ကျမ်းစာစောင်နံပါတ် ၄၃—ယောဟန်
ကျမ်းရေးသူ– တမန်တော်ယောဟန်
ရေးရာဒေသ– ဧဖက် သို့မဟုတ် အနီး
ရေးသားပြီးစီးချိန်– အေဒီ ၉၈ ခန့်
ငုံမိသည့်ကာလပိုင်း– ပထမအခန်းငယ် တစ်ဆယ့်ရှစ်ခန်းနောက်ပိုင်း၊ အေဒီ ၂၉-၃၃
မဿဲ၊ မာကုနှင့် လုကာသတင်းကောင်းကျမ်းစောင်တို့ကို လူတို့ဖတ်ရှုလေ့လာခဲ့သည်မှာ နှစ်ပေါင်း ၃၀ ကျော်ကြာခဲ့ပြီဖြစ်ကာ သန့်ရှင်းသောဝိညာဉ်တော်၏မှုတ်သွင်းမှုဖြင့် လူတို့ရေးသားရာကျမ်းများအဖြစ် ပထမရာစုခရစ်ယာန်တို့သည် ၎င်းတို့ကို အမြတ်တနိုးသဘောထားနေကြပေပြီ။ ရာစုနှစ်ကုန်ခါနီး ယခုအချိန်၌မူ ယေရှုနှင့်အတူ နေခဲ့ဖူးသူတို့ဦးရေ တစ်စတစ်စ လျော့နည်းလာပြီဖြစ်၍ ဤမေးခွန်းများပေါ်ခဲ့ပေမည်– နောက်ထပ်ပြောစရာအကြောင်းအရာများ ရှိနေဆဲလော။ ယေရှုဓမ္မအမှုအကြောင်း အဖိုးတန်အချက်အလက်အသေးစိတ်များကို မျက်မြင်ကိုယ်တွေ့ပြောနိုင်သူ တစ်ဦးဦး ရှိနေသေးသလော။ ရှိပါသည်။ အသက်အရွယ်အိုမင်းနေပြီဖြစ်သော ယောဟန်သည် ယေရှုနှင့်ပေါင်းသင်းခဲ့ရာတွင် အခွင့်ထူးခဲ့သူဖြစ်သည်။ နှစ်ခြင်းဆရာယောဟန်၏တပည့်များထဲမှ ဘုရားသခင်၏သိုးသငယ်နှင့် ဦးဆုံး မိတ်ဆက်ခွင့်ရသူများအနက် ယောဟန်သည် တစ်ဦးဖြစ်ခဲ့ဖွယ်ရှိပြီး အချိန်ပြည့်ဓမ္မအမှုဆောင်ခြင်းတွင် ပါဝင်ရန် ယေရှုဖိတ်ခေါ်ခဲ့သူ ပထမဆုံးလေးဦးအနက် တစ်ဦးအပါအဝင်လည်းဖြစ်သည်။ (ယော. ၁:၃၅-၃၉; မာ. ၁:၁၆-၂၀) ယေရှု၏ဓမ္မအမှုဆောင်ချိန်တစ်လျှောက်လုံးတွင် ကိုယ်တော်နှင့်ရင်းနှီးသောဆက်ဆံရေး ဆက်ရှိခဲ့သူဖြစ်သည်။ နောက်ဆုံးပသခါပွဲတွင် ယေရှု၏ ရင်ခွင်တော်နား၌လျောင်းရသော “ယေရှုချစ်တော်မူသောတပည့်တော်” လည်းဖြစ်သည်။ (ယော. ၁၃:၂၃; မ. ၁၇:၁; မာ. ၅:၃၇; ၁၄:၃၃) ယေရှုအား ကွပ်မျက်သည့် ကြေကွဲဖွယ်အချိန်တွင်လည်း အနား၌ရှိနေသူဖြစ်ပြီး မိမိ၏မွေးမိခင်ကို ကြည့်ရှုစောင့်ရှောက်ရန် ယေရှု၏အပ်နှင်းခြင်းခံရသူဖြစ်သည်။ ယေရှုထမြောက်ပြီဆိုသောသတင်း ကြားရ၍ သင်္ချိုင်းသို့ပြေးသွားကြည့်ရာတွင် ပေတရုကို ကျော်တက်ခဲ့သူလည်းဖြစ်သည်။—ယော. ၁၉:၂၆၊ ၂၇; ၂၀:၂-၄။
၂ ဓမ္မအမှုတွင် လှုပ်ရှားတက်ကြွစွာပါဝင်ခဲ့သည်မှာ နှစ်ပေါင်း ၇၀ နီးပါးရှိနေပြီဖြစ်ရာ ဝါရင့်နေပြီဖြစ်သည့်အပြင် မကြာသေးမီက ပတ်မုကျွန်းတွင် တစ်ဦးတည်း အကျဉ်းချထားခံရစဉ် ရူပါရုံများရခဲ့ပြီး ပြန်ပြောင်းစဉ်းစားတွေးတောခွင့် ရရှိခဲ့သောယောဟန်သည် မိမိနှလုံးတွင် ကာလကြာမြင့်စွာ အမြတ်တနိုးသိမ်းဆည်းထားသောအရာများကို ချရေးရန် အရည်အချင်း လုံးဝပြည့်မီနေပေပြီ။ ဖတ်သောသူတိုင်းအား ‘ယေရှုသည် ခရစ်တော်တည်းဟူသော ဘုရားသခင့်သားတော် ဖြစ်တော်မူသည်ကို ယုံကြည်၍ နာမတော်အားဖြင့် အသက်ကိုရ’ စေမည့် အသက်ပေးအဖိုးတန် အဆိုအမိန့်များကို ပြန်လည်သတိရစေပြီး ချရေးစေရန် သန့်ရှင်းသောဝိညာဉ်တော်က သူ့စိတ်ကို နှိုးဆွပေးခဲ့သည်။—၂၀:၃၁။
၃ ဒုတိယရာစုနှစ်အစပိုင်းမှ ခရစ်ယာန်တို့သည် ဤကျမ်းကိုရေးသူမှာ ယောဟန်ပင်ဖြစ်ကြောင်း လက်ခံခဲ့ကြကာ မှုတ်သွင်းခံကျမ်းစာ၏ တစ်စိတ်တစ်ပိုင်းဖြစ်ကြောင်းလည်း စောဒကမတက်ဘဲ လက်ခံခဲ့ကြသည်။ ဒုတိယရာစုနှောင်းပိုင်းနှင့် တတိယရာစုအစောပိုင်းမှ ပညာရှင်များဖြစ်သည့် အလက်ဇန္ဒြီးယားမြို့သား ကလီးမင့်၊ အိုင်ရင်နီးယပ်စ်၊ တာတူလျန်နှင့် သြရီဂျင်စသည့် ပညာရှင်အားလုံးတို့ကလည်း ယောဟန်သာ ၎င်းကျမ်းကိုရေးခဲ့ကြောင်း လက်ခံကြသည်။ ၎င်းအပြင် ကျမ်းကိုယ်နှိုက်၌ပင် ၎င်းကို ယောဟန်ရေးခဲ့ကြောင်း အထောက်အထားများတွေ့နိုင်သည်။ ကျမ်းရေးသူသည် ဂျူးဓလေ့၊ ဂျူးနယ်မြေကို နောကျေနေသူဂျူးတစ်ဦးဖြစ်ကြောင်း ထင်ရှားပါသည်။ (၂:၆; ၄:၅; ၅:၂; ၁၀:၂၂၊ ၂၃) ယေရှုနှင့်စပ်လျဉ်း၍ အတွင်းကျကျသိထားပုံကလည်း သူသည် တမန်တော်တစ်ဦးဖြစ်ရုံသာမက ထူးခြားသည့်အဖြစ်အပျက်များတွင် ယေရှုနှင့်အတူ ပါဝင်တွေ့ကြုံခဲ့ရသော အရေးပါ တမန်တော်သုံးဦး—ပေတရု၊ ယာကုပ်နှင့် ယောဟန်—တို့ထဲမှ တစ်ဦးဖြစ်ကြောင်းပြသည်။ (မ. ၁၇:၁; မာ. ၅:၃၇; ၁၄:၃၃) ကျမ်းရေးသူမှာ (ဇေဗေဒဲ၏သား) ယာကုပ်မဖြစ်နိုင်ပါ။ သူသည် ဤကျမ်းစောင်ကိုမရေးမီ အေဒီ ၄၄ ခုနှစ်ခန့်က ပထမမြောက် ဟေရုဒ်အဂြိပ္ပမင်းကြီး၏လက်ချက်ဖြင့် သေဆုံးနှင့်ပြီဖြစ်သောကြောင့်တည်း။ (တ. ၁၂:၂) ပေတရုလည်းမဟုတ်ပါ။ ယောဟန် ၂၁:၂၀-၂၄ တွင် ကျမ်းရေးသူနှင့်တွဲ၍ ဖော်ပြခြင်းခံရသောကြောင့်ဖြစ်သည်။
၄ ကျမ်းနိဂုံးပိုင်းတွင် ကျမ်းရေးသူကို ‘ယေရှုချစ်တော်မူသော’ တပည့်တော်ဟုခေါ်ထားသည်။ ဤအသုံးအနှုန်းနှင့် ယင်းနှင့်အလားတူအသုံးအနှုန်းကို ကျမ်းတစ်လျှောက်တွင် အကြိမ်ကြိမ်သုံးထားသော်လည်း တမန်တော်ယောဟန်ကို အမည်နှင့်တကွ တစ်ကြိမ်မျှဖော်ပြမထားပါ။ ဤတွင် သူနှင့်ပတ်သက်၍ ယေရှု၏မိန့်တော်မူချက်ကို ဤသို့ကိုးကားဖော်ပြထား၏– “ငါကြွလာသည်ကာလတိုင်အောင် ထိုသူကိုနေစေခြင်းငှာ ငါအလိုရှိလျှင် သင်သည် အဘယ်သို့ဆိုင်သနည်း။” (ယော. ၂၁:၂၀၊ ၂၂) ဤစကားကိုထောက်ခြင်းဖြင့် ထိုတပည့်တော်မှာ ပေတရုနှင့် အခြားသောတမန်တော်များသေဆုံးပြီးနောက် အချိန်များစွာပို၍ အသက်ရှင်သောသူဖြစ်ရပေမည်။ ယင်းတို့အားလုံးနှင့် ကိုက်ညီသူမှာ တမန်တော်ယောဟန်ပင်ဖြစ်သည်။ ယေရှုကြွလာတော်မူမည်အကြောင်း ဗျာဒိတ်ရူပါရုံကို ရရှိပြီးနောက် ထိုပရောဖက်ပြုချက်၏အဆုံးတွင် “အာမင်၊ သခင်ယေရှုကြွလာတော်မူပါ” ဟုပြောခဲ့ခြင်းသည် စိတ်ဝင်စားစရာပင်။—ဗျာ. ၂၂:၂၁။
၅ ယောဟန်၏အရေးအသားများကိုယ်နှိုက်တွင် မည်သို့မျှမဖော်ပြသော်လည်း ယောဟန်သည် ပတ်မုကျွန်းသို့ တစ်ကျွန်းပို့ခံရပြီး ပြန်ရောက်လာမှ သတင်းကောင်းကျမ်းစောင်ကို ရေးခဲ့သည်ဟု ယေဘုယျအားဖြင့် ယူဆကြသည်။ (ဗျာ. ၁:၉) အေဒီ ၉၆-၉၈ ၌နန်းတက်သော ရောမဧကရာဇ်နားဗာသည် သူဆက်ခံသော ဧကရာဇ်ဒိုမီရှန် စိုးစံမှုအဆုံးပိုင်းလောက်တွင် ပြည်နှင်ဒဏ်ပေးခံရသူများစွာကို လွတ်ငြိမ်းချမ်းသာခွင့် ပေးခဲ့သည်။ ယောဟန်သည် အေဒီ ၉၈ ခုနှစ်တွင် သတင်းကောင်းကျမ်းစောင်ကိုရေးပြီးနောက် ဧကရာဇ်ထရာဂျင်၏ နန်းစံတတိယနှစ်ဖြစ်သော အေဒီ ၁၀၀ တွင် ဧဖက်မြို့၌ ငြိမ်းချမ်းစွာ သေဆုံးခဲ့သည်ဟု ယူဆကြသည်။
၆ သတင်းကောင်းကျမ်းစောင်ကို ဧဖက်မြို့ သို့မဟုတ် ယင်းအနီးအနားတွင် ရေးခဲ့သည်ဟု ဆိုသည်။ သမိုင်းပညာရှင် ယူစီးဘီးယပ်စ် (အေဒီ ၂၆၀-၃၄၂ ခန့်) သည် အိုင်ရင်နီးယပ်စ်၏အဆိုကို ကိုးကား၍ “သခင်၏ရင်ခွင်၌လျောင်းရသော တပည့်တော်ယောဟန်သည် အာရှရှိ ဧဖက်မြို့တွင်နေထိုင်စဉ် သတင်းကောင်းကျမ်းစောင်ကိုရေးခဲ့သည်” ဟုဆို၏။a ယေရှု၏အတိုက်အခံသမားများကို “ဖာရိရှဲများ၊” “ယဇ်ပုရောဟိတ်အကြီးများ” ဟုမခေါ်ဘဲ “ယုဒလူများ” ဟုယေဘုယျအသုံးအနှုန်းဖြင့် ခေါ်ဆိုထားခြင်းက ဤကျမ်းကို ပါလက်စတိုင်းပြင်ပတစ်နေရာရာတွင် ရေးခြင်းဖြစ်ကြောင်း ထင်ရှားသည်။ (ယော. ၁:၁၉; ၁၂:၉) ဂါလိလဲအိုင်ကိုလည်း ရောမနာမည်ဖြင့် တိဗေရိအိုင်ဟုခေါ်ထားသည်။ (၆:၁; ၂၁:၁) ဂျူးပွဲတော်များအကြောင်းကိုလည်း ဂျူးမဟုတ်သူများသိစေခြင်းငှာ ယောဟန် တကူးတက ရှင်းပြပေးခဲ့သည်။ (၆:၄; ၇:၂; ၁၁:၅၅) သူတစ်ကျွန်းပို့ခံရသော ပတ်မုကျွန်းသည် ဧဖက်မြို့နှင့်နီးသည်။ ဧဖက်အပါအဝင် အာရှမိုင်းနားရှိ အခြားအသင်းတော်များနှင့် သူသိကျွမ်းကြောင်းလည်း ဗျာဒိတ် အခန်းကြီး ၂ နှင့် ၃ တွင်တွေ့ရသည်။
၇ ယောဟန်သတင်းကောင်းကျမ်းစောင်သည် ကျမ်းစစ်ကျမ်းမှန်ဖြစ်ကြောင်း ၂၀ ရာစုတွင် တွေ့ရှိသော လက်ရေးစာမူများက များစွာထောက်ခံသည်။ ယင်းတို့ထဲမှတစ်ခုမှာ အီဂျစ်တွင်တွေ့ရှိသော ယောဟန်သတင်းကောင်းကျမ်းစောင်အပိုင်းအစတစ်ခုဖြစ်သည်။ ယင်းကို ရိုင်လန်း ပါပိုင်းရပ်စ် ၄၅၇ (P52) ဟုခေါ်ကာ ယောဟန် ၁၈:၃၁-၃၃၊ ၃၇၊ ၃၈ တို့ပါရှိလေသည်။ ယခုဆိုလျှင် အင်္ဂလန်နိုင်ငံ၊ မန်ချက်စတာမြို့ ဂျွန်ရိုင်လန်းစာကြည့်တိုက်တွင် သိမ်းဆည်းထားသည်။b ပထမရာစုအဆုံးပိုင်းတွင် ယောဟန်ကျမ်းကိုရေးသည်ဟူသည့် ရှေးအစဉ်အလာစကားအဆိုနှင့်စပ်လျဉ်း၍ ကွယ်လွန်သူ ဆာဖရက်ဒရစ်ခ် ကင်ညွန်က ၎င်း၏စာအုပ်ဖြစ်သော The Bible and Modern Scholarship၊ ၁၉၄၉၊ စာမျက်နှာ ၂၁ တွင် ဤသို့ဆိုခဲ့သည်– “ဤသတင်းကောင်းကျမ်းစောင်၏စာမူသည် သေးငယ်သောအပိုင်းဖြစ်သော်လည်း အေဒီ ၁၃၀-၁၅၀ ခန့်အချိန်က ယင်းစာမူကိုတွေ့ရှိခဲ့သည့် အီဂျစ်ပြည်တွင် ပျံ့နှံ့နေပြီဟု မှတ်ယူနိုင်ကြောင်း ယင်းက လုံလောက်စွာ သက်သေထူသည်။ ကျမ်းကိုရေးသည့်မူလနေရာမှ ကျမ်းစောင်ပျံ့နှံ့စေဖို့ အနည်းဆုံးအချိန်ကို သတ်မှတ်လျှင်ပင် ယင်းကျမ်းကိုရေးသည့်ရက်စွဲသည် ရှေးအစဉ်အလာစကားအဆိုရက်စွဲဖြစ်သော ပထမရာစု၏နောက်ဆုံးဆယ်စုနှစ်နားသို့ ရောက်ရှိသွားပေမည်၊ ယင်းက ရှေးရိုးစကားအဆို ခြေမြစ်မှန်ကန်မှုနှင့်ပတ်သက်၍ မေးခွန်းထုတ်စရာအကြောင်းမရှိတော့ပါ။”
၈ ယောဟန်သတင်းကောင်းကျမ်းစောင်၏နိဒါန်းသည် အထူးထင်ရှားပါသည်။ ယင်းအခန်းငယ်တွင် ခပ်သိမ်းသောအရာတို့ကို ဖန်ဆင်းတော်မူသော၊ “အစအဦး၌ ဘုရားသခင်နှင့်အတူရှိ” ခဲ့သော နှုတ်ကပါဌ်တော်အကြောင်း ဖော်ပြသည်။ (၁:၂) ခမည်းတော်နှင့်သားတော်အကြားရှိ အထူးမြတ်နိုးဖွယ်ဆက်ဆံရေးကို ဖော်ပြပြီးနောက် ယေရှု၏လုပ်ဆောင်ချက်များ၊ ဟောပြောချက်များအကြောင်းကို ယောဟန် ပိုင်ပိုင်နိုင်နိုင် ရေးသားပုံဖော်လေတော့သည်။ ဘုရားသခင့်အစီအစဉ်ကြီးတစ်ခုလုံးတွင် ပါဝင်သောအရာများ မေတ္တာနှင့် စည်းလုံးစွာပေါင်းစည်းရပ်တည်ခြင်းအကြောင်းကို အသားပေးရေးသားသွားသည်။ ဤယေရှု၏ဘဝအသက်တာမှတ်တမ်းသည် အေဒီ ၂၉-၃၃ အထိ အချိန်ကာလပိုင်းကို ခြုံငုံမိသည်။ မိမိ၏ဓမ္မအမှုဆောင်နေစဉ်အတွင်း ယေရှုတက်ရောက်ခဲ့သော ပသခါပွဲလေးခုအကြောင်းလည်း ဂရုတစိုက်ရေးသားဖော်ပြပေးသည်။ သို့ဖြင့် ကိုယ်တော်၏အမှုဆောင်သက်တမ်းမှာ သုံးနှစ်ခွဲဖြစ်ကြောင်း တွက်ယူနိုင်စေသည်။ ပသခါပွဲလေးခုထဲမှသုံးခုကို ပသခါပွဲဟု ဖော်ပြထားသည်။ (၂:၁၃; ၆:၄; ၁၂:၁၊ ၁၃:၁) တစ်ခုကို “ယုဒပွဲ” ဟုဖော်ပြထားသည်။ သို့သော် ‘ရိတ်သိမ်းချိန်မတိုင်မီလေးလ’ ဟုဖော်ပြပြီးနောက် ယင်းပွဲတော်အကြောင်းပြောခြင်းက ၎င်းသည် ပသခါပွဲဖြစ်ကြောင်း သိစေသည်၊ အကြောင်းမှာ ရိတ်သိမ်းချိန်အစပိုင်းတွင် ယင်းပွဲတော်ကို ကျင်းပသည်။—၄:၃၅; ၅:၁။c
၉ “ယောဟန်သတင်းကောင်းကျမ်းစောင်” သည် အထူးဖြည့်စွက်ရာကျမ်းဖြစ်သည်။ ၎င်းတွင်ပါသောအကြောင်းအရာ ၉၂ ရာခိုင်နှုန်းကို အခြားသတင်းကောင်းကျမ်းစောင်များတွင် မတွေ့ရပါ။ သို့တိုင် “ယေရှုပြုတော်မူသောအခြားအမှုအရာများ ရှိသေး၏။ ထိုအမှုအရာရှိသမျှတို့ကို အသီးအခြားရေးထားလျှင် မြေကြီးမဆံ့နိုင်အောင် ကျမ်းစာများပြားလိမ့်မည်” ဟူသောစကားဖြင့် ယောဟန်နိဂုံးချုပ်ခဲ့သည်။—၂၁:၂၅။
အဘယ်ကြောင့်အကျိုးရှိကြောင်း
၃၀ “ယောဟန်သတင်းကောင်းကျမ်းစောင်” ၏ အားပါသောပွင့်လင်းမှု၊ လက်ခံယုံကြည်ဖွယ်ဖြစ်သော အတွင်းရေးများ၊ ခရစ်တော်ဖြစ်လာသည့် နှုတ်ကပါဌ်တော်၏ ကြည်နူးအားရဖွယ်ကောင်းသော သရုပ်သကန်များက ဘုရားသခင့်ဘိသိက်ခံသားတော်ကို အနီးကပ်မြင်နိုင်ရန် အကူအညီပေး၏။ “လူတတ်မဟုတ်၊ လူသာမည” ဖြစ်သည်ဟု ဖော်ပြခံရသူ ယောဟန်၏ရေးဟန်နှင့် စကားလုံးအသုံးအနှုန်းတို့သည် ရိုးရှင်းလှ၏။ (တ. ၄:၁၃) ခမည်းတော်နှင့် သားတော်၏ အလွန်ချစ်ခင်ရင်းနှီးသော ဆက်ဆံရေးကို ပေါ်လွင်စေရာတွင်၊ ကိုယ်တော်တို့နှင့် ပေါင်းစည်းခြင်းဖြင့် မြင့်မြတ်၍ မေတ္တာပါသောဆက်ဆံရေးကို ရရှိနိုင်ကြောင်း ပေါ်လွင်စေရာတွင် ယောဟန်သတင်းကောင်းကျမ်းစောင်သည် အထူးခြားဆုံးဖြစ်၏။ “မေတ္တာ၊” ‘ချစ်သည်’ ဟူသောစကားလုံးများကို သုံးသည့်နေရာတွင် ကျန်သတင်းကောင်းကျမ်းစောင်သုံးစောင်ပေါင်းထက် ယောဟန်အသုံးများ၏။
၃၁ အစအဦးတွင် နှုတ်ကပါဌ်တော်နှင့် ခမည်းတော်ဘုရားသခင်စပ်ကြား မွန်မြတ်လှသော ဆက်ဆံရေးရှိခဲ့သည်တကား။ ဘုရားသခင့် စီမံမှုဖြင့် “နှုတ်ကပါဌ်တော်သည်လည်း လူဇာတိအဖြစ်ကိုခံယူ၍ ကျေးဇူးတော်နှင့်လည်းကောင်း၊ သစ္စာတော်နှင့်လည်းကောင်း ပြည့်စုံလျက် ငါတို့တွင် တည်နေတော်မူသည်ဖြစ်၍ ခမည်းတော်၌ တစ်ပါးတည်းသောသားတော်၏ဘုန်းကဲ့သို့ သူ၏ဘုန်းတော်ကို ငါတို့သည် မြင်ရကြပြီ။” (ယော. ၁:၁၄) ၎င်းနောက် ယောဟန်၏မှတ်တမ်းတစ်လျှောက်လုံးတွင် ယေရှုက မိမိသည် ခမည်းတော်အလိုတော်ကို မဆိုင်းမတွနာခံခြင်းဖြစ်သော ဆက်ဆံရေးဖြင့် လက်အောက်ခံသူဖြစ်ကြောင်း အလေးအနက်တင်ပြ၏။ (၄:၃၄; ၅:၁၉၊ ၃၀; ၇:၁၆; ၁၀:၂၉၊ ၃၀; ၁၁:၄၁၊ ၄၂; ၁၂:၂၇၊ ၄၉၊ ၅၀; ၁၄:၁၀) ယောဟန်အခန်းကြီး ၁၇ ၌ မှတ်တမ်းတင်ထားသော လှုံ့ဆော်မှုဖြစ်စေသည့်ဆုတောင်းချက်ပါ ဖော်ပြချက်တို့တွင် ၎င်းရင်းနှီးသည့်ဆက်ဆံရေး အထွတ်အထိပ်ကိုတွေ့ရ၏။ ၎င်းအခန်းကြီး၌ ယေရှုက မိမိသည် မြေကြီးပေါ်တွင်လုပ်ဆောင်ရန် ပေးအပ်ခံရသောလုပ်ငန်း ပြီးစီးပြီဖြစ်ကြောင်း အစီရင်ခံပြီးသည့်နောက် “အိုအဘ၊ ဤကမ္ဘာမတည်မရှိမီ အထံတော်၌ အကျွန်ုပ်ခံစားသော ဘုန်းအသရေနှင့် ယခုတွင်လည်း အကျွန်ုပ်ကို အထံတော်၌ ချီးမြှောက်တော်မူပါ” ဟုလျှောက်တင်ခဲ့သည်။—၁၇:၅။
၃၂ ယေရှုနှင့် တပည့်တော်များ ဆက်ဆံရေးကို မည်သို့ဆိုမည်နည်း။ တပည့်တော်များနှင့် လူသားတစ်ရပ်လုံးထံ ဘုရားသခင့်ကောင်းချီးများ သက်ရောက်စေသည့် တစ်ခုတည်းသောလမ်းကြောင်းဖြစ်သော ယေရှု၏အခန်းကဏ္ဍကို ထင်ရှားစွာရေးသားဖော်ပြထားသည်။ (၁၄:၁၃၊ ၁၄; ၁၅:၁၆; ၁၆:၂၃၊ ၂၄) ကိုယ်တော်ကို “ဘုရားသခင်၏သိုးသငယ်၊” “အသက်မုန့်၊” “လောက၏အလင်း၊” “ကောင်းသောသိုးထိန်း၊” “ထမြောက်ခြင်းအကြောင်း၊ အသက်ရှင်ခြင်းအကြောင်း” နှင့် “မှန်သောစပျစ်နွယ်ပင်” ဟုရည်ညွှန်းဖော်ပြထားသည်။ (၁:၂၉; ၆:၃၅; ၈:၁၂; ၁၀:၁၁; ၁၁:၂၅; ၁၄:၆; ၁၅:၁) “မှန်သောစပျစ်နွယ်ပင်” ဥပမာ၌ ယေရှုက မိမိနှင့် မိမိ၏နောက်လိုက်စစ်များကြားတွင်သာမက မိမိခမည်းတော်နှင့်လည်း အံ့ဖွယ်စည်းလုံးမှုရှိကြောင်းကို ပေါ်လွင်စေသည်။ တပည့်တို့သည် အသီးများစွာသီးခြင်းအားဖြင့် ခမည်းတော်၏ဘုန်းတော်ကို ထင်ရှားစေမည်ဖြစ်၏။ “ခမည်းတော်သည် ငါ့ကိုချစ်တော်မူသကဲ့သို့ ငါသည် သင်တို့ကိုချစ်၏။ ငါ၏ချစ်ခြင်းမေတ္တာ၌ တည်နေကြလော့” ဟုယေရှုညွှန်ကြားသည်။—၁၅:၉။
၃၃ ဤချစ်ဖွယ်သောသူအားလုံးသာမက ‘သူတို့ဟောပြောခြင်းအားဖြင့် မိမိအပေါ် ယုံကြည်လာသောသူတို့” သည် မိမိခမည်းတော်နှင့်လည်းကောင်း၊ မိမိနှင့်လည်းကောင်း တလုံးတဝတည်းဖြစ်ရန်၊ သမ္မာတရားကြောင့် သန့်ရှင်းခြင်းသို့ရောက်ကြရန် ယေရှုထက်သန်စွာဆုတောင်းခဲ့သည်။ ယေရှုပတ္ထနာ၏အဆုံးပိုင်းတွင် ကိုယ်တော့်ဓမ္မအမှုလုပ်ငန်း၏ ရည် ရွယ်ချက်အပြည့်အဝကို ထင်ထင်ရှားရှား တွေ့နိုင်ပေသည်– “ကိုယ်တော်သည် အကျွန်ုပ်ကို ချစ်တော်မူသောမေတ္တာသည် သူတို့၌ရှိစေခြင်းငှာလည်းကောင်း၊ အကျွန်ုပ်သည် သူတို့၌ရှိစေခြင်းငှာလည်းကောင်း ကိုယ်တော်၏နာမကို အကျွန်ုပ်သည် သူတို့အား ပြညွှန်ပါပြီဖြစ်၍ အစဉ်ပြညွှန်ပါပြီ။”—၁၇:၂၀၊ ၂၆။
၃၄ ယေရှုသည် တပည့်တော်များအား လောက၌ထားခဲ့ရမည်ဖြစ်သော်လည်း ကူညီမစသူမရှိဘဲ ပစ်ထားမည်မဟုတ်။ “အမှန်တရားကို ဖော်ပြသော ဘုရားသခင့် ဝိညာဉ်တော်” ကိုပေးမည်ဖြစ်သည်။ ထို့ပြင် လောကနှင့်ဆက်ဆံပုံနှင့်ပတ်သက်သည့် အခန့်သင့်သွန်သင်ချက်များပေးကာ “အလင်း၏သား” များအနေနှင့် မည်သို့အောင်မြင်နိုင်ပုံကိုပါ ပြသခဲ့သည်။ (၁၄: ၁၆၊ ၁၇၊ ကဘ; ၃:၁၉-၂၁; ၁၂:၃၆) ယေရှုက “သင်တို့သည် ငါ၏ဒေသနာ၌တည်လျှင် ငါ့တပည့်အမှန်ဖြစ်ကြ၏။ သမ္မာတရားကိုလည်း သိကြသဖြင့် ထိုတရားသည် သင်တို့ကို လွှတ်လိမ့်မည်” ဟုမိန့်တော်မူ၏။ မှောင်မိုက်သားများကိုကား “သင်တို့သည် သင်တို့၏အဘတည်းဟူသော မာရ်နတ်မှဆင်းသက်ကြ၏။ သင်တို့၏အဘ၏အလိုသို့လည်း လိုက်တတ်ကြ၏။ မာရ်နတ်သည် . . . သစ္စာတရားမရှိသောကြောင့် သစ္စာတရား၌ မတည်မနေ။” သို့ဖြစ်၍ သမ္မာတရား၌ အစဉ်ရပ်တည်ရန် စိတ်ပိုင်းဖြတ်ကြစို့။ ‘ဘုရားသခင့် ဝိညာဉ်တော်၏လမ်းပြမှုကို ခံယူ၍ အမှန်တရားနှင့်အညီ ခမည်းတော်ကို ကိုးကွယ်’ ကြစို့။ “မစိုးရိမ်ကြနှင့်။ ငါသည် လောကကိုအောင်ပြီ” ဟူသော ယေရှုစကားကို ရင်ဝယ်ပိုက်၍ အားယူကြစို့။—၈:၃၁၊ ၃၂၊ ၄၄; ၄:၂၃၊ ကဘ; ၁၆:၃၃။
၃၅ ဤအရာအားလုံးသည် ဆက်စပ်မှုရှိသည့်ပြင် နိုင်ငံတော်နှင့်လည်း ဆက်စပ်မှုရှိ၏။ စစ်ဆေးမေးမြန်းခံရစဉ် ယေရှုဤအချက်ကို သက်သေထူခဲ့သည်– “ငါ၏နိုင်ငံသည် ဤလောကနှင့်မစပ်ဆိုင်။ ငါ၏နိုင်ငံသည် ဤလောကနှင့်စပ်ဆိုင်လျှင် ငါသည် ယုဒလူသို့လက်သို့ မရောက်စေခြင်းငှာ ငါ၏လူတို့သည် တိုက်လှန်ကြလိမ့်မည်။ ယခုမူကား ငါ၏နိုင်ငံသည် ဤဒေသအရပ်နှင့် မစပ်ဆိုင်။” ၎င်းနောက် ပိလတ်အမေးကို ဤသို့ဖြေကြားတော်မူ၏– “မင်းကြီးမေးသည်အတိုင်း ငါသည် ရှင်ဘုရင်မှန်၏။ သမ္မာတရားဘက်၌ သက်သေခံခြင်းငှာ ငါသည် မွေးဖွားခြင်းကိုခံ၍ ဤလောကသို့ကြွလာပြီ။ သမ္မာတရားနှင့်စပ်ဆိုင်သမျှသောသူတို့သည် ငါ့စကားကို နားထောင်ကြသည်။” (၁၈:၃၆၊ ၃၇) နာခံသူများ၊ “ဒုတိယမွေးခြင်း” ခံသူများသည် ‘ဘုရားသခင့်နိုင်ငံတော်သို့’ ဝင်ကာ ဘုရင်နှင့်အတူပေါင်းစည်းကြမည်ဖြစ်၍ ဝမ်းမြောက်ကြသည်။ သိုးထိန်းလည်းဖြစ်၊ ဘုရင်လည်းဖြစ်သော ကိုယ်တော့်စကားသံကို နားထောင်သောအားဖြင့် အသက်ရယူမည့် “အခြားသိုး” တို့လည်း ဝမ်းမြောက်ကြ၏။ “ယေရှုသည် ခရစ်တော်တည်းဟူသော ဘုရားသခင်၏သားတော်ဖြစ်တော်မူသည်ကို သင်တို့သည် ယုံမည်အကြောင်း၊ ထိုသို့ယုံ၍ နာမတော်အားဖြင့် အသက်ကိုရမည်အကြောင်း” ရည်ရွယ်ကာ ယောဟန်သတင်းကောင်းကျမ်းစောင်ကို ရေးသားခြင်းဖြစ်သောကြောင့် ယင်းကျမ်းစောင်အတွက် ကျေးဇူးတင်ထိုက်ပေသည်။—၃:၃၊ ၅; ၁၀:၁၆; ၂၀:၃၁။
[အောက်ခြေမှတ်ချက်များ]
a The Ecclesiastical History, Eusebius, V, VIII, 4.