“ဘုရားသခင့်တောင်တော်” နိုင်ငံရှိ “သက်သေအစုအပုံ”

တိုက်ကြီးများ၏မြေပုံပေါ်တွင် အနောက်အာဖရိက၏ ပင်လယ်ကမ်းရိုးတန်းတစ်လျှောက်ကို ကောက်ကြောင်းလိုက်ပြီး ဂီနီယာပင်လယ်ကွေ့အတိုင်း အရှေ့ဘက်သို့ လိုက်သွားလျှင် တောင်ဘက်သို့ကမ်းခြေကွေ့သွားသောနေရာ၌ ကယ်မရွန်နိုင်ငံကို သင်တွေ့လိမ့်မည်။ သင်သည် ကမ်းရိုးတန်းအတိုင်း တောင်ဘက်သို့ ဆက်ဆင်းသွားလျှင် မည်းနေသောသဲသောင်ပြင်ကြီးများသို့ ရောက်သွားမည်။ ထိုသဲမည်းများသည် ကယ်မရွန်မီးတောင်ပေါက်မှုများ၏ ရလဒ်ဖြစ်သည်။

၁၃,၃၅၃ ပေမြင့်သော အဆိုပါကတော့ပုံတောင်ထွတ်သည် ထိုဒေသကို လုံးဝစိုးမိုးထားသည်။ ဆည်းဆာနေခြည်က ကယ်မရွန်တောင်စောင်းများကို အလင်းဖြင့်ဆမ်းလိုက်ချိန်ဝယ် တောက်ပသော ခရမ်းနုရောင်၊ လိမ္မော်ရောင်၊ ရွှေရောင်နှင့် ကြက်သွေးရောင်များဖြင့် ရင်သပ်ရှုမောဖွယ်ဟိတ်ဟန်ထုတ်ပြလေတော့သည်။ ပင်လယ်နှင့် အနီးအနားရှိ လတာပြင်တို့သည် ကြေးမုံတစ်ချပ်သဖွယ် အဆိုပါအရောင်များကို အလင်းပြန်ပေးရာ ကောင်းကင်နှင့် မြေကြီးကို ခွဲခြား၍မရနိုင်လုခမန်းဖြစ်သွားသည်။ ဤဒေသရှိ နတ်ကိုးကွယ်သည့်လူမျိုးများက ဤတောင်ကို မွန်ဂိုမာလိုးဘား တောင်ဟု အဘယ့်ကြောင့် သမုတ်ကြကြောင်းကို နားလည်ဖို့မခက်ပါလေ။ ယင်းကို “နတ်ရထား” သို့မဟုတ် ပို၍အသုံးများသည်မှာ “ဘုရားတောင်တော်” ဟူ၍ပြန်ဆိုနိုင်သည်။

သာ၍ဝေးသောတောင်ဘက်တွင် အုန်းပင်များနှင့်အနားသတ်ထားသော မိုင်နှင့်ချီသည့် သောင်ပြင်ဖွေးဖွေးရှိသည်။ သဘာဝအလှအပဖြင့်ပြီးသော အဆိုပါပင်လယ်ကမ်းရိုးတန်းမှတစ်ပါး နိုင်ငံ၏ဒေသများစွာသည် ထူထပ်သည့်အီကွေတာသစ်တောဖြင့် အုပ်ဆိုင်းလျက်ရှိသည်။ ကွန်ဂိုနိုင်ငံနှင့် ဗဟိုအာဖရိကပြည်ထောင်စုတို့၏နယ်စပ်အထိရောက်ပြီး မြောက်ဘက်တွင် နိုက်ဂျီးရီးယား၊ ဆာဟာရအောက်ပိုင်း ချတ်နိုင်ငံအထိကျယ်ပြန့်သည်။ နိုင်ငံ၏အနောက်ပိုင်းသည် တောင်တန်းထူထပ်သောဒေသဖြစ်ပြီး ခရီးသွားသူအား ဥရောပဒေသများကို ပြန်ပြောင်းသတိရစေသည်။ သို့သော် ပူအိုက်သည့်ရာသီဥတုက သင်သည် အီကွေတာနှင့် အလွန်နီးသောအကွာအဝေးတွင်ရှိနေကြောင်း သင့်အား မေ့သွားစေမည်မဟုတ်ပေ။ အမျိုးမျိုးအဖုံဖုံကွဲပြားသော ယင်း၏ကျေးလက်ဒေသအနေအထားကြောင့် ဧည့်လမ်းညွှန်များစွာက ကယ်မရွန်ကို အာဖရိကတိုက်၏ပုံစံငယ်အဖြစ် ဖော်ညွှန်းကြသည်။ အဆိုပါစွဲမှတ်ဖွယ်ရာကို လူမျိုးစုကွဲများ၊ ၂၂၀ ကျော်သော တရားဝင်အသိအမှတ်ပြု ဘာသာစကားများနှင့် လူမျိုးစုအလိုက်ဘာသာစကားများက ထပ်၍အားဖြည့်ပေးသည်။

ကယ်မရွန်သို့ သင်အလည်အပတ်လာလျှင် ဒူအာလာပင်လယ်ဆိပ်ကမ်းမြို့တွင်ဖြစ်စေ၊ မြို့တော် ရာအွန်းဒီတွင်ဖြစ်စေ ဟိုတယ်ကြီးတစ်ခု၌ သင်တည်းခိုပေမည်။ သို့သော် လူတို့၏ဘဝ၊ အထူးသဖြင့် “ဘုရားတောင်တော်”a နိုင်ငံအနှံ့ “သက်သေအစုအပုံ” ကို တည်ဆောက်ရေးတွင် အလုပ်များနေကြသည့် ၂၄,၀၀၀ ကျော်သော ယေဟောဝါသက်သေများ ဘဝအကြောင်း တစေ့တစောင်း သိရှိခွင့် ဆုံးရှုံးသွားနိုင်သည်။ သူတို့ထဲမှ အချို့သူများနှင့်တွေ့ဆုံရန် နိုင်ငံအနှံ့ခရီးဆန့်ပါလေ။ ဤအနောက်အာဖရိကနိုင်ငံ၌ စူးစမ်းရှာဖွေခြင်းမှ အကျိုးကျေးဇူးများစွာ သင်ရရှိမည်မုချ။”

လုံးထွင်းကနူးလှေဖြင့်လော၊ ချုံတိုးတက္ကစီဖြင့်လော၊ စက်ဘီးဖြင့်လော

ကယ်မရွန်နိုင်ငံတွင် အရှည်ဆုံးဖြစ်ပြီး သမုဒ္ဒရာအထိရောက်သော စန်နာဂါမြစ်သည် ကျယ်ပြန့်သောမြစ်ဝကျွန်းပေါ်ကို ဖြစ်ပေါ်လာစေသည်။ ဤကျယ်ပြန့်သောဒေသတွင် မှီတင်းနေထိုင်သူအားလုံးထံရောက်ဖို့ ယေဟောဝါသက်သေများသည် လုံးထွင်းကနူးလှေများဖြင့် သွားကြရလေ့ရှိသည်။ ဘုရားသခင့်နိုင်ငံတော်ကြေညာသူ ကိုးယောက်ရှိသော အမ်ဘီယာကိုရှိ အုပ်စုလေးသည် ဤနည်းဖြင့်ပင် သွားလာကြရသည်။ သူတို့ထဲမှာ နှစ်ဦးမှာ ၁၆ မိုင်အကွာတွင်ရှိသည့် ယိုယိုရွာတွင်နေထိုင်ကြသည်။ အမ်ဘီယာကိုသို့ရောက်ဖို့အတွက် အားသွန်ခွန်စိုက် လှော်ခတ်ရသော်လည်း ခရစ်ယာန်အစည်းအဝေးများကို သူတို့ အမြဲတမ်းတက်ရောက်ကြသည်။ နယ်လှည့်ကြီးကြပ်မှူးတစ်ဦးသည် ဤအုပ်စုသို့သွားရောက်လည်ပတ်စဉ် ယေဟောဝါသက်သေများ—နာမတော်နောက်ဝယ်ရှိအဖွဲ့အစည်း ဗီဒီယိုကို ပြသမည်ဖြစ်ကြောင်း အကြံပြုလိုက်သည်။ သို့သော် အပြောထက် အလုပ်ကခက်နေသည်။ ဤကဲ့သို့သောဝေးလံသီခေါင်သည့် ရွာမျိုးတွင် ဗီဒီယိုအောက်စက်၊ ရုပ်မြင်သံကြားစက်နှင့် လျှပ်စစ်ဓာတ်အား အဘယ်မှာ ရနိုင်ပါမည်နည်း။

နယ်လှည့်ကြီးကြပ်မှူးလည်ပတ်သည့်အပတ်အတွင်း ကြေညာသူတချို့သည် ဒေသန္တရချာ့ချ်၏ပါစတာတစ်ယောက်ထံ သွားရောက်လည်ပတ်ခဲ့ကြသည်။ ထိုပါစတာက သူတို့ကို လှိုက်လှိုက်လှဲလှဲကြိုဆိုရာ သူတို့အံ့အားသင့်သွားပြီး သူနှင့်တက်တက်ကြွကြွကျမ်းစာဆွေးနွေးဖြစ်သွားသည်။ ပါစတာတွင် ဗီဒီယိုအောက်စက်တစ်ခုကိုသာမက လျှပ်စစ်ဓာတ်အားပေးစက်တစ်လုံးပါပိုင်ဆိုင်ထားကြောင်း သတိပြုမိရာ ညီအစ်ကိုများသည် ရဲဆေးတင်ပြီး သူ၏ပစ္စည်းများကို ငှားနိုင်မနိုင်မေးမြန်းကြသည်။ စောစောပိုင်းကျမ်းစာဆွေးနွေးခန်းကို သဘောခွေ့သွားရကား ပါစတာသည် အကူအညီပေးဖို့ သဘောတူလိုက်သည်။ စနေနေ့ညနေတွင် အဆိုပါပါစတာနှင့် သူ၏ချာ့ချ်အသင်းသားအများစုအပါအဝင် ၁၀၂ ယောက်သောသူများသည် ပြသမှုသို့ လာရောက်ခဲ့ကြသည်။ ယိုယိုရွာမှ သက်သေခံနှစ်ယောက်တို့သည် စိတ်ဝင်စားသူတော်တော်များများကို ကနူးလှေနှစ်စင်းဖြင့် ခေါ်လာသည်။ ဒီရေအတက်ရေကြောင်းကို ဆန်ပြီးလှော်ခတ်ရခြင်းသည် သူတို့အတွက်မှုစရာမဟုတ်ပါလေ။ ဗီဒီယိုကြည့်ပြီးနောက် သူတို့အတွက် အကြီးအကျယ်လှုံ့ဆော်အားပေးမှုဖြစ်ခဲ့ရာ ယေဟောဝါကို ဂုဏ်တင်ဖို့ရည်သန်သည့် ဤကဲ့သို့သောအဖွဲ့အစည်းကြီးထဲတွင် ရှိနေရခြင်းကို သူတို့ဂုဏ်ယူခဲ့ကြသည်။

လုံးထွင်းကနူးလှေဖြင့် မရောက်နိုင်သောနေရာများသို့သွားရန် ချုံတိုးတက္ကစီကို သုံးနိုင်သည်။ ခရီးသည်များကို စောင့်ဆိုင်းနေသည့် တက္ကစီဂိတ်နေရာများသည် အမြဲပင်ကျွက်ကျွက်ညံလျက် လှုပ်ရှားသွားလာနေကြသည်။ ရေခဲရေရောင်းသူများ၊ ငှက်ပျောသီးသည်များနှင့် အထမ်းသမားများကြားတွင် အလွယ်တကူ ခေါင်းရှုပ်သွားနိုင်သည်။ အထမ်းသမားလေးများ၏အလုပ်မှာ “ထွက်ဖို့အသင့်ဖြစ်နေ” ပြီဟု သူတို့ပြောသော စောင့်နေသည့် ချုံတိုးတက္ကစီများအားလုံးပေါ်သို့ ခရီးသည်များကို ခေါ်တင်ပေးဖို့ဖြစ်သည်။ သို့သော် “အသင့်ဖြစ်နေ” ဟူသည့်စကား၏အဓိပ္ပာယ်ကို အတိအကျယူရန်မဟုတ်ပါ။ ခရီးသည်များသည် နာရီနှင့်ချီ၍၊ တစ်ခါတစ်ရံ ရက်နှင့်ချီ၍စောင့်ရကြသည်။ ခရီးသည်အားလုံးသည် အထဲတွင် ပြွတ်သိပ်ကျပ်ညှပ်ကာ ယာဉ်မောင်းက ခရီးဆောင်အိတ်၊ ကုန်အိတ်များနှင့် တစ်ခါတစ်ရံတွင် ကြက်နှင့်ဆိတ်အရှင်များကိုပင် အကာအရံပါသောအမိုးပေါ်တွင်နေရာချပြီးသည်နှင့် ချုံတိုးတက္ကစီသည် မညီမညာဖုန်ထူသောလမ်းကြောင်းများအတိုင်း ရွေ့ရှားပါတော့သည်။

နယ်လှည့်ကြီးကြပ်မှူးတစ်ဦးသည် ဤကဲ့သို့သွားလာရခြင်းကို စိတ်ညစ်လာပြီး ယင်းတို့ကိုအားကိုးမနေဖို့ ဆုံးဖြတ်လိုက်သည်။ ယခုဆိုလျှင် သူသည် မိမိ၏ခရီးစဉ်အားလုံးကို စက်ဘီးဖြင့်သွားတော့သည်။ သူဤသို့ ပြောသည်– “အသင်းတော်တစ်ခုကနေ တစ်ခုကို စက်ဘီးနဲ့သွားဖို့ ကျွန်တော်ဆုံးဖြတ်လိုက်တဲ့အချိန်ကစပြီး လည်ပတ်မှုအတွက် အမြဲပဲအချိန်မှန်ရောက်တယ်။ ခရီးလမ်းဟာ နာရီပေါင်းများစွာကြာတာမှန်ပါတယ်။ ဒါပေမဲ့ဗျာ အနည်းဆုံးတော့ တစ်ရက်နှစ်ရက်အချိန်ကုန်ခံပြီး ချုံတိုးတက္ကစီကို စောင့်နေစရာမလိုတော့ဘူးပေါ့။ မိုးရာသီအတွင်းမှာဆို တချို့လမ်းတွေဟာ ရေတွေမြုပ်နေလို့ ပျောက်လုမတတ်ဖြစ်နေတယ်။ ဗွက်တောရေတောထဲကို ဖြတ်ဖို့ဆိုရင် ရှူးဖိနပ်ကို ချွတ်ကိုချွတ်ရမယ်။ တစ်နေ့မှာ ကျွန်တော့်ရဲ့ရှူးဖိနပ်တစ်ဖက် ချောင်းထဲကျသွားတာ အပတ်တော်တော်များများအထိ ရှာမတွေ့ဘူး။ ယေဟောဝါသက်သေတစ်ယောက်ရဲ့သမီးက ငါးမျှားရင်း လုံးဝမထင်မှတ်ဘဲ သွားချိတ်မိတယ်ဗျာ! ဖိနပ်တစ်ဖက်ကငါးတွေနဲ့အတူရေထဲမှာ အချိန်တော်တော်ကြာကြာနေပြီးမှ အဲ့ဒီရှူးဖိနပ်ကို ပြန်စီးနိုင်လို့ ဝမ်းသာအယ်လဲဖြစ်မိပါတယ်။ တစ်ခါတလေဆိုရင် ယေဟောဝါသက်သေတွေ သည့်အရင်က တစ်ခါမှမဟောဖူးတဲ့ ဒေသတွေကိုနှံ့စပ်အောင်သွားတယ်။ ရွာသားတွေက ကျွန်တော့်ကို ဘာပါသလဲလို့ အမြဲတမ်းမေးတယ်။ ဒါကြောင့် မဂ္ဂဇင်းတွေနဲ့ ဘရိုရှာတွေကို အမြဲအရန်သင့်ဆောင်ထားတယ်။ ကျွန်တော်ရပ်နားတဲ့အခါတိုင်း ကျမ်းစာအခြေခံတဲ့ အဲ့ဒီစာပေတွေကို ဝေငှပြီး တိုတိုတုတ်တုတ်သက်သေခံတယ်။ ယေဟောဝါဟာ အဲ့ဒီသမ္မာတရားမျိုးစေ့တွေကို အပင်ပေါက်လာအောင်လုပ်ပေးမယ်လို့ ကျွန်တော်ယုံကြည်တယ်။”

အတွင်းပိုင်းကျကျဆီသို့

ယေဟောဝါသက်သေတို့သည် ကယ်မရွန်နိုင်ငံ၏ အလယ်ဗဟိုကျကျ၊ တောနက်ထဲတွင်ပုန်းကွယ်နေသော ကျေးရွာများအထိပင် ဘုရားသခင့်နိုင်ငံတော်သတင်းဝေမျှဖို့ ကြိုးစားကြသည်။ အကြီးအကျယ်အားထုတ်ဖို့ လိုအပ်သော်လည်း ရလဒ်များမှာ ပီတိဖြာစရာပင်။

အချိန်ပြည့်ဓမ္မအမှုဆောင်တစ်ဦးဖြစ်သူ မေရီသည် အာလက်ထ်အမည်ရှိ မိန်းမငယ်လေးတစ်ဦးနှင့် ကျမ်းစာစသင်သည်။ ဦးဆုံးအကြိမ်သင်အံမှုအပြီးတွင် မိမိကို တံခါးဝအထိ လိုက်ပို့ပေးမည်လောဟု မေရီက အာလက်ထ်ကို မေးလိုက်သည်။ ထိုသို့လိုက်ပို့ခြင်းသည် အာဖရိက၏ ဒေသထုံးစံဖြစ်သည်။ သို့သော် အဆိုပါအမျိုးသမီးငယ်က မိမိခြေထောက်များနာနေသည့်အတွက် လမ်းကောင်းကောင်းမလျှောက်နိုင်ကြောင်း ရှင်းပြခဲ့သည်။ အမများသည် အသားထဲဝင်ရောက်ခိုအောင်းကာ ပြည်တည်နာများဖြစ်စေသည့် လှေးကောင်တစ်မျိုးကြောင့် အာလက်ထ်၏ခြေထောက်များ ရောဂါပိုးဝင်နေခြင်းဖြစ်သည်။ မေရီသည် မကြောက်မရွံ့ဘဲ လှေးကောင်တစ်ကောင်ချင်းကို ဖယ်ထုတ်ပေးသည်။ ညညရောက်လျှင် ဤမိန်းမငယ်လေးခမျာ နတ်ဆိုးများ၏အနှိပ်စက်ကို ခံနေရကြောင်း နောက်ပိုင်းတွင် သူမသိရှိသွားရပြန်သည်။ လူတစ်ဦးသည် ယေဟောဝါကို မည်သို့ယုံကြည်ကိုးစားနိုင်ကြောင်း၊ အထူးသဖြင့် ဆုတောင်းပြီး ကိုယ်တော်၏နာမတော်ကို အသံကျယ်ကျယ်နှင့်ခေါ်ခြင်းအားဖြင့်ဖြစ်ကြောင်း မေရီက စိတ်ရှည်လက်ရှည်ရှင်းပြသည်။—သု. ၁၈:၁၀။

အာလက်ထ်သည် မြန်မြန်ဆန်ဆန်တိုးတက်လာသည်။ သူမသည် ကာယရေးကော တွေးခေါ်ဆင်ခြင်မှုတွင်ပါ သိသိသာသာတိုးတက်လာသောကြောင့် အစပိုင်းတွင် သူမ၏မိသားစုသည် မည်သို့မျှမဖြစ်ချေ။ သို့သော် သူမသည် ယေဟောဝါသက်သေတစ်ဦးဖြစ်ချင်ကြောင်း သဘောပေါက်သွားကြသောအခါဝယ် ကျမ်းစာဆက်မသင်ဖို့ တားမြစ်လိုက်ကြသည်။ သုံးပတ်ကြာသောအခါ သမီးဖြစ်သူ စိတ်ဆင်းရဲနေပုံကို သိသွားသော အာလက်ထ်၏မိခင်သည် မေရီနှင့် အဆက်အသွယ်လုပ်ကာ ပြန်သင်ကြားပေးဖို့ တောင်းဆိုခဲ့သည်။

တိုက်နယ်စည်းဝေးတက်ချိန် ရောက်လာသောအခါတွင် မေရီသည် နှစ်ရက်စလုံး အာလက်ထ်ကို ခေါ်ဖို့ အငှားယာဉ်တစ်စီးကို အခပေးငှားလိုက်သည်။ သို့သော် ယာဉ်မောင်းဖြစ်သူက လမ်းမပေါ်သို့ ရောက်သည့်လမ်းသွယ်သည် သွားရန်မဖြစ်နိုင်ကြောင်း စိတ်ပိုင်းဖြတ်ကာ အာလက်ထ်၏အိမ်နားအထိအရောက် မောင်းဖို့ ငြင်းဆိုခဲ့သည်။ ထို့ကြောင့် မေရီခမျာ ထိုအမျိုးသမီးငယ်ကို လမ်းမပေါ်ရောက်အောင်ခေါ်လာဖို့ စီစဉ်ရသည်။ ယေဟောဝါသည် အဆိုပါအားထုတ်မှုများအတွက် မုချကောင်းချီးပေးတော်မူသည်။ ယနေ့ဆိုလျှင် အာလက်ထ်သည်အသင်းတော်စည်းဝေးအားလုံးကို တက်ရောက်နေသည်။ ဤသို့တက်ရောက်နိုင်ဖို့ သူမကို ကူညီရန် မေရီသည် မမောနိုင်မပန်းနိုင် သူမကို သွားသွားခေါ်ရသည်။ သွားတိုင်း ၇၅ မိနစ်ကြာကြာ အတူလမ်းလျှောက်ကြသည်။ တနင်္ဂနွေနေ့ အစည်းအဝေးသည် နံနက် ၈:၃၀ တွင် စသည့်အတွက်ကြောင့် မေရီသည် ၆:၃၀ တွင် အိမ်မှထွက်ရသည်; သို့သော် သူတို့သည်အချိန်ကိုက်ရောက်နိုင်ကြသည်။ အာလက်ထ်သည် မကြာမီအချိန်တွင် သူမ၏ဆက်ကပ်အပ်နှံခြင်းအထိမ်းအမှတ်အဖြစ် ရေနှစ်ခြင်းခံဖို့ မျှော်လင့်ပါသည်။ မေရီက “သူမကျမ်းစာစသင်တုန်းက မတွေ့မိလိုက်တဲ့သူတစ်ဦးအတွက်ဆိုလျှင် သူမခုလောက်ထိပြောင်းလဲသွားတာကို အံ့သြလို့ကုန်နိုင်မှာမဟုတ်ဘူး။ ဒီကလေးမကို ယေဟောဝါရှင်ကောင်းချီးပေးလိုက်ပုံကြောင့် ကိုယ်တော်ကို ကျွန်မသိပ်ကျေးဇူးတင်တယ်။” မေရီသည် ကိုယ်ကျိုးစွန့်မေတ္တာအတွက် ကောင်းသောပုံနမူနာရှင်တစ်ယောက်ဖြစ်သည်။

မြောက်ဘက်ဝေးဝေးသို့

မြောက်ပိုင်းကယ်မရွန်တွင် ကွဲပြားခြားနားမှုအမျိုးမျိုးနှင့် အံ့အားသင့်စရာအပြည့်ရှိသည်။ မိုးဥတုအတွင်းတွင် စိမ်းလန်းစိုပြည်သော ဧရာမဥယျာဉ်ကြီးအဖြစ်သို့ ပြောင်းသွားသည်။ သို့သော် ပူပြင်းသောနေမင်းရောင်ခြည်က လွှမ်းခြုံလိုက်သည့်အခါဝယ် မြက်ပင်များ ညှိုးနွမ်းသွားတော့သည်။ အပေါ်တည့်တည့်နေရောက်ကာ အရိပ်ရှာမရသည့် မွန်းတည့်ချိန်ဝယ် သိုးများခမျာ အိမ်များ၏ရွှံ့နီနံရံတစ်ဖက်တွင် တိုးဝှေ့၍အရိပ်ခိုကြရရှာသည်။ သဲနှင့်ခြောက်သွေ့သောမြက်ခင်းအလယ်တွင် ဗေအိုဗတ်ပင်များ၏အရွက်အနည်းငယ်သာ စိမ်းစိမ်းလန်းလန်းနှင့် ကြံ့ကြံ့ခံရပ်တည်နေသည်။ ယင်းအပင်တို့သည် အီကွေတာသစ်တောရှိ ယင်းတို့၏မျိုးစုဝင်များလောက် မကြီးမားသော်လည်း ၎င်းတို့လောက်ပင်ခံနိုင်ရည်ရှိသည်။ ခက်ခဲသောဝန်းကျင်တွင် ယင်းတို့၏ခံနိုင်ရည်အစွမ်းက သမ္မာတရားအလင်းထွန်းလင်းစေနိုင်ဖို့ ဤဒေသတွင်နေထိုင်ကြသည့် သက်သေခံအနည်းငယ်၏ ဇွဲနှင့် ရဲစွမ်းသတ္တိတို့ကို ကောင်းစွာသရုပ်ဖော်သည်။

ဤဒေသရှိ အသင်းတော်တချို့သည် တစ်ခုနှင့်တစ်ခု မိုင် ၃၀၀ မှ မိုင် ၅၀၀ အထိကွာဝေးရာ အမှန်ပင်အထီးကျန်လှသည်။ သို့သော် စိတ်ဝင်စားစရာ ဒုနှင့်ဒေးရှိသည်။ အခြားဒေသများမှ သက်သေခံများက အကူအညီပေးရန် ဤနေရာသို့ ပြောင်းရွှေ့လာကြသည်။ ဓမ္မအမှုတွင် ထိရောက်မှုရှိစေရန် ဒေသခံလူမျိုးစုစကားဖြစ်သော ဖူဖူလ်ဒေးဘာသာစကားကို သင်ယူရကြသည်။

ဂရူးအားမြို့မှ သက်သေခံတစ်ယောက်သည် မိုင် ၁၀၀ ခန့်ဝေးသည့် မိမိ၏ဇာတိရွာတွင် ရက်အနည်းငယ်ကြာ ဟောပြောဖို့ ဆုံးဖြတ်လိုက်သည်။ စိတ်ဝင်စားသူတချို့ကို တွေ့ခဲ့သော်လည်း ခရီးစရိတ်အလွန်မြင့်မားသောကြောင့် မှန်မှန်ပြန်သွားဖို့ အဟန့်အတားဖြစ်နေသည်။ အပတ်အနည်းငယ်ကြာပြီးနောက် ထိုသက်သေခံသည် စိတ်ဝင်စားသူတစ်ဦးထံမှ ထပ်ပြီးလာရောက်လည်ပတ်ဖို့ တောင်းဆိုထားသောစာတစ်စောင်ကို လက်ခံရရှိခဲ့သည်။ ယာဉ်စီးခပေးဖို့ ငွေကြေးလက္ခဏာရှားပါးနေဆဲဖြစ်ရာ ပြန်မသွားနိုင်ခဲ့ပါ။ ထိုသူသည်ဂရူးအားမြို့ရှိ သက်သေခံ၏အိမ်သို့ပေါက်ချလာပြီး ရွာတွင် သူ့အလာကိုစောင့်မျှော်နေသူ ဆယ်ယောက်ရှိကြောင်း သတင်းပေးလိုက်သည့်အချိန်ဝယ် ထိုသက်သေခံမည်မျှအံ့အားသင့်သွားမည်ကို စဉ်းစားကြည့်ပါလေ!

ချတ်နိုင်ငံနယ်စပ်အနီးရှိ နောက်ရွာတစ်ရွာတွင် စိတ်ဝင်စားသူ ၅၀ ရှိသော အုပ်စုတစ်စုသည် သူတို့ဘာသာကျမ်းစာလေ့လာမှုလုပ်ဖို့အတွက် စုဝေးခဲ့ကြသည်။ သူတို့ထဲမှ သုံးယောက်ကို ချတ်နိုင်ငံရှိ အနီးဆုံးအသင်းတော်တွင် အစည်းအဝေးများတက်ရောက်ရန် စီစဉ်ပေးကြသည်။ ထိုသူတို့သည် ပြန်လာပြီး အုပ်စုတစ်စုလုံးကို ကျမ်းစာသင်တန်းပို့ချပေးရသည်။ မှန်ပါသည်၊ ဤနေရာတွင် ယေရှု၏ဤစကားများသည် အလွန်မှန်ကန်လှပေသည်– “စပါးရိတ်စရာများစွာရှိ၏။ ရိတ်သောသူတို့သည်နည်းကြ၏။ ထိုကြောင့် လုပ်ဆောင်သောသူတို့ကို စပါးရိတ်စေခြင်းငှာ စေလွှတ်တော်မူမည်အကြောင်း စပါးရှင်ကို ဆုတောင်းကြလော့။”—မဿဲ ၉:၃၇၊ ၃၈။

မြို့ကြီးများတွင် သက်သေခံခြင်း

နှစ်ပေါင်းများစွာ ရှားပါးခဲ့ပြီးနောက် လွန်ခဲ့သည့်နှစ်နှစ်ခန့်က ကင်းမျှော်စင် နှင့် နိုးလော့! မဂ္ဂဇင်းတို့ကို ကယ်မရွန်တွင် လွတ်လွတ်လပ်လပ်ရရှိနိုင်ပြီ။ လူများစွာသည် ဤမဂ္ဂဇင်းများကို ဦးဆုံးအကြိမ်ဖတ်ရှုရသည့်အတွက် ယင်းတို့ကို ဖတ်လိုစိတ်အလွန်ပြင်းပြကြပြီး အလွန်စိတ်ဝင်စားကြသည်။ မြို့တစ်မြို့တွင် တာဝန်ပေးခံရသော ငယ်ရွယ်သည့်အထူးရှေ့ဆောင်မောင်နှံသည် သူတို့၏ရပ်ကွက်သစ်တွင် ပထမဆုံးအကြိမ် နံနက်ဟောပြောခြင်း၌ မဂ္ဂဇင်း ၈၆ စောင်ဝေငှခဲ့သည်။ အချို့ကြေညာသူများသည် တစ်လလျှင် မဂ္ဂဇင်းအစောင် ၂၅၀ အထိ ဝေငှရသည်! သူတို့အောင်မြင်မှု၏ လျှို့ဝှက်ချက်ကား အဘယ်နည်း။ မဂ္ဂဇင်းများကို လူတိုင်းထံ ဝေငှခြင်းပင်တည်း။

အများပြည်သူများအတွက် ဖွင့်လှစ်ထားသောရုံးတစ်ရုံးတွင် အလုပ်လုပ်နေသောသက်သေခံတစ်ယောက်သည် မဂ္ဂဇင်းများကို လူမြင်ကွင်းတွင် အမြဲပြသထားသည်။ အမျိုးသမီးတစ်ဦးသည်မဂ္ဂဇင်းများကို ကြည့်သော်လည်း တစ်စောင်မျှ မယူပါ။ ထိုသက်သေခံသည် သူမ၏စိတ်ဝင်စားမှုကို ရိပ်မိကာ တစ်စောင်ကို ဝေလိုက်ရာ ယင်းကို သူမယူလိုက်သည်။ နောက်တစ်နေ့တွင် သူမပြန်လာသည်ကိုတွေ့လိုက်ရာ သူအံ့အားသင့်သွားရသည်။ သူမယူသွားသောမဂ္ဂဇင်းအတွက် အလှူငွေထည့်ဝင်လိုရုံမျှမက ထပ်လိုချင်သေးကြောင်းကိုလည်း ပြောခဲ့သည်။ အဘယ့်ကြောင့်နည်း၊ ဗလက္ကာရပြုခံခဲ့ရဖူးသူတစ်ယောက်ဖြစ်သော ထိုအမျိုးသမီးသည် ထိုအကြောင်းပါသည့် မဂ္ဂဇင်းကို ရွေးယူခဲ့သည်။ သူမသည် ထိုတွင်ပေးထားသည့် အကြံဉာဏ်များကို ညလုံးပေါက် ပြန်ပြန်ဖတ်နေသည်။ စိတ်သက်သာမှုခံစားရပြီး ယေဟောဝါသက်သေတို့အကြောင်းကို ပို၍သိလိုခဲ့သည်။

ကလေးငယ်လေးများပင် ကျမ်းစာ၏မျှော်လင့်ချက် သတင်းတရား ကြဲဖြန့်ရေးတွင် ပါဝင်နိုင်ပါသည်။ ခြောက်နှစ်အရွယ်ရှိ သက်သေခံမိန်းကလေးတစ်ယောက်ကို သူမ၏ဆရာက ချာ့ချ်ဓမ္မသီချင်းတစ်ပုဒ် သီဆိုခိုင်းသောအခါ မိန်းကလေးက မိမိသည် ယေဟောဝါသက်သေတစ်ယောက်ဖြစ်ကြောင်း ဖော်ပြကာ ငြင်းဆိုခဲ့သည်။ ထိုအခါ ဆရာဖြစ်သူက ကလေးမ၏သီဆိုမှုကို အဆင့်သတ်မှတ်နိုင်ရန် သူမ၏ဘာသာရေးသီချင်းတစ်ပုဒ်ကို သီဆိုဖို့တောင်းဆိုသည်။ “ဘုရားကတိတော်ပရဒိသု” အမည်ရှိ သီချင်းကို ရွေးလိုက်ပြီး အလွတ်ဆိုပြလိုက်သည်။ ဆရာက သူငယ်မအား “တပည့်ရဲ့သီချင်းထဲမှာ ပရဒိသုတစ်ခုဆိုတာ ပါတယ်၊ အဲ့ဒီပရဒိသုဆိုတာ ဘယ်မှာလဲ” ဟုမေးမြန်းခဲ့သည်။ များမကြာမီ ကမ္ဘာကို ပရဒိသုတည်ဆောက်ပေးဖို့ ဘုရားသခင်ရည်ရွယ်ထားကြောင်း လုံမငယ်လေးက ရှင်းပြလိုက်သည်။ ဆရာသည် သူငယ်မ၏အဖြေကြောင့် အံ့အားသင့်သွားကာ လုံမငယ်လေးလေ့လာနေသည့် စာအုပ်ကို သူမ၏မိဘများထံ တောင်းခံတော့သည်။ ဆရာသည် ဘာသာရေးသင်ခန်းစာများမှ သူမသွန်သင်ခံနေရသည့်အရာဖြင့်မဟုတ်ဘဲ ထိုစာအုပ်ဖြင့် သူမ၏အဆင့်ကို သတ်မှတ်လိုသည်။ သူသည် လုံမငယ်လေးကို မှန်မှန်ကန်ကန်အဆင့်သတ်မှတ်လိုလျှင် သူကိုယ်တိုင် ဦးဆုံးလေ့လာသင့်ကြောင်း မိဘများက ဆရာဖြစ်သူကို အကြံပြုသည်။ သူနှင့် ကျမ်းစာသင်အံမှု စတင်ခဲ့သည်။

လည်ပတ်မှုတစ်ခုကို အစီအစဉ်ဆွဲခြင်း

ယခုအချိန်တွင် ကမ္ဘာ့ဒေသများစွာရှိ လူများစွာသည် ဘုရားသခင့်နိုင်ငံတော်သတင်းကောင်းကို ဥပေက္ခာပြုနေကြသည်။ ဘုရားသခင်ကိုသော်လည်းကောင်း၊ ကျမ်းစာကိုသော်လည်းကောင်း စိတ်မဝင်စားကြတော့ပါ။ အခြားသူများမှာမူ ကြောက်ရွံ့မှု၏ တုတ်နှောင်ထားခြင်းခံရကာ တံခါးဝတွင် သူစိမ်းတစ်ယောက်ကို လက်ခံစကားပြောဖို့ အကြောက်အကန်ငြင်းကြသည်။ ဤအရာအားလုံးသည် ယေဟောဝါသက်သေတို့ မိမိတို့၏ဓမ္မအမှုတွင်တွေ့ရသည့် တကယ့်စိန်ခေါ်ချက်ဖြစ်သည်။ သို့သော် ကယ်မရွန်တွင်မူ ကွာခြားလိုက်သည်ဖြစ်ခြင်း!

အိမ်ပေါက်စေ့ဟောပြောခြင်းကို ဤအရပ်သားများ နှစ်ခြိုက်ကြသည်။ တံခါးမခေါက်ဘဲ ဓလေ့ရှိသည့်အတိုင်း “ကော်န်၊ ကော်န်၊ ကော်န်” ဟူ၍ ခေါ်ရသည်။ “ဘယ်သူလဲ” ဟု အတွင်းမှ တုံ့ပြန်လိုက်သည်။ ယင်းနောက် ယေဟောဝါသက်သေများဖြစ်ကြောင်း မိမိတို့ကိုယ်ကို မိတ်ဆက်ကြသည်။ မိဘများက သူတို့၏ကလေးများကို ခုံတန်းရှည်များသွားယူခိုင်းကာ သရက်ပင်ဖြစ်ကောင်းဖြစ်မည့် သစ်ပင်တစ်ပင်၏အရိပ်အောက်တွင် သွားချခိုင်းသည်။ ထိုနောက် ဘုရားသခင့်နိုင်ငံတော်သည် အဘယ်အရာဖြစ်ကြောင်းနှင့် လူသားတို့၏အမင်္ဂလာအခြေအနေကို သက်သာအောင်လုပ်ပေးမည့်အရာတို့ကို ရှင်းပြရန်အသုံးပြုသော ပျော်စရာအချိန်ဖြစ်တော့သည်။

ဤသို့ဆွေးနွေးမှုတစ်ခုပြီးရုံရှိသေးသည် အမျိုးသမီးတစ်ဦးက ဤသို့ရင်ဖွင့်သည်– “ကျွန်မမွေးဖွားကြီးပြင်းခဲ့တဲ့ ဘာသာမှာ ကျွန်မရှာနေတဲ့သမ္မာတရားကို မတွေ့လို့ စိတ်ပျက်လက်ပျက်ဖြစ်နေတာ။ သမ္မာတရားကို ပြပေးတော်မူတဲ့ ဘုရားသခင်ကို ကျွန်မကျေးဇူးတင်တယ်။ ကျွန်မတို့ချာ့ချ်မှာ ကျွန်မဟာ သင်းထောက်တစ်ယောက်ပါ။ အပျိုစင်ရုပ်ကို သင်းထောက်တစ်ယောက်စီရဲ့အိမ်မှာ တစ်ပတ်စီ အလှည့်ကျထားပါတယ်။ ဒါမှ ယောက်တိုင်း သူမဆီမှာ တောင်းဆိုနိုင်မှာ။ ကျွန်မကတော့ သမ္မာတရားကို သိဖို့သူမဆီမှာ အမြဲအကူအညီတောင်းတယ်။ သမ္မာတရားဟာ သူမဆီမှာမရှိကြောင်း ဘုရားသခင်ကျွန်မကို အခုပြလိုက်ပြီ။ ယေဟောဝါကို ကျွန်မသိပ်ကျေးဇူးတင်တယ်။”

တစ်နေ့နေ့၌ ဘုရားသခင့်နိုင်ငံတော်သတင်းကောင်း ဟောပြောရာတွင် ရရှိနိုင်သည့် သာ၍ကြီးမားသောပျော်ရွှင်မှုခံစားရဖို့လိုအပ်သည်ဟု သင်ယူမှတ်ပါမူ ဤအနောက်အာဖရိကသို့ အလည်လာပါလေ။ “အာဖရိကတိုက်၏ပုံစံငယ်” ကိုတွေ့ရှိရမည့်အပြင် ကနူးလှေ၊ ချုံတိုးတက္ကစီ သို့မဟုတ် စက်ဘီးစသည့်အရာတစ်ခုခုဖြင့် “ဘုရားတောင်တော်” နိုင်ငံတွင် တည်ဆောက်နေသည့် “သက်သေအစုအပုံ” ကို သင်ပါဝင်တည်ဆောက်နိုင်ပါလိမ့်မည်။

[အောက်ခြေမှတ်ချက်များ]

[Credit Line on page 22]

Map: Mountain High Maps ® Copyright © 1995 Digital Wisdom, Inc.