ဘုရားသခင့်နိုင်ငံတော်ကြွေးကြော်သူများမှတ်တမ်း
“ပူးပေါင်းလုပ်ဆောင်ရေးစိတ်ဓာတ်အတွက် အထိမ်းအမှတ်တစ်ခု”
စပိန်ခံတပ်များ၏ တောင်ဘက်အစွန်ဆုံးနေရာအနီးတွင် ဂျီဘရော်လ်တာကျောက်တုံးဟု ထင်ရှားသော ဆစ်ထားသည့် ထုံးကျောက်တုံးကြီးတစ်တုံး ရှိသည်။ ဤကျောက်တုံးသည် နိုင်ငံရေးပဋိပက္ခနှင့် အပြည်ပြည်ဆိုင်ရာ သဘောထားကွဲလွဲမှုတို့ကို နှစ်ရာပေါင်းများစွာ အသံတိတ်သက်သေခံလာခဲ့သည်။ ယင်းနှင့်ဆန့်ကျင်လျက် မကြာသေးမီက ဂျီဘရော်လ်တာကျောက်တုံးသည် ယနေ့ကမ္ဘာတွင် တွေ့ရခဲသည့် ပူးပေါင်းလုပ်ဆောင်မှုနှင့်စည်းလုံးမှုတို့ကို ထင်ရှားပြသသည့် နောက်ခံအကြောင်းဖြစ်ခဲ့သည်။
ကျောက်တုံးနှင့် နှစ်မိုင်ခန့်ဝေးသောနေရာတွင် စပိန်နိုင်ငံ၏မြို့တစ်မြို့ဖြစ်သည့် လာလီးနီးယားရှိသည်။ ထိုတွင် ယေဟောဝါသက်သေတို့၏ဘုရားနိုင်ငံတော်ခန်းမတစ်လုံး ဆောက်လုပ်ဖို့အတွက် မိမိတို့အချိန်နှင့်ခွန်အားကိုပေးရန် စိတ်အားထက်သန်ကြသော ရာနှင့်ချီသည့်စေတနာ့ဝန်ထမ်းများ စုရုံးရောက်ရှိနေကြသည်။ သူတို့သည် ဖန်ဆင်းရှင်ယေဟောဝါဘုရားသခင်ဝတ်ပြုရေးအတွက် လျောက်ပတ်သည့်နေရာကို တည်ဆောက်ရန် အလုပ်လုပ်နေကြရာ ယင်းနှင့်ယှဉ်လိုက်လျှင် ဂျီဘရော်လ်တာကျောက်တုံး၏ ဂုဏ်ကျက်သရေဆောင်သော နောက်ခံအကြောင်း၏ အရေးပါမှုပင်လျှင် မှေးမှိန်သွားရသည်။
ကမ္ဘာ့ထိုအစိတ်အပိုင်းရှိ ဘုရားသခင့်နိုင်ငံတော်ကြွေးကြော်သူများက အောက်ပါအတိုင်း အစီရင်ခံသည်–
“စိတ်အားထက်သန်တဲ့ စေတနာ့ဝန်ထမ်းကိုးရာတို့ဟာ ၁၉၉၃ ခု၊ စက်တင်ဘာလ ၂၄ ရက်၊ သောကြာနေ့မွန်းလွဲကစပြီး နေ့ရောညပါအလုပ်လုပ်ကြတယ်။ တနင်္ဂနွေနေ့ညနေ ခုနစ်နာရီရောက်တော့ အဆောက်အအုံကို ယေဟောဝါသက်သေများရဲ့ခန်းမလို့ သတ်မှတ်ဖော်ပြပေးတဲ့ အထိမ်းအမှတ်သစ်တစ်ခုကို ဆောက်လုပ်ပြီးသွားပြီး ဆွဲဆောင်မှုရှိတဲ့အဆောက်အအုံသစ်ကို ပထမဆုံးအကြိမ်လူထုစည်းဝေးပွဲကျင်းပဖို့ အသုံးပြုခဲ့တယ်။
“ဂျီဘရော်လ်တာအနီးအနားက သက်သေခံတွေဟာ သူတို့ရဲ့စပိန်ညီအစ်ကိုတွေကို ကူညီဖို့ နယ်စပ်ကိုဖြတ်ပြီး ရောက်လာကြတယ်။ ဂျီဘရော်လ်တာနိုင်ငံသား စေတနာ့ဝန်ထမ်းလုပ်သားတစ်ဦးက ‘နိုင်ငံရေးကွဲပြားမှုတွေက ကျွန်တော်တို့ရဲ့ အပြည်ပြည်ဆိုင်ရာ ညီအစ်ကိုအသင်းအဖွဲ့သဘောထားကို မဟန့်တားနိုင်ခဲ့ဘူး’ ဟုပြောခဲ့သည်။ သူဤသို့ဆက်ပြောသည်– ‘လွန်ခဲ့တဲ့ နှစ်အတော်ကြာက လာလီးနီးယားကမိတ်ဆွေတွေဟာ ဂျီဘရော်လ်တာမှာ ကျွန်တော်တို့ခန်းမဆောက်တာကို လာဝိုင်းကူညီကြတယ်။ ဒါကြောင့် အခု သူတို့ရဲ့အကူအညီကို ပြန်တုံ့ပြန်ရတာ ကျွန်တော်တို့ပျော်တယ်။’
“အသင်းတော်နှစ်ခုက ယေဟောဝါသက်သေတွေနဲ့ အင်ဒါလူးဇင်က ကျွမ်းကျင်မှုရှိတဲ့ကူညီပေးသူရာပေါင်းများစွာတို့ရဲ့ အင်တိုက်အားတိုက်ကြိုးစားအားထုတ်မှုကို ဖြည့်စွက်ပေးဖို့ လာလီးနီးယားမြို့သားတွေက လိုအပ်တဲ့မြေကွက်တွေကိုလှူဖို့ ဆုံးဖြတ်ခဲ့ကြတယ်။ ဆောက်လုပ်ရေးနေရာကို လာလီးနီးယားမြို့တော်ဝန် လာရောက်လည်ပတ်တုန်းက အခုလိုရှင်းပြခဲ့တယ်။ ‘ထုံးတမ်းစဉ်လာအရဆိုရင် ကက်သလစ်ချာ့ချ်အဆောက်အအုံအတွက် မြေကွက်ကို စပိန်ဒေသန္တရအာဏာပိုင်တွေက ပေးတယ်။ တခြားဘာသာရေးဂိုဏ်းဂဏတွေကိုကော ဘာကြောင့် အဲဒီလိုမပေးရမှာလဲ။ စေတနာ့ဝန်ထမ်းတွေရဲ့ ကိုယ်ကျိုးစွန့်စိတ်ဓာတ်ကို ကျွန်တော်အရမ်းကြိုက်တယ်။ ကျွန်တော်တို့ရဲ့အကူအညီကို သူတို့ရသင့်တယ်လို့ ကျွန်တော်ယူဆတယ်။ ဒီနေ့ အကွဲကွဲအပြားပြားဖြစ်နေတဲ့လောကမှာ အဲဒီလိုစိတ်ဓာတ်မျိုး အများကြီးလိုအပ်တယ်။’
“ခန်းမကို ‘ပူးပေါင်းလုပ်ဆောင်ရေးစိတ်ဓာတ်အထိမ်းအမှတ်’ လို့ သူခေါ်ခဲ့တယ်။ တကယ်ပါပဲ၊ အထူးစိတ်စွဲစရာကောင်းတဲ့ကဏ္ဍက ပိသုကာပုံစံလည်းမဟုတ်ဘူး၊ ခန်းမအရွယ်အစားကြောင့်လည်း မဟုတ်ဘူး။ ပတ်ဝန်းကျင်ကလူတွေကို စိတ်စွဲသွားစေတာက အဆောက်အအုံတစ်ခုလုံးကို စေတနာ့ဝန်ထမ်းတွေနဲ့ချည်းဆောက်လုပ်ပြီး ၄၈ နာရီအတွင်းဆောက်လုပ်ပြီးစီးလို့ပါပဲ!”
လာလီးနီးယားမြို့နှင့် အနီးတစ်ဝိုက်ရှိ ယေဟောဝါသက်သေများသည် ဂလာတိ ၆:၁၀ ပါစကားများကို စွဲလမ်းကြကြောင်း ယင်းကသက်သေထူသည်။ ထိုတွင် တမန်တော်ပေါလုက ယုံကြည်သူချင်းတို့အား ဤသို့သြဝါဒပေးခဲ့သည်– “ထို့ကြောင့် ငါတို့သည် အဆင်သင့်သည့်အတိုင်း ယုံကြည်ခြင်း၏အိမ်သူအိမ်သားတို့၌ အထူးသဖြင့်ကျေးဇူးပြုလျက် ခပ်သိမ်းသောသူတို့အား ကျေးဇူးပြုကြကုန်အံ့။”