ယေဟောဝါ၏မိသားစုသည် တန်ဖိုးရှိစည်းလုံးမှု၌ မွေ့လျော်လျက်ရှိ၏

“ညီအစ်ကိုတို့သည် သဘောတူလျက်ပေါင်းဖော်ကြသည်အရာမှာ အလွန်ကောင်းပေ၏။”—ဆာလံ ၁၃၃:၁။

၁။ ယနေ့ခေတ်တွင်ရှိသော မိသားစုများစွာတို့၏အခြေအနေကား အဘယ်နည်း။

ယနေ့မိသားစုသည် အန္တရာယ်နှင့်ကြုံဆုံနေရ၏။ မိသားစုများစွာတို့၌ အိမ်ထောင်ရေးနှောင်ကြိုးသည် ပြတ်တောက်တော့မည့်အခြေအနေ၌ ဆိုက်ရောက်နေသည်။ ကွာရှင်းပြတ်စဲမှုသည် ဖြစ်နေကျ အဖြစ်အပျက်မျှသာဖြစ်လာပြီး ကွာရှင်းပြတ်စဲလိုက်ကြသော ဇနီးမောင်နှံတို့၏သားသမီးများမှာ ဝမ်းနည်းကြေကွဲမှုကို ကြုံတွေ့ခံစားနေကြရသည်။ သန်းပေါင်းများစွာသော မိသားစုတို့၌ ပျော်ရွှင်မှုနှင့် စည်းလုံးမှုမရှိကြတော့ချေ။ သို့သော်လည်း စစ်မှန်သောရွှင်လန်းမှုနှင့် စည်းလုံးမှုကို သိရှိခံစားနေကြရသော မိသားစုကြီးတစ်စုရှိ၏။ ၎င်းမှာ ယေဟောဝါဘုရားသခင်၏ စကြဝဠာဆိုင်ရာ အိမ်ထောင်စုကြီးပင်ဖြစ်ပေသည်။ ထိုအထဲ၌ ရေတွက်၍ပင်မရနိုင်သော မျက်မြင်မရကောင်းကင်တမန်များသည် သူတို့ကိုခန့်အပ်ထားသောအလုပ်များကို ဘုရားသခင်၏အလိုတော်နှင့်အညီ လုပ်ဆောင်လျက်ရှိကြ၏။ (ဆာလံ ၁၀၃:၂၀၊ ၂၁) သို့သော်လည်း ထိုကဲ့သို့သော စည်းလုံးမှုကို မွေ့လျော်ခံစားလျက်ရှိသည့် မိသားစုတစ်စု မြေကြီးပေါ်၌ရှိပါသလော။

၂၊ ၃။ (က) ယခု မည်သူတို့သည် ဘုရားသခင့်စကြဝဠာမိသားစုဝင်များဖြစ်ကြသနည်း။ ယနေ့ခေတ်ရှိ ယေဟောဝါသက်သေအားလုံးတို့ကို အဘယ်အရာနှင့် ကျွန်ုပ်တို့ခိုင်းနှိုင်းနိုင်သနည်း။ (ခ) အဘယ်မေးခွန်းများကို ကျွန်ုပ်တို့ဆွေးနွေးသုံးသပ်ကြမည်နည်း။

^၂ ‘ကောင်းကင်ပေါ်၊ မြေကြီးပေါ်မှာရှိသော မိသားစုအားလုံး မိမိတို့အမည်ကိုရစေသော ခမည်းတော်ထံ၌ ငါသည် ဒူးထောက်ပါ၏’ ဟု တမန်တော်ပေါလုရေးသားခဲ့သည်။ (ဧဖက် ၃:၁၄၊ ၁၅၊ ကဘ) ကမ္ဘာမြေပေါ်တွင်ရှိသော မိသားစုမျိုးရိုးစဉ်ဆက်အားလုံးတို့သည် ဘုရားသခင်ထံမှ အမည်ရကြ၏။ အကြောင်းမှာ ကိုယ်တော်သည် ဖန်ဆင်းရှင်ဖြစ်သောကြောင့်ဖြစ်၏။ ကောင်းကင်ပေါ်၌ အဘယ်လူ့မိသားစုမျှ မရှိပါသော်လည်း ပုံဆောင်သဘောအရပြောရလျှင် ဘုရားသခင်သည် မိမိ၏ကောင်းကင်အဖွဲ့အစည်းတော်နှင့် ထိမ်းမြားခဲ့ပြီး ယေရှုသည် ကောင်းကင်၌ မိမိနှင့် ပေါင်းစည်းမည့် ဝိညာဏသတို့သမီးတစ်ဦးကို ရရှိမည်ဖြစ်သည်။ (ဟေရှာယ ၅၄:၅; လုကာ ၂၀:၃၄၊ ၃၅; ၁ ကောရိန္သု ၁၅:၅၀; ၂ ကောရိန္သု ၁၁:၂) မြေကြီးပေါ်တွင်ရှိသော သစ္စာရှိဘိသိက်ခံများသည် ယခုအချိန်၌ ဘုရားသခင့်စကြဝဠာဆိုင်ရာမိသားစုကြီး၏ အစိတ်အပိုင်းဖြစ်ကြပြီး မြေကြီးမျှော်လင့်ချက်ရှိသော ယေရှု၏ “အခြားသိုးတို့” သည် ၎င်း၏အလားအလာရှိသော မိသားစုဝင်များဖြစ်ကြသည်။ (ယောဟန် ၁၀:၁၆; ရောမ ၈:၁၄-၁၇; ကင်းမျှော်စင် ဇန်နဝါရီ ၁၅၊ ၁၉၉၆၊ စာမျက်နှာ ၃၁) မည်သို့ပင်ဆိုစေ ယနေ့ခေတ်တွင်ရှိသော ယေဟောဝါသက်သေအားလုံးတို့ကို စည်းလုံးသည့် ကမ္ဘာချီမိသားစုတစ်စုနှင့် ခိုင်းနှိုင်းနိုင်လေသည်။

^၃ သင်သည် အပြည်ပြည်ဆိုင်ရာ ဘုရားသခင့်ကျေးကျွန်များ၏ အံ့ဖွယ်မိသားစု အစိတ်အပိုင်းဝင်ဖြစ်ပါသလော။ ဖြစ်ပါက သင်သည် မည်သူမဆိုရရှိနိုင်သည့် အကြီးမားဆုံးသောကောင်းချီးများမှ တစ်ခုကို မွေ့လျော်နေခြင်းဖြစ်သည်။ ယေဟောဝါ၏ကမ္ဘာချီမိသားစုကြီး—ကိုယ်တော်၏မျက်မြင်ရအဖွဲ့အစည်း—သည် ခိုက်ရန်ဖြစ်ပွားလျက် စည်းလုံးမှုမရှိသော လောကကန္တာရထဲမှ ငြိမ်းချမ်း၍ စည်းလုံးသည့် အိုအေစစ်တစ်ခုဖြစ်ကြောင်း သန်းပေါင်းများစွာတို့က ထောက်ခံကြပေလိမ့်မည်။ ယေဟောဝါ၏ကမ္ဘာချီမိသားစုစည်းလုံးမှုကို မည်သို့သရုပ်ဖော်ပြနိုင်မည်နည်း။ ထို့ပြင် ထိုကဲ့သို့သောစည်းလုံးမှုကို တိုးပွားအောင်လှုံ့ဆော်ပေးသော အကြောင်းတရားများကား အဘယ်နည်း။

အလွန်ကောင်း၍ တင့်တယ်လျောက်ပတ်လှပါသည်တကား!

၄။ ညီအစ်ကိုချင်းစည်းလုံးမှုနှင့်ပတ်သက်၍ ဆာလံ ၁၃၃ ၌ ဖော်ပြထားသည့်အရာကို သင့်ကိုယ်ပိုင်စကားဖြင့် မည်သို့ဖော်ပြမည်နည်း။

^၄ ဆာလံဆရာဒါဝိဒ်သည် ညီအစ်ကိုချင်းစည်းလုံးညီညွတ်မှုကို အလွန်တန်ဖိုးထားလေးမြတ်၏။ သူသည် ၎င်းနှင့်ပတ်သက်၍ သီဆိုဖွဲ့နွဲ့ရန်ပင် မှုတ်သွင်းခံရသည်တကား! “ညီအစ်ကိုတို့သည် သဘောတူလျက်ပေါင်းဖော်ကြသည်အရာမှာ အလွန်ကောင်းပေ၏။ အလွန်တင့်တယ်လျောက်ပတ်ပေ၏။ အာရုန်၏ခေါင်းပေါ်မှာ လောင်းလျက်၊ သူ၏မုတ်ဆိတ်သို့စီး၍ လည်ခွံတိုင်အောင်ကျသော နံ့သာဆီကဲ့သို့ဖြစ်၏။ ဟေရမုန်တောင်မှနှင်းသည် ဇိအုန်တောင်များပေါ်သို့ ကျသကဲ့သို့ဖြစ်၏။ ထိုအရပ်၌ပင် ထာဝရဘုရားသည် အစဉ်အမြဲအသက်ရှင်ခြင်းအခွင့်တည်းဟူသော ကောင်းချီးမင်္ဂလာကို စီရင်တော်မူ၏” ဟု သူ၏စောင်းဖြင့်သီဆိုခဲ့သည်ကို မြင်ယောင်ကြည့်ပါ။—ဆာလံ ၁၃၃:၁-၃၊ သမ္မာ။

၅။ ဆာလံ ၁၃၃:၁၊ ၂ ကို အခြေပြုလျက် ဣသရေလလူမျိုးနှင့် ဘုရားသခင်၏ မျက်မှောက်ခေတ်ကျေးကျွန်များအကြား၌ အဘယ်နှိုင်းယှဉ်ချက်ကို ပြုနိုင်မည်နည်း။

^၅ ထိုစကားများသည် ဘုရားသခင်၏ ရှေးလူမျိုးတော်ဖြစ်သော ဣသရေလလူမျိုးများ မွေ့လျော်ခံစားခဲ့ကြသည့် ညီအစ်ကိုချင်းစည်းလုံးညီညွတ်မှုကို ရည်ညွှန်းနေခြင်းဖြစ်သည်။ သူတို့သည် နှစ်ပတ်လည် ပွဲတော်သုံးရပ်အတွက် ယေရုရှလင်မြို့၌ ရောက်နေကြစဉ် အမှန်တကယ်ပင် စည်းလုံးစွာနေထိုင်ခဲ့ကြသည်။ သူတို့သည် အမျိုးအနွယ်အသီးသီးတို့မှ ဆင်းသက်လာကြသူများဖြစ်သော်လည်း မိသားစုတစ်စုတည်းဖြစ်ကြ၏။ အတူတကွရှိနေခြင်းက လန်းဆန်းစေသည့် နှစ်သက်ဖွယ်ရနံ့ရှိသော ဘိသိက်ဆီကဲ့သို့ သူတို့ပေါ်၌ ကောင်းကျိုးသက်ရောက်မှုရှိလေသည်။ ထိုကဲ့သို့သော နံ့သာဆီကို အာရုန်၏ခေါင်းပေါ်သို့ သွန်းလောင်းခဲ့စဉ်က ၎င်းသည် သူ၏မုတ်ဆိတ်သို့ စီးဆင်းသွားပြီး သူ၏အင်္ကျီကော်လာသို့ ရောက်သွား၏။ ဣသရေလလူမျိုးများအတွက်၊ အတူတကွရှိနေခြင်းသည် စုရုံးနေသောလူများတို့ကို အုပ်စုတစ်စုအဖြစ် ကောင်းသောသြဇာသက်ရောက်မှုရှိလေသည်။ နားလည်လွဲမှုများ ပြေရှင်းသွားကာ စည်းလုံးမှု တိုးပွားလာသည်။ ယနေ့ ယေဟောဝါ၏ကမ္ဘာချီမိသားစုကြီးတွင် ထပ်တူစည်းလုံးမှုမျိုးရှိပေသည်။ မှန်မှန်ပေါင်းသင်းခြင်းက ၎င်း၏မိသားစုဝင်များကို အကျိုးဖြစ်ထွန်းသောဝိညာဏကောင်းကျိုးသက်ရောက်စေသည်။ ဘုရားသခင့်နှုတ်ကပါဌ်တော်သြဝါဒကို လိုက်လျှောက်ကြသောအခါ အဘယ်နားလည်လွဲမှုနှင့် အခက်အခဲများမဆို ပပျောက်သွားမည်ဖြစ်သည်။ (မဿဲ ၅:၂၃၊ ၂၄; ၁၈:၁၅-၁၇) ယေဟောဝါ၏လူမျိုးတော်သည် သူတို့၏ညီအစ်ကိုချင်းစည်းလုံးညီညွတ်မှုမှရရှိသော အပြန်အလှန်အားပေးမှုကို အလွန်တန်ဖိုးထားကြလေသည်။

၆၊ ၇။ ဣသရေလတို့၏စည်းလုံးမှုသည် ဟေရမုန်တောင်မှ နှင်းများနှင့် မည်သို့တူညီသနည်း။ ယနေ့ခေတ်၌ ဘုရားသခင်၏ကောင်းချီးကို အဘယ်နေရာတွင် ရှာတွေ့နိုင်မည်နည်း။

^၆ ဣသရေလတို့၏ စည်းလုံးစွာအတူတကွနေထိုင်ကြခြင်းသည် ဟေရမုန်တောင်မှ နှင်းများနှင့်လည်း မည်သို့တူညီသနည်း။ အဆိုပါတောင်သည် ပင်လယ်ရေမျက်နှာပြင်အထက် ပေ ၉,၀၀၀ ကျော်မြင့်သောကြောင့် တစ်နှစ်ပတ်လုံးနီးပါး နှင်းများဖုံးလွှမ်းနေသည်။ ဟေရမုန်၏ နှင်းဖုံးနေသောတောင်ထိပ်က ညအချိန်၌ ပြန်သောရေခိုးရေငွေ့များကို ငွေ့ရည်ဖွဲ့ပေးသောကြောင့် နှင်းပေါက်များကိုကျစေပြီး ရှည်လျားသောခြောက်သွေ့ရာသီအတောအတွင်း၌ အသီးအနှံများကို ဆက်လက်ရှင်သန်စေသည်။ ဟေရမုန်တောင်တန်းမှ အေးမြသောလေစီးကြောင်းက အဆိုပါရေခိုးရေငွေ့များကို တောင်ဘက်ယေရုရှလင်ဒေသအထိ သယ်ဆောင်သွားနိုင်ပြီး ထိုတွင် နှင်းများအဖြစ် ငွေ့ရည်ဖွဲ့သည်။ ထို့ကြောင့် ဆာလံဆရာက ‘ဟေရမုန်တောင်နှင်းသည် ဇိအုန်တောင်များပေါ်သို့ကျသည်’ ဟု မှန်ကန်စွာပြောဆိုခဲ့လေသည်။ ယေဟောဝါကို ဝတ်ပြုကိုးကွယ်သူမိသားစု၏ စည်းလုံးမှုကို တိုးပွားအောင်လှုံ့ဆော်ပေးသည့် နှစ်လိုဖွယ်သြဇာသက်ရောက်မှုကို သတိရစေသည့်အချက်ကောင်းပါတကား!

^၇ ခရစ်ယာန်အသင်းတော် မတည်ထောင်မီ ဇိအုန် သို့မဟုတ် ယေရုရှလင်သည် စစ်မှန်သောဝတ်ပြုကိုးကွယ်မှု၏ဗဟိုဖြစ်သည်။ ထို့ကြောင့် ထိုတွင် ကောင်းချီးများတည်နေရန် ဘုရားသခင်မိန့်တော်မူခဲ့ခြင်းဖြစ်၏။ ကောင်းချီးမင်္ဂလာအားလုံး၏ အရင်းအမြစ်မှာ ယေရုရှလင်မြို့၏သန့်ရှင်းရာဌာန၌ ကိုယ်စားပြုတည်နေသောကြောင့် ကောင်းချီးမင်္ဂလာများသည် ထိုမှထွက်ပေါ်လာလိမ့်မည်ဖြစ်သည်။ စစ်မှန်သောဝတ်ပြုရေးသည် အဘယ်အရပ်ဒေသကိုမျှ အမှီမပြုတော့သော်လည်း ကောင်းချီး၊ မေတ္တာနှင့် ဘုရားသခင့်ကျေးကျွန်များ၏စည်းလုံးမှုကို ကမ္ဘာမြေတစ်လွှား၌ ယနေ့တွေ့ မြင်နိုင်ပါသည်။ (ယောဟန် ၁၃:၃၄၊ ၃၅) ဤစည်းလုံးမှုကို တိုးပွားအောင်လှုံ့ဆော်ပေးသော အကြောင်းတရားအချို့ကား အဘယ်နည်း။

စည်းလုံးမှုကို တိုးပွားအောင်လှုံ့ဆော်ပေးသော အကြောင်းတရားများ

၈။ ယောဟန် ၁၇:၂၀၊ ၂၁ ၌ စည်းလုံးမှုနှင့်ပတ်သက်၍ အဘယ်အရာကို ကျွန်ုပ်တို့သင်ယူရရှိသနည်း။

^၈ ယေဟောဝါကို ဝတ်ပြုကိုးကွယ်သူများ၏စည်းလုံးမှုသည် ယေရှုခရစ်တော်၏သွန်သင်ချက်များအပါအဝင် ဘုရားသခင်၏နှုတ်ကပါဌ်တော်ကို မှန်ကန်စွာနားလည်ပြီး လိုက်လျှောက်ခြင်းအပေါ် မူတည်၏။ သမ္မာတရားကိုသက်သေခံရန်နှင့် ယဇ်သကာအဖြစ်အသေခံရန် မိမိ၏သားတော်ကို ဤလောကသို့ ယေဟောဝါစေလွှတ်ခဲ့ခြင်းအားဖြင့် စည်းလုံးသောခရစ်ယာန်အသင်းတော်ကို ဖွဲ့စည်းထူထောင်ရန်အတွက် လမ်းပွင့်သွားခဲ့သည်။ (ယောဟန် ၃:၁၆; ၁၈:၃၇) “ထိုသူတို့အဖို့ကိုသာ အကျွန်ုပ်ဆုတောင်းသည်မဟုတ်ပါ။ သူတို့ဟောပြောခြင်းအားဖြင့် အကျွန်ုပ်ကိုယုံကြည်သောသူတို့အဖို့ကိုလည်း ဆုတောင်းပါ၏။ ကိုယ်တော်သည် အကျွန်ုပ်ကိုစေလွှတ်တော်မူသည်ကို လောကီသားတို့သည် ယုံကြမည်အကြောင်း ထိုသူအပေါင်းတို့သည် တလုံးတဝတည်းဖြစ်လျက်၊ အဘ ကိုယ်တော်သည် အကျွန်ုပ်၌ရှိတော်မူ၍ အကျွန်ုပ်သည်လည်း ကိုယ်တော်၌ရှိသကဲ့သို့ ထိုသူအပေါင်းတို့သည် ငါတို့၌တလုံးတဝတည်းဖြစ်စေခြင်းငှာ ဆုတောင်းပါ၏” ဟု ယေရှုဆုတောင်းခဲ့စဉ်က ထိုအသင်းသားများအကြား၌ စစ်မှန်သောစည်းလုံးမှုရှိရမည်အကြောင်း ရှင်းလင်းစွာဖော်ပြခဲ့သည်။ (ယောဟန် ၁၇:၂၀၊ ၂၁) ဘုရားသခင်နှင့် ကိုယ်တော့်သားတော်အကြား၌ရှိသော စည်းလုံးမှုမျိုးကို ယေရှု၏နောက်တော်လိုက်များ အမှန်ပင်ရရှိခဲ့ကြ၏။ ဤသို့ဖြစ်ရခြင်းမှာ သူတို့သည် ဘုရားသခင်၏နှုတ်ကပါဌ်တော်နှင့် ယေရှု၏သွန်သင်ချက်များကို လိုက်လျှောက်ကြသောကြောင့်ဖြစ်သည်။ ထပ်တူသဘောထားသည် ယနေ့ ယေဟောဝါ၏ကမ္ဘာချီမိသားစု စည်းလုံးရခြင်း၏ အဓိကအကြောင်းတရားတစ်ခုဖြစ်လေသည်။

၉။ ယေဟောဝါလူမျိုးတော်၏စည်းလုံးမှုနှင့်စပ်လျဉ်း၍ သန့်ရှင်းသောဝိညာဉ်တော်သည် အဘယ်ကဏ္ဍ၌ ပါဝင်သနည်း။

^၉ ယေဟောဝါ၏လူမျိုးတော်ကို စည်းလုံးစေသော နောက်အကြောင်းတရားတစ်ခုမှာ ဘုရားသခင်၏သန့်ရှင်းသောဝိညာဉ်တော် သို့မဟုတ် တက်ကြွလှုပ်ရှားသောစွမ်းအား ကျွန်ုပ်တို့တွင်ရှိသောကြောင့်ဖြစ်၏။ ၎င်းက ယေဟောဝါ၏နှုတ်ကပါဌ်တော်ပါ ဖော်ပြထားသောသမ္မာတရားကို ကျွန်ုပ်တို့အား နားလည်စေသောကြောင့် ကိုယ်တော့်ထံ၌ စည်းလုံးစွာဖြင့် အမှုထမ်းနိုင်စေသည်။ (ယောဟန် ၁၆:၁၂၊ ၁၃) ခိုက်ရန်ဖြစ်ပွားခြင်း၊ မနာလိုခြင်း၊ အမျက်ဒေါသထွက်ခြင်းနှင့် ဆိုင်ပြိုင်ခြင်းကဲ့သို့သော စည်းလုံးမှုမဲ့စေသည့် ဇာတိပကတိအကျင့်များကို ရှောင်ကြဉ်ရန် ဝိညာဉ်တော်က ကျွန်ုပ်တို့ကို ကူညီပေး၏။ ယင်းအစား ဘုရားသခင်၏ဝိညာဉ်တော်သည် စည်းလုံးမှုရှိစေသော အသီးများဖြစ်သည့် ချစ်ခြင်း၊ ဝမ်းမြောက်ခြင်း၊ ငြိမ်သက်ခြင်း၊ စိတ်ရှည်ခြင်း၊ ကျေးဇူးပြုခြင်း၊ ကောင်းမြတ်ခြင်း၊ သစ္စာစောင့်ခြင်း၊ နူးညံ့သိမ်မွေ့ ခြင်းနှင့် ကာမဂုဏ်ချုပ်တည်းခြင်းတို့ကို ကျွန်ုပ်တို့၌သီးပွင့်စေလေသည်။—ဂလာတိ ၅:၁၉-၂၃။

၁၀။ (က) စည်းလုံးသော လူ့မိသားစုတစ်စု၌ရှိသည့် မေတ္တာနှင့် ယေဟောဝါထံ ဆက်ကပ်အပ်နှံထားသူတို့အကြား၌ ထင်ရှားသော မေတ္တာတို့တွင် အဘယ်ခိုင်းနှိုင်းချက်ကို ပြုနိုင်မည်နည်း။ (ခ) ဝိညာဏညီအစ်ကိုများကို တွေ့ဆုံရခြင်းနှင့်စပ်လျဉ်း၍ အုပ်ချုပ်ရေးအဖွဲ့ဝင်တစ်ဦးက သူ၏ခံစားချက်များကို မည်သို့ဖော်ပြခဲ့သနည်း။

^၁၀ စည်းလုံးသောမိသားစုတစ်စု၏ မိသားစုဝင်များသည် တစ်ဦးကိုတစ်ဦးချစ်မြတ်နိုးကြပြီး အတူတကွနေထိုင်ရခြင်းအတွက် ပျော်ရွှင်ကြသည်။ ထိုနည်းတူ ယေဟောဝါကို ဝတ်ပြုကိုးကွယ်သူ၊ စည်းလုံးသောမိသားစုတွင်ရှိသည့် သူများသည် ကိုယ်တော်၊ ကိုယ်တော်၏သားတော်နှင့် ယုံကြည်သူချင်းများကို ချစ်မြတ်နိုးကြသည်။ (မာကု ၁၂:၃၀; ယောဟန် ၂၁:၁၅-၁၇; ၁ ယောဟန် ၄:၂၁) ချစ်ခင်မြတ်နိုးမှုရှိသော မိသားစုတစ်စုသည် အတူတကွအစာစားသုံးရခြင်းကို ပျော်ပိုက်သကဲ့သို့ ဘုရားသခင်ထံ ဆက်ကပ်အပ်နှံထားသူများသည် ကောင်းသောပေါင်းသင်းမှုနှင့် အကောင်းဆုံးသောဝိညာဏအစားအစာများမှ အကျိုးရရှိရန် ခရစ်ယာန်စည်းဝေးများနှင့် စည်းဝေးကြီးများတွင် ရောက်ရှိနေရခြင်းကို နှစ်သက်ကြ၏။ (မဿဲ ၂၄:၄၅-၄၇; ဟေဗြဲ ၁၀:၂၄၊ ၂၅) “ကျွန်တော့်အတွက်ကတော့ ညီအစ်ကိုတွေနဲ့တွေ့ဆုံရတာဟာ ဘဝအသက်တာမှာ အကြီးမားဆုံးသောပျော်ရွှင်စရာနဲ့ အားပေးမှုရဲ့အရင်းအမြစ်တစ်ခု ဖြစ်ပါတယ်။ ဖြစ်နိုင်မယ်ဆိုရင် ဘုရားသခင့်နိုင်ငံတော်ခန်းမကို ဦးဆုံးရောက်ရှိတဲ့သူနဲ့ နောက်အကျဆုံးမှ ပြန်တဲ့သူတွေအဝင် ဖြစ်ရတာကို ကျွန်တော်နှစ်သက်တယ်။ ဘုရားသခင်ရဲ့လူမျိုးတော်နဲ့စကားပြောရတဲ့အခါတွေမှာ အတွင်းပိုင်းကနေကို ကျွန်တော်ပျော်ရွှင်မှုခံစားရတယ်။ သူတို့နဲ့အတူရှိနေချိန်မှာ ကျွန်တော့်မိသားစုနဲ့ အိမ်မှာရှိနေရသလိုပဲ ခံစားရတယ်” ဟု ယေဟောဝါသက်သေများ၏ အုပ်ချုပ်ရေးအဖွဲ့မှ အဖွဲ့ဝင်တစ်ဦး တစ်ခါကပြောပြခဲ့ဖူးသည်။ သင်ထိုသို့ပင် ခံစားရပါသလော။—ဆာလံ ၂၇:၄။

၁၁။ ယေဟောဝါသက်သေများသည် အဘယ်အလုပ်၌ အထူးသဖြင့် ရွှင်လန်းမှုကို ရှာတွေ့ ကြသနည်း။ ဘုရားသခင်၏လုပ်ငန်းတော်ကို ကျွန်ုပ်တို့ဘဝအသက်တာတွင် အဓိကအာရုံစိုက်စရာဖြစ်စေခြင်းမှ အဘယ်အကျိုးရလဒ်များ ဖြစ်ထွန်းမည်နည်း။

^၁၁ စည်းလုံးသောမိသားစုတစ်စုသည် အတူတကွအလုပ်လုပ်ဆောင်ရခြင်း၌ ပျော်ရွှင်ကြ၏။ ထိုနည်းထပ်တူ ယေဟောဝါကို ဝတ်ပြုကိုးကွယ်သူမိသားစုတွင်ရှိကြသော သူတို့သည် ဘုရားသခင့်နိုင်ငံတော်ဟောပြောခြင်းနှင့် တပည့်ဖြစ်စေခြင်းလုပ်ငန်း၌ စည်းလုံးစွာလုပ်ဆောင်ရခြင်းအတွက် ပျော်ရွှင်ဝမ်းမြောက်ကြသည်။ (မဿဲ ၂၄:၁၄; ၂၈:၁၉၊ ၂၀) ထိုတွင် မှန်မှန်ပါဝင်နေခြင်းက အခြားသောယေဟောဝါ၏သက်သေများနှင့် ပို၍ရင်းနှီးမှုရှိစေသည်။ ဘုရားသခင်၏လုပ်ငန်းတော်ကို ကျွန်ုပ်တို့အသက်တာတွင် အဓိကအာရုံစိုက်စရာဖြစ်စေပြီး ကိုယ်တော့်လူမျိုးတော်၏လုပ်ဆောင်မှုများအားလုံးကို ထောက်ခံအားပေးခြင်းကလည်း ကျွန်ုပ်တို့အကြား၌ မိသားစုစိတ်ဓာတ်ကို တိုးပွားစေလေသည်။

သီအိုကရက်တစ်အစီအစဉ်သည် မရှိမဖြစ်လိုအပ်၏

၁၂။ ပျော်ရွှင်၍ စည်းလုံးသောမိသားစုတစ်စု၏ သွင်ပြင်လက္ခဏာများကား အဘယ်နည်း။ ပထမရာစုတွင်ရှိသော ခရစ်ယာန်အသင်းတော်များ၌ အဘယ်အစီအစဉ်က စည်းလုံးမှုကို တိုးပွားစေခဲ့သနည်း။

^၁၂ တည်ကြည်ခိုင်မာသော်လည်း မေတ္တာပါသော ဦးဆောင်မှုရှိပြီး စည်းစနစ်ကျနသော မိသားစုတစ်စုသည် စည်းလုံးပြီး ပျော်ရွှင်ရန်အကြောင်းရှိပေသည်။ (ဧဖက် ၅:၂၂၊ ၃၃; ၆:၁) ယေဟောဝါသည် ငြိမ်သက်မှုရှိပြီး စည်းစနစ်ကျနသောဘုရားတစ်ပါးဖြစ်ကာ ကိုယ်တော်၏မိသားစုတွင်ရှိသောသူအားလုံးတို့သည် ကိုယ်တော့်ကို “အမြင့်ဆုံးသောဘုရား” အဖြစ် ကြည်ညိုလေးစားကြသည်။ (ဒံယေလ ၇:၁၈၊ ၂၂၊ ၂၅၊ ၂၇; ၁ ကောရိန္သု ၁၄:၃၃) ကိုယ်တော်သည် မိမိ၏သားတော်ယေရှုခရစ်ကို အရာခပ်သိမ်း၏အမွေခံအဖြစ် ခန့်အပ်ကြောင်းနှင့် ကောင်းကင်နှင့် မြေကြီးပေါ်တွင်ရှိသော အခွင့်အာဏာအားလုံးတို့ကို ကိုယ်တော်အား အပ်နှင်းကြောင်းကိုလည်း သူတို့အသိအမှတ်ပြုကြသည်။ (မဿဲ ၂၈:၁၈; ဟေဗြဲ ၁:၁၊ ၂) ခရစ်တော်၏ဦးစီးမှုဖြင့် ခရစ်ယာန်အသင်းတော်သည် စည်းစနစ်ကျနပြီး စည်းလုံးသောအဖွဲ့အစည်းတစ်ခုဖြစ်ပေသည်။ (ဧဖက် ၅:၂၃) ပထမရာစုရှိ အသင်းတော်များ၏လှုပ်ရှားမှုများကို ကြီးကြပ်ရန် တမန်တော်များနှင့် ဝိညာဉ်ရေးအရ ရင့်ကျက်သော အခြား ‘အသက်ကြီးသူများ’ တို့ဖြင့်ဖွဲ့စည်းထားသည့် အုပ်ချုပ်ရေးအဖွဲ့တစ်ဖွဲ့ရှိသည်။ အသင်းတော်တစ်ခုစီ၌ ခန့်အပ်ခံကြီးကြပ်မှူးများ သို့မဟုတ် အကြီးအကဲမျာနှင့် ဓမ္မအမှုထမ်းများ ရှိကြသည်။ (တမန်တော် ၁၅:၆; ဖိလိပ္ပိ ၁:၁) ထိုဦးဆောင်သူများကို နာခံခြင်းက စည်းလုံးမှုကို တိုးပွားစေသည်။—ဟေဗြဲ ၁၃:၁၇။

၁၃။ လူများကို ယေဟောဝါ မည်သို့ဆွဲဆောင်သနည်း။ ၎င်းမှ အဘယ်အကျိုးရလဒ်များ ဖြစ်ထွန်းသနည်း။

^၁၃ သို့သော် ယေဟောဝါကို ဝတ်ပြုကိုးကွယ်သောသူများ၏စည်းလုံးမှုသည် ကျွမ်းကျင်၍ ပုဂ္ဂိုလ်စွဲမရှိသော ဦးစီးမှုနှင့်စပ်ဆိုင်နိုင်သည်ဟု ဤအစီအစဉ်များအားလုံးတို့က အဆိုပြုပါသလော။ မပြုပါ! ဘုရားသခင် သို့မဟုတ် ကိုယ်တော့်အဖွဲ့အစည်းနှင့်ပတ်သက်၍ မေတ္တာမဲ့သောအရာတစ်ခုမျှမရှိပါ။ ယေဟောဝါသည် မေတ္တာတင်ပြခြင်းအားဖြင့် လူများကို ဆွဲဆောင်ပြီး နှစ်စဉ်နှစ်တိုင်း ထောင်နှင့်သောင်းနှင့်ချီသောသူများသည် ဘုရားသခင်ထံ သူတို့၏စိတ်နှလုံးအကြွင်းမဲ့ဆက်ကပ်အပ်နှံမှု၏ အထိမ်းအမှတ်အဖြစ် နှစ်ခြင်းခံခြင်းအားဖြင့် စိတ်လိုကိုယ်လျောက်နှင့်ပျော်ရွှင်စွာ ယေဟောဝါ၏အဖွဲ့အစည်းတော်၏အစိတ်အပိုင်းဝင်များ ဖြစ်လာကြသည်။ သူတို့၏စိတ်ဓာတ်များသည် “အဘယ်မည်သောဘုရားတို့အား ဝတ်ပြုမည်အရာကို ယနေ့ရွေးကြလော့။ ငါနှင့်ငါ့အိမ်သားဖြစ်လျှင် ထာဝရဘုရားကိုသာ ဝတ်ပြုမည်” ဟူ၍ ဣသရေလအမျိုးသားချင်းတို့ကို တိုက်တွန်းခဲ့သော ယောရှု၏စိတ်ဓာတ်နှင့်တူသည်။—ယောရှု ၂၄:၁၅။

၁၄။ ယေဟောဝါ၏အဖွဲ့အစည်းတော်သည် သီအိုကရက်တစ်ဖြစ်သည်ဟု အဘယ်ကြောင့် ကျွန်ုပ်တို့ပြောဆိုနိုင်သနည်း။

^၁၄ ယေဟောဝါ၏မိသားစုဝင်များအဖြစ် ကျွန်ုပ်တို့သည် ပျော်ရွှင်ဝမ်းမြောက်ကြသည်သာမကဘဲ လုံခြုံမှုလည်းရှိကြ၏။ ယင်းသို့ဖြစ်ရသည့်အကြောင်းမှာ ကိုယ်တော်၏အဖွဲ့အစည်းသည် သီအိုကရက်တစ်ဖြစ်သောကြောင့်ဖြစ်သည်။ ဘုရားသခင်၏နိုင်ငံတော်သည် သီအိုကရေစီစနစ် (ဂရိတွင် သီအော့စ်၊ ဘုရားသခင်နှင့် ကရတော့စ်၊ အုပ်ချုပ်ခြင်း) ဖြစ်၏။ ၎င်းမှာ ဘုရားသခင်၏ အုပ်ချုပ်ခြင်းဖြစ်ပြီး ကိုယ်တော်က စီစဉ်၍ တည်ထောင်ခဲ့ခြင်းဖြစ်သည်။ ယေဟောဝါ၏ ဘိသိက်ခံ “သန့်ရှင်းသောလူမျိုး” သည် ကိုယ်တော်၏အုပ်ချုပ်မှုကို လက်အောက်ခံကြသောကြောင့်လည်း သီအိုကရက်တစ်ဖြစ်ကြ၏။ (၁ ပေတရု ၂:၉) ကျွန်ုပ်တို့၏တရားသူကြီး၊ ပညတ်ပေးရှင်နှင့် ဘုရင်ဖြစ်ပြီး အကြီးမြတ်ဆုံးသော သီအိုကရက်ဖြစ်တော်မူသည့် ယေဟောဝါကြောင့် ကျွန်ုပ်တို့သည် လုံခြုံသည်ဟု ခံစားရရန် အကြောင်းများစွာရှိလေသည်။ (ဟေရှာယ ၃၃:၂၂) သို့သော် ငြင်းခုံမှုအချို့ပေါ်ပေါက်လာပြီး ကျွန်ုပ်တို့၏ပျော်ရွှင်မှု၊ လုံခြုံမှုနှင့် စည်းလုံးမှုကို ခြိမ်းခြောက်လာပါက မည်သို့ပြုမည်နည်း။

အုပ်ချုပ်ရေးအဖွဲ့က အရေးယူဆောင်ရွက်

၁၅၊ ၁၆။ ပထမရာစု၌ အဘယ်ငြင်းခုံမှု ဖြစ်ပွားခဲ့သနည်း။ အဘယ်ကြောင့်နည်း။

^၁၅ မိသားစု၏စည်းလုံးမှုကို ထိန်းသိမ်းရန် ရံဖန်ရံခါ ငြင်းခုံမှုများကို ဖြေရှင်းရလိမ့်မည်ဖြစ်သည်။ စီ.အီး. ပထမရာစုတွင်ရှိသော ဘုရားသခင်ကို ဝတ်ပြုကိုးကွယ်သည့်မိသားစု၏စည်းလုံးမှုကို ထိန်းသိမ်းရန် ဝိညာဏပြဿနာတစ်ခုကို ဖြေရှင်းစရာရှိသည်ဟု ဆိုကြပါစို့။ ဘာပြုလုပ်ရမည်နည်း။ အုပ်ချုပ်ရေးအဖွဲ့က ဝိညာဉ်ရေးကိစ္စရပ်များကို ဆုံးဖြတ်ချက်များ ချမှတ်ကာ အရေးယူဆောင်ရွက်ခဲ့လေသည်။ ထိုအရေးယူဆောင်ရွက်မှုနှင့်ပတ်သက်သော ကျမ်းစာမှတ်တမ်း ကျွန်ုပ်တို့တွင် ရှိပါသည်။

^၁၆ စီ.အီး. ၄၉ ခုနှစ်ခန့်၌ အုပ်ချုပ်ရေးအဖွဲ့သည် အရေးကြီးပြဿနာတစ်ခုကို ဖြေရှင်းခြင်းအားဖြင့် “ဘုရားသခင်၏အိမ်တော်သား” များ၏စည်းလုံးမှုကို ထိန်းသိမ်းရန် ယေရုရှလင်မြို့တွင် တွေ့ဆုံခဲ့ကြသည်။ (ဧဖက် ၂:၁၉) လွန်ခဲ့သော ၁၃ နှစ်ခန့်က တမန်တော်ပေတရုသည် ကော်နေလိကို ဟောပြောခဲ့ပြီး ပထမဦးဆုံးသော တစ်ပါးအမျိုးသားများသည် နှစ်ခြင်းခံပြီးသော ယုံကြည်သူများ ဖြစ်လာကြသည်။ (တမန်တော် အခန်းကြီး ၁၀) ပေါလု၏ပထမသာသနာပြုခရီးစဉ်အတောအတွင်း တစ်ပါးအမျိုးသားများစွာတို့သည် ခရစ်ယာန်ဘာသာတရားကို သက်ဝင်ယုံကြည်လာကြသည်။ (တမန်တော် ၁၃:၁–၁၄:၂၈) အမှန်သော် ရှုရိပြည်၊ အန္တိအုတ်မြို့၌ တစ်ပါးအမျိုးသား ခရစ်ယာန်အသင်းတော်တစ်ခု တည်ထောင်ခဲ့ကြပြီဖြစ်၏။ အချို့ဂျူးခရစ်ယာန်များက ဘာသာပြောင်းလာသော တစ်ပါးအမျိုးသားများသည် အရေဖြားလှီး၍ မောရှေပညတ်ကို စောင့်ထိန်းအပ်သည်ဟု ယူမှတ်ကြသော်လည်း အခြားသူများက သဘောမတူကြချေ။ (တမန်တော် ၁၅:၁-၅) ဤငြင်းခုံမှုသည် စည်းလုံးမှုကို လုံးလုံးပြိုကွဲသွားစေနိုင်ပြီး ဂျူးနှင့် တစ်ပါးအမျိုးသားအသင်းတော်များအဖြစ် ကွဲသွားရန်ပင် ဖြစ်စေနိုင်သည်။ ထို့ကြောင့် အုပ်ချုပ်ရေးအဖွဲ့သည် ခရစ်ယာန်စည်းလုံးမှုကိုထိန်းသိမ်းရန် ချက်ချင်းပင်အရေးယူဆောင်ရွက်ခဲ့လေသည်။

၁၇။ တမန်တော် အခန်းကြီး ၁၅ ၌ သဟဇာတရှိသော အဘယ်သီအိုကရက်တစ်အစီအစဉ်ကို ဖော်ပြထားသနည်း။

^၁၇ တမန်တော် ၁၅:၆-၂၂ အရ “တမန်တော်တို့နှင့် သင်းအုပ်တို့သည် ထိုအမှုကို ကြည့်ရှုဆင်ခြင်ခြင်းငှာ စည်းဝေးကြ၏။” အန္တိအုတ်မှ ကိုယ်စားလှယ်အဖွဲ့အပါအဝင် အခြားသူများလည်း ရောက်ရှိနေကြသည်။ ပေတရုက ‘သူဟောပြောသောအားဖြင့် တစ်ပါးအမျိုးသားတို့သည် ဧဝံဂေလိတရားကိုကြားနာ၍ ယုံကြည်ကြ’ ကြောင်း ဦးစွာရှင်းပြ၏။ ထို့နောက် ဗာနဗနှင့် ပေါလုတို့က “မိမိတို့အားဖြင့် တစ်ပါးအမျိုးသားတို့တွင် ဘုရားသခင်ပြုတော်မူသမျှသော နိမိတ်လက္ခဏာ၊ အံ့ဖွယ်သောအမှုတို့ကို” ပြောပြစဉ်၌ “စုဝေးသောသူအပေါင်းတို့သည်” နားထောင်နေခဲ့ကြသည်။ ထို့နောက် ယာကုပ်က ပြဿနာကို မည်သို့ဖြေရှင်းနိုင်ကြောင်း အဆိုပြု၏။ အုပ်ချုပ်ရေးအဖွဲ့မှ ဆုံးဖြတ်ချက်တစ်ခုကိုချမှတ်ပြီးနောက် ‘တမန်တော်တို့နှင့် သင်းအုပ်တို့မှစ၍ သင်းဝင်သူအပေါင်းတို့သည် မိမိတို့အထဲ၌ရွေးကောက်သောသူတို့ကို အန္တိအုတ်မြို့သို့ ပေါလု၊ ဗာနဗတို့နှင့်တကွ စေလွှတ်မည်အကြောင်း သဘောညီညွတ်ကြ၏’ ဟု ဖော်ပြလေသည်။ ထို ‘ရွေးကောက်သောသူ’—ယုဒနှင့် သိလ—တို့သည် ယုံကြည်သူချင်းများထံသို့ အားပေးစာတစ်စောင်ကို ယူဆောင်သွားလေသည်။

၁၈။ မောရှေပညတ်ချက်ပါဝင်ပတ်သက်သော အဘယ်ဆုံးဖြတ်ချက်ကို အုပ်ချုပ်ရေးအဖွဲ့က ချမှတ်ခဲ့သနည်း။ ၎င်းက ဂျူးနှင့် တစ်ပါးအမျိုးသားခရစ်ယာန်များကို မည်သို့အကျိုးပြုခဲ့သနည်း။

^၁၈ အုပ်ချုပ်ရေးအဖွဲ့၏ဆုံးဖြတ်ချက်ကို ကြေညာသည့်စာတွင် “တမန်တော်၊ သင်းအုပ်၊ ညီအစ်ကိုများတို့သည် အန္တိအုတ်မြို့မှစ၍ ရှုရိပြည်၊ ကိလိကိပြည်တို့၌ရှိနေ၍ တစ်ပါးအမျိုးသားဖြစ်သောညီအစ်ကိုတို့ကို မေတ္တာနှင့်ကြားလိုက်ပါ၏!” ဟူသည့်စကားများဖြင့် အစပြုထားသည်။ ဤသမိုင်းတွင်သောစည်းဝေးကို အခြားသူများတက်ရောက်ခဲ့ကြသော်လည်း အုပ်ချုပ်ရေးအဖွဲ့တွင် ‘တမန်တော်များနှင့် သင်းအုပ်များ’ သာ ပါဝင်ကြပုံရသည်။ ဘုရားသခင်၏ဝိညာဉ်တော်က သူတို့ကိုညွှန်ကြား၏။ အကြောင်းမှာ စာထဲ၌ “ရုပ်တုရှေ့မှာ ပူဇော်သောယဇ်ကောင်ကိုလည်းကောင်း၊ အသွေးကိုလည်းကောင်း၊ လည်ပင်းကိုညှစ်၍သတ်သောအရာကိုလည်းကောင်း၊ မတရားသောမေထုန်ကိုလည်းကောင်း ကြဉ်ရှောင်ရမည်ဟူသောပညတ်မှတစ်ပါး အခြားသောဝန် သင်တို့၏အပေါ်၌တင်ခြင်းငှာ သန့်ရှင်းသောဝိညာဉ်တော်နှင့် ငါတို့သည် အလိုမရှိ” ဟု ဖော်ပြထားသောကြောင့်ဖြစ်၏။ (တမန်တော် ၁၅:၂၃-၂၉) ခရစ်ယာန်များသည် အရေဖျားလှီးခြင်းဖြင့် မောရှေပညတ်ကိုစောင့်ထိန်းရန် မလိုအပ်ပေ။ ဤဆုံးဖြတ်ချက်က ဂျူးနှင့် တစ်ပါးအမျိုးသား ခရစ်ယာန်များကို စည်းလုံးစွာဖြင့် ပြုမူပြောဆိုရန် အကူအညီဖြစ်စေခဲ့သည်။ ယေဟောဝါသက်သေများ၏အုပ်ချုပ်ရေးအဖွဲ့မှလာသော ဝိညာဏလမ်းညွှန်မှုအောက်တွင်ရှိသည့် မျက်မှောက်ခေတ် ဘုရားသခင်၏ကမ္ဘာချီမိသားစုမှာကဲ့သို့ပင် ထိုအသင်းတော်များသည် အားရဝမ်းသာလျက် အဖိုးတန်စည်းလုံးမှုလည်း ဆက်လက်တည်ရှိခဲ့လေသည်။—တမန်တော် ၁၅:၃၀-၃၅။

သီအိုကရက်တစ်စည်းလုံးမှုဖြင့် အမှုထမ်းဆောင်ခြင်း

၁၉။ ယေဟောဝါကို ဝတ်ပြုကိုးကွယ်သူမိသားစု၌ စည်းလုံးမှု အဘယ်ကြောင့်တိုးပွားလာရသနည်း။

^၁၉ မိသားစုတစ်စုတွင်ပါဝင်သူများသည် တစ်ဦးနှင့်တစ်ဦး ပူးပေါင်းဆောင်ရွက်ကြသောအခါ စည်းလုံးမှုတိုးပွားလာလေသည်။ ယေဟောဝါကို ဝတ်ပြုကိုးကွယ်သူမိသားစုတွင်လည်း ယင်းအချက်မှန်ကန်၏။ ပထမရာစုအသင်းတော်တွင်ရှိသော အကြီးအကဲများနှင့် အခြားသူများတို့သည် သီအိုကရက်တစ်ဖြစ်လျက် အုပ်ချုပ်ရေးအဖွဲ့နှင့် အပြည့်အဝပူးပေါင်းဆောင်ရွက်ပြီး ၎င်း၏ဆုံးဖြတ်ချက်ကိုလက်သင့်ခံခြင်းအားဖြင့် ဘုရားသခင်ထံ၌ အမှုထမ်းဆောင်ခဲ့ကြသည်။ အုပ်ချုပ်ရေးအဖွဲ့၏အကူအညီအားဖြင့် အကြီးအကဲများသည် ‘နှုတ်ကပါဌ်တရားကို ဟောပြော’ ကာ ယေဘုယျအားဖြင့် အသင်းတော်သားများသည် ‘စကားတညီတညွတ်တည်း ပြောဆိုကြ၏။’ (၂ တိမောသေ ၄:၁၊ ၂; ၁ ကောရိန္သု ၁:၁၀) ထို့ကြောင့် ယေရုရှလင်၊ အန္တိအုတ်၊ ရောမ၊ ကောရိန္သုနှင့် အခြားအဘယ်နေရာ၌ပင်ရှိသော ခရစ်ယာန်စည်းဝေးများတွင်ဖြစ်စေ၊ ဓမ္မအမှုတွင်ဖြစ်စေ တစ်မျိုးတည်းသော ကျမ်းစာသမ္မာတရားကိုသာ တင်ဆက်ကြလေသည်။ ထိုကဲ့သို့သော သီအိုကရက်တစ်စည်းလုံးမှုသည် ယနေ့၌လည်း ရှိပါသည်။

၂၀။ ခရစ်ယာန်စည်းလုံးမှုကို ထိန်းသိမ်းရန် ကျွန်ုပ်တို့ ဘာပြုလုပ်ရမည်နည်း။

^၂၀ ကျွန်ုပ်တို့၏စည်းလုံးမှုကို ထိန်းသိမ်းရန်အလို့ငှာ ယေဟောဝါ၏ ကမ္ဘာချီမိသားစုအစိတ်အပိုင်းဝင်များဖြစ်ကြသော ကျွန်ုပ်တို့အားလုံးသည် သီအိုကရက်တစ်မေတ္တာကို တင်ပြရန် ကြိုးစားသင့်ပေသည်။ (၁ ယောဟန် ၄:၁၆) ကျွန်ုပ်တို့သည် ဘုရားသခင်၏အလိုတော်ကို လိုက်နာပြီး ‘သစ္စာရှိကျွန်’ နှင့် အုပ်ချုပ်ရေးအဖွဲ့ကို နက်ရှိုင်းသော ရိုသေလေးစားမှုရှိကြောင်း တင်ပြရန် လိုအပ်သည်။ ဘုရားသခင်ထံ ကျွန်ုပ်တို့ဆက်ကပ်အပ်နှံခဲ့သည့်နည်းတူ ကျွန်ုပ်တို့၏နာခံမှုသည် စိတ်လိုကိုယ်လျောက်ဖြစ်ပြီး ပျော်ရွှင်မှုရှိရမည်ဖြစ်သည်။ (၁ ယောဟန် ၅:၃) ရွှင်လန်းမှုနှင့် နာခံမှုကို ဆာလံဆရာ ချိတ်ဆက်ပြခဲ့ခြင်းသည် မည်မျှသင့်လျော်လှပါသည်တကား! သူက “ထာဝရဘုရားကိုကြောက်ရွံ့ ၍ ပညတ်တော်တို့၌ အလွန်မွေ့လျော်သောသူသည် မင်္ဂလာရှိ၏” ဟု သီဆိုခဲ့လေသည်။—ဆာလံ ၁၁၂:၁။

၂၁။ ကျွန်ုပ်တို့သည် သီအိုကရက်တစ်ဖြစ်ကြောင်း မည်သို့သက်သေထူနိုင်မည်နည်း။

^၂၁ အသင်းတော်၏ဦးခေါင်းဖြစ်တော်မူသော ယေရှုသည် သီအိုကရက်တစ်အပြည့်အဝဖြစ်တော်မူပြီး သူ့ခမည်းတော်၏အလိုတော်ကို အမြဲလုပ်ဆောင်ခဲ့သည်။ (ယောဟန် ၅:၃၀) ထို့ကြောင့် ကျွန်ုပ်တို့သည် ယေဟောဝါ၏အဖွဲ့အစည်းတော်နှင့် အပြည့်အဝပူးပေါင်းဆောင်ရွက်၍ ကိုယ်တော်၏အလိုတော်ကို သီအိုကရက်တစ်ဆန်ဆန်နှင့် စည်းလုံးညီညွတ်စွာ လုပ်ဆောင်ခြင်းအားဖြင့် ကျွန်ုပ်တို့၏ပုံနာမူနာရှင်နောက်သို့ လိုက်လျှောက်ကြစို့။ သို့အားဖြင့် “ညီအစ်ကိုတို့သည် သဘောတူလျက်ပေါင်းဖော်ကြသည်အရာမှာ အလွန်ကောင်းပေ၏” ဟူသည့် ဆာလံဆရာ၏သီချင်းကို လှိုက်လှဲသော ပျော်ရွှင်ဝမ်းမြောက်မှုနှင့် ကျေးဇူးတင်မှုဖြင့် ကျွန်ုပ်တို့ သံယောင်လိုက်နိုင်ကြမည်ဖြစ်ပေသည်။

သင်မည်သို့ဖြေဆိုမည်နည်း

◻ ကျွန်ုပ်တို့၏ခရစ်ယာန်စည်းလုံးမှုနှင့် ဆာလံ ၁၃၃ ကို မည်သို့ဆက်စပ်နိုင်မည်နည်း။

◻ စည်းလုံးမှုကိုတိုးပွားအောင်လှုံ့ဆော်ပေးသော အကြောင်းတရားအချို့ကား အဘယ်နည်း။

◻ ဘုရားသခင့်လူမျိုးတော်၏စည်းလုံးမှု၌ သီအိုကရက်တစ်အစီအစဉ်သည် အဘယ့်ကြောင့် မရှိမဖြစ်လိုအပ်သနည်း။

◻ စည်းလုံးမှုကို ထိန်းသိမ်းရန် ပထမရာစုတွင်ရှိသော အုပ်ချုပ်ရေးအဖွဲ့သည် မည်သို့အရေးယူဆောင်ရွက်ခဲ့သနည်း။

◻ သီအိုကရက်တစ်စည်းလုံးမှုအတွင်း၌ အမှုထမ်းခြင်းသည် သင့်အတွက် မည်သည့်အဓိပ္ပာယ်ရှိသနည်း။

[စာမျက်နှာ ၁၃ ပါ ရုပ်ပုံ]

စည်းလုံးမှုကိုထိန်းသိမ်းရန် အုပ်ချုပ်ရေးအဖွဲ့က အရေးယူဆောင်ရွက်ခဲ့