စာရှုသူများထံမှ မေးခွန်းလွှာ

“တိုးတယ်” (ထိုအခါ) ဟူသည့် ဂရိစကားလုံးသည် နောက်၌လိုက်၍ဖြစ်ပျက်လာမည့်အရာကိုဖော်ပြရန်အတွက် အသုံးပြုကြောင်း ကျွန်တော်နားလည်ပါသည်။ သို့ဖြစ်ပါက မဿဲ ၂၄:၉ ၌ “ထိုကာလ [“တိုးတယ်”] ၌ လူများတို့သည် သင်တို့ကို ညှဉ်းဆဲ” ကြလိမ့်မည်ဟု အဘယ်ကြောင့်ဆိုရသနည်း။ စင်စစ် ယှဉ်ပြိုင်မှတ်တမ်းဖြစ်သော လုကာ ၂၁:၁၂ ၌ “ထိုအမှုအရာများမဖြစ်မီ လူများတို့သည် . . . သင်တို့ကို ဖမ်းဆီးညှဉ်းဆဲ” ကြလိမ့်မည်ဟု ဆိုထားသည်။

မှန်ပါသည်၊ တိုးတယ်ကို နောက်၌လိုက်၍ဖြစ်လာမည့်အရာ၊ ပြောရမည်ဆိုလျှင် ဆက်ဖြစ်လာမည့်အရာကိုဖော်ပြရန်အတွက် အသုံးပြုနိုင်သည်။ သို့သော်လည်း ၎င်းသည် တစ်ခုတည်းသော ကျမ်းစာအသုံးအနှုန်းဖြစ်သည်ဟု ကျွန်ုပ်တို့သဘောမပေါက်ဖို့လိုပေသည်။

ဘော်အာ၊ အဲန့်နှင့် ဂင်ဂရစ်ချ်တို့ရေးသားသော A Greek-English Lexicon of the New Testament and Other Early Christian Literature ၌ တိုးတယ် ဟူသည့်စကားလုံးကို ကျမ်းစာထဲတွင် အခြေခံအဓိပ္ပာယ်နှစ်မျိုးဖြင့်အသုံးပြုကြောင်း ဖော်ပြထား၏။

တစ်ခုမှာ “ထိုအချိန်၌” ဟူ၍ဖြစ်၏။ ၎င်းသည် “အတိတ်နှင့်ဆိုင်သော ထို့နောက် ” ဖြစ်နိုင်သည်။ ပေးထားသော ဥပမာတစ်ခုမှာ ‘ထိုအခါ ပရောဖက်ယေရမိဖြင့်ရောက်သော ဗျာဒိတ်တော်အတိုင်း ပြည့်စုံ၏’ ဟူသည့် မဿဲ ၂:၁၇ ဖြစ်သည်။ ၎င်းသည် အစဉ်အတိုင်းဖြစ်လာသည့်အရာကို ရည်ညွှန်းနေခြင်းမဟုတ်၊ ထိုအချိန်၌ကဲ့သို့သော အတိတ်နှင့်ဆိုင်သည့်အထူးအချက်အလက်တစ်ခုကို ညွှန်ပြနေခြင်းဖြစ်သည်။ ထို့နည်းတူပင် တိုးတယ် ကို “အနာဂတ်နှင့်ဆိုင်သော ထိုအခါ ” အဖြစ်လည်း အသုံးပြုနိုင်သည်။ ဥပမာတစ်ခုအနေနှင့် ၁ ကောရိန္သု ၁၃:၁၂ ၌ “ယခုတွင် ငါတို့သည် မှန်အားဖြင့်ရိပ်မိလျက်သာနေကြ၏။ ထိုအခါမူကား မျက်မှောက်ထင်ထင်မြင်ရကြလိမ့်မည်။ ယခုတွင် ငါအသိအမြင်မစုံမလင်ဖြစ်၏။ ထိုအခါမူကား သူတစ်ပါးသည် ငါ့ကိုသိသကဲ့သို့ ငါသိရလိမ့်မည်” ဟု ဆိုထားသည်ကို တွေ့နိုင်လေသည်။ ဤနေရာ၌ ပေါလုသည် တိုးတယ်ကို ‘အနာဂတ်အချက်အလက်’ နှင့်ဆိုင်သောအဓိပ္ပာယ်ဖြင့် အသုံးပြုထားသည်။

အဆိုပါအဘိဓာန်ကျမ်းအရ တိုးတယ်နှင့်စပ်လျဉ်းသော အခြားသုံးပုံသုံးနည်းမှာ “ဆက်လက်ဖြစ်ပျက်မည့်အရာကို အစပြုဖော်ပြရန်” အတွက်ဖြစ်သည်။ ကိုယ်တော်ရောက်ရှိနေခြင်းနိမိတ်လက္ခဏာအကြောင်း တမန်တော်များ၏အမေးကိုဖြေကြားသည့် ယေရှု၏အဖြေများနှင့်စပ်လျဉ်းသော မှတ်တမ်းသုံးခုတွင်တွေ့ရသည့် ဥပမာများစွာကို ထိုအဘိဓာန်က ဖော်ပြသည်။ a “ဆက်လက်ဖြစ်ပျက်မည့်အရာကို အစပြုဖော်ပြရန်” တိုးတယ်ကိုအသုံးပြုခြင်းနှင့်စပ်လျဉ်းသော ဥပမာများအနေဖြင့် အဘိဓာန်ကျမ်းက မဿဲ ၂၄:၁၀၊ ၁၄၊ ၁၆၊ ၃၀; မာကု ၁၃:၁၄၊ ၂၁ နှင့် လုကာ ၂၁:၂၀၊ ၂၇ တို့ကို ကိုးကားတင်ပြထားသည်။ ရှေ့နောက်စကားများကို သုံးသပ်ရာတွင် တစ်ဆက်တည်းဖြစ်လာခြင်းသည် အဘယ်ကြောင့် မှန်ကန်သောသဘောပေါက်နားလည်မှုဖြစ်ကြောင်း ပြပေသည်။ ထို့ပြင် အနာဂတ်ဖြစ်ရပ်များ တိုးတက်ဖြစ်ပေါ်လာခြင်းအကြောင်း ပါဝင်သည့် ယေရှုပရောဖက်ပြုချက်၏အဓိပ္ပာယ်ကို နားလည်ခြင်းသည် များစွာအကူအညီဖြစ်စေမည်။

သို့သော် ဤမှတ်တမ်းများတွင်ပါသော တိုးတယ်နှင့်ဆိုင်သည့် အချက်များအားလုံးသည် တစ်ဆက်တည်းလိုက်၍ဖြစ်လာသောအရာကို ဖော်ပြခြင်းဖြစ်သည်ဟု ကျွန်ုပ်တို့ တထစ်ချယူမှတ်၍မရပေ။ ဥပမာအနေနှင့် မဿဲ ၂၄:၇၊ ၈၊ ၉ ၌ တစ်နိုင်ငံနှင့်တစ်နိုင်ငံ စစ်ဖြစ်ခြင်း၊ အစာခေါင်းပါးခြင်းနှင့် ငလျင်လှုပ်ခြင်းများဖြစ်လိမ့်မည်ဟု ယေရှုကြိုဟောကြားခဲ့သည်။ “ထိုကာလ၌ လူများတို့သည် သင်တို့ကို ညှဉ်းဆဲခြင်း၊ အသေသတ်ခြင်းကို ခံစေခြင်းငှာ အပ်နှံကြလိမ့်မည်။ ငါ၏နာမကြောင့်လည်း ခပ်သိမ်းသောလူမျိုးတို့သည် သင်တို့ကို မုန်းကြလိမ့်မည်” ဟူ၍ အခန်းငယ် ၉ ၌ ဆက်လက်ဖော်ပြထားသည်။ ကြိုဟောထားသော စစ်ပွဲ၊ အစာခေါင်းပါးခြင်းနှင့် ငလျင်လှုပ်ခြင်းများသည် ညှဉ်းပန်းနှိပ်စက်ခြင်းမစတင်မီ အားလုံးဖြစ်ပျက်ကာ ပြီးဆုံးသွားကောင်းလည်း ပြီးဆုံးသွားမည်ဟု သဘောပေါက်နားလည်ခြင်းသည် ကျိုးကြောင်းညီညွတ်ပါမည်လော။

၎င်းသည် ကျိုးကြောင်းညီညွတ်မှုမရှိသကဲ့သို့ ပထမရာစုပြည့်စုံချက်နှင့်စပ်လျဉ်း၍ ကျွန်ုပ်တို့သိရှိထားသောအရာကိုလည်း ထောက်ခံမှုမပြုပေ။ ခရစ်ယာန်အသင်းတော်သစ်မှ အသင်းသားများသည် စတင်ဟောပြောပြီးနောက် ချက်ချင်းဆိုသလိုပင် ပြင်းထန်သောဆန့်ကျင်မှုများကို သူတို့ကြုံတွေ့ခဲ့ရသည်ဟု တမန်တော်ဝတ္ထုပါ မှတ်တမ်းက ဖော်ပြသည်။ (တမန်တော် ၄:၅-၂၁; ၅:၁၇-၄၀) ယေရှုမိန့် ကြားခဲ့သော စစ်ပွဲ၊ အစာခေါင်းပါးခြင်းနှင့် ငလျင်လှုပ်ခြင်းများ အားလုံးသည် ထိုအစောပိုင်းနှိပ်စက်ညှဉ်းပန်းခြင်းမတိုင်မီ ဖြစ်ပျက်ခဲ့ပါသည်ဟု ကျွန်ုပ်တို့ တပ်အပ်မပြောနိုင်ပေ။ ယင်းအစား “ထိုအမှုအရာများမဖြစ်မီ လူများတို့သည် . . . သင်တို့ကို ဖမ်းဆီးညှဉ်းဆဲ” ကြလိမ့်မည်ဟု အဖြစ်အပျက်များကို လုကာသုံးနှုန်းဖော်ပြထားသည့်နည်းအတိုင်း၊ ကြိုဟောထားသော အခြားအရာမြောက်မြားစွာတို့ “မဖြစ်မီ” ထိုဆန့်ကျင်မှုများဖြစ်ပျက်ခဲ့လေသည်။ (လုကာ ၂၁:၁၂) မဿဲ ၂၄:၉ ၌ တိုးတယ်သည် “ထိုအချိန်၌” ဟူသည့်အဓိပ္ပာယ်ဖြင့်အသုံးပြုခြင်း ပို၍ဖြစ်နိုင်သည်။ စစ်ပွဲ၊ အစာခေါင်းပါးခြင်းနှင့် ငလျင်လှုပ်ခြင်းများဖြစ်သည့်အချိန်အတောအတွင်း သို့မဟုတ် ထိုအချိန်၌ ယေရှု၏နောက်တော်လိုက်များ ညှဉ်းပန်းနှိပ်စက်ခံရခြင်းဖြစ်ပေလိမ့်မည်။

[အောက်ခြေမှတ်ချက်များ]