မှော်အတတ်နှင့် စုန်းအတတ်တို့သည် မကောင်းပါ

စာတန်သည် သင့်ကို မှော်အတတ်လိုက်စားစေလို၏။ လူများစွာသည် မိမိတို့ကိုယ်ကိုဘေးအန္တရာယ်မှကာကွယ်ရန် ဘိုးဘေးများ သို့မဟုတ် နာမ်ဝိညာဉ်များကို ပူဇော်ပသကြသည်။ နာမ်ဝိညာဉ်ဘုံမှစွမ်းအားများကို သူတို့ကြောက်သောကြောင့် ထိုသို့ပြုကြခြင်းဖြစ်၏။ မှော်အတတ်ပညာဆိုင်ရာလက်စွပ်များ သို့မဟုတ် လက်ကောက်များကို သူတို့ဝတ်ဆင်ကြသည်။ ဆန်းကြယ်သောစွမ်းပကားရှိသည်ဟုယူမှတ်ကြသည့် “ဆေးများ” ကိုသူတို့သောက်ကြ သို့မဟုတ် ကိုယ်ခန္ဓာများပေါ်ပွတ်လိမ်းကြ၏။ အချို့က ကာကွယ်ပေးနိုင်စွမ်းရှိသည်ဟုယူမှတ်ကြသော အရာဝတ္ထုများကို မိမိတို့၏နေအိမ်များ သို့မဟုတ် မြေကြီးထဲတွင်ဝှက်ထားကြသည်။ အခြားသူတို့မူ မှော်အတတ်ဆိုင်ရာ “ဆေး” သည် စီးပွားရေး၊ ကျောင်းစာမေးပွဲ သို့မဟုတ် ပိုးပန်းရာတွင် အောင်မြင်စေလိမ့်မည်ဟု ယုံကြည်ကြသောကြောင့် ယင်းကိုအသုံးပြုကြသည်။

ယေဟောဝါအား သင့် မိတ်ဆွေအဖြစ်ထားခြင်းသည် စာတန့်ရန်မှ အကောင်းဆုံးကာကွယ်နည်းဖြစ်သည်။ ယေဟောဝါနှင့်ကိုယ်တော်၏ ကောင်းကင်တမန်များသည် စာတန်နှင့်သူ၏နတ်ဆိုးများထက် သာ၍တန်ခိုးကြီးမားသည်။ (ယာကုပ် ၂:၁၉; ဗျာဒိတ် ၁၂:၉) ယေဟောဝါသည် မိမိ၏မိတ်ဆွေများဖြစ်သော—ကိုယ်တော်အား လုံးလုံးလျားလျားသစ္စာစောင့်သူများ—အတွက် တန်ခိုးတော်ကိုပြလိုစိတ်ပြင်းပြတော်မူ၏။—၂ ရာဇဝင်ချုပ် ၁၆:၉။

ဘုရားသခင့်နှုတ်ကပါဌ်တော်က “ကာလဗေဒင်ကို မကြည့်ရ” ဟုဆိုသည်။ ယေဟောဝါသည် မှော်အတတ်နှင့် စုန်းအတတ်ကို ရှုတ်ချတော်မူ၏၊ အကြောင်းမှာ ထိုအမူအကျင့်များသည် လူတစ်ဦးကို စာတန့်တန်ခိုးအောက်သို့ တိုက်ရိုက်ရောက်စေနိုင်သောကြောင့်ပင်ဖြစ်သည်။—ဝတ်ပြုရာ ၁၉:၂၆။