ဘုရားသခင့်နိုင်ငံတော် ကြွေးကြော်သူများမှတ်တမ်း

“အလုံးစုံသောပညတ်တော်တို့သည် သစ္စာဖြစ်ကြပါ၏”

မောရှေသည် မိမိမသေဆုံးမီအချိန်ကလေး၌ ဣသရေလလူမျိုးများအား ယေဟောဝါ၏ပညတ်တော်များကို တစ်ခုမကျန်နာခံကြရန် အားပေးတိုက်တွန်းခဲ့သည်။ “သင်တို့အား ယနေ့ငါသက်သေခံသမျှသောစကားတို့ကို နှလုံးသွင်းကြလော့။ သင်တို့သားသမီးတို့သည် ဤပညတ်တရားစကားတော်အလုံးစုံတို့ကို စောင့်ရှောက်စေခြင်းငှာ သူတို့အား ထပ်ဆင့်၍မှာထားရကြမည်။ ဤအမှုသည် သာမညအမှုမဟုတ်။ သင်တို့အသက်နှင့်ဆိုင်သော အမှုဖြစ်၏” ဟု သူပြောဆိုခဲ့သည်။—တရားဟောရာ ၃၂:၄၆၊ ၄၇။

နှစ်ရာပေါင်းများစွာကြာပြီးနောက် ဆာလံဆရာက “အိုထာဝရဘုရား၊ ကိုယ်တော်သည် နီးတော်မူ၏။ အလုံးစုံသောပညတ်တော်တို့သည် သစ္စာဖြစ်ကြပါ၏” ဟု ပြောဆိုရာ၌ ဘုရားသခင့်သွန်သင်ချက်အားလုံး၏ အရေးကြီးမှုကို သူပေါ်လွင်စေခဲ့သည်။ (ဆာလံ ၁၁၉:၁၅၁) ပထမရာစုအချိန်က ယေရှုသည် “ဘုရားသခင်မိန့်တော်မူသမျှ” ၏တန်ဖိုးကို ကိုယ်တော်တိုင် ကိုးကားဖော်ပြတော်မူခဲ့သည်။ (မဿဲ ၄:၄) ဘုရားသခင်၏ညွှန်ကြားမှုအောက်၌ တမန်တော်ပေါလုက “ကျမ်းစာရှိသမျှသည် ဘုရားသခင်မှုတ်သွင်းတော်မူသောအားဖြင့်ဖြစ်” သည်ဟု ရေးသားခဲ့လေသည်။—၂ တိမောသေ ၃:၁၆။

ရှင်းနေသည်မှာ မိမိအားဝတ်ပြုကိုးကွယ်သူများသည် ရေးသားထားသော မိမိ၏နှုတ်ကပါဌ်တော်အားဖြင့် ကျွန်ုပ်တို့အားပေးအပ်ထားသည့် သတင်းတရားတစ်ရပ်လုံးကို လေးလေးနက်နက်ဆင်ခြင်စဉ်းစားရန် ယေဟောဝါဘုရားသခင် မျှော်လင့်ပေသည်။ သမ္မာကျမ်းစာထဲ၌ တန်ဖိုးမရှိသည့်ကျမ်းချက် တစ်ခုမျှမရှိပါ။ ၎င်းမှာ မော်ရေးရှပ်ကျွန်းမှ အောက်ပါတွေ့ ကြုံမှုတွင် ဖော်ပြထားသကဲ့သို့ ဘုရားသခင်၏နှုတ်ကပါဌ်တော်နှင့်ပတ်သက်၍ ယေဟောဝါသက်သေများ ယူမှတ်သည့်ပုံပင်ဖြစ်သည်။

ဦးဒီ——သည် ဝေးလံသီခေါင်သောရွာလေးတစ်ရွာတွင် နေထိုင်သည့် ညစောင့်တစ်ဦးဖြစ်သည်။ ဘုရားသခင်အား မှန်ကန်သည့်နည်းလမ်းဖြင့် ဝတ်ပြုကိုးကွယ်ရန် ရိုးသားစွာ သူရှာဖွေခဲ့သည်မှာ ကြာမြင့်လှပေပြီ။ သူညစောင့်လုပ်ရသောအချိန်အတွင်း၌ သမ္မာကျမ်းစာကို စတင်ဖတ်ရှုလေသည်။ အချိန်တန်သော် တစ်အုပ်လုံးကို သူဖတ်ပြီးသွားလေသည်။ ဘုရားသခင်၏နာမတော်သည် ယေဟောဝါ—သူ၏ဟင်ဒီကျမ်းစာထဲ၌ အကြိမ်ပေါင်းများစွာပါဝင်သော နာမတော်တစ်ခု—ဖြစ်ကြောင်း သူသိလာသည်။ ဗျာဒိတ်ကျမ်းစာစောင်သည် အထူးသဖြင့်ဆွဲဆောင်မှုရှိကြောင်း သူတွေ့ရလေသည်။

ထို့နောက် သူသည် ကျမ်းစာတစ်အုပ်လုံးကို လိုက်လျှောက်သောဘာသာတစ်ခုများ ရှိပါလေစဟု မိမိကိုယ်ကိုမိမိမေးကြည့်မိ၏။ အကောင်းဘက်မှ ရှုမြင်သုံးသပ်သော်မှ သူအကျွမ်းတဝင်ရှိသည့်ဘာသာများသည် သမ္မာကျမ်းစာ၏တစ်စိတ်တစ်ပိုင်းကိုသာ လိုက်လျှောက်ကြသည်။ အချို့ဘာသာများသည် ဟေဗြဲကျမ်းစောင်များကိုလက်ခံပြီး ခရစ်ယာန်ဂရိကျမ်းစောင်များကို ငြင်းပယ်ကြသည်။ အခြားဘာသာများကမူ ဟေဗြဲကျမ်းစောင်များကို လျစ်လျူရှုပြီး ခရစ်ယာန်ဂရိကျမ်းစာများကိုသာ လက်တွေ့ကျတန်ဖိုးရှိသည်ဟု မှတ်ယူကြသည်။

တစ်နေ့ ၌ ဦးဒီ——သည် မိုးမိနေသော မောင်နှံတစ်စုံကိုတွေ့ ၍ သူ၏အိမ်၌မိုးခိုရန် သူတို့ကိုခေါ်ဖိတ်လိုက်သည်။ သူတို့သည် ယေဟောဝါသက်သေများဖြစ်ကြ၏။ ဇနီးဖြစ်သူက ဗျာဒိတ်ကျမ်း—ယင်း၏မဟာအထွတ်အထိပ်နီးပြီ! (လိပ်)a ဟူသည့်စာအုပ်ကို ကိုင်ထားသည်။ ချက်ချင်းပင် ဦးဒီ——သည် ထိုစာအုပ်ကို တောင်းကြည့်သည်။ သက်သေခံများက ဗျာဒိတ်ကျမ်းပရောဖက်ပြုချက်အကြောင်းအရာများသည် သူ့အတွက် အလွန်နက်နဲလွန်းသည်ဟု ထင်မြင်သောကြောင့် ၎င်းအစား အခြားစာအုပ်ကို သူ့အားပေးခဲ့သည်။ သို့သော်လည်း ဦးဒီ——က ဗျာဒိတ်ကျမ်း စာအုပ်ကိုသာ ဇွတ်တောင်းလေသည်။

သူ့ကိုယ်ပိုင်တစ်အုပ်ရသောအခါ စာအုပ်ကို အလျင်အမြန်ဖတ်ရှုလေတော့သည်။ ထို့နောက် ယေဟောဝါသက်သေများနှင့် ကျမ်းစာလေ့လာရန် လက်ခံလိုက်သည်။ သက်သေခံများသည် သမ္မာကျမ်းစာတစ်အုပ်လုံးကို အလွန်တန်ဖိုးထားကြသည်ဟူသည့်အချက်ကို မကြာမီပင် သူ့စိတ်၌အလွန်စွဲမှတ်သွားသည်။ ဟေဗြဲကျမ်းစောင်များကော ခရစ်ယာန်ဂရိကျမ်းစောင်များပါ ဂရုတစိုက်လေ့လာကြသော ယေဟောဝါသက်သေများ၏ဘုရားသခင့်နိုင်ငံတော်ခန်းမတွင် စည်းဝေးများကို မှန်မှန်စတက်လာသည်။ ယခုသူသည် နှစ်ခြင်းခံပြီးဖြစ်သော ခရစ်ယာန်အသင်းတော်သားတစ်ဦးဖြစ်ကာ ဘုရားသခင့်နိုင်ငံတော်ကို ကြွေးကြော်နေသူဖြစ်လေသည်။

[အောက်ခြေမှတ်ချက်များ]