ကိုယ်ကျင့်တရား ကောင်းမွန်သော ကလေးများကို ပြုစုပျိုးထောင်ခြင်း—ယင်းသည် ဖြစ်နိုင်သေးသလော

“ကျင့်ဝတ်တရား သတ်သတ်မှတ်မှတ်မရှိသည့် အလွန်ရှုပ်ထွေးနေသောလူ့ဘောင်၊ အလွန်ကွဲပြားမြားမြောင်လှသည့်အရာများ ပါဝင်သည့်ယဉ်ကျေးမှုတွင် ယခုကျွန်တော်တို့နေထိုင်နေကြသည်” ဟုကနေဒါ၊ အိုတာဝါရှိ မိသားစုအတွက် ဗဲန်နီယတက္ကသိုလ်မှ ရော်ဘတ်ဂလောစ်ဆိုပ်ကဆိုသည်။ ရလဒ်ကားအဘယ်နည်း။ သည်တိုရွန်တိုစတားသတင်းစာမှ သတင်းတစ်ပုဒ်က ဤသို့ဆိုထားသည်– “ဆယ်ကျော်သက်ကိုယ်ဝန်ဆောင်မှု၊ လူငယ်အကြမ်းဖက်မှု၊ ဆယ်ကျော်သက်ကိုယ့်ကိုယ်ကိုသတ်သေမှုတို့သည် အလွန်များပြားနေသည်။”

ထိုပြဿနာသည် မြောက်အမေရိကကိုကျော်လွန်၍ ကျယ်ပြန့်နေသည်။ အမေရိကန်နိုင်ငံ၊ ရို့ဒ်ကျွန်းရှိ ဘရောင်းတက္ကသိုလ်မှ လူသားဖွံ့ဖြိုးတိုးတက်မှုဌာနက ဒါရိုက်တာဘီးလ်ဒဲမန်သည် ဗြိတိန်နှင့် အခြားဥရောပနိုင်ငံများအပြင် ဩစတြေးလျ၊ အစ္စရေးနှင့် ဂျပန်နိုင်ငံတို့တွင် ဤပြဿနာကိုလေ့လာခဲ့သည်။ လူငယ်များအတွက် လမ်းညွှန်မှုနှင့်ပတ်သက်၍ ချာ့ချ်များ၊ ကျောင်းများနှင့် အခြားအဖွဲ့အစည်းများ၏ဆုတ်ယုတ်ကျဆင်းမှုကို သူညွှန်ပြသည်။ ကျွန်ုပ်တို့၏ယဉ်ကျေးမှုသည် “အကျင့်စရိုက်နှင့် အစွမ်းအစရှိရန် ကလေးများဖန်တီးယူနိုင်အောင် အဘယ်အရာလိုအပ်သည်ကို သတိမမူမိကြပါ” ဟုသူယုံကြည်သည်။ “ဆုံးမပဲ့ပြင်မှုသည် ကလေးများ၏ကျန်းမာရေးနှင့် ကောင်းစားရေးကို ထိခိုက်စေသည်” ဟုသွန်သင်သည့် မိဘရေးရာကျွမ်းကျင်သူများအဆိုကို ကိုးကားကာ ဒဲမန်က ယင်းအဆိုသည် “ဇွတ်တရွတ်နိုင်ပြီး နာခံမှုမရှိသောကလေးများဖြစ်ပေါ်ကြီးပြင်းလာစေသည့် ပုံသေနည်းတစ်ခု” ဖြစ်သည်ဟု အခိုင်အမာပြောဆိုသည်။

ယနေ့ လူငယ်များ၏ လိုအပ်ရာများကားအဘယ်နည်း။ သူတို့၏စိတ်နှလုံးကို ပြုပြင်ပေးဖို့ မေတ္တာပါသောလေ့ကျင့်သွန်သင်မှု အဆက်မပြတ်လိုအပ်သည်။ အသွင်မတူသောလူငယ်များသည် ကွဲပြားခြားနားသော ဆုံးမပဲ့ပြင်မှုများလိုအပ်သည်။ ချစ်ခြင်းမေတ္တာက လှုံ့ဆော်သောအခါ ဆုံးမပဲ့ပြင်ခြင်းသည် အကျိုးသင့်အကြောင်းသင့်သဘောဖြင့်ဖြစ်လေ့ရှိသည်။ ထို့ကြောင့် “ဆုံးမခြင်းကို . . . နားထောင်” ဖို့နယပုံပြင် ၈:၃၃ ၌ကျွန်ုပ်တို့ကို ပြောထားခြင်းဖြစ်သည်။ သို့သော် အချို့သူတို့သည် “စကားအားဖြင့်သာ . . . ဆုံးမ၍” မရချေ။ မနာခံမှုအတွက် သင့်တော်လျောက်ပတ်သည့်အတိုင်းအတာဖြင့် လျော်ကန်သောအပြစ်ပေးမှု လိုအပ်ပေမည်။ (သု. ၁၇:၁၀; ၂၃:၁၃၊ ၁၄; ၂၉:၁၉) ဤသို့ဆိုရာတွင် ကလေးတစ်ဦးအား ဒဏ်ရာရသည့်အထိအနာတရဖြစ်စေမည့် ဒေါသအမျက်ဖြင့်ကြိမ်လုံးနှင့်ရိုက်ခြင်း သို့မဟုတ် အလွန်အကျွံရိုက်ခြင်းကို ကျမ်းစာက ထောက်ခံနေခြင်းမဟုတ်ပါ။ (သု. ၁၆:၃၂) သို့အစား ကလေးတစ်ဦးသည် မိမိပဲ့ပြင်ခံရသည့်အကြောင်းရင်းကို နားလည်သင့်ပြီး မိဘသည် မိမိဘက်မှာရှိကြောင်းကို ခံစားစေသင့်သည်။—ဟေဗြဲ ၁၂:၆၊ ၁၁ နှိုင်းယှဉ်။

ဤလက်တွေ့ကျပြီး ကျိုးကြောင်းခိုင်လုံသော ကျမ်းဆိုင်ရာအကြံဉာဏ်ကို မိသားစုပျော်ရွှင်မှု၏လျှို့ဝှက်ချက်စာအုပ်တွင် ထင်ရှားပေါ်လွင်စေသည်။