ရွှေပန်းသီးများကဲ့သို့
ပန်းသီးများ—မျက်စိနှင့် ခံတွင်းနှစ်ခုစလုံးအတွက် နှစ်ခြိုက်စရာပါတကား! “အခန့်သင့်ပြောဆိုသောစကားတစ်ခွန်းသည် ငွေထည်တွင်ရှိသော ရွှေပန်းသီးများနှင့်တူသည်” ဟု အရသာရှိ ဤအသီးကိုစဉ်းစားဆင်ခြင်စရာတင်စားချက်အဖြစ် သမ္မာကျမ်းစာအသုံးပြုထားသည်။ (သု. ၂၅:၁၁၊ ကဘ) ယင်းဖော်ပြချက်က အဘယ်အရာကို ဆိုလိုသနည်း။
“ငွေထည်တွင်ရှိသော ရွှေပန်းသီးများ” ဟုဆိုထားသဖြင့် ရွှေအသီးအနှံများထည့်ထားသည့် ငွေလင်ဗန်းကဲ့သို့သော ပန်းပုလက်ရာကို ပြောဆိုနေခြင်းဖြစ်မည်။ ဤအခန်းကြီး၏ ရှေ့အခန်းငယ်များတွင် ရှင်ဘုရင်ရှေ့ ဝင်ရောက်ခစားခြင်းအကြောင်း ဖော်ပြနေသည့်အတွက် ယင်းအခန်းငယ်က မင်းကြီးတစ်ပါးအား ဆက်သသည့်လက်ဆောင်ပဏ္ဏာများ—ငွေလင်ဗန်းများတွင်ထည့်ထားသည့် ပန်းသီးပုံသဏ္ဌာန်ရှိ ရွှေအဆင်တန်ဆာများ—ကိုဆိုလိုနေခြင်းဖြစ်မည်။ (သု.၂၅:၆၊ ၇) အမှန်ပင် မှတ်သားဖွယ် ထူးခြားစွာ လှပတင့်တယ်မှုပါတကား!
စာအားဖြင့်လည်းကောင်း၊ နှုတ်အားဖြင့်လည်းကောင်း ရေးသားပြောဆိုသည့် လျောက်ပတ်သင့်လျော်၊ အသရေရှိသောအခန့်သင့်စကားများသည်လည်း ထပ်တူပင် တင့်တယ်လှပေသည်။ ယင်းတို့သည် နှစ်လိုဖွယ်ဖြစ်ရုံမက အားပေးတည်ဆောက်မှုဖြစ်ပြီး အဘက်ဘက် အကျိုးရှိပါသည်။ အထူးသဖြင့် မှုတ်သွင်းခြင်းအားဖြင့်ဖြစ်သည့် သမ္မာကျမ်းစာရှိ မြင့်မြတ်သောသြဝါဒစကားများသည် လှပတင့်တယ်သည့် “ငွေထည်တွင်ရှိသော ရွှေပန်းသီးများ” နှင့်တူပါသည်။
သု. ၂၅:၁၁ ပါရှောလမုန်၏ ပညာရှိစကားများ ဖော်ပြသည့်အတိုင်း မင်းကြီးသည် “နှစ်သက်ဖွယ်သောစကားများနှင့် စာဖြင့်ရေးထားသည့် ဖြောင့်မတ်သော သမ္မာတရားစကားများကို ရှာတွေ့” ရန် ကြိုးစားခဲ့၏။ (ဒေသနာ ၁၂:၁၀ ကဘ; သု. ၂၅:၁) နောင်ရာစုအနည်းငယ်အကြာတွင် ခရစ်ယာန်တမန်တော်ပေါလုက “ကျမ်းစာရှိသမျှသည် ဘုရားရှင်ဝိညဉ်တော်မှုတ်သွင်းထား၍ . . . အကျိုးရှိ၏” ဟုရေးသားခဲ့သည်။ (၂ တိမောသေ ၃:၁၆၊ ကဘ) မှန်ပါသည်။ သမ္မာကျမ်းစာတွင် အကျိုးရှိသြဝါဒအပြင် ပရောဖက်ပြုချက်များ၊ စကားဖြင့် ပုံဖော်ပြချက်များ၊ အမှန်တရားများ ပါရှိသည်။ ယင်းတို့သည်လည်း လက်ရာအပြောင်မြောက်ဆုံး လက်မှုပညာရှင်၏လက်ရာတို့ထက် ထူးကဲစွာတင့်တယ်လှပ၏။ ထို့ပြင် ဘုရားသခင့်နှုတ်ကပါဌ်တော် သမ္မာကျမ်းစာအသိပညာရရှိထားသူသည် တန်ဖိုးအနဂ္ဃရှိဘဏ္ဍာရှင်ဖြစ်၍ ထာဝရအသက်ရရန် မျှော်လင့်နိုင်သူလည်းဖြစ်သည်။—သု. ၄:၇-၉; ယောဟန် ၁၇:၃။