ဘာသာတရားက ကမ္ဘာ့ငြိမ်းချမ်းရေးကို ဆောင်ကြဉ်းပေးမည်လော
၂၀၀၀ ပြည့်နှစ်၊ ဩဂုတ်လ ၂၈ မှ ၃၁ အထိ နိုင်ငံပေါင်း ၇၃ နိုင်ငံမှ ကိုယ်စားလှယ် ၅၀၀ ကျော်သည် နယူးယောက်မြို့၌ ဆုံစည်းခဲ့ကြ၏။ သူတို့သည် “ဘာသာရေးနှင့် ဝိညာဉ်ရေးခေါင်းဆောင်များ၏ အနှစ်တစ်ထောင်ကမ္ဘာ့ငြိမ်းချမ်းရေး ထိပ်သီးအစည်းအဝေး” အတွက် ယူအဲန်တွင် အတူတကွဆုံတွေ့ခဲ့ကြခြင်းဖြစ်သည်။ ထိုခေါင်းဆောင်များ—ခေါင်းပေါင်းများ၊ . . . ရောင်ဝတ်ရုံများ၊ ငှက်မွေးတောင်ဦးထုပ်များ သို့မဟုတ် ရှည်လျားသောအနက်ရောင်ဝတ်ရုံလွှာများ ဝတ်ဆင်ထားကြသူများ—သည် ယုံကြည်ချက် များစွာတို့ကို ကိုယ်စားပြုခဲ့ကြသည်။ ၎င်းတို့တွင် ခရစ်ယာန်ဘောင် ဘာသာတရားများ၊ ဂျိန်းဘာသာ၊ ဂျူးဘာသာ၊ ဆစ်ခ်ဘာသာ၊ ဇိုရိုအက်စ်ထရီယန်ဘာသာ၊ တာအိုဘာသာ၊ ဗဟိုင်းဘာသာ၊ . . . ရှင်တိုဘာသာ၊ ဟိန္ဒူဘာသာနှင့် အစ္စလာမ်ဘာသာတို့ပါဝင်ခဲ့သည်။
ထိုလေးရက်တာဆွေးနွေးပွဲအတွက် ပထမနှစ်ရက်၌ ကိုယ်စားလှယ်များသည် ယူအဲန်တွင် တွေ့ဆုံခဲ့ကြ၏။ သို့သော် ၎င်းဆွေးနွေးပွဲကို ယူအဲန်က စီစဉ်ဆောင်ရွက် ငွေကြေးပံ့ပိုးသည်မဟုတ်ဘဲ အသင်းအဖွဲ့အသီးသီးက စီစဉ်ခဲ့ခြင်းဖြစ်သည်။ မည်သို့ပင်ဖြစ်စေ ယူအဲန်နှင့် ဘာသာရေးခေါင်းဆောင် နှစ်ရပ်စလုံးက ဆင်းရဲမှု၊ လူမျိုးရေးစိတ်ဓာတ်၊ ပတ်ဝန်းကျင်ပြဿနာများ၊ စစ်မက်နှင့် အလုံးအရင်းလိုက်ဖျက်ဆီးရန် အသုံးပြုသောလက်နက်များ အဆုံးသတ်ရေးကို အတူတကွဆောင်ကျဉ်းပေးကြခြင်း၏ အရေးပါမှုအကြောင်း ပြောဆိုဆွေးနွေးခဲ့ကြသည်။
ကိုယ်စားလှယ်များသည် “ကမ္ဘာနှင့်အဝန်း ငြိမ်းချမ်းရေး ကတိကဝတ်” ခေါင်းစဉ်တပ်ထားသော စာချုပ်တစ်ခုကို လက်မှတ်ရေးထိုးခဲ့ကြသည်။ အကြမ်းဖက်မှုနှင့် စစ်မှုကို “တစ်ခါတစ်ရံ ဘာသာရေးအမည်ဖြင့် ပြုလုပ်ခဲ့ကြခြင်း” ကို အသိအမှတ်ပြုကြစဉ် အဆိုပါစာချုပ်က လက်မှတ်ရေးထိုးသူတို့သည် “ငြိမ်းချမ်းရေးကိုအမီလိုက်ရန် . . . ယူအဲန်နှင့်ပူးပေါင်းလုပ်ဆောင်ကြရ” လိမ့်မည်ဖြစ်ကြောင်း ကြေညာခဲ့သည်။ သို့သော် ၎င်းကို မည်သို့မည်ပုံပြီးမြောက်စေမည်အကြောင်း ပြညွှန်သည့် ယတိပြတ်ဆုံးဖြတ်ချက်များ အတိအကျမရှိခဲ့ချေ။
ဒုတိယနေ့တွင် ထိပ်သီးအစည်းအဝေး၏ အထွေထွေအတွင်းရေးမှူးဖြစ်သူ ဘာဝါ ဂျင်းက သူ၏အဖွင့်ပြောဆိုချက်၏နိဂုံးချုပ်၌ အစောပိုင်းနှစ်အနည်းငယ်က ယူအဲန်တွင် ဆွဲထားသောပုံတစ်ပုံကို သူသတိပြုမိခဲ့ကြောင်း ရှင်းပြခဲ့သည်။ အဆိုပါရုပ်ပုံက ယူအဲန်၏အထွေထွေအဆောက်အဦထက် သာ၍မြင့်သောလူတစ်ဦးကို ပုံဖော်ထားသည်။ သူသည် အဆောက်အဦကို တံခါးတစ်ချပ်အလား ခေါက်နေသည်။ ရုပ်ပုံ၏အောက်ဘက်စာတန်းတွင် ဤသို့ဆိုသည်– “ငြိမ်သက်ခြင်းမင်းသား။” မစ္စတာ ဂျင်း ကဤသို့ပြောခဲ့သည်– “[အဆိုပါရုပ်ပုံ] ကိုတွေ့တွေ့ချင်းမှာပဲ ကျွန်တော်ဟာ နက်နက်နဲနဲခံစားမိတယ်။ [၎င်း] ရဲ့ဆိုလိုရင်းနဲ့ပတ်သက်လို့ တစ်ယောက်ပြီးတစ်ယောက်ကို မေးကြည့်ခဲ့တယ်။ ဒီနေ့တော့ အဖြေရပြီလို့ ထင်တယ်။ ကမ္ဘာ့ဝိညာဉ်ရေးနဲ့ ဘာသာရေးခေါင်းဆောင်တွေဖြစ်တဲ့ သင်တို့အားလုံး ဒီနေရာမှာစုရုံးလာကြတာဟာ ယူအဲန်ရဲ့တံခါးရှေ့မှာ ငြိမ်သက်ခြင်းမင်းသားက တံခါးခေါက်နေတာပါပဲ။”
သမ္မာကျမ်းစာက ခြားနားသောရှုမြင်ချက်တစ်ရပ်ကို ဖော်ပြပေးသည်။ ၎င်းက ငြိမ်သက်ခြင်းမင်းသားသည် ယေရှုခရစ်ဖြစ်ကြောင်း ဖော်ပြ၏။ ကိုယ်တော်သည် ဤလောကရှိနိုင်ငံရေး သို့မဟုတ် ဘာသာရေးခေါင်းဆောင်များ၏ ကြိုးပမ်းအားထုတ်မှုဖြင့်မဟုတ်ဘဲ ဘုရားသခင့်နိုင်ငံတော်အားဖြင့် ကမ္ဘာတစ်ဝန်းတွင် ငြိမ်သက်ခြင်း ဆောင်ကြဉ်းပေးတော်မူလိမ့်မည်။ ဤနိုင်ငံတော်ဖြစ်သော ဘုရားသခင့်ကောင်းကင်အစိုးရသည် နာခံမှုရှိသည့်လူသားများကို အောင်မြင်စွာစည်းလုံးစေမည်ဖြစ်ပြီး ဘုရားသခင့်အလိုတော်ကို မြေကြီးပေါ်မှာပြည့်စုံစေပေလိမ့်မည်။—ဟေရှာယ ၉:၆; မဿဲ ၆:၉၊ ၁၀။