လူသားမဖန်တီးနိုင်သော “ငြိမ်းချမ်းခြင်းနှင့်လုံခြုံမှု” ကိုရှုမျှော်ခြင်း

အမှန်မှာ လူသားသည် စစ်မှန်၍တည်မြဲသောငြိမ်းချမ်းရေးမပေးနိုင်ပါ။ အဘယ်ကြောင့်နည်း။ အကြောင်းမူကား သွေးစွန်းသမိုင်းအတွက် လူသားတို့တာဝန်မကင်းကြသော်လည်း ငြိမ်သက်မှုကိုချိုးဖျက်သည့်တရားခံအစစ် ကား လူမဟုတ်ပါ။ ငြိမ်သက်မှုကိုချိုးဖျက်သူကား လူထက်တန်ခိုးကြီးမားသည်။ ယင်းသည် စာတန်မာရ်နတ်သာဖြစ်သည်။ သူ့အား ကျမ်းစာက “လောကီတစ်နိုင်ငံလုံးကိုလှည့်ဖြား” သူဟုဖော်ပြထားသည်။—ဗျာဒိတ် ၁၂:၉။

ကျ မ်းစာက “လောကီသားအပေါင်းတို့သည် မာရ်နတ်၏လက်၌ရှိကြသည်” ဟုဆိုသည်။ (၁ ယောဟန် ၅:၁၉) သို့ဖြစ်၍ စစ်မှန်သောငြိမ်းချမ်းမှုနှင့်တည်မြဲသောလုံခြုံမှုရရှိရေးအတွက် စာတန်မာရ်နတ်နှင့် သူတည်ထောင်၍ချုပ်ကိုင်ထားသော လောကစနစ်ကိုဖယ်ရှင်းပစ်ရမည်ဖြစ်သည်။ (ဟေရှာယ ၄၈:၂၂။ ရောမ ၁၆:၂၀ နှင့်နှိုင်းယှဉ်။) ယင်းကို လူသားမပြုလုပ်နိုင်ပါ။

သို့ဖြစ်လျှင် ငြိမ်းချမ်းခြင်းနှင့်လုံခြုံမှုကို မည်သို့ရရှိနိုင်မည်နည်း။ စာတန်ထက်အဆမတန်ကြီးမြတ်တော်မူသောအရှင်၏တန်ခိုးတော်အားဖြင့်ဖြစ်သည်။ လူ့လောကအလယ် စာတန်၏လှုပ်ရှားရာကာလကို အနန္တတန်ခိုးရှင်ဘုရားသခင်သည် အချိန်ကန့်သတ်ထားတော်မူပြီ။ ကန့်သတ်ထားရာကာလကုန်ဆုံးသည့်အခါ စာတန်၏လက်ခုပ်တွင်းရှိလောကအပေါ် “ပျက်စီးခြင်းဘေး” သည် တစ်မုဟုတ်ချင်းရောက်လိမ့်မည်။ (၁ သက်သာလောနိတ် ၅:၃-၇) ထိုသို့များမကြာမီဖြစ်တော့မည်အကြောင်း သာဓကအမြောက်အမြားကဖော်ညွှန်းနေသည်။

ယခုပင် ငြိမ်းချမ်း၍လုံခြုံပြီတကား

သို့သော် ယခုတွင်ကော။ ယနေ့တွင်ပင် စစ်မှန်သောငြိမ်းချမ်းခြင်းနှင့်လုံခြုံမှု အနည်းအကျဉ်းရှိနိုင်ပါသည်။ မည်သို့အားဖြင့်နည်း။ ဘာသာရေးခေါင်းဆောင်အများ လောကီရေးရာတွင် ပါဝင်ပြီးကြိုးစားခြင်းအားဖြင့်မဟုတ်ဘဲ ဘုရားသခင်၏အမိန့်တော်နှင့်သြဝါဒကိုလိုက်လျှောက်ခြင်းအားဖြင့်ဖြစ်သည်။

ဤကဲ့သို့သောလမ်းစဉ်သည် ငြိမ်သက်မှုအမှန်ရှိစေသလော။ အမှန်ရှိစေသည်။ ဥပမာ၊ စစ်မှန်သောငြိမ်သက်ခြင်းနှင့် လုံခြုံမှုအသင့်အတင့်ရှိနိုင်ကြောင်း ယေဟောဝါသက်သေများစမ်းသပ်သိရှိခဲ့ပြီ။ သမ္မာကျမ်းစာပါ ဘုရားသခင်၏မိန့်တော်မူချက်များကိုလိုက်လျှောက်ခြင်းအားဖြင့် မည်သည့်လူမျိုး၊ မည်သည့်နိုင်ငံသား၊ မည်သည့်ဘာသာစကားပြောသူဖြစ်စေကာမူ စစ်မှန်သောငြိမ်းချမ်းမှုရှိ အပြည်ပြည်ဆိုင်ရာအဖွဲ့အစည်းတစ်ခုအနေနှင့်ဖွဲ့စည်းနိုင်ခဲ့ပေပြီ။—ဆာလံ ၁၃၃:၁။

ဘုရားပေးပညတ်တော်ကိုနာခံသည့်အနေနှင့် သူတို့သည် ပုံဆောင်စကားအားဖြင့် ‘ဓားများကိုထွန်သွားဖြစ်စေပြီး စစ်အတတ်ကိုလည်း မသင်ယူကြတော့ချေ။’ (ဟေရှာယ ၂:၂-၄) ဘုရားသခင်၏ကရုဏာအောက် လုံခြုံနေကြပြီး သူတို့၏ဝိညာဏညီအစ်ကိုများသည် မိမိတို့ကိုချစ်ခင်ကြောင်း စိတ်ချကြသည်။ (ရောမ ၈:၂၈၊ ၃၅-၃၉။ ဖိလိပ္ပိ ၄:၇) ယင်းကိုသင်သံသယရှိနေမည်ဆိုလျှင် သူတို့၏နိုင်ငံတော်ခန်းမတစ်ခုခုသို့သွား၍ ကိုယ်တိုင်ဆန်းစစ်ကြည့်ရန် ဖိတ်ခေါ်ပါသည်။

ကမ္ဘာချီငြိမ်းချမ်း၍လုံခြုံခြင်း

သို့ရာတွင် ယင်းက ကျမ်းစာပါ စစ်မှန်သောငြိမ်းချမ်းခြင်းနှင့်လုံခြုံမှု၏အပြီးသတ်ပြည့်စုံချက်လုံးဝမဟုတ်ပါ။ ဘုရားသခင်၏ပညတ်တော်ကိုလူတိုင်းလိုက်လျှောက်မည်ဆိုလျှင် ဤလောကသည် မည်သို့ဖြစ်လာမည်အကြောင်း ကြိုတင်တွေ့မြင်ချက်မျှသာဖြစ်သည်။ များမကြာမီ ထိုမျှော်လင့်ချက်သည် အမှန်ဖြစ်လာပေမည်။

တမန်တော်ပေါလုကဤသို့ဆိုသည်။ “[မိမိနည်း၊ မိမိဟန်ဖြင့် ငြိမ်းချမ်းရေးနှင့်လုံခြုံမှုရရှိစေပြီအထင်နှင့်] ‘ငြိမ်ဝပ်ခြင်းရှိ၏၊ ဘေးအန္တရာယ်နှင့်ကင်းလွတ်၏’ ဟု [ဘုရားကိုဝတ်မပြုသူများ] ဆိုစဉ်တွင် . . . သူတို့အပေါ်၌ လျင်မြန်စွာသောပျက်စီးခြင်းရောက်” လိမ့်မည်။ (၁ သက်သာလောနိတ် ၅:၃) လူသားတို့ကိုစာတန်လှည့်ဖြားခဲ့ချိန် ကြာလွန်းပြီဟု ဘုရားသခင်ဆုံးဖြတ်လိမ့်မည်။ ထိုအခါ ကမ္ဘာ့ဇာတ်ခုံမှ သူနှင့်သူ၏လက်ခုပ်တွင်းရှိ ပျက်စီးယိုယွင်းသောလောကစနစ်ကို ဖယ်ရှင်းပစ်ရန်အချိန်တိုင်မည်ဖြစ်သည်။ ထိုအခါ ဒံယေလ၏ပရောဖက်ပြုချက်ပြည့်စုံရလိမ့်မည်။ “ပျက်စီးခြင်းသို့မရောက်နိုင်သောနိုင်ငံတစ်ခုကို ထိုမင်းကြီးများလက်ထက်၌ ကောင်းကင်ဘုံရှင်ဘုရားသခင်သည် တည်ထောင်စေတော်မူမည်။ ထိုနိုင်ငံသည် အခြားသောလူမျိုးလက်သို့မရောက်ရဘဲ အထက်ဆိုခဲ့ပြီးသောနိုင်ငံရှိသမျှတို့ကို ချိုးဖဲ့ဖျက်ဆီး၍ အစဉ်အမြဲတည်လိမ့်မည်။”—ဒံယေလ ၂:၄၄၊ ၄၅။

ဘုရားသခင်ယင်းသို့စီရင်ခြင်းသည် မတရားဟူ၍ဆိုမည်လော။ အဘယ်နည်းဖြင့်မျှမဆိုနိုင်ပေ။ ဘုရားသခင့်စီရင်ချက်၊ ဘုရားသခင့်စံချိန်အရ ထိုက်တန်သူများအပေါ် ပျက်စီးခြင်းဘေးသည် တစ်မုဟုတ်ချင်းကျရောက်ရမည်။ ဤကိစ္စတွင် ဖန်ဆင်းရှင်သည် တရားသဖြင့်စီရင်မည်ဟု ကျွန်ုပ်တို့စိတ်ချနိုင်ကြပါသလော။ ကိုယ်တော်ကို အမှန်တကယ်စိတ်ချအားထားနိုင်သည်။ ကိုယ်တော်၏စီရင်ချက်ကြောင့် အဘယ်ရလဒ်ထွက်မည်နည်း။ ပညာရှိစကားက “ဖြောင့်မတ်သောသူတို့သည် ပြည်တော်၌နေ၍ စုံလင်သောသူတို့သည် နေရာကျကြလိမ့်မည်။ အဓမ္မလူတို့မူကား ပြည်တော်မှပယ်ရှင်းခြင်း၊ လွန်ကျူးသောသူတို့သည် နှုတ်ပစ်ခြင်းကိုခံရကြလိမ့်မည်။” (သု၊ ၂:၂၁၊ ၂၂) လူဆိုးတို့ပယ်ရှင်းခံရခြင်းကို ဝမ်းနည်းမည့်သူရှိပါမည်လော။

ငြိမ်သက်ခြင်းချိုးဖျက်သူများ မရှိတော့သည့်အခါ ဘုရားသခင်နိုင်ငံတော်အစိုးရ၏ ကရုဏာသက်ရောက်မှုအောက် လူသားအပေါင်းသည် ကမ္ဘာချီစစ်မှန်သောငြိမ်းချမ်းခြင်းနှင့်လုံခြုံမှုရရှိမည်ဖြစ်သည်။ “ငါ၏သန့်ရှင်းသောတောင်တစ်ပြင်လုံး၌ အချင်းချင်းညှဉ်းဆဲခြင်း၊ ဖျက်ဆီးခြင်းကိုမပြုရကြ။ အကြောင်းမူကား၊ ပင်လယ်ရေသည် မိမိနေရာကိုလွှမ်းမိုးသကဲ့သို့ မြေကြီးသည် ထာဝရဘုရား [ယေဟောဝါ၊ NW] ကိုသိကျွမ်းခြင်းပညာနှင့်ပြည့်စုံလိမ့်မည်။” (ဟေရှာယ ၁၁:၉) သမ္မာကျမ်းစာပါ ဤကတိတော်ကို သင်ယုံကြည်လက်ခံပါသလော။ ဤအရာများ မကြာမီဖြစ်ပျက်တော့မည်ကို သင်စိတ်ချသလော။ သံသယများရှိနေမည်ဆိုလျှင် ယင်းအကြောင်းကို ဆက်လေ့လာသုံးသပ်ရန် အားပေးပါသည်။ အမှန်မှာ ဘုရားသခင့်နည်းလမ်းအားဖြင့်သာလျှင် တောင့်တမျှော်ကိုးသည့် စစ်မှန်သောငြိမ်သက်ခြင်းနှင့်တကယ့်လုံခြုံမှုပန်းတိုင်သို့ရောက်နိုင်မည်ဖြစ်သည်။