ပေးကမ်းခြင်း—မျှော်လင့်ထားရာလော

လက်ဆောင်များပေးကမ်းခြင်းသည် ဓလေ့ထုံးတမ်းအရဖြစ်လေ့ရှိကြောင်း သင်ကောင်းစွာသိပေမည်။ ယဉ်ကျေးမှုအများ၌ လက်ဆောင်ပေးခြင်းကို မျှော်လင့်ကြသော အခါသမယများရှိ၏။ ယင်းကဲ့သို့သောလက်ဆောင်များသည် လေးစားသည့်သင်္ကေတ သို့မဟုတ် မေတ္တာကိုဖော်ပြခြင်းအဖြစ် အဓိပ္ပာယ်ဆောင်ပေမည်။ အများစုမှာ လက်ခံရရှိသူများက လုံးဝအသုံးမပြုကြပါ; အခြားတို့မှာမူ အမှန်လိုအပ်ရာများကို ဖြည့်စွက်ပေးပြီး အလွန်တန်ဖိုးထားခြင်းခံရကြသည်။

ဒိန်းမတ်တွင် ကလေးငယ်တစ်ဦးမွေးဖွားသောအခါ မိတ်ဆွေနှင့် ဆွေမျိုးများ လာရောက်လည်ပတ်ကြကာ ကလေးငယ်အတွက် အသုံးဝင်မည်ဟုထင်သည့်လက်ဆောင်များကို ယူလာကြမည်ဖြစ်သည်။ အခြားနိုင်ငံများတွင် မိတ်ဆွေများက ပါတီပွဲကျင်းပမည်ဖြစ်ကာ ထိုတွင်မွေးဖွားမှုကိုမျှော်လင့်သည့်အနေဖြင့် လက်ဆောင်များကိုပေးကြ၏။

လက်ဆောင်ပေးခြင်းကို မျှော်လင့်ကြသော အခါသမယအများသည် နှစ်စဉ်ကျင်းပသည့်ပွဲများတွင်ဖြစ်သည်။ ယင်းကဲ့သို့သောပွဲလမ်းများသည် ကနဦးခရစ်ယာန်များအကြား၌ အလေ့အထမရှိခဲ့သော်လည်း ခရစ်ယာန်ဟုဆိုသူအများနှင့် ခရစ်ယာန်မဟုတ်သူများအကြားတွင် အလွန်ရေပန်းစားလာသည်။ အခြားယဉ်ကျေးမှုများတွင် ကလေးများကြီးပြင်းလာသည်နှင့်အမျှ မွေးနေ့လက်ဆောင်ပေးကမ်းခြင်းများမှေးမှိန်တိမ်ကောသွားမည်ဖြစ်သော်လည်း ဂရိလူမျိုးများအကြားရှိ ဓလေ့ထုံးတမ်းတွင်မူ ပြဋ္ဌာန်းထားသည်။ ဂရိနိုင်ငံတွင် မွေးနေ့ကို အလွန်အလေးထားကြသည်။ သူတို့သည် လူတစ်ဦးအား သူ၏ “နာမည်မှည့်သောနေ့” ၌လည်း လက်ဆောင်များပေးကြသည်။ ယင်းကားအဘယ်နည်း။ ဘာသာရေးဓလေ့ထုံးတမ်းက နှစ်တစ်နှစ်၏ရက်တိုင်းကို ခြားနားသော “သန့်ရှင်းသူ” တစ်ဦးနှင့်ချိတ်ဆက်ပေးထားကာ များစွာသောသူတို့သည် “သန့်ရှင်းသူများ” ၏အမည်ကို မှည့်ခံရကြသည်။ “သန့်ရှင်းသူ၏” နေ့ရောက်လာသောအခါ ထိုနာမည်ကိုရထားသောသူများ လက်ဆောင်ရရှိကြသည်။

ကိုရီးယားလူမျိုးတို့သည် သူတို့ကလေးများအတွက် မွေးနေ့ပွဲများကျင်းပပေးသည့်အပြင် ကလေးများနေ့ဟုသိကြသော နိုင်ငံ့အားလပ်ရက်နေ့ရှိသေး၏။ ယင်းသည် မိသားစုအပျော်ခရီးထွက်ကြသည့်အချိန်အခါ၊ သူတို့၏မွေးနေ့သည် မည်သည့်နေ့ရက်တွင်မဆိုကျပါစေ မိဘများက သားသမီးများကိုပေးကမ်းကြရသည့်အချိန်အခါဖြစ်သည်။ ကိုရီးယားလူမျိုးတွင် ကလေးများက သူတို့မိဘများကို ပေးကမ်းကြသောအချိန်အခါဖြစ်သည့် မိဘများနေ့နှင့် တပည့်များက သူတို့၏ဆရာများကိုဂုဏ်ပြုကာ လက်ဆောင်များပေးကမ်းကြသောအချိန်အခါဖြစ်သည့် ဆရာများနေ့လည်းရှိ၏။ ကိုရီးယားလူမျိုးဓလေ့ထုံးစံအရ လူတစ်ဦး အသက် ၆၀ ပြည့်သောအခါ ပါတီပွဲကြီးတစ်ခုကိုကျင်းပကြသည်။ မိသားစုနှင့် မိတ်ဆွေများသည် အသက်တာရှည်မှုနှင့် ပျော်ရွှင်မှုအတွက် ဆုတောင်းခြင်းများပြုပေးခြင်းတွင် ပါဝင်တက်ရောက်ကြပြီး ထိုအသက်သို့ရောက်သူကို လက်ဆောင်များပေးကမ်းကြသည်။

ထိမ်းမြားပွဲသည် လက်ဆောင်များပေးကမ်းကြသည့် ရေပန်းစားသောဓလေ့ထုံးစံမျိုးဖြစ်သည့် နောက်အခါသမယတစ်ခုဖြစ်သည်။ ကင်ညာနိုင်ငံတွင် မောင်နှံတစ်စုံလက်ထပ်သောအခါ သတို့သားအိမ်ထောင်ဘက်မှ သတို့သမီးအိမ်ထောင်ဘက်ကို လက်ဆောင်ပေးရမည်ဖြစ်ကြောင်း မျှော်လင့်ထားသည်။ ဧည့်သည်များလည်း လက်ဆောင်များယူလာကြသည်။ သတို့သမီးနှင့် သတို့သားတို့သည် ပြဋ္ဌာန်းထားသည့် ဓလေ့ထုံးစံကိုလိုက်လျှောက်ကြပါက ဧည့်သည်များ လက်ဆောင်များယူလာချိန်အခိုက်၌ စင်မြင့်ပေါ်တွင်ထိုင်ရမည်ဖြစ်သည်။ တစ်ဦးစီက လာရောက်ပေးကမ်းကြစဉ် “မည်သူမည်ဝါက မောင်နှံစုံအတွက် လက်ဆောင်ယူလာပေးသည်” ဟု ကြေညာလိမ့်မည်ဖြစ်သည်။ ပေးကမ်းသူများစွာတို့သည် ယင်းကဲ့သို့သောအသိအမှတ်ပြုမှုမရရှိပါက အလွန်မကျေမနပ်ဖြစ်လိမ့်မည်ဖြစ်သည်။

လက်ဘနွန်လူမျိုးများအကြား၌ တစ်စုံတစ်ဦးလက်ထပ်တော့မည်ဆိုသည့်အခါ မိတ်ဆွေ၊ အိမ်နီးချင်းများနှင့် မောင်နှံစုံကိုကောင်းစွာမသိကျွမ်းသူများပင် ရက်ပေါင်းများစွာကြို၍ လက်ဆောင်များဖြင့် ရောက်လာကြပေမည်။ ငယ်စဉ်ဘဝကတည်းက လက်ဆောင်များပေးကမ်းခြင်းသည် အကြွေးဆပ်ရသကဲ့သို့သော တာဝန်တစ်ခုဖြစ်သည်ဟု သွန်သင်ခံရကြသည်။ လက်ဘနွန်အမျိုးသားတစ်ဦးက “အဲဒီလိုမပေးဘူးဆိုရင် ခင်ဗျားရဲ့စိတ်ထဲမှာ ပျော်မှာမဟုတ်ဘူး။ ဒါက ထုံးတမ်းစဉ်လာပဲ” ဟု ပြောသည်။

သို့သော်လည်း တိုင်းနိုင်ငံများစွာတို့၌ ပေးကမ်းခြင်းကိုမျှော်လင့်သည့် အခါသမယအားလုံးတွင် ခရစ္စမတ်သည် အထင်ရှားဆုံးဖြစ်သည်။ သင်နေထိုင်သည့်နေရာ၌ ထိုကဲ့သို့ပင်မဟုတ်ပေလော။ မကြာသေးသော ၁၉၉၀ ခုနှစ်က အမေရိကန်၌ ခရစ္စမတ်လက်ဆောင်များအတွက် နှစ်စဉ်ဒေါ်လာ ၄၀ ဘီလီယံကျော်သုံးစွဲခဲ့သည်ဟု ခန့်မှန်းရသည်။ အလွန်စိတ်အားထက်သန်စွာဖြင့် ယင်းအားလပ်ရက်ကို ဂျပန်နိုင်ငံရှိ . . . ရှင်တိုဘာသာဝင်များလည်းကျင်းပကြသည်။ ထို့ပြင် ဥရောပ၊ တောင်အမေရိကနှင့် အာဖရိကတချို့ဒေသများတွင် ကျင်းပမှုပုံစံမျိုးပေါင်းစုံကို တွေ့ကြရသည်။

ခရစ္စမတ်သည် ပျော်ရွှင်ဖွယ်အချိန်ရာသီဖြစ်မည်ဟု လူတို့မျှော်လင့်ကြသော်လည်း များစွာတို့မှာမပျော်ရွှင်ကြပါ။ လက်ဆောင်များအတွက် ပျာယီးပျာယာဈေးဝယ်ကြရကာ ပေးချေရမည့်ငွေများအတွက် စိုးရိမ်ပူပန်မှုက သူတို့ကြုံတွေ့ရသော မည်သည့်အခိုက်အတန့်ပျော်ရွှင်မှုလေးကိုမဆို မှေးမှိန်သွားစေကြောင်း လူများစွာတို့ တွေ့ကြရသည်။

သို့ရာတွင် သမ္မာကျမ်းစာက ပေးကမ်းခြင်း၌ ပျော်ရွှင်ခြင်းရှိ၏ဟု ဆိုထားသည်။ ပေးကမ်းသောစိတ်ဓာတ်ပေါ်မူတည်၍ အမှန်ပင် ပျော်ရွှင်မှုရှိနိုင်ပါသည်။—တမန်တော် ၂၀:၃၅။