ဥရောပနဲ့ပတ်သက်ပြီး သတိပြုမိရာ

အကျိုးပြုတဲ့ မိခင်ရဲ့အသံ

လမစေ့ဘဲမွေးတဲ့ကလေးငယ်တွေ ဆေးရုံမှာရှိနေချိန် သူတို့ရဲ့လက်မှာ မိခင်အသံကိုကြားစေနိုင်တဲ့ စက်ကလေးတစ်ခု တပ်ထားတာက ကျန်းမာရေးအတွက် အကျိုးအများကြီးရှိတယ်လို့ အီတလီနိုင်ငံ မီလန်းမြို့က သုတေသီတွေ တွေ့ရှိခဲ့ကြတယ်။ ကလေးဟာ ဗိုက်ထဲမှာ ရှိကတည်းက မိခင်ရဲ့အသံကို ကြားနိုင်တယ်။ အဲဒါကိုတုပပြီး အဲဒီစက်ကို ပြုလုပ်ထားတာ ဖြစ်တယ်။ “လမစေ့ဘဲမွေးတဲ့ကလေးတွေဟာ မိခင်ရဲ့အသံကို စောစောကြားခွင့်ရလေ အကျိုးရှိလေပဲ” လို့ လေ့လာတွေ့ရှိချက်ကနေ ကောက်ချက်ချခဲ့ကြတယ်။

သမ္မာကျမ်းစာပြောဆိုရာ– ‘အမေ့ရင်ခွင်ထဲက နို့ပြတ်သွားတဲ့ကလေးလို စိတ်အေးလက်အေးနဲ့ ငြိမ်သက်နေပါတယ်။’—ဆာလံ ၁၃၁:၂၊ ကဘ။

သားသမီးတွေကို အထင်ကြီးစိတ်ဝင်အောင် သင်ပေးနေ

နယ်သာလန်မှာရှိတဲ့ ၇ နှစ်ကနေ ၁၁ နှစ်ကြား ကလေး ၅၆၅ ယောက်ကို လေ့လာဆန်းစစ်ခဲ့တယ်။ “တခြားကလေးတွေထက် ပိုသာတယ်၊” “အရေးပေးဆက်ဆံ ခံထိုက်တယ်” လို့ မိဘတွေ မြှောက်ပင့်ထားတဲ့ ကလေးတွေဟာ သူတို့ရဲ့ ရွယ်တူချင်းတွေထက် ကိုယ့်ကိုယ်ကိုယ် အထင်ကြီးလွန်းပြီး ဘဝင်မြင့်၊ အတ္တကြီးသူတွေဖြစ်နေတာကို တွေ့ရှိခဲ့ကြတယ်။ “ငါ့သားသမီးသာ အတော်ဆုံးလို့ မိဘတွေ ပြောတာကို သားသမီးတွေ ယုံကြည်ကြတယ်။ အဲဒီလို မြှောက်ပင့်ပြောဆိုတာဟာ ကလေးတွေအတွက်ရော လူ့အဖွဲ့အစည်းအတွက်ပါ မကောင်းဘူး” ဆိုပြီး လေ့လာမှုမှာ ပါဝင်တဲ့သူတစ်ယောက် ပြောပြတယ်။

သမ္မာကျမ်းစာပြောဆိုရာ– ‘သင်တို့သည် ကိုယ်ကိုထင်သင့်သည်ထက် လွန်၍မထင်ဘဲ သင့်လျော်စွာ ထင်ကြပါ။’—ရောမ ၁၂:၃။

အကောင်းမြင်စိတ်ရှိတဲ့ အသက်တစ်ရာရှိသူများ

အသက်တစ်ရာရှိသူတွေဟာ ဖျားနာမှုနဲ့ ကာယပိုင်း ကန့်သတ်ချက်ရှိပေမဲ့ ဆက်အသက်ရှင်လိုစိတ် ပြင်းပြဆဲပဲ ဆိုပြီး ဂျာမနီနိုင်ငံ ဟိုက်ဒယ်လ်ဘာ့ခ် တက္ကသိုလ်က သုတေသီတွေ ပြောတယ်။ အသက်တစ်ရာရှိသူ လေးယောက်မှာ သုံးယောက်က အသက်ဆက်ရှင်လိုကြပြီး ပျော်ပျော်နေကြသူတွေ ဖြစ်တယ်။ ပန်းတိုင်တွေချပြီး ဖြစ်မြောက်အောင် လုပ်ဆောင်တယ်၊ အကောင်းမြင်တတ်ပြီး မျှော်လင့်ချက်ရှိတယ်၊ ဘဝအဓိပ္ပာယ်ရှိပြီး ဘာသာရေးနဲ့ လူ့ကျင့်ဝတ်စံနှုန်းတွေကို စွဲကိုင်ကြတယ်။

စဉ်းစားစရာ– ဒေသနာ ၃:၁၁ မှာပြောထားသလို ဆက်အသက်ရှင်လိုတဲ့ ကျွန်တော်တို့ရဲ့ မွေးရာပါဆန္ဒက ဘာကို ဖော်ပြသလဲ။