ဆယ်နှစ်လုံးလုံး တစ်ပြိုင်တည်း!
လွန်ခဲ့သော ဆယ်နှစ်က အင်္ဂလိပ်ကင်းမျှော်စင်နှင့်တစ်ပြိုင်တည်း စပိန်ဘာသာကင်းမျှော်စင်လည်း ထွက်လာသောအခါ မည်သို့ခံစားရသနည်းဟု မေးမြန်းခံရသည့် ချစ်စရာကောင်းသော စပိန်ညီအစ်မတစ်ဦး ဤသို့ပြောသည်– ‘ကောင်းချီးတစ်ရပ်လို့ ခံယူပါတယ်။ ဘာကြောင့်လည်းဆိုတော့ အခုဆိုရင် ဘယ်လိုပြောမလဲ၊ အင်္ဂလိပ်နဲ့ ခြေလှမ်းတူနေပြီပေါ့။ အင်္ဂလိပ်လို့ ကျွန်မပြောတိုင်း အဖွဲ့အစည်းကို စဉ်းစားမိတယ်။ အဖွဲ့အစည်းကို “မေမေ” လို့ ကျွန်မတို့ရည်ညွှန်းပါတယ်။ ကျွန်မတို့ ရင်းနှီးနီးကပ်မှုခံစားရတယ်။ တကယ့်ကိုကောင်းတယ်။ ကောင်းလိုက်တာ!’
ဤသစ္စာရှိညီအစ်မသည် အင်္ဂလိပ်စာပေ မဖတ်တတ်သူများစွာ၏ ခံစားချက်ကို ဖော်ထုတ်ပြောဆိုနေခြင်းဖြစ်သည်။ လွန်လေပြီးသောနှစ်များက အင်္ဂလိပ်စာစောင်ပါ ဆောင်းပါးများ ထွက်ပြီး ခြောက်လကြာမှသာ စပိန်ဘာသာထုတ် ကင်းမျှော်စင်တွင် ထွက်လာပါသည်။ ထပ်တူကြန့်ကြာမှုများကို အခြားဘာသာများတွင်လည်း ကြုံတွေ့ခဲ့ရသည်။ ယင်းကြောင့် ဘာသာစကားမြောက်မြားစွာဖြင့် ဆောင်းပါးတစ်မျိုးတည်းကို တစ်ပြိုင်တည်း ထုတ်ဝေလိုစိတ်ပြင်းပြခဲ့ခြင်းကို နားလည်နိုင်ပါသည်။
ထိုကြောင့် ဧပြီ ၁ ၁၉၈၄၊ ထုတ် စာစောင်မှစတင်၍ စပိန်ဘာသာထုတ်သည် အင်္ဂလိပ်ဘာသာနှင့် တစ်ပြိုင်တည်းထွက်သည့် ပထမဦးဆုံးစာစောင်ဖြစ်လာပါသည်။ အခြားဘာသာစကားများလည်း မကြာမီ ထိုသို့ဖြစ်လာကြပါသည်။ ၁၉၈၅ ခုနှစ်တိုင်လေသော် ၂၃ ဘာသာဖြင့် တစ်ပြိုင်တည်း ထုတ်ဝေနိုင်ခဲ့သည်။ ဘာသာပြန်သူများကို ရှာဖွေတွေ့ရှိ၍ လေ့ကျင့်ပေးနိုင်သည့်အလျောက် အင်္ဂလိပ်နှင့်အမီလိုက်နိုင်သော ဘာသာစကားထုတ်များ အရေအတွက် တိုးများလာပါသည်။
ဤကင်းမျှော်စင်စာစောင်သည် တစ်ပြိုင်တည်းထုတ်နိုင်ခဲ့သည့် ဆယ်ကြိမ်မြောက်နှစ်ဖြစ်ပါသည်။ ယခု ကင်းမျှော်စင်ကို ၁၁၆ ဘာသာဖြင့် ထုတ်ဝေထား၍ ၈၅ ဘာသာမှာ တစ်ပြိုင်တည်းထုတ်ဖြစ်သည်။ ယင်းကြောင့် စုစုပေါင်း ပျမ်းမျှစောင်ရေ ၁၆,၁၀၀,၀၀၀ ၏ ၉၉.၃ ရာခိုင်နှုန်းသည် မျက်နှာဖုံးဒီဇိုင်းနှင့် ဆောင်းပါးတစ်မျိုးတည်းဖြင့် ထွက်လာနေပါသည်။ ပတ်စဉ်ကင်းမျှော်စင်သင်တန်းတက်သူများအနက် ၉၅ ရာခိုင်နှုန်းကျော်သည် ထပ်တူဆောင်းပါးကို တစ်ကြိမ်တည်းတွင် ဆွေးနွေးသုံးသပ်နေကြပါသည်။
ကင်းမျှော်စင်၏ တွဲဖက်မဂ္ဂဇင်း နိုးလော့!ကို ၇၄ ဘာသာ ဖြင့်ထုတ်ဝေရာ တစ်ပြိုင်တည်း ၃၇ ဘာသာဖြင့် ထုတ်ဝေထားပြီ။ နှစ်ပတ်လည် ယေဟောဝါသက်သေများ၏ နှစ်ချုပ်စာအုပ်ကို ၁၈ ဘာသာဖြင့် ထုတ်ဝေပါသည်။ စာပေများကို ဤသို့ တစ်ပြိုင်တည်း ထုတ်ဝေခြင်းဖြင့် ဘုရားသခင့်လူမျိုးအား “အချင်းချင်းမကွဲပြားဘဲ စိတ်သဘောတစ်သံတစ်သမတ်တည်းရှိ” စေပါသည်။—၁ ကောရိန္သု ၁:၁၀။