စာရှုသူများထံမှမေးခွန်းလွှာ

အချို့ဘာသာပြန်ကျမ်းများတွင်ဖော်ပြထားသော ခြူးကောင်ဟူသောသတ္တဝါ ရှိသည်ဟု သမ္မာကျမ်းစာကထောက်ခံပါသလော။

ဂျိမ်းဘုရင်၊ ဒူးဝေးနှင့် အခြားဘာသာပြန်ကျမ်းများတွင် ခြူးကောင်များကိုဖော်ပြထားသည်။ သို့သော် ဟေဗြဲဘာသာစကားကိုပြန်ဆိုသည့် ခေတ်သစ်ဘာသာပြန်ကျမ်းများတွင် ယင်းသတ္တဝါပါရှိကြောင်းမတွေ့ရပေ။—ဆာလံ ၂၂:၂၁။ ၂၉:၆။ ၉၂:၁၀ (ဒူးဝေးတွင် ၂၁:၂၂။ ၂၈:၆။ ၉၁:၁၁)။

မြင်းကိုယ်နှင့်မြင်းခေါင်းရှိပြီး သမင်၏ခြေနှင့်ခြင်္သေ့အမြီးရှိသောသတ္တဝါမျိုးသည် နှစ်ရာစုများစွာကတည်းက ဒဏ္ဍာရီများတွင်ပေါ်ပေါက်ခဲ့သည်။ ဤစိတ်ကူးယဉ်သတ္တဝါ၏အထူးခြားဆုံးအချက်မှာ ယင်း၏နဖူးတွင် လိမ်နေသောချိုတစ်ချောင်းပေါက်နေခြင်းဖြစ်ဖွယ်ရှိသည်။a

“တစ်ချိန်ကလူများသည် ခြူးကောင်၏ဦးချိုတွင် အဆိပ်ဖြေဆေးပါရှိသည်ဟုယုံကြည်ခဲ့ကြပြီး အလယ်ခေတ်များတွင် ထိုဦးချိုဖြင့်လုပ်သည်ဟုဆိုသောအမှုန့်များကို အလွန်ဈေးနှုန်းမြင့်မားစွာဖြင့် ရောင်းချခဲ့ကြသည်။ ကျမ်းပညာရှင်အများစုက ခြူးကောင်၏ပုံပန်းသဏ္ဌာန်သည် ကြံ့များနှင့်ဆိုင်သောဥရောပပါးစပ်ရာဇဝင်မှတ်တမ်းများမှ ပေါ်ပေါက်လာခဲ့သည်ဟုယုံကြည်ကြသည်။” (The World Book Encyclopedia) အဆီးရီးယားနှင့်ဘေဘီလုံအထိမ်းအမှတ်ကျောက်တိုင်အချို့က ဦးချိုတစ်ချောင်းရှိသတ္တဝါများကို ဖော်ပြထားသည်။ ယင်းတို့သည် ယနေ့ ဆတ်၊ တောင်ဆိတ်၊ နွားမနှင့် နွားသိုးများဟုသိကြသောအကောင်များ၏ ဦးချိုနှစ်ချောင်းလုံးမပေါ်သည့်ဘေးတိုက်ပုံဖြစ်သည်။

ဟေဗြဲဘာသာအားဖြင့် ရီအဲမ် (re’emʹ) ဟုခေါ်သောအကောင်ကို ကျမ်းစာတွင် ကိုးကြိမ်ဖော်ပြထားသောကြောင့် ယင်းကိုကျမ်းစာကျောင်းသားများက စိတ်ဝင်စားကြသည်။ (တောလည်ရာ ၂၃:၂၂။ ၂၄:၈။ တရားဟောရာ ၃၃:၁၇။ ယောဘ ၃၉:၉၊ ၁၀။ ဆာလံ ၂၂:၂၁။ ၂၉:၆။ ၉၂:၁၀။ ဟေရှာယ ၃၄:၇) ဘာသာပြန်သူများက ယင်းအကောင်သည် မည်သည့်သတ္တဝါကိုဆိုလိုကြောင်း နှစ်ပေါင်းများစွာမရေမရာဖြစ်ခဲ့သည်။ ဂရိ စပ်ထွားဂျင့် ကျမ်းက ရီအဲမ် ကို ‘ချိုတစ်ချောင်းနှင့်’ သို့မဟုတ် ခြူးကောင်ဟုပြန်ဆိုသည်။ လက်တင် ဗားလ်ဂိတ် က ယင်းကို “ကြံ့” ဟုမကြာခဏပြန်ဆိုသည်။ အခြားဘာသာပြန်ကျမ်းများက ‘နွားထီးရိုင်း’၊ ‘သားရဲများ’ သို့မဟုတ် ‘ကျွဲ’ ဟုပြန်ဆိုကြသည်။ ရောဘတ်ယန်းဂ်က ဟေဗြဲမှအင်္ဂလိပ်သို့အသံဖလှယ်၍ “ရီးမ်” (Reem) ဟုပြန်ဆိုခြင်းအားဖြင့် ကျမ်းစာဖတ်သူအား ဘာမျှမသိနိုင်သည့်အခြေအနေတွင်ထားခဲ့သည်။

ခေတ်သစ်ကျမ်းပညာရှင်များက ရီအဲမ် (re’emʹ) နှင့်ပတ်သက်သောရှုပ်ထွေးမှုအတော်များများကို နိဂုံးချုပ်လိုက်သည်။ အဘိဓာန်ပြုစုသူများဖြစ်ကြသော Ludwig Koehler နှင့် Walter Baumgartner တို့က ယင်းသည် “နွားထီးရိုင်းများ” ဖြစ်ကြောင်း သိပ္ပံဆိုင်ရာအထောက်အထားဖြစ်သော Bos primigenius အဘိဓာန်စာအုပ်ဖြင့်တင်ပြကြသည်။ ယင်းသည် “ကြီးမားသောချိုနှင့်ခွာရှိသောမျိုးရင်း၏မျိုးခွဲတစ်ခု” ဖြစ်သည်။ The New Encyclopœdia Britannica. စွယ်စုံကျမ်းက ဤသို့ရှင်းပြသည်။

“ဓမ္မဟောင်းကျမ်းပါလင်္ကာဆန်သောကျမ်းပိုဒ်အချို့တို့သည် တုတ်ခိုင်၍ထင်ရှားသည့်ဦးချိုပါသော ရီအဲမ် (re’emʹ) ခေါ်သတ္တဝါတစ်မျိုးကို ရည်ညွှန်းသည်။ ယင်းစကားလုံးကို ဘာသာပြန်ကျမ်းအတော်များများက “ခြူးကောင်” သို့မဟုတ် “ကြံ့” ဟုဘာသာပြန်ကြသည်။ သို့ရာတွင် ခေတ်သစ်ဘာသာပြန်ကျမ်းများစွာတွင် ဟေဗြဲစကားလုံး ရီအဲမ် (re’emʹ) ၏တိကျမှန်ကန်သောအဓိပ္ပာယ်ဖြစ်သည့် ‘နွားထီးရိုင်း’ ဟုဖော်ပြထားကြသည်။”

ခေတ်ပေါ်အင်္ဂလိပ်စကားအရ “နွားထီး” သည် သင်းကွပ်ထားသောနွားထီးဟူသည့်အဓိပ္ပာယ်ရသဖြင့် The New World Translation of the Holy Scriptures က ရီအဲမ် (re’emʹ) ကို “နွားသိုးရိုင်း” ဟုတိကျမှန်ကန်စွာ တစ်သမတ်တည်းပြန်ဆိုထားသည်။ နွားရိုင်းများသည် ၁၇ ရာစုတွင် မျိုးတုံးသွားပုံရသော်လည်း သိပ္ပံပညာရှင်များက ယင်းတို့သည်ဒဏ္ဍာရီပုံပြင်များတွင်ပါသောခြူးကောင်နှင့် များစွာကွာခြားကြောင်း ကောက်ချက်ချကြသည်။ ရှေးနွားရိုင်းများသည် ခြောက်ပေခန့်မြင့်ပြီး ဆယ်ပေခန့်ရှည်လျားကြသည်။ ယင်းတို့သည် ပေါင် ၂,၀၀၀ ခန့်လေးပြီး ဦးချိုနှစ်ခုမှတစ်ခုစီသည် လက်မသုံးဆယ်ခန့်အထိရှည်လျားသည်။

ယင်းသည် ကျမ်းစာဖော်ပြချက်ဖြစ်သည့် ရီအဲမ် (re’em) သို့မဟုတ် နွားထီးရိုင်းနှင့် ကိုက်ညီသည်။ ယင်း၏ခွန်အားနှင့်ဂမူးရှူးထိုးနိုင်သည့်သဘော (ယောဘ ၃၉:၁၀၊ ၁၁) ကိုသာမက လျင်မြန်ဖြတ်လတ်မှုကိုလည်း မှတ်တမ်းတင်ထားသည်။ (တောလည်ရာ ၂၃:၂၂။ ၂၄:၈) ယင်းသည် ချိုနှစ်ချောင်းရှိပြီး ဒဏ္ဍာရီမှခြူးကောင်ကဲ့သို့ ချိုတစ်ချောင်းမဟုတ်သည်မှာ ထင်ရှားသည်။ မောရှေသည် ယောသပ်သားနှစ်ယောက်မှဆင်းသက်လာမည့် ခွန်အားကြီးလူမျိုးနှစ်မျိုးအကြောင်းပုံဆောင်ရှင်းပြရာတွင် ယင်း၏ဦးချိုများကိုကိုးကားခဲ့သည်။—တရားဟောရာ ၃၃:၁၇။

ထို့ကြောင့် ဒဏ္ဍာရီတွင်ထင်ရှားသော ခြူးကောင်ရှိသည်ဟုသောအယူအဆကို သမ္မာကျမ်းစာမထောက်ခံပါ။ ကြီးမားတုတ်ခိုင်ပြီး ကြောက်မက်ဖွယ်ကိုယ်ခန္ဓာရှိသောကြံ့ သို့မဟုတ် ကျမ်းစာခေတ်မှသည် မကြာသေးမီအချိန်ကအထိရှိနေခဲ့သောနွားရိုင်းကို ကျမ်းစာက တိကျစွာပုံဖော်ပြနေခြင်းဖြစ်သည်။

[အောက်ခြေမှတ်ချက်များ]

[Picture Credit Line on page 31]

စိတ်ကူးယဉ်နှင့်ဒဏ္ဍာရီဆိုင်ရာသတ္တဝါများစုဆောင်းထားရာပြတိုက်၊ ၁,၀၈၇

သမိုင်းအခြေအမြစ်မှဖော်ပြချက်များ ရစ်ချက်ဟူးဗား/ဒိုဗာထုတ်စာစောင်များ