¿Á xa̱a̱ íyo tu̱ʼvaún ña̱ koún nu̱ú ñuʼú ña̱ taxi Ndióxi̱?

¿Á XA̱A̱ ÍYO TU̱ʼVAYÓ ÑA̱ NDASALIVIYÓ ÑUʼÚ YÓʼO?

Tá ni̱ka̱ʼa̱n Jehová xíʼin ta̱ Adán xíʼin ñá Eva ña̱ kaku se̱ʼena ta sakútuna nu̱ú ñuʼú ta kundaanaña, xíʼin ña̱ ni̱ka̱ʼa̱nra kúnda̱a̱-iniyó ña̱ kixaa̱ iin ki̱vi̱ ña̱ iníísaá nu̱ú ñuʼú yóʼo nduliviña (Gén. 1:28). Na̱ ndátu koo ndiʼi tiempo nu̱ú ñuʼú yóʼo xíniñúʼu saxínuna ña̱ ni̱ka̱ʼa̱n Jehová xíʼin ta̱ Adán xíʼin ñá Eva. Tá ná ndiʼi ya̱ʼa ña̱ Armagedón, va̱ása xa̱a̱ kooví ñuʼú yóʼo iin ñuʼú livi nda̱a̱ táki̱ʼva ni̱xi̱yo jardín ña̱ Edén. Ña̱kán ndeéní koo chiñu nu̱úyó ña̱ ndasaviíyó nu̱ú ñuʼú yóʼo.

Ki̱ʼva saá ndeéní ni̱xi̱yo chiñu nu̱ú na̱ ñuu Israel tá nda̱ndikóna ñuu Jerusalén, chi ki̱ʼva 70 ku̱i̱ya̱ kǒo na̱ níxi̱ndoo ñuu kán. Soo mií Jehová chi̱ndeétáʼan xíʼinna ña̱ nda̱saviínaña, nda̱a̱ táki̱ʼva ni̱ka̱ʼa̱n ta̱ profeta Isaías: “Jehová ndasara ñuʼú yi̱chí nda̱a̱ táki̱ʼva ni̱xi̱yo ña̱ jardín ña̱ Edén ta yoso̱ ña̱ yi̱chí ndasaraña nda̱a̱ táki̱ʼva íyo Jardín miíra” (Is. 51:3). Na̱ ñuu Israel ku̱chiñuna nda̱salivina ñuu Jerusalén saáchi mií Jehová chi̱ndeétáʼan xíʼinna. Saátu chindeétáʼanra xíʼin na̱ ndátu koo ndiʼi tiempo nu̱ú ñuʼú yóʼo ña̱ ndasalivinaña. Ña̱kán nda̱a̱ tiempo vitin íyo sava ña̱ kivi keʼún ta xíʼin ña̱yóʼo na̱ʼún ña̱ kúni̱ún keʼún chiñu yóʼo nu̱ú ñuyǐví xa̱á.

Ña̱kán iin ña̱ kivi keʼéyó kúú ña̱ sakúaʼayó limpio ná koo veʼeyó ta saátu yéʼeyó ta vií ná kundoo ña̱ʼa ti̱xin veʼeyó. Ta kiviva keʼéyó ña̱yóʼo ni na̱ íyo yatin xíʼinyó va̱ása kéʼénaña. Inkaka ña̱ kivi keʼéyó kúú ña̱ chindeétáʼanyó xíʼin na̱ hermano ña̱ ndatiʼvína ti̱xin Salón nu̱ú ndákutáʼanyó ndásakáʼnuyó Ndióxi̱ xíʼin nu̱ú xíyo asamblea. Saátu kivi ku̱ʼu̱nyó chindeétáʼanyó xíʼin sava na̱ hermanoyó na̱ ndi̱ʼi-xa̱ʼa̱ veʼe xa̱ʼa̱ ña̱ ndeéní ku̱un sa̱vi̱ á ña̱ ni̱ta̱an. Tasaá na̱ʼa̱yó ña̱ kúni̱yó chindeétáʼanyó xíʼin na̱ yáʼa nu̱ú tu̱ndóʼo. Tá nda̱a̱ tiempo vitin ná sakúaʼayó keʼéyó ku̱a̱ʼá chiñu, ña̱yóʼo chindeétáʼanña xíʼinyó ña̱ viíní keʼéyó chiñu ti̱xin ñuyǐví xa̱á tá ná taxi Ndióxi̱ ya̱ʼayó.

¿Á XA̱A̱ ÍYO TU̱ʼVAYÓ ÑA̱ NDAKIʼINYÓ NA̱ NDATAKU?

Tá sa̱ndátaku ta̱ Jesús ñá loʼo se̱ʼe ta̱ Jairo, ni̱ka̱ʼa̱nra ña̱ ná taxina kuxuñá (Mar. 5:42, 43). Su̱ví iin chiñu ndeéníví níxi̱kuu ña̱ taxina ña̱ kuxu iin ñá loʼo ñá 12 ku̱i̱ya̱. Soo kivi ndakanixi̱níyó ña̱ nu̱ú ñuyǐví xa̱á kooní chiñu nu̱úyó tá ná saxínu ta̱ Jesús ña̱yóʼo: “Ndiʼi na̱ ni̱xi̱ʼi̱ na̱ ñúʼu ti̱xin ya̱vi̱ kuniso̱ʼona tu̱ʼunra ta keena” (Juan 5:28, 29). Loʼova káʼa̱n Biblia xa̱ʼa̱ ña̱yóʼo, soo kivi ndakanixi̱níyó ña̱ na̱ ndataku xíniñúʼu koo ña̱ kuxuna, iin veʼe nu̱ú kundoona xíʼin ti̱ko̱to̱na. Ña̱kán nda̱a̱ tiempo vitin kivi na̱ʼa̱yó ña̱ kúni̱yó chindeétáʼanyó xíʼin inkana. Ná ndakanixi̱níyó xa̱ʼa̱ sava pregunta yóʼo.

Tá ti̱xin congregación nu̱ú ndíka̱ún ni̱ya̱ʼa anuncio ña̱ kixi ta̱ superintendente ña̱ circuito, ¿á ndani̱ʼún ndaʼún ta̱ taxiún ña̱ kuxura? Tá ku̱ndaa̱-iniún ña̱ iin na̱ hermano va̱ása kachíñukana ti̱xin Betel á iin ta̱ hermano va̱ása kúúkara superintendente ña̱ circuito. ¿Á kivi chindeétáʼún xíʼinna ña̱ ndani̱ʼína iin veʼe nu̱ú koona? Tá ná koo iin asamblea regional a especial yatin nu̱ú íyoún, ¿Á kivi chindeétáʼún xíʼinna tá kúma̱níka kooña á tá xa̱a̱ ndi̱ʼi ni̱xi̱yoña? ¿Á kivi ndakiʼún na̱ hermano na̱ ke̱e inka ñuu na̱ ki̱xaa̱ ti̱xin asamblea yóʼo?

¿Á XA̱A̱ ÍYO TU̱ʼVAYÓ ÑA̱ SANÁʼA̱YÓ NA̱ NDATAKU?

Ña̱ káʼa̱n Hechos 24:15 chíndeétáʼanña xíʼinyó ndakanixi̱níyó ña̱ ku̱a̱ʼání na̱ yiví ndataku nu̱ú ñuyǐví xa̱á. Ku̱a̱ʼání na̱yóʼo va̱ása níkunda̱a̱-inina xa̱ʼa̱ Jehová tá kúma̱níka kuvina, soo nu̱ú ñuyǐví xa̱á kivi sakúaʼana xa̱ʼa̱ra.a Na̱ nda̱kúní íyo ini xíʼin Jehová sanáʼa̱na ku̱a̱ʼání na̱ yiví na̱ ndataku (Is. 11:9). Iin ñá hermana ñá naní Charlotte, ñá na̱túʼun xa̱ʼa̱ Ndióxi̱ chí Europa, Sudamérica xíʼin África, kúni̱níñá ná kixaa̱ ki̱vi̱ ña̱ ndataku na̱ ni̱xi̱ʼi̱. Ta kúsi̱íkaví-iniñá káʼa̱nñá ña̱yóʼo: “Kúni̱níi̱ sanáʼi̱ na̱ ndataku xa̱ʼa̱ Ndióxi̱. Tá káʼvii̱ xa̱ʼa̱ na̱ ni̱xi̱yo tiempo xi̱naʼá, ndákanixi̱níi̱: ‘Tá na̱ yiví kán níxa̱a̱na sakúaʼana xa̱ʼa̱ Jehová síínníva koo ña̱ kutakuna’. Kúni̱níi̱ sanáʼi̱ na̱ yiví kán xa̱ʼa̱ Jehová ta ka̱ʼi̱n xíʼinna ña̱ si̱íní koona tá ná sakúaʼana xa̱ʼa̱ra”.

Nda̱a̱ na̱ nda̱kúní ni̱xi̱yo-ini xíʼin Jehová tá kúma̱ní kixi ta̱ Jesús nu̱ú ñuʼú yóʼo ndatakuna ti̱xin ñuyǐví xa̱á ta ku̱a̱ʼání ña̱ sakúaʼana. Kusi̱íní-iniyó ña̱ natúʼunyó xíʼin ta̱ Daniel ndáa ki̱ʼva ni̱xi̱nu profecía ña̱ ka̱ʼyíra soo va̱ása níxa̱a̱ra kunda̱a̱-inira xa̱ʼa̱ña (Dan. 12:8). Ta saátu kusi̱íní-iniyó ta ná natúʼunyó xíʼin ñá Rut ta saátu ñá Noemí ña̱ ti̱xin na̱ veʼená ki̱ta ta̱ ni̱xa̱a̱ ku̱u Mesías. Ta kusi̱ínítu-iniyó tá ná sanáʼa̱yó ku̱a̱ʼání na̱ yiví xa̱ʼa̱ Ndióxi̱ iníísaá ñuyǐví ta va̱ása kooka nda̱a̱ ni iin ña̱ kasi nu̱úyó ña̱ keʼéyó chiñu yóʼo.

¿Ndáa ki̱ʼva na̱ʼa̱yó ña̱ kúni̱yó sanáʼa̱yó na̱ yiví nu̱ú ñuyǐví xa̱á? Iin ki̱ʼva ña̱ keʼéyó ña̱yóʼo kúú ña̱ nda̱a̱ tiempo vitin ná chika̱a̱yó ndee̱ ña̱ viíní sanáʼa̱yó na̱ yiví ta saátu ná kǒo sandákooyó ña̱ natúʼunyó xa̱ʼa̱ Ndióxi̱ (Mat. 24:14). Ni nda̱a̱ ndáaka ku̱i̱ya̱ kúúmiíyó á ndeéndóʼoyó kiviva keʼéyó chiñu yóʼo. Chi saá na̱ʼa̱yó ña̱ xa̱a̱ íyo tu̱ʼvayó ña̱ sanáʼa̱yó na̱ yiví na̱ ndataku nu̱ú ñuyǐví xa̱á.

Tá saá, ¿á kúni̱ún koún nu̱ú ñuyǐví xa̱á?, ¿á kúsi̱í-iniún ndasaliviún nu̱ú ñuʼú yóʼo ta chindeétáʼún xíʼin na̱ yiví na̱ ndataku ña̱ sakúaʼana xa̱ʼa̱ Ndióxi̱? Na̱ʼún ña̱ xa̱a̱ íyo tu̱ʼvaún tá xa̱a̱ nda̱a̱ tiempo vitin chíka̱ún ndee̱ ña̱ keʼún chiñu ña̱ táxina ndaʼún chi ki̱ʼva saá koo chiñu ña̱ keʼéyó nu̱ú ñuyǐví xa̱á.