အခန်း ဆယ့်တစ်

မေရှိယ ကြွလာချိန်ကို ဖော်ထုတ်ခြင်း

၁။ ယေဟောဝါသည် မဟာအချိန်မှတ်ရှင် ဖြစ်တော်မူသောကြောင့် အဘယ်အရာကို ကျွန်ုပ်တို့ စိတ်ချနိုင်သနည်း။

ယေဟောဝါသည် မဟာအချိန်မှတ်ရှင် ဖြစ်တော်မူ၏။ အမှုတော်နှင့်ဆက်နွှယ်သည့် အချိန်ကာလနှင့် ရာသီဥတုမှန်သမျှသည် ကိုယ်တော့်ထိန်းချုပ်မှုအောက်တွင်ရှိ၏။ (တမန်တော် ၁:၇) အဆိုပါ အချိန်ကာလနှင့် ရာသီဥတုများအတွက် သတ်မှတ်ထားသည့် ဖြစ်ရပ်အားလုံးသည် ဧကန်မုချ ဖြစ်ပျက်လာပေမည်။ ပျက်ကွက်ခြင်း အလျှင်းရှိမည်မဟုတ်။

၂၊ ၃။ ဒံယေလသည် အဘယ်ပရောဖက်ပြုချက်ကို ဂရုတစိုက်လေ့လာသနည်း။ ထိုအချိန်တွင် ဗာဗုလုန်ကို အဘယ်အင်ပါယာက အုပ်ချုပ်လျက်ရှိသနည်း။

^၂ ပရောဖက်ဒံယေလသည် သမ္မာကျမ်းစာကို အပတ်တကုတ် လေ့လာသူတစ်ဦးအနေနှင့် ဖြစ်ရပ်များကို ယေဟောဝါ အချိန်ဇယားဆွဲ၍ ဖြစ်ပျက်စေနိုင်စွမ်းရှိကြောင်း ယုံကြည်၏။ ဒံယေလ အထူးစိတ်ဝင်စားသည့်အရာမှာ ယေရုရှလင်မြို့ လူသူကင်းမဲ့ခြင်းနှင့်ပတ်သက်သည့် ပရောဖက်ပြုချက်များပင်ဖြစ်သည်။ ယေရမိသည် သန့်ရှင်းသောမြို့တော် မည်မျှကြာကြာ လူသူကင်းမဲ့နေမည့်အကြောင်း ဘုရားသခင့်ဗျာဒိတ်တော်ကို မှတ်တမ်းတင်ခဲ့ရာ ဒံယေလက ၎င်းပရောဖက်ပြုချက်ကို စေ့စေ့စပ်စပ် ထည့်သွင်းစဉ်းစားခဲ့သည်။ သူဤသို့ ရေးသားထား၏– “ခါလဒဲနိုင်ငံကို အုပ်စိုးရန် မီးဒီးယားလူမျိုး အာရွှေရု၏သား၊ ဒါရိ မင်းမြှောက်ခံရသော ပထမနှစ်၊ နန်းစံပထမနှစ်တွင် ငါဒံယေလသည် ယေရုရှလင်မြို့ လူသူကင်းမဲ့လျက် နေရလတ္တံ့သော နှစ်ပေါင်းခုနစ်ဆယ်တည်းဟူသော နှစ်အရေအတွက်နှင့်စပ်လျဉ်း၍ ပရောဖက်ယေရမိထံ ရောက်လာခဲ့သော ယေဟောဝါ၏ ဗျာဒိတ်တော်နှင့်အညီ ကျမ်းဂန်များအားဖြင့် ရိပ်စားမိ၏။”—ဒံယေလ ၉:၁၊ ၂၊ ကဘ; ယေရမိ ၂၅:၁၁။

^၃ မီးဒီးယားလူမျိုး ဒါရိမင်းသည် ထိုအချိန်တွင် “ခါလဒဲနိုင်ငံကို အုပ်စိုး” လျက်ရှိသည်။ နံရံပေါ်ကလက်ရေးစာကို အနက်ဖွင့်သည့်အချိန်၌ ဒံယေလ၏ အစောပိုင်းဟောကိန်းသည် လျင်မြန်စွာပင် ပြည့်စုံသွားခဲ့သည်။ ယခု ဗာဗုလုန်အင်ပါယာ မရှိတော့ချေ။ ဘီ.စီ.အီး. ၅၃၉ ခုနှစ်တွင် “မီးဒီးယားလူမျိုး၊ ပါးရှားလူမျိုးတို့အား အပ်ပေး” လိုက်ပြီဖြစ်သည်။—ဒံယေလ ၅:၂၄-၂၈၊ ၃၀၊ ၃၁၊ ကဘ။

ဒံယေလ ယေဟောဝါထံ နှိမ့်ချစွာ အသနားခံခြင်း

၄။ (က) ဘုရားသခင်၏ ကယ်တင်ခြင်းကျေးဇူးကို ခံစားနိုင်ရန် အဘယ်အရာ လိုအပ်သနည်း။ (ခ) ဒံယေလသည် ယေဟောဝါထံသို့ မည်သို့စတင်ချဉ်းကပ်သနည်း။

^၄ ယေရုရှလင်မြို့၏ နှစ်ပေါင်း ၇၀ လူသူကင်းမဲ့ခြင်းသည် ကုန်ဆုံးတော့မည်ဖြစ်ကြောင်း ဒံယေလ သဘောပေါက်၏။ ထိုအခါ သူဘာပြုလုပ်သနည်း။ သူကိုယ်တိုင် ဤသို့ပြောပြ၏– “ငါသည် အစာရှောင်ခြင်း၊ လျှော်တေဝတ်ခြင်း၊ ပြာလူးခြင်းတို့နှင့် ဆုတောင်းလျက်၊ တိုးလျှိုးတောင်းပန်လျက် မှန်သောဘုရားသခင် ယေဟောဝါကိုရှာခြင်းငှာ ကိုယ်တော်ဘက်သို့ မျက်နှာမူလိုက်၏။ ငါ၏ဘုရားသခင် ယေဟောဝါထံဆုတောင်း၍ ဝန်ချတောင်းပန်၏။” (ဒံယေလ ၉:၃၊ ၄၊ ကဘ) မှန်ကန်သော နှလုံးသားအခြေအနေရှိပါမှ ဘုရားသခင်၏ သက်ညှာမှုရှိသည့် ကယ်တင်ခြင်းကျေးဇူးကို ခံစားနိုင်သည်။ (ဝတ်ပြုရာ ၂၆:၃၁-၄၆; ၃ ဓမ္မရာဇဝင် ၈:၄၆-၅၃) ယုံကြည်ခြင်း၊ နှိမ့်ချခြင်းသဘော ရှိရမည့်အပြင် ကျေးကျွန်အဖြစ် နယ်နှင်ခံဘဝသို့ ရောက်ရှိစေခဲ့သည့် အပြစ်များမှ လုံးလုံးလျားလျား နောင်တရရန်လည်း လိုအပ်သည်။ ထို့ကြောင့် ဒံယေလသည် အပြစ်ရှိသည့် မိမိလူမျိုး၏ကိုယ်စား ဘုရားသခင်ထံ ချဉ်းကပ်လေ၏။ အဘယ်သို့နည်း။ နောင်တရခြင်းနှင့် စိတ်ရင်းမှန်ခြင်း၏ အမှတ်သင်္ကေတအဖြစ် အစာရှောင်ခြင်း၊ ဝမ်းနည်းပူဆွေးခြင်းနှင့် လျှော်တေအဝတ် ဝတ်ခြင်းအားဖြင့်ဖြစ်သည်။

၅။ ဂျူးလူမျိုးသည် မွေးရပ်ဌာနေသို့ ပြန်ရမည်ဖြစ်ကြောင်း ဒံယေလ အဘယ်ကြောင့် စိတ်ချယုံကြည်နိုင်ခဲ့သနည်း။

^၅ ယေရမိ၏ပရောဖက်ပြုချက်၌ များမကြာမီ ဂျူးလူမျိုးများ သူတို့၏မွေးရပ်ဌာနေသို့ ပြန်ရတော့မည်ဖြစ်ကြောင်း ဖော်ပြထားသောကြောင့် ဒံယေလအဖို့ မျှော်လင့်ချက်ရောင်ခြည် သန်းစေခဲ့သည်။ (ယေရမိ ၂၅:၁၂; ၂၉:၁၀) ကုရုအမည်ရှိသူသည် ပါးရှားနိုင်ငံတွင် ဘုရင်အဖြစ် စိုးစံလျက်ရှိနေပြီ ဖြစ်သောကြောင့် နှိပ်ကွပ်သိမ်းသွင်းခံရသည့် ဂျူးလူမျိုးများ လွတ်မြောက်ချိန် နီးပြီဖြစ်ကြောင်း ဒံယေလ ယုံကြည်မှုအပြည့်ရှိမည်မှာ ယုံမှားဖွယ်မရှိပေ။ ကုရုမင်းသည် ဂျူးလူမျိုးအား လွတ်မြောက်ရေးပေး၍ ယေရုရှလင်မြို့နှင့် ဗိမာန်တော်ကို ပြန်လည်တည်ဆောက်စေမည်ဟု ဟေရှာယပရောဖက်ပြုခဲ့သည် မဟုတ်လော။ (ဟေရှာယ ၄၄:၂၈–၄၅:၃) သို့သော်လည်း မည်သို့ဖြစ်ပျက်လာမည်ကို ဒံယေလ မသိချေ။ ထို့ကြောင့် သူသည် ယေဟောဝါထံ အဆက်မပြတ် အသနားခံတောင်းလျှောက်လေ၏။

၆။ ဒံယေလက ဆုတောင်းရာတွင် အဘယ်အချက်ကို ထည့်သွင်းဝန်ခံခဲ့သနည်း။

^၆ ဒံယေလသည် ဘုရားသခင်၏ ကရုဏာတော်နှင့် မေတ္တာကျေးဇူးတော်ကို သတိပြုစေ၏။ ဂျူးလူမျိုးသည် ပုန်ကန်ခြင်း၊ ယေဟောဝါ၏ပညတ်တော်များမှ သွေဖည်ခြင်း၊ ကိုယ်တော့်ပရောဖက်များကို လျစ်လျူရှုခြင်းအားဖြင့် အပြစ်ပြုမိကြောင်း စိတ်နှိမ့်ချစွာဖြင့် သူဝန်ခံခဲ့သည်။ ဘုရားသခင်သည် ‘သူတို့၏ သစ္စာမဲ့မှုကြောင့် သူတို့ကို’ တရားသဖြင့် ‘ကွဲလွင့်စေ’ တော်မူခဲ့သည်။ ဒံယေလ ဤသို့ဆုတောင်း၏– “အို ယေဟောဝါ၊ ကိုယ်တော်ကို ပြစ်မှားမိသောကြောင့်၊ ဘိုးဘေးတို့မှစ၍ ရှင်ဘုရင်၊ မှူးမတ်တို့နှင့် အကျွန်ုပ်တို့သည် မျက်နှာပျက်ခြင်းနှင့် ဆိုင်ကြပါ၏။ အကျွန်ုပ်တို့သည် ကိုယ်တော်ကို ပုန်ကန်မိကြသည့်အတွက် အကျွန်ုပ်တို့၏ဘုရားသခင် ယေဟောဝါသည် ကရုဏာပြခြင်း၊ အပြစ်လွှတ်ခြင်းအခွင့်နှင့် ဆိုင်တော်မူ၏။ ကိုယ်တော်၏အမှုတော်ထမ်း ပရောဖက်တို့၏လက်ဖြင့် ကျွန်ုပ်တို့ရှေ့၌ ထားတော်မူသော ပညတ်တရားတော်လမ်းသို့လိုက်ခြင်းငှာ အကျွန်ုပ်တို့၏ဘုရားသခင် ယေဟောဝါ၏ ဗျာဒိတ်တော်အသံကို နားမထောင်ဘဲ နေကြပါပြီ။ ဣသရေလလူမျိုး အပေါင်းတို့လည်း ဗျာဒိတ်တော်အသံကို နားမထောင်ဘဲ လွဲသွား၍၊ တရားတော်ကို လွန်ကျူးလျက် ကိုယ်တော်ကို ပြစ်မှားကြသောကြောင့် မှန်သောဘုရားသခင်၏အမှုတော်ထမ်း မောရှေ၏ပညတ္တိကျမ်း၌ ရေးထားသောကျိန်စာနှင့် ကျိန်ဆိုချက်တို့ကို အကျွန်ုပ်တို့အပေါ်သို့ သွန်းလောင်းတော်မူပါပြီ။”—ဒံယေလ ၉:၅-၁၁၊ ကဘ; ထွက်မြောက်ရာ ၁၉:၅-၈; ၂၄:၃၊ ၇၊ ၈။

၇။ ဂျူးလူမျိုးများအား သုံ့ပန်းဘဝ ရောက်စေခြင်းကိစ္စတွင် ယေဟောဝါသည် တရားနည်းလမ်းကျစွာ ပြုမူတော်မူသည်ဟု အဘယ်ကြောင့် ဆိုနိုင်သနည်း။

^၇ ဘုရားသခင်က မိမိ၏အမိန့်တော်ကို နာမခံ၊ ဖွဲ့တော်မူသည့် ပဋိညာဉ်ကို ပမာမထားပါက တွေ့ကြုံရမည့် ဆိုးကျိုးများကို ဣသရေလလူမျိုးအား သတိပေးထားတော်မူ၏။ (ဝတ်ပြုရာ ၂၆:၃၁-၃၃; တရားဟောရာ ၂၈:၁၅; ၃၁:၁၇) ဘုရားသခင့် အရေးယူဆောင်ရွက်မှုများသည် တရားနည်းလမ်းကျကြောင်း ဒံယေလ အသိအမှတ်ပြုလျက် ဤသို့ဆို၏– “ယေရုရှလင်မြို့၌ ဘေးသင့်ရောက်သကဲ့သို့ ကောင်းကင်တစ်ပြင်လုံးအောက် မသင့်ရောက်စဖူးသော ကြီးစွာသောဘေးဥပဒ်ကို အကျွန်ုပ်တို့ အပေါ်သို့ သင့်ရောက်စေခြင်းအားဖြင့် အကျွန်ုပ်တို့တစ်ဖက်၊ အုပ်စိုးသော တရားမင်းတို့တစ်ဖက်၌ မိန့်ဆိုသော ဗျာဒိတ်တော်ကို တည်စေတော်မူပြီ။ မောရှေ၏ပညတ္တိကျမ်း၌ ရေးထားသည့်အတိုင်း ဘေးဥပဒ်ရှိသမျှသည် အကျွန်ုပ်တို့အပေါ်တွင် သင့်ရောက်ပြီးဖြစ်သော်လည်း ဒုစရိုက်ကိုကြဉ်ရှောင်၍ ကိုယ်တော်၏သစ္စာတော်ကို ထိုးထွင်းသိမြင်ခြင်းအားဖြင့် အကျွန်ုပ်တို့၏ဘုရားသခင် ယေဟောဝါ၏မျက်နှာသာကို မရှာဘဲ နေကြပါပြီ။ အကျွန်ုပ်တို့၏ဘုရားသခင် ယေဟောဝါသည် ပြုတော်မူသမျှ၌ ဖြောင့်မတ်တော်မူသော်လည်း အကျွန်ုပ်တို့မူကား ဗျာဒိတ်တော်အသံကို နားမထောင်ဘဲနေကြသောကြောင့် ယေဟောဝါသည် ထိုဘေးဥပဒ်ကို သတိဝီရိယကြီးစွာဖြင့် စောင့်ကြပ်လျက် နောက်ဆုံးတွင် အကျွန်ုပ်တို့အပေါ်သို့ သင့်ရောက်စေတော်မူပြီ။”—ဒံယေလ ၉:၁၂-၁၄၊ ကဘ။

၈။ ဒံယေလသည် အဘယ်အချက်များအပေါ် အခြေပြုလျက် အသနားခံသနည်း။

^၈ ဒံယေလသည် မိမိအမျိုးသားချင်းတို့၏ လုပ်ဆောင်မှုများ လျော်ကန်သင့်မြတ်ကြောင်း ပြသရန် မကြိုးစားချေ။ “အကျွန်ုပ်တို့သည် ပြစ်မှားမိပါပြီ၊ ဆိုးသွမ်းစွာ ပြုမိပါပြီ” ဟုမဆိုင်းမတွ ဝန်ခံခဲ့သည့်အတိုင်း ဂျူးလူမျိုး နယ်နှင်ခံရခြင်းသည် တရားသဖြင့် ထိုက်ထိုက်တန်တန် ခံရခြင်းဖြစ်ပေသည်။ (ဒံယေလ ၉:၁၅၊ ကဘ) သူသည် ဒုက္ခဆင်းရဲမှ လွတ်မြောက်ရေးအတွက်သာ စိတ်စောနေခြင်းလည်းမရှိပေ။ ယေဟောဝါ၏ဘုန်းတော်နှင့် ဂုဏ်တော်တို့အပေါ် အခြေပြုလျက် အသနားခံ၏။ ဘုရားသခင်အနေဖြင့် ဂျူးလူမျိုး၏ အပြစ်ကိုဖြေလွှတ်၍ သူတို့အား မွေးရပ်ဌာနေသို့ ပြန်လည်ပို့ဆောင်ခြင်းဖြင့် ယေရမိအားဖြင့် ထားရှိသော ကတိတော်ကို ပြည့်စုံစေမည့်အပြင် မိမိ၏ သန့်ရှင်းသောနာမတော်ကိုပါ သိဒ္ဓိတင်နိုင်မည်ဖြစ်သည်။ ဒံယေလ ဤသို့လျှောက်လဲ၏– “အို ယေဟောဝါ၊ ဖြောင့်မတ်တော်မူသောအမှု ရှိသမျှနှင့်အညီ သန့်ရှင်းသောတောင်တော်၊ ယေရုရှလင်မြို့တော်မှ အမျက်တော်နှင့် ပြင်းစွာသော ဒေါသကို လွှဲတော်မူပါ။ အကြောင်းမူကား၊ အကျွန်ုပ်တို့၏ အပြစ်နှင့် ဘိုးဘေးတို့၏ ဒုစရိုက်များကြောင့် ယေရုရှလင်မြို့နှင့် လူမျိုးတော်သည် ပတ်ဝန်းကျင်၌ ရှိသမျှသောသူတို့တွင် ကဲ့ရဲ့စရာဖြစ်ပါ၏။”—ဒံယေလ ၉:၁၆၊ ကဘ။

၉။ (က) ဒံယေလသည် အဘယ်တိုးလျှိုးတောင်းပန်ချက်များဖြင့် သူ၏ဆုတောင်းချက်ကို နိဂုံးချုပ်သနည်း။ (ခ) အဘယ်အရာအတွက် ဒံယေလ များစွာစိတ်မကောင်း ဖြစ်မိသနည်း။ သို့ရာတွင် သူသည် ဘုရားသခင့်နာမတော်ကိုလေးစားကြောင်း မည်သို့တင်ပြသနည်း။

^၉ ဒံယေလသည် စိတ်ထက်သန်စွာဖြင့် ဤသို့ဆက်လက် ဆုတောင်း၏– “အို အကျွန်ုပ်တို့၏ ဘုရားသခင်၊ ကျွန်တော်မျိုးပြုသော ပတ္ထနာစကားနှင့် အသနားတော်ခံချက်ကို နားညောင်းတော်မူပါ။ လူသူကင်းမဲ့လျက်ရှိသော သန့်ရှင်းရာဌာနတော်ကို ယေဟောဝါအတွက် မျက်နှာတော်ရောင်ခြည် ထွန်းလင်းတော်မူပါ။ အို အကျွန်ုပ်၏ ဘုရားသခင်၊ နားတော်ကိုလှည့်၍ နားညောင်းတော်မူပါ။ မျက်စိတော်ကိုဖွင့်၍ ကျွန်တော်တို့၏ လူသူကင်းမဲ့ရာ အခြေအနေများကိုလည်းကောင်း၊ နာမတော်ဖြင့် သမုတ်သောမြို့ကိုလည်းကောင်း ကြည့်ရှုတော်မူပါ။ အကျွန်ုပ်တို့သည် ကိုယ့်ဖြောင့်မတ်ခြင်း လုပ်ဆောင်ချက်များကို အမှီမပြုဘဲ၊ မဟာကရုဏာတော်ကိုသာ အမှီပြု၍ ရှေ့တော်၌ အသနားတော်ခံကြပါ၏။ အို ယေဟောဝါ၊ နားညောင်းတော်မူပါ။ အို ယေဟောဝါ၊ ဖြေလွှတ်တော်မူပါ။ အို ယေဟောဝါ၊ အာရုံပြု၍ စီရင်တော်မူပါ။ အကျွန်ုပ်၏ ဘုရားသခင်၊ ကိုယ်တော်၏မြို့၊ ကိုယ်တော်၏ လူမျိုးတော်သည် ကိုယ်တော်၏နာမတော်ဖြင့် သမုတ်ခံရသည်ဖြစ်၍ ကိုယ်တော့်အတွက် ဆိုင်းလင့်တော်မမူပါနှင့်။” (ဒံယေလ ၉:၁၇-၁၉၊ ကဘ) အကယ်၍သာ ဘုရားသခင်သည် အပြစ်မလွှတ်ဘဲ မိမိလူမျိုးတော်ကို နယ်နှင်ခံဘဝတွင် ဆက်လက်ထားရှိပြီး သန့်ရှင်းသောမြို့တော် ယေရုရှလင်မြို့ကိုလည်း အချိန်အကန့်အသတ်မရှိ လူသူကင်းမဲ့သည့်အခြေ၌ ဆက်လက်ထားရှိမည်ဆိုလျှင် တိုင်းနိုင်ငံများက ကိုယ်တော်အား စကြဝဠာအချုပ်အခြာအာဏာပိုင်အဖြစ် မှတ်ယူကြပါမည်လော။ ယေဟောဝါသည် ဗာဗုလုန်နတ်ဘုရားများကိုပင် တွန်းလှန်နိုင်သည့်တန်ခိုးမရှိဟု သူတို့သဘောရကြမည် မဟုတ်လော။ သို့ဖြစ်လျှင်၊ ယေဟောဝါ၏နာမတော်သည် ကဲ့ရဲ့ပြစ်တင်ခြင်းခံရမည်ဖြစ်ရာ ဒံယေလ များစွာစိတ်မကောင်း ဖြစ်မိလေသည်။ ဒံယေလကျမ်းတွင် ဘုရားသခင့်နာမတော် ယေဟောဝါကို ၁၉ ကြိမ်တွေ့ရှိရသည့်အနက် ၁၈ ကြိမ်မှာ ဤဆုတောင်းချက်နှင့် ဆက်နွှယ်လျက်ရှိသည်!

ဂါဗြေလ လျင်မြန်စွာ ရောက်ရှိလာခြင်း

၁၀။ (က) ဒံယေလထံ မည်သူ့ကို စေလွှတ်ခဲ့သနည်း။ အဘယ်ကြောင့်နည်း။ (ခ) ဒံယေလက ဂါဗြေလကို “လူ” ဟုအဘယ်ကြောင့် ဆိုသနည်း။

^၁၀ ဒံယေလ ထိုသို့ဆုတောင်းလျက်နေစဉ်တွင် ကောင်းကင်တမန် ဂါဗြေလ ပေါ်လာ၍ ဤသို့ဆို၏– “အချင်းဒံယေလ၊ သင်သည် ထိုးထွင်းသိမြင် နားလည်စေရန် ယခု ငါရောက်လာပြီ။ သင်သည် အသနားတော်ခံစပြုစဉ်၌ပင်၊ ဗျာဒိတ်တော်ကို ထုတ်ဆင့်တော်မူသည်ဖြစ်၍ သင်သည် အလွန်နှစ်သက်ရသူဖြစ်သဖြင့် သင့်အား ဖော်ပြခြင်းငှာ၊ ငါကိုယ်တိုင် ရောက်လာပြီ။ ထို့ကြောင့်၊ ဤအမှုကို ဆင်ခြင်၍ မြင်ရသည့်ရူပါရုံကို နားလည်လော့။” သို့သော် ဒံယေလက “ဂါဗြေလ” ကို “လူ” ဟုအဘယ်ကြောင့် ခေါ်ဆိုသနည်း။ (ဒံယေလ ၉:၂၀-၂၃၊ ကဘ) စောစောပိုင်းက မြင်ခဲ့ရသည့် ဆိတ်ထီးနှင့် သိုးထီးရူပါရုံကိုနားလည်ရန် ဒံယေလ ဆင်ခြင်နေစဉ် “လူ့သဏ္ဌာန်ရှိသူ တစ်ဦးသည်” သူ့ရှေ့၌ ပေါ်လာ၏။ ဤသူကား ဒံယေလအား ထိုးထွင်းသိမြင်ဉာဏ်ပေးရန် စေလွှတ်ခံရသည့် ကောင်းကင်တမန် ဂါဗြေလပင်တည်း။ (ဒံယေလ ၈:၁၅-၁၇၊ ကဘ) အလားတူစွာ ဒံယေလဆုတောင်းပြီးနောက် ဤကောင်းကင်တမန်သည် လူကဲ့သို့သောသဏ္ဌာန်ဖြင့် သူ့ထံသို့ရောက်လာပြီး လူတစ်ဦးနှင့်တစ်ဦး စကားပြောသကဲ့သို့ သူ့အားစကားပြော၏။

၁၁၊ ၁၂။ (က) ဗာဗုလုန်မြို့တွင် ယေဟောဝါ၏ဗိမာန်တော် သို့မဟုတ် ယဇ်ပလ္လင် မရှိသော်လည်း ကြည်ညိုကိုင်းရှိုင်းသည့် ဂျူးလူမျိုးအနေဖြင့် ပညတ်တရားပြဋ္ဌာန်းထားသည့် ပူဇော်သကာများကို အလေးထားကြောင်း မည်သို့ပြသကြသနည်း။ (ခ) ဒံယေလကို “အလွန်နှစ်သက်ရသူ” ဟုအဘယ်ကြောင့် ခေါ်သနည်း။

^၁၁ ဂါဗြေလသည် “ညဦးယံ ပူဇော်ချိန်တွင်” ရောက်လာ၏။ ယေဟောဝါ၏ယဇ်ပလ္လင်သည် ယေရုရှလင်မြို့ရှိ ဗိမာန်တော်နှင့်အတူ ဖျက်ဆီးခံရပြီး ဂျူးလူမျိုးလည်း တိတ္ထိဗာဗုလုန်လူမျိုး၏ သုံ့ပန်းများ ဖြစ်နေကြသည်။ ထို့ကြောင့် ဗာဗုလုန်ပြည်ရှိ ဂျူးလူမျိုးသည် ဘုရားသခင်ထံပူဇော်ခြင်း မပြုနိုင်ကြချေ။ သို့သော်လည်း မောရှေ၏ပညတ္တိကျမ်း၌ ပြဋ္ဌာန်းထားသည့် ပူဇော်ချိန်တွင် ဗာဗုလုန်ရှိ ကြည်ညိုကိုင်းရှိုင်းသည့် ဂျူးလူမျိုးအနေဖြင့် ယေဟောဝါအားချီးမွမ်း၍ တိုးလျှိုးတောင်းပန်ရန် လျော်ကန်သင့်မြတ်ပေသည်။ ဒံယေလသည် ဘုရားသခင်အား အလွန်တရာ ကြည်ညိုကိုင်းရှိုင်းသူ ဖြစ်သောကြောင့် “အလွန်နှစ်သက်ရသူ” ဟုအခေါ်ခံရ၏။ “ပတ္ထနာကို နားညောင်းတော်မူသောအရှင်” ယေဟောဝါသည် ဒံယေလကို စိတ်တော်နှင့်တွေ့သဖြင့် သူ၏ ယုံကြည်ခြင်းပြည့်ဝသော ဆုတောင်းချက်ကိုဖြေကြားရန် ဂါဗြေလကို အလျင်အမြန် စေလွှတ်ခဲ့ခြင်းဖြစ်သည်။—ဆာလံ ၆၅:၂၊ သမ္မာ။

^၁၂ ယေဟောဝါထံ ဆုတောင်းခြင်းကြောင့် အသက်အန္တရာယ်နှင့် ရင်ဆိုင်ရသည့်အချိန်၌ပင် ဒံယေလသည် ဘုရားသခင်ထံ တစ်နေ့သုံးကြိမ် မပြတ်ဆုတောင်းခဲ့သည်။ (ဒံယေလ ၆:၁၀၊ ၁၁) သူ့အား ယေဟောဝါအလွန်နှစ်သက်ရသည်မှာ အဆန်းမဟုတ်ပေ! ဆုတောင်းခြင်းအပြင် ဒံယေလသည် ဘုရားသခင့်နှုတ်ကပါဌ်တော်ကို လေးနက်စွာ ဆင်ခြင်တွေးတောခြင်းကြောင့် ယေဟောဝါ၏အလိုတော်ကို ပိုင်းခြားသိမြင်နိုင်ခဲ့သည်။ ဒံယေလသည် ဆုတောင်းခြင်းအမှု၌ စွဲမြဲသည့်အပြင် နားညောင်းခြင်းခံရရန် ယေဟောဝါထံ မည်သို့နည်းမှန်လမ်းကျ ချဉ်းကပ်ရမည့်အကြောင်းလည်းသိရှိ၏။ သူသည် ဘုရားသခင်၏ ဖြောင့်မတ်ခြင်းတရားကို အသားပေးဖော်ပြသည်။ (ဒံယေလ ၉:၇၊ ၁၄၊ ၁၆) ရန်သူများက မိမိ၌အပြစ်ရှာ၍ မတွေ့နိုင်ကြသော်လည်း ဒံယေလမူ မိမိသည် ဘုရားသခင့်အမြင်တွင် အပြစ်သားတစ်ဦးဖြစ်ကြောင်း သိရှိပြီး မိမိအပြစ်အတွက် ဝန်ချတောင်းပန်ရန် အဆင်သင့်ရှိခဲ့သည်။—ဒံယေလ ၆:၄; ရောမ ၃:၂၃။

အပြစ်ကို အဆုံးရောက်စေရန် “သီတင်း ခုနစ်ဆယ်”

၁၃၊ ၁၄။ (က) ဂါဗြေလက ဒံယေလအား အဘယ်အရေးကြီးသည့် သတင်းအချက်အလက်ကို အသိပေးခဲ့သနည်း။ (ခ) “သီတင်း ခုနစ်ဆယ်” သည် မည်မျှတာရှည်သနည်း။ ကျွန်ုပ်တို့ မည်သို့သိရသနည်း။

^၁၃ စွဲစွဲမြဲမြဲဆုတောင်းသည့် ဒံယေလသည် မည်မျှအားတက်ဖွယ်ကောင်းသော ဖြေကြားချက်ကို ရရှိခဲ့သည်တကား! ယေဟောဝါက ဂျူးလူမျိုးသည် သူတို့၏မွေးရပ်ဌာနေသို့ ပြန်ရမည်ဖြစ်ကြောင်း ဒံယေလအား စိတ်ချစေရုံမက သာ၍အရေးပါသည့်အမှု—ကြိုဟောထားသည့် မေရှိယ ပေါ်ထွန်းခြင်း—ကိုပါ ထိုးထွင်းသိမြင်စေတော်မူ၏။ (ကမ္ဘာဦး ၂၂:၁၇၊ ၁၈; ဟေရှာယ ၉:၆၊ ၇) ဂါဗြေလက ဒံယေလအား ဤသို့ပြောကြား၏– “လွန်ကျူးမှုကို အပြီးသတ်၍ အပြစ်ကို အဆုံးရောက်စေလျက် ဒုစရိုက်ကို ဖြေရှင်းခြင်းငှာလည်းကောင်း၊ ထာဝရဖြောင့်မတ်ခြင်းကိုသွင်း၍ ရူပါရုံနှင့် အနာဂတ်စကားကို တံဆိပ်ခတ်လျက် သန့်ရှင်းတကာ့ သန့်ရှင်းရာဌာနကို ဘိသိက်သွန်းစေခြင်းငှာလည်းကောင်း သင်၏အမျိုးသားချင်းနှင့် သင်၏သန့်ရှင်းသောမြို့အဖို့ သီတင်းခုနစ်ဆယ်ကို ပြဋ္ဌာန်းတော်မူလေပြီ။ ယေရုရှလင်မြို့ကို တစ်ဖန်ထူထောင်၍ ပြန်လည်တည်ဆောက်စေခြင်းငှာ အမိန့်တော် ထုတ်ဆင့်သည့်နေ့မှစ၍ ဦးစီးခေါင်းဆောင် မေရှိယ ပေါ်ထွန်းသည့်တိုင်အောင်၊ ခုနစ်သီတင်းအပြင် ခြောက်ဆယ့်နှစ်သီတင်း ကြာလိမ့်မည်အကြောင်း သိမှတ်၍ ထိုးထွင်းသိမြင်လော့။ ထိုမြို့တော်သည် ပြည်သူ့ရင်ပြင်၊ ကျုံးနှင့်တကွ တစ်ဖန် တည်ထောင်လိမ့်မည်ဖြစ်သော်လည်း အကျပ်အတည်းကာလ၌ ဖြစ်လိမ့်မည်။”—ဒံယေလ ၉:၂၄၊ ၂၅၊ ကဘ။

^၁၄ ဤကား အမှန်ပင် သတင်းကောင်းဖြစ်၏! ယေရုရှလင်မြို့ ပြန်လည်တည်ဆောက်၍ ဗိမာန်တော်အသစ်တွင် ကိုးကွယ်ဝတ်ပြုမှု ပြန်လည်ပြုလုပ်လာနိုင်မည့်အပြင် “ဦးစီးခေါင်းဆောင် မေရှိယ” သည်လည်း တိကျသည့်အချိန်တွင် ပေါ်ထွန်းလိမ့်မည်။ ဤအမှုတို့သည် “သီတင်း ခုနစ်ဆယ်” အတွင်း ဖြစ်ပျက်လာလိမ့်မည်။ ဂါဗြေလက နေ့အကြောင်း ဖော်ပြခြင်းမရှိသောကြောင့် ဤသီတင်းတို့မှာ ခုနစ်ရက်စီရှိသည့် သီတင်းပတ်များမဟုတ်ပေ။ ထိုသို့ဖြစ်ပါက ရက်ပေါင်း ၄၉၀ နှင့်ညီမည်ဖြစ်ရာ တစ်နှစ်နှင့် လေးလခန့်သာကြာမည်ဖြစ်သည်။ ယေရုရှလင်မြို့ကို “ပြည်သူ့ရင်ပြင်၊ ကျုံးနှင့်တကွ” ပြန်လည်တည်ဆောက်မည်ဟု ကြိုဟောထားသည့်လုပ်ငန်း ပြီးစီးရန်အတွက်ပင် ထိုထက်မက အချိန်ယူခဲ့ရသည်။ ၎င်းသီတင်းများမှာ နှစ်သီတင်းများဖြစ်သည်။ တစ်သီတင်းစီသည် ခုနစ်နှစ်စီ တာရှည်ကြောင်းကို ခေတ်သစ်ဘာသာပြန်ကျမ်း အတော်များများက ဖော်ပြကြသည်။ သာဓကအနေဖြင့်၊ ဂျူးပုံနှိပ်ထုတ်ဝေရေးအသင်းမှ ပုံနှိပ်ထုတ်ဝေသည့် တာနာ့ခ်—သန့်ရှင်းသောကျမ်းစာ တွင် ဒံယေလ ၉:၂၄ ၏အောက်ခြေမှတ်ချက်၌ “နှစ်သီတင်း ခုနစ်ဆယ်” ဟူသောပြန်ဆိုချက်တစ်မျိုးကို ဖော်ပြထားသည်။ မက်ကွာယား တည်းဖြတ်သည့် မြန်မာကျမ်းစာ သမ္မာကျမ်းစာတော် တွင် “နှစ် သီတင်းပေါင်း ခုနစ်ဆယ်ကို သင်၏အမျိုးသားချင်းအဖို့နှင့် သင်၏သန့်ရှင်းသောမြို့အဖို့ ပြဋ္ဌာန်းတော်မူခြင်းရှိ၏” ဟူ၍ဖတ်ရ၏။ အမေရိကန် ဘာသာပြန်ကျမ်း၊ မောဖက်နှင့် ရောသဟမ်းတို့ပြန်ဆိုသည့် ဘာသာပြန်ကျမ်းများ၌လည်း ဆင်တူယိုးမှား ပြန်ဆိုချက်များကို တွေ့ရှိရသည်။

၁၅။ “သီတင်း ခုနစ်ဆယ်” ကိုအဘယ်ကာလသုံးပိုင်း ပိုင်းခြားထားသနည်း။ ၎င်းတို့ မည်သည့်အချိန်တွင် အစပြုသနည်း။

^၁၅ ကောင်းကင်တမန်၏ စကားအရ “သီတင်း ခုနစ်ဆယ်” ကို ကာလသုံးပိုင်း ပိုင်းခြားထားသည်– (၁) “ခုနစ် သီတင်း၊” (၂) “ခြောက်ဆယ့်နှစ် သီတင်း၊” နှင့် (၃) တစ်သီတင်းတို့ဖြစ်ကြသည်။ ထိုကာလသုံးပိုင်းမှာ ၄၉ နှစ်၊ ၄၃၄ နှစ်နှင့် ၇ နှစ်—စုစုပေါင်း ၄၉၀ နှစ်—ဖြစ်သည်။ စိတ်ဝင်စားဖွယ် ကောင်းသည်မှာ ပြင်ဆင်တည်းဖြတ်ထားသည့် အင်္ဂလိပ် သမ္မာကျမ်းစာ တွင် “နှစ်ပေါင်း ခုနစ်ဆယ် ခုနစ်လီကို သင်၏လူမျိုးနှင့် သင်၏သန့်ရှင်းရာမြို့အဖို့ သတ်မှတ်ထား၏” ဟူ၍ဖတ်ရသည်။ ဂျူးလူမျိုးသည် ဗာဗုလုန်တွင် နှစ်ပေါင်း ၇၀ နယ်နှင်ခံ၍ ဒုက္ခဆင်းရဲခံပြီးနောက်တွင် ဘုရားသခင်၏ အထူးမျက်နှာသာတော်ကို နှစ်ပေါင်း ၄၉၀၊ သို့မဟုတ် နှစ်ပေါင်း ၇၀ အမြောက် ၇ လီတိုင်တိုင် ခံစားရကြမည်ဖြစ်သည်။ ဤကာလ အစပြုသည့်အမှတ်သည် “ယေရုရှလင်မြို့ကို တစ်ဖန်ထူထောင်၍ ပြန်လည်တည်ဆောက်စေခြင်းငှာ အမိန့်တော် ထုတ်ဆင့်သည့်နေ့” ဖြစ်သည်။ အဘယ်အချိန် ဖြစ်မည်နည်း။

“သီတင်း ခုနစ်ဆယ်” အစပြုခြင်း

၁၆။ ကုရုမင်း၏အမိန့်စာတွင် ဖော်ပြသည့်အတိုင်း ဂျူးလူမျိုးအား အဘယ်ရည်ရွယ်ချက်ဖြင့် မွေးရပ်ဌာနေသို့ ပြန်စေခြင်းဖြစ်သနည်း။

^၁၆ “သီတင်း ခုနစ်ဆယ်” ၏အစနှင့်ပတ်သက်၍ သတိပြုထိုက်သော ဖြစ်ရပ်သုံးခုကို သုံးသပ်သင့်သည်။ ပထမတစ်ခုမှာ ဂျူးလူမျိုးအား မွေးရပ်ဌာနေသို့ပြန်ရန် ကုရုမင်း အမိန့်ထုတ်ဆင့်ခဲ့သည့် ဘီ.စီ.အီး. ၅၃၇ ခုနှစ်တွင် ဖြစ်ပျက်ခဲ့သည်။ အမိန့်စာ၌ ဤသို့ဖတ်ရသည်– “ပေရသိရှင်ဘုရင် ကုရုမင်း မိန့်တော်မူသည်ကား ‘ကောင်းကင်ဘုံ၏အရှင် ဘုရားသခင် ထာဝရဘုရားသည် မြေကြီးပေါ်မှာ တိုင်းနိုင်ငံရှိသမျှတို့ကို ငါ့အားပေးတော်မူသည်ဖြစ်၍ ယုဒပြည် ယေရုရှလင်မြို့၌ အိမ်တော်ကို ငါတည်ဆောက်ရမည်အကြောင်း မှာထားတော်မူပြီ။ သင်တို့တွင် အဘယ်သူသည် ဘုရားသခင်၏လူဖြစ်သနည်း။ ထိုသူနှင့်အတူ ဘုရားသခင် ရှိတော်မူပါစေသော။ ယုဒပြည် ယေရုရှလင်မြို့သို့သွား၍ ဣသရေလအမျိုး၏ ဘုရားသခင် ထာဝရဘုရား၏ အိမ်တော်ကိုတည်ဆောက်စေ။ ယေရုရှလင်မြို့၌ ရှိတော်မူသော ဘုရားသည် ဘုရားသခင်ဖြစ်တော်မူ၏။ ဘုရားသခင်၏လူ တည်းခိုရာ အရပ်ရပ်၌ နေသောသူတို့သည် ယေရုရှလင်မြို့မှာ ရှိတော်မူသော ဘုရားသခင်၏အိမ်တော်အဖို့ အလိုလိုလှူသော အလှူမှတစ်ပါး ရွှေ၊ ငွေ၊ ဥစ္စာ၊ တိရစ္ဆာန်နှင့် မစစေ’ ဟုမိန့်တော်မူ၏။” (ဧဇရ ၁:၂-၄) ဤအမိန့်၏ တိကျသောရည်ရွယ်ချက်မှာ ‘ယေဟောဝါ၏အိမ်တော်’ ဖြစ်သည့် ဗိမာန်တော်ကို မူလနေရာ၌ ပြန်လည်တည်ဆောက်ရန်ပင်ဖြစ်သည်။

၁၇။ ဧဇရအားပေးလိုက်သည့် စာချွန်လွှာအရ ဧဇရသည် အဘယ်အတွက် ယေရုရှလင်မြို့သို့ ခရီးထွက်ရသနည်း။

^၁၇ ဒုတိယဖြစ်ရပ်သည် ပါးရှားဘုရင် အာတဇေရဇ် (ဇားခ်စီးဇ်၏သား အာတဇေရဇ် လောင်ဂီမဲင်းနာ့စ်) နန်းစံ သတ္တမနှစ်တွင် ဖြစ်ပျက်ခဲ့သည်။ ထိုအချိန်တွင်၊ ကျမ်းကူးဆရာ ဧဇရသည် ဗာဗုလုန်မြို့မှ ယေရုရှလင်မြို့သို့ လေးလကြာသည့်ခရီးကို နှင်ခဲ့သည်။ သူသည် ရှင်ဘုရင်ထံမှ အထူးစာချွန်လွှာကို ယူဆောင်သွားခဲ့သော်လည်း ၎င်းစာ၌ ယေရုရှလင်မြို့ကို ပြန်လည်တည်ဆောက်ရန် အခွင့်အာဏာ အပ်နှင်းခြင်းမရှိချေ။ ဧဇရ၏တာဝန်ခန့်အပ်ချက်မှာ ‘ယေဟောဝါ၏အိမ်တော်ကို တင့်တယ်စေရန်’ အတွက်သာ ကန့်သတ်ထားသည်။ သို့ဖြစ်သောကြောင့် ၎င်းစာချွန်လွှာတွင် ရွှေ၊ ငွေ၊ အမွန်အမြတ်ထားသော ခွက်ဖလားများနှင့် ဗိမာန်တော်တွင် ကိုးကွယ်ဝတ်ပြုမှုကို ထောက်ပံ့ရန် ဂျုံ၊ စပျစ်ရည်၊ ဆီ၊ ဆားတို့နှင့်ပတ်သက်သည့် အလှူများအကြောင်းကိုသာ ရည်ညွှန်းဖော်ပြထားသည်။—ဧဇရ ၇:၆-၂၇။

၁၈။ အဘယ်သတင်းကြောင့် နေဟမိ စိတ်အနှောင့်အယှက် ဖြစ်ရသနည်း။ ရှင်ဘုရင် အာတဇေရဇ်က ယင်းအကြောင်းကို မည်သို့သိရှိရသနည်း။

^၁၈ တတိယဖြစ်ရပ်သည် ၁၃ နှစ်အကြာ၊ ပါးရှားဘုရင် အာတဇေရဇ် နန်းစံ ၂၀ မြောက်နှစ်တွင် ဖြစ်ပျက်ခဲ့သည်။ ထိုစဉ်တွင် နေဟမိသည် “ရှုရှန်နန်းတော်” ၌ ဖလားတော်ဝန်အဖြစ် အမှုထမ်းလျက်ရှိသည်။ ဗာဗုလုန်ပြည်မှ ပြန်လာကြသည့် အကြွင်းအကျန်တို့သည် ယေရုရှလင်မြို့ကို အထိုက်အလျောက်အားဖြင့် ပြန်လည်တည်ဆောက်ပြီး ဖြစ်သော်လည်း ကျေနပ်အားရစရာ မကောင်းလှသေးပေ။ ‘ယေရုရှလင်မြို့ရိုးသည် ပြိုပျက်လျက်၊ မြို့တံခါးလည်း မီးလောင်၍ကုန်ပြီ’ ဖြစ်ကြောင်း နေဟမိကြားသိရ၏။ ယင်းအတွက် သူအလွန် စိုးရိမ်ပူပန်၍ စိတ်နှလုံးမသာမယာ ဖြစ်လေ၏။ အဘယ်ကြောင့် မျက်နှာညှိုးငယ်ရကြောင်း မေးမြန်းခံရသည့်အခါ နေဟမိက “ရှင်ဘုရင် အသက်တော် အစဉ်အမြဲရှင်ပါစေ။ ကျွန်တော့်ဘိုးဘေး သင်္ချိုင်းရှိရာမြို့သည် ပျက်စီးလျက်၊ မြို့တံခါးလည်း မီးလောင်၍ ကုန်ပြီဖြစ်သောကြောင့် ကျွန်တော်သည် မျက်နှာမညှိုးငယ်ဘဲ အဘယ်သို့ နေနိုင်ပါမည်နည်း” ဟု ပြန်လည်လျှောက်တင်၏။—နေဟမိ ၁:၁-၃; ၂:၁-၃။

၁၉။ (က) ဘုရင်အာတဇေရဇ် မေးမြန်းစုံစမ်းသည့်အခါ နေဟမိ ရှေးဦးစွာ ဘာပြုလုပ်သနည်း။ (ခ) နေဟမိက အဘယ်အရာ တောင်းလျှောက်သနည်း။ ဤကိစ္စတွင် ယေဟောဝါ၏အခန်းကဏ္ဍကို သူမည်သို့ အသိအမှတ်ပြုသနည်း။

^၁၉ နေဟမိနှင့်ပတ်သက်သည့်မှတ်တမ်းက ဤသို့ဆက်၍ဆို၏– “ဘုရင်မင်းက ‘မည်သည့်အရာကို တောင်းလိုသနည်း’ ဟုမေးတော်မူရာ၊ ငါသည်လည်း မိုးကောင်းကင့်ရှင် ဘုရားသခင်ကို အာရုံပြု၍၊ ဘုရင်မင်းအား ‘ရှေ့တော်တွင် ကျွန်တော်မျိုး မျက်နှာသာရလျက် သဘောတော်မြတ်ပါက ဘိုးဘေးသင်္ချိုင်းရှိရာမြို့ကို ပြုစုရန်၊ ယုဒပြည်သို့ ကျွန်တော်မျိုးသွားခွင့် ပြုတော်မူပါ’ ဟုတင်လျှောက်လေ၏။” အာတဇေရဇ်မင်းသည် ဤတောင်းလျှောက်ချက်ကို သဘောကျသည့်အပြင် နေဟမိ၏ အောက်ပါထပ်ဆင့် တောင်းဆိုချက်ကိုလည်း ခွင့်ပြုခဲ့သည်– “သဘောတော်မြတ်ပါလျှင် မြစ်ကြီး [ယူဖရေးတီးစ်] အနောက်ဘက် ဘုရင်ခံတို့ထံ၊ ယုဒပြည်သို့ ကျွန်တော်အား သွားခွင့်ပြုစေရန် အမှာတော်စာကိုလည်းကောင်း၊ သစ်တောဝန် အာသပ်အားလည်း ဗိမာန်တော်ရဲတိုက်၊ မြို့ရိုး၊ တည်းအိမ်၊ တံခါးထုပ်များအဖြစ် သစ်ပေးစေရန် အမှာတော်စာကိုလည်းကောင်း သနားတော်မူပါ။” နေဟမိသည် “ငါ့အပေါ်တွင် ကိုယ့်ဘုရားသခင့် မြင့်မြတ်သောလက်တော် တည်ရှိသောကြောင့်၊ [အမှာတော်စာများကို] ဘုရင်မင်း ပေးတော်မူ၏” ဟုဆိုလျက် ဤကိစ္စအားလုံးတွင် ယေဟောဝါ၏အခန်းကဏ္ဍကို အသိအမှတ်ပြုလေ၏။—နေဟမိ ၂:၄-၈၊ သမ။

၂၀။ (က) “ယေရုရှလင်မြို့ကို တစ်ဖန်ထူထောင်၍ ပြန်လည်တည်ဆောက်” ရန်အမိန့်တော်သည် အဘယ်အချိန်တွင် အကျိုးသက်ရောက်ခဲ့သနည်း။ (ခ) “သီတင်း ခုနစ်ဆယ်” သည်အဘယ်အချိန်တွင် အစပြု၍ အဘယ်အချိန်တွင် အဆုံးတိုင်သနည်း။ (ဂ) “သီတင်း ခုနစ်ဆယ်” ၏အစနှင့်အဆုံး ရက်စွဲများသည် တိကျမှန်ကန်ကြောင်း အဘယ်အထောက်အထားက ထောက်ပြသနည်း။

^၂၀ အာတဇေရဇ်မင်း နန်းစံ ၂၀ မြောက်နှစ် အစောပိုင်းကာလ နိသန်လတွင် ခွင့်ပြုမိန့်ပေးခဲ့သော်လည်း “ယေရုရှလင်မြို့ကို တစ်ဖန်ထူထောင်၍ ပြန်လည်တည်ဆောက်စေခြင်းငှာ အမိန့်တော်” သည်လပေါင်းအတန်ကြာမှ အမှန်စင်စစ် အကျိုးသက်ရောက်ခဲ့သည်။ ဤကိစ္စသည် ယေရုရှလင်မြို့သို့ နေဟမိရောက်၍ ပြန်လည်ထူထောင်ခြင်းလုပ်ငန်း စတင်သည့်အချိန်ကျမှ ဖြစ်ပျက်ခဲ့သည်။ ဧဇရ၏ ခရီးစဉ်သည် လေးလကြာမြင့်ခဲ့သော်လည်း ရှုရှန်မြို့သည် ဗာဗုလုန်မြို့၏အရှေ့ဘက် မိုင်ပေါင်း ၂၀၀ ကျော်၌တည်ရှိသဖြင့် ယေရုရှလင်မြို့နှင့် ပို၍ အလှမ်းကွာဝေးသည်။ သို့ဖြစ်သောကြောင့် ယေရုရှလင်မြို့သို့ နေဟမိ ရောက်ရှိသည့်အချိန်မှာ အာတဇေရဇ်မင်း နန်းစံ ၂၀ နှစ် ကုန်ဆုံးခါနီးအချိန်၊ သို့မဟုတ် ဘီ.စီ.အီး. ၄၅၅ ခုနှစ်တွင် ဖြစ်ဖွယ်ရှိသည်။ ထိုအချိန်တွင် ကြိုဟောထားသည့် “သီတင်း ခုနစ်ဆယ်၊” သို့မဟုတ် နှစ်ပေါင်း ၄၉၀ စတင်သည်။ ထိုကာလသည် စီ.အီး. ၃၆ ခုနှစ်နှောင်းပိုင်းတွင် ကုန်ဆုံးမည်ဖြစ်သည်။—စာမျက်နှာ ၇၀ ရှိ “အာတဇေရဇ် မည်သည့်အချိန်တွင် စတင်စိုးစံသနည်း” ကိုရှု။

“ဦးစီးခေါင်းဆောင် မေရှိယ” ပေါ်ထွန်းခြင်း

၂၁။ (က) ပထမ “ခုနစ်သီတင်း” အတွင်း အဘယ်အရာ ပြီးစီးမည်နည်း။ အဘယ်အခြေအနေမျိုး၌ ဖြစ်မည်နည်း။ (ခ) မည်သည့်နှစ်တွင် မေရှိယ ပေါ်ထွန်းရမည်နည်း။ ထိုအချိန်တွင် မည်သည့်အရာ ဖြစ်ပျက်ခဲ့ကြောင်း လုကာ၏ခရစ်ဝင်ကျမ်းက ဆိုသနည်း။

^၂၁ နှစ်ပေါင်းမည်မျှကုန်လွန်ပြီးမှ ယေရုရှလင်မြို့ အမှန်တကယ် ပြန်လည်တည်ဆောက် ပြီးစီးသနည်း။ မြို့တော်ပြန်လည်ထူထောင်ခြင်းလုပ်ငန်းသည် “အကျပ်အတည်းကာလ၌” ပြီးစီးမည်ဖြစ်သည်။ အဘယ်ကြောင့်ဆိုသော် ဂျူးလူမျိုးကိုယ်နှိုက်အတွင်း ပြဿနာအမျိုးမျိုးရှိသည့်အပြင် ရှမာရိလူမျိုးနှင့် အခြားလူမျိုးတို့၏ ဆန့်ကျင်မှုများလည်း ရှိနေသောကြောင့်ဖြစ်သည်။ ၎င်းလုပ်ငန်းသည် အလွန်ဆုံး ဘီ.စီ.အီး. ၄၀၆ ခုနှစ်တွင်—“ခုနစ်သီတင်း၊” သို့မဟုတ် ၄၉ နှစ်အတွင်း—ပြီးစီးခဲ့သည်မှာ သိသာထင်ရှားသည်။ (ဒံယေလ ၉:၂၅) ၎င်းနောက် ၆၂ သီတင်း၊ သို့မဟုတ် ၄၃၄ နှစ်ကြာညောင်းသည့်ကာလ တစ်ဆက်တည်း လိုက်ပါလာသည်။ ထိုကာလကုန်လွန်ပြီးနောက် ကြာမြင့်စွာက ကတိထားခဲ့သော မေရှိယ ပေါ်ထွန်းလိမ့်မည်။ နှစ်ပေါင်း ၄၈၃ နှစ် (၄၉ အပေါင်း ၄၃၄) ကို ဘီ.စီ.အီး. ၄၅၅ ခုနှစ်မှစ၍ ရေတွက်လိုက်လျှင် စီ.အီး. ၂၉ ခုနှစ်သို့ရောက်ရှိပေမည်။ ထိုအချိန်တွင် အဘယ်အရာ ဖြစ်ပျက်ခဲ့သနည်း။ ခရစ်ဝင်ကျမ်းရေးသူ လုကာက ဤသို့ပြောပြ၏– “ကဲသာဘုရင် တိဗေရိ နန်းစံတစ်ဆယ့်ငါးနှစ်တွင်၊ ယုဒပြည်၌ ပုန္တိပိလတ်သည် မြို့ဝန်အရာ၊ ဂါလိလဲပြည်၌ ဟေရုဒ်သည် စော်ဘွားအရာ . . . အသီးအသီး ရှိကြသောအခါ၊ တော၌ရှိသော ဇာခရိ၏သား ယောဟန်သည် ဘုရားသခင်၏ ဗျာဒိတ်တော်ကိုခံရ၏။ . . . ယောဟန်သည် ယော်ဒန်မြစ်နား၌ အနှံ့အပြားလှည့်လည်၍ အပြစ်လွှတ်ခြင်းအဖို့အလိုငှာ နောင်တနှင့်စပ်ဆိုင်သော ဗတ္တိဇံတရားကို ဟောလေ၏။” ထိုအချိန်၌ မေရှိယ ပေါ်ထွန်းခြင်းကို “လူများတို့သည် မျှော်လင့်၍” နေကြ၏။—လုကာ ၃:၁-၃၊ ၁၅။

၂၂။ ယေရှုသည် အဘယ်အချိန်နှင့် အဘယ်နည်းဖြင့် ကတိတော်ထားရာ မေရှိယ ဖြစ်လာသနည်း။

^၂၂ ယောဟန်သည် ကတိထားရာမေရှိယ မဟုတ်ပေ။ သို့သော် စီ.အီး. ၂၉ ခုနှစ် ဆောင်းဦးရာသီတွင် နာဇရက်မြို့သား ယေရှုနှစ်ခြင်းခံစဉ် သူတွေ့မြင်ခဲ့ရာနှင့်စပ်လျဉ်း၍ ယောဟန်က ဤသို့ဆို၏– “ဝိညာဉ်တော်သည် ကောင်းကင်မှ ချိုးငှက်ကဲ့သို့ ဆင်းသက်၍ ထိုသူ၏အပေါ်၌ နားတော်မူသည်ကို ငါမြင်ရပြီ။ အစက ထိုသူကိုငါမသိ။ ရေ၌ဗတ္တိဇံကို ပေးစေခြင်းငှာ ငါ့ကိုစေလွှတ်တော်မူသောသူက၊ ‘အကြင်သူ၏အပေါ်၌ ဝိညာဉ်တော်ဆင်းသက်၍ နားတော်မူသည်ကို သင်သည်မြင်လျှင်၊ ထိုသူကား၊ သန့်ရှင်းသောဝိညာဉ်တော်၌ ဗတ္တိဇံကိုပေးသောသူပေတည်း’ ဟုမိန့်တော်မူသည်နှင့်အညီ၊ ငါသည်မြင်၍ ဤသူသည် ဘုရားသခင်၏သားတော် ဖြစ်တော်မူကြောင်းကို သက်သေခံသည်။” (ယောဟန် ၁:၃၂-၃၄) နှစ်ခြင်းခံစဉ်တွင် ယေရှုသည် ဘိသိက်တော်ခံသူ—မေရှိယ၊ သို့မဟုတ် ခရစ်တော်—ဖြစ်လာတော်မူ၏။ ၎င်းနောက် များမကြာမီ ယောဟန်၏တပည့် အန္ဒြေသည် ဘိသိက်တော်ခံ ယေရှုကိုတွေ့ပြီးနောက် ရှိမုန်ပေတရုအား “ငါတို့သည် မေရှိယကိုတွေ့ကြပြီ” ဟုပြောဆို၏။ (ယောဟန် ၁:၄၁၊ သမ္မာ) ဤသို့ဖြင့် “ဦးစီးခေါင်းဆောင် မေရှိယ” သည် ၆၉ သီတင်းကုန်ဆုံးချိန်တွင် အတိအကျပင် ပေါ်ထွန်းတော်မူခဲ့လေသည်။

နောက်ဆုံးသီတင်းအတွင်း ဖြစ်ရပ်များ

၂၃။ “ဦးစီးခေါင်းဆောင် မေရှိယ” သည်အဘယ်ကြောင့် အသေခံရမည်နည်း။ ဤအမှုသည် မည်သည့်အချိန်တွင် ဖြစ်ပျက်ရမည်နည်း။

^၂၃ ၇၀ မြောက်သီတင်းအတွင်း အဘယ်အရာများ ပြီးမြောက်ရမည်နည်း။ ဂါဗြေလက “လွန်ကျူးမှုကို အပြီးသတ်၍ အပြစ်ကို အဆုံးရောက်စေလျက် ဒုစရိုက်ကို ဖြေရှင်းခြင်းငှာလည်းကောင်း၊ ထာဝရဖြောင့်မတ်ခြင်းကိုသွင်း၍ ရူပါရုံနှင့် အနာဂတ်စကားကို တံဆိပ်ခတ်လျက် သန့်ရှင်းတကာ့ သန့်ရှင်းရာဌာနကို ဘိသိက်သွန်းစေခြင်းငှာလည်းကောင်း” “သီတင်းခုနစ်ဆယ်” ကာလကိုပြဋ္ဌာန်းလေပြီဟု ဆိုခဲ့သည်။ ဤအရာတို့ကို ပြီးမြောက်စေရန် “ဦးစီးခေါင်းဆောင် မေရှိယ” သည်အသေခံရမည်ဖြစ်သည်။ အဘယ်အချိန်တွင်နည်း။ ဂါဗြေလက ဤသို့ဆို၏– “ထိုခြောက်ဆယ်နှစ်သီတင်း လွန်ပြီးမှ မေရှိယသည် မည်သည့်အရာကိုမျှမပိုင်ဘဲ ပယ်ရှားခြင်းခံရလိမ့်မည်။ . . . ကိုယ်တော်သည် လူအများတို့အဖို့ ပဋိညာဉ်တော်ကို တစ်သီတင်းတိုင်တိုင် အာဏာတည်စေလျက် ထိုသီတင်း၏တစ်ဝက်တွင် ယဇ်ပူဇော်ခြင်းနှင့် ဘောဇဉ်ပူဇော်သကာတို့ကို ရပ်စဲစေလိမ့်မည်။” (ဒံယေလ ၉:၂၆က၊ ၂၇က၊ ကဘ) အရေးကြီးသောအချိန်မှာ “ထိုသီတင်း၏ တစ်ဝက်တွင်” ဖြစ်သည်။ တစ်နည်းအားဖြင့် နောက်ဆုံးသီတင်းနှစ်များ၏ အလယ်ဗဟိုပင်ဖြစ်သည်။

၂၄၊ ၂၅။ (က) ပရောဖက်ပြုထားသည့်အတိုင်း ခရစ်တော်သည် အဘယ်အချိန်တွင် သေဆုံးသနည်း။ ကိုယ်တော်၏သေခြင်းနှင့် ထမြောက်ခြင်းတို့က အဘယ်အရာကို အဆုံးတိုင်စေခဲ့သနည်း။ (ခ) ယေရှု၏သေခြင်းက အဘယ်အရာကို ဖြစ်မြောက်စေသနည်း။

^၂၄ စီ.အီး. ၂၉ ခုနှစ်နှောင်းပိုင်းတွင် ယေရှုခရစ်တော်၏ လူသိရှင်ကြား ဓမ္မအမှုတော် စတင်ခဲ့ပြီး သုံးနှစ်ခွဲတိတိ ကြာမြင့်ခဲ့သည်။ ပရောဖက်ပြုချက်နှင့်အညီ စီ.အီး. ၃၃ ခုနှစ် အစောပိုင်းတွင် ခရစ်တော်သည် ညှဉ်းဆဲရာနှက်တိုင်ပေါ်၌ အသေခံလျက် လူသားတို့အဖို့ ရွေးနုတ်ဖိုးအဖြစ် အသက်တော်ကို စွန့်တော်မူခဲ့စဉ်တွင် “ပယ်ရှားခြင်း” ခံခဲ့ရသည်။ (ဟေရှာယ ၅၃:၈; မဿဲ ၂၀:၂၈) ရှင်ပြန်ထမြောက်သည့် ယေရှုက မိမိပူဇော်သည့် လူ့အသက်တန်ဖိုးကို ကောင်းကင်ဘုံ၌ ဘုရားသခင်အား ဆက်သလိုက်သည်နှင့် ပညတ်တရား၌ ပြဋ္ဌာန်းထားသည့် တိရစ္ဆာန်ယဇ်သကာနှင့် ဘောဇဉ်ပူဇော်သကာ ပူဇော်ခြင်းလည်း ရပ်စဲသွားလေသည်။ စီ.အီး. ၇၀ ပြည့်နှစ် ယေရုရှလင်မြို့ရှိ ဗိမာန်တော် ပျက်စီးသည့်အချိန်အထိ ဂျူးယဇ်ပုရောဟိတ်တို့က အဆက်မပြတ် ပူဇော်ခြင်းပြုခဲ့ကြသော်လည်း ထိုသို့သော ယဇ်သကာများကို ဘုရားသခင် လက်သင့်မခံတော့ချေ။ သာ၍ကောင်းမြတ်သောယဇ်၊ နောက်တစ်ဖန်ထပ်၍ ပူဇော်စရာမလိုတော့သည့်ယဇ်ဖြင့် အစားထိုးလိုက်ပြီဖြစ်သည်။ တမန်တော်ပေါလုက ဤသို့ရေးသားခဲ့သည်– “ခရစ်တော်မူကား အပြစ်များကိုဖြေရန် အခါခပ်သိမ်းအတွက် ယဇ်တစ်ခုတည်းကို ပူဇော်တော်မူ၏။ . . . ကိုယ်တော်သည် မိမိကိုယ်ကို တစ်ကြိမ်တည်း ပူဇော်ခြင်းအားဖြင့် အပြစ်မှသန့်စင်လာသူတို့အား ထာဝစဉ် အပြစ်ဆိုဖွယ်မရှိသူများ ဖြစ်လာစေတော်မူသတည်း။”—ဟေဗြဲ ၁၀:၁၂၊ ၁၄၊ သက။

^၂၅ အပြစ်နှင့်သေခြင်းသည် လူသားများကို ဆက်လက်၍ ဒုက္ခပေးလျက်ရှိသော်လည်း ယေရှု အသေခံ၍ ကောင်းကင်အသက်တာသို့ ရှင်ပြန်ထမြောက်ခြင်းဖြင့် ကိုယ်တော်၏ ပယ်ရှားခံရခြင်းသည် ပရောဖက်ပြုချက်ကို ပြည့်စုံစေ၏။ ဤအချက်က ‘လွန်ကျူးမှုကို အပြီးသတ်၍ အပြစ်ကို အဆုံးရောက်စေသည့်အပြင် ဒုစရိုက်ကိုဖြေရှင်း၍ ထာဝရဖြောင့်မတ်ခြင်းကို သွင်းခဲ့သည်။’ ဂျူးလူမျိုးတို့ကို အပြစ်သားများအဖြစ် ဖော်ထုတ်၍ စီရင်ချက်ချခဲ့သည့် ပညတ်ပဋိညာဉ်ကို ဘုရားသခင် ဖယ်ရှားလိုက်တော်မူ၏။ (ရောမ ၅:၁၂၊ ၁၉၊ ၂၀; ဂလာတိ ၃:၁၃၊ ၁၉; ဧဖက် ၂:၁၅; ကောလောသဲ ၂:၁၃၊ ၁၄) ယခုသော် နောင်တရသည့် ပြစ်မှားသူတို့၏ အပြစ်များကို ပယ်ဖျက်နိုင်သည့်အပြင် ကျခံရမည့် ပြစ်ဒဏ်များမှလည်း လွတ်ကင်းစေနိုင်၏။ မေရှိယ၏ အပြစ်ပြေငြိမ်းစေသောယဇ်အားဖြင့် ယုံကြည်ခြင်းတင်ပြသူတို့သည် ဘုရားသခင်နှင့် ပြန်၍သင့်မြတ်နိုင်ကြလေသည်။ သူတို့သည် “သခင်ယေရှုခရစ်အားဖြင့် ထာဝရအသက်” တည်းဟူသော ဘုရားသခင်ပေးသနားသည့်ဆုကို လက်ခံရရှိရန် မျှော်လင့်နိုင်ကြသည်။—ရောမ ၃:၂၁-၂၆; ၆:၂၂၊ ၂၃; ၁ ယောဟန် ၂:၁၊ ၂။

၂၆။ (က) ပညတ်ပဋိညာဉ်ကို ဖယ်ရှားလိုက်သော်လည်း အဘယ်ပဋိညာဉ်ကို ‘တစ်သီတင်းတိုင်တိုင် အာဏာတည်စေ’ ခဲ့သနည်း။ (ခ) ၇၀ မြောက်သီတင်း အဆုံးတွင် အဘယ်အရာ ဖြစ်ပျက်ခဲ့သနည်း။

^၂၆ ထို့ကြောင့် စီ.အီး. ၃၃ ခုနှစ်တွင် ခရစ်တော် အသေခံခြင်းအားဖြင့် ပညတ်ပဋိညာဉ်ကို ယေဟောဝါ ဖယ်ရှားတော်မူလိုက်ခြင်းဖြစ်သည်။ သို့ဖြစ်လျှင် မေရှိယသည် “လူအများတို့အဖို့ ပဋိညာဉ်တော်ကို တစ်သီတင်းတိုင်တိုင် အာဏာတည်စေ” မည်ဟု အဘယ်သို့ဆိုနိုင်မည်နည်း။ အကြောင်းမှာ ကိုယ်တော်သည် အာဗြဟံ ပဋိညာဉ်တော်ကို ဆက်လက်အာဏာတည်စေတော်မူ၏။ ဘုရားသခင်သည် ၇၀ မြောက်သီတင်း မကုန်မချင်း အဆိုပါပဋိညာဉ်၏ ကောင်းချီးများကို အာဗြဟံ၏ ဟေဗြဲသားမြေးများအား ခံစားစေတော်မူ၏။ သို့သော် စီ.အီး. ၃၆ ခုနှစ်တွင် “သီတင်း ခုနစ်ဆယ်” နှစ်များ ကုန်ဆုံးသည့်အခါ တမန်တော်ပေတရုသည် ဘာသာတရားကြည်ညိုကိုင်းရှိုင်းသည့် အီတလီလူမျိုး ကော်နေလိနှင့် အိမ်သူအိမ်သားများမှစ၍ အခြားလူမျိုးခြားတို့အား ဟောပြောလေသည်။ ထိုနေ့မှစ၍ တိုင်းနိုင်ငံအသီးသီးမှ လူမျိုးများအလယ်တွင် နိုင်ငံတော်သတင်းကို စတင်ဟောပြောလေ၏။—တမန်တော် ၃:၂၅၊ ၂၆; ၁၀:၁-၄၈; ဂလာတိ ၃:၈၊ ၉၊ ၁၄။

၂၇။ အဘယ် “သန့်ရှင်းတကာ့ သန့်ရှင်းရာဌာန” ကိုဘိသိက်ပေးခဲ့သနည်း။ မည်သို့အားဖြင့်နည်း။

^၂၇ ပရောဖက်ပြုချက်၌ “သန့်ရှင်းတကာ့ သန့်ရှင်းရာဌာန” ကိုဘိသိက်သွန်းခြင်းအကြောင်းလည်း ကြိုဟောထားသည်။ ဤအချက်က ယေရုရှလင်မြို့ရှိ ဗိမာန်တော်မှ အထူးသန့်ရှင်းရာဌာန၊ သို့မဟုတ် အတွင်းအကျဆုံးအခန်းကို ရည်ညွှန်းခြင်းမဟုတ်ပါ။ ဤနေရာ၌ “သန့်ရှင်းတကာ့ သန့်ရှင်းရာဌာန” မှာ ဘုရားသခင်၏ ကောင်းကင်ဆိုင်ရာ သန့်ရှင်းရာဌာနတော်ကို ရည်ညွှန်းခြင်းဖြစ်သည်။ ထိုနေရာတွင် ယေရှုသည် မိမိ၏ လူသားယဇ်နှင့်ဆိုင်သောတန်ဖိုးကို ခမည်းတော်ထံဆက်သခဲ့သည်။ စီ.အီး. ၂၉ ခုနှစ်တွင် ယေရှု နှစ်ခြင်းခံခြင်းဖြင့် မြေကြီးဆိုင်ရာတဲတော်ရှိ အထူးသန့်ရှင်းရာဌာနနှင့် နောက်ပိုင်းတွင် ဗိမာန်တော်ရှိ အထူးသန့်ရှင်းရာဌာနဖြင့် ကိုယ်စားပြုဖော်ပြသည့် ကောင်းကင်ဆိုင်ရာ၊ ဝိညာဉ်ရေးဆိုင်ရာ အစစ်အမှန် တည်ရှိသောအရာကို ဘိသိက်ပေးခဲ့သည်၊ သို့မဟုတ် သီးသန့်ဖြစ်စေခဲ့သည်။—ဟေဗြဲ ၉:၁၁၊ ၁၂။

ဘုရားသခင် အတည်ပြုတော်မူသည့် ပရောဖက်ပြုချက်

၂၈။ ‘ရူပါရုံနှင့် အနာဂတ်စကားကို တံဆိပ်ခတ်ခြင်း’ ဆိုရာ၌ အဘယ်အဓိပ္ပာယ် ရှိသနည်း။

^၂၈ ကောင်းကင်တမန် ဂါဗြေလအားဖြင့်မြွက်ဆိုသည့် မေရှိယဆိုင်ရာ ပရောဖက်ပြုချက်တွင် “ရူပါရုံနှင့် အနာဂတ်စကားကို တံဆိပ်ခတ်” ခြင်းအကြောင်းလည်း ပါရှိသည်။ ဆိုလိုသည်မှာ မေရှိယနှင့်ပတ်သက်၍ ကြိုဟောထားသည့်အရာ မှန်သမျှ—ကိုယ်တော်၏ ပူဇော်သကာ၊ ရှင်ပြန်ထမြောက်ခြင်း၊ ကောင်းကင်ဘုံသို့ ပြန်လည်တက်ကြွခြင်းမှစ၍ ၇၀ မြောက် သီတင်းအတွင်း ဖြစ်ပျက်သည့် အခြားအရာများအားဖြင့် ကိုယ်တော် ပြီးမြောက်စေခဲ့ရာအားလုံး—သည် ဘုရားသခင့်ထောက်ခံမှုဖြင့် တံဆိပ်ခတ်နှိပ်ခြင်း ခံရမည်ဖြစ်ပြီး မှန်ကန်၍ ယုံကြည်စိတ်ချနိုင်ကြောင်း ထင်ရှားလာမည်ဖြစ်သည်။ ၎င်းရူပါရုံကို တံဆိပ်ခတ်နှိပ်၍ မေရှိယအတွက်သာ သီးသန့်ထားရှိမည်။ ၎င်းရူပါရုံသည် ကိုယ်တော်၌လည်းကောင်း၊ ကိုယ်တော်အားဖြင့် ဘုရားသခင်ပြုတော်မူသည့် အမှုတော်၌လည်းကောင်း ပြည့်စုံလာမည်ဖြစ်သည်။ ကြိုဟောထားသည့် မေရှိယနှင့် ဆက်စပ်ခြင်းအားဖြင့်သာ ၎င်းရူပါရုံ၏အဓိပ္ပာယ်အမှန်ကို ကျွန်ုပ်တို့ သိရှိနိုင်ပေသည်။ အဓိပ္ပာယ်အမှန်ကို ဖွင့်ဆိုနိုင်သည့် အခြားမည်သည့်နည်းလမ်းမျှ မရှိပေ။

၂၉။ ပြန်လည်တည်ဆောက်ထားသည့် ယေရုရှလင်မြို့သည် မည်သို့ဖြစ်ရမည်နည်း။ အဘယ်အကြောင်းကြောင့်နည်း။

^၂၉ ယေရုရှလင်မြို့ကို ပြန်လည်တည်ဆောက်မည့်အကြောင်း ဂါဗြေလက အထက်တွင် ပရောဖက်ပြုခဲ့သည်။ ယခုသော် ပြန်လည်တည်ဆောက်သည့် မြို့တော်နှင့်တကွ ၎င်း၏ဗိမာန်တော် ပျက်စီးမည့်အကြောင်း ဤသို့ကြို၍ဟော၏– “နောက်လာလတ္တံ့သော ခေါင်းဆောင်တစ်ဦး၏ လူများတို့သည် မြို့တော်နှင့် သန့်ရှင်းရာဌာနကို ဖြိုဖျက်ကြလိမ့်မည်။ ၎င်း၏ဆုံးခန်းသည် ရေလွှမ်းမိုးခြင်းအားဖြင့် ဖြစ်လိမ့်မည်။ ဆုံးခန်းတိုင်အောင် စစ်မှုရှိလိမ့်မည်၊ လူသူကင်းမဲ့ရာ ဖြစ်ရမည်ဟု ပြဋ္ဌာန်းပြီးဖြစ်သည်။ . . . ရွံရှာဖွယ်သောအရာများ၏ တောင်ပံပေါ်တွင် လူသူကင်းမဲ့ရာ ဖြစ်စေမည့်သူ ရှိလိမ့်မည်။ သုတ်သင်ပယ်ရှင်းခြင်းတိုင်အောင် ပြဋ္ဌာန်းတော်မူသမျှကို လူသူကင်းမဲ့ရာဖြစ်စေသူ အပေါ်တွင်လည်း သွန်းလောင်းတော်မူမည်။” (ဒံယေလ ၉:၂၆ခ၊ ၂၇ခ၊ ကဘ) ဤလူသူကင်းမဲ့ခြင်းသည် “သီတင်း ခုနစ်ဆယ်” ပြည့်ပြီးနောက်မှ ဖြစ်ပျက်မည့်အရာ ဖြစ်သော်လည်း ခရစ်တော်ကို ဂျူးလူမျိုးများငြင်းပယ်၍ ကွပ်မျက်ခဲ့သည့် နောက်ဆုံး “သီတင်း” အတွင်း ဖြစ်ပျက်ခဲ့ရာများ၏ တိုက်ရိုက်အကျိုးဆက်ပင်ဖြစ်သည်။—မဿဲ ၂၃:၃၇၊ ၃၈။

၃၀။ သမိုင်းမှတ်တမ်း ဖော်ပြသည့်အတိုင်း မဟာအချိန်မှတ်ရှင်၏ အမိန့်တော်သည် မည်သို့ပြည့်စုံခဲ့သနည်း။

^၃၀ စီ.အီး. ၆၆ ခုနှစ်တွင် ဆီးရီးယားနယ် ဘုရင်ခံ စက်စတီးယပ်စ် ဂဲလပ်စ် လက်အောက်ရှိ ရောမစစ်တပ်က ယေရုရှလင်မြို့ကို ဝိုင်းရံခဲ့ကြောင်း သမိုင်းမှတ်တမ်းများက ဖော်ပြသည်။ ဂျူးလူမျိုးများ အပြင်းအထန်ခုခံသည့်ကြားမှ ရောမတပ်ဖွဲ့တို့သည် ရုပ်တုအထိမ်းအမှတ်များ ပါရှိသည့်အလံများကို ကိုင်ဆောင်လျက် မြို့တွင်းသို့ထိုးဖောက်၍ ဗိမာန်တော်၏မြောက်ဘက်တံတိုင်းကို စ၍ဖြိုဖျက်ခဲ့သည်။ ထိုနေရာတွင် ၎င်းတို့ရောက်ရှိနေခြင်းဖြင့် ၎င်းတို့သည် အပြီးသတ် လူသူကင်းမဲ့ရာ ဖြစ်စေနိုင်သည့် “ရွံရှာဖွယ်အရာ” ဖြစ်လာခဲ့သည်။ (မဿဲ ၂၄:၁၅၊ ၁၆) စီ.အီး. ၇၀ ပြည့်နှစ်တွင် ဗိုလ်ချုပ်ကြီး တိတု၏လက်အောက်ရှိ ရောမစစ်တပ်သည် “ရေလွှမ်းမိုး” သကဲ့သို့ ရောက်ရှိလာကြပြီးလျှင် ယေရုရှလင်မြို့နှင့် ဗိမာန်တော်ကို လူသူကင်းမဲ့ရာဖြစ်စေခဲ့သည်။ ဤသို့မဖြစ်ရအောင် မည်သည့်အရာကမျှ မတားဆီးနိုင်ခဲ့ချေ။ အဘယ်ကြောင့်ဆိုသော် ဘုရားသခင် အမိန့်တော်ချမှတ်ပြီး—“ပြဋ္ဌာန်းပြီး”—ဖြစ်၍တည်း။ မဟာအချိန်မှတ်ရှင် ယေဟောဝါသည် မိမိ၏နှုတ်ကပါဌ်တော်ကို ထပ်မံ၍ပြည့်စုံစေတော်မူ၏!

အဘယ်အရာ သိမြင်ခဲ့သနည်း

• နှစ်ပေါင်း ၇၀ ယေရုရှလင်မြို့ လူသူကင်းမဲ့ခြင်းသည် မည်သည့်အချိန်တွင် ကုန်ဆုံးသနည်း။ ဒံယေလသည် ယေဟောဝါထံ မည်သည့်အသနားခံချက် ပြုခဲ့သနည်း။

• “သီတင်း ခုနစ်ဆယ်” သည်မည်မျှတာရှည်သနည်း။ မည်သည့်အချိန်တွင် စတင်၍ မည်သည့်အချိန်တွင် ကုန်ဆုံးသနည်း။

• “ဦးစီးခေါင်းဆောင် မေရှိယ” သည် အဘယ်အချိန်တွင် ပေါ်ထွန်း၍ အဘယ်အရေးကြီးသည့်အချိန်တွင် ပယ်ရှားခံရသနည်း။

• အဘယ်ပဋိညာဉ်သည် “လူအများတို့အဖို့ . . . တစ်သီတင်းတိုင်တိုင် အာဏာတည်စေ” ခဲ့သနည်း။

• “သီတင်း ခုနစ်ဆယ်” ကုန်ဆုံးပြီးနောက် အဘယ်အရာများ ဖြစ်ပျက်ခဲ့သနည်း။

[စာမျက်နှာ ၁၉၇ ပါ လေးထောင့်ကွက်/ရုပ်ပုံများ]

အာတဇေရဇ် မည်သည့်အချိန်တွင် စတင်စိုးစံသနည်း

ပါးရှားရှင်ဘုရင် အာတဇေရဇ် စတင်စိုးစံသည့်နှစ်နှင့် ပတ်သက်၍ သမိုင်းပညာရှင်များ သဘောကွဲလွဲကြသည်။ အချို့က ဘီ.စီ.အီး. ၄၆၅ ခုနှစ်တွင် နန်းတက်သည်ဟု ယူဆကြသည်။ အကြောင်းမှာ သူ့ခမည်းတော် ဇားခ်စီးဇ်သည် ဘီ.စီ.အီး. ၄၈၆ ခုနှစ်တွင် စတင်စိုးစံ၍ နန်းစံ ၂၁ နှစ်တွင် အနိစ္စရောက်သောကြောင့်ဖြစ်သည်။ သို့ရာတွင် အာတဇေရဇ်သည် ဘီ.စီ.အီး. ၄၇၅ ခုနှစ်တွင်နန်းတက်၍ သူ၏နန်းစံပထမနှစ်သည် ဘီ.စီ.အီး. ၄၇၄ ခုနှစ်တွင်စတင်သည့် အထောက်အထားရှိပေသည်။

ရှေးခေတ် ပါးရှားမြို့တော် ပါဆဲပလစ္စမြို့တွင် တူးဖော်ရရှိသည့် ကမ္ပည်းကျောက်စာများနှင့် ပန်းပုလက်ရာများက ဇားခ်စီးဇ်နှင့် သူ့ခမည်းတော် ပထမမြောက် ဒရိုင်းယပ်စ်တို့ အတူတကွ အုပ်စိုးခဲ့သည့် ကာလတစ်ခုရှိခဲ့ကြောင်း ထောက်ပြကြသည်။ အကယ်၍ ထိုကာလသည် ၁၀ နှစ်တာရှည်၍ ဘီ.စီ.အီး. ၄၈၆ ခုနှစ်တွင် ဒရိုင်းယပ်စ် ကွယ်လွန်ပြီးနောက် ဇားခ်စီးဇ် တစ်ဦးတည်း ၁၁ နှစ်ကြာအုပ်ချုပ်ခဲ့သော် အာတဇေရဇ်၏ နန်းစံပထမနှစ်သည် ဘီ.စီ.အီး. ၄၇၄ ခုနှစ်ဖြစ်ပေလိမ့်မည်။

ဒုတိယအထောက်အထားသည် ဘီ.စီ.အီး. ၄၈၀ ပြည့်နှစ်တွင် ဇားခ်စီးဇ်၏စစ်တပ်ကို နှိမ်နင်းခဲ့သူ အေသင်မြို့သား ဗိုလ်ချုပ်ကြီး သမစ္စတာကလီးဇ် ပါဝင်ပတ်သက်သည်။ ၎င်းသည် နောက်ပိုင်းတွင် ဂရိပြည်သူတို့၏ ကြိုက်နှစ်သက်ခြင်း မခံရသည့်အပြင် နိုင်ငံတော် သစ္စာဖောက်အဖြစ် စွပ်စွဲခံရသည်။ သမစ္စတာကလီးဇ်သည် ထွက်ပြေး၍ ပါးရှားနန်းတော်တွင် ခိုလှုံခွင့်တောင်းခံသဖြင့် သူ့အား ကောင်းမွန်စွာလက်သင့်ခံခဲ့သည်။ ဂရိသမိုင်းပညာရှင် သူးစီးဒီဒီးဇ်၏အဆိုအရ ဤအဖြစ်အပျက်သည် အာတဇေရဇ် “နန်းတက်၍ မကြာသေးမီတွင်” ဖြစ်ပျက်ခဲ့သည်။ ဂရိသမိုင်းပညာရှင် ဒိုင်အာဒေါရပ်စ် ဆစ်ခယူးလပ်စ်က သမစ္စတာကလီးဇ်သည် ဘီ.စီ.အီး. ၄၇၁ ခုနှစ်တွင် သေဆုံးသည်ဟုဆိုသည်။ သမစ္စတာကလီးဇ်က ဘုရင် အာတဇေရဇ်ထံ အခစားမဝင်မီ ပါးရှားဘာသာစကား သင်ကြားရန် တစ်နှစ်အချိန် တောင်းခံခဲ့သဖြင့် သူသည် ဘီ.စီ.အီး. ၄၇၃ ခုနှစ်မတိုင်မီ အာရှမိုင်းနားသို့ ရောက်ရှိခဲ့ရပေမည်။ ဂျရုမ်း ရေးသားသည့် ယူစီးဘီးယပ်စ်၏ ရာဇဝင်မှတ်တမ်း စာအုပ်က ၎င်းရက်စွဲကို ထောက်ခံသည်။ ဘီ.စီ.အီး. ၄၇၃ ခုနှစ်၌ သမစ္စတာကလီးဇ် အာရှတိုက်သို့ ရောက်ရှိချိန်တွင် အာတဇေရဇ်သည် “နန်းတက်၍ မကြာသေးမီ” သာရှိသောကြောင့် ဂျာမန်ပညာရှင် အန်းစ်ထ် ဟဲင်းစတန်းဘာ့ဂ်က သူရေးသားသည့် ဓမ္မဟောင်းကျမ်းမှ ခရစ်တော်၏ ပုဂ္ဂိုလ်နှင့် ဂုဏ်ရည်ဆိုင်ရာ ပညာ စာအုပ်တွင် အခြားသောစာပေများနည်းတူ ဘီ.စီ.အီး. ၄၇၄ ခုနှစ်တွင် အာတဇေရဇ် စတင်စိုးစံကြောင်း ဖော်ပြထားသည်။ “အာတဇေရဇ်မင်း နန်းစံနှစ်ဆယ်သည် ခရစ်တော်မတိုင်မီ ၄၅၅ ခုနှစ်ဖြစ်သည်” ဟူ၍ ဖြည့်စွက်ဖော်ပြထားသည်။

[ရုပ်ပုံ]

သမစ္စတာကလီးဇ်၏ ကိုယ်တစ်ပိုင်းပုံရုပ်တု

[စာမျက်နှာ ၁၈၈၊ ၁၈၉ ပါ လေးထောင့်ကွက်/ရုပ်ပုံများ]

(ကားချပ်အပြည့်အစုံကို စာစောင်တွင်ကြည့်ပါ)

“သီတင်းခုနစ်ဆယ်”

၄၉ နှစ် ၄၃၄ နှစ် ၇ နှစ်

[စာမျက်နှာ ၁၈၀ ပါ ရုပ်ပုံ]

[စာမျက်နှာ ၁၆၃ ပါ ရုပ်ပုံ]