ဘုရားသခင်၏ အစောပိုင်းကျေးကျွန်များဘောင်တွင် အမျိုးသမီးများ၏ သိက္ခာရှိသောအခန်းကဏ္ဍ

“ယေဟောဝါဘုရားသခင်ကလည်း ‘ယောက်ျားသည် တစ်ယောက်တည်းမနေကောင်း၊ သူ၏ဖြည့်ဖက်အဖြစ် အထောက်အမကို သူ့အဖို့ ငါလုပ်ဦးမည်’ ဟုမိန့်တော်မူ၏။”—ကမ္ဘာဦး ၂:၁၈၊ ကဘ။

၁ ရှေးခေတ်ကအမျိုးသမီးများ၏အဖြစ်ကို သမ္မာကျမ်းစာအဘိဓာန်ကျမ်းတစ်စောင်က မည်သို့ဖော်ပြထားသနည်း။

“မျက်မှောက်ခေတ်အနောက်တိုင်းလူ့အဖွဲ့အစည်းများတွင်ကဲ့သို့ ရှေးမြေထဲပင်လယ်ဒေသ၌လည်းကောင်း၊ အရှေ့အနီးပိုင်းဒေသ၌လည်းကောင်း အမျိုးသမီးများသည် လွတ်လပ်ခွင့်ကို မရကြချေ။ ယေဘုယျပုံစံမှာ ကျွန်သည် လူလွတ်အောက်၊ လူငယ်သည် လူကြီးအောက် . . . အဆင့်နိမ့်သည်နည်းတူ အမျိုးသမီးတို့သည် အမျိုးသားအောက် အဆင့်နိမ့်သူဖြစ်သည်။ ယောက်ျားကလေးများကို မိန်းကလေးများထက် ပါစားပေးပြီး တစ်ခါတစ်ရံ ရင်ခွင်ပိုက်မိန်းကလေးများအား ဆုံးပါးသွားစေရန် ပစ်စလက်ခတ်ထားတတ်ကြသည်။” ရှေးခေတ်ကအမျိုးသမီးများ၏အဖြစ်ကို ကျမ်းစာအဘိဓာန်ကျမ်းတစ်စောင်က ထိုသို့ဖော်ပြထားပါသည်။

၂၊ ၃။ (က) ပြန်တမ်းတစ်ခုအရ ယနေ့ အမျိုးသမီးအများ၏ အခြေအနေကား အဘယ်နည်း။ (ခ) အဘယ်မေးခွန်းများ ပေါ်ပေါက်လာသနည်း။

^၂ ယနေ့ ကမ္ဘာ့ဒေသများစွာတွင် ယင်းအခြေအနေသည် သိပ်မထူးခြားပါ။ ၁၉၉၄ ခုနှစ်တွင် ယူ. အက်စ်. ပြည်ထဲရေးဌာန၏ နှစ်ပတ်လည် လူ့အခွင့်အရေးပြန်တမ်းက အမျိုးသမီးများအား ပြုမူဆက်ဆံခြင်းကို ပထမဆုံးအကြိမ်အနေနှင့် အာရုံပြုခဲ့သည်။ “၁၉၃ နိုင်ငံမှအချက်အလက်များက နေ့စဉ်နေ့တိုင်း ခွဲခြားဆက်ဆံခံရခြင်းသည် ဖြစ်မြဲဖြစ်နေကြောင်း ဖော်ပြသည်” ဟုထိုပြန်တမ်းနှင့်စပ်လျဉ်းသည့် နယူးယောက်တိုင်းမ်စ်ခေါင်းစည်းတစ်ခုကဆိုသည်။

^၃ ကမ္ဘာချီ ယေဟောဝါလူများ၏ အသင်းတော်များတွင် ယဉ်ကျေးမှုနောက်ခံအမျိုးမျိုးရှိ အမျိုးသမီးမြောက်မြားစွာ ပေါင်းသင်းနေကြသည့်အတွက် မေးခွန်းအချို့ ပေါ်ပေါက်လာသည်– “အထက်တွင်ဖော်ပြသော ပြုမူဆက်ဆံမှုမျိုးသည် အမျိုးသမီးများနှင့်စပ်လျဉ်း၍ အစကနဦးတွင် ဘုရားသခင်ရည်ရွယ်ထားသည့် ပြုမူဆက်ဆံမှုမျိုး ဖြစ်ပါသလော။ သမ္မာကျမ်းစာခေတ်က ယေဟောဝါကိုကိုးကွယ်သူများအလယ်တွင် အမျိုးသမီးများကို မည်သို့ပြုမူဆက်ဆံခဲ့သနည်း။ ယနေ့ အမျိုးသမီးများကို မည်သို့ပြုမူဆက်ဆံသင့်သနည်း။

“အထောက်အမ” နှင့် “ဖြည့်ဖက်”

၄။ ဧဒင်ဥယျာဉ်တွင် ပထမလူယောက်ျားသည် အတန်ကြာ တစ်ယောက်တည်းရှိပြီးနောက် ယေဟောဝါသည် အဘယ်အရာကိုသတိပြုတော်မူသနည်း။ ထို့နောက် ဘုရားသခင် အဘယ်အမှုကိုပြုတော်မူသနည်း။

^၄ ဧဒင်ဥယျာဉ်တွင် အာဒံသည် အတန်ကြာ တစ်ယောက်တည်းရှိပြီးနောက် ယေဟောဝါက ဤသို့သတိပြုမိသည်– “ယောက်ျားသည် တစ်ယောက်တည်းမနေကောင်း၊ သူ၏ဖြည့်ဖက်အဖြစ် အထောက်အမကို သူ့အဖို့ ငါလုပ်ဦးမည်။” (ကမ္ဘာဦး ၂:၁၈၊ ကဘ) အာဒံသည် စုံလင်သောယောက်ျားတစ်ဦးဖြစ်သော်လည်း ဖန်ဆင်းရှင်၏ရည်ရွယ်ချက်ကို ပြုမူဆောင်ရွက်ရန် အခြားအရာတစ်ခု လိုအပ်နေသည်။ ထိုလိုအပ်ချက်ကိုဖြည့်စွက်ပေးရန် ယေဟောဝါသည် လူမိန်းမကိုဖန်ဆင်းပြီး ပထမဦးဆုံးမင်္ဂလာပွဲကို ကျင်းပတော်မူခဲ့သည်။—ကမ္ဘာဦး ၂:၂၁-၂၄။

၅။ (က) “အထောက်အမ” ဟုပြန်ဆိုသည့် ဟေဗြဲနာမ်ကို ကျမ်းရေးသူများက မည်သို့အသုံးပြုလေ့ရှိသနည်း။ (ခ) ပထမလူမိန်းမအား ယေဟောဝါက “ဖြည့်ဖက်” ဟုခေါ်ဆိုခြင်းသည် အဘယ်အရာကို တင်ပြသနည်း။

^၅ “အထောက်အမ” နှင့် “ဖြည့်ဖက်” ဟူသောစကားလုံးများက အမျိုးသမီး၏ ဘုရားပေးအခန်းကဏ္ဍသည် နိမ့်ကျသည်ဟု ဖော်ညွှန်းသလော။ ထိုသို့လုံးဝမဟုတ်ပါ။ ကျမ်းရေးသူများက “အထောက်အမ” ဟုပြန်ဆိုသည့် ဟေဗြဲနာမ် (အီဇာ) ကိုဘုရားသခင်နှင့်စပ်လျဉ်း၍ အသုံးပြုလေ့ရှိသည်။ ဥပမာ၊ ယေဟောဝါသည် “ငါတို့၏အမအစ၊ ငါတို့၏ဒိုင်းလွှားဖြစ်တော်မူ” ကြောင်း ထင်ရှားတော်မူသည်။ (ဆာလံ ၃၃:၂၀၊ သမ္မာ; ထွက်မြောက်ရာ ၁၈:၄; တရားဟောရာ ၃၃:၇) ဟောရှေ ၁၃:၉ (သမ္မာ) တွင် ယေဟောဝါသည် ကိုယ်ကိုယ်တိုင်အား ဣသရေလလူမျိုး၏ ‘မစရှင်’ အဖြစ်ပင်ရည်ညွှန်းတော်မူသည်။ “ဖြည့်ဖက်” ဟူ၍ပြန်ဆိုထားသည့် ဟေဗြဲစကားလုံး (နီဂဲဒ်) နှင့်ပတ်သက်၍မူ ကျမ်းပညာရှင်တစ်ဦးက ဤသို့ရှင်းပြသည်– “မိမိ၏နေ့စဉ်လုပ်ငန်းဆောင်တာ သို့မဟုတ် သားသမီးမွေးဖွားရေးအတွက်သာ အထောက်အမရရန် အကူအညီယူခြင်းမျှမဟုတ်ဘဲ . . . ပေါင်းဖော်ခြင်းမှ အပြန်အလှန်ရရှိသော ထောက်မမှုဖြစ်သည်။”

၆။ လူမိန်းမကိုဖန်ဆင်းပြီးနောက် အဘယ်စကားကို ပြောဆိုတော်မူသနည်း။ အဘယ်ကြောင့်နည်း။

^၆ ယင်းကြောင့် အမျိုးသမီးအား “အထောက်အမ” နှင့် “ဖြည့်ဖက်” ဟူ၍ ယေဟောဝါဖော်ပြရာတွင် နိမ့်ကျသည်ဟု ယူမှတ်စရာအကြောင်း လုံးလုံးမရှိပါ။ အမျိုးသမီးတွင် ကိုယ်ပိုင်ထူးခြားသောဉာဏ်ရည်၊ စိတ်လှုပ်ရှားမှုနှင့် ကာယဖွဲ့စည်းပုံရှိသည်။ သူမသည် ယောက်ျားအတွက် သင့်တော်သောတွဲဖက်ဖြစ်သည်။ တစ်ဦးနှင့်တစ်ဦးမတူသော်လည်း ဖန်ဆင်းရှင်၏ရည်ရွယ်ချက်နှင့်အညီ “မြေကြီးကိုပြည့်စေ” ရန် တစ်ဦးနှင့်တစ်ဦးတွဲဖက်ပြုလုပ်ဖို့လိုအပ်သည်။ လူယောက်ျား၊ လူမိန်းမ နှစ်ဦးစလုံးကိုဖန်ဆင်းပြီးနောက်၌ “ဘုရားသခင်သည် မိမိဖန်ဆင်းသမျှသောအရာတို့ကို ကြည့်ရှုလျှင် အလွန်ကောင်းသည်ကို မြင်တော်မူ” ကြောင်းထင်ရှားသည်။—ကမ္ဘာဦး ၁:၂၈၊ ၃၁။

၇၊ ၈။ (က) ဧဒင်တွင် အပြစ်ဝင်လာသည့်အခါ အမျိုးသမီး၏အခန်းကဏ္ဍသည် မည်သို့ဖြစ်သွားသနည်း။ (ခ) ကမ္ဘာဦး ၃:၁၆ ပြည့်စုံခြင်းနှင့်စပ်လျဉ်း၍ ယေဟောဝါကိုကိုးကွယ်သူများအလယ်တွင် အဘယ်မေးခွန်းများ ပေါ်ပေါက်လာသနည်း။

^၇ အပြစ်ဝင်လာသည့်အခါ လူယောက်ျား၊ လူမိန်းမအတွက် အခြေအနေပြောင်းလဲသွားပါသည်။ အပြစ်သားများဖြစ်ကြသောကြောင့် ယေဟောဝါသည် သူတို့နှစ်ဦးစလုံးကို အပြစ်ဒဏ်စီရင်တော်မူသည်။ ဧဝအား ယေဟောဝါက “သင်၌ကိုယ်ဝန်ဆောင်ခြင်းဝေဒနာကို ငါအလွန်များပြားစေမည်” ဟုမိန့်တော်မူရာတွင် ကိုယ်တော်ခွင့်ပြုသောဖြစ်တန်ရာသည့်ကိစ္စကို ကိုယ်တော်တိုင်ပြုဘိသကဲ့သို့ မိန့်ဆိုတော်မူခဲ့၏။ ကိုယ်တော်က ဤသို့ထပ်ဆင့်သည်– “ပင်ပန်းစွာဝေဒနာကိုခံ၍ သားဖွားရမည်။ ကိုယ်ခင်ပွန်း၏အလိုသို့လိုက်၍ သူ၏အုပ်စိုးခြင်းကိုလည်း ခံရမည်။” (ကမ္ဘာဦး ၃:၁၆) ထိုအချိန်ကတည်းက အမျိုးသမီးအမြောက်အမြားသည် အမျိုးသားများ၏ ရက်စက်စွာ အုပ်စိုးခြင်းခံကို ကြိမ်ဖန်များစွာခံခဲ့ရပြီ။ အထောက်အမများနှင့် ဖြည့်ဖက်များအဖြစ် တန်ဖိုးထားခံရမည့်အစား သူတို့သည် များသောအားဖြင့် အစေခံများ၊ ကျွန်များအဖြစ် ဆက်ဆံခံကြရသည်။

^၈ သို့သော် ယေဟောဝါကိုကိုးကွယ်သူ အမျိုးသမီးများအတွက် ကမ္ဘာဦး ၃:၁၆ ပြည့်စုံခြင်းက အဘယ်အဓိပ္ပာယ်ရှိသနည်း။ သူတို့အား ခယဝပ်တွားရသော၊ နိမ့်ကျသောနေရာသို့ ပယ်ထုတ်လိုက်ပါသလော။ ဝေးလေစွ! သို့သော် ယနေ့ လူ့အဖွဲ့အစည်းအချို့တွင် လက်သင့်မခံနိုင်ပုံရှိသည့် အမျိုးသမီးများနှင့်ဆိုင်သော ထုံးစံနှင့်အကျင့်များအကြောင်းကိုဖော်ပြသည့် ကျမ်းစာမှတ်တမ်းများကို မည်သို့ဆိုမည်နည်း။

သမ္မာကျမ်းစာဆိုင်ရာထုံးစံများကို သိရှိနားလည်ခြင်း

၉။ ကျမ်းစာခေတ်က အမျိုးသမီးများနှင့်စပ်လျဉ်းသော ထုံးစံများကို သုံးသပ်သည့်အခါ အဘယ်အချက်သုံးချက်ကို စွဲမှတ်ထားသင့်သနည်း။

^၉ ကျမ်းစာခေတ်ကဘုရားသခင့်ကျေးကျွန်တို့ဘောင်တွင် အမျိုးသမီးများကို ကောင်းစွာပြုမူဆက်ဆံသည်။ မှန်ပါသည်၊ ထိုစဉ်ကအမျိုးသမီးများနှင့်ပတ်သက်သော ထုံးစံဓလေ့များကို ဆင်ခြင်သုံးသပ်ရာတွင် အချက်အလက်အချို့ကို စွဲမှတ်ထားခြင်းသည် အကူအညီဖြစ်မည်။ ဦးဆုံး၊ အတ္တဆန်သောအပြစ်သားများ၏ ကြီးစိုးမှုကြောင့် ဖြစ်ပေါ်လာသည့် စိတ်မချမ်းသာစရာအခြေအနေများအကြောင်းကို ကျမ်းစာက တင်ပြသည့်အတွက် အမျိုးသမီးများအား ထိုသို့ပြုမူဆက်ဆံခြင်းကို ဘုရားသခင်ထောက်ခံသည်ဟု သဘောမသက်ရောက်ပါ။ ဒုတိယ၊ ယေဟောဝါသည် မိမိကျေးကျွန်များ၏ထုံးစံအချို့ကို အတန်ကြာခွင့်ပြုထားတော်မူသည်မှန်သော်လည်း အမျိုးသမီးများအတွက် အကာအကွယ်ဖြစ်စေရန် ယင်းတို့ကိုထိန်းချုပ်ပေးတော်မူသည်။ တတိယ၊ ရှေးခေတ်ထုံးစံများကို မျက်မှောက်ခေတ်စံနှုန်းများအတိုင်း အကဲမဖြတ်မိရန် သတိပြုရမည်။ ယနေ့ လူအချို့လက်မခံနိုင်သော ထုံးစံအချို့ကို ရှေးခေတ်ကအမျိုးသမီးများက နိမ့်ကျသည်ဟု ယူမှတ်ချင်မှယူမှတ်မည်။ ဥပမာအချို့ကို သုံးသပ်ကြည့်ကြစို့။

၁၀။ လင်ပြိုင်၊ မယားပြိုင်ဓလေ့ကို ယေဟောဝါ မည်သို့ယူမှတ်သနည်း။ ကိုယ်တော်သည် မိမိ၏ မူလ တစ်လင်တစ်မယားစံနှုန်းကို တစ်ခါမျှစွန့်လွှတ်တော်မမူကြောင်း အဘယ်အချက်က ဖော်ပြသနည်း။

^၁၀ မယားပြိုင်၊ လင်ပြိုင်ဓလေ့–a ယေဟောဝါ၏အစကနဦးရည်ရွယ်ချက်အတိုင်းဆိုလျှင် ဇနီးသည်တစ်ဦးသည် သူမ၏လင်ယောက်ျားကို အခြားအမျိုးသမီးတစ်ဦးနှင့်အတူ ပေါင်းဖက်မည်မဟုတ်ပါ။ ဘုရားသခင်သည် အာဒံအတွက် မိန်းမတစ်ယောက်တည်းကိုသာ ဖန်ဆင်းပေးတော်မူခဲ့သည်။ (ကမ္ဘာဦး ၂:၂၁၊ ၂၂) ဧဒင်၌ ပုန်ကန်မှုဖြစ်ပြီးနောက် မယားပြိုင်ထားသည့်အကျင့်သည် ကာဣန၏ဆွေစဉ်မျိုးဆက်တွင် ဦးဆုံးပေါ်ပေါက်လာသည်။ ယင်းသည် တဖြည်းဖြည်းထုံးစံဓလေ့တစ်ခုဖြစ်လာပြီး ယေဟောဝါကိုကိုးကွယ်သူအချို့ပါ ကျင့်ကြံပြုမူကြလေတော့သည်။ (ကမ္ဘာဦး ၄:၁၉; ၁၆:၁-၃; ၂၉:၂၁-၂၈) မယားပြိုင်ဓလေ့ကို ယေဟောဝါခွင့်ပြု၍ ယင်းကြောင့် ဣသရေလလူမျိုး၏လူဦးရေ တိုးများလာသည်မှန်သော်လည်း အမျိုးသမီးများကိုထောက်ထားညှာတာစွာဖြင့် ယင်းအကျင့်ကို စည်းကမ်းသတ်မှတ်၍ထိန်းချုပ်ပေးတော်မူသည်။ ဤသို့အားဖြင့် ဇနီးသည်များနှင့် သားသမီးများပါ အကာအကွယ်ရရှိမည်ဖြစ်သည်။ (ထွက်မြောက်ရာ ၂၁:၁၀၊ ၁၁; တရားဟောရာ ၂၁:၁၅-၁၇) ထို့ပြင် ယေဟောဝါသည် မိမိ၏ မူလ တစ်လင်တစ်မယားစံနှုန်းကို တစ်ခါမျှစွန့်လွှတ်တော်မမူချေ။ “များပြားစွာမွေးဖွားလျက် မြေကြီးကိုပြည့်စေ” ရန်အမိန့် ထပ်မံပေးခံရသော နောဧနှင့်သူ၏သားများသည် တစ်လင်တစ်မယားသာပေါင်းဖက်သူများ ဖြစ်ကြသည်။ (ကမ္ဘာဦး ၇:၇; ၉:၁; ၂ ပေတရု ၂:၅) ဘုရားသခင်သည် ဣသရေလလူမျိုးနှင့် ကိုယ်တော်တိုင်၏ဆက်ဆံရေးကို တင်စားဖော်ပြရာတွင် ကိုယ်တော်တိုင်အား တစ်လင်တစ်မယားသာရှိသော လင်ယောက်ျားအဖြစ် ပုံဆောင်ဖော်ပြတော်မူသည်။ (ဟေရှာယ ၅၄:၁၊ ၅) ထို့ပြင် ဘုရားသခင်၏ တစ်လင်တစ်မယား မူလစံနှုန်းကို ယေရှုခရစ်ပြန်လည်တည်ထောင်ကာ အစောပိုင်းခရစ်ယာန်အသင်းတော်တွင် ကျင့်သုံးခဲ့သည်။—မဿဲ ၁၉:၄-၈; ၁ တိမောသေ ၃:၂၊ ၁၂။

၁၁။ သမ္မာကျမ်းစာခေတ်က ကွမ်းဖိုးအဘယ်ကြောင့်ပေးခဲ့ကြရသနည်း။ ယင်းက အမျိုးသမီးများကို နိမ့်ကျစေသလော။

^၁၁ ကွမ်းဖိုးပေးခြင်း– ရှေးခေတ်ဣသရေလနိုင်ငံ—ယင်း၏နေမှုထိုင်ပုံနှင့် ဖွဲ့စည်းတည်ဆောက်ပုံဟူသောစာအုပ်က ဤသို့ဆိုသည်– “ငွေတန်ရာတန်ကြေး သို့မဟုတ် ယင်းနှင့်ညီမျှရာကို မိန်းကလေး၏မိသားစုအား ပေးရခြင်းက ဣသရေလပြည်သားတစ်ဦး အိမ်ထောင်မှုပြုခြင်းသည် ဝယ်ယူခြင်းအသွင်ရှိသည်။ သို့သော် [ကွမ်းဖိုးပေးခြင်း] ကအမျိုးသမီးအတွက် အခငွေပေးခြင်းထက် မိသားစုအား လျော်ကြေးပေးခြင်းအဓိပ္ပာယ်သက်ရောက်သည်။” (ကျွန်ုပ်တို့စာလုံးစောင်းထား။) ထို့ကြောင့် ကွမ်းဖိုးပေးခြင်းအားဖြင့် ထိုအမျိုးသမီး၏မိသားစုကုန်ကျခဲ့သမျှအတွက်သာမက သူမ၏လုပ်အားကို ဆုံးရှုံးရတော့မည်ဖြစ်၍ ယင်းအတွက်လျော်ကြေးပေးခြင်းဖြစ်သည်။ ယင်းကြောင့် အမျိုးသမီးကို နှိမ်မည့်အစား သူမ၏မိသားစုတွင် သူမသည် တန်ဖိုးရှိသူတစ်ဦးဖြစ်ကြောင်းကို အသိအမှတ်ပြုခြင်းဖြစ်သည်။—ကမ္ဘာဦး ၃၄:၁၁၊ ၁၂; ထွက်မြောက်ရာ ၂၂:၁၆; ၁၉၉၀၊ ဇန်နဝါရီ ၁၅၊ ကင်းမျှော်စင်၊ စာမျက်နှာ ၂၃-၆ ရှု။

၁၂။ (က) ကျမ်းစာတွင် အိမ်ထောင်ရှင်နှင့်အိမ်ရှင်မများကို တစ်ခါတစ်ရံ မည်သို့ဖော်ပြသနည်း။ ယင်းစကားရပ်များသည် အမျိုးသမီးများ ဗွေယူစရာဖြစ်ခဲ့သလော။ (ခ) ဧဒင်တွင် ယေဟောဝါအသုံးပြုခဲ့သော စကားရပ်များနှင့်စပ်လျဉ်း၍ အဘယ်ထူးခြားချက်ရှိသနည်း။ (အောက်ခြေမှတ်ချက်ကိုရှု။)

^၁၂ “ပိုင်ရှင်များ” အဖြစ်လင်ယောက်ျားများ– ဘီ. စီ. အီး. ၁၉၁၈ ခုနှစ်ခန့်တွင် အာဗြဟံနှင့်စာရာခေတ်၌ အိမ်ထောင်သည်ယောက်ျားအား “ပိုင်ရှင်” (ဟေဗြဲ၊ ဘဲယာလ်) အဖြစ်၊ အိမ်ထောင်သည်မိန်းမအား ‘ပိုင်ရှင်ရှိသူ’ (ဟေဗြဲ၊ ဗျူလာ) အဖြစ်ယူမှတ်ကြကြောင်း သူတို့အသက်တာတွင် ဖြစ်ပျက်ခဲ့သော အဖြစ်အပျက်တစ်ခုက ထင်ရှားစေသည်။ (ကမ္ဘာဦး ၂၀:၃) ဤအသုံးအနှုန်းများကို ကျမ်းစာတွင် နောက်ပိုင်း၌ ဆက်အသုံးပြုထားသည်ဖြစ်၍ ခရစ်ယာန်ခေတ်မတိုင်မီက အမျိုးသမီးများသည် ယင်းတို့ကိုဗွေယူသည်ဟူ၍ မတွေ့ရပါ။b(တရားဟောရာ ၂၂:၂၂) သို့သော် ဇနီးသည်များအား ပစ္စည်းပစ္စယများကဲ့သို့ ပြုမူဆက်ဆံကြရန်မဟုတ်ပါ။ ပစ္စည်းဥစ္စာ သို့မဟုတ် စည်းစိမ်ချမ်းသာကို ဝယ်ယူရောင်းချနိုင်ရုံမက အမွေပင်ခံယူနိုင်ပါသည်။ သို့သော် အမျိုးသမီးတစ်ဦးကိုကား ထိုသို့မပြုနိုင်ချေ။ “အိမ်နှင့်စည်းစိမ်သည် မိဘအမွေဥစ္စာဖြစ်၏။ သမ္မာသတိရှိသောမယားမူကား ထာဝရဘုရားပေးသနားတော်မူရာဖြစ်၏” ဟုကျမ်းစာပညာရှိစကားတစ်ခွန်းကဆိုသည်။—သု. ၁၉:၁၄; တရားဟောရာ ၂၁:၁၄။

သိက္ခာရှိအခန်းကဏ္ဍ

၁၃။ ဘုရားသခင်ကိုကြောက်ရွံ့သောယောက်ျားများသည် ယေဟောဝါ၏ပုံသက်သေကိုတုပကာ ကိုယ်တော်၏ပညတ်ကိုလိုက်နာကြသည့်အခါ အမျိုးသမီးများအတွက် အဘယ်အကျိုးရှိသနည်း။

^၁၃ ထိုသို့ဆိုလျှင် ခရစ်ယာန်ခေတ်မတိုင်မီက ဘုရားသခင်၏ကျေးကျွန်များဘောင်တွင် အမျိုးသမီးများ၏ အခန်းကဏ္ဍကား အဘယ်နည်း။ သူတို့အား မည်သို့ယူမှတ်ပြီး ပြုမူဆက်ဆံခဲ့ကြသနည်း။ ရိုးရိုးဖော်ပြရလျှင် ဘုရားသခင်ကိုကြောက်ရွံ့သောယောက်ျားများသည် ယေဟောဝါ၏ပုံသက်သေကိုတုပကာ ကိုယ်တော်၏ပညတ်ကိုလိုက်နာကြသည့်အခါ အမျိုးသမီးများသည် ဂုဏ်အသရေရှိပြီး အခွင့်အရာနှင့်အခွင့်ထူးများစွာ ခံစားကြရသည်။

၁၄၊ ၁၅။ ဣသရေလနိုင်ငံတွင် အမျိုးသမီးများသည် လေးစားခံရကြောင်း အဘယ်အရာက ဖော်ပြသနည်း။ ယေဟောဝါကိုကိုးကွယ်သူ အမျိုးသားများသည် အမျိုးသမီးများကို လေးစားလိမ့်မည်ဟု ကိုယ်တော်အဘယ်ကြောင့် မျှော်လင့်နိုင်သနည်း။

^၁၄ အမျိုးသမီးများကို လေးစားရမည်ဖြစ်သည်။ ဖခင်နှင့်မိခင် နှစ်ဦးစလုံးကို ရိုသေလေးစားရမည်ဟု ဣသရေလလူမျိုးအား ဘုရားသခင်ပေးသည့်ပညတ်က မိန့်မှာသည်။ (ထွက်မြောက်ရာ ၂၀:၁၂; ၂၁:၁၅၊ ၁၇) “လူတိုင်းကိုယ်မိဘကို ကြောက်ရွံ့ရိုသေရမည်” ဟု ဝတ်ပြုရာ ၁၉:၃ (ကဘ) ကဆိုသည်။ သားရှောလမုန်ကို ဗေသရှေဘသွားတွေ့ချိန်တွင် “ရှင်ဘုရင်သည် မယ်တော်ကိုခရီးဦးကြိုပြုအံ့သောငှာ ထ၍ဦးချ” ပြီးအရိုအသေပေးခဲ့သည်။ (၃ ဓမ္မရာဇဝင် ၂:၁၉) ဂျူဒေးယကားစွယ်စုံကျမ်းက ဤသို့ဆိုသည်– “ဣသရေလလူမျိုးအပေါ် ဘုရားသခင်ထားရှိသောချစ်ခြင်းကို ဇနီးသည်အပေါ် လင်သားတစ်ဦးထားရှိသောချစ်ခြင်းနှင့် ပရောဖက်ပြုနှိုင်းယှဉ်ခြင်းတို့ကို အမျိုးသမီးများအား လေးစားသည့် လူ့အဖွဲ့အစည်းတွင်သာ ပြုလုပ်နိုင်သည်။”

^၁၅ ယေဟောဝါသည် မိမိကိုကိုးကွယ်သူ အမျိုးသားများအား အမျိုးသမီးများကို လေးစားစေလိုတော်မူသည်။ ကိုယ်တော်တိုင်ပင် အမျိုးသမီးများကို တန်ဖိုးထားတော်မူကြောင်း အမျိုးသမီးများ၏ခံစားချက်များကို ပုံဆောင်အသုံးပြုဖော်ပြသော၊ ကိုယ်တော်တိုင်၏ ခံစားချက်များကို အမျိုးသမီးများ၏ခံစားချက်နှင့် နှိုင်းယှဉ်ဖော်ပြသော ကျမ်းချက်များ၌ ထင်ရှားသည်။ (ဟေရှာယ ၄၂:၁၄; ၄၉:၁၅; ၆၆:၁၃) ယင်းက စာရှုသူများအား ယေဟောဝါ၏သဘောတော်ကို သိရှိနားလည်စေသည်။ စိတ်ဝင်စားစရာကား ကိုယ်တော်တိုင်နှင့်စပ်လျဉ်း၍ ယေဟောဝါအသုံးပြုတော်မူသော “ကရုဏာ” သို့မဟုတ် “သနားခြင်း” ဟုပြန်ဆိုသည့် ဟေဗြဲစကားလုံးသည် အမိ “သားအိမ်” နှင့်နီးစပ်မှုရှိပြီး “မိခင်စိတ်ထား” ဟူ၍ဖော်ပြနိုင်ပါသည်။—ထွက်မြောက်ရာ ၃၃:၁၉; ဟေရှာယ ၅၄:၇။

၁၆။ ဘုရားတရားကြည်ညိုသော အမျိုးသမီးများ၏အကြံပြုချက်သည် တန်ဖိုးထားခံရကြောင်း အဘယ်ပုံဥပမာများက ဖော်ပြသနည်း။

^၁၆ ဘုရားတရားကြည်ညိုသောအမျိုးသမီးများ၏အကြံပြုချက်ကို တန်ဖိုးထား၏။ ဘုရားသခင်ကိုကြောက်ရွံ့သူ အာဗြဟံသည် ဘုရားသခင်ကိုကြည်ညိုသောဇနီး စာရာ၏အကြံပြုချက်ကိုလိုက်နာရန် တစ်ချိန်တွင် တုံ့ဆိုင်းနေခဲ့သောအခါ ယေဟောဝါက သူ့အား ဤသို့မိန့်တော်မူသည်– “သူ၏စကားကိုနားထောင်လော့။” (ကမ္ဘာဦး ၂၁:၁၀-၁၂) ဧသော၏ ဟိတ္တိမိန်းမများသည် “ဣဇာက်နှင့်ရေဗက္က၌ စိတ်နှလုံးပူပန်စရာအကြောင်းဖြစ်” သည်။ အတန်ကြာလေသော် ရေဗက္ကက သူတို့၏သားယာကုပ်ပါ ဟိတ္တိသူတစ်ဦးကို ထိမ်းမြားမည်ဆိုလျှင် စိတ်ဆင်းရဲရမည်အကြောင်း ထုတ်ပြောခဲ့သည်။ ဣဇာက်သည် မည်သို့တုံ့ပြန်ခဲ့သနည်း။ “ထိုအခါ ဣဇာက်သည် ယာကုပ်ကိုခေါ်၍ ‘သင်သည် ခါနာန်အမျိုးသမီးနှင့် အိမ်ထောင်ဘက်မပြုရ’ . . . ဟုကောင်းချီးပေးလျက် မှာထား” လေသည်။ မှန်ပါသည်၊ ရေဗက္ကသည် တိုက်ရိုက်အကြံမပေးခဲ့သော်လည်း သူမ၏ယောက်ျားသည် သူမ၏ခံစားချက်ကိုထောက်ထားပြီး ဆုံးဖြတ်ချက်ချခဲ့သည်။ (ကမ္ဘာဦး ၂၆:၃၄၊ ၃၅; ၂၇:၄၆; ၂၈:၁) နောက်ပိုင်းတွင် ဒါဝိဒ်မင်းကြီးသည် အဘိဂဲလ၏ အသနားခံချက်ကို နားထောင်ခဲ့သောကြောင့် သွေးသွန်းသောအပြစ်ကို ရှောင်ကြဉ်ခဲ့သည်။—၁ ဓမ္မရာဇဝင် ၂၅:၃၂-၃၅။

၁၇။ အမျိုးသမီးများသည် မိသားစုတွင် အခွင့်အာဏာအတော်အသင့်ရှိကြောင်း အဘယ်အရာက ဖော်ပြသနည်း။

^၁၇ အမျိုးသမီးများသည် မိသားစုတွင် အခွင့်အာဏာအတော်အသင့်ရှိသည်။ သားသမီးတို့သည် ဤသို့တိုက်တွန်းခံရသည်– “ငါ့သား၊ အဘ၏နည်းဥပဒေသကို နားထောင်လော့။ အမိ၏တရားကိုလည်း မပယ်နှင့်။” (သု. ၁:၈) နယပုံပြင် အခန်းကြီး ၃၁ ပါ “အရည်အချင်းပြည့်ဝသောဇနီး” ကိုဖော်ပြထားပုံအရ ဝီရိယရှိသောအိမ်ရှင်မတစ်ဦးသည် မိမိအိမ်ကိုနိုင်အောင် ကြည့်ရှုထိန်းသိမ်းရုံမက အိမ်မြေကိစ္စဆောင်ရွက်ကိုင်တွယ်ခြင်း၊ သီးနှံဖြစ်ထွန်းသောလယ်ယာကို စိုက်ပျိုးခြင်း၊ စီးပွားရေးလုပ်ငန်းငယ်တစ်ခုကိုတည်ထောင်ထား၍ အခြားသူများအား အသိဉာဏ်ပညာနှင့် စကားပြောဆိုလေ့ရှိသည်။ အားလုံးတို့ထက် အရေးကြီးဆုံးကား ချီးမွမ်းခံထိုက်သော ထိုအမျိုးသမီး၏ ယေဟောဝါကိုရိုသေခန့်ညားသောသဘောဖြစ်သည်။ ဤကဲ့သို့သောအမျိုးသမီးတန်ဖိုးသည် “သန္တာကျောက်များထက် အဖိုးသာ၍ထိုက်” ၏ဟုဆိုခြင်းသည် အံ့ဩစရာမဟုတ်ပါတကား! တန်ဖိုးအနဂ္ဃရှိသန္တာကျောက်ကို လက်ဝတ်တန်ဆာအတွက်ဖြစ်စေ၊ အလှဆင်ရန်အတွက်ဖြစ်စေ အလွန်မက်မောကြသည်။—သု. ၃၁:၁၀-၃၁၊ ကဘ။

ဘုရားသခင်၏အထူးမျက်နှာသာရ အမျိုးသမီးများ

၁၈။ သမ္မာကျမ်းစာခေတ်တွင် အမျိုးသမီးအချို့သည် အဘယ်နည်းဖြင့် အထူးမျက်နှာသာပေးခံရသနည်း။

^၁၈ ကျမ်းစာခေတ်ကသူအချို့ကို ယေဟောဝါအထူးမျက်နှာသာပေးခဲ့ခြင်းက အမျိုးသမီးများကို ကိုယ်တော်အလေးထားကြောင်း ထင်ရှားစေသည်။ ဟာဂရ၊ စာရာ နှင့် မာနော်၏မိန်းမထံ ကောင်းကင်တမန်များရောက်ရှိလာပြီး ဘုရားပေးညွှန်ကြားချက်များကို သူတို့အား မိန့်မှာခဲ့သည်။ (ကမ္ဘာဦး ၁၆:၇-၁၂; ၁၈:၉-၁၅; တရားသူကြီး ၁၃:၂-၅) တဲတော်တွင် “အစေခံသောမိန်းမတို့” နှင့် ရှောလမုန်၏နန်းတော်တွင် သီချင်းဆိုသူအမျိုးသမီးများရှိသည်။—ထွက်မြောက်ရာ ၃၈:၈၊ သမ; ၁ ဓမ္မရာဇဝင် ၂:၂၂; ဒေသနာ ၂:၈။

၁၉။ ယေဟောဝါသည် မိမိအားကိုယ်စားပြုရန် အမျိုးသမီးများကို အဘယ်နည်းဖြင့် တစ်ခါတစ်ရံ အသုံးပြုတော်မူခဲ့သနည်း။

^၁၉ ဣသရေလသမိုင်းတွင် ယေဟောဝါသည် မိမိအားကိုယ်စားပြုရန် သို့မဟုတ် မိမိအတွက် ပြောဆိုပေးရန် အမျိုးသမီးတစ်ဦးဦးအား အကြိမ်ကြိမ်အသုံးပြုတော်မူခဲ့သည်။ ပရောဖက်မ ဒေဗောရနှင့်စပ်လျဉ်း၍ ကျွန်ုပ်တို့ဤသို့ဖတ်ရှုရသည်– “ဣသရေလအမျိုးသားတို့သည် ထိုပရောဖက်မ၏စီရင်ခြင်းကိုခံအံ့သောငှာ ရောက်လာတတ်ကြ၏။” (တရားသူကြီး ၄:၅) ဣသရေလလူမျိုးသည် ခါနာန်ဘုရင်ယာဘိန်ကို စစ်နိုင်ပြီးနောက် ဒေဗောရသည် အမှန်ပင်ထူးခြားသောအခွင့်အရေးတစ်ခု ရရှိခဲ့သည်။ သူမသည် ယေဟောဝါ၏မှုတ်သွင်းခံမှတ်တမ်းအဝင်ဖြစ်လာခဲ့သော အောင်ပွဲခံသီချင်းကို အနည်းဆုံးတစ်စိတ်တစ်ပိုင်း စပ်ဆိုခွင့်ရကြောင်းထင်ရှားသည်။c (တရားသူကြီး၊ အခန်းကြီး ၅) နောက်ပိုင်းရာစုအနည်းငယ်အကြာတွင် ယေဟောဝါအားမေးမြန်းရန် ယောရှိမင်းသည် ပရောဖက်မ ဟုလဒထံ ယဇ်ပုရောဟိတ်မင်းပါဝင်သည့် စေတမန်အဖွဲ့တစ်ဖွဲ့ကို စေလွှတ်ခဲ့သည်။ ဟုလဒသည် “ဣသရေလအမျိုး၏ဘုရားသခင် ထာဝရာဘုရား၏အမိန့်တော်ဟူမူကား” ဟူ၍ ပိုင်နိုင်စွာဖြင့်ဖြေဆိုနိုင်ခဲ့သည်။ (၄ ဓမ္မရာဇဝင် ၂၂:၁၁-၁၅) ထိုအချိန်တွင် ကိုယ်စားလှယ်အဖွဲ့အား ပရောဖက်မတစ်ဦးထံ၌ ယေဟောဝါ၏ညွှန်ကြားချက်ကို သွားတောင်းရန် ဘုရင်ကမိန့်တော်မူခဲ့သည်။—မာလခိ ၂:၇ နှိုင်းယှဉ်။

၂၀။ အမျိုးသမီးများ၏ခံစားချက်နှင့် သူတို့၏ဖူလုံမှုကို ယေဟောဝါဂရုစိုက်ကြည့်ရှုတော်မူကြောင်း အဘယ်ဥပမာများက တင်ပြသနည်း။

^၂၀ အမျိုးသမီးများ၏ဖူလုံမှုကို ယေဟောဝါဂရုစိုက်ကြည့်ရှုတော်မူကြောင်း ကိုယ်တော်အားကိုးကွယ်သူ အမျိုးသမီးအချို့၏အကျိုးကိုဆောင်ရွက်ပေးခြင်းက ဖော်ပြပါသည်။ အာဗြဟံ၏ဇနီး လှပသောစာရာကို အသရေမပျက်စေရန် ကိုယ်တော်နှစ်ကြိမ်ကာကွယ်ပေးတော်မူခဲ့သည်။ (ကမ္ဘာဦး ၁၂:၁၄-၂၀; ၂၀:၁-၇) လျော့၍အချစ်ခံရသူ ယာကုပ်၏ဇနီး လေအာအား “သားဖွားရသောအခွင့်ကို ပေးတော်မူ” ခြင်းအားဖြင့် ဘုရားသခင်သည် မျက်နှာသာပြတော်မူခဲ့သည်။ (ကမ္ဘာဦး ၂၉:၃၁၊ ၃၂) ဘုရားသခင်ကိုကြောက်ရွံ့သော ဣသရေလဝမ်းဆွဲနှစ်ဦးသည် မိမိတို့၏အသက်ကိုပင်စွန့်ရန် အသင့်ရှိပြီး အီဂျစ်ပြည်တွင် ဟေဗြဲသားယောက်ျားကလေးများကို အသက်ချမ်းသာပေးခဲ့သည့်အတွက် ယေဟောဝါသည် သူတို့အား ကျေးဇူးပြု၍ “သူတို့အိမ်ထောင်များကို တိုးပွားစေတော်မူ၏။” (ထွက်မြောက်ရာ ၁:၁၇၊ ၂၀၊ ၂၁) ဟန္နလှိုက်လှဲစွာတောင်းခဲ့သော ဆုတောင်းချက်ကိုလည်း ကိုယ်တော်ဖြေဆိုတော်မူခဲ့သည်။ (၁ ဓမ္မရာဇဝင် ၁:၁၀၊ ၂၀) ထို့နောက် ပရောဖက်တစ်ဦး၏မယားဖြစ်သူ မုဆိုးမသည်သူမ၏အကြွေးကျေရန် သူမ၏သားများကိုလာသိမ်းယူသည့်ကြွေးရှင်ရောက်လာသောအခါ ယေဟောဝါသည် သူမအား စွန့်ပစ်ထားတော်မမူ။ ချစ်ခြင်းမေတ္တာရှေ့ထားကာ ဘုရားသခင်သည် ပရောဖက်ဧလိရှဲအား သူမ၏ဆီကိုတိုးပွားစေပြီး ကြွေးဆပ်စေခဲ့သည်။ ဤနည်းဖြင့် သူမသည် မိမိ၏မိသားစုနှင့် မိမိသိက္ခာကိုကယ်ဆယ်နိုင်ခဲ့သည်။—ထွက်မြောက်ရာ ၂၂:၂၂၊ ၂၃; ၄ ဓမ္မရာဇဝင် ၄:၁-၇။

၂၁။ ဟေဗြဲကျမ်းစာစောင်များက အမျိုးသမီးများ၏အဖြစ်နှင့်စပ်လျဉ်း၍ အဘယ်မျှတသောအမြင်ကိုတင်ပြသနည်း။

^၂၁ ထို့ကြောင့် အမျိုးသမီးများအား ချိုးနှိမ်ခြင်းကို အားပေးမည့်အစား ဟေဗြဲကျမ်းစာစောင်များက ဘုရားသခင်၏ကျေးကျွန်တို့ဘောင်တွင် မိန်းမတို့အဖြစ်နှင့်စပ်လျဉ်း၍ မျှတသောအမြင်ကိုတင်ပြပါသည်။ ကမ္ဘာဦး ၃:၁၆ ပြည့်စုံခြင်းကို ယေဟောဝါအားကိုးကွယ်သူ အမျိုးသမီးများမခံစားရရန် ကာကွယ်ပေးတော်မမူခဲ့သော်လည်း ယေဟောဝါ၏ပုံသက်သေကိုတုပပြီး ကိုယ်တော့်ပညတ်ကိုလိုက်နာသော ဘုရားသခင်ကိုကြောက်ရွံ့သူ အမျိုးသားများသည် အမျိုးသမီးများကိုဂုဏ်အသရေရှိရှိခန့်ညားလေးစားစွာ ပြုမူဆက်ဆံကြသည်။

၂၂။ ကမ္ဘာပေါ်သို့ ယေရှုရောက်ရှိချိန်တိုင်လေသော် အမျိုးသမီးများ၏ အခန်းကဏ္ဍသည် မည်သို့ပြောင်းလဲလာသနည်း။ အဘယ်မေးခွန်းများကို မေးမြန်းထားသနည်း။

^၂၂ ဟေဗြဲကျမ်းစာစောင်များကို ရေးပြီးသည့်နောက် ရာစုနှစ်များအတွင်း ဂျူးလူမျိုးအလယ်တွင် အမျိုးသမီးများ၏ အခန်းကဏ္ဍပြောင်းလဲသွားသည်။ ကမ္ဘာပေါ်သို့ ယေရှုဆင်းသက်လာချိန်တိုင်လေသော် ရဗ္ဗိထုံးတမ်းစဉ်လာများသည် သူတို့၏ဘာသာရေးအခွင့်အရေးများနှင့် လူမှုရေးကဏ္ဍများတွင် အမျိုးသမီးများကို အကြီးအကျယ်ချုပ်ချယ်ထားလေတော့သည်။ ယင်းထုံးတမ်းစဉ်လာများသည် အမျိုးသမီးများနှင့် ယေရှုဆက်ဆံပုံကို လွှမ်းမိုးသလော။ ယနေ့ ခရစ်ယာန်အမျိုးသမီးများကို မည်သို့ဆက်ဆံသင့်သနည်း။ ဤမေးခွန်းများကို နောက်ဆက်တွဲဆောင်းပါးတွင် ဆွေးနွေးပါလိမ့်မည်။

[အောက်ခြေမှတ်ချက်များ]

သင်မည်သို့ဖြေဆိုမည်နည်း

◻ “အထောက်အမ” နှင့် “ဖြည့်ဖက်” ဟူသောစကားလုံးများက အမျိုးသမီး၏ ဘုရားပေး အခန်းကဏ္ဍအကြောင်း အဘယ်အရာကိုထင်ရှားစေသနည်း။

◻ သမ္မာကျမ်းစာခေတ်က အမျိုးသမီးများနှင့်စပ်လျဉ်းသော ထုံးစံများကို သုံးသပ်သည့်အခါ အဘယ်အရာကို စွဲမှတ်ထားသင့်သနည်း။

◻ ဘုရားသခင်၏ အစောပိုင်းကျေးကျွန်များဘောင်တွင် အမျိုးသမီးများသည် သိက္ခာရှိအခန်းကဏ္ဍရထားကြောင်း အဘယ်အချက်က ဖော်ပြသနည်း။

◻ ယေဟောဝါသည် ခရစ်ယာန်ခေတ်မတိုင်မီကအမျိုးသမီးအချို့အား အဘယ်နည်းဖြင့် အထူးမျက်နှာသာပေးတော်မူခဲ့သနည်း။