¿Á ndákaʼún xa̱ʼa̱ ña̱yóʼo?

¿Á ka̱ʼviún ndiʼi Tutu Ña̱ Nátúʼun xíʼinyó? Koto á kuchiñún ndakuiún ndiʼi ña̱yóʼo:

¿Ndáaña va̱’a ndakiʼinyó tá ná taváyó tiempo ña̱ ka̱ʼa̱nyó xíʼin Jehová, kuniso̱ʼoyó ña̱ káʼa̱nra ta ndakanixi̱níyó xa̱ʼa̱ra?

Va̱ʼaní kana ña̱ ndaka̱xinyó keʼéyó, va̱ʼaníka sanáʼa̱yó, kandíxaníkayóra ta kuʼvi̱níka-iniyó kuniyóra (w22.01, página 30 xíʼin 31).

¿Nda̱chun ndáyáʼviní sakúaʼayó kandíxayó Jehová ta saátu na̱ ta̱xira kuniʼi yichi̱ nu̱úyó?

Vitin kúú tiempo ña̱ ndáyáʼviní kandíxayó ña̱ viíní íyo ndiʼi ña̱ ndáka̱xin Jehová keʼéra. Náʼa̱yó ña̱ kándíxayóra tá va̱ása xíka-iniyó xa̱ʼa̱ ña̱ ndáka̱xin na̱ anciano keʼéna ta saátu kéʼéyó ña̱ káʼa̱nna xíʼinyó. Tá ná kixáʼa ña̱ gran tribulación, xa̱a̱ koo tu̱ʼvayó keʼéyó ña̱ ka̱ʼa̱n na̱ ñuu Ndióxi̱ xíʼinyó ni ná ixayo̱ʼvi̱ña xíʼinyó (w22.02, página 4 nda̱a̱ 6).

¿Nda̱chun ni̱ka̱ʼa̱n iin ángel xíʼin ta̱ Zacarías ña̱ kunira kuniʼi ta̱ chíñu Zorobabel iin plomo? (Zac. 4:8-10).

Xíʼin visión ña̱ xi̱nira yóʼo ni̱na̱ʼa̱ña nu̱ú na̱ ñuu Ndióxi̱ ña̱ ni núu ná kuna̱ʼa̱ templo, sandíʼivana keʼénaña tasaá kivi ndasakáʼnuna Jehová nda̱a̱ táki̱ʼva kúni̱ miíra (w22.03, página 16 xíʼin 17).

¿Ndáaña xíniñúʼu keʼéyó ña̱ chinúuyó iin yichi̱ va̱ʼa nu̱ú inkana xíʼin tu̱ʼun ña̱ káʼa̱nyó? (1 Tim. 4:12).

Tá ku̱a̱ʼa̱nyó natúʼunyó xa̱ʼa̱ Ndióxi̱ ta káʼa̱n-ndi̱va̱ʼana xíʼinyó, vií ná ndakuiinyó yuʼúna ta to̱ʼó ná ka̱ʼa̱nyó xíʼinna. Tá ku̱a̱ʼa̱nyó reunión xíʼin ña̱ si̱í-ini ná katayó, ndiʼi yichi̱ ná chika̱a̱yó ndee̱ ña̱ taxiyó comentario, nina ña̱ nda̱a̱ ná ka̱ʼa̱nyó, ná chika̱a̱yó ndee̱ xíʼin inkana, ta ná va̱ása ka̱ʼa̱nyó tu̱ʼun ña̱ sáxo̱ʼvi̱-ini inkana (w22.04, página 6 nda̱a̱ 9).

Tí kití tí káʼa̱n ña̱ Apocalipsis 13:1, 2 xa̱ʼa̱, ¿nda̱chun inkáchi kúni̱ kitáʼanrí xíʼin ku̱mí kití tí káʼa̱n (na̱ chíñu) Daniel capítulo 7 xa̱ʼa̱?

Tí kití yukú tí káʼa̱n Apocalipsis capítulo 13 xa̱ʼa̱, su̱ví iinlá kuití na̱ chíñu ndána̱ʼa̱ tíyóʼo tá kúú na̱ ñuu Roma. Chi ndána̱ʼa̱rí ndiʼi na̱ chíñu na̱ xa̱a̱ xáʼndachíñu nu̱ú ñuʼú yóʼo (w22.05, página 9).

¿Ndáa ki̱ʼva náʼa̱yó ña̱ kándíxayó ña̱ nda̱kúní ndatiin Jehová ku̱a̱chi?

Tá iinna ni̱ka̱ʼa̱n-ndi̱va̱ʼana xíʼinyó á ke̱ʼéna iin ña̱ va̱ása va̱ʼa xíʼinyó, ná kǒo sa̱a̱-iniyó kuniyóna tá ná sandákooyó ndiʼi ña̱ ndóʼoyó ndaʼa̱ Jehová. Chi miíra ndasavií ndiʼi ña̱ sáxo̱ʼvi̱ miíyó (w22.06, página 10 xíʼin 11).

¿Ndáaña xíniñúʼu kiʼin iin ta̱ hermano kuenta xíʼin tá kéʼéra oración ti̱xin congregación?

Tá kéʼéra oración va̱ása xíniñúʼu taxira consejo ndaʼa̱ na̱ congregación ta saátu va̱ása xíniñúʼu taxira anuncio. Ni va̱ása xíniñúʼu ku̱a̱ʼání ka̱ʼa̱nra tá kíxáʼa reunión (Mat. 6:7) (w22.07, página 24 xíʼin 25).

¿Ndáaña kúni̱ kachi Juan 5:29 tá káʼa̱nña ña̱ ndataku na̱ ke̱ʼé ña̱ va̱ása va̱ʼa ta ndatiinna ku̱a̱chi xíʼinna?

Va̱ása ndatiinna ku̱a̱chi xíʼinna xa̱ʼa̱ ña̱ʼa ña̱ ke̱ʼéna tá kúma̱níka kuvina. Saáchi tá ná ndatakuna nu̱ú ñuyǐví xa̱á, ña̱ keʼéna kán kúú ña̱ ndatiinna ku̱a̱chi xíʼinna (w22.09, página 18).

¿Ndáaña ndáyáʼviní ni̱ka̱ʼa̱n ta̱ hermano Joseph Rutherford ti̱xin iin asamblea tá septiembre ña̱ ku̱i̱ya̱ 1922?

Ti̱xin iin asamblea ña̱ ni̱xi̱yo chí Cedar Point (Ohio, Estados Unidos), ni̱ka̱ʼa̱nra: “Ta̱ Jesús xa̱a̱ Rey kúúra chí ndiví ta ndóʼó kúú na̱ chíndeétáʼan xíʼinra. Ña̱kán, natúʼunndó, natúʼunndó, natúʼunndó xa̱ʼa̱ ta̱ Rey xíʼin xa̱ʼa̱ reinora” (w22.10, página 2 nda̱a̱ 5).

Nda̱a̱ táki̱ʼva káchi ña̱ va̱xi nu̱ú Isaías capítulo 30, ¿ndáa u̱ni̱ ki̱ʼva chíndeétáʼan Jehová xíʼinyó ña̱ kundeé-iniyó?

Ña̱ capítulo yóʼo náʼa̱ña nu̱úyó 1) Jehová xíniso̱ʼora ña̱ káʼa̱nyó xíʼinra, 2) níʼira yichi̱ nu̱úyó ta 3) ku̱a̱ʼá ña̱ va̱ʼa táxira ndaʼa̱yó tiempo vitin ta saátu chí nu̱únínu (w22.11, página 9).

¿Nda̱chun kivi kandíxayó ña̱ va̱xi nu̱ú Salmo 37:10, 11, 29 ña̱ ni̱xi̱nuña tiempo xi̱naʼá ta xi̱nuña chí nu̱únínu?

Tu̱ʼun ña̱ ni̱ka̱ʼa̱n ta̱ David va̱ʼaní kítáʼanña xíʼin ki̱ʼva ña̱ ni̱xi̱yo na̱ ñuu Israel tiempo xi̱naʼá tá xa̱ʼndachíñu ta̱ rey Salomón nu̱úna. Ta ta̱ Jesús ni̱ka̱ʼa̱nra xa̱ʼa̱ ña̱ versículo 11 tá ni̱ka̱ʼa̱nra xa̱ʼa̱ ñuyǐví xa̱á (Mat. 5:5; Luc. 23:43) (w22.12, página 8 nda̱a̱ 10 xíʼin 14).