လုဒိ—ဘုရားသခင်ကို ဝတ်ပြုသော ဧည့်ဝတ်ကျေပွန်သူ

ရှးခေတ်ကတည်းက ဘုရားသခင်၏ ကျေးကျွန်စစ်များသည် သူတို့၏ဧည့်ဝတ်ကျေပွန်မှုကြောင့် ထင်ရှားကျော်ကြားကြသည်။ (ကမ္ဘာဦး ၁၈:၁-၈; ၁၉:၁-၃) “သူစိမ်းများကို ချစ်ခင်မြတ်နိုးမှု သို့မဟုတ် ကြင်နာမှု” ဟုအနက်ဖွင့်ထားသည့် ရိုးသားသောနှလုံးသားမှ ယိုဖိတ်လာသော ဧည့်ဝတ်ကျေပွန်မှုသည် ယနေ့အချိန်တွင်ပင် ခရစ်ယာန်အယူဝါဒစစ်၏ အမှတ်သင်္ကေတဖြစ်သည်။ အမှန်မှာ ယင်းသည် ဘုရားသခင်လက်ခံတော်မူဖွယ်နည်းနှင့်အညီ ဝတ်ပြုလိုသူတိုင်းအတွက် လိုအပ်သောအရာဖြစ်သည်။—ဟေဗြဲ ၁၃:၂; ၁ ပေတရု ၄:၉။

စံပြုထိုက်သည့်ပုံစံဖြင့် ဧည့်ဝတ်ကျေပွန်မှုတင်ပြခဲ့သူတစ်ဦးမှာ လုဒိဖြစ်သည်။ သူမသည် ဖိလိပ္ပိမြို့သို့ လာရောက်လည်ပတ်သော ခရစ်ယာန်သာသနာပြုများကို မိမိအိမ်တွင်တည်းခိုရန် “ခေါ်ဖိတ်” ခဲ့သည်။ (တမန်တော် ၁၆:၁၅၊ သတင်းကောင်း) ကျမ်းစာတွင် လုဒိအကြောင်းကို အတိုချုံး၍သာဖော်ပြထားသော်လည်း သူမအကြောင်းဖော်ပြထားသည့်အရာအနည်းငယ်သည် ကျွန်ုပ်တို့အတွက် အားပေးချက်ဖြစ်နိုင်သည်။ မည်သည့်နည်းဖြင့်နည်း။ လုဒိကားမည်သူနည်း။ သူမနှင့်ပတ်သက်၍ ကျွန်ုပ်တို့ မည်သည့်အရာသိရသနည်း။

“ခရမ်းရောင်အဝတ်အထည်သည်”

လုဒိသည် မက်စီဒိုးနီးယား၏ အချက်အချာကျသောမြို့ကြီးဖြစ်သည့် ဖိလိပ္ပိမြို့တွင် နေထိုင်သည်။ သို့သော် သူမသည် အနောက်ပိုင်းအာရှမိုင်းနားရှိ လေဒီယာဒေသ၏ မြို့တစ်မြို့ဖြစ်သော သွာတိရဲမြို့မှဖြစ်သည်။ ဤအကြောင်းကြောင့် “လုဒိ” မှာ ဖိလိပ္ပိမြို့တွင် သူမကို ချစ်စနိုးပေးထားသည့် အမည်ဖြစ်သည်ဟု အချို့ကဆိုကြသည်။ တစ်နည်းခေါ်ရလျှင် ယေရှုခရစ်သက်သေခံခဲ့သည့် အမျိုးသမီးကို “ရှမာရိအမျိုးသမီး” ဟု ခေါ်ဆိုတတ်သကဲ့သို့ သူမသည်လည်း “လေဒီယာသူ” ဖြစ်သည်။ (ယောဟန် ၄:၉) လုဒိသည် “ခရမ်းရောင်အဝတ်အထည်” သို့မဟုတ် ထိုအရောင်ဆိုးထားသော အထည်များကို ရောင်းသည်။ (တမန်တော် ၁၆:၁၂၊ ၁၄၊ ကဘ) သွာတိရဲနှင့် ဖိလိပ္ပိနှစ်မြို့စလုံးတွင် ဆေးဆိုးလုပ်ငန်းလုပ်ကိုင်သူများရှိကြောင်း ရှေးဟောင်းသုတေသနပညာရှင်များ တူးဖော်ရရှိသည့်အရေးအသားများက သက်သေထူသည်။ လုဒိသည် မိမိ၏ကိုယ်ပိုင်စီးပွားရေးလုပ်ငန်းကြောင့်ဖြစ်စေ၊ သွာတိရဲဆေးဆိုးလုပ်ငန်းလုပ်ကိုင်သူများ ကုမ္ပဏီတစ်ခု၏ ကိုယ်စားလှယ်အနေနှင့်ဖြစ်စေ မိမိ၏လုပ်ငန်းကိုင်ငန်းတစ်ခုခုကို လုပ်ကိုင်ဖို့ ပြောင်းရွှေ့သွားခြင်းဖြစ်နိုင်သည်။

ခရမ်းရောင်ဆိုးဆေးကို အရင်းအမြစ်အမျိုးမျိုးမှ ရရှိသည်။ ပင်လယ်ရေကြောင်ခရုမျိုးစုတချို့မှ ထုတ်ယူရရှိသော ဆိုးဆေးသည် ဈေးအကြီးဆုံးဖြစ်သည်။ ပထမရာစု ရောမကဗျာဆရာ မာရှယ်၏ အဆိုအရ တုရုမြို့ (ထိုပစ္စည်းကိုထုတ်လုပ်သည့် နောက်ပင်ရင်းဌာနတစ်ခု) ထွက် အကောင်းဆုံးခရမ်းရောင် ဝတ်ရုံတစ်ထည်သည် အလုပ်သမားတစ်ဦး၏ ရက်ပေါင်း ၂,၅၀၀ လုပ်ခနှင့်ညီမျှသော စက်စ်တာ့စ် ၁၀,၀၀၀ သို့မဟုတ် ဒေနာရိ ၂,၅၀၀ အတိ တန်ဖိုးကျနိုင်သည်။ ရှင်းနေသည်မှာ ဤကဲ့သို့သောအထည်များသည် လူနည်းစုသာဝယ်နိုင်သည့် ဇိမ်ခံပစ္စည်းများဖြစ်သည်။ ထို့ကြောင့် လုဒိသည် စီးပွားရေးအရ အလွန်အဆင်ပြေသူဖြစ်နိုင်သည်။ မည်သို့ပင်ဖြစ်ပါစေ သူမသည် တမန်တော်ပေါလုနှင့် အဖော်များ—လုကာ၊ သိလ၊ တိမောသေနှင့် အခြားသူများကို ဧည့်ဝတ်ပြုဖို့ ဖိတ်ခေါ်နိုင်ခဲ့သည်။

ဖိလိပ္ပိမြို့တွင် ပေါလုဟောပြောခြင်း

စီ.အီး. ၅၀ ခုနှစ်ခန့်တွင် ပေါလုသည် ဥရောပ၌ ဦးဆုံးခြေချကာ ဖိလိပ္ပိမြို့တွင် စတင်ဟောပြောခဲ့သည်။a ပေါလုသည် အခြားမြို့တစ်မြို့သို့ ရောက်သည်နှင့် ထုံးစံအတိုင်း ဂျူးနှင့် ဂျူးဘာသာသို့ပြောင်းဝင်လာသူများ စုဝေးနေသည့် တရားဇရပ်တွင် ဦးဆုံးသွားရောက်ဟောပြောသည်။ (တမန်တော် ၁၃:၄၊ ၅၊ ၁၃၊ ၁၄; ၁၄:၁ နှိုင်းယှဉ်။) သို့သော် သတင်းရပ်ကွက်အချို့အရ ရောမဥပဒေက ဂျူးများကို ဖိလိပ္ပိမြို့၏ “ဘာသာရေး ကန့်သတ်နယ်မြေများ” အတွင်း ဘာသာရေးလုပ်ရပ်များ မလုပ်ကြဖို့ တားမြစ်ထားသည်။ သာသနာပြုများသည် ဤမြို့တွင် “ကာလအတန်အရာ” ကြာပြီးနောက် ဥပုသ်နေ့တွင် “ပတ္ထနာဇရပ်ရှိတတ်ရာ” မြို့ပြင် မြစ်ကမ်းဘေးတွင်ရှိသောနေရာတစ်ခုကို တွေ့ရှိခဲ့သည်။ (တမန်တော် ၁၆:၁၂၊ ၁၃) ဤမြစ်ကား ဂန်ဂီးတီးစ်မြစ်ဖြစ်ကြောင်း ထင်ရှားသည်။ ဤတွင် သာသနာပြုများသည် အမျိုးသမီးများကိုသာတွေ့ရှိခဲ့ပြီး သူတို့ထဲမှတစ်ဦးမှာ လုဒိဖြစ်သည်။

“ဘုရားသခင်ကို ကိုးကွယ်သောသူ”

လုဒိသည် “ဘုရားသခင်ကို ကိုးကွယ်သောသူ” ဖြစ်သည်။ သို့သော်လည်း ဘာသာရေးအမှန်တရားရှာဖွေရင်း ဂျူးဘာသာသို့ ပြောင်းဝင်လာသူ ဖြစ်နိုင်သည်။ လုဒိသည် အလုပ်ကောင်းအကိုင်ကောင်းရထားသော်လည်း ရုပ်ပစ္စည်းမက်မောခြင်းမရှိပါ။ ယင်းသို့မက်မောမည့်အစား ဝိညာဉ်ရေးကိစ္စများအတွက် အချိန်သီးသန့်ဖယ်ထားခဲ့သည်။ “ပေါလုဟောပြောသောအရာကို မှီဝဲဆည်းကပ်စေခြင်းငှာ သူ၏စိတ်နှလုံးကို သခင်ဘုရားဖွင့်တော်မူ” ရာ လုဒိသည် သမ္မာတရားကို လက်ခံခဲ့သည်။ အမှန်တွင် “ထိုမိန်းမသည် အိမ်သူအိမ်သားတို့နှင့်တကွ ဗတ္တိဇံကိုခံ” ခဲ့ကြသည်။—တမန်တော် ၁၆:၁၄၊ ၁၅။

ကျမ်းစာတွင် လုဒိ၏ အခြားမိသားစုဝင်များအမည်ကို သီးသန့်ဖော်ပြမထားပါ။ လင်သားရှိကြောင်းလည်း ဖော်ပြမထားသောကြောင့် အပျိုတစ်ယောက် သို့မဟုတ် မုဆိုးမတစ်ယောက်ဖြစ်နိုင်သည်။ “အိမ်သူအိမ်သား” ဟူသည် သွေးသားတော်စပ်သူများကို ခြုံခေါ်ခြင်းဖြစ်သော်လည်း ဤအသုံးအနှုန်းက ကျေးကျွန်များ၊ အစေခံများပါ အကျုံးဝင်နိုင်သည်။ မည်သို့ပင်ဖြစ်ပါစေ လုဒိသည် မိမိသိရှိခဲ့ရာများကို မိမိနှင့်အတူနေထိုင်သူများအား ဇွဲရှိရှိဝေမျှခဲ့သည်။ ထိုသူတို့သည် ယုံကြည်သက်ဝင်လာပြီး စစ်မှန်သောယုံကြည်ခြင်းကို ခံယူလာကြသောအခါ သူမအလွန်ပျော်လိုက်မည်ဖြစ်ခြင်း!

‘ကျွန်ုပ်တို့အား ခေါ်ဖိတ်လေ၏’

သာသနာပြုများသည် လုဒိနှင့်မတွေ့မီ မိမိတို့၏စရိတ်ဖြင့် ရနိုင်သည့် နေရာထိုင်ခင်းလေးနှင့် ကျေနပ်ခဲ့ရဖွယ်ရှိသည်။ သို့သော် သူမသည် နေရာထိုင်ခင်းများပြောင်းဖို့ ဖိတ်ခေါ်လိုက်နိုင်ခြင်းအတွက် ဝမ်းမြောက်ဝမ်းသာဖြစ်ခဲ့သည်။ သူမ မရမကခေါ်ခဲ့ရခြင်းက ပေါလုနှင့် သူ့အပေါင်းအဖော်များသည် အကြောက်အကန်ငြင်းခဲ့ကြပေမည်။ အဘယ်ကြောင့်နည်း။ ပေါလုသည် ‘သတင်းကောင်းကို အခကြေးငွေမယူ၊ သူ၏လုပ်ပိုင်ခွင့်ကို အလွဲမတောင်းဆို’ လိုသောကြောင့် မည်သူ့ကိုမျှ ဝန်ထုပ်ဝန်ပိုးမဖြစ်စေလိုသောကြောင့်ဖြစ်သည်။ (၁ ကောရိန္သု ၉:၁၈၊ သတင်းကောင်း; ၂ ကောရိန္သု ၁၂:၁၄) သို့သော် လုကာက ဤသို့ဖြည့်စွက်သည်– ‘သူနှင့်တကွ အိမ်သူအိမ်သားတို့သည် ဗတ္တိဇံမင်္ဂလာခံယူကြ၏။ ထို့နောက် လုဒိက “ကျွန်မသည် သခင်ဘုရားကိုအကယ်ပင် ယုံကြည်သူဖြစ်သည်ဟူ သင်တို့လက်ခံပါလျှင် ကျွန်မ၏အိမ်သို့ လာရောက်တည်းခိုကြပါ” ဟု ကျွန်ုပ်တို့အား မရမကဖိတ်ခေါ်လေသည်။’ (တမန်တော် ၁၆:၁၅၊ သတင်းကောင်း) လုဒိသည် ယေဟောဝါအပေါ် သစ္စာတည်ကြည်ရေးနှင့် ပတ်သက်၍ စိုးရိမ်မကင်းဖြစ်နေရာ ဧည့်ဝတ်ပြုဖို့ ဖိတ်ခေါ်ခြင်းက သူမ၏ယုံကြည်မှုအတွက် အထောက်အထားဖြစ်ကြောင်း ထင်ရှားသည်။ (၁ ပေတရု ၄:၉ နှိုင်းယှဉ်။) အလွန်ကောင်းသောပုံသက်သေပါတကား! ကျွန်ုပ်တို့လည်း မိမိတို့ပိုင်ဆိုင်ရာများကို သတင်းကောင်း၏အကျိုး တိုးပွားစေရန်အလို့ငှာ သုံးစွဲကြပါသလော။

ဖိလိပ္ပိမြို့ရှိ ညီအစ်ကိုများ

ပေါလုနှင့် သိလတို့သည် နတ်ဆိုးစွဲနေသော အစေခံမိန်းကလေးနှင့်ပတ်သက်သည့် ကိစ္စကြောင့် အကျဉ်းချခံရခြင်းမှ လွတ်မြောက်လာသောအခါ လုဒိအိမ်သို့ပြန်သွားကြရာ ထိုတွင် ညီအစ်ကိုတချို့ကို သူတို့တွေ့ခဲ့ကြသည်။ (တမန်တော် ၁၆:၄၀) တည်စဖိလိပ္ပိအသင်းတော်ရှိ ယုံကြည်သူများသည် လုဒိ၏အိမ်ကို ပုံမှန်စည်းဝေးရာနေရာအဖြစ် အသုံးပြုခဲ့ဖွယ်ရှိသည်။ သူမ၏အိမ်သည် ထိုမြို့တွင် သီအိုကရက်တစ်လှုပ်ရှားမှု၏ ဗဟိုဌာနတစ်ခု ဆက်ဖြစ်ခဲ့သည်ဟု ယူဆခြင်းသည် ယုတ္တိရှိပါသည်။

လုဒိ ဦးဦးဖျားဖျားတင်ပြခဲ့သည့် လှိုက်လှဲသော ဧည့်ဝတ်ကျေပွန်မှုသည် အသင်းတော်တစ်ခုလုံး၏ ပင်ကိုအရည်အသွေးတစ်ခုဖြစ်ကြောင်း ထင်ရှားသည်။ ဆင်းရဲနွမ်းပါးသည့်ကြားက ဖိလိပ္ပိအသင်းတော်သားများသည် ပေါလုလိုအပ်သည့်အရာများကို အကြိမ်ကြိမ်ပို့ပေးခဲ့ရာ ထိုတမန်တော် အလွန်ကျေးဇူးတင်ခဲ့သည်။—၂ ကောရိန္သု ၈:၁၊ ၂; ၁၁:၉; ဖိလိပ္ပိ ၄:၁၀၊ ၁၅၊ ၁၆။

စီ.အီး. ၆၀-၆၁ ခုနှစ်ခန့်တွင် ဖိလိပ္ပိအသင်းတော်သားများထံပေးပို့သော ပေါလု၏စာတွင် လုဒိအကြောင်းကို မဖော်ပြထားပါ။ ကျမ်းစာက တမန်တော်အခန်းကြီး ၁၆ တွင် စီကာပတ်ကုံးဖော်ပြထားသော အဖြစ်အပျက်များနောက် သူမ၏အဖြစ်သနစ်ကို မဖော်ပြပါ။ မည်သို့ပင်ဖြစ်ပါစေ အင်တိုက်အားတိုက် တက်တက်ကြွကြွရှိသော ဤအမျိုးသမီးနှင့်ပတ်သက်၍ အတိုချုပ်ဖော်ပြချက်က “ဧည့်သည်ဝတ်ကို ကြိုးစား၍ပြု” လိုစိတ် ကျွန်ုပ်တို့အား ပေါ်ပေါက်စေသည်။ (ရောမ ၁၂:၁၃) ကျွန်ုပ်တို့အလယ်တွင် လုဒိကဲ့သို့သော ခရစ်ယာန်များ ရှိနေခြင်းသည် အလွန်ကျေးဇူးတင်စရာပင်! သူတို့၏စိတ်ဓာတ်က အသင်းတော်များအား လှိုက်လှဲဖော်ရွေမှုကို များစွာဖြစ်စေပါသည်။ သို့အားဖြင့် ယေဟောဝါ ဘုရားသခင်ကို ဂုဏ်တင်ချီးမြှောက်ရာရောက်ပါသည်။

[အောက်ခြေမှတ်ချက်များ]

[စာမျက်နှာ ၂၈ ပါ လေးထောင့်ကွက်]

ဖိလိပ္ပိမြို့ရှိ ဂျူးတို့၏ဘဝ

ဂျူးများနှင့် ယုဒဘာသာသို့ ပြောင်းဝင်လာသူများအတွက် ဖိလိပ္ပိမြို့သားဘဝဖြစ်ရခြင်းမှာ မလွယ်ကူလှပါ။ ဂျူးဆန့်ကျင်ရေးစိတ်ဓာတ်ရှိခဲ့နိုင်ပြီး ပေါလု အလည်အပတ်မရောက်ရှိမီလေးတွင် ဧကရာဇ် ကလောဒိယပ်စ်က ဂျူးများကို ရောမမှ နှင်ထုတ်ခဲ့သည်။—တမန်တော် ၁၈:၂။

ပေါလုနှင့်သိလတို့သည် နတ်ဆိုးစွဲနေသော အစေခံမိန်းကလေးတစ်ယောက်ကို ကုသပေးပြီးနောက် တရားသူကြီးများရှေ့မှောက်သို့ ဆွဲခေါ်သွားခြင်းခံခဲ့ကြရကြောင်း သိသာသည်။ သူမ၏ပိုင်ရှင်သည် ယခုအခါတွင် ငွေဝင်လမ်းပိတ်သွားပြီဖြစ်ရာ “ဤသူတို့သည် ယုဒလူဖြစ်လျက် ငါတို့မြို့ကို နှောင့်ယှက်တတ်ပါ၏။ ရောမလူဖြစ်သောငါတို့သည် မခံမယူမကျင့်အပ်သော ဘာသာထုံးတမ်းများကို ဟောပြောသွန်သင်တတ်ပါ၏” ဟု အခိုင်အမာဆိုကာ နိုင်ငံသားချင်းတို့၏ စိတ်စွန်းကွက်မှုကို အကျိုးရှိရှိအသုံးချလိုက်သည်။ ရလဒ်အနေနှင့် ပေါလုနှင့် သိလတို့သည် တုတ်နှင့်အရိုက်ခံရကြပြီး ထောင်သွင်းအကျဉ်းချခံရကြသည်။ (တမန်တော် ၁၆:၁၆-၂၄) ဤကဲ့သို့သောအခြေအနေတွင် ဂျူးလူမျိုး၏ဘုရားသခင် ယေဟောဝါကို ပြောင်ပြောင်တင်းတင်းဝတ်ပြုဖို့အတွက် ရဲစွမ်းသတ္တိလိုသည်။ လုဒိမူ ဤသို့ကွဲပြားခြားနားနေခြင်းကို သဘောတူကြောင်း ထင်ရှားသည်။

[စာမျက်နှာ ၂၇ ပါ ရုပ်ပုံ]

ဖိလိပ္ပိမြို့ရှိအပျက်အယွင်းများ