ဘုရားရေးရာလက်အောက်ခံခြင်း —အဘယ်ကြောင့်နှင့် အဘယ်သူအားဖြင့်နည်း

“အိုထာဝရဘုရား [ယေဟောဝါ၊ ကဘ] လူသည် မိမိသွားရာလမ်းကို အစိုးမရ။ သွားစဉ်အခါ မိမိခြေရာတို့ကို မစီရင်တတ်သည်ကို အကျွန်ုပ်သိပါ၏။”—ယေရမိ ၁၀:၂၃။

၁။ အဘယ်လွတ်လပ်ရေးပုံစံများကို အနှံ့အပြား တန်ဖိုးထားကြပြီနည်း။

လူ့စာချုပ်များတွင် နာမည်အကျော်ကြားဆုံးတစ်ခုကား ၁၈ ရာစုနှစ်က မိခင်နိုင်ငံ ဗြိတိန်လက်အောက်မှ လွတ်လပ်ရေးရကြောင်း မြောက်အမေရိကရှိ ဗြိတိသျှကိုလိုနီ ၁၃ နိုင်ငံရေးဆွဲသော လွတ်လပ်ရေး ကြေညာစာတမ်းဖြစ်သည်။ သူတို့ လွတ်လပ်လိုကြသည်။ တိုင်းတစ်ပါးချုပ်ကိုင်မှုမှလွတ်မြောက်ခြင်းနှင့် လွတ်လပ်မှုသည် ယှဉ်တွဲနေပါသည်။ နိုင်ငံရေးနှင့် စီးပွားရေးအမှီအခိုကင်းခြင်းသည် များစွာအကျိုးရှိနိုင်သည်။ များမကြာမီအချိန်က အရှေ့ဥရောပနိုင်ငံအချို့သည် နိုင်ငံရေးရာလွတ်လပ်ခြင်းသို့ ဦးတည်ခဲ့ကြပေပြီ။ သို့ရာတွင် ဤသို့သောလွတ်လပ်ရေးကြောင့် ပြဿနာပေါင်းစုံဖြစ်ပေါ်လာကြောင်း ဝန်ခံကြရမည်။

၂၊ ၃။ (က) အဘယ်မည်သော လွတ်လပ်ရေးပုံစံသည် နှစ်မြို့စရာမဖြစ်သနည်း။ (ခ) ထိုဖြစ်ရပ်မှန်ကို ကနဦးက မည်သို့အတိအလင်းဖော်ပြသနည်း။

^၂ လွတ်လပ်ရေးပုံစံအမျိုးမျိုးသည် နှစ်သက်ဖွယ်ရာဖြစ်ကောင်းဖြစ်သော်လည်း လွတ်လပ်ခြင်းတစ်မျိုးမူကား နှစ်မြို့စရာမဖြစ်ပါ။ ယင်းကား အဘယ်နည်း။ လူ့ဖန်ဆင်းရှင် ယေဟောဝါဘုရားသခင်ကို အမှီအခိုကင်းခြင်းဖြစ်သည်။ ယင်းသည် ကောင်းချီးမဟုတ်ဘဲ ကျိန်ဆဲရာပင်ဖြစ်သည်။ အဘယ်ကြောင့်နည်း။ အကြောင်းမူကား၊ အထက်တွင်ကိုးကားထားသည့် ပရောဖက်ယေရမိ၏စကားများ လျောက်ပတ်စွာတင်ပြသည့်အတိုင်းပင် လူသည် ဖန်ဆင်းရှင်ကိုအမှီအခိုကင်းရှင်းစွာနေရန် တစ်ခါမျှမရည်ရွယ်ခဲ့ပါ။ တစ်နည်းအားဖြင့်ဆိုလျှင် လူသည် မိမိဖန်ဆင်းရှင်လက်အောက် နေဖို့အတွက်ဖြစ်သည်။ ဖန်ဆင်းရှင်လက်အောက်နေခြင်း၏အဓိပ္ပာယ်ကား ကိုယ်တော်၏စကားကိုနာခံနေရန်ဖြစ်ပါသည်။

^၃ ထိုဖြစ်ရပ်မှန်ကို ကမ္ဘာဦး ၂:၁၆၊ ၁၇ တွင်မှတ်တမ်းတင်ထားသည့် ပထမမောင်နှံစုံအား ယေဟောဝါ၏မိန့်မှာချက်တွင် အတိအလင်းဖော်ပြထားပါသည်။ “ကောင်းမကောင်းကိုသိကျွမ်းရာအပင်မှတစ်ပါး ထိုဥယျာဉ်၌ရှိသမျှသောအပင်တို့၏အသီးကို သင်သည်စားရသောအခွင့်ရှိ၏။ ထိုအပင်၏အသီးကိုကား မစားရ။ စားသောနေ့တွင် ဧကန်အမှန်သေရမည်။” ဖန်ဆင်းရှင်လက်အောက်တွင်နေခြင်းကို ငြင်းဆိုခဲ့ခြင်းအားဖြင့် အာဒံနှင့် သူ၏သားစဉ်မြေးဆက်တို့အပေါ် အပြစ်တရား၊ ဒုက္ခဆင်းရဲနှင့် သေခြင်းတရား ကျရောက်ခဲ့သည်။—ကမ္ဘာဦး ၃:၁၉။ ရောမ ၅:၁၂။

၄၊ ၅။ (က) ဘုရားသခင်အား လူသားတို့လက်အောက်ခံခြင်းကို ငြင်းဆန်ခြင်းရလဒ်ကား အဘယ်နည်း။ (ခ) အဘယ်စာရိတ္တဆိုင်ရာပညတ်ချက်ကို လုံးဝမလွန်ဆန်နိုင်သနည်း။

^၄ လူသားတို့ဘုရားရှင်လက်အောက်၌နေခြင်းကို ငြင်းဆန်ခြင်းသည် ပညာမဲ့ရုံမက သီလရေးအရ မှားယွင်းပါသည်။ ယင်းကြောင့် ဤလောကတစ်ခွင် မတရားမှု၊ ရာဇဝတ်မှု၊ အဓမ္မမှု၊ စာရိတ္တယိုယွင်းမှုနှင့်တကွ ယင်း၏အသီးဖြစ်သည့် လိင်ဆိုင်ရာကူးစက်ရောဂါများ ပျံ့နှံ့နေပါသည်။ ထို့ပြင် ယနေ့ လူငယ့်ရာဇဝတ်မှုကပ်ဘေးသည် ယေဟောဝါကို လက်အောက်မခံခြင်း၊ မိဘများနှင့် တိုင်းနိုင်ငံ၏ဥပဒေများကို မနာခံခြင်းကြောင့် ဖြစ်ရသည်မဟုတ်လော။ လူအများဆင်ယင်သည့် ကိုးရိုးကားရား၊ ဖြစ်ကတတ်ဆန်းဝတ်စားပုံအပြင် သူတို့အသုံးပြုသည့် ညစ်ညမ်းသောစကားတို့က ဤလွတ်လပ်လိုစိတ်ထားကို ထင်ရှားစေပါသည်။

^၅ သို့သော် ဖန်ဆင်းရှင်၏ အလျှော့အတင်းမရှိ စာရိတ္တဆိုင်ရာပညတ်ချက်ကို လုံးဝမလွန်ဆန်နိုင်ပါ။ “အလွဲမယူကြနှင့်။ ဘုရားသခင်သည် မထီမဲ့မြင်ပြုခြင်းကို ခံတော်မမူ။ လူသည် မျိုးစေ့ကြဲသည်အတိုင်း အသီးအနှံကိုရိတ်ရလိမ့်မည်။ မိမိဇာတိပကတိ၌ မျိုးစေ့ကြဲသောသူသည် ဇာတိပကတိအားဖြင့် ပုပ်ပျက်ခြင်းအသီးအနှံကို ရိတ်ရလိမ့်မည်။”—ဂလာတိ ၆:၇၊ ၈။

၆၊ ၇။ လက်အောက်ခံရန် ငြင်းဆန်ခြင်း၏ အကြောင်းရင်းကား အဘယ်အရာဖြစ်ကြောင်းကို အဘယ်ပုံဥပမာများက ထင်ရှားစေသနည်း။

^၆ လက်အောက်ခံရန် ငြင်းဆန်ခြင်းဟူသရွေ့၏ အကြောင်းရင်းကား အဘယ်နည်း။ ရိုးရိုးတင်ပြရလျှင် အတ္တဆန်ခြင်းနှင့် မာန်မာနစိတ်သာဖြစ်သည်။ ယင်းကြောင့်သာ ပထမအမျိုးသမီးဖြစ်သူ ဧဝသည် မြွေ၏လှည့်ဖြားမှုကိုခံပြီး တားမြစ်ထားသောအသီးကို ယူစားခဲ့ခြင်းဖြစ်သည်။ ကျိုးနွံစိတ်၊ နှိမ့်ချသောသဘောရှိမည်ဆိုလျှင် ဘုရားသခင်ကဲ့သို့ အကောင်းအဆိုးဆုံးဖြတ်ခြင်းအခွင့်ကို သူမရရှိရန် သွေးဆောင်ခံရခြင်းသည် သူ့အတွက် နှစ်မြို့စရာဖြစ်လိမ့်မည်မဟုတ်ပါ။ သူမသာ အတ္တသဘောမရှိပါက ဖန်ဆင်းရှင်ယေဟောဝါဘုရားသခင် အတိအလင်းတားမြစ်ထားသည့်အရာကို လိုချင်တမ်းတမိမည်မဟုတ်ပါ။—ကမ္ဘာဦး ၂:၁၆၊ ၁၇။

^၇ အာဒံနှင့်ဧဝတို့အပြစ်လုပ်ပြီး နောက်များမကြာမီပင် မာန်မာနစိတ်နှင့် အတ္တဆန်သောသဘောတို့က ကာဣနအား ညီဖြစ်သူ အာဗေလကို သတ်ပစ်စေခဲ့ပါသည်။ ထို့ပြင် အတ္တသဘောသည် ကောင်းကင်တမန်အချို့အား လွတ်လပ်စွာကျင့်စေ၍ ကာမဂုဏ်သာယာမှုများခံစားကြခြင်းငှာ သူတို့၏နေရင်းအရပ်ကိုစွန့်ပစ်ကာ ကိုယ်ယောင်ဆောင်စေခဲ့ကြသည်။ မာန်မာနစိတ်နှင့် အတ္တဆန်သောသဘောတို့၏လှုံ့ဆော်မှုကို နိမ်ရောဒခံခဲ့ရသည်။ သူ၏ခေတ်ကတည်းကလည်း လောကကိုအစိုးရသူအများ၌ ယင်းသဘောထားများထင်ရှားပါသည်။—ကမ္ဘာဦး ၃:၆၊ ၇။ ၄:၆-၈။ ၁ ယောဟန် ၃:၁၂။ ယုဒ ၆။

ယေဟောဝါဘုရားသခင်ထံ အဘယ်ကြောင့် လက်အောက်ခံထိုက်

၈-၁၁။ ဘုရားရေးရာလက်အောက်ခံခြင်းအတွက် တာသွားသောအကြောင်းလေးခုကား အဘယ်နည်း။

^၈ ဖန်ဆင်းရှင် ယေဟောဝါဘုရားသခင်ထံ အဘယ်ကြောင့်လက်အောက်ခံထိုက်သနည်း။ ဦးဆုံးအနေနှင့် ကိုယ်တော်သည် စကြဝဠာပိုင်သအုပ်စိုးခွင့်ရှိသူဖြစ်သောကြောင့်တည်း။ အခွင့်အာဏာရှိရှိသမျှကို ကိုယ်တော်ပိုင်သထိုက်တော်မူ၏။ ကိုယ်တော်သည် ကျွန်ုပ်တို့၏တရားသူကြီး၊ ပညတ်ပေးပိုင်ရှင်နှင့် ဘုရင်ဖြစ်တော်မူသည်။ (ဟေရှာယ ၃၃:၂၂) ကိုယ်တော်အကြောင်း ဤသို့လျောက်ပတ်စွာ ရေးသားဖော်ကျူးခဲ့ပြီ။ “ငါတို့ကိုစစ်ကြောစီရင်တော်မူသောသူရှေ့၌ မထင်ရှားသောအရာတစ်စုံတစ်ခုမျှမရှိ။”—ဟေဗြဲ ၄:၁၃။

^၉ ထို့ပြင် ဖန်ဆင်းရှင်သည် အနန္တတန်ခိုးရှင်ဖြစ်တော်မူသောကြောင့် မည်သူမျှ ကိုယ်တော်အား ဆန့်ကျင်ဘက်ပြု၍ အောင်မြင်လိမ့်မည်မဟုတ်ပါ။ ကိုယ်တော့်လက်အောက်ခံဖြစ်ရမည့်တာဝန်ကို မည်သူမျှ လျစ်လျူရှုမထားနိုင်ပါ။ ရှေးခေတ်က ဖာရောဘုရင်ကဲ့သို့သော်လည်းကောင်း၊ ဘုရားသခင့်အခန့်သင့်အချိန်ရောက်လျှင် စာတန်မာရ်နတ်ကဲ့သို့သော်လည်းကောင်း ငြင်းဆန်သူများသည် ဝမ်းနည်းကြေကွဲခြင်းကို အနှေးနှင့်အမြန် ကြုံတွေ့ရလိမ့်မည်။ —ဆာလံ ၁၃၆:၁၊ ၁၁-၁၅။ ဗျာဒိတ် ၁၁:၁၇။ ၂၀:၁၀၊ ၁၄။

^၁၀ အသိဉာဏ်ရှိသတ္တဝါအပေါင်းသည် ဖန်ဆင်းရှင်၏အမှုတော်ကိုထမ်းရွက်ခြင်းငှာ အသက်ရှင်နေကြသည့်အတွက် လက်အောက်ခံနေရန်တာဝန်ရှိကြပါသည်။ ဗျာဒိတ် ၄:၁၁ ကဤသို့ဆိုသည်။ “အိုထာဝရဘုရား [ယေဟောဝါ၊ ကဘ] ကိုယ်တော်သည် ခပ်သိမ်းသောအရာတို့ကို ဖန်ဆင်းတော်မူပြီ။ ထိုအရာတို့သည် အလိုတော်ကြောင့်ဖြစ်၍ ဖန်ဆင်းလျက်ရှိကြပါ၏။ ထိုကြောင့် ကိုယ်တော်သည် ဘုန်းအသရေတန်ခိုးတော်ကို ခံစားထိုက်တော်မူ၏။” ကိုယ်တော်သည် ကြီးမြတ်တော်မူသော အိုးထိန်းသမားဖြစ်သည်။ ကိုယ်တော့်ရည်ရွယ်ချက်ကိုဖြည့်စွက်ပေးရန် လူသားအိုးတို့ကို ပြုလုပ်ထားတော်မူသည်။—ဟေရှာယ ၂၉:၁၆။ ၆၄:၈။

^၁၁ ဖန်ဆင်းရှင်သည် ဉာဏ်ပညာအလုံးစုံရှိတော်မူကြောင်းကို မမေ့သင့်ပါ။ ယင်းကြောင့် ကျွန်ုပ်တို့အတွက် အဘယ်အရာသည် အကောင်းဆုံးဖြစ်တော်မူကြောင်းကို ကိုယ်တော်သိကျွမ်းတော်မူသည်။ (ရောမ ၁၁:၃၃) ကိုယ်တော်၏ပညတ်ချက်များသည် ‘ကျွန်ုပ်တို့ကောင်းကျိုးအတွက်’ ဖြစ်တော်မူသည်။ (တရားဟောရာ ၁၀:၁၂၊ ၁၃) ထိုထက်မက “ဘုရားသခင်သည် ချစ်ခြင်းမေတ္တာဖြစ်တော်မူ၏။” ယင်းကြောင့် အကျိုးအရှိဆုံးအရာကိုသာ ကျွန်ုပ်တို့အား ကိုယ်တော်ဖြစ်စေလိုတော်မူသည်။ ဖန်ဆင်းရှင် ယေဟောဝါဘုရားသခင်ကို မဖြစ်မနေ လက်အောက်ခံရန် အကြောင်းကောင်း များလှပါသည်တကား။—၁ ယောဟန် ၄:၈။

ဘုရားရေးရာလက်အောက်ခံခြင်း၏ စုံလင်သောပုံသက်သေ၊ ယေရှုခရစ်

၁၂၊ ၁၃။ (က) ဘုရားရေးရာလက်အောက်ခံခြင်းကို ယေရှုခရစ် မည်သို့တင်ပြတော်မူသနည်း။ (ခ) ယေရှုမိန့်တော်မူသည့် အဘယ်စကားများက ကိုယ်တော်၏လက်အောက်ခံစိတ်ထားကို ပေါ်လွင်စေသနည်း။

^၁၂ ယေဟောဝါ၏တစ်ပါးတည်းသောသားတော်၊ ယေရှုခရစ်သည် ဘုရားရေးရာလက်အောက်ခံခြင်း၏ စုံလင်သောပုံသက်သေတင်ပြခဲ့သည်ကား ယုံမှားစရာလုံးဝမရှိချေ။ ယင်းကို ဖိလိပ္ပိ ၂:၆-၈ တွင် တမန်တော်ပေါလုဖော်ပြခဲ့သည်။ “ထိုသခင် [ယေရှု] သည် ဘုရားသခင်၏သဏ္ဌာန်တော်နှင့် ပြည့်စုံတော်မူသည်ဖြစ်၍ ဘုရားသခင်နှင့်ပြိုင်သောအမှုကို လုယူခြင်းအမှုဟူ၍ မထင်မမှတ်လျက်ပင် မိမိအသေရေကိုစွန့်၍ အစေခံကျွန်၏သဏ္ဌာန်ကိုယူဆောင်လျက် လူကဲ့သို့သောအဖြစ်၌ ဖွားမြင်ခြင်းကိုခံတော်မူ၏။ ထိုသို့လူ၏ဂုဏ်အင်္ဂါလက္ခဏာနှင့်ပြည့်စုံလျက် အသေခံခြင်းသာမဟုတ်၊ လက်ဝါးကပ်တိုင်မှာ အသေခံခြင်းတိုင်အောင် အစေကျွန်ခံ၍ ကိုယ်ကိုယ်ကိုနှိမ့်ချတော်မူ၏။” ကမ္ဘာပေါ်ရှိစဉ် မိမိအလိုအလျောက် အဘယ်အမှုကိုမျှပြုတော်မမူကြောင်း ယေရှုသည် ကြိမ်ဖန်များစွာ မိန့်တော်မူခဲ့သည်။ ကိုယ်တော်သည် လွတ်လပ်စွာပြုမူခြင်းမရှိ၊ ကောင်းကင်ခမည်းတော်ထံ အမြဲလက်အောက်ခံတော်မူခဲ့သည်။

^၁၃ ယောဟန် ၅:၁၉၊ ၃၀ တွင် ဤသို့ဖတ်ရှုရသည်။ “ယေရှုကလည်း၊ သင်တို့အား ငါအမှန်အကန်ဆိုသည်ကား၊ ခမည်းတော်ပြုတော်မူသောအမှုကို သားတော်သည် မြင်၍သာပြု၏။ မိမိအလိုအလျောက် အဘယ်အမှုကိုမျှမပြုနိုင်။ ခမည်းတော်ပြုတော်မူသမျှအတိုင်း သားတော်လည်းပြု၏။ ငါသည် ကိုယ်အလိုအလျောက် အဘယ်အမှုကိုမျှမပြုနိုင်။ ငါသည် ကြားသည်အတိုင်း တရားစီရင်၏။ ငါစီရင်ခြင်းသည်လည်း တရားတော်နှင့်ညီညွတ်၏။ အကြောင်းမူကား၊ ငါသည် ကိုယ်အလိုသို့မလိုက်၊ ငါ့ကိုစေလွှတ်တော်မူသော ခမည်းတော်၏အလိုသို့လိုက်၏။” ထိုနည်းတူစွာ ကိုယ်တော်သစ္စာဖောက်ခံရသည့်ညတွင် “အကျွန်ုပ်အလိုရှိသည်အတိုင်း မဖြစ်ပါစေနှင့်။ ကိုယ်တော်အလိုရှိသည်အတိုင်း ဖြစ်ပါစေသော” ဟုကြိမ်ဖန်များစွာ ဆုတောင်းတော်မူခဲ့သည်။—မဿဲ ၂၆:၃၉၊ ၄၂၊ ၄၄။ ယောဟန် ၇:၂၈။ ၈:၂၈၊ ၄၂ ကိုလည်းရှု။

ဘုရားရေးရာလက်အောက်ခံခြင်း၏ ရှေးပုံသက်သေများ

၁၄။ ဘုရားရေးရာလက်အောက်ခံခြင်းကို နောဧ အဘယ်နည်းများဖြင့် တင်ပြခဲ့သနည်း။

^၁၄ အစောပိုင်းလူသားတို့အနက် ဘုရားရေးရာလက်အောက်ခံခြင်း ပုံသက်သေတင်ပြခဲ့သူများတွင် နောဧအပါအဝင်ဖြစ်သည်။ လက်အောက်ခံခြင်းကို သုံးနည်းသုံးပုံဖြင့် သူဖော်ပြခဲ့သည်။ ဦးဆုံး၊ ဖြောင့်မတ်သောသူ၊ တစ်ခေတ်တည်းသားတို့တွင် အပြစ်ဆိုဖွယ်မရှိ၊ စစ်မှန်သောဘုရားသခင်နှင့်အတူ သွားလာခြင်းအားဖြင့်ဖြစ်သည်။ (ကမ္ဘာဦး ၆:၉) ဒုတိယအနေနှင့်၊ သင်္ဘောဆောက်ခြင်းအားဖြင့်ဖြစ်သည်။ ဘုရားသခင် “မှာထားတော်မူသည်အတိုင်းလည်း နောဧပြုလေ၏။” (ကမ္ဘာဦး ၆:၂၂) တတိယအနေနှင့်ကား၊ “ဖြောင့်မတ်ခြင်းတရားဟောပြောသူ” အဖြစ် လာလတ္တံ့သောရေလွှမ်းမိုးဘေးအကြောင်း သူသတိပေးနှိုးဆော်ခြင်းအားဖြင့်ဖြစ်သည်။—၂ ပေတရု ၂:၅။

၁၅၊ ၁၆။ (က) ဘုရားရေးရာလက်အောက်ခံခြင်း ပုံသက်သေကောင်းကို အာဗြဟံ မည်သို့တင်ပြခဲ့သနည်း။ (ခ) စာရာသည် လက်အောက်ခံမှုကို မည်သို့ပြသခဲ့သနည်း။

^၁၅ ဘုရားရေးရာလက်အောက်ခံခြင်း၏ ထူးခြားသောပုံသက်သေတင်ပြသူ အခြားတစ်ဦးမှာ အာဗြဟံဖြစ်သည်။ “သင်၏ပြည် . . . ကထွက်” သွားပါဟူသော ဘုရားသခင့်အမိန့်တော်ကိုနာခံခြင်းအားဖြင့် လက်အောက်ခံကြောင်း တင်ပြခဲ့သည်။ (ကမ္ဘာဦး ၁၂:၁) ယင်းသို့ပြုခြင်းငှာ (ရှေးဟောင်းပစ္စည်းများ တူးဖော်ရရှိခဲ့သည့်သက်သေအရ အရေးပါပုံရသည့်) ဥရမြို့ရှိ အဆင်ပြေသောအခြေအနေကိုစွန့်၍ တိုင်းတစ်ပါးတွင် နှစ်ပေါင်းတစ်ရာလုံးလုံး အိုးအိမ်အတည်တကျမရှိသူကဲ့သို့ လည်ပတ်သွားလာနေရပါသည်။ သားဖြစ်သူ ဣဇာက်ကိုပူဇော်ရန် စမ်းသပ်ခံရသည့်အခါ အဆင်သင့်ရှိခြင်းအားဖြင့် ဘုရားရေးရာလက်အောက်ခံခြင်းသဘောကို အာဗြဟံ ထူးခြားစွာတင်ပြခဲ့ပါသည်။—ကမ္ဘာဦး ၂၂:၁-၁၂။

^၁၆ အာဗြဟံ၏ဇနီး၊ စာရာသည်လည်း ဘုရားရေးရာလက်အောက်ခံခြင်း ပုံသက်သေကောင်း တင်ပြသူတစ်ဦးဖြစ်ပါသည်။ သူစိမ်းနယ်မြေတွင် လည်ပတ်သွားလာနေစဉ် အဆင်မပြေမှုအမျိုးမျိုးကို ကြုံကြိုက်ခဲ့ရမည်အမှန်။ သို့သော် သူမ ညည်းညူခဲ့သည့်အကြောင်းကို လုံးဝမဖတ်ရှုရချေ။ တိတ္ထိရှင်ဘုရင်များထံ သူမကို နှမအဖြစ် အာဗြဟံဆက်သခဲ့သည့် အကြိမ်နှစ်ကြိမ်တွင် သူမသည် ဘုရားရေးရာလက်အောက်ခံခြင်း ပုံသက်သေကောင်း တင်ပြခဲ့ပါသည်။ ယင်းကြောင့် သူတို့၏မိန်းမဆောင်အတွက် သိမ်းပိုက်ခံလုဆဲဆဲဖြစ်ရသည့်တိုင် နှစ်ကြိမ်စလုံး လင်ယောက်ျားအလိုကို သူမလိုက်ခဲ့ပါသည်။ လင်ယောက်ျားဖြစ်သူအာဗြဟံအား မိမိစိတ်ထဲတွင် “သခင်” ဟုခေါ်တတ်သည့်အကျင့်ကား သူမ၏ဘုရားရေးရာလက်အောက်ခံခြင်းကို သက်သေထူပါသည်။ ယင်းက သူမ၏စိတ်ရင်းသဘောမှန်ကို ထင်ရှားစေသည်။—ကမ္ဘာဦး ၁၂:၁၁-၂၀။ ၁၈:၁၂။ ၂၀:၂-၁၈။ ၁ ပေတရု ၃:၆။

၁၇။ ဣဇာက်သည် ဘုရားရေးရာလက်အောက်ခံခြင်းကို တင်ပြခဲ့သည်ဟု အဘယ်ကြောင့်ဆိုနိုင်သနည်း။

^၁၇ အာဗြဟံ၏သား၊ ဣဇာက်တင်ပြခဲ့သည့် ဘုရားရေးရာလက်အောက်ခံခြင်း ပုံသက်သေကိုလည်း လျစ်လျူရှုမထားကြစို့နှင့်။ ဖခင်ဖြစ်သူအာဗြဟံအား သားကိုယဇ်ပူဇော်ရန် ယေဟောဝါမိန့်မှာတော်မူသည့်အခါ ဣဇာက်သည် ၂၅ နှစ်အရွယ်ခန့်ရှိနေကြောင်း ဂျူးထုံးတမ်းစဉ်လာအရ သိရှိရသည်။ မိမိထက်အသက်တစ်ရာကြီးသူ၊ ဖခင်အား ဣဇာက်ငြင်းဆန်လိုမည်ဆိုလျှင် လွယ်ကူစွာခုခံနိုင်ပါမည်။ သို့သော် ထိုသို့မပြုပါ။ ယဇ်ပူဇော်ရန် တိရစ္ဆာန်မရှိခြင်းကို ဣဇာက်တွေးတောမိသော်လည်း ယဇ်ပလ္လင်ပေါ် မိမိအား ဖခင်တင်၍ ဓားအသုံးပြုသည့်အခါ အမှတ်တမဲ့ခုခံတုံ့ပြန်မိခြင်းကို တားဆီးချုပ်ထိန်းပေးရန် ခြေလက်များကို တုတ်နှောင်ခွင့်ပြုခဲ့ပါသည်။—ကမ္ဘာဦး ၂၂:၇-၉။

၁၈။ မောရှေသည် အတုယူလောက်သည့် ဘုရားရေးရာလက်အောက်ခံခြင်းကို မည်သို့တင်ပြခဲ့သနည်း။

^၁၈ နောင်နှစ်ပေါင်းများစွာအကြာတွင် ဘုရားရေးရာလက်အောက်ခံခြင်း ပုံသက်သေကောင်းကို မောရှေတင်ပြခဲ့ကြောင်း သူ့အား “မြေကြီးပေါ်ရှိနေသော သူအပေါင်းတို့ထက် သာ၍နူးညံ့သိမ်မွေ့သောသဘောရှိ” သူဟူ၍ဖော်ပြထားခြင်းက အမှန်တင်ပြပါသည်။ (တောလည်ရာ ၁၂:၃) တောတောင်အရပ်တွင် အနှစ် ၄၀ တိုင်အောင် အတိုက်အခံပြုပုန်ကန်သူ နှစ်သန်း သို့မဟုတ် သုံးသန်းကို ကြီးကြပ်အုပ်ထိန်းပေးနေရသော်လည်း ယေဟောဝါ၏မိန့်တော်မူချက်များကို နာခံမှုရှိရှိ ဆောင်ရွက်ခဲ့ခြင်းက သူ၏ ဘုရားရေးရာလက်အောက်ခံခြင်းကို ထပ်ဆင့်သက်သေထူပါသည်။ ယင်းကြောင့်လည်း “ထာဝရဘုရား [ယေဟောဝါ၊ ကဘ] မိန့်တော်မူသမျှအတိုင်း မောရှေပြုလေ၏” ဟူ၍မှတ်တမ်းကဆိုသည်။—ထွက်မြောက်ရာ ၄၀:၁၆။

၁၉။ ယေဟောဝါကိုလက်အောက်ခံကြောင်း အဘယ်စကားများဖြင့် ယောဘတင်ပြခဲ့သနည်း။

^၁၉ ဘုရားရေးရာလက်အောက်ခံခြင်းကို အလွန်ထူးခြားစွာတင်ပြခဲ့သူတို့တွင် ယောဘသည် ထင်ရှားသူ နောက်တစ်ဦးဖြစ်သည်။ ယောဘ၏စည်းစိမ်းအားလုံးကို ဖျက်ဆီးပစ်ရန်၊ သားသမီးများကို သတ်ပစ်လိုက်ရန်၊ ထိုနောက် “ခြေဖဝါးမှသည် ဦးထိပ်တိုင်အောင် ဆိုးသောအနာစိမ်းများတိုးပေါက်စေ” ရန်စာတန်ပြုလုပ်ဖို့ ယေဟောဝါခွင့်ပြုတော်မူပြီးနောက် ယောဘ၏ဇနီးက သူ့အား “သင်သည် ဖြောင့်မတ်သောတရားကို စွဲလမ်းသေးသလော။ ဘုရားသခင်ကိုစွန့်ပယ်၍ သေလော့” ဟုဆိုခဲ့ပါသည်။ မည်သို့ဆိုစေကာမူ သူမအား “မိန်းမမိုက်ပြောတတ်သကဲ့သို့ သင်သည်ပြော၏။ အဘယ်သို့နည်း။ ငါတို့သည် ဘုရားသခင်၏လက်တော်မှ သုခချမ်းသာကိုခံယူသည်ဖြစ်၍ ဒုက္ခဆင်းရဲကို မခံမယူရာသလော” ဟုဆုံးမလိုက်ခြင်းအားဖြင့် ယောဘသည် ဘုရားရေးရာလက်အောက်ခံခြင်းကို တင်ပြခဲ့သည်။ (ယောဘ ၂:၇-၁၀) ယောဘ ၁၃:၁၅ (ကဘ) ပါသူ၏စကားများလည်း ထပ်တူစိတ်နေသဘောထားကို တင်ပြပါသည်။ “ငါ့ကိုသတ်တော်မူသော်လည်း ငါမျှော်လင့်စရာရှိမည်။” ယောဘသည် မိမိအပြစ်မရှိကြောင်းကိုဖော်ပြရန် များစွာစိတ်ပါနေသည်မှန်သော်လည်း နောက်ဆုံး၌ သူ့ကိုနှစ်သိမ့်ပေးပုံပြုသူတစ်ဦးအား ယေဟောဝါက ဤသို့မိန့်တော်မူခဲ့သည်ကို လျစ်လျူရှုမထားသင့်ပါ။ “သင်နှင့် သင်၏အဆွေခင်ပွန်းနှစ်ယောက်ကို ငါအမျက်ထွက်၏။ အကြောင်းမူကား၊ ငါ့ကျွန်ယောဘသည် ငါ့အကြောင်းအရာတို့ကို ဟုတ်မှန်စွာပြောသကဲ့သို့ သင်တို့သည်မပြော။” ယောဘသည် ဘုရားရေးရာလက်အောက်ခံခြင်း ပုံသက်သေကောင်း အမှန်တင်ပြခဲ့သည်ကား မုချဧကန်ဖြစ်သည်။—ယောဘ ၄၂:၇။

၂၀။ ဒါဝိဒ်သည် ဘုရားရေးရာလက်အောက်ခံခြင်းကို အဘယ်နည်းများဖြင့် တင်ပြခဲ့သနည်း။

^၂၀ ဟေဗြဲကျမ်းစာစောင်များမှ အခြားပုံသက်သေတစ်ခုကို ထပ်တင်ပြရဦးမည်ဆိုလျှင် ဒါဝိဒ်ရှိပါသည်။ အမဲလိုက်သကဲ့သို့ ဒါဝိဒ်အား ရှောလုမင်းကြီးလိုက်လံရှာဖွေနေစဉ် ရှောလုကိုသတ်ပစ်ခြင်းအားဖြင့် မိမိဒုက္ခများကိုငြိမ်းစေရန် ဒါဝိဒ်အခွင့်ကောင်းနှစ်ကြိမ်ရရှိခဲ့သည်။ သို့နှင့်ပင် ဒါဝိဒ်၏ဘုရားရေးရာလက်အောက်ခံခြင်းက သူ့အားတားဆီးပေးပါသည်။ ၁ ဓမ္မရာဇဝင် ၂၄:၆ တွင်သူ၏စကားများကို မှတ်တမ်းတင်ထားသည်။ “ထာဝရဘုရား [ယေဟောဝါ၊ ကဘ] ပေးတော်မူသော ဘိသိက်ကိုခံသော ငါ့အရှင်သည် ထာဝရဘုရား [ယေဟောဝါ၊ ကဘ] အခွင့်နှင့် ဘိသိက်ခံသူဖြစ်သောကြောင့် ထိုအရှင်ကို ထိခိုက်ခြင်းငှာ ငါလက်ဆန့်သောအမှုကို ထာဝရဘုရား [ယေဟောဝါ၊ ကဘ] ဆီးတားတော်မူပါစေသော။” (၁ ဓမ္မရာဇဝင် ၂၆:၉-၁၁ ကိုလည်းရှု။) ထိုနည်းတူစွာ မိမိအမှားများပြုသည့်အခါ၊ သို့မဟုတ် ပြစ်မှားမိသည့်အခါ ဆုံးမခံခြင်းအားဖြင့် ဘုရားရေးရာလက်အောက်ခံခြင်းသဘောကို သူတင်ပြခဲ့ပါသည်။—၂ ဓမ္မရာဇဝင် ၁၂:၁၃။ ၂၄:၁၇။ ၁ ရာဇဝင်ချုပ် ၁၅:၁၃။

ပေါလု၏ လက်အောက်ခံခြင်းပုံသက်သေ

၂၁-၂၃။ အဘယ်အချိန်အခါများတွင် ဘုရားရေးရာလက်အောက်ခံခြင်းကို တမန်တော်ပေါလု တင်ပြခဲ့သနည်း။

^၂၁ ခရစ်ယာန်ဂရိကျမ်းစောင်တွင် ထူးခြားသောဘုရားရေးရာလက်အောက်ခံခြင်းပုံသက်သေကို တမန်တော်ပေါလု၌ တွေ့ရှိရသည်။ တမန်တော်အဖြစ် ဓမ္မအမှုဆောင်သည့်ကဏ္ဍအသီးသီးတွင်နည်းတူ ဤတွင်လည်း သူ၏သခင်၊ ယေရှုခရစ်ကို တုပခဲ့ပါသည်။ (၁ ကောရိန္သု ၁၁:၁) အခြားမည်သည့်တမန်တော်ထက်မဆို သူ့အား ယေဟောဝါဘုရားသခင် များစွာအသုံးပြုတော်မူခဲ့သော်လည်း ပေါလုသည် တစ်ခါမျှ ထင်ရာစိုင်းမပြုမူခဲ့ပါ။ ဘာသာဝင်သူ တစ်ပါးအမျိုးသားတို့သည် အရေဖျားလှီးရန် လိုမည်၊ မလိုမည်ကိစ္စ ပေါ်ပေါက်လာသည့်အခါ “ပေါလုနှင့်ဗာနဗတို့သည် အခြားသောတပည့်တော်အချို့တို့နှင့်တကွ ထိုပြဿနာ၏အကြောင်းကြောင့် ယေရုရှလင်မြို့၌ရှိသော တမန်တော်တို့နှင့် သင်းအုပ်တို့ထံသို့သွားရမည်အကြောင်းကို [အန္တိအုတ်မြို့ရှိညီအစ်ကိုများက] စီရင်ကြ၏” ဟုလုကာမှတ်တမ်းတင်ပြပါသည်။—တမန်တော် ၁၅:၂။

^၂၂ ပေါလု၏သာသနာပြုလုပ်ငန်းနှင့်ပတ်သက်၍မူကား ဂလာတိ ၂:၉ တွင် ကျွန်ုပ်တို့အား ဤသို့ဆိုခဲ့သည်။ “အမှီတကဲဖြစ်သော ယာကုပ်၊ ကေဖ၊ ယောဟန်တို့သည်လည်း ငါရသောကျေးဇူးတော်ကို သိကြသောအခါ မိမိတို့သည် အရေဖျားလှီးခြင်းကိုခံသောသူတို့ဆီသို့သွားမည်အကြောင်းနှင့် ငါတို့သည် တစ်ပါးအမျိုးသားတို့ဆီသို့သွားမည်အကြောင်း လက်ယာလက်ခံခြင်းကို ဗာနဗနှင့်ငါ့အား ပေးကြ၏။” ထင်ရာစိုင်းမည့်အစား ပေါလုသည် ညွှန်ကြားချက်ကို ခံယူခဲ့သည်။

^၂၃ ထပ်တူပင် ယေရုရှလင်မြို့တွင် ပေါလုနောက်ဆုံးအကြိမ်ရောက်ခဲ့စဉ် မောရှေ၏ပညတ်တရားနှင့်ပတ်သက်၍ သူသည် ဖောက်ပြန်သူမဟုတ်ကြောင်းကို လူအပေါင်းအားတွေ့ရှိစေခြင်းငှာ ဗိမာန်တော်သို့သွား၍ ပညတ်သည့်အတိုင်းဆောင်ရွက်ရမည်ဟူသော အကြီးအကဲများ၏သြဝါဒကို သူနာခံခဲ့သည်။ ထိုသို့ပြုမူခြင်းကြောင့် လူအုပ်သည် မိမိအတွက်နှင့် ထကြွဆူပူလာသည်ကို တွေ့ရှိရသဖြင့် အကြီးအကဲများကို သူလက်အောက်ခံခဲ့ခြင်းသည် မှားသွားပါသလော။ လုံးဝမဟုတ်ကြောင်း တမန်တော် ၂၃:၁၁ ပါစကားများက ထင်ရှားစေသည်။ “နက်ဖြန်နေ့ညတွင် သခင်ဘုရားသည် ပေါလုအနား၌ပေါ်လာတော်မူလျက် ‘ပေါလု မစိုးရိမ်နှင့်။ ငါ၏အကြောင်းအရာကို သင်သည် ယေရုရှလင်မြို့၌ သက်သေခံပြီးသည်နည်းတူ ရောမမြို့၌လည်း ခံရလေဦးမည်’ ဟုမိန့်တော်မူ၏။”

၂၄။ နောက်ဆောင်းပါးတွင် လက်အောက်ခံခြင်းနှင့်ပတ်သက်၍ အဘယ်အကြောင်းများကို ထပ်ဆင့်ဆွေးနွေးမည်နည်း။

^၂၄ ကျွန်ုပ်တို့လက်အောက်ခံကြရန် တာသွားသောအကျိုးအကြောင်းများစွာနှင့် ထူးခြားစွာလက်အောက်ခံခဲ့သူများ၏ ပုံသက်သေများကိုပါ ကျမ်းစာဖော်ပြထားသည်ကား အမှန်ပင်။ နောက်ဆောင်းပါးတွင် ယေဟောဝါဘုရားသခင်ကို လက်အောက်ခံနိုင်သည့် နည်းမျိုးစုံ၊ ထိုသို့ပြုလုပ်ရန် အထောက်အကူများနှင့် ရရှိသည့် အကျိုးရလဒ်များအကြောင်း သုံးသပ်ကြမည်။

သင်မည်သို့ဖြေဆိုမည်နည်း

◻ အဘယ်မည်သောလွတ်လပ်ခြင်းမျိုးသည် နှစ်မြို့စရာမဖြစ်သနည်း။

◻ လက်အောက်ခံခြင်းကို ခုခံငြင်းဆန်ခြင်း၏ အကြောင်းရင်းကား အဘယ်နည်း။

◻ ယေဟောဝါဘုရားသခင်ကို အဘယ်အကြောင်းများကြောင့် လက်အောက်ခံနေသင့်သနည်း။

◻ ဘုရားရေးရာလက်အောက်ခံခြင်းဆိုင်ရာ အဘယ်ပုံသက်သေကောင်းများကို ကျမ်းစာဖော်ပြထားသနည်း။

[စာမျက်နှာ ၁၀ ပါ ရုပ်ပုံ]

နိမ်ရောဒ၊ ရေလွှမ်းမိုးမှုနောက်ပိုင်းအုပ်စိုးသူတို့တွင် ဘုရားရေးရာလက်အောက်ခံခြင်းကို ငြင်းဆန်ခဲ့သည့် ဦးဆုံးမင်း

[စာမျက်နှာ ၁၃ ပါ ရုပ်ပုံ]

နောဧ၊ အပြစ်ဆိုဖွယ်မရှိ ဘုရားရေးရာလက်အောက်ခံခြင်းပုံသက်သေ—ကမ္ဘာဦး ၆:၁၄၊ ၂၂