ဒိုမီနီကန်သမ္မတနိုင်ငံ—စူးစမ်းရှာဖွေမှုအတွက် လမ်းဖွင့်ထားဆဲ

လူငယ်တစ်ဦးအနေနှင့် ခရစ္စတိုဖာကိုလန်ဘတ်သည် ပင်လယ်ခရီးသွားလာသည့် အသက်တာကို စတင်ခဲ့ပြီး နောက်ဆုံးတွင် ယနေ့ ဝက်စ်အင်ဒီးစ်ဟုသိကြသော ကျွန်းများကို ရှာဖွေတွေ့ရှိခဲ့သည်။ ၁၄၉၂ ခု၊ ဒီဇင်ဘာလတွင် သူ၏ဦးစီးသင်္ဘောဖြစ်သော စန်တာမာရီးယာ သည် ယနေ့ ဟေတီနှင့် ဒိုမီနီကန်နိုင်ငံတို့ တစ်ဝက်စီပိုင်ဆိုင်သည့် ဟစ္စပါနီယိုးလာဟု သိကြသော အက်စ္စပါညိုးလာကျွန်း၏ မြောက်ဘက်ကမ်းရိုးတန်းတွင် သောင်တင်ခဲ့သည်။ ကိုလန်ဘတ်သည် ထိုနေရာတွင် ပထမဆုံး ဥရောပတိုက်သားများ၏ နယ်မြေသစ်ထူထောင်မှုကို စတင်ခဲ့ပြီး ခံတပ်တစ်ခုကို အလျင်အမြန်ဆောက်လုပ်ကာ လာနာဗီဒက်ဟု အမည်ပေးခဲ့သည်။ ထိုကျွန်းသည် သူ့အတွက် ထပ်မံစူးစမ်းလေ့လာမှုများပြုရန် အခြေစိုက်စခန်းဖြစ်ခဲ့သည်။

ထိုကျွန်းတွင် သိသိသာသာရုပ်ချောသော၊ ယုံကြည်စိတ်ချရသော၊ ဧည့်ဝတ်ကျေပွန်သော တိုင်နိုအင်းဒီးယန်းလူမျိုးများ နေထိုင်ကြသည်။ ထိုအချိန်က ထိုနေရာတွင် ခန့်မှန်းခြေအားဖြင့် ထိုလူမျိုး ၁၀၀,၀၀၀ ခန့်ရှိသည်။ သို့သော် ရွှေရှာရန် အဓိကစိတ်ဝင်စားသော ကျူးကျော်ဝင်ရောက်သူများက သူတို့အား ကြမ်းတမ်းစွာဆက်ဆံသောကြောင့် ဒေသခံလူဦးရေကျဆင်းခဲ့ရသည်။ ၁၅၇၀ ရောက်သော် မှတ်တမ်းအရ တိုင်နိုအင်းဒီးယန်းလူမျိုး ၅၀၀ ခန့်သာကျန်တော့သည်။

ယနေ့ ဒိုမီနီကန်သမ္မတနိုင်ငံသည် ဤနေရာသို့ သူတို့၏ဘိုးဘေးမျာပြောင်းရွှေ့လာခြင်းကြောင့် ရောက်လာကြသော လူအမျိုးမျိုး၊ အသားအရောင်အဖုံဖုံတို့ နေထိုင်ရာဖြစ်သည်။ သို့တစေ သူတို့၌ တိုင်နိုတို့၏ ကောင်းသောစရိုက်လက္ခဏာအတော်များများ ရှိပုံရပြီး ယေဘုယျအားဖြင့် ဖော်ရွေကာ အေးအေးဆေးဆေးနေတတ်သူများ ဖြစ်ကြသည်။ ဘုရားကို စိတ်ရင်းမှန်ဖြင့်ယုံကြည်ခြင်းနှင့် သမ္မာကျမ်းစာကို လေးစားခြင်းတို့ဖြင့် တွဲဖက်သော ထိုစရိုက်များက ထိုဒေသတွင် ယေဟောဝါသက်သေများ၏ ဟောပြောခြင်းနှင့် သွန်သင်ခြင်းလုပ်ငန်းအတွက် သိသာထင်ရှားသည့် အောင်မြင်မှုကို ဖြစ်စေသည်။

အခြားအရာတစ်မျိုးကို စူးစမ်းရှာဖွေခြင်း

ပထမဆုံး ကင်းမျှော်စင်သာသနာပြုများဖြစ်ကြသော လဲနတ်နှင့် ဗာဂျီးနီးယားဂျွန်ဆင်တို့သည် အာဏာရှင်ထရူဂျီလိုအုပ်စိုးသောအချိန်အတွင်း ဒိုမီနီကန်နိုင်ငံသို့ ရောက်ရှိခဲ့ကြသည်။ လူများစွာတို့သည် သူတို့၏ကျမ်းစာသတင်းကိုလျင်မြန်စွာနှင့် နှစ်လို့ဖွယ်ရာတုံ့ပြန်ကြသည်ကို သူတို့ဝမ်းမြောက်ဝမ်းသာတွေ့ကြုံကြရသည်။ သို့သော် ယင်းသည် အာဏာပိုင်များနှင့် သူတို့၏ ဘာသာရေးဆိုင်ရာအကြံပေးသူများကို မနှစ်မြို့စေခဲ့ချေ။ နှိပ်စက်ညှဉ်းပန်းမှုဒီလှိုင်းကြီး စတင်လှိမ့်ဆင်းလာရာ ကနဦးဒိုမီနီကန်လူမျိုးသက်သေခံများ၏ ယုံကြည်ခြင်း အပြင်းအထန်စမ်းသပ်ခံရသည်။ ယနေ့အထိ သူတို့၏—သေသည့်တိုင်အောင်—သစ္စာစောင့်သိမှုနှင့် ယုံကြည်မှုတို့အကြောင်း ပြောဆိုကြလေ့ရှိသည်။

ယခု ထိုဒေသတွင်ရှိသော ယေဟောဝါသက်သေ ၁၆,၀၀၀ ခန့်တို့ကို လူများကောင်းစွာသိကြသည်။ လွန်ခဲ့သည့်တစ်ချိန်က တစ်နိုင်ငံလုံးရှိ ရုပ်သံလွှင့်ဌာနငါးခုတို့သည် ယေဟောဝါသက်သေတို့၏ ယေဟောဝါသက်သေများ—နာမတော်နောက်ဝယ်ရှိအဖွဲ့အစည်းa အမည်ရှိသော ဗီဒီယိုတိပ်ခွေကို ထုတ်လွှင့်ပေးခဲ့သည်။

ယင်းသည် မြို့ကြီးများတွင်သာမက မြို့ငယ်ကလေးများနှင့် ကျေးလက်ဒေသများတွင်ပါ သက်သေခံခြင်းလုပ်ငန်းကို များစွာလူသိရှင်ကြားဖြစ်သွားစေသည်။ ဆက်လက်လုပ်ဆောင်သည့်အနေနှင့် သူတို့သည် အထူးလှုပ်ရှားမှုအဖွဲ့တစ်ခုဖွဲ့စည်းပြီး အစွန်အဖျားကျသော ထိုဒေသများသို့သွားရောက်ကာ ဘုရားသခင့်နိုင်ငံတော်သတင်းကို ယူဆောင်သွားကြသည်။

ခရီးဆန့်ခြင်းအတွက်ကောင်းချီးများ

တက်ကြွထက်သန်ပြီး ဇွဲရှိသော သက်သေခံလူငယ်များစွာတို့သည် ထိုသို့ဝေးလံသည့်ရပ်ကွက်များတွင် နှစ်လကြာ ဟောပြောခြင်းလုပ်ငန်းအတွက် အချိန်ပေးခဲ့ကြသည်။ သူတို့၏ကြိုးစားအားထုတ်မှုမှ ကောင်းစွာအကျိုးဖြစ်ထွန်းခဲ့သည်။ နေရာတစ်ခုတွင် သက်သေခံနှစ်ဦးသည် ထူးခြားသည့်စိတ်ဝင်စားမှုကို တွေ့ရှိခဲ့ကြသည်။ ယေရှုသေခြင်းကို သတိရအောက်မေ့ရာ နှစ်ပတ်လည်ပွဲတော် ကျင်းပမည့်အချိန်ရောက်လာသဖြင့် သူတို့သည် အစီအစဉ်များပြုလုပ်ပြီး လူများကိုခေါ်ဖိတ်ကြသည်။ ခန်းမတွင် လူများပြည့်ကျပ်သွားပြီး အစည်းအဝေးကို သူတို့ကျင်းပကြသည်။ အစည်းအဝေးပြီးသောအခါ အခြားလူအုပ်ကြီးတစ်အုပ်သည် အထဲဝင်ရန် ခန်းမပြင်ပ၌စောင့်နေကြသည်ကို သူတို့အံ့သြစွာတွေ့ရှိလိုက်ရသည်။ သို့နှင့် သူတို့ကို အထဲသို့ခေါ်ဖိတ်ပြီး အစီအစဉ်ကို ထပ်မံပြုလုပ်ကြသည်။ ယခုအခါ ထိုနေရာတွင် အသင်းတော်တစ်ခုတည်ရှိနေပြီဖြစ်သည်။

ရက်ရောပြီး ဖော်ရွေပျူငှာသော ထိုလူတို့၏သဘာဝက မိမိတို့လေ့လာနေသော ကျမ်းစာသမ္မာတရားကို မိမိတို့၏မိသားစုအဝင်များနှင့် အခြားသူများအား ဝေငှရန် သူတို့အားလှုံ့ဆော်သည်။ ကျမ်းစာသင်သားတစ်ယောက်သည် တစ်အိမ်မှတစ်အိမ်ဓမ္မအမှုတွင် ပါဝင်ရန် အရည်အချင်းပြည့်မီလာသောအခါ ရွှင်လန်းမှုပြည့်ဖြိုးလျှံသွားသည်။ သူသည် အိမ်နီးနားချင်းများနှင့် ကျမ်းစာသင်အံမှုငါးခု ကျင်းပနေပြီဖြစ်သော်လည်း ဓမ္မအမှုတွင် တိုးချဲ့ပါဝင်ခွင့်ရသည့်အတွက် ပျော်ရွှင်ခဲ့သည်။

သက်သေခံများ မှန်မှန်မရောက်ရှိသော ရပ်ကွက်အတော်များများရှိရာ ဘတ်စကားပေါ်မှလူများနှင့် လုပ်ငန်းကိုင်ငန်းအတွက် သို့မဟုတ် ဈေးဝယ်ရန်အတွက် မြို့သို့သွားသောသူများကို ဟောပြောရန် ကြိုးစားကြသည်။ ဌာနခွဲရုံးက လက်ခံရရှိသောစာတစ်စောင်နှင့် ပတ်သက်သည့် တွေ့ကြုံမှုတစ်ခုကဲ့သို့ ယင်းက ပျော်ရွှင်ဖွယ်အကျိုးများကို ဖြစ်စေသည်။ ကျေးလက်ဒေသရှိ ကျမ်းစာသင်အံမှုတောင်းဆိုသော လူနှစ်ယောက်ထံမှဖြစ်သည်။ သူတို့ထံသို့ သက်သေခံများရောက်ရှိသွားကြသောအခါ ထို “လူများ” သည် အသက် ၁၀ နှစ်နှင့် ၁၁ နှစ်အရွယ်ရှိသူများဖြစ်သည်ကို သိရကြသည်။ သို့သော် ကျမ်းစာသင်အံမှုအစီအစဉ်ကို သူတို့မည်သို့သိရှိခဲ့ကြသနည်း။ ထိုရွာမှလူတစ်ဦးသည် အလုပ်ကိစ္စတစ်ခုအတွက် မြို့သို့တက်လာသည်။ လမ်းပေါ်တွင် သက်သေခံတစ်ဦးနှင့်တွေ့ရာ သက်သေခံက သူ့အား ဝေစာတစ်စောင်နှင့် အခမဲ့ကျမ်းစာသင်အံမှုကမ်းလှမ်းလိုက်သည်။ ထိုသူသည် မိမိရွာသို့ပြန်ရောက်သောအခါ ဝေစာကို အသက် ၁၂ နှစ်အရွယ်ရှိ အိမ်နီးချင်းမိန်းကလေးတစ်ဦးအား ပေးလိုက်ပြီး ကျမ်းစာသင်အံမှုအစီအစဉ်ကို သူမအားပြောပြသည်။ သို့နှင့် မိန်းကလေးက အားတက်သရောစာရေးသော ယောက်ျားလေးနှစ်ယောက်ထံ သတင်းသယ်ဆောင်သွားခဲ့သည်။ ထိုယောက်ျားလေးများ၊ ထိုမိန်းကလေး၊ ထိုလူနှင့် သူ့ကလေးနှစ်ယောက်တို့ဖြင့် ကျမ်းစာသင်အံမှုစတင်ခဲ့သည်။

ငယ်ရွယ်သူများထံမှ ကောင်းသောတုံ့ပြန်မှု

မှန်ပါသည်၊ ငယ်ရွယ်သူများသည် သမ္မာတရားတွင် ကြီးပြင်းလာသူဖြစ်စေ၊ မဟုတ်သူဖြစ်စေ မိမိတို့၏ဘုရားသခင်ဝတ်ပြုရေးကို အလေးအနက်သဘောထားကြသည်။ ဥပမာ၊ တာမာနှင့် သူမ၏ညီမဖြစ်သူ ကေလာတို့သည် အသက် ၁၀ နှစ်တွင် နှစ်ခြင်းခံခဲ့ကြပြီး အသက် ၁၁ နှစ်တွင် အချိန်ပြည့်ရှေ့ဆောင်ဓမ္မအမှုဆောင်ခြင်းသို့ ဝင်ရောက်ခဲ့ကြသည်။ ဝယ်န်ဒီကာရိုလီနာသည် မိမိကိုယ်ကို ရေတွင်နှစ်ခြင်းခံခြင်းအားဖြင့် မိမိကိုယ်ကိုဆက်ကပ်အပ်နှံကြောင်း တင်ပြသောအချိန်တွင် သူမအသက် ၁၂ ရှိပြီး နောက်နှစ်နှစ်ဖြစ်သော ၁၉၈၅ ခုနှစ်တွင် မှန်မှန်ရှေ့ဆောင်စလုပ်သည်။ ယခုသူမသည် ထိရောက်စွာသွန်သင်ပေးသူဖြစ်နေပြီး အချိန်ပြည့်ဓမ္မအမှု၌ မွေ့လျော်လျက်ရှိသည်။ အသက် ၁၀ နှစ်တွင် နှစ်ခြင်းခံပြီး ၁၁ နှစ်တွင် မှန်မှန်ရှေ့ဆောင်လုပ်သော လူငယ်ဟိုဗန်နီးသည် ကျမ်းစာသင်အံမှုလေးခုကို ကျင်းပနေသည်။ တစ်ပတ်နွမ်းစာအုပ်ရောင်းသူထံတွင် ယေဟောဝါသက်သေများထုတ်ဝေသော စာအုပ်ငယ်များရှိသည်ကို အသက်ဆယ်နှစ်ရှိ ရေး ဆိုသူကလေး သိလိုက်သောအခါ ထိုစာအုပ်ကို မိမိအတွက်ဝယ်ပေးရန် မိခင်ဖြစ်သူအား ပူဆာတော့သည်။ ထိုစာအုပ်ကို အစအဆုံးသူဖတ်လိုက်သည်။ နောက်ထပ်ကျမ်းစာစာပေများကို ရှာဖွေလျက် နောက်ဆုံးတွင် ဌာနခွဲရုံးသို့ရောက်သွားသည်။ ယခုအခါ သူသည် အချိန်ပြည့်လုပ်ငန်းတွင် မွေ့လျော်လျက်ရှိပြီး သူ၏မိခင်မှာလည်း ဘုရားသခင့်အမှုတော်ဆောင်လျက်ရှိသည်။

ဤငယ်ရွယ်သူများနှင့် အခြားသောငယ်ရွယ်သူများ ဝိညာဏရေးရာများ၏တန်ဖိုးကို လေးမြတ်တတ်ရန် မည်သည့်အရာက အကူအညီပေးခဲ့သနည်း။ အများအားဖြင့် မိဘတို့၏ တော်လျော်သောလမ်းညွှန်မှုသည် အရေးကြီးသည့်ကဏ္ဍအဖြစ် လုပ်ဆောင်သည်။ ကျောင်းဆရာများဖြစ်သော ဟိုစွေ၏ခရစ်ယာန်မိဘများသည် သူ့အတွက် ယင်းသို့ဖြစ်ခဲ့သည်။ မိမိတို့သားသမီးများထဲမှ အနည်းဆုံးတစ်ယောက်ကို အချိန်ပြည့်ဓမ္မအမှုဆောင်ဖြစ်ရန် အကူအညီပေးဖို့ နယ်လှည့်ကြီးကြပ်မှူးတစ်ယောက်က အကြံပေးသောအခါ ဟိုစွေကို သူတို့အာရုံစိုက်ကြသည်။ လူရည်ချွန်တစ်ဦးဖြစ်သော ဟိုစွေသည် အင်ဂျင်နီယာအတတ်ကိုသင်ယူရန်အတွက် အစိုးရပညာသင်စရိတ်ရခဲ့သည်။ တက္ကသိုလ်တွင် တစ်နှစ်ခွဲကြာသောအခါ ဒိုမီနီကန်သမ္မတနိုင်ငံရှိ ယေဟောဝါသက်သေများ၏ ဌာနချုပ်အဆောက်အအုံများဆောက်လုပ်ရေး စီမံကိန်းတွင် လုပ်ဆောင်ရန် ခေါ်ဖိတ်ခံရသည်။ မိမိတို့၏သားကို ယေဟောဝါ၏လုပ်ငန်းတော်အတွက် ပေးဆက်ရခြင်းကို သူ၏မိဘများက အလွန်ကျေနပ်အားရကြောင်း တင်ပြကြသည်။

အခြားနိုင်ငံမှ “နယ်သစ်ရှာဖွေသူများ”

“စပါးရိတ်စရာများစွာရှိ၏။ ရိတ်သောသူတို့သည် နည်းကြ၏” ဟူသော ယေရှု၏စကားကို ဤဒေသတွင်ရှိသောလယ်ကွင်းနှင့် အမှန်ပင်သက်ဆိုင်စေနိုင်သည်။ (မဿဲ ၉:၃၇) ကြီးမားသောလိုအပ်မှုနှင့် ကောင်းသောတုံ့ပြန်မှုများက အခြားနိုင်ငံမှ သက်သေခံများအား ဤအရပ်တွင် စစ်မှန်သော ခေတ်သစ်ရတနာများ—သမ္မာတရားကို စိတ်ရင်းမှန်ဖြင့်ရှာဖွေသူများရှိသည့် ရပ်ကွက်သစ်များကိုရှာဖွေခြင်းတွင် လာရောက်ပါဝင်ကြရန် လှုံ့ဆော်အားပေးသည်။

အနီးအနားရှိ ပွက်တိုရီကိုကျွန်းမှရောက်ရှိလာခဲ့ကြသော သက်သေခံမိသားစုများသည် ဒိုမီနီကန်သမ္မတနိုင်ငံတွင် ခြားနားသောအရပ်ဒေသများ၌ အမှုဆောင်ခြင်းမှ စစ်မှန်သောကျေနပ်မှုကို ခံစားကြရသည်။ မိသားစုဦးစီးတစ်ဦးက ဤသို့ပြောသည်– “ကိုယ့်ယုံကြည်ခြင်းနဲ့ မျှော်လင့်ခြင်းကို နားထောင်ချင်တဲ့သူတွေကို တင်ပြခွင့်ရတာဟာ သမ္မာတရားကို ရှင်သန်စေတာအမှန်ပဲဖြစ်တယ်!” ဤဒေသရှိလိုအပ်ချက်ကို သိရှိလာသော ဆွီဒင်နိုင်ငံမှ စီစီလီယာနှင့် အမေရိကန်နိုင်ငံမှ နီယာတို့သည် အခြားမြောက်မြားစွာသော အချိန်ပြည့်ရှေ့ဆောင်လူငယ်များနှင့် လာရောက်ပူးပေါင်းကြသည်။ နိုင်ငံအတွင်းတွင် မြေမျက်နှာပြင်မြင့်ပြီး ရာသီဥတုကောင်းမွန်သော ဒေသများတွင် သူတို့အမှုဆောင်ကြသည်။ အလားတူ အေးစိမ့်သောထင်းရှူးတောများ ဖုံးလွှမ်းနေသည့်တောင်များပေါ်တွင် အမေရိကန်နိုင်ငံမှ ပြန်လာသော ဒိုမီနီကန်မိသားစုတစ်စုနှင့်အတူ ကနေဒီယန်မိသားစုနှစ်စုတို့ နေကြသည်။ သူတို့သည် အသင်းတော်ငယ်ကလေးတစ်ခု၏ အစိတ်အပိုင်းဖြစ်ကြပြီး ယေဟောဝါသက်သေများ၏ လည်ပတ်ခြင်းမခံရသည်မှာ ဆယ်နှစ်ကြာပြီဖြစ်သော လူများထံသို့ ရောက်ရှိနိုင်ကြသည်။

အာလ်ဖရေဒိုနှင့် လူးရ်ဒက်စ်တို့သည် သူတို့၏ကလေးငါးယောက်နှင့်အတူ နယူးယောက်မြို့မှ ပြန်လာခဲ့ကြပြီး လှပသော ကမ္ဘာလှည့်ခရီးစဉ်ဆိပ်ကမ်းမြို့တစ်မြို့ရှိ အသင်းတော်ငယ်ကလေးတစ်ခုနှင့်ပေါင်းသည်။ စိတ်နှလုံးရိုးသားသူများကို ရှာဖွေခြင်းနှင့် အသင်းတော်ကြီးမားတိုးတက်အောင် ကူညီပေးခြင်းတို့တွင် ပါဝင်နိုင်ကြသည့်အတွက် သူတို့အလွန်ဝမ်းသာကြသည်။ ဩစတြီးယားမှ ကွန်ပျူတာပညာရှင် ရိုးလန့်နှင့် သူ၏ဇနီးဖြစ်သူယူတာတို့သည် နိုင်ငံ၏ ပူအိုက်ခြောက်သွေ့သော တောင်ပိုင်းဒေသတွင် အခြေချကြသည်။ သူတို့ရောက်ရှိချိန်မှစ၍ အသင်းတော်သစ်တစ်ခုပေါ်ပေါက်လာသည်ကို တွေ့ရ၍ သူတို့ရွှင်လန်းကြသည်။ ထိုအနီးအနားမြို့တစ်မြို့ရှိ ရှေ့ဆောင်ညီအစ်မသုံးဦးနှင့် ကယ်လီဖိုးနီးယားမှ မောင်နှံတစ်စုံပါဝင်သည့်အုပ်စုက သူတို့သည် ကျမ်းစာသင်ပေးရန် တောင်းဆိုခံရခြင်း အလွန်များလွန်းလှရကား အားလုံးမလုပ်ပေးနိုင်လောက်အောင်ပင်ဖြစ်ကြောင်း သတင်းပို့ကြသည်။ ထို့ကြောင့် ဒေသန္တရခန်းမတွင် အစည်းအဝေးများတက်ရောက်ပြီး အလှည့်ကျဇယားတွင် ကျမ်းစာသင်အံမှုအတွက် အမည်သွင်းရန် စိတ်ဝင်စားသူများကို တိုက်တွန်းကြသည်။ ယူတာ၏မောင်ဖြစ်သူ ရှတယ်ဖန်သည် အရှေ့မြောက်ဘက် စာမာနာခေါ် လှပသောမြို့ကလေးတစ်မြို့ရှိ အသင်းတော်ငယ်ကလေးတစ်ခုတွင် သစ္စာရှိစွာအမှုဆောင်လျက်ရှိသည်။ နှစ်နှစ်အတွင်း ထိုအသင်းတော်၏ ကြေညာသူအရေအတွက်သည် နှစ်ဆတိုးပွားလာခဲ့သည်။

ထိုသူတို့နှင့် အကူအညီပေးရန် ရောက်ရှိလာကြသော အခြားသူများတင်ပြကြသည့် မေတ္တာနှင့်ဇွဲတို့သည် အမှန်ပင်ချီးမွမ်းဖွယ်ရာဖြစ်သည်။ စိန်ခေါ်မှုကို သူတို့လက်ခံကြပြီး ခြားနားသည့်ယဉ်ကျေးမှုနှင့် ထုံးစံဓလေ့တို့ရှိရာဒေသများတွင် ပြောင်းရွှေ့နေထိုင်ကြရုံမျှမက အများအားဖြင့် သိုးကဲ့သို့သောသူများ၏ ဝိညာဏလိုအပ်ရာများကို ဖြည့်စွက်ပေးနိုင်ရန် ဘာသာစကားအသစ်များကို သင်ယူကြသည်။ သူတို့၏ကြိုးစားအားထုတ်မှုများက ဒေသခံများ၏ အပြုသဘောဖြင့်တုံ့ပြန်မှုကို ဖြစ်ပေါ်စေသည်။

အချို့ဒိုမီနီကန်မိသားစုများသည် မြို့ကြီးပြကြီးများရှိ သူတို့၏စည်းစိမ်ချမ်းသာများကို စွန့်လွှတ်ပြီး ကျေးလက်ဒေသများတွင် ပြောင်းရွှေ့နေထိုင်ကြသည်။ သူတို့အားလုံးသည် စိတ်ရင်းမှန်ဖြင့် သမ္မာတရားရှာသူများဖြစ်သည့် ရတနာအစစ်အမှန်များကို ရှာဖွေတွေ့ရှိခြင်းအားဖြင့် ခံစားရသောရွှင်လန်းမှုကို ဆုလာဘ်အဖြစ်ရရှိကြသည်။

၁၅ ရာစုက ရတနာရှာဖွေသူများသည် ကောင်းချီးများကိုမဟုတ်ဘဲ အချုပ်အနှောင်နှင့် မရေမတွက်နိုင်သော ဆင်းရဲဒုက္ခများကို တိုင်နိုတိုင်းရင်းသားများထံ ယူဆောင်လာခဲ့ကြသည်။ ကိုလန်ဘတ်ကိုယ်တိုင် အနောက်ကမ္ဘာလုံးခြမ်းမှ ရတနာများအားဖြင့် အကျိုးမခံစားခဲ့ရပါ။ နောက်ဆုံးတွင် သူအဖမ်းခံရပြီး သူရှာဖွေတွေ့ရှိသည့်ကျွန်းမှ နှင်ထုတ်ခံရကာ အကျဉ်းသားဘဝဖြင့် စပိန်သို့ပြန်ပို့ခြင်းခံရသည်။

ယနေ့ ခြားနားသောစူးစမ်းရှာဖွေမှုသည် ဆက်လက်ဖြစ်ပေါ်နေပြီး သာ၍အဖိုးထိုက်သောရတနာများကို ရှာဖွေတွေ့ရှိသည်။ ယေဟောဝါ၏လူများသည် ဘုရားသခင့်နိုင်ငံတော်သတင်းကောင်းကို အရိုးခံစိတ်ဖြင့်တုံ့ပြန်သူများကို ရှာဖွေခြင်းတွင် အလုပ်များနေကြသည်။ ရလဒ်ကား အစဉ်တစိုက်တိုးတက်နေသော လူအုပ်ကြီးသည် ဘုရားသခင့်နှုတ်ကပါဌ်တော်ကသာ ပေးစွမ်းနိုင်သော လွတ်လပ်မှု၌ မွေ့လျော်နေကြခြင်းပင်ဖြစ်သည်။ (ယောဟန် ၈:၃၂) ဤတောင်တန်းများ၊ ရေတံခွန်များ၊ လှပသောကမ်းခြေများနှင့် ဆွဲဆောင်မှုရှိသောကျောက်ဂူများသည် ကျွန်း၏အလှအပတစ်ခုမျှသာမက မြေကြီးတစ်ခွင်လုံးကိုလွှမ်းခြုံမည့် ကမ္ဘာသစ်၏ အစိတ်အပိုင်းတစ်ခုလည်း ဖြစ်လာမည့်အချိန်ကို သူတို့စောင့်မျှော်ကြသည်။—၂ ပေတရု ၃:၁၃။

[အောက်ခြေမှတ်ချက်များ]

[စာမျက်နှာ ၂၄ ပါ မြေပုံ]

(ကားချပ်အပြည့်အစုံကို စာစောင်တွင်ကြည့်ပါ)

ဒိုမီနီကန် သမ္မတနိုင်ငံ

[စာမျက်နှာ ၂၄၊ ၂၅ ပါ ရုပ်ပုံ]

လူငယ်များသည် အချိန်ပြည့်လုပ်ငန်းတော်ကို လုပ်ဆောင်နေကြခြင်းအားဖြင့် ဝိညာဏအရာများ၏တန်ဖိုးကို ရှာဖွေတွေ့ရှိကြသည်