စာရှုသူများထံမှ မေးခွန်းလွှာ

▪ ယောဟန် ၁၈:၁၅ ၌ယဇ်ပုရောဟိတ်မင်းနှင့်သိကျွမ်းသော တပည့်တော်တစ်ဦးအကြောင်းဖော်ပြထားသည်။ ဤတပည့်တော်သည် မာကု ၁၄:၅၁၊ ၅၂ ၌မှတ်တမ်းတင်ထားသည့်အတိုင်း စောစောက “အဝတ်မရှိဘဲ” ထွက်ပြေးခဲ့သောတပည့်တော်ပင်ဖြစ်သလော။

မဟုတ်ပါ။ ယဇ်ပုရောဟိတ်မင်းနှင့်သိကျွမ်းသောသူမှာ တမန်တော်ယောဟန်ဖြစ်ပုံရပြီး “အဝတ်မရှိဘဲ” ထွက်ပြေးသူမှာ တပည့်တော်မာကုဖြစ်သည်။

ဤအကြောင်းအရာများဖြစ်ပျက်ချိန်ကို အစဉ်အလိုက်ပြောရလျှင် ဂေသရှေမန်ဥယျာဉ်မှ အစချီရပေမည်။ ယေရှုခရစ်တော်အဖမ်းခံရချိန်၌ တမန်တော်တို့သည် ကြောက်ရွံ့ခဲ့ကြသည်။ “တပည့်တော်အပေါင်းတို့သည် ကိုယ်တော်ကိုစွန့်ပစ်၍ပြေးကြ၏။” မာကု၏မှတ်တမ်းမှ နောက်အခန်းငယ်တွင် ခြားနားချက်တစ်ခုကိုဖော်ပြထားသည်။ “လုလင်တစ်ယောက်သည် ပိတ်တစ်ထည်ကိုသာခြုံလျက် နောက်တော်သို့လိုက်သည်ဖြစ်၍ ထိုသူကိုဖမ်းဆီးကြ၏။ သူသည်လည်း ပိတ်ထည်ကိုစွန့်၍ အဝတ်မရှိဘဲ ထွက်ပြေးလေ၏။”—မာကု ၁၄:၅၀-၅၂။

သို့ဖြင့် တမန်တော် ၁၁ ပါးတို့၏ကနဦးတုံ့ပြန်ချက်သည် ဤအမည်မဖော်သောတပည့်တော်၏တုံ့ပြန်ချက်နှင့် ကွဲပြားနေသဖြင့် ဤသူသည် တမန်တော်တစ်ပါးမဟုတ်ကြောင်း ကျိုးကြောင်းညီညွတ်စွာကောက်ချက်ချနိုင်ပေသည်။ ဤအဖြစ်အပျက်ကို ဗာနဗ၏ဝမ်းကွဲ၊ ကနဦးတပည့်တော်ယောဟန်မာကုရေးသားသည့် ခရစ်ဝင်ကျမ်းတစ်စောင်တည်း၌သာ မှတ်တမ်းတင်ထားသည်ကိုတွေ့ရသည်။ ထို့ကြောင့် အဖမ်းခံရသော ယေရှုနောက်တော်သို့လိုက်၍ လူအုပ်ကဖမ်းမည်ပြုစဉ် အပေါ်ခြုံထည်ကိုစွန့်၍ ထွက်ပြေးခဲ့သော “လုလင်” မှာမာကုဖြစ်ကြောင်း ယုံကြည်လက်ခံရန်အကြောင်းရှိပေသည်။—တမန်တော် ၄:၃၆။ ၁၂:၁၂၊ ၂၅။ ကောလောသဲ ၄:၁၀။

ထိုညတစ်ချိန်ချိန်၌ တမန်တော်ပေတရုကလည်း ခပ်လှမ်းလှမ်းမှနေ၍ ယေရှု၏နောက်တော်သို့လိုက်ခဲ့သည်။ ဤဖြစ်ရပ်၌ တူညီချက်တစ်ရပ်တွေ့ရသည်။ ငယ်ရွယ်သောတပည့်တော် (မာကု) သည် ယေရှုနောက်တော်သို့လိုက်ခဲ့သော်လည်း ဆက်မလိုက်ဘဲနေခဲ့သည်။ သို့သော် ထွက်ပြေးသွားသောတမန်တော်နှစ်ပါးသည် နောက်ပိုင်းတွင် အဖမ်းခံရသောသူတို့၏သခင်၏ နောက်တော်သို့လိုက်ခဲ့ကြသည်။ တမန်တော်ယောဟန်၏ခရစ်ဝင်ကျမ်းတွင် ကျွန်ုပ်တို့ဤသို့ဖတ်ရသည်။ “ရှိမုန်ပေတရုနှင့်အခြားသောတပည့်တော်တစ်ယောက်သည် ယေရှုနောက်တော်သို့လိုက်ကြ၏။ ထိုတပည့်တော်သည် ယဇ်ပုရောဟိတ်မင်း၏အသိအကျွမ်းဖြစ်၍ ယေရှုနှင့်တကွ ယဇ်ပုရောဟိတ်မင်း၏အိမ်ဦးထဲသို့ ဝင်လေ၏။”—ယောဟန် ၁၈:၁၅။

တမန်တော်ယောဟန်သည် “ယောဟန်” ဟူသောအမည်ကို နှစ်ခြင်းဆရာယောဟန်အတွက် ရည်ညွှန်းရာ၌အသုံးပြုသော်လည်း မိမိကိုယ်ကိုရည်ညွှန်းရာတွင် အမည်နာမလုံးဝမသုံးခဲ့ပေ။ သာဓကအနေနှင့် “ထိုတပည့်တော်ကား၊ ဤအကြောင်းအရာများကို သက်သေခံ၍ရေးထားသောသူ” ဟူသောအကြောင်းကို သူရေးသားသည်။ ထိုနည်းတူ “ထိုအကြောင်းအရာကိုမြင်သောသူသည် သက်သေခံ၏။ သူ၏သက်သေခံချက်သည်လည်း မှန်ပေ၏။ . . . သူပြောသောစကားမှန်သည်ကို သူသိ၏” ဟူ၍လည်း ရေးသားထားသည်။ (ယောဟန် ၁၉:၃၅။ ၂၁:၂၄) ယောဟန် ၁၃:၂၃ ကိုလည်းမှတ်သားပါ။ “ယေရှုချစ်တော်မူသောတပည့်တော်သည် ရင်ခွင်တော်နားမှာလျောင်း” သည်။ ထိုသို့လျောင်းခဲ့သည့်အချိန်မှာ ယေရှုအဖမ်းမခံရမီကလေး၌ဖြစ်သည်။ ထိုနေ့နှောင်းပိုင်းတွင် သစ်တိုင်တင်ခံရသောယေရှုက တပည့်တော်တစ်ယောက်ကိုရွေးထုတ်တော်မူခဲ့သည်။ ထိုသူအကြောင်းကို အလားတူအသုံးအနှုန်းမျိုး ဖြင့်ပင် ယောဟန်ဖော်ပြထားသည်။ “မယ်တော်နှင့်ကိုယ်တော်ချစ်တော်မူသောတပည့်တော်သည် အနားမှာရပ်နေသည်ကို ယေရှုသည်မြင်တော်မူလျှင် မယ်တော်အား ‘အချင်းမိန်းမ၊ သင်၏သားကိုကြည့်ပါ’ ဟူ၍ . . . မိန့်တော်မူ၏။”—ယောဟန် ၁၉:၂၆၊ ၂၇။ ယောဟန် ၂၁:၇၊ ၂၀ နှင့်နှိုင်းယှဉ်။

အမည်မဖော်ဘဲထားသည့် ဤထူးခြားသည့်သဘောမျိုးကို ယောဟန် ၁၈:၁၅ ၌ထင်ရှားစွာတွေ့ရသည်။ ထိုမျှမက ယောဟန်နှင့်ပေတရုတို့သည် ယောဟန် ၂၀:၂-၈ မှယေရှုရှင်ပြန်ပြီးစမှတ်တမ်းတွင်လည်း ဆက်နွယ်ခဲ့ကြသည်။ ဤအချက်တို့က “ယဇ်ပုရောဟိတ်မင်း၏အသိအကျွမ်း” ဖြစ်သောတပည့်တော်မှာ တမန်တော်ယောဟန်ပင်ဖြစ်ကြောင်း ထောက်ပြကြသည်။ ဂါလိလဲနယ်သား တမန်တော် (ယောဟန်) သည်ယဇ်ပုရောဟိတ်မင်းကို မည်သို့သိကျွမ်းသည်၊ သူ့အားယဇ်ပုရောဟိတ်မင်းက မည်သို့သိကျွမ်းသည်ကို နောက်ကြောင်းနှင့်တကွ သမ္မာကျမ်းစာကမဖော်ပြပေး။ သို့သော်လည်း သူ့ကိုယဇ်ပုရောဟိတ်မင်း၏အိမ်သားတို့က သိကျွမ်း၍သာယောဟန်သည် တံခါးစောင့်တို့ကိုဖြတ်၍ အိမ်ဝင်းအတွင်းသို့ဝင်ရောက်နိုင်ခဲ့သည့်ပြင် ပေတရုကိုလည်းခေါ်သွင်းနိုင်ခဲ့ခြင်းဖြစ်သည်။

▪ သိပ္ပံပညာရှင်များက အချို့ကြယ်များသည် လောင်ကျွမ်းခြင်း သို့မဟုတ် ပေါက်ကွဲသွားသည်ဟု ခံယူထားသည်ဖြစ်ရာ ဟေရှာယ ၄၀:၂၆ ကအဘယ်ကြောင့် “[ကြယ်များ] တစ်စုံတစ်ခုမျှမပေါ်ဘဲမနေရ” ဟုဆိုထားသနည်း။

ယေဟောဝါသည်ဤတွင် ကြယ်များပျောက်ကွယ်ရန် ခွင့်ပြုသည်မပြုသည် ကိုဆွေးနွေးနေခြင်းမဟုတ်ချေ။ ကိုယ်တော်သည်မိမိ၏ ဉာဏ်ပညာနှင့်စွမ်းရည် မည်မျှကြီးမားကြောင်းကို အလေးအနက်ပြောနေခြင်းဖြစ်သည်။

ဘုရင်ဟေဇကိအား ပရောဖက်ဟေရှာယကဗာဗုလုန်များသည်ဂျူးတို့ကို သုံ့ပန်းအဖြစ်ခေါ်ဆောင်သွားမည့်အကြောင်း၊ ဘုရားရှင်၏သတိပေးချက်ကို ဖော်ပြသည်။ (ဟေရှာယ ၃၉:၅၊ ၇) ဗာဗုလုန်များသည် ဘုရားရှင်၏လူများကို အကန့်အသတ်မရှိချုပ်ထားနိုင်မည်လော။ မချုပ်ထားနိုင်ပါ။ ယေဟောဝါရှင်သည်သူတို့အား အနှစ် ၇၀ ပြီးနောက်လွတ်မြောက်စေရန် ရည်ရွယ်ထားရုံမကဘဲ ပြုလုပ်တော်မူမည်။ ‘ရေများကိုလက်ဆွန်းဖြင့်ခြင်သောသူ၊ မိုးကောင်းကင်ကို မိမိလက်ဖြင့်ထွာ’ နိုင်သည့်ပုဂ္ဂိုလ်ကို မည်သူမျှမတားဆီးနိုင်။ မည်သူနှင့်မျှ ကိုယ်တော် တိုင်ပင်ရန်မလိုပေ။ အကြောင်းမှာ ကိုယ်တော်အတွက် “လူအမျိုးမျိုးတို့သည် ရေပုံးမှကျသောရေစက်ကဲ့သို့” ဖြစ်သည်။ (ဟေရှာယ ၄၀:၁၂-၁၇) ကိုယ်တော်၏အံ့ဖွယ်စွမ်းရည်ကို အလေးအနက်တင်ပြလို၍ ယေဟောဝါရှင်သည် ဟေဇကိယခင်မှ-အသိအမှတ်ပြုခဲ့သော ဖန်ဆင်းရာတွင်ထင်ရှားသော မိမိ၏စွမ်းရည်ကို အာရုံစိုက်စေခဲ့သည်။ (ဟေရှာယ ၃၇:၁၆၊ ၁၇) ဘုရားရှင်ကကြေညာသည်မှာ၊

“‘သို့ဖြစ်၍၊ ငါ့ကိုအဘယ်သို့ ပုံပြရအံ့နည်း။ ငါသည်အဘယ်သူနှင့် တူရအံ့နည်း’ ဟု သန့်ရှင်းသောဘုရား မေးတော်မူ၏။ ‘အထက်သို့မျှော်ကြည့်ကြလော့။ ထိုအရာတို့ကို အဘယ်သူဖန်ဆင်းသနည်း။ ထိုသူသည် သူတို့အလုံးအရင်းကို အရေအတွက်အားဖြင့် ထုတ်ဆောင်တော်မူ၏။ အလုံးစုံတို့ကိုနာမည်ဖြင့် ခေါ်တော်မူ၏။ ခွန်အားကြီး၍ တန်ခိုးနှင့်ပြည့်စုံတော်မူသောကြောင့် တစ်စုံတစ်ခုမျှ မပေါ်ဘဲမနေရ။’”—ဟေရှာယ ၄၀:၂၅၊ ၂၆။

သိပ္ပံပညာရှင်များက ကျွန်ပ်တို့၏နဂါးငွေ့တန်းတွင်ကြယ် သန်းထောင်ပေါင်းများစွာပါဝင်သည်ဟု ခန့်မှန်းပြီးနဂါးငွေ့တန်း သန်းပေါင်းတစ်ထောင်ခန့်ရှိသည်။ သို့နှင့်ပင်မြင့်မြတ်သောစကားတော်ဖြင့်ဖြစ်နိုင်သော တစ်ခုချင်းနာမည်ဖြစ်စေ သို့မဟုတ် နာမည်ကဲ့သို့သတ်မှတ်ချက်ကိုဖြစ်စေ ဘုရားရှင်သည်ကြယ်တစ်လုံးစီကို နာမည်ဖြင့်သိတော်မူသည်။ ယင်းတို့၏အခြေအနေသည် ကိုယ်တော်၏အမိန့်အောက်တွင်ရှိသည်။ဗိုလ်ချုပ်တစ်ဦးသည် တပ်များကိုစုရုံးနိုင်သကဲ့သို့ ယေဟောဝါရှင်သည်ကြယ်များကိုစုရုံးရန် ခေါ်ထုတ်နိုင်သည်။ ကိုယ်တော်ခေါ်သောအခါ တစ်စုံတစ်ခုမျှ “မပေါ်ဘဲ” နေမည်မဟုတ်။ ကြယ်တစ်လုံးစီ၏ အခြေအနေကိုသိသောကြောင့် အကယ်၍ယင်းတို့မှအချို့သည် ဓမ္မတာအတိုင်းချုပ်ငြိမ်းသွားလျှင်ပင် ဖြစ်ပျက်နေသမျှအလုံးစုံကို သိရှိသောသူအတွက် အံ့ဩစရာမဟုတ်ချေ။—ဟေရှာယ ၃၄:၁၆ နှင့်နှိုင်းယှဉ်။

နက္ခတ်ပညာရှင်များနှင့် ရူပဗေဒပညာရှင်များက ကြယ်များသည် လောင်ကျွမ်းခြင်း သို့မဟုတ် ပေါက်ကွဲသွားသည်ဟု ယူဆကြသည်။ Red Giants and White Dwarfs စာစောင်၌ ရောဘတ်ဂျက်စ်တြိုက ဤသို့ဖြစ်ပျက်နိုင်ပုံသီအိုရီကို တင်ပြထားသည်။ “ကြယ်. . .အတွင်း၌ နျူကလီးယားတုံ့ပြန်မှုဖြစ်ပေါ်လာပြီး စကြဝဠာရှိအခြားဒြပ်စင်များကို အခြေခံပါဝင်သည့်ဟိုက်ဒရိုဂျင်မှ ထုတ်လုပ်ခဲ့သည်။ နောက်ဆုံးတွင် ဤနျူကလီးယားတုံ့ပြန်မှုများ ပြီးဆုံးသွားကာကြယ်၏ သက်တမ်းကုန်ဆုံးသွားသည်။ ၄င်း၏နျူကလီးယားစွမ်းအင်၊ အင်အားစုကိုနှုတ်ယူခံရပြီးနောက် ယင်း၏အလေးချိန်အောက်၌ ပြိုကွဲသွားသည်။ ထိုသို့ပြိုကွဲသွားပြီးနောက် ပေါက်ကွဲမှုဖြစ်ပေါ်ကာ ကြယ်သက်တမ်းတစ်လျှောက်တွင် ယင်းအပေါ်၌ဖြစ်ပေါ်ခဲ့သော အရာဝတ္ထုအားလုံးသည် လေဟာပြင်သို့ပျံ့လွင့်ကုန်သည်။”

အချို့ကြယ်များသည် သူတို့ကိုယ်နှိုက်၏ဟိုက်ဒရိုဂျင်ကို လောင်ကျွမ်းစေကာ ဧရာမအနီရောင်ကြီးသို့ ပြောင်းလဲသွားပြီး အဖြူရောင်ပုကွသော သို့မဟုတ် ကြယ်သစ်ကြီးဖြစ်ပေါ်လာ၍ အချို့သည်နောက်ဆုံးတွင် နျူးထရွန်ကြယ်များ သို့မဟုတ် သီအိုရီအရအမဲပေါက်များ ဖြစ်သွားသည်။

ယင်းရှင်းပြချက်ကိုကျယ်ပြန့်စွာ လက်ခံထားကြသော်လည်း နောက်ဆုံးအဆိုများကို မကြားရသေးပေ။ ထပ်ဆင့်သိရှိလာပေဦးမည်။ ဥပမာအနေနှင့် ဇန္နဝါရီ ၂၄၊ ၁၉၈၉ ခုထုတ် The New York Times တွင်ဖော်ပြထားသော အချက်များကိုသုံးသပ်ပါ။ “သိပ္ပံပညာရှင်များက သူတို့သည်ဖန်ဆင်းခြင်း၏ ပေါက်ကွဲရာအချိန်နောက်ပိုင်း ၃ မိနစ်မှဧရာမနဂါးငွေ့တန်းများ ပေါ်ပေါက်လာသည်အထိ ခက်ခဲရာကာလဖြစ်သော စကြဝဠာ၏ ‘အမှောင်ခေတ်များ’ အကြောင်း အဓိကတွေ့ရှိချက်များ၏ အစွန်နားရောက်နေပြီဖြစ်ကြောင်း ယုံကြည်ကြသည်။ . . .တိုက်ရိုက်အထောက်အထားများ နည်းပါးလှခြင်းကြောင့် ကမ္ဘာဦးဖွဲ့စည်းပုံသည် သိပ္ပံပညာရှင်များအား လုံးဝအထမမြောက်ဖြစ်စေခဲ့သည်။ ဖဲဖက်စ်၊ ဗာရှိ ဂျော့မဲဆင်တက္ကသိုလ်မှ ရူပဗေဒပညာရှင် ဂျိမ်းအက်စ်တြီဖင်လ်က ရေးသားခဲ့သည်။ ‘နဂါးငွေ့တန်းများဖြစ်ပေါ်ပုံကို ရှင်းပြရာ၌အခက်အခဲသည် လောကဓာတ်ပညာတွင် ဒုက္ခအပေးဆုံးတစ်ခုဖြစ်နေသည်။ ယင်းတို့ထိုတွင်လုံးဝမရှိသင့်သော်လည်း ရှိမြဲရှိလျက်ပင်။”

နက္ခတ်ရူပပညာရှင် ဒေါက်တာယောဟန်မာသာ ရှင်းပြသည့်အတိုင်းဆောင်းပါးတွင် “ပထမသုံးမိနစ်” တွင်ဘာဖြစ်နိုင်ကြောင်း ဆွေးနွေးထားသည်။ ကျွန်ုပ်တို့ဤသို့ဖတ်ရှုရသည်။ “ဒေါက်တာမာသာသည် တွေ့ဆုံမေးမြန်းလာသူများ၏ ရှုပ်ထွေးမှုများတိုးများလာခြင်းကို သတိထားမိ၍လူအများလက်ခံထားသော ဖန်ဆင်းခြင်း၏ဇာတ်ညွှန်းကို သူထပ်ပြောခဲ့သည်။ ‘တကယ်တော့ကျွန်တော်တို့ ဒီလိုလုပ်နေရခြင်းက’ မှန်းဆမှုအပေါ်အခြေခံထားတဲ့ သီအိုရီတွေကိုအထပ်ထပ် ပြုပြင်ခြင်းသာဖြစ်တယ်လို့ဆိုလိုတယ်။”

မှန်ပါသည်။ လူသားသိပ္ပံပညာရှင်များသည် သူတို့တကယ်သိရှိသော၊ သိနိုင်စွမ်း၊ အလွန်ပင် အကန့်အသတ်ရှိသည်။ ဖန်ဆင်းရှင်နှင့်ကားမည်မျှ ကွာခြားလှပါတကား။ ကိုယ်တော်၏အသိပညာနှင့် ကြီးမားလှသောစွမ်းအားတို့သည် ကျွန်ုပ်တို့၏ရိုသေကြောက်ရွံ့မှုကို အမှန်ပင်ခံထိုက်ပေသည်။ ဆာလံဆရာကမှန်ကန်စွာပင် ပြောဆိုခဲ့သည်။ “ကြယ်များကိုရေတွက်၍ အသီးသီးတို့ကိုသမုတ်တော်မူ၏။ ငါတို့၏ဘုရားရှင်သည် ကြီးမြတ်တော်မူ၏။ တန်ခိုးတော်လည်းကြီး၏။ ဉာဏ်တော်သည် အနန္တဖြစ်၏။ ဟာလေလုယ။”—ဆာလံ ၁၄၇:၄၊ ၅၊ ၂၀။