ကျမ်းစာစောင်နံပါတ် ၄၁​—မာကု

ကျမ်းရေးသူ– မာကု

ရေးရာဒေသ– ရောမ

ရေးသားပြီးစီးချိန်– အေဒီ ၆၀ ခန့်-၆၅

ငုံမိသည့်ကာလပိုင်း– အေဒီ ၂၉-၃၃

ဂသရှေမန်ဥယျာဉ်တွင် ယေရှုအဖမ်းခံရပြီး တမန်တော်တို့သည် ပြေးကြသောအခါ ကိုယ်တော့်နောက်သို့ “လုလင်တစ်ဦးသည် ပိတ်ချောထည်ကိုခြုံလျက်” လိုက်လေသည်။ သူ့ကိုပါ လူအုပ်ကဖမ်းဖို့ ကြိုးစားကြသောအခါ “ပိတ်ထည်ကိုစွန့်၍ ကိုယ်လွတ်ထွက်ပြေးလေသည်။” ဤလူငယ်မှာ မာကုပင်ဖြစ်သည်ဟု အများက လက်ခံထားကြသည်။ တမန်တော်ကျမ်းတွင် သူ့အား “မာကုအမည်သစ်ကိုရသော ယောဟန်” ဟုခေါ်ထားသည်။ ယေရုရှလင်မြို့တွင် ကိုယ်ပိုင်အိမ်၊ အစေခံအခြွေအရံများနှင့် တင့်တောင့်တင့်တယ်နေသော မိသားစုမှဖြစ်ရပါမည်။ သူ့မိခင်မာရိမှာလည်း ခရစ်ယာန်တစ်ဦးဖြစ်သည်။ ကနဦးအသင်းတော်သည် သူမ၏အိမ်ကို စည်းဝေးရာနေရာအဖြစ် သုံးခဲ့ကြသည်။ ပေတရုကို ကောင်းကင်တမန် ထောင်မှလွှတ်လိုက်သောအခါ ဤအိမ်သို့ သူတန်းသွားခဲ့ခြင်းဖြစ်သည်။ ထိုတွင် ညီအစ်ကိုများစည်းဝေးနေသည်ကို သူတွေ့ခဲ့သည်။—မာ. ၁၄:၅၁၊ ၅၂၊ ကဘ; တ. ၁၂:၁၂၊ ၁၃။

^၂ ကုပရုကျွန်းမှ လေဝိလူမျိုး သာသနာပြုဗာနဗသည် မာကုနှင့် တစ်ဝမ်းကွဲတော်စပ်သည်။ (တ. ၄:၃၆; ကော. ၄:၁၀၊ ကဘ) အစာခေါင်းပါးခြင်းအတွက် အထောက်အပံ့ပစ္စည်းများကိစ္စနှင့်ပတ်သက်၍ ယေရုရှလင်သို့ ပေါလုနှင့်အတူ ဗာနဗလာသောအခါ မာကုသည် ပေါလုနှင့် သိကျွမ်းခွင့်ရခဲ့သည်။ အသင်းတော်အတွင်း ပေါင်းသင်းမှုနှင့် စိတ်အားထက်သန်သူ နယ်လှည့်အမှုဆောင်များနှင့် ပေါင်းသင်းမှုများက မာကုအား သာသနာပြုလုပ်ငန်းတွင် ပါဝင်ရန် ဆန္ဒဖြစ်ပေါ်စေခဲ့သည်မှာ ယုံမှားဖွယ်မရှိချေ။ သို့နှင့် ပေါလု၊ ဗာနဗတို့နှင့်တွဲကာ အဖော်အဖြစ်လည်းကောင်း၊ ကူဖော်လောင်ဖက်အဖြစ်လည်းကောင်း ပထမသာသနာပြုခရီးစဉ်တွင် မာကုလိုက်ခဲ့ရလေသည်။ သို့သော် အကြောင်းတချို့ကြောင့် ပံဖုလိပြည်၊ ပေရဂေမြို့တွင် မာကုသည် သူတို့နှင့်လမ်းခွဲပြီး ယေရုရှလင်သို့ ပြန်လှည့်လာလေသည်။ (တ. ၁၁:၂၉၊ ၃၀; ၁၂:၂၅; ၁၃:၅၊ ၁၃) ဤအကြောင်းကြောင့်ပင် ဒုတိယသာသနာပြုခရီးစဉ်တွင် မာကုကိုခေါ်ရန် ပေါလုငြင်းဆန်ခဲ့ရာ ပေါလုနှင့်ဗာနဗတို့လည်း လမ်းခွဲရလေတော့သည်။ ပေါလုက သိလကိုခေါ်သွားကာ ဗာနဗက မိမိ၏ဝမ်းကွဲမာကုကိုခေါ်ပြီး ကုပရုသို့လွှင့်လေသည်။—တ. ၁၅:၃၆-၄၁။

^၃ မာကုသည် ဓမ္မအမှုတွင် ကြိုးစား၍ပါဝင်ခဲ့လေရာ ဗာနဗအတွက်သာမက နောက်ပိုင်းတွင် ပေတရုနှင့်ပေါလုတို့အတွက်ပါ အဖိုးတန်အထောက်အမဖြစ်ခဲ့ပါသည်။ ရောမတွင် ပေါလုပထမအကြိမ်အကျဉ်းခံရချိန် (အေဒီ ၆၀-၆၁ ခန့်) တွင် မာကုသည် ပေါလုနှင့်အတူရှိခဲ့သည်။ (ဖိလေ. ၁၊ ၂၄) ထို့နောက် အေဒီ ၆၂ နှင့် ၆၄ အကြားတွင် မာကုသည် ပေတရုနှင့်အတူ ဗာဗုလုန်တွင် ရောက်နေပြန်သည်။ (၁ ပေ. ၅:၁၃) ပေါလု နောက်တစ်ကြိမ် ထောင်ချခံရချိန်၊ အေဒီ ၆၅ လောက်တွင် တိမောသေထံသို့ရေးသော သူ၏စာ၌ မာကုသည် “အမှုတော်ဆောင်ရွက်ရန် ငါ့မှာ အလွန်အသုံးဝင်” သောကြောင့် မာကုကိုခေါ်ခဲ့ပါဟု ရေးလိုက်သည်။ (၂ တိ. ၁:၈; ၄:၁၁) ဤကား မာကုအကြောင်း ကျမ်းစာတွင် နောက်ဆုံးအကြိမ်တွေ့ရခြင်းဖြစ်သည်။

^၄ အတိုဆုံးသောသတင်းကောင်းကျမ်းစောင်ကို မာကုရေးခဲ့သည်ဟု ဆိုရပေမည်။ သူသည် ယေရှု၏တမန်တော်တို့နှင့်အတူ တွဲအမှုဆောင်သူတစ်ဦးဖြစ်ပြီး မိမိ၏အသက်တာကို သတင်းကောင်းဟောပြောခြင်းအတွက် သုံးခဲ့သူဖြစ်သည်။ သို့သော်၊ မာကုသည် တမန်တော်တစ်ဆယ့်နှစ်ပါးအဝင်မဟုတ်သကဲ့သို့ ယေရှုနှင့် အနီးကပ်ပေါင်းသင်းခွင့်ရခဲ့သူတစ်ဦးလည်း မဟုတ်ပါ။ ယေရှု၏ဓမ္မအမှုအကြောင်းကို အစမှအဆုံးအထိ အသက်ပါအောင်ရေးရန် လိုအပ်သောအသေးစိတ်အချက်အလက်များကို သူအဘယ်မှရခဲ့သနည်း။ ပါပိုင်းယပ်စ်၊ သြရီဂျင်နှင့် တာတူလျန်တို့၏ ရှေးရိုးစကားအဆိုအရ မာကုနှင့်အနီးကပ်ပေါင်းခဲ့သော ပေတရုထံမှ ရခြင်းဖြစ်ပါသည်။a ပေတရုက သူ့အား “ငါ့သား” ဟုခေါ်ခဲ့သည်မဟုတ်လော။ (၁ ပေ. ၅:၁၃) မာကုရေးခဲ့သမျှအကြောင်း အားလုံးနီးပါး၏ မျက်မြင်သက်သေမှာ ပေတရုဖြစ်သည်။ သို့နှင့် အခြားသတင်းကောင်းကျမ်းစောင်တို့တွင်မပါသော ရုပ်လုံးဖော်ပြချက်များစွာကို ပေတရုထံမှ သိရှိနိုင်ခဲ့သည်။ ဥပမာ၊ ဇေဗေဒဲအတွက် အလုပ်လုပ်ပေးသူတို့ကို “သူငှား” ဟုလည်းကောင်း၊ ယေရှုအား အတင်းအကူအညီတောင်းသော အနူတစ်ယောက်သည် “ဒူးထောက်” လျက်ဟုလည်းကောင်း၊ နတ်ဆိုးစွဲသူသည် “ကျောက်စောင်းနှင့်ကိုယ်ကိုရှစေ” သည်ဟုလည်းကောင်း၊ ‘လူသားသည် ကြီးစွာသောဘုန်းတန်ခိုးအာနုဘော်ကိုဆောင်လျက် ကြွလာခြင်း’ အကြောင်း ပရောဖက်ပြုရာတွင် ယေရှုသည် သံလွင်တောင်ပေါ်၌ “ဗိမာန်တော်ရှေ့ရှုထိုင်” တော်မူစဉ်ဟုလည်းကောင်း မာကုဖော်ပြသည်။—မာ. ၁:၂၀၊ ၄၀; ၅:၅; ၁၃:၃၊ ၂၆။

^၅ ပေတရုကိုယ်တိုင်လည်း စိတ်လှုပ်ရှားမှုပြင်းထန်သူတစ်ဦးဖြစ်လေရာ ယေရှု၏ခံစားမှုနှင့် စိတ်လှုပ်ရှားမှုများအကြောင်းကို မာကုကွင်းကွင်းကွက်ကွက် ရေးသားနိုင်ရအောင် ကူညီပေးနိုင်ခဲ့ပေမည်။ ထို့ကြောင့် ယေရှု မည်သို့မည်ပုံခံစားပြီး တုံ့ပြန်ခဲ့သည်ဟု မာကု မကြာခဏဖော်ပြခြင်းဖြစ်သည်။ ဥပမာ၊ ကိုယ်တော်သည် “အမျက်တော်နှင့် သူတို့ကိုပတ်ကြည့်ရှု၍ သူတို့စိတ်နှလုံးမိုက်သောကြောင့် ဝမ်းနည်းတော်မူခြင်းရှိလျက်” ဟုလည်းကောင်း၊ “ညည်းတွားသံကိုပြုလျက် [“အသက်ပြင်းပြင်းရှူပြီးလျှင်၊” ကဘ]” ဟု လည်းကောင်း၊ “စိတ်နှလုံးညည်းတွားသံကိုပြုတော်မူလျက် [“အလွန်ဝမ်းနည်းလျက်၊” ကဘ]” ဟုလည်းကောင်းရေးခဲ့သည်။ (၃:၅; ၇:၃၄; ၈:၁၂) ချမ်းသာသောလူငယ်အရာရှိကို ယေရှုသည် “ချစ်သောစိတ်” ရှိကြောင်း ကျွန်ုပ်တို့အားပြောပြသူမှာ မာကုဖြစ်သည်။ (၁၀:၂၁) ယေရှုသည် ကလေးငယ်တစ်ဦးကို တပည့်များအလယ်တွင် ရပ်ခိုင်းရုံမျှသာမဟုတ်ဘဲ “လက်တော်နှင့်သိုင်းဖက်” ကြောင်း၊ အခြားအချိန်တစ်ချိန်တွင် “သူငယ်တို့ကိုချီပိုက်” ကြောင်းမှတ်တမ်းတွင် တကယ့်နွေးထွေးမှုကို တွေ့ရပါသည်။—၉:၃၆; ၁၀:၁၃-၁၆။

^၆ ပေတရု၏စရိုက်အချို့ကို မာကု၏အရေးအသားတွင် တွေ့ရသည်။ စိတ်လိုက်မာန်ပါရှိမှု၊ လှုပ်ရှားဖျတ်လတ်မှု၊ ထက်သန်မှု၊ အလောတကြီးရှိမှု၊ အသေးစိတ်ကျမှုတို့ဖြစ်သည်။ ဥပမာ၊ သူရေးနေသည်ကိုပင် နှေးကွေးလှသည်ဟု အားမလိုအားမရဖြစ်ကြောင်း တွေ့ရသည်။ ဥပမာ၊ “ချက်ချင်း၊” “ထိုခဏချင်း” ဆိုသောစကားလုံးများကို ထပ်တလဲလဲသုံးကာ အဖြစ်အပျက်များကို ဇာတ်ခင်းသွားလေသည်။

^၇ မာကုကျမ်းရေးစဉ်က မဿဲသတင်းကောင်းကျမ်းစောင်ရှိနှင့်နေပြီဖြစ်ခြင်း၊ အခြားသတင်းကောင်းကျမ်းစောင်များတွင် မပါသောအရာဟူ၍ မာကုကျမ်းတွင် ၇ ရာခိုင်နှုန်းသာရှိခြင်းတို့ကိုထောက်ပြီး မာကုသည် မဿဲသတင်းကောင်းကျမ်းစောင်ကို အတိုချုပ်၍ ထူးခြားသောအသေးစိတ်အချက်လေးများကို ထပ်ဖြည့်ရေးလိုက်ခြင်းသာဖြစ်သည်ဟု ယူဆလျှင် မှားပေမည်။ မဿဲသည် ယေရှုကို ကတိထားရာမေရှိယ၊ ရှင်ဘုရင်အဖြစ် ဖော်ပြသော်လည်း မာကုမှာမူ ကိုယ်တော်၏ဘဝနှင့် ဓမ္မအမှုကို အခြားရှုထောင့်မှ ဖော်ပြသည်။ မာကုသည် ယေရှုကို အံ့သြဖွယ်ရာအမှုများပြုသော ဘုရားသခင့်သားတော်၊ အောင်မြင်သောကယ်တင်ရှင်အဖြစ် ဖော်ကျူးလေသည်။ မာကုသည် ခရစ်တော်၏သွန်သင်ချက်များ၊ ဒေသနာများကို အဓိကထားမရေးဘဲ ကိုယ်တော်၏လုပ်ရပ်များကိုသာ အဓိကထားရေးသွားသည်။ ယေရှု၏ဥပမာအနည်းငယ်နှင့် ဟောပြောချက်ရှည်တစ်ခုလောက်ကိုသာ ဖော်ပြသည်။ တောင်ပေါ်ဒေသနာတစ်ခုလုံးကို ချန်လှပ်ခဲ့သည်။ ဤအကြောင်းကြောင့်ပင် မာကုကျမ်းသည် အခြားသတင်းကောင်းကျမ်းစောင်တို့ထက် များစွာတိုခြင်းဖြစ်သော်လည်း အဖြစ်အပျက် လှုပ်ရှားမှုအကြောင်းမှာ အခြားကျမ်းများနှင့် တန်းတူ စုံစုံစေ့စေ့ပါရှိပေသည်။ အနည်းဆုံး အံ့ဖွယ်အမှု ၁၉ ခုကို အသေးစိတ်ဖော်ပြထား၏။

^၈ မဿဲက မိမိ၏သတင်းကောင်းကျမ်းစောင်ကို ဂျူးများအတွက် ရေးခဲ့သော်လည်း မာကုက အထူးသဖြင့် ရောမများအတွက် ရေးခဲ့ကြောင်း ထင်ရှားသည်။ ဤသို့အဘယ်ကြောင့် ပြောနိုင်သနည်း။ မောရှေပညတ်ကိုရည်ညွှန်းသည့် အပြန်အလှန်ပြောဆိုချက်ကို ဖော်ပြမှသာ မောရှေပညတ်ကိုထည့်ရေးပြီး ယေရှု၏ဆွေစဉ်မျိုးဆက်စာရင်းကို ထည့်မရေးခြင်းကိုကြည့်ခြင်းဖြင့် သိနိုင်ပါသည်။ ခရစ်တော်အကြောင်း သတင်းကောင်းကို စကြဝဠာနှင့်ဆိုင်သော အရေးကြီးကိစ္စအဖြစ် ပုံဖော်သည်။ ဂျူးမဟုတ်သောစာဖတ်ပရိသတ်တို့ နားလည်မည်မဟုတ်သော ဂျူးထုံးစံများနှင့် အယူအဆများကို ရှင်းလင်းဖော်ပြသည်။ (၂:၁၈; ၇:၃၊ ၄; ၁၄:၁၂; ၁၅:၄၂) အာရမိတ်အသုံးအနှုန်းများကို ဘာသာပြန်ဖော်ပြပေးသည်။ (၃:၁၇; ၅:၄၁; ၇:၁၁၊ ၃၄; ၁၄:၃၆; ၁၅:၂၂၊ ၃၄) ပါလက်စတိုင်းနယ်၏ပထဝီအနေအထားဖြစ်သော မြစ်ချောင်း၊ တောတောင်တို့၏အမည်များနှင့် သစ်ပင်များအကြောင်းကို ရှင်းပြချက်နှင့်တစ်ပါတည်း ဖော်ပြပေးသည်။ (၁:၅၊ ၁၃; ၁၁:၁၃; ၁၃:၃) လက်တင်အသုံးအနှုန်းများကို အခြားသတင်းကောင်းကျမ်းစောင်ရေးသူများထက် ပိုသုံးထားသည်။ ဥပမာ၊ speculator (လူစောင့်)၊ praetorium (ပြဲတောရိရုံး)၊ centurio (တပ်မှူး) စသောစကားလုံးများဖြစ်သည်။—၆:၂၇; ၁၅:၁၆၊ ၃၉။

^၉ မာကုသည် ရောမလူမျိုးတို့အတွက် ရည်ရွယ်၍ရေးခြင်းဖြစ်ရာ ရောမတွင်ပင် ရေးခြင်းဖြစ်နိုင်သည်။ ရှေးရိုးစကားများနှင့် ကျမ်းပါအကြောင်းများအရ မာကုကျမ်းကို ပေါလု ပထမအကြိမ် သို့မဟုတ် ဒုတိယအကြိမ် အကျဉ်းချခံရစဉ်အတွင်း ရောမတွင်ရေးခဲ့သည်ဟုဆိုနိုင်သည်။ ထို့ကြောင့် အေဒီ ၆၀-၆၅ အတွင်းရေးခဲ့ခြင်း ဖြစ်နိုင်ဖွယ်ရှိသည်။ ထိုနှစ်များတွင် မာကုသည် ရောမသို့ အနည်းဆုံးတစ်ကြိမ်၊ ဖြစ်နိုင်သည်မှာ နှစ်ကြိမ်မျှ ရောက်ရှိခဲ့ပုံရသည်။ မာကုသည် ကျမ်းရေးသူဖြစ်ကြောင်း ဒုတိယနှင့် တတိယရာစုပညာရှင်တိုင်းက ထောက်ခံသည်။ ဒုတိယရာစုအလယ်လောက်တွင် မာကုသတင်းကောင်းကျမ်းစောင်သည် ခရစ်ယာန်များကြားတွင် ဖြန့်ချိနေပြီဖြစ်သည်။ ခရစ်ယာန်ဂရိကျမ်း၏ အစောပိုင်းကျမ်းစောင်စာရင်းတိုင်းတွင် ၎င်းကိုတွေ့ရခြင်းက မာကုသတင်းကောင်းကျမ်းစောင်သည် ကျမ်းစစ်ကျမ်းမှန်ဖြစ်ကြောင်း သာဓကဖြစ်သည်။

^၁၀ သို့သော် တချို့ကျမ်းစာများ၌ပါရှိသော အခန်းကြီး ၁၆၊ အခန်းငယ် ၈ နောက်ပိုင်းမှ နိဂုံးရှည်နှင့် နိဂုံးတိုတို့ကို ကျမ်းစစ်များဟု ယူဆရန်မဟုတ်ပါ။ ဆိုင်းနိုင်းတိခ်နှင့် ဗာတီကန် နံပါတ် ၁၂၀၉ ကဲ့သို့သော ရှေးလက်ရေးစာမူ အများစုတွင် ၎င်းတို့မပါချေ။ မာကုကျမ်းစစ်ကျမ်းမှန်သည် “ကြောက်လန့်သောကြောင့် အဘယ်သူတို့မျှ မပြောမဆိုကြ” ဟူသောစကားဖြင့် ဆုံးကြောင်း စတုတ္ထရာစုကျမ်းပညာရှင်များဖြစ်ကြသော ယူစီးဘီးယပ်စ်နှင့် ဂျရုမ်းတို့က သဘောတူကြသည်။ မာကုသတင်းကောင်းကျမ်းစောင် မပြေမပြစ်နိဂုံးချုပ်ထားခြင်းကို ပြေပြေပြစ်ပြစ်ဖြစ်စေဖို့ အခြားနိဂုံးစကားများကို နောက်ပိုင်းမှထပ်ထည့်ခြင်း ဖြစ်ပေသည်။ မြန်မာကျမ်းစာတွင်ပါသော မာကုအခန်းကြီး ၁၆ အခန်းငယ် ၉-၂၀ သည် နိဂုံးရှည်မှ ပြန်ဆိုထားခြင်းဖြစ်သည်။

^၁၁ မာကု၏မှတ်တမ်းသည် အခြားသတင်းကောင်းကျမ်းစောင်များနှင့်သာမက ကမ္ဘာဦးမှ ဗျာဒိတ်ကျမ်းအထိ ကျမ်းစာတစ်အုပ်လုံးနှင့် သဟဇာတရှိခြင်းက မာကုသတင်းကောင်းကျမ်းစောင် တိကျမှန်ကန်ကြောင်းပြသည်။ ထို့ပြင် ယေရှုသည် စကားပြောရာတွင်သာ သြဇာရှိသည်မဟုတ်ဘဲ သဘာဝစွမ်းအားစုများ၊ စာတန်နှင့်နတ်ဆိုးများ၊ အဖျားအနာနှင့် ရောဂါတို့အပေါ်တွင်လည်းကောင်း၊ သေခြင်းတရားအပေါ်တွင်ပင်လည်းကောင်း သြဇာရှိကြောင်း မာကုကျမ်းက ထပ်ခါတလဲလဲဖော်ပြပေးသည်။ “ဘုရားသခင့်သားတော်ယေရှုခရစ်၏ ဧဝံဂေလိတရား [“သတင်းကောင်း”၊ ကဘ] ၏အစကို ဆိုပေအံ့” ဟု မှတ်သားလောက်ဖွယ်စကားဖြင့် မာကုအစချီခဲ့သည်။ ကိုယ်တော်၏ကြွလာခြင်းနှင့် အမှုတော်ဆောင်ခြင်းတို့ကိုယ်နှိုက်က “သတင်းကောင်း” ဖြစ်လေရာ မာကုသတင်းကောင်းကျမ်းစောင်ကို ဖတ်ရှုလေ့လာသူတို့သည် အမှန်ပင်အကျိုးရှိကြပေသည်။ မာကုကျမ်းသည် အေဒီ ၂၉ နွေဦးအချိန်မှ အေဒီ ၃၃ နွေဦးအချိန်အတွင်း အဖြစ်အပျက်များကို ဖော်ပြပေးသည်။

အဘယ်ကြောင့်အကျိုးရှိ

^၃၁ ယေရှုခရစ်နှင့်ပတ်သက်၍ ရုပ်လုံးပေါ်အောင် ရေးသားထားရာများကြောင့် အစောပိုင်းခရစ်ယာန်များအချိန်မှစ၍ ယနေ့အထိ မာကုကျမ်းဖတ်ရှုသူအားလုံးသည် မေရှိယနှင့်ပတ်သက်သော ဟေဗြဲကျမ်းစာပရောဖက်ပြုချက်များစွာ ပြည့်စုံသည်ကို သိမြင်နိုင်ခဲ့သည်။ “ကြည့်ရှုလော့။ သင်သွားရာလမ်းကို ပြင်ရသောငါ၏တမန်ကို သင့်ရှေ့၌ ငါစေလွှတ်၏” ဟူသော ပထမကိုးကားချက်မှစ၍ “အကျွန်ုပ်ဘုရား၊ အကျွန်ုပ်ဘုရား အဘယ်ကြောင့် အကျွန်ုပ်ကိုစွန့်ပစ်တော်မူသနည်း” ဟူသော သစ်တိုင်ပေါ်တွင် ပြင်းပြစွာ ဝေဒနာခံစားနေရသော ယေရှု၏ စကားအထိ မာကုမှတ်တမ်းတင်သော ယေရှု၏ဇွဲတောက်လောင်သည့်အမှုဆောင် လုပ်ငန်းတော်ဆိုင်ရာ အတ္ထုပ္ပတ္တိသည် ဟေဗြဲကျမ်းစောင်များ၌ တင်ကူးရေးသားသည့်အတိုင်း ဖြစ်ခဲ့သည်။ (မာ. ၁:၂; ၁၅:၃၄; မာလ. ၃:၁; ဆာ. ၂၂:၁) ၎င်းပြင် ကိုယ်တော်ပြုတော်မူသော အံ့သြဖွယ်အမှုများ၊ ဆုံးမသွန်သင်မှုများ၊ ပိုင်နိုင်စွာချေပပုံ၊ ယေဟောဝါနှုတ်ကပါဌ်တော်အပေါ် ကိုယ်တော်အကြွင်းမဲ့အားထားပုံ၊ ဝိညာဉ်တော်ကိုမှီခိုပုံ၊ သိုးတော်စုကိုကြင်နာစွာ ထိန်းကျောင်းခဲ့ပုံတို့က ကိုယ်တော်သည် ဘုရားသခင့်သားတော်အာဏာဖြင့် ကြွလာသူဖြစ်ကြောင်း ပေါ်လွင်စေ၏။ ကိုယ်တော်သည် ယေဟောဝါထံမှ အခွင့်အာဏာရသောကြောင့် “အာဏာရှိသောသူကဲ့သို့” သွန်သင်ဆုံးမတော်မူ၏။ ကမ္ဘာပေါ်တွင် မိမိအဓိက ထမ်းရွက်ရမည့်လုပ်ငန်းမှာ “ဘုရားသခင်၏သတင်းကောင်း” ဟောပြောခြင်း၊ တစ်နည်းအားဖြင့် “ဘုရားသခင်၏နိုင်ငံတော် တည်လုနီးပြီ” ဟုဟောပြောခြင်းပင်ဖြစ်ကြောင်း အလေးအနက်မိန့်ဆိုခဲ့သည်။ ကိုယ်တော်၏သွန်သင်ပို့ချမှုသည် ကြားနာလိုက်လျှောက်သူတို့အဖို့ မတိုင်းဆနိုင်လောက်အောင် အကျိုးကျေးဇူးများ သက်ရောက်ခဲ့၏။—မာ. ၁:၂၂၊ ၁၄၊ ၁၅၊ ကဘ။

^၃၂ ယေရှုက တပည့်တော်တို့အား “သင်တို့သည် ဘုရားသခင့်နိုင်ငံတော်၏ နက်နဲသောအရာကို သိရသောအခွင့်ရှိကြ၏” ဟုမိန့်တော်မူ၏။ “ဘုရားသခင်၏နိုင်ငံတော်” ဟူသောစကားကို မူလဘာသာစကားတွင် ၁၄ ကြိမ်တိုင် မာကုအသုံးပြုထားသည်။ နိုင်ငံတော်အားဖြင့် အသက်ရမည့်ပုဂ္ဂိုလ်များအတွက် လိုက်နာအပ်သောမူများကိုလည်း ချမှတ်ခဲ့သည်။ ယေရှုက “အကြင်သူသည် ငါ့ကြောင့်လည်းကောင်း၊ ဧဝံဂေလိတရားကြောင့်လည်းကောင်း အသက်ရှုံး၏။ ထိုသူသည် မိမိအသက်ကို ကယ်ဆယ်လိမ့်မည်” ဟုမိန့်တော်မူသည်။ အသက်မရနိုင်ရန် တားဆီးထားသော ဆူးငြောင့်မှန်သမျှကို ဖယ်ရှားပစ်ရမည်။ ‘ဂေဟင်္နာထဲသို့ မျက်စိနှစ်ဖက်စုံနှင့် ချခြင်းကိုခံရသည်ထက် မျက်စိတစ်ဖက်နှင့် ဘုရားသခင်၏နိုင်ငံတော်သို့ ဝင်စားသော် သာ၍ကောင်း၏။’ “အကြင်သူသည် ဘုရားသခင်၏နိုင်ငံတော်ကို သူငယ်ကဲ့သို့မခံမယူ၊ ထိုသူသည် နိုင်ငံတော်သို့မဝင်ရ” ဟုလည်းကောင်း၊ “ဥစ္စာရတတ်သောသူသည် ဘုရားသခင်၏နိုင်ငံတော်သို့ အလွန်ဝင်ခဲလှ၏” ဟုလည်းကောင်း ထပ်ဆင့်လည်း မိန့်တော်မူခဲ့၏။ ကြီးမြတ်သောပညတ်ဖြစ်သည့် ပညတ်တော်နှစ်ရပ်ကိုစောင့်ထိန်းခြင်းသည် မီးရှို့သောယဇ်ကောင်မှစ၍ ယဇ်အမျိုးမျိုးတို့ကို ပူဇော်ခြင်းအကျင့်ထက် သာ၍မြတ်ကြောင်း သိမြင်သောသူကို “ဘုရားသခင်၏နိုင်ငံတော်နှင့်မဝေး” ဟုမိန့်တော်မူ၏။ မာကုသတင်းကောင်းကျမ်းစောင်ပါ ယင်းအချက်များမှစ၍ နိုင်ငံတော်ဆိုင်ရာ အခြားအချက်အလက်တို့တွင် ကျွန်ုပ်တို့၏ နေ့စဉ်အသက်တာ၌ ကျင့်သုံးနိုင်သော သြဝါဒမွန်များစွာပါရှိသည်။—၄:၁၁; ၈:၃၅; ၉:၄၃-၄၈; ၁၀:၁၃-၁၅၊ ၂၃-၂၅; ၁၂:၂၈-၃၄။

^၃၃ “မာကုသတင်းကောင်းကျမ်းစောင်” ပါသတင်းကောင်းကို တစ်နာရီ၊ နှစ်နာရီအတွင်း ပြီးအောင်ဖတ်ရှုနိုင်သည်။ ထိုသို့ဖတ်သောအခါ ယေရှု၏အမှုဆောင်ခြင်းအကြောင်းကို စိတ်ဓာတ်တက်ကြွစဖွယ်၊ အလျင်အမြန် ခြုံငုံ၍ သိရှိခွင့်ရစေသည်။ ဤမှုတ်သွင်းခံမှုတ်တမ်းကို ယင်းသို့ တစ်ထိုင်တည်း ပြီးအောင်ဖတ်ခြင်းသည်လည်းကောင်း၊ အသေအချာစူးစမ်းလေ့လာဆင်ခြင်၍ ဖတ်ခြင်းသည်လည်းကောင်း အစဉ်အကျိုးဖြစ်ထွန်းမည်။ ပထမရာစုမှာကဲ့သို့ ယနေ့ ညှဉ်းဆဲခံခရစ်ယာန်တို့အတွက် မာကုသတင်းကောင်းကျမ်းစောင်သည် အကျိုးဖြစ်စေသည်။ အကြောင်းမှာ ခရစ်ယာန်စစ်များသည် “ခဲယဉ်းသောကာလ” နှင့်ရင်ဆိုင်ရလျက်ရှိသည့်ပြင် စံနမူနာရှင်ယေရှုခရစ်နှင့်ပတ်သက်သော မာကုကျမ်းမှတ်တမ်းတင်ချက်ကဲ့သို့သော မှုတ်သွင်းခံလမ်းညွှန်မှုကို လိုအပ်ကြ၍ဖြစ်သည်။ ဘဝင်ခိုက်စေသည့် ဤထူးခြားသည့်အကြောင်းအရာကို ဖတ်ပါ။ ယုံကြည်ခြင်းကို အစအဦးစီရင်၍ စုံလင်စေတော်မူသော ယေရှုတင်ပြခဲ့သည့် မပျောက်ပျက်နိုင်သော ရွှင်လန်းမှုမျိုးရှိကာ ကိုယ်တော်၏ပုံနမူနာကို အားယူ၍လိုက်လျှောက်ပါလေ။ (၂ တိ ၃:၁; ဟေဗြဲ ၁၂:၂) မှန်ပါသည်၊ ကိုယ်တော်ကို အားမာန်တက်ကြွသော ပုဂ္ဂိုလ်တစ်ဦးအဖြစ်မြင်ပါ။ ကိုယ်တော့်ဇွဲမီးအကူးခံပါ။ ခဲယဉ်းသည့်အချိန်၊ အတိုက်အခံကြားတွင်ပင် မယိုင်မလဲခဲ့သော ကိုယ်တော်၏တည်ကြည်မှုနှင့် သတ္တိကိုတုပပါ။ မှုတ်သွင်းခံကျမ်းစာ အစိတ်အပိုင်းတစ်ရပ်ဖြစ်သော ဤကျမ်းစောင်မှ နှစ်သိမ့်မှုကိုရယူပါ။ ထာဝရအသက်ပန်းတိုင်သို့ တက်လှမ်းရာ၌ ဤကျမ်းစောင်မှ အသင်အကျိုးရနိုင်ပါစေ။

[အောက်ခြေမှတ်ချက်]