စာရှုသူများထံမှ မေးခွန်းလွှာ

▪ ကရေတေကျွန်းသားများအား သိုင်းခြုံကဲ့ရဲ့စကားကို သဘောတူလက်ခံလိုက်ခြင်းအားဖြင့် တမန်တော်ပေါလုသည် လူမျိုးတစ်စုအပေါ် အထင်အမြင်သေးစိတ်ရှိကြောင်း တင်ပြနေခြင်းလော။

မဟုတ်ပါ။ အခြားလူမျိုးစု၊ သို့မဟုတ် လူမျိုးရေးနောက်ခံအား သိမ်းကျုံးပြစ်တင်ခြင်းအကျင့်ကို ပေါလုကျင့်နေခြင်းမဟုတ်။

ဤသို့မေးရခြင်းကား တပည့်တော် တိတုထံရေးသောပေါလုစာပါ မှတ်ချက်အချို့ကြောင့်ဖြစ်သည်။ “မစုံလင်သမျှတို့ကို ပြင်ဆင်၍ မြို့ရွာများ၌ သင်းအုပ်တို့ကို ခန့်ထားစေခြင်းငှာ” မြေထဲပင်လယ်ရှိ ကရေတေကျွန်းပေါ် သူ့အား ပေါလုထားရစ်ခဲ့သည်။ အသင်းတော်အကြီးအကဲများအတွက် အရည်အချင်းအချို့ကို ပေါလုအကြမ်းဖေါ်ပြပြီး တိတုအားဤသို့ သတိပေးသည်။ “နားမထောင်ဘဲ အချည်းနှီးသောစကားကိုပြော၍ လှည့်ဖြားတတ်သောသူအများရှိကြ၏။ အရေဖျားလှီးခြင်းကို ခံသောသူတို့တွင်လည်း အထူးသဖြင့်ရှိ၏။ ထိုသူတို့၏ နှုတ်ကိုပိတ်ရမည်။ သူတို့သည် မစင်ကြယ်သောစီးပွားကို တပ်မက်လျက်၊ မပေးအပ်သော ဩဝါဒကိုပေး၍ တစ်အိမ်ထောင်လုံးကို မှောက်လှန်တတ်ကြ၏။”—တိတု ၁:၅၊ ၁၀၊ ၁၁။

အခန်းငယ် ၁၂ တွင်ပေါလုဤသို့ဆက်တင်ပြသည်။ “သူတို့အပါအဝင်၊ အမျိုးသားချင်း ပရောဖက်ဆရာတစ်ယောက်က ‘ကရက်သားမြဲ၊ မုသာစွဲလမ်း၊ သားရဲကြမ်းကြုတ်၊ စားကြူးတုတ်တုတ်၊ လူယုတ်ပေ’ ဟုစပ်ဆိုသတည်း။ အငယ် ၁၃ တွင်ဤသို့ဆက်ပြောသည်။ “ဤသက်သေမှန်၏။ ထိုကြောင့် . . . ယုံကြည်ခြင်းအမှု၌ စင်ကြယ်စေခြင်းငှာ သူတို့ကို ကျပ်တည်းစွာဆုံးမပြစ်တင်လော့။”

ပေါလုမှတ်ချက်ချခဲ့သည့် “ဤသက်သေမှန်၏” ဟူသောစကားကို ကျမ်းစာဘာသာပြန်အချို့က ကရေတေအမျိုးသား ပရောဖက်တစ်ဦးပြောဆိုသောစကားကို သူကိုးကားတင်ပြပြီးသည်နှင့် တစ်ဆက်တည်း တင်ပြသည်။ အခြားသူများမူ အခန်းငယ် ၁၃ တွင် အပိုဒ်အသစ်စခဲ့သည်။aမည်သို့ဆိုစေကာမူ အဘယ်အချက်ကို ပေါလုသဘောတူညီကြောင်း ပြခြင်းဖြစ်သနည်း။

ကရေတေကျွန်းသားများကို သိမ်းကျုံးနှိမ်ပြောသည့်စကားကို သူသဘောတူနေခြင်းမဟုတ်သည်ကား အမှန်။ ထိုသို့ဖြစ်သည်မှာ သေချာနိုင်၏။ အကြောင်းမှာ ကရေတေကျွန်းပေါ်တွင် ဘုရားသခင်နှစ်သက်တော်မူ၍ ကိုယ်တော်.သန့်ရှင်းသောဝိညာဉ်တော်နှင့် ဘိသိက်ပေးထားသော ခရစ်ယာန်ကောင်းများရှိသည်ကို ပေါလုသိထားသည်။ (တမန်တော် ၂:၅၊ ၁၁၊ ၃၃) “မြို့ရွာများ၌” အသင်းတော်များ တည်ထောင်ပေးရန် စိတ်ထက်သန်သောခရစ်ယာန် အလုံအလောက်ရှိနေသည်။ ဤခရစ်ယာန်များသည် စုံလင်သူများမဟုတ်သော်လည်း သူတို့မှာ မုသာစွဲလမ်း၊ ပျင်းရိသော စားကြူးသူများမဟုတ်ကြသည်ကို စိတ်ချနိုင်သည်။ ထိုသို့သာဆိုလျှင် ယေဟောဝါမျက်နှာသာတော်ကို သူတို့ဆက်ခံစားနေရကြမည်မဟုတ်။ (ဖိလိပ္ပိ ၃:၁၈၊ ၁၉။ ဗျာဒိတ် ၂၁:၈) ယနေ့လူမျိုးတိုင်းတွင် ကျွန်ုပ်တို့တွေ့ရသည်အတိုင်း ကရေတေကျွန်းပေါ်၌လည်း ပတ်ဝန်းကျင်ရှိ သီလယိုယွင်းမှုကြောင့် စိတ်ဓာတ်ကျပြီး ခရစ်ယာန်သတင်းတရားကို လက်ခံနာယူရန် အသင့်ရှိသူ၊ နှလုံးသား ရိုးဖြောင့်သူများ ရှိမည်အမှန်။—ယေဇကျေလ ၉:၄။ တမန်တော် ၁၃:၄၈ နှင့်နှိုင်းယှဉ်ပါ။

တစ်ဘက်ကကြည့်ပြန်လျှင် သီလစံချိန်မမြင့်မားသူများလည်း ကရေတေကျွန်းပေါ်ရှိသည်။ ယင်းကြောင့် ကရေတေသား ကဗျာဆရာ (ပရောဖက် သို့မဟုတ် ပြောရေးဆိုခွင့်ရှိသူ) ဧပိမေနေဒပ် စတင်စပ်ဆိုခဲ့သည့် စကားများကို ပေါလုကိုးကားရန် လျောက်ပတ်ပုံရှိသည်။ ကရေတေပြည်သားအချို့နှင့်စပ်လျဉ်းသည့် ထိုဖေါ်ပြချက်ကို ပေါလုသဘောတူလက်ခံလိုက်ခြင်းသာဖြစ်သည်။

သစ္စာရှိခရစ်ယာန်များနှင့် အဆက်အသွယ်ရှိသော “အချည်းနှီးသောစကားကိုပြော၍ လှည့်ဖြားတတ်သောသူများ” ရှိပြီး “တစ်အိမ်ထောင်လုံးကို မှောက်လှန်” ရန် ကြိုးစားနေကြသည်။ ဤကဲ့သို့သော မှောက်လှန်တတ်သည့် လှည့်ဖြားသူများသည် “မုသာစွဲလမ်း၊ သားရဲကြမ်းကြုတ်” ဟူသောစကားနှင့်အညီ ပြုမူနေကြသည်။ ထိုကဲ့သို့သောသူများ အခြားအရပ်ဒေသများတွင်လည်း ရှိပါသည်။ (၂ တိမောသေ ၃:၆၊ ၁၃) ထို့ပြင် ထိုအကျင့်များကိုကျင့်တတ်နေသော လှည့်ဖြားခံခဲ့ရသူ အသင်းတော်ရှိ မည်သူမဆိုကို “ကျပ်တည်းစွာ ဆုံးမ” ပေးရန်လိုနေပေသည်။ ဆုံးမခံ၍ ပြုပြင်သူများသည် အရာရာ၌ ကောင်းသောအကျင့်တို့၏ ပုံသက်သေကို ကိုယ်တိုင်ပြသူများ၊ “သင်ကြားရာတွင် အပြစ်တင်ခွင့်မရှိစေ” သူများ ဖြစ်လာနိုင်ပေမည်။—တိတု ၂:၆-၈၊ သမာကျမ်း။

ဤတွင် ကျွန်ုပ်တို့အတွက် သတိပေးချက်ကို မြင်တွေ့သင့်သည်။ လူမျိုးတစ်စုကိုအထင်အမြင်သေးခြင်း၊ သို့မဟုတ် လူမျိုးရေးစိတ်ထား ပြင်းထန်သူများအလယ် ကျွန်ုပ်တို့နေထိုင်နေကြမည်။ (ယောဟန် ၇:၄၇-၅၂ နှင့်နှိုင်းယှဉ်ပါ။) အိမ်နီးချင်းများ၊ ကျောင်းနေဖက်များ၊ အလုပ်လုပ်ဖေါ်များက အခြားလူမျိုးတစ်မျိုးနှင့်ပတ်သက်၍ ‘အဲ့ဒီလူမျိုးဟာ စိတ်မာပြီး စာနာမှုမရှိကြဘူး၊’ သို့မဟုတ် ‘သူတို့လူမျိုးအကြောင်း သိတယ်မဟုတ်လား။ သိတ်မာနကြီးတယ်၊’ သို့မဟုတ် ‘ဟိုဘက်ကလူတွေကို ယုံလိုက်ရင် အန္တရာယ်ရှိတယ်’ အစရှိသည့် သိမ်းကျုံးပြောဆိုသည့် စကားများကို ပြောဆိုကြမည်။

အခြေအမြစ်မရှိ၊ များသောအားဖြင့် ပုံကြီးချဲ့ခြင်းဖြစ်သော ဤသိမ်းကျုံးနှိမ်နင်းစကားများကို လက်မခံမိရန် ကြိုးစားရမည်။ အချို့သူများ ဖေါ်ရွေပျူငှာ၊ အာသွက်ရှာသွက်ကြမည်။ အခြားသူများမူ ရှက်တတ်ပြီး သူစိမ်းနှင့် ချက်ချင်းခင်မင်ရင်းနှီးမှု မရှိတတ်သူများဖြစ်မည်။ သို့သော် ကျွန်ုပ်တို့၏ ညီအစ်ကိုအချို့သည် ထိုလူမျိုးစုအဝင်ဖြစ်ကြောင်း၊ နှစ်ခြိုက်ဖွယ်ကောင်းသော အရည်အချင်းများရှိပြီး ဖြောင့်မတ်ခြင်းတရားကို မြတ်နိုးသည့် ခရစ်ယာန်စစ်များ မဟုတ်ကြသေးသူများစွာ ထိုလူမျိုးစု၌ ရှိနိုင်ကြောင်း သတိရသင့်သည်။

တမန်တော်ပေတရုက “ဘုရားသခင်သည် လူမျက်နှာကို မှတ်တော်မမူ၊ လူအမျိုးမျိုးတို့တွင် ဘုရားသခင်ကိုကြောက်ရွံ့၍ တရားသဖြင့်ကျင့်ဆောင်သောသူသည် အထံတော်၌ မျက်နှာရ” ကြောင်း အလေးအနက်တင်ပြခဲ့သည်။ (တမန်တော် ၁၀:၃၄၊ ၃၅) ထိုအတိုင်းပင် ပေါလုယူမှတ်ကြောင်း သေချာနိုင်သည်။ သူ၏အရေးအသားနှင့် အပြောအဆိုတွင်လည်း ထပ်တူသဘောထားတင်ပြခဲ့ပေသည်။ ကျွန်ုပ်တို့လည်း ထိုသို့ပင်ဖြစ်သင့်သည်။

[အောက်ခြေမှတ်ချက်များ]