ခရစ်ယာန်ဘောင်၏ဝတ်ပြုကိုးကွယ်မှုကို ဘုရားသခင် မည်သို့ရှုမြင်တော်မူသနည်း

“‘သခင်၊ သခင်’ ဟု ငါ့ကို လျှောက်သောသူတိုင်း ကောင်းကင်နိုင်ငံတော်သို့ဝင်ရလိမ့်မည်မဟုတ်” ဟု ယေရှုခရစ်မိန့်ဆိုတော်မူခဲ့သည်။ “ကောင်းကင်ဘုံ၌ရှိတော်မူသော ငါ့ခမည်းတော်၏အလိုကို ဆောင်သောသူသာလျှင် ဝင်ရလိမ့်မည်။ ထိုနေ့၌ကား ‘သခင်၊ သခင်၊ အကျွန်ုပ်တို့သည် . . . ကိုယ်တော်အခွင့်နှင့် များစွာသောတန်ခိုးတို့ကို ပြပါပြီမဟုတ်လော’ ဟု အများသောသူတို့သည် လျှောက်ကြလိမ့်မည်။ ထိုသို့လျှောက်ကြသောအခါ သင်တို့ကို ငါအလျှင်းမသိ! အဓမ္မအမှုကို ပြုသောသူတို့ ငါ့ထံမှဖယ်ကြဟု ထိုသူတို့အား အတည့်အလင်းငါပြောမည်။”—မဿဲ ၇:၂၁-၂၃။

ဘုရားသခင်သည် မိမိ၏မြင့်မြတ်သည့်နှုတ်ကပါဌ်တော်သမ္မာကျမ်းစာမှတစ်ဆင့် အဘယ်အရာသည် မိမိ၏အလိုတော်ဖြစ်ကြောင်း ရှင်းလင်းစွာဖော်ပြထားသည်။ ခရစ်ယာန်ဘောင်ချာ့ချ်များ ဘုရားသခင်၏အလိုတော်ကို ဆောင်ရွက်နေကြသလော။ သို့မဟုတ် သူတို့သည် “အဓမ္မအမှုကို ပြုသောသူတို့” ဟု ယေရှုခေါ်ဆိုခဲ့သည့်သူများလော။

သွေးသွန်းခြင်း

ပေတရုသည် သူ၏သခင် မသေဆုံးမီည၌ ယေရှုကိုဖမ်းရန်လွှတ်လိုက်သော တပ်ဖွဲ့နှင့် လက်နက်ချင်းတိုက်ပွဲတစ်ခုကို စတင်စေလုမတတ်ဖြစ်ခဲ့သည်။ (ယောဟန် ၁၈:၃၊ ၁၀) သို့သော် ယေရှုက ပြန်လည်ငြိမ်သက်မှုရှိအောင်ပြု၍ “ဓားကိုကိုင်သောသူရှိသမျှတို့သည် ဓားဖြင့်ဆုံးခြင်းသို့ရောက်ကြလိမ့်မည်” ဟု ပေတရုကို သတိပေးခဲ့သည်။ (မဿဲ ၂၆:၅၂) ဤရှင်းလင်းပြတ်သားသည့်သတိပေးချက်ကို ဗျာဒိတ် ၁၃:၁၀ တွင် ထပ်မံဖော်ပြထားသည်။ ခရစ်ယာန်ဘောင်ချာ့ချ်များသည် ၎င်းကို လိုက်လျှောက်ခဲ့ကြပြီလော။ သို့မဟုတ် ကမ္ဘာ့ဒေသအသီးသီးရှိ မပြီးဆုံးနိုင်သေးသောစစ်ပွဲများအတွက် သူတို့၌လည်း တာဝန်ရှိပါသလော။

ဒုတိယကမ္ဘာစစ်အတွင်းက ထောင်သောင်းမကသော ဆာ့ဘ်နှင့် ခရိုအက်တို့သည် ဘာသာရေးကို ခုတုံးလုပ်၍ သတ်ဖြတ်ခြင်းကို ခံခဲ့ကြရသည်။ “ခရိုအေးရှားတွင် တိုင်းရင်းဖွားဖက်ဆစ်စနစ်သည် နာဇီလုပ်ရပ်များထက် သာ၍ပင်ဆိုးသော ‘လူမျိုးစုသန့်စင်ရေး’ မူဝါဒကို စတင်ခဲ့သည်။ . . . ယင်းက ဆာ့ဘ်ဘီယန်းလူဦးရေ သုံးပုံတစ်ပုံကို ပြည်နှင်ဒဏ်ပေးမည်၊ သုံးပုံတစ်ပုံကို ရိုမင်ကက်သလစ်ဘာသာသို့ ပြောင်းစေမည်၊ သုံးပုံတစ်ပုံကို သုတ်သင်ပစ်မည်ဟု ကြေညာသည်။ . . . ဤလှုပ်ရှားမှုများတွင် ကက်သလစ်ဓမ္မဆရာများ၏ဘက်လိုက်၍ ပူးပေါင်းလုပ်ဆောင်မှုက စစ်ပြီးသွားသောအခါ၌ ချာ့ချ်နှင့် အစိုးရ၏ဆက်ဆံရေးကို အကြီးအကျယ်ပျက်စီးသွားစေခဲ့သည်” ဟု The New Encyclopœdia Britannica က အစီရင်ခံသည်။ မရေမတွက်နိုင်သောလူများသည် ကက်သလစ်ဘာသာသို့ ပြောင်းလျှင်ပြောင်း မပြောင်းလျှင်သေမည်ဟု အတင်းအကျပ်ပြုခံရသည်; အခြားထောင်ပေါင်းများစွာတို့သည် ရွေးချယ်ခွင့်ပင်မရလိုက်ကြပေ။ တစ်ရွာလုံး—အမျိုးသား၊ အမျိုးသမီးနှင့် ကလေးများ—သည် သူတို့၏သြသဒေါက်စ်ချာ့ချ်များအတွင်းသို့ အတင်းအဓမ္မသွင်း၍ သတ်ဖြတ်ခံရသည်။ အတိုက်အခံပြုကြသည့် ကွန်မြူနစ်စစ်တပ်များနှင့်ပတ်သက်၍ကော အသို့နည်း။ သူတို့၌ ဘာသာရေးထောက်ပံ့မှုရှိသလော။

“အချို့သောဓမ္မဆရာများသည် တော်လှန်ရေးတပ်များဘက်မှနေ၍ စစ်၌ပါဝင်ခဲ့ကြသည်” ဟု History of Yugoslavia စာအုပ်က အစီရင်ခံသည်။ “ပါတစ်စင်စစ်တပ်များတွင် ဆာ့ဘ်ဘီယန်းသြသဒေါက်စ်နှင့် ရိုမင်ကက်သလစ်ချာ့ချ်များ နှစ်ဖက်စလုံးမှ ဓမ္မဆရာများပင် ပါဝင်ကြသည်” ဟု Yugoslavia and the New Communism က ဖော်ပြသည်။ ဘော်လ်ကန်၌ ဘာသာရေးပဋိပက္ခများက စစ်မီးကို ဆက်လက်၍မီးထိုးယပ်ခပ်ပေးခဲ့ကြသည်။

ရဝမ်ဒါကော အသို့နည်း။ ကက်သလစ်နိုင်ငံတကာဆက်ဆံရေးအဖွဲ့အစည်း၏ အထွေထွေအတွင်းရေးမှူး၊ အီအဲန် လင်ဒဲက The Month ဂျာနယ်၌ အောက်ပါအတိုင်းဝန်ခံခဲ့သည်– “လန်ဒန်၌ African Rights ၏စုံစမ်းစစ်ဆေးချက်များက ပြည်သူ့စစ်သတ်ဖြတ်မှုများကို လျစ်လျူရှုခြင်း သို့မဟုတ် တာဝန်ပေးခြင်းအားဖြင့် ဒေသခံကက်သလစ်၊ အင်ကလီကန်နှင့် နှစ်ခြင်း ချာ့ချ်ခေါင်းဆောင်များ ပါဝင်ပတ်သက်နေခြင်းဆိုင်ရာ ဥပမာတစ်ခု၊ နှစ်ခုကို ပေးသည်။ . . . သာသနာနယ်ပယ်များရှိ ထင်ရှားသည့်ခရစ်ယာန် အတော်များများတို့သည် သတ်ဖြတ်မှုများတွင် ပါဝင်ပတ်သက်နေသည်မှာ သံသယဖြစ်ဖွယ်လုံးဝမရှိချေ။” ဝမ်းနည်းစရာမှာ အမည်ခံခရစ်ယာန်များအကြား တိုက်ခိုက်ခြင်းသည် ဗဟိုအာဖရိကကို ဆက်လက်နှောင့်ယှက်လျက်ရှိနေခြင်းပင်ဖြစ်သည်။

မတရားမေထုန်နှင့် သူ့မယားပြစ်မှားခြင်း

ဘုရားသခင်၏နှုတ်ကပါဌ်တော်အရ လိင်နှင့်ပတ်သက်သည့် ဂုဏ်အသရေရှိသောအစီအစဉ်တစ်ခုတည်းသာရှိရာ ၎င်းမှာ အိမ်ထောင်အနှောင်အဖွဲ့အတွင်း၌သာ ရှိသည်။ “ခပ်သိမ်းသောသူတို့၌ မင်္ဂလာဆောင်ခြင်းအမှုနှင့် သစ္စာသံဝါသပြုခြင်းအမှုသည် အသရေရှိစေလော့။ မတရားသောမေထုန်ကိုပြုသောသူနှင့် သူ့မယားကိုပြစ်မှားသောသူကို ဘုရားသခင်စစ်ကြောစီရင်တော်မူလိမ့်မည်” ဟု ကျမ်းစာကဖော်ပြ၏။ (ဟေဗြဲ ၁၃:၄) ချာ့ချ်ခေါင်းဆောင်များ ဘုရားသခင်၏ ဤသွန်သင်ချက်ကို ထိန်းသိမ်းကြပါ၏လော။

၁၉၈၉ ခုနှစ်၌ ဩစတြေးလျရှိ အင်ကလီကန်ချာ့ချ်မှ လိင်နှင့်ပတ်သက်သော တရားဝင်မှတ်တမ်းတစ်ခုကို ထုတ်ပြန်လိုက်သည်။ ၎င်းတွင် မောင်နှံစုံတစ်တွဲသည် တစ်ဦးကိုတစ်ဦး လုံးလုံးသစ္စာခံထားပါက လက်မထပ်မီ လိင်ဆက်ဆံခြင်းသည် မမှားပါဟုအကြံပြုထားသည်။ မကြာသေးမီလေးအချိန်က စကော့တလန်မှ အင်ကလီကန်ချာ့ချ်ခေါင်းဆောင်က “ချာ့ချ်ဟာ ကိစ္စရပ်တွေကို အပြစ်ရှိတယ်၊ မှားတယ်လို့ အပြစ်မဖို့သင့်ပါဘူး။ သူ့မယားပြစ်မှားခြင်းဟာ မျိုးရိုးလိုက်တဲ့အတွက်ကြောင့်ဖြစ်တယ်ဆိုတာကို ချာ့ချ်က လက်ခံရမယ်” ဟု ဖော်ပြခဲ့သည်။

တောင်အာဖရိကတွင် ဓမ္မဆရာအတော်များများသည် လိင်တူမေထုန်ပြုခြင်းကို ထောက်ခံကြောင်း ပွင့်ပွင့်လင်းလင်းပြောဆိုခဲ့ကြသည်။ ဥပမာ၊ ၁၉၉၀ ပြည့်နှစ်တွင် တောင်အာဖရိကမဂ္ဂဇင်း You ၌ ထင်ရှားကျော်ကြားသော အင်ကလီကန်ဓမ္မဆရာက ဤသို့ပြောဆိုခဲ့ကြောင်း ကိုးကားသည်– “ကျမ်းစာဟာ အမြဲပိတ်ပင်တားမြစ်နေတာမှ မဟုတ်ဘဲ။ . . . လိင်တူဆက်ဆံသူတွေနဲ့ပတ်သက်တဲ့ ချာ့ချ်ရဲ့သဘောထားနဲ့ မူဝါဒတွေမှာ အပြောင်းအလဲရှိလိမ့်မယ်လို့ ကျွန်တော်ထင်တယ်။”—ရောမ ၁:၂၆၊ ၂၇ ယှဉ်ကြည့်။

1994 Britannica Book of the Year အရ လိင်သည် အမေရိကန်ချာ့ချ်များတွင် အဓိကအငြင်းပွားရာဖြစ်လာလေပြီ။ အထူးသဖြင့် “ပုရိသလိင်တူသမားများနှင့် ဣတ္တိယလိင်တူသမားများကို လက်တင်ရဆရာများအဖြစ် ခန့်အပ်ခြင်း၊ လိင်တူဆက်ဆံခြင်းအခွင့်အရေးနှင့်ပတ်သက်သော ဘာသာရေး၏နားလည်မှု၊ ‘လိင်တူဆက်ဆံသည့်အိမ်ထောင်ရေး’ ဆိုင်ရာ ကောင်းချီး၊ လိင်တူဆက်ဆံခြင်းနှင့်ပတ်သက်သော ဘဝပုံစံများကို တရားဝင်ခွင့်ပြုခြင်း သို့မဟုတ် ရှုတ်ချခြင်း” ကဲ့သို့သော ကိစ္စများဖြစ်သည်။ အဓိကချာ့ချ်ဘာသာရေးဂိုဏ်း အများစုသည် လိင်ဆိုင်ရာ ပို၍လွတ်လပ်မှုရှိရေးအတွက် လှုပ်ရှားနေကြသော ဓမ္မဆရာများကို လက်သင့်ခံထားကြသည်။ 1995 Britannica Book of the Year အရ ဘိရှော့ အီပီစကိုးပါလီယန်း ၅၅ ယောက်သည် “လိင်တူဆက်ဆံသူများကို ခန့်အပ်ခြင်းနှင့် ၎င်းအကျင့်အကြံများအား သည်းခံခွင့်လွှတ်ထားခြင်းကို အတည်ပြုထားသည့်” တရားဝင်ကြေညာချက်တစ်ရပ်ကို လက်မှတ်ထိုးပေးခဲ့ကြသည်။

အချို့ဓမ္မဆရာများသည် လိင်တူဆက်ဆံခြင်းဘက်မှ ထောက်ခံ၍ ၎င်းကို ယေရှုတစ်ခါမျှ ဆန့်ကျင်ပြောဆိုခြင်းမရှိခဲ့ကြောင်း ငြင်းခုံကြသည်။ သို့သော် ၎င်းသည် အမှန်တကယ်ပင်ဖြစ်သလော။ ဘုရားသခင်၏နှုတ်ကပါဌ်တော်သည် သမ္မာတရားဖြစ်တော်မူသည်ဟု ယေရှုခရစ် ကြွေးကြော်ခဲ့သည်။ (ယောဟန် ၁၇:၁၇) ၎င်းမှာ ဝတ်ပြုရာ ၁၈:၂၂ တွင် ဖော်ပြထားသော လိင်တူဆက်ဆံခြင်းနှင့်ပတ်သက်သည့် ဘုရားသခင်၏အမြင်ကို ကိုယ်တော်ထောက်ခံကြောင်းဆိုလိုသည်။ ထိုတွင် “မိန်းမနှင့်ပေါင်းဖော်သကဲ့သို့ ယောက်ျားချင်း မပေါင်းဖော်ရ။ ရွံရှာဖွယ်အမှုဖြစ်၏” ဟု ဖတ်ရသည်။ ထို့ ပြင် ယေရှုသည် မတရားမေထုန်နှင့် သူ့မယားပြစ်မှားခြင်းတို့ကို “အတွင်းမှထွက်လာ၍ လူကို ညစ်ညူးစေသည့်” “ဆိုးညစ်သောအရာများ” ၌ စာရင်းသွင်းထားသည်။ (မာကု ၇:၂၁-၂၃) မတရားမေထုန်ဟူသည့် ဂရိစကားလုံးသည် သူ့မယားပြစ်မှားခြင်းဟူသည့် စကားလုံးထက် ပိုမိုကျယ်ပြန့်သော အသုံးအနှုန်းတစ်ရပ်ဖြစ်သည်။ ယင်းက လိင်တူဆက်ဆံခြင်းအပါအဝင် တရားဝင်အိမ်ထောင်အပြင်ဘက်ရှိ လိင်ဆက်ဆံခြင်းပုံစံအားလုံးတို့ကို ဖော်ပြသည်။ (ယုဒ ၇) မတရားမေထုန်နှင့်ပတ်သက်သော အရေးကြီးမှုကို ပေါ့ပေါ့တန်တန်သဘောထားသည့် မည်သည့် ခရစ်ယာန်ဆရာအခေါ်ခံသူကိုမဆို သည်းခံခွင့်လွှတ်မထားကြရန်လည်း မိမိ၏တပည့်တော်များကို ယေရှုခရစ်သတိပေးခဲ့သည်။—ဗျာဒိတ် ၁:၁; ၂:၁၄၊ ၂၀။

ဘာသာရေးခေါင်းဆောင်များက လိင်တူဆက်ဆံသူများနှင့် ဣတ္တိယလိင်တူသမားများကို ခန့်အပ်ခြင်းအတွက် လှုပ်ရှားပါဝင်ကြလျှင် သူတို့ချာ့ချ်၏ အသင်းသားများ၊ အထူးသဖြင့် လူငယ်များတွင် အဘယ်အကျိုးသက်ရောက်မှုရှိစေသနည်း။ အိမ်ထောင်မပြုဘဲ လိင်ကိုစမ်းသပ်မှုပြုရန် တွန်းထိုးလှုံ့ဆော်ပေးခြင်းမဟုတ်လော။ ယင်းနှင့်ဆန့်ကျင်လျက် ဘုရားသခင့်နှုတ်ကပါဌ်တော်က ခရစ်ယာန်များအား “မတရားသောမေထုန်ကို ကြဉ်ရှောင်ကြလော့” ဟု တိုက်တွန်းထားသည်။ (၁ ကောရိန္သု ၆:၁၈) အကယ်၍ ယုံကြည်သူချင်းတစ်ဦး အဆိုပါအပြစ်ကို ကျူးလွန်မိပါက ဘုရားသခင့်မျက်နှာသာတော်ရသူတစ်ဦး ပြန်ဖြစ်လာရန် မေတ္တာဖြင့်ကူညီပေးခြင်းခံရသည်။ (ယာကုပ် ၅:၁၆၊ ၁၉၊ ၂၀) ဤအကူအညီကို ငြင်းဆန်ခဲ့မည်ဆိုပါက အသို့နည်း။ ကျမ်းစာက အဆိုပါပုဂ္ဂိုလ်များသည် နောင်တမယူလျှင် “ဘုရားသခင်၏နိုင်ငံတော်ကို အမွေမခံရ” ဟု ဖော်ပြထားသည်။—၁ ကောရိန္သု ၆:၉၊ ၁၀။

“မင်္ဂလာဆောင်ခြင်းအမှုကို မပြုရ”

“မတရားသောမေထုန်နှင့် ကင်းလွတ်မည်အကြောင်း” “ . . . ရှိသည်ထက် ထိမ်းမြားစုံဖက်ခြင်းပြုသော်သာ၍ကောင်း၏” ဟု ကျမ်းစာက ဆိုသည်။ (၁ ကောရိန္သု ၇:၂၊ ၉) ဤအမြော်အမြင်ရှိသော အကြံဉာဏ်အစား ဓမ္မဆရာများစွာတို့သည် အိမ်ထောင်မပြုဘဲနေရန် တောင်းဆိုခံရကြသည်။ “. . . လိင်ဆက်ဆံမိလျှင်လည်း အိမ်ထောင်မပြုပါဟူသည့် ဝန်ခံချက်ကို မချိုးဖောက်ပါ။ . . . အာပတ်ဖြေသည့်နေရာ၌ ရိုးသားပွင့်လင်းစွာဖွင့်ဟလိုက်ခြင်းအားဖြင့် လိင်ဆက်ဆံခဲ့ခြင်းများအတွက် ခွင့်လွှတ်မှုခံရနိုင်သည်။ သို့သော်လည်း မည်သည့်ဓမ္မဆရာ၏လက်ထပ်ခြင်းကိုမျှ ချာ့ချ်က လုံးလုံးအသိအမှတ်ပြုလိမ့်မည်မဟုတ်ပါ” ဟု နီနို လီ ဘဲယ်လိုက သူ၏စာအုပ်ဖြစ်သော The Vatican Papers တွင် ရှင်းပြထားသည်။ ဤသွန်သင်ချက်က ကောင်းသောအသီး သို့မဟုတ် ဆိုးသောအသီးကို ဖြစ်ထွန်းစေသလော။—မဿဲ ၇:၁၅-၁၉။

ဓမ္မဆရာများစွာတို့သည် စာရိတ္တရေးအရ စင်ကြယ်သောအသက်တာရှိကြသော်လည်း အများစုတို့၌ ထိုသို့မရှိကြသည်မှာ သံသယဖြစ်ဖွယ်မရှိပါ။ 1992 Britannica Book of the Year အရ “ချာ့ချ်သည် ဓမ္မဆရာများ လိင်ဆိုင်ရာမတော်မတရားပြုကျင့်ခြင်းကိစ္စများကို ဖြေရှင်းရန် ဒေါ်လာသန်း ၃၀၀ ပေးချေခဲ့ရကြောင်း သတင်းရသည်။” နောက်ပိုင်း ၁၉၉၄ ခုနှစ်ထုတ်စာစောင်က “အေအိုင်ဒီအက်စ်ကြောင့်သေသောဓမ္မဆရာအရေအတွက်အတော်များများက ပုရိသလိင်တူဓမ္မဆရာများရှိနေခြင်းနှင့် ဓမ္မဆရာလောကအတွင်းသို့ ဆွဲဆောင်ခံရသော ပုရိသလိင်တူသမား . . . အရေအတွက် တရားလွန်များနေကြောင်း ဖော်ပြနေခြင်းပင်ဖြစ်သည်” ဟု ဆို၏။ “မင်္ဂလာဆောင်ခြင်းအမှုကို မပြုရ” ဟူသည် ‘နတ်ဆိုးသွန်သင်ချက်’ ဖြစ်ကြောင်း ကျမ်းစာဖော်ပြသည်မှာ အံ့ဩစရာမဟုတ်ပေ။ (၁ တိမောသေ ၄:၁-၃) “အချို့သောသမိုင်းဆရာများ၏ရှုမြင်ချက်အရ [ဓမ္မဆရာများဆိုင်ရာ အိမ်ထောင်မပြုခြင်း] သည် ပြည့်တန်ဆာများအပါအဝင် အနောက်တိုင်းရှိ အခြားမည်သည့်အဖွဲ့အစည်းထက်မဆို စာရိတ္တရေးကို အလွန်ထိခိုက်နစ်နာစေခဲ့သည်။ . . . [၎င်း] မှာ ခရစ်ယာန်ဘာသာ၏ အမည်ကို အများဆုံး စွန်းထင်းစေခဲ့သည်။ . . . အတင်းအဓမ္မ အိမ်ထောင်မပြုစေခြင်းသည် ဓမ္မဆရာအတန်းအစားလွှာများအား အရေခြုံမှုသို့ ဦးတည်သွားစေလေ့ရှိသည်။ . . . ဓမ္မဆရာတစ်ဦးသည် အကြိမ်ပေါင်းတစ်ထောင် စာရိတ္တယိုယွင်းမှုကိုပြုနိုင်သော်လည်း တစ်ကြိမ်သာအိမ်ထောင်ပြုရန်အတွက်မူ ဓမ္မဆရာများ၏ဝိနည်းဥပဒေက သူအား တားမြစ်ထားသည်” ဟု ပီတာ ဒီ ရိုဆာက သူ၏ Vicars of Christ စာအုပ်တွင် ရေးသားထားသည်။

ဗာလဝတ်ပြုရေးနှင့်ပတ်သက်၍ ဘုရားသခင်၏အမြင်ကို ဆင်ခြင်ကြည့်မည်ဆိုလျှင် ကွဲပြားနေသည့် ခရစ်ယာန်ဘောင်ချာ့ချ်များကို ကိုယ်တော်မည်သို့ ရှုမြင်မည်ကို ထိုးထွင်းသိမြင်ရန် မခက်ခဲပါလေ။ ကျမ်းစာ၏နောက်ဆုံးစာစောင်က မှောက်မှားသည့်ဝတ်ပြုရေးပုံစံအားလုံးတို့ကို “ဗာဗုလုန်မြို့ကြီး၊ ပြည့်တန်ဆာတို့၏အမိ၊ မြေ၌စက်ဆုပ်ရွံရှာဖွယ်သောအရာတို့၏အမိ” ဟူသည့်အမည်နာမ၌ စုပေါင်းထည့်ထားသည်။ “ပရောဖက်တို့၏အသွေး၊ သန့်ရှင်းသူတို့၏အသွေး၊ မြေကြီးပေါ်မှာကွပ်မျက်သောသူအပေါင်းတို့၏အသွေးကို ထိုမြို့၌တွေ့၏” ဟု ကျမ်းစာက ထပ်ဆင့်လိုက်သေးသည်။—ဗျာဒိတ် ၁၇:၅; ၁၈:၂၄။

ထို့ကြောင့် ဘုရားသခင်က မိမိ၏စစ်မှန်သောဝတ်ပြုကိုးကွယ်သူများ ဖြစ်လိုသူတို့ကို “ငါ၏လူမျိုးတို့၊ သူ၏အပြစ်တို့ကို ဆက်ဆံခြင်းနှင့်လည်းကောင်း၊ သူ၏ဘေးဒဏ်များကို ခံခြင်းနှင့်လည်းကောင်း ကင်းလွတ်အံ့သောငှာ သူ၏အထဲကထွက်ကြလော့။ . . . သူခံရသောသေခြင်းဘေး၊ စိတ်မသာညည်းတွားခြင်းဘေး၊ မွတ်သိပ်ခြင်း ဘေးဒဏ်များတို့နှင့် တစ်နေ့ခြင်းတွင်တွေ့ ၍ မီးဖြင့်လည်း ကျွမ်းလောင်ခြင်းကို ခံရလိမ့်မည်။ သူ့ကိုစီရင်တော်မူသော ထာဝရအရှင်ဘုရားသခင်သည် ခွန်အားဗလကြီးတော်မူ၏” ဟု လှုံ့ဆော်တိုက်တွန်းထားသည်။—ဗျာဒိတ် ၁၈:၄၊ ၈။

. . . ။ အဘယ်ကဲ့သို့သော ဝတ်ပြုကိုးကွယ်မှုပုံစံမျိုးကို ဘုရားသခင်လက်ခံတော်မူမည်နည်း။

[စာမျက်နှာ ၅ ပါ လေးထောင့်ကွက်/ရုပ်ပုံ]

ရုပ်ပုံကိုးကွယ်မှု

ဗာလဝတ်ပြုကိုးကွယ်ရေးတွင် ရုပ်ပုံများကို အသုံးပြုခြင်းပါဝင်သည်။ ဣသရေလလူမျိုးတို့သည် ယေဟောဝါ၏ဝတ်ပြုကိုးကွယ်ရေးကို ဗာလ၏ဝတ်ပြုကိုးကွယ်ရေးနှင့် ရောနှောရန် ကြိုးစားခဲ့ကြသည်။ ယေဟောဝါ၏ဗိမာန်တော်အတွင်းသို့ပင် ရုပ်ပုံများကို ယူဆောင်လာကြသည်။ ယေရုရှလင်နှင့် ယင်း၏ဗိမာန်တော်ကို ဘုရားသခင် ဖျက်ဆီးခဲ့ချိန်၌ ရုပ်ပုံဝတ်ပြုကိုးကွယ်ခြင်းနှင့်ပတ်သက်သော ဘုရားသခင်၏အမြင်သည် ရှင်းလင်းထင်ရှားခဲ့သည်။

ခရစ်ယာန်ဘောင်ချာ့ချ်များစွာတို့တွင် လက်ဝါးကားတိုင်ပုံ၊ သူတော်စင်ပုံနှင့် မာရိရုပ်ပုံများတို့နှင့် ပြည့်နှက်နေသည်။ ထို့ ပြင် ချာ့ချ်သို့သွားသောသူ များစွာတို့သည်လည်း ထိုရုပ်ပုံများရှေ့ ၌ ဦးညွတ်ဒူးထောက်ရန် သို့မဟုတ် လက်ဝါးကပ်တိုင်သင်္ကေတမျိုးပြုလုပ်ရန် သွန်သင်ခံရသည်။ ယင်းနှင့်ဆန့်ကျင်လျက် စစ်မှန်သောခရစ်ယာန်များသည် ရုပ်ပုံကို “ကိုးကွယ်ခြင်းအမှုကို ကြဉ်ရှောင်ကြ” ရန် မိန့်မှာခံရကြသည်။ (၁ ကောရိန္သု ၁၀:၁၄) သူတို့သည် ရုပ်ဝတ္ထုပစ္စည်းများ၏အကူအညီဖြင့် ဘုရားသခင်ကို ဝတ်ပြုကိုးကွယ်ရန် မကြိုးစားကြချေ။—ယောဟန် ၄:၂၄။

[Credit Line]

Musée du Louvre, Paris

[စာမျက်နှာ ၅ ပါ လေးထောင့်ကွက်]

“ချာ့ချ်ခေါင်းဆောင်သည် အပြစ်ကင်းသင့်သည်”

ဤအသုံးအနှုန်းသည် တိတု ၁:၇ ကို Today’s English Version အရ ဖတ်ရခြင်းဖြစ်သည်။ King James Version တွင်ဤသို့ဖတ်ရသည်– “ဘိရှော့သည် အပြစ်ဆိုဖွယ်မရှိသူဖြစ်ရမည်။” “ဘိရှော့” ဟူသည့် စကားလုံးသည် “ကြီးကြပ်မှူး” ဟုအဓိပ္ပာယ်ရသည့် ဂရိစကားလုံးမှ ဆင်းသက်လာသည်။ ထို့ကြောင့် စစ်မှန်သောခရစ်ယာန်အသင်းတော်တွင် ဦးဆောင်ဦးရွက်ပြုရန် ခန့်အပ်ခြင်းခံရသောအမျိုးသားများသည် အခြေခံကျမ်းစာစံနှုန်းများကို ပြည့်မီရမည်။ သူတို့သည် မပြည့်မီပါက “သိုးတော်စုရှေ့မှာ ပုံသက်သေ” မဖြစ်တော့သောကြောင့် သူတို့ရထားသည့် ကြီးကြပ်မှုအခွင့်အရာမှ ပယ်ရှားခံရသင့်သည်။ (၁ ပေတရု ၅:၂၊ ၃) ခရစ်ယာန်ဘောင်ချာ့ချ်များသည် ဤတောင်းဆိုချက်ကို မည်မျှအလေးအနက်ထားသနည်း။

ဒေါက်တာ အဲဗ်ရက်တ် ဝေါ်သင်တန်က သူ၏စာအုပ်ဖြစ်သော I Care About Your Marriage တွင် အမေရိကန်နိုင်ငံ၊ ဗာဂျီးနီးယားပြည်နယ်ရှိ ပါစတာ ၁၀၀ အား ဆွေးနွေးသုံးသပ်မှုကို ကိုးကားတင်ပြထားသည်။ ၄၀ ရာနှုန်းကျော်တို့က မိမိတို့၏အိမ်ထောင်ဖက်မဟုတ်သူတစ်ဦးဦးနှင့် ကာမရာဂနှိုးဆွပေးသောအကျင့်တစ်မျိုးတွင် ပါဝင်ခဲ့ကြောင်း ဝန်ခံကြသည်။ သူတို့ထဲမှ အခြားသူများစွာသည် သူ့သားအိမ်ရာပြစ်မှားခဲ့ကြသည်။

Christianity Today က သတိပြုမိသည့်အချက်မှာ “လွန်ခဲ့သည့်ဆယ်စုနှစ်တစ်လျှောက် ချာ့ချ်သည် အလေးစားခံရဆုံးသောခေါင်းဆောင်တချို့က အကျင့်ပျက်မှုကို လှစ်ဟပြခဲ့သောကြောင့် အကြိမ်ကြိမ်တုန်လှုပ်ချောက်ချားသွားခဲ့ရသည်။” “သူ့သားအိမ်ရာပြစ်မှားသော ပါစတာများကို ပြန်မခန့်သင့်သည့်အကြောင်း” အမည်ရှိဆောင်းပါးသည် “လိင်မှုကိစ္စဆိုင်ရာအပြစ်ကြောင့် အပြစ်စီရင်” ခံရပြီးနောက်ပိုင်း ချာ့ချ်ခေါင်းဆောင်များကို သူတို့၏မူလရာထူးများတွင် မြန်မြန်ဆန်ဆန်ပြန်ခန့်သည့် ခရစ်ယာန်ဘောင်မှ လုပ်နေကျလုပ်ရပ်များကို စောဒကတက်ခဲ့သည်။