သမ္မာတရားရှိလုပ်ဖော်ဆောင်ဖက် နယ်လှည့်ကြီးကြပ်မှူးများ

ပထမရာစုခရစ်ယာန်အသင်းတော်တွင် အသင်းတော်များကို လှည့်လည်၍အားပေးတည်ဆောက်မှုပြုသော နယ်လှည့်ကြီးကြပ်မှူးများရှိခဲ့သည်။ သူတို့သည် ကိုယ်ကျိုးမရှာဘဲ၊ အသင်းတော်ရှိသူများ ဘုရားသခင်ရှေ့လျော်ကန်စွာ သွားလာနိုင်ရေးကို ကူညီပေးရန်အတွက် မိမိတို့ကိုယ်ကိုပေးဆက်ထားသူများဖြစ်ကြသည်။—တမန်တော် ၁၁:၂၃၊ ၂၄၊ ၁၄:၂၁၊ ၂၂၊ ၁၅:၃၂၊ ၂၀:၂၊ ၃၁-၃၅။ ဖိလိပ္ပိ ၂:၂၀-၂၂၊ ၂၉။ ၁ သက်သာလောနိတ် ၂:၅-၁၂။

ယနေ့ယေဟောဝါသက်သေတို့၏ အသင်းတော်များလည်း နယ်လှည့်ကြီးကြပ်မှူးများ လည်ပတ်ခြင်းမှ အကျိုးခံစားရကြသည်။ ဤသူတို့သည် ယေဟောဝါသက်သေတို့၏ဟောပြောခြင်းလုပ်ငန်းတွင်လည်းကောင်း၊ ကြီးကြပ်မှူးများအဖြစ်လည်းကောင်း နှစ်ပေါင်းများစွာ အတွေ့အကြုံရှိသူများဖြစ်ကြသည်။ သူတို့သည်အချိန်ပြည့် ဓမ္မအမှုဆောင်ခြင်းလုပ်ငန်းတွင်ပါဝင်ရန်အတွက် ဝမ်းစာရေးလုပ်ငန်းနှင့်အိမ်မှုတာဝန်တို့မှ မိမိတို့ကိုယ်ကိုကင်းလွတ်စေကြသည်။ အိမ်ထောင်သည်များဖြစ်က ဇနီးသည်တို့လည်း သူတို့ခင်ပွန်းနှင့်အတူအချိန်ပြည့်ဓမ္မအမှုဆောင်ခြင်းတွင် ပါဝင်လေ့ရှိကြသည်။

တိုက်နယ်ကြီးကြပ်မှူးတစ်ယောက်သည် အသင်းတော် ၁၈ ခုမှ ၂၅ ခုခန့်ရှိတိုက်နယ်တစ်ခုကို ကြည့်ရှုရန် တာဝန်အပ်နှင်းခံရသည်။ တိုက်နယ်အတွင်းရှိ အသင်းတော်တစ်ခုစီသို့တစ်နှစ် နှစ်ကြိမ်ခန့်လည်ပတ်ပြီး နှစ်နှစ်သုံးနှစ်ကြာသောအခါ အခြားတိုက်နယ်တစ်ခုသို့ ပြောင်းရွှေ့လည်ပတ်ရသည်။ ဤနည်းဖြင့် အသင်းတော်တို့သည် ခြားနားသောတိုက်နယ်ကြီးကြပ်မှူးတို့၏တွေ့ကြုံမှုနှင့် အရည်အချင်းတို့မှ အထူးထူးအပြားပြားအကျိုးခံစားရကြသည်။

တိုက်နယ်ကြီးကြပ်မှူးသည် အသင်းတော်၏ဝိညာဉ်ရေးအခြေအနေနှင့် လုပ်ဆောင်မှုတို့ကိုကြည့်ရှုစစ်ဆေးသည်။ ဟောပြောချက်များလည်းပေးပြီး အသင်းတော်တိုးတက်ရာတိုးတက်ကြောင်းကို သုံးသပ်နိုင်ရန် အကြီးအကဲ၊ ဓမ္မအမှုထမ်းတို့နှင့် တွေ့ဆုံဆွေးနွေးသည်။

တိုက်နယ်ကြီးကြပ်မှူး လည်ပတ်သည့်ရက်သတ္တပတ်အတွင်း ကြီးကြပ်မှူးနှင့်အိမ်ထောင်ရှိက ဇနီးသည်ပါ ဒေသခံယေဟောဝါသက်သေများနှင့်ပေါင်း၍ တစ်အိမ်တက်ဆင်းဓမ္မအမှုဆောင်ခြင်းတွင် တိုးတက်ရန်ကူညီပေးကြသည်။ သူနှင့်ဇနီးတို့သည် စိတ်ဝင်စားသူလူသစ်များကို ယုံကြည်ခြင်း၌အားပေးရန်လည်း လည်ပတ်ကြသည်။ သင့်ထံသို့လည်းခေါ်ဖိတ်နိုင်သည်။

ခရိုင်ကြီးကြပ်မှူးသည်လည်း အလားတူဝိညာဏအရည်အချင်းနှင့် နောက်ခံတွေ့ကြုံမှုရှိသူဖြစ်သည်။ သူသည်တိုက်နယ်တစ်ခုမှ တစ်ခုသို့လှည့်လည်ပြီး တိုက်နယ်စည်းဝေးပွဲများနှင့်စပ်လျဉ်း၍ အပတ်တိုင်းအကျိုးဆောင်သည်။ သူနှင့်သူ့ဇနီးတို့သည် လည်ပတ်ရောက်ရှိနေသည့် တိုက်နယ်ရှိအသင်းတော်တစ်ခုတွင်ရှိသော သက်သေခံများနှင့်လယ်ကွင်းဓမ္မအမှုဆောင်ခြင်းတွင် အတူပါဝင်လုပ်ဆောင်ကြသည်။ သူသည်တိုက်နယ်စည်းဝေးပွဲအစီအစဉ်ကို အပြီးသတ်ပြင်ဆင်ရာ၌ကြပ်မတ်ကြည့်ရှုပြီး စည်းဝေးပွဲတွင် လူထုဟောပြောပွဲအပါအဝင် အခြားဟောပြောချက်များကိုလည်းပေးသည်။

နယ်လှည့်ကြီးကြပ်မှူးတို့၏လည်ပတ်မှုသည် တိုက်နယ်တစ်ခု သို့မဟုတ် အသင်းတစ်ခု၌ ပြီးဆုံးသွားသောအခါ အခြားတိုက်နယ် သို့မဟုတ် ခရိုင်တစ်ခုသို့အလားတူ အစီအစဉ်အတိုင်းဆက်၍ လည်ပတ်ကြပြန်သည်။ အသင်းတော် သို့မဟုတ် တိုက်နယ်အားလုံးလည်ပတ်မိချိန် ၆ လခန့်ကြာပြီး နောက်တစ်ဖန်အလားတူပြန်လည်စတင်လည်ပတ်ကြသည်။

နိုင်ငံအများတွင် နယ်လှည့်ကြီးကြပ်မှူးတို့သည် ကား သို့မဟုတ် လူထုပို့ဆောင်ရေးယာဉ်များဖြင့် ခရီးသွားကြသည်။ အချို့နိုင်ငံများတွင် စက်ဘီး သို့မဟုတ် ခြေလျင်ဖြင့်ပင်သွားရသည်။ နယ်လှည့်ကြီးကြပ်မှူးတို့အတွက် ခရီးစရိတ်ကို အသင်းမကအကုန်ကျခံပြီး သူတို့ဇနီးမောင်နှံကိုယ်ပိုင်သုံးရန် ထောက်ပံ့ကြေးအနည်းငယ်ရရှိကြသည်။ နယ်လှည့်ကြီးကြပ်မှူးနှင့် သူ့ဇနီးတို့အတွက်တည်းခိုရေး၊ စားသောက်ရေးတို့ကိုလည်ပတ်ရောက်ရှိသည့် အသင်းတော်ကတာဝန်ယူလေ့ရှိသည်။

ဤလုပ်ငန်းသည် ကိုယ်ကျိုးစွန့်အနစ်နာခံစိတ်ဓာတ်လိုအပ်သည်။ နယ်လှည့်ကြီးကြပ်မှူးနှင့် ဇနီးတို့သည် အသင်းတော်များအပေါ်ကြီးလေးသောဝန်ထုပ်ဝန်ပိုးမဖြစ်စေဘဲ၊ အသင်းတော်အကျိုးဆောင်ရန် စိတ်ပိုင်းဖြတ်ထားသူများဖြစ်ကြသည်။—၁ သက်သာလောနိတ် ၂:၉။

• ပထမရာစုခရစ်ယာန်အသင်းတော်၌ နယ်လှည့်ကြီးကြပ်မှူးတို့၏ရည်ရွယ်ချက်ကားအဘယ်နည်း။

• ယခုခေတ်နယ်လှည့်ကြီးကြပ်မှူးတို့သည် ဤဓမ္မအမှုအတွက် မည်သို့အရည်အချင်းပြည့်မီလာပြီး အကျိုးဆောင်နိုင်ကြသနည်း။

• ခရိုင်နှင့်တိုက်နယ်ကြီးကြပ်မှူးတို့၏ လုပ်ငန်းနှင့်သူတို့မည်သို့နေထိုင်ကြပုံအကြောင်းဖော်ပြပါ။

[စာမျက်နှာ ၂၀ ပါ ရုပ်ပုံ]

တိုက်နယ်အစည်းအဝေးတွင်ခရိုင်ကြီးကြပ်မှူးဟောပြောချက်ပေးနေပုံ

[စာမျက်နှာ ၂၁ ပါ ရုပ်ပုံများ]

တိုက်နယ်ကြီးကြပ်မှူးသည် တစ်အိမ်တက်ဆင်းဟောပြောခြင်းတွင် ညွှန်ကြားချက်ပေးခြင်း၊ အကြီးအကဲတို့နှင့်ဆွေးနွေးနှီးနှောခြင်း၊ ကျမ်းစာသင်လူသစ်များထံလည်ပတ်ခြင်း၊ အသင်းတော်ကိုသြဝါဒပေးခြင်းတို့ကိုပြုသည်