʼi̱ ta taxira kutakuna ndiʼi tiempo (Hech. 24:15; Tito 1:1, 2). Ta̱ Job xi̱kunda̱a̱-inira ña̱ kúni̱ní Jehová sandátakura na̱ ni̱xi̱ʼi̱ (Job 14:14, 15). Ta̱ profeta Daniel xi̱kunda̱a̱-inira ña̱ ndatakuva na̱ ni̱xi̱ʼi̱ ta xa̱a̱na koona ndiʼi tiempo (Sal. 37:29; kaʼvi Daniel 12:2,g 13).h Na̱ judío na̱ ni̱xi̱yo tiempo ta̱ Jesús xi̱kunda̱a̱-inina ña̱ kivi sandátaku Jehová na̱ xi̱kachíñu nu̱úra ta xa̱a̱na koona ndiʼi tiempo (Luc. 10:25; 18:18). Ta̱ Jesús ku̱a̱ʼání yichi̱ ni̱ka̱ʼa̱nra ña̱ sandátaku Jehová na̱ ni̱xi̱ʼi̱, ta nda̱a̱ miíra nda̱taku i̱xaa yivára (Mat. 19:29; 22:31, 32; Luc. 18:30; Juan 11:25).

10. ¿Ndáaña ni̱na̱ʼa̱ ña̱ nda̱taku na̱ yiví na̱ ni̱xi̱yo xi̱naʼá? (Koto na̱ʼná).

¹⁰ Jehová kúú ta̱ táxi ña̱ tákuyó ta íyo ndee̱ ndaʼa̱ra ña̱ va̱ʼa sandátakura na̱ ni̱xi̱ʼi̱. Ta̱xira ndee̱ ndaʼa̱ ta̱ profeta Elías ña̱ va̱ʼa sa̱ndátakura iin ta̱ loʼo se̱ʼe ñá ñaʼá ñá ñuu Sarepta (1 Rey. 17:21-23). Tá ni̱ya̱ʼa tiempo, Jehová chi̱ndeétáʼanra xíʼin ta̱ profeta Eliseo ña̱ va̱ʼa sa̱ndátakura se̱ʼe iin ñá ñaʼá ñá ñuu Sunem (2 Rey. 4:18-20, 34-37). Ña̱ nda̱taku na̱ yiví yóʼo náʼa̱ña nu̱úyó ña̱ íyoní ndee̱ Jehová ña̱ sandátakura na̱ ni̱xi̱ʼi̱. Tá ni̱xi̱yo ta̱ Jesús nu̱ú ñuʼú yóʼo ni̱na̱ʼa̱ káxira ña̱ yivára kúú ta̱ ta̱xi ndee̱ ndaʼa̱ra ña̱ va̱ʼa sandátakura na̱ ni̱xi̱ʼi̱ (Juan 11:23-25, 43, 44). Ta vitin ta̱ Jesús íyora chí ndiví, ta Ndióxi̱ ta̱xira chiñu ndaʼa̱ra ña̱ kiʼinra “kuenta xíʼin ndiʼi ña̱ʼa ña̱ íyo chí ndiví xíʼin ña̱ íyo nu̱ú ñuʼú yóʼo”. Ña̱kán kivi saxínura ña̱ kúni̱ Ndióxi̱, ña̱ “ndiʼi na̱ ni̱xi̱ʼi̱ na̱ ñúʼu ti̱xin ya̱vi̱, ndatakuna ta koona ndiʼi tiempo” (Mat. 28:18; Juan 5:25-29).

11. ¿Ndáaña va̱ʼa ndakiʼinyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó?

¹¹ ¿Nda̱chun ta̱xi Jehová ña̱ ni̱xo̱ʼvi̱ní se̱ʼera ta nda̱a̱ ni̱xi̱ʼi̱ra? Ta̱ Jesús ni̱ka̱ʼa̱nra xa̱ʼa̱ ña̱yóʼo tá ka̱chira: “Ndióxi̱ ni̱kuʼvi̱ní-inira xi̱nira na̱ ñuyǐví ta nda̱taxira se̱ʼera ta̱ mitúʼun xa̱ʼa̱na, ña̱ va̱ʼa ndiʼi na̱ kándíxa miíra kǒo ndiʼi-xa̱ʼa̱na chi kutakuna ndiʼi tiempo” (Juan 3:16). Xa̱ʼa̱ ña̱ ta̱xi Ndióxi̱ se̱ʼera ña̱ ni̱xi̱ʼi̱ra xa̱ʼa̱yó kivi ndoo ku̱a̱chiyó, tasaá kúú ña̱ ni̱ʼíyó ña̱ kutakuyó ndiʼi tiempo (Mat. 20:28). Ta̱ apóstol Pablo ni̱ka̱ʼa̱nra xa̱ʼa̱ kúni̱ Ndióxi̱ tá ka̱chira: “Xa̱ʼa̱ iin ta̱a kúú ña̱ ki̱xáʼa xíʼi̱yó, ta xa̱ʼa̱ iin ta̱a kúú ña̱ ndataku na̱ ni̱xi̱ʼi̱. Saáchi xa̱ʼa̱ ta̱ Adán kúú ña̱ ndiʼina xíʼi̱, ta saátu xa̱ʼa̱ ta̱ Cristo kúú ña̱ ndiʼina ndataku” (1 Cor. 15:21, 22).

12. ¿Ndáa ki̱ʼva saxínu Jehová ña̱ kúni̱ra?

¹² Ta̱ Jesús sa̱náʼa̱ra na̱ discípulora ña̱ ná ka̱ʼa̱nna xíʼin Ndióxi̱ ña̱ ná kixaa̱ ki̱vi̱ ña̱ kaʼndachíñura ta ná koo ña̱ kúni̱ miíra nu̱ú ñuʼú yóʼo (Mat. 6:9, 10). Ta iin ña̱ kúni̱ Ndióxi̱ koo nu̱ú ñuʼú yóʼo kúú ña̱ ná koo na̱ yiví ndiʼi tiempo. Xa̱ʼa̱ ña̱yóʼo kúú ña̱ nda̱kaxin Jehová se̱ʼera ta̱ Jesús ña̱ koora rey, ta xa̱a̱ sándatakara 144,000 na̱ yiví ña̱ kaʼndachíñuna xíʼin ta̱ Jesús ña̱ va̱ʼa saxínura ña̱ kúni̱ra (Apoc. 5:9, 10).

13. ¿Ndáaña kéʼé Jehová tiempo vitin, ta ndáaña xíniñúʼu keʼún?

¹³ Tiempo ña̱ ndóoyó vitin Jehová sándatakara ku̱a̱ʼání na̱ yiví ta sánáʼa̱rana ndáa ki̱ʼva koona nu̱ú ñuyǐví xa̱á (Apoc. 7:9, 10; Sant. 2:8). Ni nda̱taʼvíní ñuyǐví ña̱ ndóoyó yóʼo xa̱ʼa̱ ña̱ sáa̱ní-ini na̱ yiví xínitáʼanna á xa̱ʼa̱ ña̱ íyoní guerra, soo na̱ yiví na̱ sándataka Ndióxi̱ chíka̱a̱nína ndee̱ ña̱ va̱ása sa̱a̱-inina kunitáʼanna. Na̱yóʼo xa̱a̱ sa̱ndákoona ndiʼi ña̱ va̱ása va̱ʼa xi̱keʼéna tá ya̱chi̱ (Miq. 4:3). Nu̱úka ña̱ ku̱ʼu̱nna nu̱ú guerra, na̱yóʼo chíndeétáʼanna xíʼin na̱ yiví na̱ ndixa kúni̱ kutaku ndiʼi tiempo ta sánáʼa̱nana ña̱ nda̱a̱ xa̱ʼa̱ Ndióxi̱ xíʼin xa̱ʼa̱ ña̱ kúni̱ra keʼéra (1 Tim. 6:19). Ta xa̱ʼa̱ ña̱ chíndeétáʼanna xíʼin reino Ndióxi̱, sana nda̱a̱ kivi ixandi̱va̱ʼa na̱ veʼena xíʼinna á kuma̱ní xu̱ʼún ndaʼa̱na, soo Jehová kǒo sándakoorana chi táxira ña̱ xíniñúʼuna (Mat. 6:25, 30-33; Luc. 18:29, 30). Ndiʼi ña̱yóʼo náʼa̱ña nu̱úyó ña̱ tá ná kaʼndachíñu ta̱ Jesús viíní koo ta sáxi̱nura ndiʼi ña̱ xi̱kuni̱ Jehová.

LIVINÍ KUNDOOYÓ CHÍ NU̱ÚNÍNU

14, 15. ¿Ndáa ki̱ʼva saxínu Jehová ña̱ káʼa̱nra sandíʼi-xa̱ʼa̱ra ña̱ xíʼi̱yó?

¹⁴ Ta̱ Jesús xa̱a̱ rey kúúra ta xa̱a̱ ki̱xáʼara xáʼndachíñura chí ndiví ta sáxi̱nura ndiʼi ña̱ kúni̱ Jehová (2 Cor. 1:20). Nani tá 1914 xa̱a̱ ki̱xáʼara kúchiñura nu̱ú na̱ sáa̱-ini xíni ñaʼá (Sal. 110:1, 2). Si̱lóʼo kúma̱ní ta miíra xíʼin na̱ 144,000 sandíʼi-xa̱ʼa̱na na̱ kéʼé ña̱ va̱ása va̱ʼa nu̱ú ñuʼú yóʼo (Apoc. 6:2).

¹⁵ Ti̱xin ña̱ mil ku̱i̱ya̱, ta̱ Jesús sandátakura na̱ yiví na̱ ni̱xi̱ʼi̱ ta chindeétáʼanra xíʼin ndiʼi na̱ yiví na̱ va̱ʼaní xíniso̱ʼo ña̱ va̱ʼa ndoo ku̱a̱china. Tá ná ndiʼi prueba ña̱ so̱ndíʼi, na̱ yiví na̱ kéʼé ña̱ va̱ʼa nu̱ú Jehová na̱yóʼo kúú na̱ taxira koo nu̱ú ñuʼú “ta ndiʼi tiempo kundoona nu̱úña” (Sal. 37:10, 11, 29). Tá ná ndiʼi, Jehová va̱ása taxikara kuviyó (1 Cor. 15:26). Ta ndeéní kusi̱í-iniyó xa̱ʼa̱ ña̱yóʼo.

16. ¿Ndáa xa̱ʼa̱ kúú ña̱ xíniñúʼu ndasakáʼnuyó Jehová?

¹⁶ Nda̱a̱ táki̱ʼva sa̱kuaʼayó nu̱ú artículo yóʼo, ña̱ ndátuyó kooyó ndiʼi tiempo su̱ví miíyó káʼa̱n xa̱ʼa̱ ña̱yóʼo chi nu̱ú tu̱ʼun Ndióxi̱ va̱xiña. Ta xa̱ʼa̱ ña̱ kándíxayó ña̱ kooyó ndiʼi tiempo, ña̱yóʼo chíndeétáʼanña xíʼinyó ña̱ nda̱kú koo iniyó xíʼin Ndióxi̱ tiempo so̱ndíʼi ña̱ ndóoyó vitin. Soo tá kúni̱yó keʼéyó ña̱ kútóo Jehová xíniñúʼu nda̱kú koo iniyó xíʼinra ta saátu xíʼin ta̱ Jesús ta su̱ví xa̱ʼa̱ ña̱ kúni̱yó ka̱kuyó keʼéyó ña̱yóʼo chi xa̱ʼa̱ ña̱ kúʼvi̱-iniyó xíniyóna xíʼin ndiʼi níma̱yó kúúña (2 Cor. 5:14, 15). Xa̱ʼa̱ ña̱ kúʼvi̱-iniyó xíniyóna ndíku̱nyó yichi̱na ta ña̱yóʼo kúútu ña̱ chíndeétáʼan xíʼinyó ña̱ kusi̱í-iniyó natúʼunyó xíʼin inkana xa̱ʼa̱ ña̱ ndátuyó ndakiʼinyó chí nu̱únínu (Rom. 10:13-15). Ta saátu tá ná chika̱a̱kayó ndee̱ ña̱ va̱ʼa koo iniyó ta va̱ása sa̱a̱-iniyó kuniyó inkana, Jehová kuni̱ra koora migoyó ndiʼi tiempo (Heb. 13:16).

17. ¿Ndáaña xíniñúʼu keʼé iin tá iinyó? (Mateo 7:13, 14).

¹⁷ Ta miíyó, ¿á kutakuyó ndiʼi tiempo? Jehová kúni̱vara kutakuyó, soo miíyó kúú na̱ xíniñúʼu chika̱a̱ ndee̱ ña̱ va̱ʼa ndakiʼinyó ña̱yóʼo (kaʼvi Mateo 7:13, 14). Ña̱kán, ¿ndáa ki̱ʼva kooyó tá ná ni̱ʼíyó ña̱ kutakuyó ndiʼi tiempo? Ña̱yóʼo sakúaʼayó nu̱ú inka artículo.