ပါရဂူများက သွေးအစား အခြားရွေးချယ်စရာများကို စဉ်းစားသုံးသပ်ခဲ့ကြ

အမေရိကန်နိုင်ငံတစ်ဝန်းမှ ပါရဂူ ၂၀၀ ခန့်တို့သည် ဆေးပညာလောကတွင် တိုးပွားစိတ်ဝင်စားလာကြသည့် သွေးမပါသည့် ဆေးကုသမှုနှင့် ခွဲစိတ်ကုသမှုအကြောင်းကို ဆွေးနွေးသုံးသပ်ကြရန် ၁၉၉၅ ခု၊ အောက်တိုဘာ ၇ ရက်၊ စနေနေ့၌ အမေရိကန်နိုင်ငံ အိုဟိုင်အိုနယ်၊ ကလီဗ်လန်မြို့တွင် တွေ့ဆုံခဲ့ကြသည်။

ခက်ခဲသောအခြေအနေရပ် အတော်များများအကြောင်းကို ဆွေးနွေးသုံးသပ်ခဲ့ကြသည်။ ဥပမာအနေနှင့် လူနာတစ်ဦးသည် ရုတ်တရက်အလွန်သွေးအားနည်းနေပါက မည်သို့ပြုရမည်နည်း။ လမစေ့ဘဲ အလွန်အကျွံစော၍ မွေးဖွားလာသည့်ကလေးတစ်ဦးကို သွေးမသုံးဘဲ မည်သို့ကုသပြုစုပေးနိုင်မည်နည်း။ သွေးမသွင်းဘဲ နှလုံးခွဲစိတ်မှုကို အောင်မြင်စွာပြုလုပ်နိုင်မည်လော။ စိတ်ဝင်စားစရာမှာ ခန္ဓာကိုယ်ကို ၎င်း၏သွေးပမာဏ ပြန်လည်တိုးပွားလာစေရန် အထောက်အကူပေးသော အသုံးပြုနေကျ နည်းစနစ်ဖြစ်သည့် သွေးမဲ့ခွဲစိတ်ကုသမှုကို အဆိုပါအခြေအနေရပ်အားလုံးတို့တွင် အကျိုးရလဒ်ကောင်းများဖြင့် အသုံးချခဲ့ကြပြီးဖြစ်သည်။a

သွေးသွင်းခြင်းအစား အခြားရွေးချယ်စရာများကို အဘယ်ကြောင့်လိုအပ်ရသနည်း။ “သွေးသွင်းခြင်းဟာ အထူးသဖြင့် အသည်းရောင်ရောဂါစတဲ့ ရောဂါတွေကို မကြာခဏကူးစက်စေတတ်တယ်ဆိုတာ ကျွန်မတို့လေ့လာသိရှိခဲ့ရပါတယ်” ဟု ကလီဗ်လန်မြို့တွင်ရှိသော စိန့် ဗင်းစဲန့် ကုသိုလ်ဖြစ်ဆေးရုံမှ သွေးမပါသည့် ဆေးကုသမှုနှင့် ခွဲစိတ်ကုသမှုဆိုင်ရာ ဗဟိုဌာန၏ ညွှန်ကြားရေးမှူးဖြစ်သည့် ရှယ်ရန်း ဗာနန်က ဆိုသည်။ “သွေးဟာ ရောဂါကို မကူးစက်စေသည့်တိုင် လူနာရဲ့ရောဂါကာကွယ်နိုင်စွမ်းကို အားနည်းသွားစေနိုင်ပါတယ်” ဟု သူမဆက်ပြောလေသည်။ သွေးကို စိစစ်မှုများပြုခြင်းကြောင့် အေအိုင်ဒီအက်စ်ရောဂါကူးစက်မှု ကျဆင်းသွားပြီဖြစ်သော်လည်း ထိုကဲ့သို့ စမ်းသပ်မှုများအားဖြင့် မတွေ့ ရှိနိုင်သော ရောဂါမြောက်မြားစွာရှိနေဆဲပင်ဖြစ်သည်။ ထို့အပြင် သွေးမဲ့ခွဲစိတ်ကုသမှုအတွက် သာ၍ကောင်းစွာပြင်ဆင်ရန် လိုအပ်ပါသော်လည်း လူနာများကို ရောဂါပါသောသွေး သွင်းမိသည့်အတွက် ဖြစ်ပေါ်လာနိုင်သော တရားရေးပြဿနာများမှ ကင်းဝေးစေသောကြောင့် ဆေးရုံများအတွက် အကုန်အကျများစွာ သက်သာစေပေသည်။

ယေဟောဝါသက်သေများအဖို့မူ သွေးသွင်းခြင်းကို ရှောင်ကြဉ်ရသည့် သာ၍အရေးကြီးသော အကြောင်းတစ်ရပ်ရှိလေသည်။ ၎င်းမှာ ဘုရားသခင့်ပညတ်ချက်က တားမြစ်ထားခြင်းဟူသည့် အကြောင်းပင်ဖြစ်သည်။ (တမန်တော် ၁၅:၂၉) သို့ဖြစ်သော်လည်း သူတို့သည် ကောင်းနိုင်သမျှ အကောင်းဆုံးသော ဆေးဝါးကုသမှုကို ခံယူလိုကြသည်။ ထို့ကြောင့် သူတို့သည် သွေးမဲ့ကုသမှု ဆေးပညာရပ်ကို စူးစမ်းရှာဖွေရာ၌ ဦးဆောင်နေကြသော ဆရာဝန်များနှင့် ပူးပေါင်းဆောင်ရွက်ကြသည်။ ထိုကဲ့သို့ကုသမှုများသည် ယေဟောဝါသက်သေများအတွက်သာမကဘဲ သွေးသွင်းခြင်း၏အန္တရာယ်နှင့်စပ်လျဉ်း၍ စိုးရိမ်နေကြသူ မြောက်မြားစွာတို့အတွက်လည်း အကျိုးရှိပါသည်။

[အောက်ခြေမှတ်ချက်များ]

[Picture Credit Line on page 32]

WHO Photo by P. Almasy