“နာမအောက်သို့” ဗတ္တိဇံယူခြင်း

ဤရာစုနှစ်အစပိုင်းတွင် အီဂျစ်နိုင်ငံ သဲသောင်ပြင်မှ တွေ့ရှိခဲ့ရသော ထောင်နှင့်ချီသည့် ရှေးဟောင်းလောကကျူစာ စာချုပ်စာတမ်းများကို လေ့လာကြည့်ရာတွင် ခရစ်ယာန်ဂရိကျမ်းစောင်များကို စိတ်ဝင်စားဖွယ်ဖြစ်စေသည်။ မည်သို့အားဖြင့်နည်း။ စကားလုံးအချို့ကိုအသုံးပြုထားပုံမှ ထပ်တူစကားလုံးများကို ကျမ်းစာတွင်ထည့်အသုံးပြုထားရာ ယင်း၏အဓိပ္ပာယ်အတိအကျကို သဘောပေါက်နားလည်လာစေသည်။

ဥပမာတစ်ခုကား၊ ကောင်းကင်သို့မတက်ကြွမီ တပည့်တော်များအား မိန့်မှာချက်တွင် ယေရှုအသုံးပြုခဲ့သော “နာမ၌” စကားလုံးဖြစ်သည်။ “သင်တို့သွား၍ လူမျိုးတကာတို့ကို ငါ့တပည့်ဖြစ်စေလျက်၊ ခမည်းတော်၊ သားတော်၊ သန့်ရှင်းသောဝိညာဉ်တော်၏နာမ၌ ဗတ္တိဇံကိုပေးကြလော့။”—မဿဲ ၂၈:၁၉။

လောကစာပေများတွင် “နာမ၌” သို့မဟုတ် “နာမအောက်သို့” (Kingdom Interlinear) ကို “တစ်ဦးတစ်ယောက်၏စာရင်းထဲသို့” ထည့်သွင်းခြင်းနှင့်ပတ်သက်၍ အသုံးပြုတတ်ကြောင်း ပညာရှင်များ တွေ့ရှိခဲ့ကြပြီ။ ကျမ်းစာပညာရှင်ပါမောက္ခ ဒေါက်တာ ဂျီ၊ အဒေါ့လ်ဖ် ဒေ့စ်မန်က ပေစာများမှရရှိသည့်အထောက်အထားအရဆိုလျှင် “သခင်၏နာမ၌ဗတ္တိဇံပေးရန် သို့မဟုတ် သားတော်၏နာမ၌ယုံကြည်ခြင်း ဟူသည့် စကားအသုံးအနှုန်းနောက်ဝယ်တွင် ဗတ္တိဇံ သို့မဟုတ် ယုံကြည်ခြင်း၌ ဘုရားသခင် သို့မဟုတ် ဘုရားသခင့်သားတော်၏ ပိုင်ဆိုင်ရာဖြစ်ခြင်းသဘော ပါဝင်သည်” ဟုခံယူခဲ့ပါသည်။—ဒေ့စ်မန်၏ စာလုံးစောင်းများ။

စိတ်ဝင်စားစရာကား Theological Dictionary of the New Testament ရှင်းပြသည့်အတိုင်း ယေရှုနှင့်တစ်ခေတ်တည်းသားဂျူးများသည် ထပ်တူစကားအသုံးအနှုန်းကို ဤသို့အသုံးပြုပါသည်။ “ယုဒဘာသာသွင်းရန် ဘာသာဝင်လာသူတစ်ဦး၏ အရေဖျားလှီးခြင်းကို . . . ‘ဘာသာဝင်လာသူ၏နာမ၌’ ပြုလုပ်ကြပါသည်။ ပဋိညာဉ်အဝင်ဖြစ်စေရန် ဤအရေဖျားလှီးခြင်းအမှုကို . . . ‘ပဋိညာဉ်၏နာမ၌’ ပြုလုပ်ကြပါသည်။” ဤနည်းဖြင့် ဆက်စပ်မှုရှိလာပြီး ပဋိညာဉ်၏အခွင့်အာဏာအားဖြင့် ဂျူးမဟုတ်သူသည် ဘာသာဝင်လာသူဖြစ်လာပါသည်။

ထိုကြောင့်ခရစ်ယာန်တစ်ဦးသည် ဆက်ကပ်အပ်နှံပြီးနောက် နှစ်ခြင်းယူခြင်းအားဖြင့် ယေဟောဝါဘုရားသခင်၊ သားတော်ယေရှုခရစ်၊ သန့်ရှင်းသောဝိညာဉ်တော်တို့နှင့် ရင်းနှီးသောဆက်ဆံမှုရှိလာစေသည်။ ဘာသာပြောင်းဝင်လာသူသည် မိမိ၏အသက်တာဘဝအသစ်တွင် ယင်းတို့အသီးသီး၏ ကဏ္ဍဆိုင်ရာအခွင့်အာဏာကို အသိအမှတ်ပြုကြပါသည်။ ဖော်ပြပါသုံးမျိုးသုံးစားနှင့်စပ်လျဉ်း၍ မည်သို့ကိုက်ညီနေသည်ကို သတိပြုပါ။

ဘုရားသခင့်အခွင့်အာဏာကို အသိအမှတ်ပြုခြင်းအားဖြင့် ကိုယ်တော်ထံ ချဉ်းကပ်နိုင်ပြီး ကိုယ်တော်နှင့်ရင်းနှီးသောဆက်ဆံမှု ရှိလာလေသည်။ (ဟေဗြဲ ၁၂:၉။ ယာကုပ် ၄:၇၊ ၈) ကျွန်ုပ်တို့သည် ယေရှုခရစ်၏ရွေးဖိုးပူဇော်သက္ကာဖြင့် ဝယ်ယူခံရသောကျွန်များအနေနှင့် ဘုရာသခင့်ပိုင်ဆိုင်ရာ ဖြစ်လာကြသည်။ (၁ ကောရိန္သု ၃:၂၃။ ၆:၂၀) ပထမရာစုခရစ်ယာန်များသည် သူတို့ထံ သမ္မာတရားယူဆောင်လာကောင်း ယူဆောင်လာမည့်သူများပိုင်ဆိုင်ရာမဟုတ်ဘဲ ယေရှုခရစ်၏ပိုင်ဆိုင်ရာဖြစ်ကြောင်း တမန်တော်ပေါလုလည်း ပြောခဲ့ပါသည်။ (၁ ကောရိန္သု ၁:၁၂၊ ၁၃။ ၇:၂၃။ မဿဲ ၁၆:၂၄ နှိုင်းယှဉ်။) သားတော်၏နာမ၌ဗတ္တိဇံယူခြင်းသည် ယင်းဖြစ်ရပ်မှန်ကို အသိအမှတ်ပြုရာကျသည်။ ဤသို့အားဖြင့် ယေရှုကို ‘လမ်းခရီး၊ သမ္မာတရား၊ အသက်’ အဖြစ်လက်ခံကြောင်းတင်ပြသည်။—ယောဟန် ၁၄:၆။

ယေဟောဝါနှင့်လည်းကောင်း၊ ယေရှုခရစ်နှင့်လည်းကောင်း တော်မှန်သောဆက်ဆံရေးရှိဖို့အတွက် သန့်ရှင်းသောဝိညာဉ်တော်လည်း အရေးကြီးပါသည်။ သန့်ရှင်းသောဝိညာဉ်တော်၏နာမ၌ ဗတ္တိဇံယူခြင်းအားဖြင့် ကျွန်ုပ်တို့နှင့် ဘုရားသခင့်ဆက်ဆံရာတွင် ဝိညာဉ်တော်၏ကဏ္ဍကို ကျွန်ုပ်တို့အသိအမှတ်ပြုကြောင်း တင်ပြကြပါသည်။ ယင်း၏လမ်းပြမှုကိုလိုက်နာရန် ကျွန်ုပ်တို့ရည်ရွယ်ထားကြောင်း၊ ယင်းကို ဥပေက္ခာမပြု၊ ဆန့်ကျင်မည်မဟုတ်၊ ကျွန်ုပ်တို့အားဖြင့် ယင်း၏လုပ်ဆောင်မှုကို တားဆီးမည်မဟုတ်ကြောင်း တင်ပြကြသည်။ (ဧဖက် ၄:၃၀။ ၁ သက်သာလောနိတ် ၅:၁၉) ယုဒဘာသာအရ ‘ပဋိညာဉ်၏နာမ၌’ ဟူသောစကားအသုံးအနှုန်းကို အသုံးပြုခြင်းအားဖြင့် အခက်အခဲမပေါ်၊ မရှိခဲ့သကဲ့သို့ပင် ဝိညာဉ်တော်၏ပုဂ္ဂိုလ်မဟုတ်သော အနေအထားကြောင့် ယင်းစကားအသုံးအနှုန်းသည် အဘယ်အခက်အခဲမျှမရှိ။ အဓိပ္ပာယ်လည်း မလွဲစေပါ။

ထိုကြောင့်ဆက်ကပ်အပ်နှံနှစ်ခြင်းယူချိန်တွင် ကျွန်ုပ်တို့၏ဆက်ဆံမှုအသစ်တွင် ပါဝင်သည့်အရာများအကြောင်းကို ဆုတောင်းခြင်းအားဖြင့် ဆင်ခြင်သုံးသပ်နေသင့်ပါသည်။ ထိုသို့ပြုရန် ဘုရားသခင့်အလိုတော်ကို လက်အောက်ခံနာယူရန်လိုသည်။ ယင်းကို ယေရှုခရစ်၏ပုံသက်သေနှင့် ရွေးဖိုးအစီအစဉ်က ထင်ရှားစေသည်။ ဘုရားသခင့်ကမ္ဘာတစ်ဝန်းရှိ ကျေးကျွန်များသည် ချစ်ခြင်းမေတ္တာအပြည့်နှင့် စည်းလုံးညီညွတ်စွာဖြင့် အလိုတော်ကိုဆောင်ရွက်ရန် သန့်ရှင်းသောဝိညာဉ်တော်ညွှန်ကြားသည့်အတိုင်း ပြုလုပ်သွားကြပါမည်။