ဘုရားသခင့်နိုင်ငံတော်ကြွေးကြော်သူများမှတ်တမ်း

ကွန်ဂိုဒီမိုကရက်တစ်သမ္မတနိုင်ငံရှိလူငယ်များ ဘုရားသခင်အားချီးမွမ်း

ရာစုနှစ်ပေါင်းများစွာက ဆာလံဆရာသည် ထာဝရဘုရင်ကိုချီးမွမ်းရန် လူငယ်များကို ဤသို့လှိုက်လှိုက်လှဲလှဲ ဖိတ်ခေါ်ခဲ့သည်– “လူပျိုနှင့်အပျိုများ၊ လူအိုနှင့်လူကလေးများတို့ ထာဝရဘုရားကိုချီးမွမ်းကြလော့။ နာမတော်တစ်ပါးတည်းသာလျှင်မြတ် . . . သောကြောင့်၊ ထာဝရဘုရား၏နာမတော်ကို ချီးမွမ်းကြစေ။” (ဆာလံ ၁၄၈:၁၂၊ ၁၃) ဤယှဉ်၍မရသောအခွင့်အရေးကို ကွန်ဂိုဒီမိုကရက်တစ်သမ္မတနိုင်ငံမှ အောက်ပါတွေ့ ကြုံမှုများက ပေါ်လွင်စေသည်။

• အထူးရှေ့ဆောင်တစ်ဦးငှားနေသော အိမ်ပိုင်ရှင်သည် ယေဟောဝါသက်သေများ၏ အမူအကျင့်ကို အလွန်သဘောကျမိသည်။ ထို့ကြောင့် မိမိ၏ငါးနှစ်အရွယ်သမီးဖီးဖီကို ကျမ်းစာသင်ပေးရန် သူခွင့်ပြုခဲ့သည်။ ကျွန်ုပ်၏ကျမ်းစာပုံပြင်စာအုပ်a ကိုလေ့လာရာတွင် ဖီးဖီ၏တိုးတက်မှုကိုသတိပြုမိပြီးနောက် သူမ၏ဖခင်က ဘုရားသခင့်နိုင်ငံတော်ခန်းမ၌ အစည်းအဝေးများကိုတက်ခွင့်ပေးသည်။ ထိုနေရာတွင် ဖီးဖီလေးသည် သက်သေခံများ၏သီချင်းစာအုပ်မှ ဘုရားသခင့်နိုင်ငံတော်သီချင်းများကို သင်ယူခဲ့သည်။ “ဘုရားကတိတော်ပရဒိသု” ဟူ၍ ခေါင်းစဉ်ရှိသော သီချင်းနံပါတ် ၄ ကိုသူမအထူးနှစ်သက်သည်။

တစ်နေ့တွင် ဖီးဖီ၏ဖခင်က သူ၏ချာ့ချ်သို့ သူမကိုခေါ်သွားရန် ဆုံးဖြတ်လေသည်။ ချာ့ချ်မှသီချင်းများကိုဆိုရန် ဖီးဖီငြင်းဆိုသည်ကို လူတိုင်းအံ့သြကြလေသည်။ အဘယ်ကြောင့်နည်း။ အကြောင်းမှာ သူမဖခင်၏ချာ့ချ်တွင် သီဆိုသောသီချင်းများသည် သမ္မာကျမ်းစာ၌ သူမလေ့လာခဲ့သည့်အရာများနှင့်မညီညွတ်ဟု ယူဆသောကြောင့်ပင်ဖြစ်သည်။ ယင်းကိုသီဆိုမည့်အစား သတ္တိရှိရှိနှင့် သူမအနှစ်သက်ဆုံး ဘုရားသခင့်နိုင်ငံတော်သီချင်းကိုဆိုလေသည်။

သူမ၏စိတ်ကိုပြောင်းလဲရန် အကြိမ်ကြိမ်ကြိုးစားရာ၌ မအောင်မြင်သည့်အခါ ချာ့ချ်ခေါင်းဆောင်များက ငါးနှစ်အရွယ်ဖီးဖီကို ကြဉ်လိုက်ရန် ဆုံးဖြတ်ကြလေသည်! ဤသို့မညှာမတာပြုကြသော်လည်း သူမ၏ဖခင်မှာ အေးဆေးတည်ငြိမ်စွာပင်နေသည်။ ဖီးဖီသည် သူမယုံကြည်သည့်အရာအတွက် ခိုင်မြဲစွာရပ်တည်ခဲ့သည်ကို သူဂုဏ်ယူပါသည်။ သူမ၏ဖခင်နှင့် မိခင်နှစ်ဦးစလုံးက မိမိတို့သမီးကို ယေဟောဝါသက်သေများနှင့် ဆက်လက်ပေါင်းသင်းစေလိုကြသည်။

• လူကိုဒီအမည်ရှိ ဆယ်ကျော်သက်သူငယ်တစ်ဦး ယေဟောဝါသက်သေများနှင့် သမ္မာကျမ်းစာလေ့လာဖို့ဆုံးဖြတ်သည့်အခါ သူ့ဖခင်က အကြီးအကျယ်အတိုက်အခံပြုလေသည်။ တစ်ကြိမ်တွင် လူကိုဒီသည် ဘုရားသခင့်နိုင်ငံတော်ခန်းမ၌ အစည်းအဝေးသွားတက်ဖို့ အသင့်ပြင်နေစဉ် သူ့ဖခင်ကသူ့ကို ဓားမနှင့်ခုတ်ဖို့ ခြိမ်းခြောက်လေသည်။ နောက်တစ်ကြိမ်တွင်မူ လူကိုဒီ၏နောက်ကျောတွင် နက်သောဒဏ်ရာတစ်ခုရသည့်အထိ ဖခင်ဖြစ်သူက တုတ်တစ်ချောင်းနှင့် ရိုက်နှက်ခဲ့သည်။ အပြင်းအထန်အတိုက်အခံပြုသည့်ကြားမှပင် လူကိုဒီသည် ယေဟောဝါသက်သေတစ်ဦးဖြစ်လာရန်ဟူသည့် သူ၏စိတ်ပိုင်းဖြတ်ချက်နှင့်အညီ မားမားမတ်မတ်ရပ်တည်ခဲ့သည်။ နှစ်ခြင်းခံသည့်အဆင့်သို့ ရောက်သည့်အထိ သူဆက်တိုးတက်လာသည်။ ယခုသူသည် မှန်မှန်ရှေ့ဆောင်တစ်ဦးအဖြစ် အမှုထမ်းနေပါသည်။

လူကိုဒီ၏ညီမငယ်ဆိုနာသည် အစ်ကိုဖြစ်သူ၏ရပ်တည်မှုကို မည်မျှစွဲမှတ်သွားသနည်းဟူမူ သူမလည်း ယေဟောဝါသက်သေများနှင့် သမ္မာကျမ်းစာကို စတင်လေ့လာတော့သည်။ သို့သော် သူတို့၏ဖခင်သည် လေ့လာမှုပြတ်တောက်ဖို့အတွက် သက်သေခံများမရှိသည့် အခြားကျေးရွာတစ်ခုတွင် ကျောင်းတက်ဖို့ သူမကိုပို့လိုက်သည်။ သို့ဖြစ်စေကာမူ ဆိုနာသည် သူမသင်ယူခဲ့သည့်အရာများအကြောင်း အခြားသူများအားပြောပြခြင်းကို အကျင့်တစ်ခုဖြစ်စေခဲ့သည်။ ရလဒ်မှာ သူမ၏ဝမ်းကွဲတစ်ဦးလည်း စိတ်ဝင်စားလာလေသည်။

ဆိုနာ၏ဟောပြောခြင်းလုပ်ငန်းအကြောင်း အနီးအနားရှိကျေးရွာမှ သက်သေခံများကကြားသိကြသောအခါ သူမထံသွားရောက်လည်ပတ်ကြပြီး အိမ်တွင်းကျမ်းစာသင်အံမှုတစ်ခု မှန်မှန်ပြုလုပ်နိုင်ဖို့ စီစဉ်ပေးကြသည်။ သူမသည် ဆက်၍တိုးတက်လာရာ မကြာမီ သူမအစ်ကိုကဲ့သို့ ဆက်ကပ်အပ်နှံ၊ နှစ်ခြင်းခံယူပြီးသည့် ယေဟောဝါသက်သေတစ်ဦးဖြစ်လာလေသည်။ ထို့အပြင် ယခုသူမ၏ဝမ်းကွဲသည် နှစ်ခြင်းမခံရသေးသော ကြေညာသူတစ်ဦးဖြစ်နေပြီး ထိုကျေးရွာ၌ စာအုပ်ကြီးသင်တန်းတစ်ခုကို ကျင်းပပေးလျက်ရှိသည်။

ယေဟောဝါ၏နာမတော်ကို ချီးမွမ်းရာတွင် လူငယ်များပါဝင်ကြသည့်အခါ မည်မျှကောင်းမွန်၍ အားသစ်လန်းဖွယ်ပါတကား!

[အောက်ခြေမှတ်ချက်များ]