ခရစ္စမတ်—အရှေ့တိုင်း၌ပင် အဘယ်ကြောင့်ကျင်းပကြ

အရှေ့တိုင်းမှ ရှေးယုံကြည်ချက်တစ်ခုသည် ခရစ္စမတ်၏စဲန်တာကလော့စ်ကို ပြန်ပြောင်းသတိရစေသည်။ ၎င်းမှာ ချိုဝမ်ရှင်းအမည်ရှိသူတစ်ဦးအပေါ် ကိုရီးယားတို့၏ယုံကြည်ချက်ဖြစ်ပြီး တရုတ်နှင့်ဂျပန်အချို့တွင်လည်း ထပ်တူယုံကြည်ချက်ရှိသည်။

ချိုဝမ်ရှင်းဟူသည် မီးဖိုချောင်ကိုတာဝန်ယူသောဘုရားတစ်ပါး၊ ရှေးခေတ်ကိုရီးယားမီးဝတ်ပြုမှုနှင့်ဆိုင်သော မီးဘုရားတစ်ပါးဟု ယူဆခဲ့ကြသည်။ (ရှေးအခါက ကိုရီးယားလူမျိုးသည် တောက်လောင်နေသော မီးသွေးခဲများကို ဘယ်သောအခါမျှမငြိမ်းစေရန် အသေအချာဂရုတစိုက်သယ်ယူပို့ဆောင်လေ့ရှိသည်။) ဤမီးဘုရားသည် တစ်နှစ်ပတ်လုံး မိသားစု၏နေထိုင်ပုံကို စောင့်ကြပ်ကြည့်ရှုပြီးနောက် မီးဖိုနှင့် မီးခိုးခေါင်းတိုင်မှတစ်ဆင့် ကောင်းကင်သို့တက်ကြွသွားသည်ဟု ယုံကြည်ကြ၏။

ချိုဝမ်ရှင်းသည် ဒီဇင်ဘာလ ၂၃ ရက်တွင် ကောင်းကင်ဘုရင်ထံ သတင်းပို့ရသည်ဟု ယူဆကြသည်။ သူသည် လူတစ်ဦးစီ၏ကျင့်ကြံပြုမူပုံနှင့်အညီ ဆုကျေးဇူးများနှင့် အပြစ်ဒဏ်များကို ယူဆောင်လျက် နှစ်ကုန်ပိုင်းတွင် မီးခိုးခေါင်းတိုင်နှင့် မီးဖိုမှတစ်ဆင့်ပြန်လာသည်ဟု ယူမှတ်ကြသည်။ သူပြန်လာသည့်နေ့၌ မိသားစုသည် မီးဖိုချောင်နှင့် တစ်အိမ်လုံးတွင် ဖယောင်းတိုင်များထွန်းညှိထားကြရသည်။ ထိုမီးဖိုချောင်ဘုရား၏ပုံမှာ စဲန်တာကလော့စ်နှင့် အခြားဆင်တူချက်တစ်ခုရှိပြန်သည်—အနီရောင်ဖြင့် သူ့ကိုသရုပ်ဖော်ကြ၏! ချွေးမဖြစ်သူသည် ကိုရီးယားရိုးရာခြေအိတ်တစ်စုံကိုထိုး၍ ဆောင်းယဉ်စွန်းချိန်တွင် ယောက္ခမဖြစ်သူကိုပေးရသည့်ထုံးစံရှိသည်။ ၎င်းနေ့နောက်ပိုင်းမှစ၍ နေ့တာရှည်လာသည်ဖြစ်ရာ ထိုသို့ပြုခြင်းဖြင့် ယောက္ခမဖြစ်သူအား အသက်ရှည်စေလိုသည့်ဆန္ဒကို ဖော်ပြရာရောက်သည်။

အဆိုပါအချက်များနှင့် ခရစ္စမတ် ဆင်တူသည့်အချက်အချို့ကို သင်မြင်သလော။ ၎င်းတို့တွင် မီးခိုးခေါင်းတိုင်၊ ဖယောင်းတိုင်များ၊ လက်ဆောင်ပေးခြင်း၊ ခြေအိတ်များ၊ အနီရောင်ဝတ်စုံဖြင့် အသက်ကြီးသူတစ်ဦးနှင့် ရက်စွဲစသည့် ဆင်တူသောပုံပြင်များနှင့် ထုံးစံများရှိသည်။ သို့သော် ကိုရီးယား၌ ခရစ္စမတ်ကို အလွယ်တကူလက်ခံကြခြင်းမှာ ၎င်းဆင်တူချက်များကြောင့်သာမဟုတ်ပါ။ ကိုရီးယားသို့ ခရစ္စမတ် ဦးဆုံးရောက်လာချိန်တွင် ချိုဝမ်ရှင်းယုံကြည်ချက်မှာ ကွယ်ပျောက်လုပြီ။ အမှန်မှာ၊ ၎င်းယုံကြည်ချက်ရှိခဲ့ဖူးကြောင်းကို ယနေ့ ကိုရီးယားလူမျိုးအများစု မသိကြချေ။

သို့သော်လည်း ယင်းက ဆောင်းယဉ်စွန်းချိန်နှင့်လည်းကောင်း၊ နှစ်အကုန်ပိုင်းနှင့်လည်းကောင်း ဆက်စပ်သည့် ဓလေ့ထုံးစံများသည် ကမ္ဘာတစ်ဝန်းသို့ နည်းအမျိုးမျိုးဖြင့် မည်သို့ပျံ့နှံ့ခဲ့ပုံကိုဖော်ပြသည်။ စီ.အီး. လေးရာစုတွင် ရောမအင်ပါယာ၌ ဩဇာလွှမ်းသောချာ့ချ်က အယူမှားရောမနေဘုရား၏ မွေးနေ့ပွဲဖြစ်သော စက်တာနေလီယာအမည်ကိုပြောင်း၍ ခရစ္စမတ်၏အစိတ်အပိုင်းဖြစ်စေခဲ့သည်။ ခရစ္စမတ်ပွဲခံခြင်းသည် ဒေသခံဓလေ့ထုံးစံများကို နာမည်အသစ်ဖြင့် ပြန်လိုက်စားခြင်းမျှသာဖြစ်သည်။ မည်သို့ဖြစ်နိုင်မည်နည်း။

လက်ဆောင်ပေးခြင်း အခန်းကဏ္ဍ

လက်ဆောင်ပေးခြင်းသည် တစ်ခါမျှပျောက်ကွယ်မသွားသည့် ထုံးတမ်းတစ်ခု ဖြစ်သည်။ ကိုရီးယားလူမျိုးသည် လက်ဆောင်ပေးခြင်းနှင့် ရယူခြင်းကို နှစ်ခြိုက်ခဲ့ကြသည်မှာ အတန်ကြာပေပြီ။ ယင်းက ကိုရီးယားတွင် ခရစ္စမတ်ပွဲကို လူကြိုက်များစေသည့် အကြောင်းရင်းတစ်ခုဖြစ်သည်။

ဒုတိယကမ္ဘာစစ်ပြီးနောက် ပြည်သူလူထုနှင့် ရင်းနှီးမှုနှောင်ကြိုးခိုင်မြဲစေလိုသည့် ကိုရီးယားတွင် တာဝန်ကျသော ယူ.အက်စ်. တပ်သားများသည် ချာ့ချ်များကို တွေ့ဆုံရာနေရာ၊ လက်ဆောင်များနှင့် ကယ်ဆယ်ရေးပစ္စည်းများ ဝေငှရာနေရာများအဖြစ် အသုံးပြုခဲ့ကြသည်။ အထူးသဖြင့် ခရစ္စမတ်နေ့တွင် ထိုသို့ပြုလုပ်လေ့ရှိကြသည်။ ကလေးငယ်များစွာသည် စပ်စပ်စုစုနှင့် ချာ့ချ်တက်ခဲ့ကြရာ ချောကလက်လက်ဆောင်များကို ပထမဆုံးအကြိမ်ရရှိခဲ့ကြသည်။ ၎င်းနောက် ထိုကလေးအများသည် လာမည့်ခရစ္စမတ်ကို စောင့်မျှော်ကြလေတော့သည်။

ထိုကလေးငယ်များအတွက် စဲန်တာကလော့စ်သည် အနီရောင်ခြေစွပ်ပုံဦးထုပ်ဆောင်းသော အမေရိကန်စစ်သားတစ်ဦးဖြစ်သည်။ နယပုံပြင် ၁၉:၆ က “လက်ဆောင်ပေးသောသူကို . . . လူတိုင်းမိတ်ဆွေဖွဲ့တတ်၏” ဟုဆိုသည်။ မှန်ပါသည်၊ လက်ဆောင်ပေးခြင်းသည် အလွန်ထိရောက်ကြောင်းထင်ရှား၏။ သို့သော် ထိုအခန်းငယ်မှသင်ကောက်ချက်ချနိုင်သည်မှာ ၎င်းလက်ဆောင်များက တည်မြဲသောမိတ်ဆွေအဖြစ်ကို အာမ,မခံနိုင်ခြင်းဖြစ်သည်။ ကိုရီးယား၌ပင် ချာ့ချ်ဟူသည် ငယ်စဉ်အခါက ချောကလက်အရသာခံခဲ့သောနေရာမျှဖြစ်သည်ဟု အမှတ်ရသူများစွာရှိသည်။ သို့သော် ခရစ္စမတ်ကိုမူ မမေ့ကြချေ။ ကိုရီးယားလူမျိုး၏စီးပွားရေးနှင့်အတူ ကူးသန်းရောင်းဝယ်မှုလည်း တစ်ရှိန်ထိုးတိုးတက်လာရာ ခရစ္စမတ်လက်ဆောင်ပေးခြင်းသည် ငွေကြေးသုံးစွဲမှုကိုမြှင့်တင်ပေးသည့် နည်းတစ်နည်းမျှသာဖြစ်သည်။ စီးပွားရေးလုပ်ငန်းများသည် အမြတ်တိုးများစေဖို့ ခရစ္စမတ်ကိုအသုံးချခဲ့ကြသည်။

ယင်းက မျက်မှောက်ခေတ် အရှေ့တိုင်းရှိခရစ္စမတ်ကို ထိုးထွင်းသိမြင်စေသည်။ ခရစ္စမတ်တွင် တပျော်တပါးသုံးဖြုန်းဝယ်ခြမ်းကြခြင်းကို ချိန်ရွယ်လျက် ပစ္စည်းအသစ်အဆန်းများထုတ်လုပ်တတ်ကြသည်။ နွေအလယ်ပိုင်းလောက်တွင် ကြော်ငြာအစီအစဉ်များစတင်သည်။ ခရစ္စမတ်လက်ဆောင်များ၊ ကတ်များနှင့် တိတ်ခွေများ ဝယ်ယူမှုများကြောင့် နှစ်အကုန်တွင် အရောင်းပမာဏမှာ အမြင့်ဆုံးဖြစ်လေသည်။ အိမ်တွင်နေ၍ ခရစ္စမတ်အကြိုနေ့၌ မည်သည့်လက်ဆောင်မျှမရရှိလျှင် ကြော်ငြာများက သာမန်လူငယ်တို့ကို စိတ်ဆင်းရဲစေနိုင်ပေသည်!

ခရစ္စမတ်နေ့နီးလာသည်နှင့်အမျှ ဆိုးလ်မြို့ရှိစတိုးဆိုင်များ၊ လေဟာပြင်ဈေးများတွင် လက်ဆောင်ဝယ်သူများဖြင့် ပြည့်နှက်လျက်ရှိရာ အရှေ့တိုင်းမှအခြားမြို့များ၌လည်း ထိုနည်းတူဖြစ်သည်။ ယာဉ်ကြောပိတ်ဆို့မှုများရှိသည်။ ဟိုတယ်များ၊ စီးပွားရေးရပ်ကွက်များ၊ ပျော်ပွဲစားရုံများနှင့် နိုက်ကလပ်များမှာ ဖောက်သည်များဖြင့် ကြိတ်ကြိတ်တိုးလျက်ရှိသည်။ သောက်စားပျော်ပါး—ကျယ်လောင်စွာသီဆို—သံကိုကြားနိုင်သည်။ ခရစ္စမတ်အကြိုနေ့တွင် အမှိုက်သရိုက်များပြန့်ကြဲနေသောလမ်းများပေါ်ဝယ် အရက်မူးသူအမျိုးသား၊ အမျိုးသမီးများ သွားလာလှုပ်ရှားနေကြသည်ကိုတွေ့ရသည်။

ထိုသို့ပင်ဖြစ်နေသည်။ အရှေ့တိုင်းမှခရစ္စမတ်သည် ခရစ်ယာန်အမည်ခံသူတို့၏ အားလပ်ရက်တစ်ခုမျှသာမဟုတ်တော့ပါ။ အခြားနေရာများ၌ကဲ့သို့ ကိုရီးယားတွင် ကူးသန်းရောင်းဝယ်မှုသည် ရှေ့တန်းမှနေ၍ ခရစ်ယာန်ဘောင်၏ ဤအားလပ်ရက်ကို အမြတ်ထုတ်ယူနေကြောင်း ထင်ရှားသည်။ သို့ဖြစ်၍ ခရစ္စမတ်သည် ခရစ်တော်၏စိတ်ဓာတ်နှင့် လုံးဝမညီညွတ်တော့ခြင်းသည် ကူးသန်းရောင်းဝယ်မှုတစ်ခုတည်းကြောင့်သာလော။ ပါဝင်ပတ်သက်နေသော အရေးပါကိစ္စရပ်ကို ခရစ်ယာန်စစ်များ နှိုက်နှိုက်ချွတ်ချွတ်ဆန်းစစ်ဖို့လိုသည်။

ခရစ္စမတ်၏မူလအစ

တိရစ္ဆာန်ရုံရှိလှောင်အိမ်အတွင်းသို့ ပြောင်းရွှေ့ခံရသော တိရစ္ဆာန်အရိုင်းတစ်ကောင်သည် သားရဲတစ်ကောင်ဖြစ်ဆဲပင်။ လှောင်အိမ်အတွင်း၌ အခိုက်အတန့်ရှိနေပြီး ယင်း၏သားငယ်များနှင့် ပျော်ရွှင်နေသည်ဟုထင်ရရုံဖြင့် ယဉ်ပါးနေပြီဟုယူမှတ်ခြင်းသည် အမှားကြီးမှားပေလိမ့်မည်။ တိရစ္ဆာန်ရုံလုပ်သားများ တိုက်ခိုက်ခံရသည့်သတင်းများကို သင်ကြားဖူးပေမည်။

ခရစ္စမတ်ပွဲခံခြင်းနှင့်ပတ်သက်၍ အလားတူ တစ်နည်းအားဖြင့် ပြောဆိုနိုင်သည်။ အစပိုင်းတွင် ၎င်းသည် ခရစ်ယာန်ဘာသာပြင်ပရှိ “သားရဲ” တစ်ကောင်ဖြစ်သည်။ “ရောမစက်တာနေလီယာပွဲနှင့်စပ်လျဉ်း၍” ဟူသောခေါင်းစဉ်ငယ်အောက်တွင် ခရစ္စမတ်နှင့်ပတ်သက်၍ ခရစ်ယာန်စွယ်စုံကျမ်း (ကိုရီးယန်းဘာသာဖြင့်)a က ဤသို့ဖော်ပြသည်–

“အယူမှားစက်တာနေလီယာပွဲနှင့် ဘရူမေလီယာပွဲတို့သည် လူကြိုက်များပြီး အမြစ်စွဲနေသောဓလေ့ထုံးစံဖြစ်ခဲ့ရာ ခရစ်ယာန်သြဇာလွှမ်းမိုးမှုဖြင့် မဖယ်ရှားနိုင်ခဲ့ကြချေ။ ဧကရာဇ်ကွန်စတင်တိုင်းက တနင်္ဂနွေနေ့ (ဖီးဘစ်နှင့် မိသ်ရစ်နေ့အပြင် သခင်အရှင်၏နေ့) ကို အသိအမှတ်ပြုခဲ့ခြင်းက . . . ဘုရားသခင့်သားတော်၏မွေးနေ့ကို နေ၏မွေးနေ့နှင့် တစ်ထပ်တည်းပြုလုပ်ဖို့ သင့်တော်သည်ဟု လေးရာစုမှခရစ်ယာန်များကို ယူမှတ်စေခဲ့ပေမည်။ အထိန်းအကွပ်မဲ့အပျော်ကြူး၍ ပျော်ပွဲနွှဲကြသည့် ထိုအယူမှားပွဲများကို အလွန်လူကြိုက်များခဲ့ရာ ခရစ်ယာန်များသည် လွယ်လွယ်နှင့်ဆင်ခြေပေးကာ ယင်းကိုမူလသဘောထား သို့မဟုတ် ပွဲခံပုံအတိုင်း မပြောင်းမလဲ ဆက်ကျင်းပကြသည်။”

ထိုသို့သောအခြေအနေသည် ဆန့်ကျင်မှုတစ်စုံတစ်ရာမျှမရှိဘဲ ဖြစ်ပေါ်လာနိုင်သည်ဟု သင်ထင်သလော။ ၎င်းစွယ်စုံကျမ်းကပင် ဤသို့ဆိုသည်– “အနောက်နှင့် အရှေ့တိုင်းအနီးရှိ ခရစ်ယာန်တရားဟောပြောသူများက ခရစ်တော်၏မွေးနေ့ကို မလျောက်ပတ်စွာ ဤသို့ပေါ့ပေါ့တန်တန်ကျင်းပခြင်းကို ကန့်ကွက်ကြစဉ် ဤအယူမှားပွဲကို ခရစ်ယာန်ပွဲအဖြစ်လက်ခံခြင်းကြောင့် မက်ဆိုပိုတေးမီးယားမှခရစ်ယာန်များက အနောက်တိုင်းမှညီအစ်ကိုများကို ရုပ်ပုံနှင့်နေကိုကိုးကွယ်သည်ဟု စွပ်စွဲခဲ့ကြသည်။” အမှန်ဆိုလျှင် အစကတည်းက တစ်စုံတစ်ရာ လွဲမှားနေသည်။ စွယ်စုံကျမ်းက ဤသို့ဖော်ပြသည်– “သို့တိုင် ထိုပွဲကိုလူအများလက်ခံလာကြ၍ နောက်ဆုံးတွင် အလွန်အမြစ်စွဲလာခဲ့ရာ ဆယ့်ခြောက်ရာစုတွင်ဖြစ်ပွားခဲ့သည့် ပရိုတက်စတင့်တော်လှန်ရေးကပင် ယင်းကိုမဖယ်ရှားနိုင်ခဲ့ပေ။”

မှန်ပါသည်၊ ခရစ်ယာန်ဘာသာတရားအစစ်နှင့်မဆိုင်သော နေဘုရား၏ပွဲကို ဩဇာလွှမ်းသောချာ့ချ်က လက်ခံလိုက်သည်။ အမည်အသစ်ရရှိသည့်တိုင်—အယူမှားလုပ်ရိုးလုပ်စဉ်မူ ကျန်ရစ်ခဲ့သည်။ ယင်းက အမည်ခံခရစ်ယာန်ချာ့ချ်များအတွင်းသို့ အယူမှားဝါဒကိုရောပြွမ်းစေရန်နှင့် လူတို့၏ဝိညာဉ်ရေးကို ပျက်ယွင်းစေရန် ထောက်ကူပေးခဲ့သည်။ ခရစ်ယာန်ဘောင်ထွက်ပေါ်လာသည်နှင့် ‘ရန်သူတို့ကိုချစ်’ ရမည်ဟူသော ကနဦးစိတ်ထားအစား အကျင့်ပျက်ပြားမှုများနှင့် အကြမ်းဖက်စစ်ပွဲများကနေရာယူလာကြောင်း သမိုင်းကထောက်ခံသည်။

အတန်ကြာသော် ခရစ္စမတ်ဟူသော အမည်အတုရထားသော်လည်း ၎င်း၏ ဆူညံပျော်မြူးခြင်း၊ သောက်ကြူးခြင်း၊ ပျော်ပွဲရွှင်ပွဲလုပ်ခြင်း၊ ကခုန်ခြင်း၊ လက်ဆောင်ပေးခြင်းနှင့် အမြဲစိမ်းပင်များဖြင့် အိမ်ကိုတန်ဆာဆင်ခြင်းတို့ကြောင့် အယူမှားကိုမြစ်ဖြားခံကြောင်း ထင်ရှားသည်။ ကူးသန်းရောင်းဝယ်ရေး၏အဓိကပန်းတိုင်—ပို၍အရောင်းစွံခြင်း—အတွက် ခရစ္စမတ်သည် နည်းအမျိုးမျိုးဖြင့် ခေါင်းပုံဖြတ်ခံခဲ့ရပြီ။ လူထုဆက်သွယ်ရေးလမ်းကြောင်းက ယင်းကို အမွှမ်းတင်သည်; လူထုမူကား သဘောကျနေကြသည်။ အတွင်းခံအဝတ်အစားများကို အထူးရောင်းချသော ဆိုးလ်မြို့လယ်မှ စတိုးဆိုင်တစ်ဆိုင်သည် ယင်း၏မှန်ပြတင်း၌ အတွင်းခံများနှင့်သာဆင်ယင်ထားသော ခရစ္စမတ်သစ်ပင်ကိုပြသထားရာ ရုပ်မြင်သံကြားသတင်းတစ်ရပ်ဖြစ်လာသည်။ ခရစ္စမတ်စိတ်ဓာတ်လွှမ်းမိုးထင်ရှားသော်လည်း ခရစ်တော်ကိုကြိုဆိုသည့်လက္ခဏာတစ်စုံတစ်ခုမျှ မတွေ့ရချေ။

ခရစ္စမတ်ကိုကျမ်းစာဖြင့်ထိုးထွင်းသိမြင်ခြင်း

ဤသမိုင်းနောက်ခံနှင့် အခြေအနေသစ်များမှ အဘယ်အရာကိုသိရှိကြရသနည်း။ ရှပ်အင်္ကျီ သို့မဟုတ် ဘလောက်စ်အင်္ကျီကြယ်သီးကို မညီမညာတပ်ထားမိလျှင် ပြန်ညီစေနိုင်သည့် တစ်ခုတည်းသောနည်းမှာ အစမှပြန်စတပ်ဖို့ဖြစ်သည်။ မမှန်ပေလော။ ၎င်းသည်မှန်သော်လည်း နေကိုးကွယ်မှုအယူမှားရင်းမြစ်များမှဖြစ်သော ခရစ္စမတ်ကို ခရစ်ယာန်ဘောင်က လက်ခံထားပြီးပြီဟု အချို့ကဆင်ခြေပေးကြသည်။ ထို့ကြောင့် ၎င်းပွဲနေ့သည် ခရစ်တော်၏မွေးနေ့အဖြစ် စင်ကြယ်ခံရပြီး အဓိပ္ပာယ်အသစ်ရှိနေသည်ဟု သူတို့ယူဆကြသည်။

ရှေးခေတ်ယုဒနိုင်ငံ၌ဖြစ်ပျက်ခဲ့သော သမိုင်းဝင်အဖြစ်အပျက်တစ်ခုမှ အဖိုးတန်သင်ခန်းစာတစ်ခုကို သင်ယူနိုင်သည်။ ဘီ.စီ.အီး. ၆၁၂ တွင် ယုဒလူမျိုးသည် ယေရုရှလင်မြို့ရှိဗိမာန်တော်အတွင်းသို့ နေကိုးကွယ်သည့်အယူမှားဝတ်ပြုမှုကို သွတ်သွင်းခဲ့သည်။ ယေဟောဝါဘုရားသခင်၏ သန့်ရှင်းသောဝတ်ပြုရေးအတွက် သီးသန့်ထားသောနေရာအတွင်းသို့ ၎င်းအယူမှားဝတ်ပြုမှုကို ယူဆောင်လာခဲ့ခြင်းအားဖြင့် ၎င်းသည် စင်ကြယ်သွားသလော။ ယေရုရှလင်ဗိမာန်တော်တွင် နေဝတ်ပြုခြင်းနှင့်စပ်လျဉ်း၍ ကျမ်းရေးသူယေဇကျေလက ဤသို့ရေးသားခဲ့သည်– “ဗိမာန်တော်တံခါးဝ၊ ဗိမာန်တော်ဦးနှင့်ယဇ်ပလ္လင်ကြားမှာ လူနှစ်ကျိပ်ငါးယောက်တို့သည် . . . အရှေ့သို့မျက်နှာပြုလျက် အရှေ့မျက်နှာ၌နေကိုကိုးကွယ်ကြ၏။ တစ်ဖန်တုံ၊ ‘အချင်းလူသား၊ ထိုအမှုကိုမြင်ပြီလော။ ယုဒအမျိုးသည် ဤအရပ်၌ စက်ဆုပ်ရွံရှာဖွယ်အမှုတို့ကိုပြုသောအပြစ် ပေါ့သလော။ သူတို့သည် အဓမ္မအမှုဖြင့် တစ်ပြည်လုံးကိုပြည့်စေ၍ ငါ၏အမျက်ကို အထပ်ထပ်နှိုးဆော်ကြပြီ။ သစ်ခက်ကိုလည်း မိမိတို့နှာခေါင်းဝ၌ကပ်၍ကိုင်ကြ၏။’ ”—ယေဇကျေလ ၈:၁၆၊ ၁၇။

မှန်ပါသည်၊ ထိုအယူမှားဝတ်ပြုပုံသည် သန့်စင်ခံရမည့်အစား ဗိမာန်တော်တစ်ခုလုံးကို အန္တရာယ်ကျရောက်စေခဲ့သည်။ ယုဒနိုင်ငံထဲသို့ ထိုအလေ့အထစိမ့်ဝင်ခဲ့ပြီး အကြမ်းဖက်မှုနှင့် အကျင့်ယိုယွင်းမှုတို့ ပျံ့နှံ့ခဲ့သည်။ ခရစ်ယာန်ဘောင်၌လည်း အလားတူပင်၊ နေကိုးကွယ်သော စက်တာနေလီယာပွဲကို အရင်းခံသည့်အကျင့်များသည် ခရစ္စမတ်အချိန်တွင် ရှေ့တန်းသို့ရောက်လာ၏။ ထိုအဆင်းအာရုံကို ယေဇကျေလရရှိ၍ နှစ်အနည်းငယ်အကြာတွင် ယေရုရှလင်မြို့သည် ဘုရားသခင်၏တရားစီရင်ခြင်း—ဗာဗုလုန်လူမျိုးတို့၏လက်ဖြင့် ဖျက်ဆီးခြင်း—ကိုခံခဲ့ရကြောင်း ထင်ရှားသည်။—၂ ရာဇဝင်ချုပ် ၃၆:၁၅-၂၀။

ရှေ့ဆောင်းပါး၌ဖော်ပြထားသော သူငယ်ယေရှုနှင့်ပတ်သက်သည့် ကိုရီးယားပညာရှင်တစ်ဦး၏ ဖော်ပြချက်ကို သင်သဘောကျပေမည်။ သို့သော် အမှန်ဆိုလျှင် ခရစ်တော်နှင့်ဆိုင်သော တိကျမှန်ကန်သည့်အသိပညာမရှိသူတစ်ဦး၏ ထွက်ဆိုချက်ဖြစ်ခြင်းကြောင့် ထိုတုံ့ပြန်မှုသည် အတော်အတန်အရေးပါသည်။ ၎င်းသည် ခရစ္စမတ်ကျင်းပကြသူများ အလေးအနက်တွေးတောစရာဖြစ်သည်။ အဘယ်ကြောင့်နည်း။ အကြောင်းမှာ ခရစ္စမတ်သည် ခရစ်တော်ကိုမှန်ကန်စွာကိုယ်စားပြုခြင်း လုံးဝမဟုတ်ပါ။ အမှန်မှာ၊ ကိုယ်တော်၏လက်ရှိရပ်တည်ချက်အမှန်ကို ဖုံးကွယ်သည်။ ယေရှုသည် နွားစားခွက်ထဲရှိ ကလေးငယ်တစ်ဦး မဟုတ်တော့ပေ။

ယခု ယေရှုသည် ဘုရားသခင့်ကောင်းကင်နိုင်ငံတော်၏ တန်ခိုးကြီးမားသောဘုရင် မေရှိယသခင်ဖြစ်ကြောင်း သမ္မာကျမ်းစာက ကြိမ်ဖန်များစွာဖော်ပြသည်။ (ဗျာဒိတ် ၁၁:၁၅) ခရစ္စမတ်ရာသီအတွင်း လှူဒါန်းကြချိန်တွင် အချို့သူတို့ မေ့လျော့မသွားသည့် ဆင်းရဲခြင်းနှင့် စိတ်ဆင်းရဲစရာတို့ကို ကိုယ်တော်အဆုံးတိုင်စေဖို့ အသင့်ရှိနေပေပြီ။

ပွင့်ပွင့်လင်းလင်းပြောရလျှင် ခရစ္စမတ်သည် ခရစ်ယာန်ဘောင်နိုင်ငံများကိုဖြစ်စေ၊ အရှေ့တိုင်းမှ အခြားနိုင်ငံများကိုဖြစ်စေ အကျိုးမပြုခဲ့ချေ။ ယင်းအစား ဘုရားသခင့်နိုင်ငံတော်နှင့် . . . အစီအစဉ်စနစ်၏အဆုံးတို့နှင့်ပတ်သက်သော ခရစ်ယာန်သတင်းတရားအစစ်အမှန်မှ လူတို့ကိုအာရုံလွဲစေခဲ့ပြီ။ (မဿဲ ၂၄:၁၄) ထိုအဆုံးသည် မည်သို့ရောက်ရှိလာမည်နှင့်ပတ်သက်၍ ယေဟောဝါသက်သေများကိုမေးမြန်းဖို့ သင့်အားကျွန်ုပ်တို့ဖိတ်ခေါ်ပါသည်။ မြေကြီးသည် ဘုရားသခင့်နိုင်ငံတော်နှင့် နန်းထိုင်ဘုရင် ယေရှုခရစ်၏ညွှန်ကြားမှုအောက်ရောက်ရှိသည့်အခါ ခံစားရမည့်ထာဝရကောင်းချီးများအကြောင်း သူတို့ထံမှသင်ယူနိုင်ပါသည်။—ဗျာဒိတ် ၂၁:၃၊ ၄။

[အောက်ခြေမှတ်ချက်များ]

[စာမျက်နှာ ပါ အကျဉ်းဖော်ပြချက်]

ခရစ္စမတ်သည် အမည်ခံခရစ်ယာန်ချာ့ချ်များအတွင်းအယူမှားဝါဒကိုရောပြွမ်းလာစေရန်ထောက်ကူခဲ့

[စာမျက်နှာ ၅ ပါ ရုပ်ပုံ]

ကလေးငယ်များစွာသည် စပ်စပ်စုစုနှင့် ချာ့ချ်တက်ခဲ့ကြရာ ထိုတွင် ချောကလက်လက်ဆောင်များရရှိခဲ့ကြသည်။၎င်းနောက် လာမည့်ခရစ္စမတ်ကိုသူတို့စောင့်မျှော်ကြတော့သည်

[စာမျက်နှာ ၇ ပါ ရုပ်ပုံ]

ကိုရီးယားနိုင်ငံ၊ ဆိုးလ်မြို့လယ်ခေါင်မှ ခရစ္စမတ်အကြိုနေ့

[စာမျက်နှာ ၈ ပါ ရုပ်ပုံ]

ခရစ်တော်သည် ကလေးငယ်မဟုတ်တော့ဘဲဘုရားသခင့်နိုင်ငံတော်၏တန်ခိုးကြီးဘုရင်ဖြစ်နေပေပြီ