“ငြိမ်းချမ်းတဲ့အသိုင်းအဝိုင်းရဲ့အရသာကို ကျွန်တော်ခံစားလိုက်ရ”
သက်သေခံများကို “ထောက်လှမ်း” ရန်ယေဟောဝါသက်သေများစီစဉ်ကျင်းပခဲ့သော စည်းဝေးကြီးတစ်ခုကို ဂျာမန်စကားပြောသည့်အမျိုးသားတစ်ဦး တက်ရောက်ခဲ့သည်။ အဘယ်ကြောင့်နည်း။ သူ၏ရည်ရွယ်ချက်မှာ “ဤဂိုဏ်းကိုမျက်နှာဖုံးခွာချပြီး သူ၏မိတ်ဆွေများကိုလမ်းလွဲခြင်းမှကယ်တင်” ရန်ဖြစ်သည်။ စည်းဝေးကြီးကိုတက်ရောက်ပြီးနောက် သူ၏မိတ်ဆွေများထံ အောက်ပါအတိုင်းစာရေးသားခဲ့သည်–
“စည်းဝေးကြီးကျင်းပရာနေရာကို ကျွန်တော်ချဉ်းကပ်သွားတဲ့အခါ ဒီနေရာဟာ နေရာမှန်မှဟုတ်ရဲ့လားလို့ စဉ်းစားမိခဲ့တယ်။ လူတစ်ယောက်ကိုမှမတွေ့ရဘူး၊ ကြမ်းပြင်ပေါ်မှာ အမှိုက်သရိုက်တွေ၊ ဘီယာဘူးခွံတွေမရှိဘူး။ ကျွန်တော်ပိုနီးလာတာနဲ့ အားကစားကွင်းရဲ့တံခါးဝမှာ လူရည်မွန်နှစ်ယောက်ကိုတွေ့ခဲ့ရတယ်။ သူတို့က ကျွန်တော့်ကိုနှုတ်ဆက်ပြီး အထဲဝင်ခွင့်ပေးကြတယ်။
“အဲဒီမှာလူထောင်နဲ့ချီရှိမှာမို့ ဆူညံနေမယ်လို့ထင်ခဲ့ပေမဲ့ တိတ်ဆိတ်နေတယ်။ ‘လူနည်းနည်းပဲလာပြီး ပြန့်ကျဲနေလို့ဖြစ်မယ်’ ဆိုပြီးကျွန်တော်ထင်လိုက်တယ်။
“အထဲကိုဝင်လိုက်တာနဲ့ စင်မြင့်ပေါ်မှာပြနေတဲ့ပြဇာတ်က ကျွန်တော့်အာရုံကို ချက်ချင်းဖမ်းစားခဲ့တယ်။ အားကစားကွင်းတစ်ခုလုံးမှာ အာရုံစိုက်နေတဲ့ ပရိသတ်ထောင်နဲ့ချီရှိပြီး ပြည့်နေတယ်ဆိုတာကို ခဏကြာတော့မှသတိထားမိခဲ့တယ်။ ငြိမ်းချမ်းတဲ့အသိုင်းအဝိုင်းရဲ့အရသာကို ကျွန်တော်ခံစားလိုက်ရတယ်။ ကျွန်တော်ကြားခဲ့၊ မြင်ခဲ့၊ ခံစားခဲ့ရတဲ့ ကျန်ရှိတဲ့စည်းဝေးကြီးအစီအစဉ်က ကျွန်တော့်ကိုအလွန်စွဲမှတ်စေခဲ့ပါတယ်။
“သက်သေခံတွေကြားမှာ သူတို့ရဲ့ပျော်ရွှင်တဲ့မျက်နှာထားတွေနဲ့ မေတ္တာပြည့်ဝတဲ့စကားတွေကို သတိမပြုမိဘဲ မနေနိုင်ဘူး။ ရုတ်တရက် ‘ဒီလူတွေဟာ တကယ့်ကိုဘုရားသခင့်လူတွေပါပဲ’ ဆိုတဲ့အတွေးကိုမထိန်းချုပ်နိုင်ခဲ့ဘူး။”
ထိုလူငယ်သည် ‘လမ်းလွဲသွားသောမိတ်ဆွေများအား ကယ်တင်’ မည့်အစား သူနှင့်ကျမ်းစာသင်အံမှုပြုလုပ်ဖို့ သူတို့ကိုတောင်းဆိုခဲ့သည်။ ရလဒ်ကားအဘယ်နည်း။ ယခု သူသည် ခရစ်ယာန်အကြီးအကဲတစ်ဦးဖြစ်နေပေပြီ။ သူနှင့် သူ၏မိသားစုသည် ဆွစ်ဇာလန်နိုင်ငံ၊ ဇာဂ်မြို့ရှိ အသင်းတော်များအနက် တစ်ခုတွင် တက်တက်ကြွကြွပါဝင်နေကြသည်။